ಕೊಂಕ್ಣಿ ಸಮಾಜ್
ಲ್ಹಾನ್, ಪುಣ್ ಕೊಂಕ್ಣಿ ಚಿಂತಾಪ್ ಲ್ಹಾನ್ ಆಸುನ್ ಉರಾನಾಯೆ,
ಬಗಾರ್ ಆಮ್ಚೆಮಧೆಂ ಅಸ್ಚ್ಯಾ ತಾಲೆಂತಾಕ್, ಪ್ರತಿಭೆಕ್ ಆಮಿ
ವಳ್ಕುಂಚೆಂ ತಶೆಂಚ್ ಜೊಕ್ತೊ ಮಾನ್ ದಿಂವ್ಚೊ ಆಮ್ಚೊ ಕಾಯ್ದೊ
ಜಾವ್ನಾಸಾ. ಅಮಿ ಚಡ್ತಾವ್ ಸಂಯ್ಬಿಕ್ ಮೊಸ್ರಾಚೆ ಶಿಕಾರಿ (ಕೊಣಾಚ್ಯಾ
ರುಪಾಚೆರ್ / ಕಾತಿಚೆರ್ / ಶಿಕ್ಪಾಚೆರ್ / ಸಮ್ಜೊಣೆಚೆರ್ /
ಪ್ರತಿಭೆಚೆರ್ ಮೊಸೊರ್ ಕರ್ತಾಂವ್) ದೆಕುನ್ ಜಶೆಂ
ಕುಂಕಾಡ್ ಆಪ್ಲ್ಯಾ ಪಾಂಯಾಂ ಪಂದಾಂ ಉಸ್ತಿಲ್ಲೆಪರಿಂಚ್,
ಆಮ್ಚಿಚ್ಚ್ ಬಡಾಯ್ ಆಮಿ ಉಚಾರ್ತಾಂವ್, ಆಮಿಂ ಬರಯಿಲ್ಲೆಂಚ್
ವಾಚ್ತಾಂವ್ ಶಿವಾಯ್ ಹೆರಾಂಚೆಂ ವಾಚುಂಕ್ ಸಯ್ತ್ ಆಮ್ಕಾಂ
ಸಯ್ರಣ್ ನಾ. ಅಸಲ್ಯಾ ಮನೋಗತೆಂತ್ ಖಂಚೀಯ್ ಭಾಸ್/ಸಾಹಿತ್
ಉದ್ದಾರ್ ಜಾಯ್ನಾ ಬಗಾರ್ ಕುರ್ವೊನ್ ವೆತಾ. ಅಸಲ್ಯಾ
ಪರಿಗತೆಂತ್ ಪ್ರತಿಭಾವಂತ್ ಬರಯ್ಣಾರ್/ಸಾಹಿತಿ ಹೆರ್
ಭಾಸಾಂನಿ ಬರಂವ್ಕ್ ಲಾಗ್ತಾತ್ ವಾ ಕೊಂಕ್ಣೆಂತ್ ಬರಂವ್ಚೆಂಚ್
ಉಣೆಂ ಕರ್ತಾತ್, ಅಶೆಂ ಕೊಂಕ್ಣೆಕ್ ಎಕಾಥರಾಚೆಂ ಲುಕ್ಸಾಣ್
ಮ್ಹಣ್ಯೆತಾ. ಹಾಚೆಂ ಕಾರಣ್ ಭೋವ್ ಸಂಪೆಂ; ಜೊಕ್ತೆಂ ಶಿಕಾಪ್
ಆಸ್ಚೆ ಬರವ್ಪಿ ಕೊಂಕ್ಣೆಂತ್ ಆಸ್ಚೆ ಭೋವ್ ಥೊಡೆ. ಶಿಕಪ್
ಮ್ಹಳ್ಯಾರ್ ಫಕತ್ತ್ ಡಿಗ್ರಿ ನ್ಹಯ್.
ಅಸಲ್ಯಾಂಚಿ ಮಟ್ವಿ ಪುಣ್ ಸವಿಸ್ತಾರ್ ವಳೊಕ್
ಕರುನ್ ದೀಂವ್ಕ್ ಆಮ್ಕಾಂ ಭೋವ್ ಸಂತೊಸ್ ತಸೊಚ್ಚ್ ಅಭಿಮಾನ್
ಭಗ್ತಾ.
-ಸಂ |
ತುಮಿ ತಾಚ್ಯಾಲಾಗಿಂ
ಉಲೋವ್ನ್ ರಾವ್ಲ್ಯಾರ್ ತುಮ್ಕಾಂ ತೊ ಭೊವ್ ಸಾದೊ ಆನಿ
ಖಾಲ್ತೊ ತಸೊ ದಿಸೊಂಕ್ ಆಸಾ.ಸ್ವಭಾವಾನ್ ತೊ ಸಾದೊ ಆನಿ
ಖಾಲ್ತೊ ವ್ಹಯ್ ತರೀ , ತಾಚ್ಯಾ ಹರ್ಯೇಕ್ ಉಲೊವ್ಣ್ಯಾ
ಪಾಟ್ಲ್ಯಾನ್ ತಶೆಂಚ್ ತಾಣೆ ಕರ್ಚ್ಯಾ ಹರ್ಯೇಕಾ ಕಾಮಾಂತ್
ಜಾಂವ್ದಿ ತಿ ರಂಗ್ಮಾಂಚಿಯೆಚ್ಯಾ ವಯ್ರ್ ಯ್ಯಾ ಭಾಯ್ರ್
ತಾಚೆ ಥಂಯ್ ಆತ್ಮ್ವಿಶ್ವಾಸ್ ಆನಿ ದ್ರಡತಾ ಭರ್ಪೂರ್
ಝಳ್ಕತಾ.ಕೊಂಕ್ಣಿ ಸಂಗೀತ್ ಸಾಂಜಾಂ ವಿಷಯಾಂತ್ ಜಾಣಾ ಆಸ್ಲ್ಲ್ಯಾಂಕ್
,ತಶೆಂಚ್ ಖಾಡಿ ಗಾಂವಾಂತ್ಲ್ಯಾ ಟೊಸ್ಟ್ ಮಾಸ್ಟರ್ಸ್
ಹಾಂಚ್ಯಾ ಕಾರ್ಯಾವಳಿಂ ಥಂಯ್ ಆಭಿರುಚ್ ಆಸ್ಲ್ಲ್ಯಾಂಕ್
ಹಾಂವೆಂ ವಯ್ರ್ ಉಲ್ಲೇಖ್ ಕೆಲ್ಲೊ ವ್ಯಕ್ತಿ ಶ್ರೀ ರೊನಾಲ್ಡ್
ಒಲಿವೆರಾ ಮುಣೊನ್ ಚಿಂತುಂಕ್ ಯ್ಯಾ ಸಾಂಗೊಂಕ್ ಚಡ್ ವೇಳ್
ಲಾಗ್ಚೊ ನಾ.
ಕೊಂಕ್ಣಿ ಉಲೊಂವ್ಚ್ಯಾ ಲೋಕಾಕ್ ಎಕಾ ಕೊಂಕ್ಣಿ
ಕಾರ್ಯನಿರ್ವಾಹಕಾಚೆಂ ಮಟ್ಟ್ ಆನಿ ಆರ್ಹತಾ ಪಾರ್ಕುಂಕ್
ಆಪ್ಲಿಂಚ್ ಮುಳ್ಳಿಂ ಮಾಪಕಾಂ ಆಸೊಂಕ್ ಪುರೊ ಅನಿ ಥೊಡ್ಯಾ
ಪೌವ್ಟಿಂ ವಶಿಲಾಯ್ ಸಯ್ತ್ ಆಪ್ಲೊ ಪಾತ್ರ್ ಖೆಳ್ತಾ ಆಸೊಂಕಿ
ಪುರೊ. ಕೊಣೆಂ ತರೀ ಕೊಂಕ್ಣೆತ್ಲ್ಯಾ ಕಾರ್ಯ್ನಿರ್ವಾಹಕಾಂಕ್
ತಾಂಚ್ಯಾ ಆರ್ಹತಾ ತೆಕಿದ್ ತಾಂಕಾಂ ರ್ಯಾಂಕ್ / ಸ್ಥಾನ್
ದಿಂವ್ಕ್ ಗೆಲ್ಯಾರ್ ಸಭಾರ್ ಲೋಕಾಚ್ಯೊ ಆಭಿಪ್ರಾಯೊ ತ್ಯಾ
ಮಾಪಕಾಂಚ್ಯಾ ವಿರೋಧ್ ವಚೊಂಕ್ ಪುರೊ. ಪುಣ್ ಕೋಣಿ ಹೆಂ
ನೆಗಾರ್ ಕರ್ಚೊನಾಂಗಿ ಕೊಂಕ್ಣೆಂತ್ಲ್ಯಾ ಚಡ್ತಿಕ್
ಸಂಗೀತ್ಗಾರಾಂಕ್, ಕಲಾವಿದಾಂಕ್ ಕಾರ್ಯ್ನಿರ್ವಾಹಣ್
ಕೆಲ್ಲೆ ಕಾರ್ಯ್ನಿರ್ವಾಹಕ್ ಭೊವ್ಚ್ ಭೊವ್ ವಿರಳ್. ಆನಿ
ಆಸ್ಲ್ಯಾ ವಿರಳ್ ಜಮ್ಯಾಂತ್ಲ್ಯಾ ಪಟ್ಟೆಂತ್ ಉಂಚಾಯೆರ್
ಸೊಬ್ಚೆಂ ಏಕ್ ನಾಂವ್ ತೆಂ ಜಾವ್ನಾಸಾ ರೊನಾಲ್ಡ್ ಒಲಿವೆರಾ
ಪಡುಕೋಣೆ.ರೊನಾಲ್ಡ್ ಒಲಿವೆರಾನ್ ಕಾರ್ಯ್ನಿರ್ವಾಹಕ್ಪಣ್
ಕೆಲ್ಲ್ಯಾ ಲಾಂಬ್ ಪಟ್ಟೆಂತ್ ಕೊಂಕಣ್ ಕೊಗುಳ್ ವಿಲ್ಫಿ
ರೆಬಿಂಬಸಾ ಥಾವ್ನ್ ಉದೇವ್ನ್ ಯೆಂವ್ಚೆಂ ಭರ್ವಾಷ್ಯಾಚೆಂ
ನೆಕೆತ್ರ್ ಎಸ್ತೇರ್ ನೊರೊನ್ಹಾ ಪರ್ಯಾಂತ್
ಸೆರ್ವಾತಾತ್.ತಾಣೆಂ ಕಾರ್ಯ್ನಿರ್ವಾಹಕ್ಪಣ್ ಕೆಲ್ಲ್ಯಾ
ಪಟ್ಟೆಂತ್ ಹೆನ್ರಿ ಡಿ’ಸೋಜಾ, ಮೆಲ್ವೀನ್ ಪೆರಿಸ್, ವಿಲ್ಸನ್
ಒಲಿವೆರಾ, ಕ್ಲೋಡ್ ಡಿ’ಸೋಜಾ ,ಮಿಕ್ಮ್ಯಾಕ್ಸ ,
ಮ್ಯಾಕ್ಸಿಮ್ ಪಿರೇರಾ ಆನಿ ಗೊಂಯ್ಚೆಂ ನೈಟಿಂಗೆಲ್ ಲೊರ್ನಾ
ಹಾಂಚಿಂ ನಾಂವಾಂ ಘಾಲಿನಾತ್ಲ್ಯಾರ್ ತಿ ಪಟ್ಟಿ ಆಪೂರ್ಣ್.
ಕೊಂಕಣಿ,ಇಂಗ್ಲೀಷ್,ಹಿಂದಿ ,ಕನ್ನಡ ತಶೆಂಚ್ ತುಳು ಭಾಸಾಂ
ವಯ್ರ್ ರೊನಿಕ್ ಸಂಪೂರ್ಣ್ ಪ್ರಬುದ್ಧತಾ ಆನಿ ನಿರಳತಾ ಆಸಾ
ವಯ್ ತರೀ ಇಂಗ್ಲಿಷ್ ಆನಿ ಮಲಯಾಳಮ್ ಭಾಸ್ ಉಲೊಂವ್ಚೆ
ಹಜಾರಾಂನಿ ಆಭಿಮಾನಿ ಆಸಾತ್.ವಾಚ್ಪ್ಯಾಂಕ್ ತೊ ಮಲಯಾಳಮ್
ಭಾಶೆಕ್ ಕಸೊ ಪಾವ್ಲೊ ಮುಣೊನ್ ಆಶ್ಚರ್ಯ್ ಭಗುಂಕ್
ಆಸಾ.ಖಂಡಿತ್ ಜಾವ್ನ್ ಮಲಯಾಳಮ್ ಭಾಶೆಂತ್ ತೊ ಆಪ್ರತೀಮ್
ಖಂಡಿತ್ ನಂಯ್ , ಬಗಾರ್ ಖಾಡಿ ಗಾಂವಾಂತಿ ಆನಿ ವಿಶೇಷ್
ಜಾವ್ನ್ ಸೌದಿ ಆರೇಬಿಯಾಂತ್ ಮಲಯಾಳಾಂತ್ಲ್ಯಾ ಉಂಚ್ಲ್ಯಾ
ಕಲಾಕರಾಂನಿ ಲಗ್ಭಗ್ ತೀನ್ ಹಜಾರ್ ಪ್ರೇಕ್ಷಕಾಂ ಮುಖಾರ್
ತಾಂಚಿಂ ಕಾರ್ಯಕ್ರಮಾಂ ಸಾಧರ್ ಕರ್ತಾನಾ ತಾಂಕಾಂ ಪಯ್ಲೆಂ
ಉಗ್ಡಾಸಾಕ್ ಯೆಂವ್ಚೊ ತಶೆಂಚ್ ತಾಣಿಂ ಪಯ್ಲಿ ಪ್ರಾಶಸ್ತ್ಯ್
ದಿಂವ್ಚೊ ಕಾರ್ಯ್ನಿರ್ವಾಹಕ್ ಜಾವ್ನಾಸಾ ರೊನಾಲ್ಡ್
ಒಲಿವೆರಾ.ತಾಣೆಂ ಕಾರ್ಯ್ನಿರ್ವಾಹಕ್ಪಣ್ ಕೆಲ್ಲೆ ಥೊಡೆ
ಮಲಯಾಳಾಂತ್ಲೆ ಪ್ರಸಿದ್ಧ್ ಕಲಾಕರ್ ಜಾವ್ನಾಸಾತ್ ಕೊಟ್ಟಾಯಮ್
ನಜೀರ್, ಮೊಹಮ್ಮದ್ ಆಸ್ಲಾಮ್, ನಾದರ್ಶ ಆನಿ ಸಭಾರ್ ಆನ್ಯ್
ಕಲಾಕರ್.ಪರ್ತುನ್ ಪರ್ತುನ್ ತಾಣೆ ಸಂಸಾರಾಂತ್ಲ್ಯಾ ಹರ್ಯೇಕಾ
ಕೊನ್ಶಾಚ್ಯಾ ಲೋಕಾಕ್ ಹೆಂ ರುಜು ಕರುನ್ ದಾಕಯ್ಲಾಂಕಿ ಕೆದೆಂ
ಮಹಾನ್ ಕಾರ್ಯೆಂ ಜಾಲ್ಯಾರಿ ತೊ ಕಿತ್ಲ್ಯಾ ಸಲಿಸಾಯೆನ್ ಆನಿ
ಸಗ್ಳ್ಯಾಂಚಿಂ ಮನಾಂ ಪಿಸ್ವೊಂಚ್ಯಾ ಬರಿ ಕಾರ್ಯೆಂ
ನಿರ್ವಾಹಣ್ ಕರುಂಕ್ ಸಕ್ತಾ ಮುಣೊನ್.2001ಂತ್ ತಾಣೆಂ
ಕಾರ್ಯ್ನಿರ್ವಾಹಣ್ ಕೆಲ್ಲೆಂ ಭೋವ್ ಯಶಸ್ವಿ ಕಾರ್ಯಕ್ರಮ್
"ರೇಮಂಡ್ ದ ಕಂಪ್ಲೀಟ್ ಮೇನ್ " ತಾಚ್ಯಾ ಶ್ಯಾಥಿಯೇಕ್ ಎಕ್
ರುಜ್ವಾತ್ ಜಾವ್ನಾಸಾ.ಬಾಹ್ರೇಯ್ನಾಂತ್ "ಟೋಸ್ಟ್ ಮಾಸ್ಟರ್ಸ್
ಆಸೊಶಿಯೇಶನ್ " ಹಾಣಿಂ ಆಸಾ ಕೆಲ್ಲ್ಯಾ ಪೆನೆಲ್ ಡಿಸ್ಕಶನ್
ಹಾಂತುಂ ರೊನಾಲ್ಡ್ ಒಲಿವೆರಾ ಎಕ್ಲೊ ಸದಸ್ಯ್ ಜಾವ್ನಾಸ್ಲ್ಲೊ.ತಾಚ್ಯಾ
ಸಾಂಗಾತಾ ನಾಂವಾಡ್ದಿಕ್ ತೇಲಾ ಕಂಪ್ಣೆಚೆ C.E.O,
ಸಾರ್ವಜನಿಕ್ ಉಲೊವ್ಣ್ಯಾಚೊ ವಿಶ್ವ್ ವಿಜೇತ್, ಉಂಚ್ಲೆ
ಪ್ರಖ್ಯಾತ್ ಪತ್ರ್ಕರ್ತ್, ನಾಂವಾಡ್ದಿಕ್ ಉದ್ಯೋಗ್ಪತಿ
ಹಾಜರ್ ಆಸ್ಲ್ಲ್ಯಾ ಹ್ಯಾ ಕಾರ್ಯಾಚೆಂ ಪ್ರಸರಣ್ ಸಭಾರ್
ಪ್ರಸಿದ್ದ್ ಟಿ.ವಿ.ಚಾನೇಲಾಂನಿ ದಾಕಯ್ಲಾಂ.
ರೊನಾಲ್ಡ್ ಒಲಿವೆರಾ "ಟೊಸ್ಟ್ಸ್ ಮಾಸ್ಟರ್ಸ್ ಇಂಟರ್ನ್ಯಾಷನಲ್
" ಹಾಚೊ ಸಾಂದೊ ಜಾವ್ನಾಸಾ. ಹೊ ಸಂಸ್ಥೊ ಸಾರ್ವಜನಿಕ್
ಉಲೊವ್ಣ್ಯಾಕ್ ತಶೆಂಚ್ ಮನ್ಶಾಂಥಂಯ್ ನಾಯಕತ್ವಾಚೆ ಗೂಣ್ ಆನಿ
ಆರ್ಹತಾ ಅಪ್ಣಾಂವ್ಕ್ ಸಂಸಾರ್ಭರ್ ವಿಸ್ತಾರ್ಲೆಲ್ಯಾ
ಆಪ್ಲ್ಯಾ ಶಾಖ್ಯಾಂದ್ವಾರಿ ಕುಮೊಕ್ ಕರ್ತಾ.ಲಗ್ಭಗ್ 60
ದೇಶಾನಿ ವಿಸ್ತಾರ್ಲೆಲ್ಯಾ ಹ್ಯಾ ಸಂಸ್ಥ್ಯಾಚೆ ಲಗ್ಭಗ್
16,000 ಹಜಾರಾಚ್ಯಾಕಿ ಚಡ್ತಿಕ್ ಶಾಖೆ ಆಸೊನ್ , 150 ಶಾಖೆ
ಖಾಡಿ ಗಾಂವಾಂತ್ಚ್ ಆಸಾತ್.ಆಂತರಾಷ್ಟ್ರೀಯ್ ತಶೆಂಚ್ ಗಲ್ಫ್
ಮಟ್ಟಾರ್ ರೊನಾಲ್ಡ್ ಒಲಿವೇರಾನ್ ವಿವಿಧ್ ಉಲೊವ್ಣ್ಯಾ
ಸ್ಪರ್ದ್ಯಾಂನಿ ಸಭಾರ್ ಬಹುಮಾನಾಂ
ಜೊಡ್ಲ್ಯಾಂತ್.ಆಮೇರಿಕಾಂತ್ ಚಲ್ಲ್ಲ್ಯಾ "ಇಂಟರ್ನೇಷನಲ್
ಟೇಪ್ಡ್ ಸ್ಪೀಚ್ ಕಾಂಪಿಟೇಶನ್" ಹಾಂತುಂ ತೀನ್
ಆಂತರಾಷ್ಟ್ರೀಯ್ ಪ್ರಶಸ್ತ್ಯೊ ಜೊಡ್ಲ್ಲಿ ಕೀರ್ತ್
ರೊನಾಲ್ಡ್ ಒಲಿವೆರಾಕ್ ವೆತಾ , ಹೆಂ ಸಾಹಸ್ ಖಾಡಿ ಗಾಂವಾಂತ್
ಥಾವ್ನ್ ಎದೊಳ್ ಕೊಣಿ ಮೊಡುಂಕ್ ನಾ.ಗಲ್ಫ್ ಪ್ರಾಂತಾಚ್ಯಾ
ಸ್ಪರ್ದ್ಯಾಂನಿ ಸತತ್ ಚಾರ್ ವರ್ಸಾಂನಿ ಪಯ್ಲೆಂ ಸ್ಥಾನ್
ಜೊಡ್ಲ್ಲೊ ರೊನಿಚೊ ದಾಖ್ಲೊ ಎದೊಳ್ ಕೊಣಿ ಮೊಡುಂಕ್ ನಾ.
2002 ಂತ್ ಮಸ್ಕತ್,ಒಮಾನಾಂತ್ ಚಲ್ಲ್ಲ್ಯಾ ಗಲ್ಫ್ ಟೋಸ್ಟ್ಮಾಸ್ಟರ್ಸ್
ವಾರ್ಷೀಯ್ ಸಮ್ಮೇಳನಾಂತ್ ರೊನಿನ್ ತೀನ್ ಬಹುಮಾನಾಂ ಜಿಕೊನ್
ತೊ ಎದೊಳ್ ಕೊಣಿಂ ಮೊಡುಂಕ್ ಜಾಯ್ನಾತ್ಲ್ಲೊ ದಾಖ್ಲೊ
ಜಾವ್ನ್ ಉರ್ಲಾ.ಲಗ್ಭಗ್ 150 ವಯ್ರ್ ವಿವಿಧ್ ಹಂತಾಂನಿ ಚಲ್ಲ್ಲ್ಯಾ
ಸ್ಪರ್ದ್ಯಾಂನಿ ರೊನಿನ್ ಸ್ಪರ್ದ್ಯಾಚೊ ಚೆಯರ್ ಪರ್ಸನ್
ಜಾವ್ನ್ , ಮುಖ್ಯ್ ಜಡ್ಜ್ ಜಾವ್ನ್ , ಕಂಟೆಸ್ಟ್ ಜಡ್ಜ್
ಜಾವ್ನ್ ಆಪ್ಲಿ ಸೆವಾ ದಿಲ್ಯಾ.
ರೊನಾಲ್ಡ್ ಒಲಿವೆರಾ ಎಕ್ ದೂರ್ದ್ರಶ್ಟೆನ್ ಭರ್ಲ್ಲೊ
ಸ್ವಪ್ಣೆಲಿ ಆನಿ ನಾಯಕಾತ್ವಚೆ ಗೂಣ್ ಲ್ಹಾನ್ಪಣಾರ್ ಥಾವ್ನ್ಚ್
ಆಪ್ಣೆಂವ್ನ್ ಗೆಲ್ಲೊ ಮುಖೆಲಿ.ಸೌದಿಂತ್ಲೆಂ ನಾಂವಾಡ್ದಿಕ್
ಕೊಂಕಣಿ ಆಸೊಶಿಯೇಶನ್ SKY ( ಸೌದಿ ಕೊಂಕಣ್ ಯಂಗ್ಸ್ಟರ್ಸ್
) ಹಾಚೊ ಸ್ಥಾಪಕ್ ಸಾಂದೊ ತಶೆಂಚ್ ಪಯ್ಲೊ ಜೆರಾಲ್
ಕಾರ್ಯದರ್ಶಿ.ಉಪ್ರಾಂತ್ ತೊ ಬಾಹ್ರೇಯ್ನ್ ಪಾವ್ಲೊ ಆನಿ
ಸಮಾನ್ ಮನಾಚೆ ಇಶ್ಟ್ ಜಾವ್ನಾಸ್ಲ್ಲ್ಯಾ ರಿಚಾರ್ಡ್ ಮೊರಾಸ್
, ಹೆನ್ರೀ ಆಲ್ಮೇಡಾ , ಜೋನ್ ಮಸ್ಕರೆನ್ಹಸ್ , ಮನು
ಬಾಹ್ರೇಯ್ನ್ ಆನಿ ರೊನಾಲ್ಡ್ ಡಿ.ಎಫ್.ಡಿ’ಸೋಜಾ ಅನಿ
ಸಾಂಗಾತ್ಯಾನಿ ಮೆಳೊನ್ ಘಡ್ಲ್ಲ್ಯಾ ಕೊಂಕ್ಣಿ ಕುಟಾಮ್
ಸಂಸ್ಥ್ಯಾಚೊ ತೊ ಆಜೂನಿ ಕಾರ್ಯಾಳ್ ಸಾಂದೊ
ಜಾವ್ನಾಸಾ.ರೊನಿಚ್ಯಾ ಸಂಚಾಲಕ್ಪಣಾಖಾಲ್ ಸಭಾರ್ ಕೊಂಕ್ಣಿ
ಆನಿ ಇಂಗ್ಲೀಷ್ ಕಾರ್ಯಕ್ರಮಾಂ ಚಲ್ಲ್ಯಾಂತ್.
ರೊನಾಲ್ಡ್ ಒಲಿವೆರಾ ಏಕ್ ನಾಂವ್ ವೆಲ್ಲೊ ಕೊಂಕಣಿ ಲೇಖಕ್.
100 ಚ್ಯಾಕಿ ಚಡ್ ಮಟ್ವ್ಯೊ ಕಾಣಿಯೊ , 150 ಚ್ಯಾಕಿ ವಯ್ರ್
ಲೇಕನಾಂ ಎದೊಳ್ಚ್ ವಿವಿದ್ ಕೊಂಕ್ಣಿ ಪತ್ರಾಂನಿ ಪಾಯ್ಸ್
ಜಾಲ್ಯಾಂತ್.ಕೊಂಕ್ಣಿ ಪತ್ರಾನಿ ಚಲಾಯಿಲ್ಲ್ಯಾ ಸಭಾರ್
ಸಾಹಿತಿಕ್ ಸ್ಪರ್ದ್ಯಾಂನಿ ತಾಣೆಂ ಇನಾಮಾಂ ಆಪ್ಣಾಯ್ಲ್ಯಾಂತ್
ಮಾತ್ರ್ ನಂಯ್ ಆಸ್ತಾಮ್ ತಾಚೆ ಥಾವ್ನ್ ಕನ್ನಡಾಂತ್ ತಶೆಂಚ್
ಇಂಗ್ಲೀಶಾಂತ್ ಸಭಾರ್ ಕಾಣಿಯೊ ತಶೆಂಚ್ ಲೇಖನಾಂ
ವಾಳ್ಳ್ಯಾಂತ್.ತಾಚ್ಯಾ ವೇಳ್ನಾತ್ಲ್ಲ್ಯಾ ಆವ್ರಾಂತ್
ಸಾಹಿತಿಕ್ ವಾವ್ರಾಕ್ ತಾಕಾ ವೇಳ್ ಮೆಳಾನಾ ತರೀ " ಸರ್ಗಾ
ವ್ಹಯ್ಲಿ ಮಾಂಯ್ " ಮುಳ್ಳ್ಯಾ ಮಟ್ವ್ಯಾ ಕಾಣಿಯಾಂಚೊ ಬೂಕ್
ತಾಣೆ ಕೊಂಕ್ಣಿ ಸಾಹಿತ್ಯ್ ಸಂಸಾರಾಕ್ ಆರ್ಪಿಲಾ.
ರೊನಾಲ್ಡ್ ಒಲಿವೆರಾ ಸಗ್ಳ್ಯಾನಿ ಗೌರವ್ ದಿಂವ್ಚ್ಯಾ ತಸಲೊ
ಏಕ್ ಸಂಪನ್ಮೂಳ್ ವ್ಯಕ್ತಿ ಜಾವ್ನಾಸಾ.ಗಲ್ಫಾಂತ್ ತಶೆಂಚ್
ಭಾರತಾಂತ್ ಸಯ್ರೊ ಉಲೊವ್ಪಿ ಜಾವ್ನ್ ಆಂತರಾಷ್ಟ್ರೀಯ್
ಕಂಪ್ಣೆಂಕ್ / ಇಸ್ಕಲಾಂಕ್ /ಕೊಲೆಜಿನಿ/ಇಗರ್ಜಾಂನಿ /ರೊಟರಿ
ಕ್ಲಬ್ , ಲಯನ್ಸ್ ಕ್ಲಬ್ ತಸಲ್ಯಾ ಸಂಸ್ಥ್ಯಾನಿ ತಶೆಂಚ್
ಸಭಾರ್ ಸಾಮಾಜಿಕ್ ತಶೆಂಚ್ ಸಾಂಸ್ಕ್ರತಿಕ್ ಸಂಘ್ -
ಸಂಸ್ಥ್ಯಾಂಕ್ ಸಂಪನ್ಮೂಳ್ ವ್ಯಕ್ತಿ ಜಾವ್ನ್ ಆಪ್ಲೆಂ
ಉಲೋವ್ಪ್ ದಿಲಾಂ.ಸೌದಿ ಆರೇಬಿಯಾ , ಬಾಹ್ರೇಯ್ನ್ ತಶೆಂಚ್
ಭಾರತಾಂತ್ " ಕಮ್ಯೂನಿಕೇಶನ್ ಆಂಡ್ ಲೀಡರ್ಶಿಪ್ "
ಕಾಮಾಸಾಳಾಂ ತಶೆಂಚ್ " ಯುತ್ ಲೀಡರ್ಶಿಪ್" ತಸಲಿಂ
ಕಾರ್ಯಕ್ರಮಾಂ ತಾಣೆಂ ಯಶಸ್ವಿ ರೀತಿನ್ ಮಾಂಡುನ್
ಹಾಡ್ಲ್ಯಾಂತ್.
ಪ್ರಚಾರಾ ಪಾಟ್ಲ್ಯಾನ್ ತೊ ದಾವೊಂಕ್ ನಾ ತರೀ , ತಾಣೆ
ತಾಚ್ಯಾ ಸಮಾಜೆಕ್ ಹಾಡ್ಲ್ಲ್ಯಾ ಗೌರವಾ ಲಾಗೊನ್ ಮರ್ಯಾದ್
ಆನಿ ನಾಂವ್ ತಾಕಾ ಸೊಧುನ್ ಆಯ್ಲ್ಯಾಂತ್.ಭಾರತಾಚೆಂ
ರಾಶ್ಟ್ರೀಯ್ ಟಿ.ವಿ.ಚಾನೆಲ್ ದೂರ್ದರ್ಶನ್ ಹಾಚೆ ವಯ್ರ್
ತಾಚೆಂ ಸಂದರ್ಶನ್ ಮಾತ್ರ್ ನಹಿಂ ಆಸ್ತಾಂ ಸಭಾರ್ ಪತ್ರಾಂನಿ
ತಶೆಂಚ್ ಹಪ್ತ್ಯಾಳಿಂ ಆನಿ ಮಹಿನ್ಯಾಳ್ಯಾಂನಿ ತಾಚಿಂ
ಸಂದರ್ಶನಾಂ ಘೇವ್ನ್ ಪಾಯ್ಸ್ ಕೆಲ್ಯಾಂತ್ ಮಾತ್ರ್ ನಹಿಂ
ಆಸ್ತಾಂ ಭಾರತ್ ಆನಿ ಗಲ್ಫ್ ದೇಶಾಂತ್ಲ್ಯಾ ಸಭಾರ್ "ಟೋಸ್ಟ್ಮಾಸ್ಟರ್ಸ್
ಕ್ಲಬ್" ಆನಿ ಕೊಂಕ್ಣಿ ಸಂಘಟನಾಂನಿ ತಾಕಾ ಸನ್ಮಾನ್ ಕರುನ್
ಗೌರವ್ ದಿಲಾ.
ಕುಂದಾಪುರ್ ವಾರಾಡಾಂತ್ಲ್ಯಾ ಪಡುಕೋಣೆ ಫಿರ್ಗಜೆಚ್ಯಾ
ದೆ.ಇನೊಕ್ ಒಲಿವೆರಾ ಆನಿ ದೆ.ಕ್ಯಾಥರಿನ್ ಒಲಿವೆರಾ ಹ್ಯಾ
ಜೊಡ್ಯಾಚೊ ಪುಸುನ್ ಘಾಲ್ಲೊ ಪೊಳೊ ಜಾವ್ನಾಸಾ.ಪ್ರಖ್ಯಾತ್
ಕೊಂಕ್ಣಿ ಪದಾಂ ಘಡ್ಣಾರ್ ಆನಿ ಗಾವ್ಪಿ ಶ್ರೀ ವಿಲ್ಸನ್
ಒಲಿವೆರಾ , ರೊನಿಚೊ ಮಾಲ್ಘಡೊ ಭಾವ್ ಜಾವ್ನಾಸಾ.ಕೆದಾಳಾಯ್
ತಾಚ್ಯಾ ಯಶಸ್ವೆಚ್ಯಾ ಪಾಟ್ಲ್ಯಾನ್ ಕೋಣ್ ಆಸಾತ್ ಮುಣೊನ್
ವಿಚಾರ್ಲ್ಯಾರ್ ತಾಚ್ಯಾ ವ್ಹಡಿಲಾಂಚೆಂ , ಭಾವ್/ಬೈಣ್ಯಾಂಚೆಂ
, ಆಪ್ಲಿ ಧರ್ಮ್ ಪತಿಣ್ ಸ್ಮೀತಾ ತಶೆಂಚ್ ಆಪ್ಲೊ ದಾಕ್ಟುಲೊ
ಪುತ್ ರೆನೊಯ್ ಹಾಂಚೆಂ ನಾಂವ್ ಕಾಡುಂಕ್ ವಿಸ್ರಾನಾಂ.ಮಾತ್ರ್
ನಂಯ್ ಆಸ್ತಾಂ ಪಡುಕೊಣೆ ಫಿರ್ಗಜೆಚೆ ಯಾಜಕ್
ರೆ.ಫಾ.ರಿಚಾರ್ಡ್ ಸಲ್ದಾನಾ ಆನಿ ರೆ.ಫಾ.ವಿಲಿಯಂ ಮಿನೇಜಸ್
, ತಾಚಿಂ ಶಿಕ್ಷಕಾಂ ಶ್ರೀಮತಿ ಐರಿನ್ ಒಲಿವೆರಾ , ಶ್ರೀ
ನಾಗಪ್ಪಯ್ಯ ಮಾಸ್ಟರ್ , ದೆ.ಸಿ.ವೆನೆಟ್ಟಾ ರೊಡ್ರಿಗಸ್ ,
ಸಿ.ಹೆಲೆನ್ ಮೆರಿ , ಸಿ.ಸಿಸಿಲಾ ಮೆಂಡೊನ್ಸಾ ಆನಿ ಶ್ರೀ
ಝೆವಿಯರ್ ಡಿ’ಸೋಜಾ ಹಾಣಿಂ ಆಪ್ಲೆಂ ವ್ಯಕ್ತೀತ್ವ್ ರುತಾ
ಕರ್ಚ್ಯಾಂತ್ ಭರ್ಫೂರ್ ಸಹಕಾರ್ ದಿಲಾ ಮುಣ್ಚೊ ರೊನಿ ಕೊಂಕಣ್
ಕೊಗುಳ್ ದೆ.ವಿಲ್ಫಿ ರೆಬಿಂಬಸಾಚೊ ಮಹಾನ್ ಆಭಿಮಾನಿ.ಪರ್ತುನ್
ಪರ್ತುನ್ ತಾಣೆ ಆಭಿಮಾನಾನ್ ಆನಿ ಗೌರವಾನ್ ಸಾಂಗ್ಲಾಂಕಿ
ಸರಳತಾ ಆನಿ ಜಿಣಿಯೆಚಿಂ ಲಿಸಾಂವಾಂ ಆಪ್ಣೆಂ ವಿಲ್ಫಿ
ರೆಬಿಂಬಸಾ ಥಾವ್ನ್ ಶಿಕ್ಲ್ಲಿಂ ಮುಣೊನ್.ವಿಲ್ಫಿ
ರೆಬಿಂಬಸಾಚ್ಯಾ ಕುಟ್ಮಾಸವೆಂ ತಾಕಾ ಆಸ್ಚ್ಯಾ ಸಾಮಿಪ್ಯತಾ
ಲಾಗೊನ್ ವಿಲ್ಫಿ ರೆಬಿಂಬಸಾಚಿ ಮಾಲ್ಘಡಿ ನಾತ್ ಆನ್ನಾ ನತಾಶಾ
ಪಾಯ್ಸ್ ಹಾಚೊ ತೊ ಪೊದೊರ್ನ್ ಜಾವ್ನಾಸಾ.
{ವಿಲ್ಸನ್ ಆನಿ
ರೊನಾಲ್ಡ್ ಒಲಿವೆರಾ ಆಪ್ಲ್ಯಾ ಹೆರ್ ಭಾವ್-ಭಯ್ಣಿಂಸಾಂಗಾತಾ]
ಆಸ್ಲ್ಯಾ ಸಭಾರ್
ವಿಶೇಷ್ ದೆಣ್ಯಾಂನಿ ಭರ್ಲ್ಲ್ಯಾ ಶ್ರೀ ರೊನಾಲ್ಡ್ ಒಲಿವೆರಾ
ಹಾಕಾ "ಪಯ್ಣಾರಿ" ವ್ಹಡಾ ಆಭಿಮಾನಾನ್ ಆನಿ ಗೌರವಾನ್ ತಾಚಿ
ಸೇವಾ ವ್ಹಳ್ಕೋನ್ ಘೆತಾ ಆನಿ ತಾಚ್ಯಾ ಮುಖ್ಲ್ಯಾ ವಾವ್ರಾಂತ್
ಸರ್ವ್ ಬೊರೆಂ ಮಾಗ್ತಾ.
- ನಾನು ಮರೋಲ್ - ತೊಟ್ಟಾಮ್
|