 |
|
[ಖಬರ್]
ಗಲ್ಫಾಂತ್ಲ್ಯಾ ಕೊಂಕಣಿ
ವಾವ್ರಾಚೆರ್ ಏಕ್ ಪರಿಸಂವಾದ್ |
|
ಜ್ಯೂನ್ 10: ದೀಸ್ಪಡ್ತೊ ಗ್ರಾಸ್ ಜೊಡುಂಕ್ ಪರ್ಗಾಂವಾಕ್
ವಚುನ್ ಸಯ್ತ್ ಕೊಂಕಣಿ ಬಾವ್ಟೊ ಉಭೊ ಕರುನ್ ಕೊಂಕಣಿ
ವಾವ್ರ್ ಕರುನ್ ಆಯಿಲ್ಲ್ಯಾ, ಪ್ರತ್ಯೇಕ್ ಜಾವ್ನ್
ಗಲ್ಫಾಂತ್ ಜಾಲ್ಲ್ಯಾ ಕೊಂಕಣಿ ವಾವ್ರಾಚಿ ಎಕಾಮೆಕಾ ಒಳೊಕ್
ಕರುನ್ ದಿಂವ್ಚ್ಯಾ ಇರಾದ್ಯಾನ್ ಆಶಾವಾದಿ ಪ್ರಕಾಶನಾನ್
ಸನ್ವಾರಾ, ಜ್ಯೂನ್ 10 ತಾರಿಕೆರ್ ಏಕ್ ಡಿಜಿಟಲ್
ಪರಿಸಂವಾದ್ ಆಸಾ ಕೆಲೆಂ. ಅಖಿಲ್ ಭಾರತೀಯ್ ಕೊಂಕಣಿ
ಪರಿಶದೆಚಿ ಆಧ್ಲಿ ಅಧ್ಯಕ್ಷ್ ಬಾಯ್ ಉಶಾ ರಾಣೆನ್ ಉಗ್ತಾವಣ್
ಉಲವ್ಪಾಂತ್ ’ವಿದೇಶಾಂತ್ ಕೊಂಕಣಿ ವಾವ್ರ್ ಕೆಲ್ಲೊ ವಿವರ್
ಕೊಂಕಣಿಂತ್ ಎಕಾ ಪುಸ್ತಕಾರುಪಾರ್ ಪರ್ಗಟುನ್ ಯೆಂವ್ಕ್
ಜಾಯ್’ ಆನಿ ಆಮ್ಚ್ಯಾ ಲೊಕಾಕ್ ತ್ಯಾ ವಾವ್ರಾಚಿ ಮಾಹೆತ್
ಮೆಳುಂಕ್ ಜಾಯ್ ಮ್ಹಣಾಲಿ. ಮುಖೆಲ್ ಸಯ್ರೊ ದೊ|ಆಸ್ಟಿನ್
ಪ್ರಭುನ್ ಆಮಿ ಎಕಾ ಸಾಂಕ್ಳಿಚ್ಯಾ ಗಾಂಚಿಪರಿಂ
ವೆಗ್-ವೆಗಳ್ಯಾ ಲಿಪಿಚ್ಯಾಂನಿ ಸಾಂಗಾತಾ ಮೆಳುನ್ ಎಕಾ
ಮನಾನ್ ಕೊಂಕಣಿ ವಾವ್ರ್ ಕರುಂಕ್ ಜಾಯ್ ಮ್ಹಣಾಲೊ. ಉತ್ತರ್
ಕರ್ನಾಟಕಾಚೊ ನಾಮ್ನೆಚೊ ತಿಯಾತ್ರಿಸ್ತ್ ಸಿಮ್ಸನ್
ಲೊಪೆಜಾನ್ ಕೊಂಕಣಿ ಕಾಂತಾರಾಂ, ತಿಯಾತ್ರಾಂ ಮುಖಾಂತ್ರ್
ಕಶೆಂ ಹೆರ್ ಪ್ರಾಂತ್ಯಾಚ್ಯಾ ಕೊಂಕಣಿ ಲೊಕಾಂಕ್ ಮೆಳುಂಕ್
ಅಪ್ಣಾಕ್ ಆವ್ಕಾಸ್ ಲಾಭ್ಲೊ ಅಶೆಂಚ್ ಜಾಯ್ತೆಂ ಕೊಂಕಣಿ
ತಾಲೆಂತ್ ಮುಕಾರ್ ಯೆವ್ಪಾಕ್ ಆವ್ಕಾಸ್ ಕರುಂಕ್ ಅಸಲಿಂ
ವೆಬಿನಾರಾಂ ಸಕುಂದಿತ್ ಮ್ಹಣಾಲೊ. ಧೆಂಫೆ ಕೊಲೆಜಿಚ್ಯಾ
ಕೊಂಕಣಿ ವಿಭಾಗಾಚಿ ಮುಖೆಸ್ತ್ ಬಾಯ್ ಅಂಜು ಸಾಖರ್‌ದಾಂಡೆನ್
ಅಪ್ಲ್ಯಾ ಉಲವ್ಪಾಂತ್ ಬಾಬ್ ದಾಮೋದರ್ ಮಾವ್ಜೊ, ಬಾಯ್ ಹೇಮಾ
ನಾಯ್ಕ್, ಬಾಬ್ ಎಡ್ವಿನ್ ಜೆ.ಎಫ್.ಡಿ’ಸೋಜ್ ಆನಿ
ಹೆರಾಂಚ್ಯಾ ಕಾದಂಬರೆಂನಿ ಗಲ್ಫಾಚೆಂ ಜಿವಿತ್
ಪಿಂತ್ರಾಯಿಲ್ಲೆಂ ಆಮಿ ಅಧ್ಯಯನ್ ಕರುನ್ ಆಯ್ಲ್ಯಾಂವ್ ಪುಣ್
ಪಯ್ಲೆಪಾವ್ಟಿಂ ಆಮ್ಕಾಂ ಹಿ ಸಂಧಿ ಮೆಳ್ಳಿ -
ಗಲ್ಫಾಂತ್ಲ್ಯಾ ಕೊಂಕಣಿ ವಾವ್ರಾವಿಶಿಂ ಸಮ್ಜುಂಕ್, ಅಸಲಿಂ
ಕಾಮಾಂ ಫುಡೆಂಯ್ ಜಾಂವ್ಕ್ ಜಾಯ್ ಮ್ಹಣಾಲಿ.
ಪರಿಸಂವಾದಾಚ್ಯಾ ಪಯ್ಲ್ಯಾ ವಾಂಟ್ಯಾಂತ್ ಸ್ಮಿತಾ ಶೆಣಯ್
ಹಿಣೆಂ ’ಪರ್ಗಾಂವೊ ವಾವ್ರ್ ಅಮೊಲಿಕ್, ಪುಣ್ ಆಮಿ ಕೆದಿಂಚ್
ತ್ಯಾ ವಾವ್ರಾಕ್ ಮೋಲ್ ದಿಲ್ಲೆಂ ನಾ, ಸಾಮಾಜಿಕ್
ಸ್ಥಿತಿಯಂತರಾಂತ್ ಕೊಂಕಣಿ ಲೋಕ್ ಭಾಶಿಕ್/ಧರ್ಮಿಕ್
ಬಂಧಡೆಕ್ ಲಾಗುನ್ ಗೊಂಯಾಂ ಸೊಡುನ್ ಲಾಗ್ಶಿಲ್ಯಾ
ರಾಜ್ಯಾಂನಿ ವಚುನ್ ಜಿಯೆಂವ್ಕ್ ಲಾಗ್ಲೊ ಆನಿ ತೆದ್ನಾಂ
ತಾಣಿಂ ತಾಂಚ್ಯಾ ಕುಟ್ಮಾಸವೆಂ ಫಕತ್ ದೊನಾಂಕ್ ಅಪ್ಣಾಸವೆಂ
ವ್ಹೆಲೆಂ; ಅಪ್ಲೊ ದೇವ್ ಆನಿ ಅಪ್ಲಿ ಆವಯ್ ಭಾಸ್.
ತಿತ್ಲೆಂಚ್ ನ್ಹಯ್, ಅಪ್ಲ್ಯಾ ಆವಯ್ ಭಾಶೆಚೊ ಮೋಗ್ ಕರುನ್
ತಿಚೊ ಪೋಸ್ ಸಯ್ತ್ ಕೆಲೊ’ ಮ್ಹಣಾಲಿ. ಶೈಲೇಂದ್ರ ಮೆಹ್ತಾನ್
ಸಯ್ರ್ಯಾಂಚಿ ಒಳೊಕ್ ಕರುನ್ ದಿತಚ್ ಪರಿಸಂವಾದಾಚಿ
ಸುರ್ವಾತ್ ಕರುನ್ ಹೇಮಾಚಾರ್ಯನ್ ಸತ್ತರಾವ್ಯಾ
ದಾಕ್ಡ್ಯಾಥಾವ್ನ್ ಮೊಟ್ವಿ ಒಳೊಕ್ ಕರುನ್ ದಿವುನ್
ಉಪ್ರಾಂತ್ ದಾಯ್ಜಿದುಭಾಯ್ ಸಂಘಟನಾಚ್ಯಾ ವಾವ್ರಾವಿಶಿಂ
ತಾಂಚ್ಯಾ ದಿಶ್ಟಾವ್ಯಾವಿಶಿಂ, ತಾಂಚ್ಯಾ ಸುರ್ವಿಲ್ಲ್ಯಾ
ವಾವ್ರಾಂತ್ ಫುಡ್ ಕರುಂಕ್ ಮೆಳ್‌ಲ್ಲ್ಯಾ ಅಡ್ಚಣೆವಿಶಿಂ
ಸವಿಸ್ತಾರ್ ರಿತಿನ್ ಉಲವ್ನ್, ಆಜ್ ಕೊಂಕಣಿಂತ್
ದಾಯ್ಜಿದುಭಯ್ ಏಕ್ ವ್ಹಡ್ ರೂಕ್ ಜಾವ್ನ್ ಮಂಗ್ಳುರಾಂತ್
ಸಯ್ತ್ ದಾಯ್ಜಿದುಭಾಯ್ ಸಂಘಟನಾಚೆ ಸಾಂದೆ ಗಾಂವಾರ್ ಗಾಂವ್
ವಚುನ್ ’ಯೆಯಾ ಆಮಿ ಕೊಂಕಣಿ ಉಲವ್ಯಾಂ’ ಮ್ಹಳ್ಳಿಂ ಕಾರ್ಯಿಂ
ಚಲವ್ನ್ ಆಸಾತ್ ಮ್ಹಣಾಲೊ.
ತ್ಯೇ ಉಪ್ರಾಂತ್ ಕ್ಲೆರೆನ್ಸ್ ಕೈಕಂಬಾನ್
ಮಸ್ಕತಾಂತ್ಲ್ಯಾ ಬರ್ಪಿ ಮಿತ್ರಾಚ್ಯಾ ಸವಿಸ್ತಾರ್
ವಾವ್ರಾವಿಶಿಂ ಉಲವ್ನ್, ಮಸ್ಕತಾಂತ್ಲ್ಯಾ ಸಾಹಿತಿಕ್
ತಾಲೆಂತಾಂನಿ ಅಪ್ಲಿಂ ತಾಲೆಂತಾಂ ಫಕತ್ ಮಸ್ಕತಾಕ್ ಮಾತ್ರ್
ಸೀಮಿತ್ ಕರುನ್ ದವರಿನಾಸ್ತಾಂ, ದಾಯ್ಜಿದುಭಯ್.ಕೊಮ್,
ಮಾಯ್ಭಾಸ್.ಕೊಮ್, ದಾಯ್ಜ್.ಕೊಮ್ ಅಶೆಂ ಸರ್ವ್ ನೇಮಾಳಿಂ
ತಶೆಂಚ್ ಜಾಳಿಜಾಗ್ಯಾಂಕ್ ತೆಂಕೊ ದಿವುನ್ ಆಯ್ಲೆಂ
ಮ್ಹಣಾಲೊ. ಖತಾರಾಂತ್ ಪಾಟ್ಲ್ಯಾ ಪಂಚ್ವೀಸ್-ತೀಸ್ ವರ್ಸಾಂ
ಥಾವ್ನ್ ಚಲುನ್ ಆಸ್ಚ್ಯಾ ವಾವ್ರಾಚಿ ಮಾಹೆತ್ ದಿವ್ನ್
ಗ್ಲ್ಯಾಡ್ಸನ್ ಅಲ್ಮೇಡಾನ್ ಹೊಚ್ ವಾವ್ರ್ ಹಾಚ್ಯಾಕೀ ಬರೆ
ರಿತಿನ್ ಮುಕಾರುನ್ ವ್ಹರ್ಚೊ ಆಶಾವಾದ್ ವೆಕ್ತ್ ಕೆಲೊ.
ತ್ಯೇ ಉಪ್ರಾಂತ್ ಕುವೆಯ್ಟಾಂತ್ಲ್ಯಾ ಕೊಂಕಣಿ ವಾವ್ರಾವಿಶಿಂ
ಉಲವ್ನ್ ಬಾಯ್ ಐಡಾ ಡಿಸಿಲ್ವಾ ಪಾಲಡ್ಕಾನ್ ಕೊಂಕಣಿ
ಕುಳ್ವಾರ್ ಕುವೇಯ್ಟ್ ಸಂಘಟನಾಚ್ಯಾ ಬುನ್ಯಾದಿ ವಾವ್ರಾಚಿ
ತಶೆಂಚ್ ಆಶಾವಾದಿ ಪ್ರಕಾಶನಾಚ್ಯಾ ಸುರ್ವಿಲ್ಯಾ ವಾವ್ರಾಚಿ
ಒಳೊಕ್ ಕರುನ್ ದಿತಚ್ ವಲ್ಲಿ ಕ್ವಾಡ್ರಸಾನ್ ಸವಿಸ್ತಾರ್
ರಿತಿನ್ ಕುವೆಯ್ಟಾಂತ್ ಜಾಲ್ಲ್ಯಾ ಕೊಂಕಣಿ ಸಾಹಿತ್ಯಿಕ್
ವಾವ್ರಾಚಿ ಒಳೊಕ್ ಕರುನ್ ದಿಲಿ; ಸತ್ತಾವಿಸ್ ಕೊಂಕಣಿ
ಪುಸ್ತಕಾಂ ಆಶಾವಾದಿ ಪ್ರಕಾಶನಾನ್ ಪರ್ಗಟ್ಲಿಂ, ಪಾಂತೀಸ್
ಮಯ್ನ್ಯಾಳಿಂ ಕಾಮಾಸಾಳಾಂ, ಬಾತ್ತೀಸ್ ಪುಸ್ತಕ್ ಸಮೀಕ್ಶಾ,
ಸ ಕಥಾಪಾಠ್, ಕೊಂಕಣಿ ಅಭಿಯಾನ್, ಅಟ್ಟಾವೀಸ್ ಮಯ್ನ್ಯಾಳೆ
ಕವಿತಾ ಸ್ಪರ್ಧೆ, ದೋನ್ ವರ್ಸಾಚೆ ಕವಿ, ತಶೆಂಚ್ ದೋನ್
ವರ್ಸಾಚೆ ಕಥಾಕಾರ್ ಪುರಸ್ಕಾರ್, ತಶೆಂಚ್ 2004 ಥಾವ್ನ್
2007 ಪರ್ಯಾಂತ್ ವರ್ಸಾಳೆ ಸಾಹಿತಿಕ್ ಸ್ಪರ್ಧೆ ಮಾಂಡುನ್
ಹಾಡ್ಲೆ ಮಾತ್ರ್ ನ್ಹಯ್, ಮುಂಬಯ್ ಆನಿ ಗಾಂವಾಂತ್ ಸಯ್ತ್
ಕೊಂಕಣಿ ಕಾಮಾಸಾಳಾಂ ಚಲವ್ನ್ ವ್ಹೆಲಿಂ ಮ್ಹಣಾಲೊ.
ಪರಿಸಂವಾದಾಚೊ ವಾಂಟೊ ಗೌರಂಗ್ ಭಂಡಾಯೆನ್ ಚಲವ್ನ್ ವ್ಹೆಲೊ.
ಅಖೇರಿಚೊ ವಾಂಟೊ ಶೈಲೇಂದ್ರ ಮೆಹ್ತಾನ್ ಚಲವ್ನ್ ವ್ಹೆಲೊ.
ಕನ್ಸೆಪ್ಟಾ ಫೆರ್ನಾಂಡಿಸಾನ್ ಅಪ್ಲ್ಯಾ ಸಂಪ್ಣೆಚ್ಯಾ
ಉಲವ್ಪಾಂತ್, ಪರಿಸಂವಾದಾಂತ್ ಜಾಲ್ಲ್ಯಾ ಸರ್ವ್
ಉಲವ್ಪಾಂಚೆರ್ ಏಕ್ ನದರ್ ಘಾಲುನ್ ಪ್ರಮುಕ್ ವಿಶ್ಯಾಂಚೆರ್
ಉಜ್ವಾಡ್ ಫಾಂಕಯಿತ್ತ್, ಹೆಂ ಖರೆಂಚ್ ಏಕ್ ಜಾಗತಿಕ್
ಪರಿಸಂವಾದ್, ಆನಿ ಹಿ ಏಕ್ ಸುರ್ವಾತ್ ಮಾತ್ರ್, ಫುಡೆಂ
ಎಕೆಕಾ ರಾಶ್ಟ್ರಾಂತ್ ಜಾಲ್ಲ್ಯಾ ಸಮಗ್ರ್ ಕೊಂಕಣಿ
ವಾವ್ರಾಚೆರ್ ಖೊಲಾಯೆಚೆಂ ಅಧ್ಯಯನ್ ಚಲಂವ್ಚ್ಯಾ ದಿಶೆನ್
ಪರಿಸಂವಾದ್ ಮಾಂಡುನ್ ಹಾಡುಂಕ್ ಉಲೊ ದಿಲೊ.
ವಲ್ಲಿ ಕ್ವಾಡ್ರಸಾನ್ ಧಿನ್ವಾಸ್ ಪಾಟವ್ನ್ ಜುಲಾಯ್ 1
ತಾರಿಕೆರ್ ’ಸಿರಿವಂತಾಚ್ಯಾ ಸಾಹಿತ್ಯಾಚೊ ಅಭ್ಯಾಸ್’
ಸುರ್ವಾತ್ ಜಾಂವ್ಕ್ ಆಸ್ಚ್ಯಾ ಕಥಾಪಾಠ್ ಚೊವ್ತ್ಯಾ
ಶಿಂಕಳೆಚಿ ತಶೆಂಚ್ ಸಿರಿವಂತಾಚಿ ಮೊಟ್ವಿ ಒಳೊಕ್ ಕರುನ್
ದಿಲಿ.
ವರ್ದಿ:
ಆಮ್ಚೊ ಭಾತ್ಮಿ
|
|
[खबर]
गलफांतल्या कोंकणी वावराचेर एक परिसंवाद |
|
यून १०: दीस्पडतो ग्रास जोडुंक पर्गांवाक वचून सयत
कोंकणी बावटो उभो करून कोंकणी वावर करून
आयिल्ल्या, प्रत्येक जावन गलफांत जाल्ल्या कोंकणी
वावराची एकामेका ओळोक करून दिंवच्या इराद्यान
आशावादी प्रकाशनान सन्वारा, ज्यून १० तारिकेर एक
डिजिटल परिसंवाद आसा केलें. अखील भारतीय कोंकणी
परिशदेची आधली अध्यक्ष बाय उशा राणेन उग्तावण
उलवपांत ’विदेशांत कोंकणी वावर केल्लो विवर
कोंकणिंत एका पुसतकारुपार पर्गटून येवंक जाय’ आनी
आमच्या लोकाक त्या वावराची माहेत मेळुंक जाय
म्हणाली. मुखेल सयरो दो|आसटीन प्रभून आमी एका
सांकळिच्या गांचिपरीं वेग-वेगळ्या लिपिच्यांनी
सांगाता मेळून एका मनान कोंकणी वावर करुंक जाय
म्हणालो. उत्तर कर्नाटकाचो नाम्नेचो तियात्रिसत
सिम्सन लोपेजान कोंकणी कांतारां, तियात्रां
मुखांत्र कशें हेर प्रांत्याच्या कोंकणी लोकांक
मेळुंक अपणाक आवकास लाभलो अशेंच जायतें कोंकणी
तालेंत मुकार येवपाक आवकास करुंक असलीं वेबिनारां
सकुंदीत म्हणालो. धेंफे कोलेजिच्या कोंकणी
विभागाची मुखेसत बाय अंजू साखरदांडेन अपल्या
उलवपांत बाब दामोदर मावजो, बाय हेमा नायक, बाब
एडवीन जे.एफ.डी’सोज आनी हेरांच्या कादंबरेंनी
गलफाचें जिवीत पिंत्रायिल्लें आमी अध्ययन करून
आयल्यांव पूण पयलेपावटीं आमकां ही संधी मेळ्ळी -
गलफांतल्या कोंकणी वावराविशीं समजुंक, असलीं कामां
फुडेंय जावंक जाय म्हणाली.
परिसंवादाच्या
पयल्या वांट्यांत स्मिता शेणय हिणें ’पर्गांवो
वावर अमोलीक, पूण आमी केदिंच त्या वावराक मोल
दिल्लें ना, सामाजीक स्थितियंतरांत कोंकणी लोक
भाशीक/धर्मीक बंधडेक लागून गोंयां सोडून लागशिल्या
राज्यांनी वचून जियेवंक लागलो आनी तेदनां ताणीं
तांच्या कुटमासवें फकत दोनांक अपणासवें व्हेलें;
अपलो देव आनी अपली आवय भास. तितलेंच न्हय, अपल्या
आवय भाशेचो मोग करून तिचो पोस सयत केलो’ म्हणाली.
शैलेंद्र मेहतान सयऱ्यांची ओळोक करून दितच
परिसंवादाची सुर्वात करून हेमाचाऱ्यन सत्तराव्या
दाकड्याथावन मोटवी ओळोक करून दिवून उपरांत
दायजिदुभाय संघटनाच्या वावराविशीं तांच्या
दिश्टाव्याविशीं, तांच्या सुर्विल्ल्या वावरांत
फूड करुंक मेळल्ल्या अडचणेविशीं सविसतार रितीन
उलवन, आज कोंकणिंत दायजिदुभय एक व्हड रूक जावन
मंगळुरांत सयत दायजिदुभाय संघटनाचे सांदे गांवार
गांव वचून ’येया आमी कोंकणी उलव्यां’ म्हळ्ळीं
काऱ्यीं चलवन आसात म्हणालो.
त्ये उपरांत क्लेरेन्स कैकंबान मसकतांतल्या
बर्पी मित्राच्या सविसतार वावराविशीं उलवन,
मसकतांतल्या साहितीक तालेंतांनी अपलीं तालेंतां
फकत मसकताक मात्र सीमीत करून दवरिनासतां,
दायजिदुभय.कोम, मायभास.कोम, दायज.कोम अशें सर्व
नेमाळीं तशेंच जाळिजाग्यांक तेंको दिवून आयलें
म्हणालो. खतारांत पाटल्या पंचवीस-तीस वर्सां थावन
चलून आसच्या वावराची माहेत दिवन ग्ल्याडसन
अल्मेडान होच वावर हाच्याकी बरे रितीन मुकारून
व्हर्चो आशावाद वेक्त केलो. त्ये उपरांत
कुवेयटांतल्या कोंकणी वावराविशीं उलवन बाय ऐडा
डिसिलवा पालडकान कोंकणी कुळवार कुवेयट संघटनाच्या
बुन्यादी वावराची तशेंच आशावादी प्रकाशनाच्या
सुर्विल्या वावराची ओळोक करून दितच वल्ली
क्वाड्रसान सविसतार रितीन कुवेयटांत जाल्ल्या
कोंकणी साहित्यीक वावराची ओळोक करून दिली;
सत्तावीस कोंकणी पुसतकां आशावादी प्रकाशनान
पर्गटलीं, पांतीस मयन्याळीं कामासाळां, बात्तीस
पुसतक समीक्षा, स कथापाठ, कोंकणी अभियान, अट्टावीस
मयन्याळे कविता स्पर्धे, दोन वर्साचे कवी, तशेंच
दोन वर्साचे कथाकार पुरसकार, तशेंच २००४ थावन २००७
पऱ्यांत वर्साळे साहितीक स्पर्धे मांडून हाडले
मात्र न्हय, मुंबय आनी गांवांत सयत कोंकणी
कामासाळां चलवन व्हेलीं म्हणालो.
परिसंवादाचो वांटो गौरंग भंडायेन चलवन व्हेलो.
अखेरिचो वांटो शैलेंद्र मेहतान चलवन व्हेलो.
कन्सेपटा फेर्नांडिसान अपल्या संपणेच्या उलवपांत,
परिसंवादांत जाल्ल्या सर्व उलवपांचेर एक नदर घालून
प्रमूक विश्यांचेर उज्वाड फांकयित्त, हें खरेंच एक
जागतीक परिसंवाद, आनी ही एक सुर्वात मात्र, फुडें
एकेका राश्ट्रांत जाल्ल्या समग्र कोंकणी वावराचेर
खोलायेचें अध्ययन चलंवच्या दिशेन परिसंवाद मांडून
हाडुंक उलो दिलो.
वल्ली क्वाड्रसान
धिन्वास पाटवन जुलाय १ तारिकेर ’सिरिवंताच्या
साहित्याचो अभ्यास’ सुर्वात जावंक आसच्या कथापाठ
चोवत्या शिंकळेची तशेंच सिरिवंताची मोटवी ओळोक
करून दिली.
वर्दी:
आमचो भात्मी
|
|
[Khobor]
Golfantlea Konknni vauracher ek Porisomvad |
|
June 10: Dispoddoto gras zoddunk porgamvak
vochun soit Konknni bautto ubho korun Konknni
vaur korun ayil'lea, protyek zaun golfant
zal'lea Konknni vaurachi ekameka ollok korun
dimvchea iradean Ashawadi Prakashanan
sonvara, jyun 10 tariker ek ddijittol porisomvad
asa kelem. Okhil bharti-i Konknni porixodechi
adhli odhyokx bai Usha Ranen ugtaunn
uloupant ’Videxant Konknni vaur kel'lo vivr
Konknnint eka pustokarupar porgottun yeunk zai’
ani amchea lokak tea vaurachi mahet mellunk zai
mhonnali. Mukhel soiro do|Austin Prabhun
ami eka sankllichea ganchiporim veg-vegllea
lipicheamni sangata mellun eka monan Konknni
vaur korunk zai mhonnalo. Ut'tor kornattokacho
namnecho tiatrisot Samson Lopezan
Konknni kantaram, tiatram mukhantr koxem her
pranteachea Konknni lokank mellunk opnnak aukas
labhlo oxench zaitem Konknni talent mukar yeupak
aukas korunk oslim vebinaram sokundit mhonnalo.
Dhempe Collegichea Konknni vibhagachi
mukhesot bai Anju Sakhardandden oplea
uloupant bab Damodor Mauzo, bai
Hema Naik, bab Edwin J.F.D’Souza
ani heranchea kadomboremni golfachem jivit
pintrayil'lem ami odhyoin korun aileamv punn
poilepauttim amkam hi sondhi mell'lli -
golfantlea Konknni vauravixim somzunk, oslim
kamam fuddem-i zaunk zai mhonnali.
Porisomvadachea poilea vantteant Smitha
Shennoy hinnem ’porgamvo vaur omolik, punn
ami kedinch tea vaurak mol dil'lem na, samajik
sthitiyontorant Konknni lok bhaxik/dhormik
bondhddek lagun Gõyam soddun lagxilea rajeamni
vochun jieunk laglo ani tednam tannim tanchea
kuttmasovem fokot donank opnnasovem vhelem; oplo
devo ani opli auy bhas. Titlench nhoi, oplea auy
bhaxecho mog korun ticho pos soit kelo’
mhonnali. Shailendra Mehtan soireanchi
ollok korun ditoch porisomvadachi survat korun
Hemacharyan sot'toravea dakddeathaun
mottvi ollok korun divun uprant daijidubai
songhttonachea vauravixim tanchea
dixttaveavixim, tanchea survil'lea vaurant fudd
korunk melll'lea oddchonnevixim sovisotar ritin
uloun, az Konknnint daijidubai ek vhodd ruk zaun
mongllurant soit daijidubhai songhttonache sande
gamvar gamv vochun ’yeya ami Konknni ulveam’
mholl'llim karyim choloun asat mhonnalo.
Tye uprant Clarence Kaikamban
moskotantlea Borpi Mitrachea sovisotar
vauravixim uloun, Muscatantlea sahitik
talentamni oplim talentam fokot moskotak matr
simit korun dourinasotam,
Daijidubai.com,
Maibhaas.com,
daaiz.com oxem
sorv nemallim toxench zallizageank tenko divun
ailem mhonnalo. Qatarant pattlea ponchvis-tis
vorsam thaun cholun aschea vaurachi mahet divn
Gladson Almeidan hoch vaur hacheaki
bore ritin mukarun vhorcho axavad vekt kelo. Tye
uprant kuveyttantlea Konknni vauravixim uloun
bai Ida DSilva Paladkan Konknni Kullvar
Kuwait songhttonachea buneadi vaurachi toxench
Ashawadi Prakashanachea survilea vaurachi ollok
korun ditoch Valley Quadrosas sovisotar
ritin Kuwaitant zal'lea Konknni sahityik
vaurachi ollok korun dili; sot'tavis Konknni
pustokam Ashawadi Prakashanan
porgottolim, pantis moineallim kamasallam,
bat'tis pustok somikxa, so kothapatth, Konknni
obhian, ott'ttavis moinealle kovita spordhe, don
vorsache kovi, toxench don vorsache kothakar
pursokar, toxench 2004 thaun 2007 poreant
vorsalle sahitik spordhe manddun haddle matr
nhoi, mumboi ani gamvant soit Konknni kamasallam
choloun vhelim mhonnalo.
Porisomvadacho vantto gourong bhonddayen
choloun vhelo. Okhericho vantto Shailendra
Mehtan choloun vhelo. Concepta
Fernandesan oplea sompnnechea uloupant,
porisomvadant zal'lea sorv uloupancher ek nodor
ghalun promuk vixeancher ujvadd fankyit't, hem
khorench ek zagtik porisomvad, ani hi ek survat
matr, fuddem ekeka raxttrant zal'lea somgr
Konknni vauracher kholayechem odhyoin
cholomvchea dixen porisomvad manddun haddunk ulo
dilo.
Valley Quadrosan dhinvas
pattoun July 1 tariker ’Sirivontachea
sahiteacho obheas’ survat zaunk aschea
Kothapatth choutea xinkllechi toxench
Sirivontachi mottvi ollok korun dili.
Vordi:
Amco Bhatmi
| |
|
2004 ಥಾವ್ನ್
2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ
ದಾಯ್ಜ್.ಕೊಮ್ ಚೆರ್
ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ
ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್
ಲಾಭಯ್ತೆಲ್ಯಾಂವ್. | |
| |
![]() |
|
