[ಖಬರ್] ಗಂಟಾಲ್ಕಟ್ಟೆಂತ್ ಯುವಜಣಾಂತ್ ಸಾಹಿತಿಕ್ ಕಾರ್ಯಾಗಾರ್

ಗಂಟಾಲ್ಕಟ್ಟೆಂತ್ ಯುವಜಣಾಂತ್ ಕೊಂಕಣಿ ಸಾಹಿತಿಕ್ ಕಾರ್ಯಾಗಾರ್

6 ಮಾಯ್ 2023: ಆಶಾವಾದಿ ಪ್ರಕಾಶನಾನ್ ಐ.ಸಿ.ವೈ.ಎಮ್ ಆನಿ ವೈ.ಸಿ.ಎಸ್ ಹಾಂಚ್ಯಾ ಸಹಯೋಗಾಖಾಲ್ ಗಂಟಾಲ್ಕಟ್ಟೆಚ್ಯಾ ನಿತ್ಯಾದಾರ್ ಮಾಯೆಚ್ಯಾ ಇಗರ್ಜೆಚ್ಯಾ ಸಭಾಸಾಲಾಂತ್ ಆದೇಸಾಚೆಂ ಸಾಹಿತಿಕ್ ಕಾರ್ಯಾಗಾರ್ ಚಲವ್ನ್ ವ್ಹೆಲೆಂ.  ಫಿರ್ಗಜೆಚೊ ವಿಗಾರ್ ಮಾ|ಬಾ|ರೊನಾಲ್ಡ್ ಡಿಸೋಜಾಚ್ಯಾ ಅಧ್ಯಕ್ಷ್‌ಪಣಾಖಾಲ್, ಮಾಗ್ಣ್ಯಾಂತ್ ಸುರ್ವಾತ್ ಕರುನ್ ಹ್ಯಾ ಕಾರ್ಯಾಗಾರಾಚೆಂ ಉಗ್ತಾವಣ್ ಜಾತಚ್ ಅಪ್ಲ್ಯಾ ಯೆವ್ಕಾರ್ ಉಲವ್ಪಾಂತ್ "ಕೊಂಕಣಿ ಭಾಸೆಚೊ ಮೋಗ್ ಕರ್ಚೊ, ತಿಚೊ ಪೋಸ್ ಕರ್ಚಿ ಜವಾಭ್ದಾರಿ ಆಮಾಂ ಸರ್ವಾಂಚಿ ಜಾಲ್ಲ್ಯಾನ್ ತ್ಯಾ ಇರಾದ್ಯಾನ್ ಆಮ್ಚ್ಯಾ ಸಮಾಜೆಂತ್ ಆಸ್ಚ್ಯಾ ಸಾಹಿತಿಕ್ ತಾಲೆಂತಾಕ್ ವ್ಹಳ್ಕುನ್, ತಾಂಕಾಂ ಮುಕಾರ್ ಯೆಂವ್ಚಿ ವಾಟ್ ರುತಾಂ ಕರ್ಚೆದಿಶೆನ್ ಅಸಲಿಂ ಕಾರ್ಯಾಗಾರಾಂ ಮಾಂಡುನ್ ಹಾಡ್ಚಿ ಗರ್ಜ್ ಆಜ್ ಉದೆಲ್ಯಾ" ಮ್ಹಣಾಲೆ. ಬೆನಿಟಾ ಮಿನೇಜಸಾನ್ ಕಾರ್ಯಾಗಾರಾಚೆಂ ಸೂತ್ರ್ ಸಂಚಾಲನ್ ಕೆಲೆಂ, ಐ.ಸಿ.ವೈ.ಎಮ್. ಅಧ್ಯಕ್ಷ್ ನೋಲನ್ ಮಿರಾಂದಾ, ವೈ.ಸಿ.ಎಸ್. ಅಧ್ಯಕ್ಷಿಣ್ ಲಿವ್ಯಾ ಸೆರಾವೊ, ಪ್ರಿನ್ಸಿಟಾ ದಾಂತಿಸ್, ಎಡೆಲ್ ಮಿನೇಜಸ್ ಆನಿ ವೈ.ಸಿ.ಎಸ್. ಕಾರ್ಯದರ್ಶಿ ಮೆಲಿಶಾ ಮಿರಾಂದಾ ಹಾಣಿಂ ಹೆಂ ಕಾರ್ಯಾಗಾರ್ ಚಲವ್ಪಿಂಚಿ ಒಳೊಕ್ ಕರುನ್ ದಿಲಿ. ಮಾ|ರೋಯ್ಸನ್ ಫೆರ್ನಾಂಡಿಸ್ (ಸಂಪಾದಕ್ - ಉಜ್ವಾಡ್ ಪಂದ್ರಾಳೆಂ), ಮಾ|ಚೇತನ್ ಲೋಬೊ (ಸಂಪಾದಕ್ - ಸೆವಕ್ ಮಯ್ನ್ಯಾಳೆಂ) ತಶೆಂಚ್ ವಲ್ಲಿ ಕ್ವಾಡ್ರಸ್ (ಸಂಪಾದಕ್ - ಪಯ್ಣಾರಿ) ಹಾಂಕಾಂ ವಿಗಾರಾನ್ ಶೊಲಾಂ ಪಾಂಗ್ರುನ್ ಫುಲಾಂಚೊ ಬುಕ್ಕೊ ತಶೆಂಚ್ ಯಾದಸ್ತಿಕಾ ದಿವುನ್ ಸ್ವಾಗತ್ ಕೆಲೊ. ವೆದಿಚೆರ್ ಫಿರ್ಗಜ್ ವಿಗಾರ್, ಗೊವ್ಳಿಕ್ ಪರಿಶದೆಚಿ ಕಾರ್ಯದರ್ಶಿ ಲಿಡಿಯಾ ಡಿಸೋಜ್, ಐ.ಸಿ.ವೈ.ಎಮ್ ಅಧ್ಯಕ್ಷ್ ಆನಿ ವೈ.ಸಿ.ಎಸ್.ಅಧ್ಯಕ್ಷ್ ಹಾಜರ್ ಆಸ್ಲಿಂ.

’ಖಬ್ರೊ ಕಶ್ಯೊ ಬರಂವ್ಚ್ಯೊ’ ವಿಶ್ಯಾಚೆರ್ ಮಾ|ರೋಯ್ಸನ್ ಫೆರ್ನಾಂಡಿಸ್ (ಸಂಪಾದಕ್ - ಉಜ್ವಾಡ್ ಪಂದ್ರಾಳೆಂ) ಹಾಣಿಂ ತರ್ಭೆತ್ ದಿಲಿ, ’ಲೇಖನಾಂ ಕಶಿಂ ಬರಂವ್ಚಿಂ’ ವಿಶ್ಯಾಚೆರ್ ತರ್ಭೆತ್‌ದಾರ್ ಮಾ|ಚೇತನ್ ಲೋಬೊ (ಸಂಪಾದಕ್ - ಸೆವಕ್ ಮಯ್ನ್ಯಾಳೆಂ) ಹಾಣಿಂ ತರ್ಭೆತ್ ದಿಲಿ.

’ಮೊಟ್ವ್ಯೊ ಕಾಣಿಯೊ ಕಶ್ಯೊ ಬರಂವ್ಚ್ಯೊ’ ವಿಶ್ಯಾಚೆರ್ ತರ್ಭೆತ್‌ದಾರ್ ವಲ್ಲಿ ಕ್ವಾಡ್ರಸ್ (ಸಂಪಾದಕ್ - ಪಯ್ಣಾರಿ) ಹಾಣಿಂ ತರ್ಭೆತ್ ದಿಲಿ.

ದನ್ಪಾರಾಂ ಜೆವ್ಣಾ ಉಪ್ರಾಂತ್ ಕವಿಗೋಶ್ಟಿಚ್ಯಾ ಅಧ್ಯಕ್ಷ್ ಆಂಡ್ರ್ಯೂ ಡಿ’ಕುನ್ಹಾಕ್ ವಿಗಾರಾನ್ ಶೋಲ್ ಪಾಂಗ್ರುನ್, ಫುಲಾಂಚೊ ಬುಕ್ಕೊ ಆನಿ ಯಾದಸ್ತಿಕಾ ದಿವುನ್ ಸ್ವಾಗತ್ ಕೆಲೊ. ಕವಿಗೋಶ್ಟಿಂತ್ ವಿಗಾರ್ ಮಾ|ರೊನಾಲ್ಡ್ ಡಿಸೋಜ್, ಫೆಲ್ಸಿ ಲೋಬೊ ದೆರೆಬೈಲ್, ಎಡ್ವಿನ್ ಪಿಂಟೊ ಗಂಟಾಲ್ಕಟ್ಟೆ, ಪೆದ್ರು ಪ್ರಭು ತಾಕೊಡೆ, ಗ್ಲೇನಿಶ್ ಮಾರ್ಟಿಸ್ ಅಲಂಗಾರ್, ಜೋಯ್ಸ್ ಪಿಂಟೊ ಕಿರೆಂ/ಕಿನ್ನಿಗೊಳಿ, ಸಲೋಮಿ ಮಿಯಾಪದವ್, ವಲ್ಲಿ ಕ್ವಾಡ್ರಸ್ ಹಾಣಿಂ ವಾಂಟೊ ಘೆತ್ಲೊ.

ಉಪ್ರಾಂತ್ ಆಶಾವಾದಿ ಪ್ರಕಾಶನಾಚಿಂ ದೋನ್ ಕೊಂಕಣಿ ಪುಸ್ತಕಾಂಚೆಂ ಮೊಕ್ಳೀಕ್ ಕಾರ್ಯೆಂ ಚಲ್ಲೆಂ. ಆಶಾವಾದಿ ಪ್ರಕಾಶನಾಚೆಂ ಎಕಾವನಾವೆಂ ಪುಸ್ತಕ್ ’ಆಟ್ವೊ ಸುರ್’ ತಶೆಂಚ್ ಕವಯತ್ರಿ ’ಸಲೋಮಿ ಮಿಯಾಪದವ್’ ಚಿ ತಶೆಂಚ್ ತಿಚಿ ಒಳೊಕ್ ಕರುನ್ ಹ್ಯಾ ಪುಸ್ತಕಾಚೆಂ ಮೊಕ್ಳಿಕ್ ಕಾರ್ಯೆಂ ಆಂಡ್ರ್ಯೂ ಎಲ್. ಡಿಕುನ್ಹಾನ್ ಕೆಲೆಂ. ಆಶಾವಾದಿ ಪ್ರಕಾಶನಾಚೆಂ ಬಾವನಾವೆಂ ಪುಸ್ತಕ್ ’ಪಾನಾಂಚ್ ಫುಲಾಂ ಜಾತಾನಾ’ ತಶೆಂಚ್ ಕವಯತ್ರಿ ’ಮೊನಿಕಾ ಡೆ’ಸಾ ಮಥಾಯಸ್’ ಚಿ ತಶೆಂಚ್ ತಿಚಿ ಒಳೊಕ್ ವಲ್ಲಿ ಕ್ವಾಡ್ರಸಾನ್ ಕರುನ್ ದಿತಚ್ ಮಾ|ರೊನಾಲ್ಡ್ ಡಿಸೋಜಾನ್ ಪುಸ್ತಕಾಚೆಂ ಮೊಕ್ಳಿಕ್ ಕಾರ್ಯೆಂ ಚಲಯ್ತಚ್ ಸಲೋಮಿ ಮಿಯಾಪದವ್ ಹಿಣೆಂ ಅಪ್ಲಿಂ ಭಗ್ಣಾಂ ಉಚಾರುನ್ ಹ್ಯಾ ಪುಸ್ತಕಾಚ್ಯಾ ಪರ್ಗಟ್ಣೆಕ್ ಕಾರಣ್ ಜಾಲ್ಲ್ಯಾಂಕ್ ಧಿನ್ವಾಸ್ ಪಾಟಯ್ಲೆ.

ವಲ್ಲಿ ಕ್ವಾಡ್ರಸಾನ್ ಉಪ್ಕಾರ್ ಆಟವ್ಣೆಚೆಂ ಉಲವ್ಪ್ ಕರುನ್ ಯುವಜಣಾಂಕ್ ಕೊಂಕಣಿ ಸಾಹಿತ್ಯಾಚಿ ಒಳೊಕ್ ಕರುನ್ ದಿಂವ್ಚಿ, ತಶೆಂಚ್ ಸಾಹಿತಿಕ್ ತಾಲೆಂತಾಕ್ ಮುಕಾರ್ ಹಾಡ್ಚೆ ದಿಶೆನ್ ಐ.ಸಿ.ವೈ.ಎಮ್ ತಶೆಂಚ್ ವೈ.ಸಿ.ಎಸ್. ಸಂಘಟನಾನ್ ಏಕ್ ದೇಕ್ ದಿಲ್ಯಾ ಆನಿ ಹೆಂ ಪ್ರೇರಣ್ ಘೆವ್ನ್ ಹೆರ್ ಪ್ರಾಂತ್ಯಾಚ್ಯಾ ಯುವ ಸಂಚಾಲನಾನ್ ಸಯ್ತ್ ಅಸಲಿಂ ಕಾರ್ಯಾಗಾರಾಂ ಮಾಂಡುನ್ ಹಾಡ್ಲಿಂ ತರ್ ಆಮ್ಚ್ಯಾ ಕೊಂಕಣಿ ಭಾಸೆಕ್ ನವ್ಯೊ ಆಂಖ್ರ್ಯೊ ಫುಲ್ತಲ್ಯೊ ತಶೆಂಚ್ ನವಿಂ ಪಾನಾಂ, ಫುಲಾಂ ಫುಲ್ತಲಿಂ ಮ್ಹಳ್ಳೊ ಆಶಾವಾದ್ ಉವಾರ್ಲೊ ತಶೆಂಚ್ ಹ್ಯಾ ಕಾರ್ಯಾಗಾರಾಕ್ ಮಿನತ್ ಕೆಲ್ಲ್ಯಾ ಸಮೇಸ್ತಾಂಚೊ ಉಪ್ಕಾರ್ ಬಾವುಡ್ಲೊ.

ವರ್ದಿ: ಇಯಾನ್ ಸಿಕ್ವೇರಾ ಗಂಟಾಲ್ಕಟ್ಟೆ

[खबर] गंटाल्कट्टेंत युवजणांत साहितीक काऱ्यागार

गंटाल्कट्टेंत युवजणांत कोंकणी साहितीक काऱ्यागार

६ माय २०२३: आशावादी प्रकाशनान ऐ.सी.वै.एम आनी वै.सी.एस हांच्या सहयोगाखाल गंटाल्कट्टेच्या नित्यादार मायेच्या इगर्जेच्या सभासालांत आदेसाचें साहितीक काऱ्यागार चलवन व्हेलें.
फिर्गजेचो विगार मा|बा|रोनालड डिसोजाच्या अध्यक्ष‌पणाखाल, मागण्यांत सुर्वात करून ह्या काऱ्यागाराचें उग्तावण जातच अपल्या येवकार उलवपांत "कोंकणी भासेचो मोग कर्चो, तिचो पोस कर्ची जवाभदारी आमां सर्वांची जाल्ल्यान त्या इराद्यान आमच्या समाजेंत आसच्या साहितीक तालेंताक व्हळकून, तांकां मुकार येंवची वाट रुतां कर्चेदिशेन असलीं काऱ्यागारां मांडून हाडची गर्ज आज उदेल्या" म्हणाले. बेनिटा मिनेजसान काऱ्यागाराचें सूत्र संचालन केलें, ऐ.सी.वै.एम. अध्यक्ष नोलन मिरांदा, वै.सी.एस. अध्यक्षीण लिव्या सेरावो, ऐ.सी.वै.एम. काऱ्यदर्शी इयान सिकवेरान, वै.सी.एस. काऱ्यदर्शी मेलिशा मिरांदा हाणीं हें काऱ्यागार चलवपिंची ओळोक करून दिली. मा|रोयसन फेर्नांडीस (संपादक - उज्वाड पंद्राळें), मा|चेतन लोबो (संपादक - सेवक मयन्याळें) तशेंच वल्ली क्वाड्रस (संपादक - पयणारी) हांकां विगारान शोलां पांग्रून फुलांचो बुक्को तशेंच यादसतिका दिवून स्वागत केलो. वेदिचेर फिर्गज विगार, गोवळीग परिशदेची काऱ्यदर्शी लिडिया डिसोज, ऐ.सी.वै.एम अध्यक्ष आनी वै.सी.एस.अध्यक्ष हाजर आसलीं.

’खबरो कश्यो बरंवच्यो’ विश्याचेर मा|रोयसन फेर्नांडीस (संपादक - उज्वाड पंद्राळें) हाणीं तर्भेत दिली, ’लेखनां कशीं बरंवचीं’ विश्याचेर तर्भेत‌दार मा|चेतन लोबो (संपादक - सेवक मयन्याळें) हाणीं तर्भेत दिली. ’मोटव्यो काणियो कश्यो बरंवच्यो’ विश्याचेर तर्भेत‌दार वल्ली क्वाड्रस (संपादक - पयणारी) हाणीं तर्भेत दिली.

दनपारां जेवणा उपरांत कविगोश्टिच्या अध्यक्ष आंडऱ्यू डी’कुन्हाक विगारान शोल पांग्रून, फुलांचो बुक्को आनी यादसतिका दिवून स्वागत केलो. कविगोश्टिंत विगार मा|रोनालड डिसोज, फेल्सी लोबो देरेबैल, एडवीन पिंटो गंटाल्कट्टे, पेद्रू प्रभू ताकोडे, ग्लेनीश मार्टीस अलंगार, जोयस पिंटो किरें/किन्निगोळी, सलोमी मियापदव, वल्ली क्वाड्रस हाणीं वांटो घेतलो.

उपरांत आशावादी प्रकाशनाचीं दोन कोंकणी पुसतकांचें मोकळीक काऱ्यें चल्लें. आशावादी प्रकाशनाचें एकावनावें पुसतक ’आटवो सूर’ तशेंच कवयत्री ’सलोमी मियापदव’ ची तशेंच तिची ओळोक करून ह्या पुसतकाचें मोकळीक काऱ्यें आंडऱ्यू एल. डिकुन्हान केलें. आशावादी प्रकाशनाचें बावनावें पुसतक ’पानांच फुलां जाताना’ तशेंच कवयत्री ’मोनिका डे’सा मथायस’ ची तशेंच तिची ओळोक वल्ली क्वाड्रसान करून दितच मा|रोनालड डिसोजान पुसतकाचें मोकळीक काऱ्यें चलयतच सलोमी मियापदव हिणें अपलीं भगणां उचारून ह्या पुसतकाच्या पर्गटणेक कारण जाल्ल्यांक धिन्वास पाटयले.

वल्ली क्वाड्रसान उपकार आटवणेचें उलवप करून युवजणांक कोंकणी साहित्याची ओळोक करून दिंवची, तशेंच साहितीक तालेंताक मुकार हाडचे दिशेन ऐ.सी.वै.एम तशेंच वै.सी.एस. संघटनान एक देक दिल्या आनी हें प्रेरण घेवन हेर प्रांत्याच्या यूव संचालनान सयत असलीं काऱ्यागारां मांडून हाडलीं तर आमच्या कोंकणी भासेक नव्यो आंखऱ्यो फुल्तल्यो तशेंच नवीं पानां, फुलां फुल्तलीं म्हळ्ळो आशावाद उवारलो तशेंच ह्या काऱ्यागाराक मिनत केल्ल्या समेसतांचो उपकार बावुडलो.

वर्दी: इयान सिकवेरा गंटाल्कट्टे

[Khobor] Gantalkattent Yuvozonnant Sahitik Kareagar

Gantalkattent Yuvozonnant Konkonni Sahitik Kareagar

6 Mai 2023: Ashawadi Prakashanan, ICYM ani YCS hanchea sohoyogakhal gonttalkott'ttechea Niteadar mayechea igorjechea sobhasalant adesachem sahitik kareagar choloun vhelem. Firgojecho vigar ma|ba|Ronaldd DSouzachea odhyokx‌ponnakhal, magnneant survat korun hea kareagarachem ugtaunn zatoch oplea yeukar uloupant "Konkonni bhasecho mog korcho, ticho pos korchi zovabhdari amam sorvanchi zal'lean tea iradean amchea somajent aschea sahitik talentak vhollkun, tankam mukar yemvchi vatt rutam korchedixen osolim kareagaram manddun haddchi gorz az udelea" mhonnale. Benita Menezesan kareagarachem sutr sonchalon kelem, ICYM Odhyokx Nolan Miranda, YCS Odhyokxinn Livea Seravo, ICYM Karyodorxi Ian Sequeiran, YCS Karyodorxi Melisha Miranda hannim hem kareagar choloupinchi ollok korun dili. Ma|Roysen Fernanddis (sompadok - Ujvadd pondrallem), ma|Cheton Lobo (Sompadok - Sevak moineallem) toxench Valley Quadros (sompadok - Poinnari) hankam vigaran xolam pangrun fulancho bukko toxench yadostika divun svagot kelo. Vedicher firgoz vigar, goullig porixodechi karyodorxi Lydia DSOuza, ICYM odhyokx ani YCS Odhyokx hazor aslim.

’Khobro koxeo boromvcheo’ vixeacher ma|Roysen Fernanddis hannim torbhet dili, ’Lekhonam koxim boromvchim’ vixeacher torbhet‌dar ma|Cheton Lobo hannim torbhet dili. ’mottveo kannio koxeo boromvcheo’ vixeacher torbhet‌dar Valley Quadros hannim torbhet dili.

Donparam jeunna uprant kovigoxttichea odhyokx Andrew DCunhak vigaran xol pangrun, fulancho bukko ani yadostika divun svagot kelo. Kovigoxttint vigar ma|Ronaldd DSOuza, Felcy Lobo Derebail, Edwin Pinto Gantalkatte, Pedru Probhu Taccode, Glanish Martis Alangar, Joyce Pinto Kirem/Kin'nigolli, Salomi Miyapadav, Valley Quadros hannim vantto ghetlo.

Uprant Ashawadi Prakashanachim don konkonni pustokanchem mokllik karyem chol'lem. Ashawadi Prakashanachem ekaunavem pustok ’Attvo Sur’ toxench kouyotri ’Salomi Miapodou’ chi toxench tichi ollok korun hea pustokachem mokllik karyem Andrew L DCunhan kelem. Ashawadi Prakashanachem baunavem pustok ’Pananch Fulam Zatana’ toxench kouyotri ’Monica DSa Mathias’ chi toxench tichi ollok Valley Quadrosan korun ditoch ma|Ronaldd DSouzan pustokachem mokllik karyem choloitoch Salomi Miyapadav hinnem oplim bhognnam ucharun hea pustokachea porgottnnek karonn zal'leank dhinvas pattoile.

Valley Quadrosas upkar attounnechem uloup korun yuvozonnank konkonni sahiteachi ollok korun dimvchi, toxench sahitik talentak mukar haddche dixen ICYM toxench YCS Songhottonan ek dek dilea ani hem preronn gheun her pranteachea yuvo sonchalonan soit osolim kareagaram manddun haddlim tor amchea konkonni bhasek noveo ankhreo fultoleo toxench novim panam, fulam fultolim mholl'llo axavad uvarlo toxench hea kareagarak minot kel'lea somestancho upkar bavuddlo.

Vordi: Ian Sequeira Gantalkatte