|
ಆಶಾವಾದಿ ಪ್ರಕಾಶನ್ ಮುಂಬಯ್ ಆನಿ
ದಿವೊ
ಹಫ್ತ್ಯಾಳೆಂ
ಹಾಂಚ್ಯಾ ಜೋಡ್ ಆಗೋಗಾಖಾಲ್
ಕೊಂಕಣಿ ಬರವ್ಪ್ಯಾಂಚೆಂ ಸಹಮಿಲನ್, ವಾಲ್ಟರ್ ಲಸ್ರಾದೊ ಆನಿ
ಮಾ|ಸ್ಟೇನಿ ಡಿ’ಕುನ್ಹಾಚೆರ್ ಏಕ್ ನಿಯಾಳ್, ದೋನ್
ಬುಕಾಂಚೆಂ ಮೊಕ್ಳೀಕ್ ಕಾರ್ಯೆಂ
11 ಅಗೋಸ್ತ್
2019 (ಅಂಧೇರಿ, ಮುಂಬಯ್): ಆಶಾವಾದಿ ಪ್ರಕಾಶನ್ ಆನಿ ದಿವೊ
ಕೊಂಕಣಿ ಹಫ್ತ್ಯಾಳೆಂ ಹಾಣಿ ಅಗೋಸ್ತ್ 11 ತಾರಿಕೆರ್
(ಆಯ್ತಾರಾ) ಮುಂಬಯ್ಚ್ಯಾ ಮುಡ್ಲ ಅಂಧೇರಿಂತ್ಲ್ಯಾ ’ಆತ್ಮ
ದರ್ಶನಾಂತ್’ ಆಯೋಜಿತ್ ಕೆಲ್ಲ್ಯಾ ಕೊಂಕಣಿ ಬರವ್ಪ್ಯಾಂಚ್ಯಾ
ಸಹಮಿಲನಾಂತ್ ಆಯ್ಲೆವಾರ್ ದೆವಾಧೀನ್ ಜಾಲ್ಲ್ಯಾ
ನಾಮ್ಣೆಚ್ಯಾ ಕೊಂಕಣಿ ಬರಯ್ಣಾರ್ ವಾಲ್ಟರ್ ಲಸ್ರಾದೊ ಆನಿ
ಮಾ|ಸ್ಟೇನಿ ಡಿ’ಕುನ್ಹಾ ಹಾಂಚೆರ್ ಏಕ್ ನಿಯಾಳ್ ಕರುನ್
ತಾಂಕಾಂ ಶೃದ್ದಾಂಜಲಿ ಭೆಟಯ್ಲಿ. ದಿವೊ ಪತ್ರಾಚೊ ಸಂಪಾದಕ್
ಮಾನೆಸ್ತ್ ಲಾರೆನ್ಸ್ ಕುವೆಲ್ಹೊಚ್ಯಾ ಅಧ್ಯಕ್ಷ್‌ಪಣಾಖಾಲ್,
ಚಲ್‌ಲ್ಲ್ಯಾ ಹ್ಯಾ ಕಾರ್ಯಾಂತ್ ವೀಜ್ ಇ-ಪತ್ರಾಚೊ ಸಂಪಾದಕ್
ದೊ| ಆಸ್ಟಿನ್ ಡಿ’ಸೋಜ್ ಪ್ರಭು ಮುಖೆಲ್ ಸಯ್ರೊ ಜಾವ್ನ್
ಹಾಜರ್ ಆಸ್ಲೊ ತಶೆಂಚ್ ಉಧ್ಯಮಿ ಮಾನೆಸ್ತ್ ಜೋನ್
ಡಿ’ಸಿಲ್ವಾ ವೆದಿರ್ ಹಾಜರ್ ಆಸ್ಲೊ.
ಸಕಾಳಿಂ ಇಕ್ರಾ
ವೊರಾಂಕ್ ಸುರು ಜಾಲ್ಲ್ಯಾ ಕಾರ್ಯಾಂತ್ ಬಾಯ್ ವಾಯ್ಲೆಟ್
ಆಳ್ವ ಮೂಡ್‌ಬೆಳ್ಳೆನ್ ವಾಲ್ಟರ್ ಲಸ್ರಾದೊಚಿ ಸವಿಸ್ತಾರ್
ವಳೊಕ್ ಕರುನ್ ದಿಲಿ, ತಶೆಂಚ್ ಬಾಬ್ ಲಾರೆನ್ಸ್ ಕುವೆಲ್ಹೊ
ಆನಿ ಬಾಬ್ ಆಲ್ಫೋನ್ಸೊ ಡಿ’ಸೋಜ್ ಹಾಣಿಂ ವಾಲ್ಟರ್
ಲಸ್ರಾದೊವಿಶಿಂ ಸವಿಸ್ತಾರ್ ಮಾಹೆತ್ ದಿವುನ್ ತಾಚ್ಯಾ
ವರ್ತ್ಯಾ ಗುಣಾಂಚೊ ಉಲ್ಲೇಕ್ ಕರ್ತಚ್ ಮಾನೆಸ್ತ್ ವಲ್ಲಿ
ಕ್ವಾಡ್ರಸಾನ್ ಮಾ|ಸ್ಟೇನಿ ಡಿ’ಕುನ್ಹಾಚಿ ಮಟ್ವಿ ವಳೊಕ್
ಕರುನ್ ತಾಚ್ಯಾ ಸಮಾಜ್‌ಸೆವೆಚ್ಯಾ ವಾವ್ರಾವಿಶಿಂ,
ಸಾಹಿತಿಕ್ ವಾವ್ರಾವಿಶಿಂ ವಿವರ್ ದಿಲೊ.
ಉಪ್ರಾಂತ್
ಶಾರಲ್ ಡಿ’ಸೋಜಾನ್ ದೊ| ಆಸ್ಟಿನ್ ಡಿ’ಸೋಜ್ ಪ್ರಭುಚಿ
ವಳೊಕ್ ಕರುನ್ ದಿತಚ್ ದೊ| ಆಸ್ಟಿನ್ ಡಿ’ಸೋಜಾನ್ ಕೊಂಕಣಿ
ವಾವ್ರಾಕ್ ಲಾಗುನ್ ಜೊಡ್‌ಲ್ಲೊ ಅನ್ಭವ್ ವಾಂಟುನ್,
ಅಪ್ಣಾಕ್ ಲಾಗ್‌ಲ್ಲಿ ಕೊಂಕಣಿ ಖೊರೊಜ್ ಕೆದಿಂಚ್
ನಿಂವ್ಚಿನಾ ಮ್ಹಣಾಲೊ.
ದೊ|ಆಸ್ಟಿನ್ ಡಿ’ಸೋಜ್
ಪ್ರಭುಚ್ಯಾ ಅಧ್ಯಕ್ಷ್‌ಪಣಾಖಾಲ್ ದನ್ಪಾರಾಂ ಉಪ್ರಾಂತ್ಲ್ಯಾ
ಕಾರ್ಯಾಂತ್ ಪಯ್ಲ್ಯಾ ವಾಂಟ್ಯಾಂತ್ ’ಮುಂಬಂಯ್ತ್
ಕೊಂಕಣಿ ಕಿತ್ಲಿ ಪ್ರಸ್ತುತ್ ಆನಿ ಕೊಂಕಣಿಚೊ ಫುಡಾರ್’
ವಿಶ್ಯಾಚೆರ್ ಬಾಯ್ ಫಿಲೋಮೆನಾ ಸಾಂಫ್ರಾನ್ಸಿಸ್ಕೊಚ್ಯಾ
ಮುಖೇಲ್‌ಪಣಾಖಾಲ್ ಸಂವಾದ್ ಚಲ್ಲೊ. ಹ್ಯಾ ಸಂವಾದಾಂತ್ ಬಾಯ್
ಫ್ಲೋರಾ ಕಲ್ಮಾಡಿ ತಶೆಂಚ್ ಯುವ ಪ್ರತಿನಿಧಿ ದೊ|ರೋಶ್ನಿ
ಕ್ರಾಸ್ತಾ ಹಾಣಿಂ ವಾಂಟೊ ಘೆತ್ಲೊ ಆನಿ ಆಪಾಪ್ಲೆ ವಿಚಾರ್
ಪ್ರಸ್ತುತ್ ಕೆಲೆ. ಬಾಯ್ ಫಿಲೋಮೆನಾ ಸಾಂಫ್ರಾನ್ಸಿಸ್ಕೊನ್
ಸವಿಸ್ತಾರ್ ರಿತಿನ್ ಮುಂಬಂಯ್ತ್ ಕೊಂಕಣಿ ಜಿವಾಳುಂಕ್
ಭುರ್ಗ್ಯಾಂಕ್ ಮುಕಾರ್ ಹಾಡ್ಚೆವಿಶಿಂ ಹರ್ಯೇಕಾ
ವ್ಹಡಿಲಾಂನಿ ಆಟೊವ್ ಕರ್ಚಿ ಗರ್ಜ್ ಆಸಾ ಮ್ಹಣಾಲಿ.
ಸಂವಾದಾ ಉಪ್ರಾಂತ್ಲ್ಯಾ ಕಾರ್ಯಾಂತ್ ಪಯ್ಣಾರಿ ವಿಶೇಸ್
ಅಂಕೊ ತಶೆಂಚ್ ’ಕಂಗಾಲ, ಕುಕ್ಕೆಹಳ್ಳಿ ಮತ್ತು
ಕತೆಗಳು’ (ಕೊಂಕಣಿ ಮಟ್ವ್ಯಾ ಕಾಣಿಯಾಂಚ್ಯಾ
ಕನ್ನಡ ಅನುವಾದಾಚ್ಯಾ ಬುಕಾಚೆಂ) ಮೊಕ್ಳೀಕ್ ಕಾರ್ಯೆಂ
ದೊ|ಆಸ್ಟಿನ್ ಪ್ರಭು ಆನಿ ರೋನ್ಸ್ ಬಂಟ್ವಾಳ್ ಹಾಣಿಂ
ಕೆಲೆಂ. ಬೂಕ್ ಉಗ್ತಾವಣ್ ಕರ್ತಚ್ ರೋನ್ಸ್ ಬಂಟ್ವಾಳಾನ್
ಆಯ್ಚ್ಯಾ ಪರಿಗತೆವಿಶಿಂ ತಶೆಂಚ್ ಎಕಾ ಕೊಂಕಣಿ
ಬರವ್ಪ್ಯಾಂಚ್ಯಾ ಖಳ್ಮಿತ್ ನಾತ್‌ಲ್ಲ್ಯಾ ಮಿನತೆಚೆರ್
ತಶೆಂಚ್ ಪರಿಶ್ರಮಾಚೆರ್ ಉಜ್ವಾಡ್ ಘಾಲೊ.
ಮುಂಬಯಾಂತ್ ಕೊಂಕಣಿ ಅಭಿಯಾನ್ ಸಮಿತಿಂತ್ ವಾವ್ರ್
ಕೆಲ್ಲ್ಯಾ ಸಮೇಸ್ತಾಂಚೊ ಉಡಾಸ್ ಕಾಡುನ್ ಹಾಜರ್
ಆಸ್‌ಲ್ಲ್ಯಾ ರಿಚಾರ್ಡ್ ಡಿ’ಸೋಜ್ ಸಾನ್‌ಪಾಡ, ಮೇರಿ ವಾಸ್
ಕಾಂದಿವಲಿ, ಫ್ಲೋರಾ ಕಲ್ಮಾಡಿ ಜೆರಿಮೆರಿ ಕಾಣಿಕ್ ದಿವುನ್
ಮಾನ್ ದಿಲೊ.
ಹೆಚ್ ಸಂಧರ್ಭಾರ್ ಹಾಜರ್ ಆಸ್‌ಲ್ಲ್ಯಾ
ವಾಲ್ಟರ್ ಲಸ್ರಾದೊಚ್ಯಾ ಪತಿಣೆನ್ ಮಾನೆಸ್ತಿಣ್ ಬೆನ್ನಿ
ಲಸ್ರಾದೊನ್ ಹಾಜರ್ ಆಸ್‌ಲ್ಲ್ಯಾ ಸಮೇಸ್ತಾಂಕ್ ವಾಲ್ಟರ್
ಲಸ್ರಾದೊಚೊ ತರ್ಜಣ್ ಮಟ್ವ್ಯಾ ಕಾಣಿಯಾಂಚೊ ಬೂಕ್ ’ಪಾಟಿಂ
ಪರ್ತಲ್ಲಿಂ ಲ್ಹಾರಾಂ’ ಹಾಜರ್ ಆಸ್‌ಲ್ಲ್ಯಾ
ಸಮೇಸ್ತಾಂಕ್ ಕಾಣಿಕೆರುಪಾರ್ ದಿಲೊ.
ಪಯ್ಣಾರಿ
ಸಂಪಾದಕ್ ವಲ್ಲಿ ಕ್ವಾಡ್ರಸಾನ್ ಕಾರ್ಯೆಂ ಚಲವ್ನ್ ವೆಲೆಂ.
- ಆಮ್ಚೊ ಭಾತ್ಮಿ | 
