ಫಾಟ್ಲ್ಯಾ 25 ವರ್ಸಾಂ ಥಾವ್ನ್ ಹಾಂವ್ ಕೊಂಕ್ಣಿ ಸಾಹಿತಿಕ್
ವಾವ್ರಾಂತ್ ಕಾರ್ಯಾಳ್ ಜಾವ್ನಾಸಾ. ಆನಿ ಹ್ಯಾ ದಿಶೆನ್
ಹಾಂವೆ ಸರಿಸುಮಾರ್ ಚಾಳಿಸ್ ಕಾಣ್ಯೊ ಆನಿ ತಿನ್ಶ್ಯಾ ವಯ್ರ್
ಕವಿತಾ ಕೊಂಕ್ಣೆಚೆಂ ಭಂಡಾರ್ ವಾಡಯ್ಲಾಂ ಮ್ಹಣ್ ಸಾಂಗೊಂಕ್
ಮಾಕಾ ಖುಶಿ ಜಾತಾ. ಕವಿತಾ ಪ್ರಕಾಶನಾ ಥಾವ್ನ್ ಮ್ಹಜೊ ಪಯ್ಲೊ
ಕವಿತಾ ಬೂಕ್ "ನಿದೊನ್ ಪಡ್ಲ್ಲೊ ಗಾಂವ್", 2012
ಇಸ್ವೆಂತ್ ಉಜ್ವಾಡಾಕ್ ಹಾಡ್ಲೊ.
’ವೆಂಗೆಂತ್ ಧರುಂ’, ’ಕಿರಾಕ್ ಮೋಗ್ ಪೆರಾಚೊ’, ’ಸಾಂಡುನ್
ಗೆಲ್ಲ್ಯಾ ಚೆಡ್ವಾ’ ಆನಿ ’ಕೆಸಾರ್ ಕಳೊ’ ಹಿಂ ಪದಾಂ ಮಾಂಡ್
ಸೊಭಾಣ್ ಥಾವ್ನ್ ಉಜ್ವಾಡಾಕ್ ಹಾಡ್ಲ್ಲ್ಯಾ ಸಿ.ಡಿ.ನಿಂ
ಲೊಕಾಮೊಗಾಳ್ ಜಾಲ್ಯಾಂತ್. ’ವೆಂಗೆಂತ್ ಧರುಂ’ ಪದ್ ಇತ್ಲೆಂ
ಲೊಕಾಮೊಗಾಳ್ ಜಾಲಾಂಗೀ, ಮಂಗ್ಳುರಾಂತ್ ಜಾಂವ್ಚ್ಯಾ ಹರ್ಯೆಕ್
ಕಾರ್ಯಾಸೊಭಾಣಾನಿ ಹೆಂ ವಾಜಾಯ್ತಾತ್.
ಮ್ಹಜ್ಯಾ ಹ್ಯಾ ನೊವ್ಯಾ ಸಿ.ಡಿಂತ್ ’ನಿದೊನ್ ಪಡ್ಲ್ಲೊ
ಗಾಂವ್’ ಬುಕಾಂತ್ಲಿ ಸುಮಾರ್ ನೋವ್ ಕವಿತಾ ವಿಂಚುನ್ ಪದಾಂ
ರುಪಾರ್ ತುಮ್ಚೆಂ ಹುಜಿರ್ ಹಾಡುಂಕ್ ಪ್ರಯತ್ನ್ ಕೆಲಾಂ.
ಮ್ಹಜ್ಯಾ ಸಂಗಿಂ ನಾಂವಾಡ್ದಿಕ್ ಮ್ಯುಸಿಕ್ ಪ್ರೊಡ್ಯುಸರ್
ಆನಿ ಸಾಂವ್ಡ್ ಎಂಜಿನಿಯರ್ ಜೊ ದಕ್ಷಿಣ್ ಭಾರತಾಚೊ ಉಂಚ್ಲೊ
ಮ್ಯುಸಿಕ್ ಕಂಪೊಸರ್ ಆನಿ ಗಾಯಕ್ ಮಾನೆಸ್ತ್ ಎ.ಅರ್.ರೆಹಮಾನ್
ಹಾಚೊ ಶಿಷ್ಯ್ ಜಾವ್ನಾಸಾ. ತೊ ಎದೊಳ್ಚ್ಚ್ ಕನ್ನಡ ಆನಿ
ಕೊಂಕಣಿ ಲ್ಹಾನ್ ತಸೆಂ ವ್ಹಡ್ ಫಿಲ್ಮಾನಿಂ ಸಂಗೀತ್ ದೀವ್ನ್
ನಾಂವಾಡ್ದಿಕ್ ಜಾಲಾ ತಸೆಂಚ್ ಏಕ್ ತಾಲೆಂತ್ವಂತ್ ಸಂಗೀತ್ಕಾರ್
ಆನಿ ಗಾಯಾಕ್ಯ್ ಜಾವ್ನಾಸಾ.
ಹ್ಯಾ ನೊವ್ಯಾ ಸಂಗೀತ್ ಸಿ.ಡಿ-ಂತ್ ಆಮ್ಚ್ಯಾ ಬಾಳ್ಪಣಾಚೊ
ಉಗ್ಡಾಸ್ ಮಾತ್ರ್ ನ್ಹಯ್ ಅಮ್ಚ್ಯಾ ತರ್ನಾಟ್ಪಣಚ್ಯೊ ಯಾದಿ
ಆನಿ ಜಿವಿತಾಂತ್ಲಿ ವಿಂಚ್ಣಾರ್ ಘಡಿತಾಂ; ಸಂತೊಸ್,
ಮೋಗ್-ಮಯ್ಪಾಸ್, ಖುಶಾಲ್ಕಾಯ್ ಆನಿ ವೆಗ್ಳಾಚಾರ್ ಭರೊನ್
ಆಸಾ ಮ್ಹಣ್ ಸಾಂಗೊಂಕ್ ಮಾಕಾ ಖುಶಿ ಜಾತಾ.
ಹಿ ಸಂಗೀತ್ ಸಿ.ಡಿ. ಸರ್ವ್ ಕೊಂಕ್ಣಿ ಸಂಗೀತ್ ಪ್ರೇಮಿಂಕ್
ಬೋವ್ ಆಪುರ್ಬಾಯೆಚಿ, ಆರ್ಥಾಭರಿತ್, ಆನಿ ’ಇನ್ನೊವೇಟಿವ್’
ಜಾವ್ನ್ ಝಳ್ಕಾತೆಲಿ ಮ್ಹಣ್ಚ್ಯಾಕ್ ಕಸಲೊಚ್ಚ್ ದುಬಾವ್
ನಾಂ.
|