|
DKA-chi Borovpa ani vachpachi
Kar’yaxalla Navele Zali
Moddganv: Aplea bhanddarantli girestkai
khaltikayen dusreak divpi mahan monis ani
Konknni bhaxentlo nanvvosto borovpi Vincy
Quadros hannem amchea ganvchea borovpiank ani
vachpiank girest kele he khatir taka porbim
ditam ani Dalgado Konknni Akademin (DKA) taka
dhaddun Konknni bhaxe khatircho boro vaur mukhar
vhorpachem sopon ballgilole khatir tichei abhar
mandtam, oxem udgar Konknni borovpi ani Navele
firgojecho padr kur Pri Myron Jeson Baretto
hannem kaddle. Dalgado Konknni Akademin
ghoddoun haddlolie Konknni borovpa ani
vachpachie kar’yaxalle vellar to uloitalo.
Tache borabor igorjecho padr vigar Pri. Arlino
De Mello, DKA-cho Chittnis Vincy Quadros ani
Bhanddari Celso Fernandes hajir asle.
Konknni
boroitanam ani vachtanam jio chaltio chuki zatat
tancher DKA-cho Chittnis ani Raxttrik bal
Sahitya Puroskar vijeto Vincy Quadrosan uzvadd
ghalo ani protek utor koxem ghoddtta ani tem
borovpak ani vachpak koxem toyar zata hachem
dekhi diun spoxttikoronn dilem. Dott’tti
letram koxim vach’chim ani tancho orth koso
bodolta te vixim tannem hajir asloleank somzonni
dili. Nakyo svor kiteak khatir yeta ani to
ailo zalear tantunt aslolea ‘m’ ani ‘n’-cho
vapor koso korop he vixii tannem mahiti dili.
Uprant koslem-i vachop kortolo zalear kosli
kosli kallji gheunk zai, te vixim sanglem.
Khub zonnamni aple prosn tache mukhar ghale,
tanchio tannem somjikayen zapo dilio.
Jem kitem
xikoilam, tem kitlem pasun somzolam tem zannun
gheunk ek bhurgeanchi kanni topasunk dili.
Magir sumar 8 zonnam koddlean venchik utare
vachun ghetle je vorvim tankam somzolem koxie
porim oddchonni yetat ani tancher koxem mat
vhoronk zai tem. Xevottak Padr Vigarachea
hatantlean inamam vanttlim.
Padr
Vigar Arlindon aple vichear manddle ani
vachtanam kosli kallji gheunk zai te vixim
thoddi mahiti dili. Dalgado Konknni
Akademichie votin xembhor voir hajir aslolea
vanttekaranche Bhanddari Celso Fernandesan upkar
atthoile.
- Vincy Quadros | 
