ಡಿಸೆಂಬರ್ 2025 ವೆರ್ ಆಶಾವಾದಿ ಪ್ರಕಾಶನಾಚ್ಯಾ ರುಪ್ಯಾಳ್ಯಾ ಜುಬ್ಲೆವಾವೆಳಿಂ ಮೆಕ್ಳಿಕ್ ಜಾಲ್ಲೆಂ, ಕವಿ ಆಂಡ್ರ್ಯೂ ಎಲ್. ಡಿಕುನ್ಹಾಚೆಂ 144 ವಿಂಚ್ಣಾರ್ ಕವಿತೆಂನಿ ಭರೊನ್ ವೊಮ್ತುಂಚೆಂ ಚೊವ್ತೆಂ ಕವಿತಾ ಪುಂಜ್ಯಾಚೆಂ ಪುಸ್ತಕ್, "ಉಜ್ವಾಡಾಚ್ಯೆ ವೆಂಗೆಂತ್" ಮ್ಹಜ್ಯಾ ಹಾತಿಂ ಪಾವ್‍ಲ್ಲೆಂಚ್, ತಾಂತ್ಲ್ಯಾ ಮುಕ್ ಪಾನಾನ್ ಮ್ಹಜ್ಯೆ ಮತಿಕ್ ಕಾವ್ಯಾಳ್ ಥಂಡಾಯ್ ದಿಲಿ. ಹ್ಯಾ ಪುಸ್ತಕಾಂತ್ಲ್ಯಾ ಕವಿತೆಂನಿ ಮೊವಾಳಾಯ್ ಮಾತ್ರ್ ನ್ಹಯ್, ಮಾರ್ಮಿಕ್ ಸತಾಂ ಲಿಪ್ಲ್ಯಾಂತ್. ಪರಿಸರ್, ಕಿಡಿ, ರಾನ್, ರುಕಾಂ ಝಾಡಾಂಚೊ ತಾಳೊ ಆಸಾ, ಸುಕ್ಣ್ಯಾಂ ಸಾವ್ಜಾಂಚಿಂ ಚಿಲಿಪಿಲಿ ಗಾಣಾಂ ಆಸಾತ್. ಮಾಂಯ್ - ಬಾಬಾಚೊ ಆಪುಟ್ ಮೋಗ್ ಆಗ್ಮೆಂತಾ ಭಾಶೆನ್ ಹೆಣೆಂ ತೆಣೆಂ ಶಿಂಪ್ಡಾಲಾ. ಸ್ತ್ರೀ ಸಂವೇದನ್ ಆಸಾ, ಝುಜಾಚೆಂ ರಗತ್, ಸೊಜೆರಾಂಚಿ ಝಳಕ್, ಶೆತ್ಕಾರಾಂಚೆ ಸಮಸ್ಸೆ, ದೆವಾಚೊ ಮೋಗ್, ದೇಶಾಕ್‌ ನಮಾನ್‌ ಅಸಾ, ನಿರಾಧಾರಿಂಚಿಂ ಸಪ್ಣಾಂ, ದೇಶಾಚ್ಯಾ ಅವ್ಯವಸ್ಥಿತ್ ಭ್ರಷ್ಟಾಚಾರಾಕ್ ಚ್ಯಾಬೂಕ್, ಮಧೆಂ ಮಧೆಂ ಮತಿಕ್ ವಿಶೆವ್ ಘೆಂವ್ಕ್ ಮೊಗಾಚ್ಯೊ ಗುಳಿಯೊಯ್ ಮೆಳ್ತಾತ್. ಕಾಳಿಜ್ ಕಡೊಂವ್ಚ್ಯೊ ಕರಾಳ್ ಘಡಿಯೊಯ್ ಕಾಂಯ್ ಉಣ್ಯೊ ನಾಂತ್. ಹ್ಯಾ ಪುಸ್ತಕಾಂತ್‌ ಇತ್ಲ್ಯೊ ಕವಿತಾ ಆಸ್ಲ್ಯಾರೀ, ಮಧೆಂ ಮಧೆಂ ಎಕೇಕ್‌ ಕವಿತಾ ಥಂಯ್ಚ್‌ ಸೊಡ್ನ್‌ ಉಡ್ಕ್ಯೊ ಮಾರ‍್ನ್‌ ಮುಕಾರ್‌ ಧಾಂವುಂಕ್‌ ಜಾಯ್ನಾಂಚ್‌ ಜಾಯ್ನಾಂ. ಹ್ಯೊ ಕವಿತಾ ವಾಚ್ಪ್ಯಾಂಕ್‌ ವಿಶೇಸ್‌ ಥರಾನ್‌ ಬಂಧಿ ಕರ‍್ತಾತ್.

ಆಂಡ್ರ್ಯೂಚ್ಯೆ ಕವಿತೆಕ್ ಆಪ್ಲಿಚ್ ಏಕ್ ಭಾಸ್ ಆಸಾ. ಲಿಪಿ ನ್ಹಯ್! ತಿ ಭಾಸ್ ವಾಚ್ಪ್ಯಾಂಚ್ಯಾ ಪಂಚೇಂದ್ರಿಯಾಂಕ್ ಪಾವೊನ್ ತಿ ಕವಿತಾ ಆಕರ್ಷಿಕ್ ಆನಿ ಗ್ರೇಸ್ತ್ ಕಾಯೆನ್ ಭರ‍್ತಾ. ಕವಿನ್ ಆಪ್ಲ್ಯೆ ಕವಿತೆಂನಿ ವಾಚ್ಪ್ಯಾಂಚ್ಯಾ ಭಾವನಾಂಕ್ (ಸಂತೊಸ್, ದೂಕ್, ರಾಗ್, ಮೋಗ್, ಪ್ರೇಮ್...ಇತ್ಯಾದಿ) ಚಾಳ್ವೊಂವ್ಚ್ಯಾಂತ್, ವಾ ಉಚಾಂಬಳ್ ಕರ‍್ಚ್ಯಾಂತ್ ಆಪ್ಲೆಸ್ತಕಿಂ ಸಾರ್ಥಕ್ ಕೆಲಾಂ

ಹ್ಯಾ ಪುಸ್ತಕಾಕ್ ಎಕಾ ಜೊಕ್ತ್ಯಾ ವೆಕ್ತಿನ್ ಪ್ರಸ್ತಾವನ್ ಬರಯ್ಲಾಂ. ಕವಿ ಬಾಪ್ ಜೊ. ಸಿ. ಸಿದ್ದಕಟ್ಟೆ. ತೊ ಮ್ಹಣ್ತಾ... "ತಾಚಿ ಕವಿತ್ವಾಚಿ ಭಾಸ್ ಕೊಂಕ್ಣಿ ನ್ಹಯ್, ಬಗಾರ್ ಮೊವಾಳಾಯ್! ಆನಿ ತಾಚ್ಯೊ ಸಭಾರ್‍ಶೊ ಕವಿತಾ ಜೆಂಜರ್‍ಲಲ್ಯಾ ಆಂಗಾಕ್ ಪಾಕಾನ್ ತೇಲ್ ಪುಸ್ಲಲ್ಯಾಪರಿಂ ಪೊಶೆವ್ನ್ ಗೂಣ್ ಕರ‍್ತಾತ್!!” ಕವಿ ಆಂಡ್ರ್ಯೂಚ್ಯಾ ಕವಿತಾಂಚಿ ವಿಶೇಷತಾ ಹಿ. 

ಕವಿ ಆಂಡ್ರ್ಯೂಚಿಂ ಚಿಂತ್ನಾಂ, ಭಾವನಾಂ, ಕಲ್ಪನಾಂ ಸಂಕ್ಶಿಪ್ತ್ ಥರಾನ್ ಮಟ್ವ್ಯಾನ್ ಪುಣ್ ಗುಂಡಾಯೆನ್, ಕಲಾತ್ಮಕ್ ರಿತಿನ್, ಸೊಭಾಯೆನ್, ಭಾವನಾತ್ಮಕ್ ಭಾಶೆಂತ್, ವೆಕ್ತ್ ಕೆಲ್ಲೆಂ ಆಮ್ಕಾಂ ಸ್ಪಷ್ಟ್ ದಿಸ್ತಾ. ತಾಚ್ಯೊ ಸಭಾರ್ ಕವಿತಾ ವಾಚ್ಪ್ಯಾಂಚ್ಯೆ ಮತಿಕ್ ಜಿರೊವ್ನ್ ಘೆಂವ್ಕ್ ಕಾಂಯ್ ತಿತ್ಲ್ಯೊ ಸಲೀಸ್ ನಾಂತ್. ಹ್ಯಾ ಪುಸ್ತಕಾಚೊ ʼಮಾತಾಳೊʼ ಸಯ್ತ್ ಏಕ್ ಪಾವ್ಟಿಂ ವಾಚುನ್ ಉದ್ಗಾರ‍್ಲೆಂಚ್, ಚಿಂತುಂಕ್ ಆವ್ಕಾಸ್ ದಿತಾ. ಕವಿನ್ ಖಂಯ್ಚ್ಯಾ ಪಾಟ್ ಥಳಾರ್ ಹ್ಯೊ ಕವಿತಾ ಬರಯ್ಲ್ಯಾರೀ, ಚ್ಯಾರ್ - ಪಾಂಚ್ ಪಾವ್ಟಿಂ ವಾಚ್ತಾಂ ವಾಚ್ತಾಂ ವೆಗ್ಳೊಚ್ ಅರ್ಥ್ ದೀಂವ್ಕ್ ಸಕ್ತಾ. ಹಿ ಕವಿ ಆಂಡ್ರ್ಯೂಚ್ಯಾ ತಾಲೆಂತಾಚಿ ತಾಂಕ್! ವಿಶೇಸ್ ಜಾವ್ನ್ ಹ್ಯಾ ಪುಸ್ತಕಾಚೆರ್ ಹಾಂವೆಂ ಪಾರ್ಕಿಲ್ಲೊ ಆನ್ಯೇಕ್ ವಿಷಯ್: ಕವಿತಾ ವಾಚುನ್ ವಾಚುನ್ ಮುಕಾರ್ ವೆತಾನಾ, ಕೊಂಕಣಿಂತ್ಲೆ ಜಾಯ್ತೆ ಸೊಭಿತ್ ಸಬ್ದ್ ಆಮ್ಕಾಂ ಭೆಟ್ತಾತ್!

ಹ್ಯಾ ಕವಿಲಾಗಿಂ ಉಣ್ಯಾ ಸಬ್ಧಾಂನಿ ಅಧಿಕ್ ಚಡ್ ಅರ್ಥ್ (condensed form) ವಿವರುಂಚೊ ಕವಿತೆಚೊ ಪ್ರಮುಕ್ ಗೂಣ್ ಉಟೊನ್ ದಿಸ್ತಾ. ದಾಕ್ಲ್ಯಾಕ್‌ ಸಾಂಗ್ಚೆಂ ತರ್‌ ಬಿಂ ಜಿವಂತ್‌ ಅಸಾ, ಥೆಂಬೆ, ಮೆಣಾಂತ್ಲಿಂ ಸುತಾಂ, ಬಾಂಗ್ಡೊ ಫುಲ್ಲೊ, ಜಿಣಿಂ, ಪುಸ್ಪುಸೊ, ಉಸ್ವಾಸ್‌, ದೀಶ್ಟ್, ಕಾಳೊಕಾಂತ್‌, ದರ್ವಡ್‌, ಆಲ್ತಾರಿಚ್ಯೆ ವಾಟೆರ್‌, ಕುಟ್ಮಾಚಿಂ ಮೊಡ್ಲಾಂ‌, ಪಾವ್ಸ್, ಗಳೊ ಚಿರ್ಡುಂಕ್ ಆನಿ ಹೆರ್‌ ಮಟ್ವ್ಯೊ ಕವಿತಾ! "ರವಿನ್ ದೆಕನಾಸ್ಲಲೆಂ ಕವಿ ದೆಕ್ತಾ" ಮ್ಹಳ್ಳೆ ಸಾಂಗ್ಣೆಪರಿಂ, ಹ್ಯಾ ವಿಶೇಸ್ ಕವಿಚಿ ದೀಶ್ಟ್ ಕಾಂಯ್ ತಸಲಿಚ್. ಕೊಣಾ ದೊಳ್ಯಾಂಕ್ ದಿಸಾನಾತ್‍ಲ್ಲೊ ಸ್ವಾಸ್ ಸಯ್ತ್ ತಾಕಾ ದಿಸ್ತಾ, ಬಾಳ್ಕಾಂಚ್ಯಾ ಕಾಳ್ಜಾ ಉಡಿಯೆಚೊ ತಾಳ್ ಕವಿಚ್ಯಾ ಕಾನಾಂಕ್ ಸಂಗೀತ್ ದಿತಾ. ಹೆಂ ತಾಚ್ಯಾ ಕವಿತೆದ್ವಾರಿಂ ವಾಚ್ಪ್ಯಾಂಕ್ ಸ್ಪಷ್ಟ್ ಜಾತಾ. ತಾಚೆ ಎದೊಳ್ಚೆ ತೀನ್ ಪುಸ್ತಕ್ ಆನಿ ಆತಾಂ ಹ್ಯಾ ಪುಸ್ತಕಾಂತ್ ದರ್ಯಾ ವೆಳೆಚೊ ಫಾತರ್ ಘರಾ ಶೋಕೇಜಿಂತ್ ಕವಿಕ್ ಪಳೆವ್ನ್ ದೊಳೆ ವಾಟಾರ‍್ತಾ. ಘಡಿಯಾಳಾಚಿ ಉಡಿ ಕವಿಚ್ಯಾ ಕಾನಾಂತ್ ಪುಸ್ಪುಸ್ತಾ! ಪಿಸೊಳ್ಯಾಂಚ್ಯಾ ಮೊಗಾರ್ ಪಡ್ತಾನಾ ಕವಿತೆಕ್ ಪಾಕಾಟೆ ಫುಟ್ತಾತ್! ಪಾವ್ಸ್ ವೆವೆಗ್ಳ್ಯಾ ವಸ್ತುಂ ವಯ್ರ್ ಪಡ್ತಾನಾ ವೆವೆಗ್ಳೆಂ ಸಂಗೀತ್ ಉಬ್ಜಾತಾ...ಅಶೆಂ ಥರಾವಳ್ ರುಚಿಕ್, ಸ್ವಾಧಿಕ್, ವಿಶೇಸ್ ಪ್ರತಿಮಾ, ತುಲನ್, ರೂಪಕಾಂ ಆಮ್ಕಾಂ ಭೊಗುಂಕ್ ಮೆಳ್ತಾತ್. ಹೊ ಕರೆಜ್ಮಾಚೊ ಕಾಳ್‌ ಜಾಲ್ಲ್ಯಾನ್‌ ಹಾಂವ್‌ ಖಂಚೊ ಪಾತ್ರಧಾರಿ- ಕವಿತಾ ಆಪ್ಣಾಚೆ ಗೂಣ್‌ ಪಾರ್ಕುನ್‌ ನಿಯಾಳ್‌ ಕರುಂಕ್‌ ಅವ್ಕಾಸ್‌ ದಿತಾ!

ಸಗ್ಳೊ ಬೂಕ್ ವಾಚುನ್ ಜಾಲ್ಲೊಚ್, ಖರೆಂಚ್ ಮನ್ಶಾಪಣಾಚೊ ಹುಸ್ಕೊ, ದಯಾಳಾಯೆಚೆಂ ಚಿಂತಪ್, ಮೊವಾಳಾಯೆಚೆಂ ಕಾಳಿಜ್ ವಾಚ್ಪ್ಯಾಂಚೆಂ ಜಾಂವ್ಚ್ಯಾಂತ್ ಕಾಂಯ್ಚ್ ದುಭಾವ್ ನಾ! ಹ್ಯಾ ಪುಸ್ತಾಕಾಂತ್ ಹರ್ ಕವಿತೆಚ್ಯಾ ಆಕೇರಿಕ್ ʼಕವಿತಾ ಬರಯಿಲ್ಲಿ ಇಸ್ವಿʼ ಆಸ್‍ಲ್ಲ್ಯಾನ್ ನಿರೂಪಿತ್ ಕವಿತೆಂಚೆಂ ಪಾಟ್‍ಥಳ್ ಅಂದಾಜ್ ಕರುಂಯೆತಾ.

ಕವಿನ್ ಪುಸ್ತಕಾಚ್ಯೆ ಸುರ್‍ವೆರ್‍‌ಚ್ "ಸಂಸಾರ್" ಕವಿತಾ ಬರಯ್ಲ್ಯಾ. ದೆವಾನ್ ಆರಂಭಾರ್‌ ಸಂಸಾರ್ ರಚುನ್ ತಾಚಿ ಜವಾಬ್ದಾರೆಚಿ ಚಾವಿ “ಮನ್ಶ್ಯಾಪಣಾ”ನ್ ಭರ‍್ಲಲ್ಯಾ  “ಮನ್ಶಾಕ್” ಮಾತ್ರ್ ದಿಲ್ಲಿ.‌ ಫಾಲ್ಯಾಂ ತಾಚೆಂ ಲೇಕ್ ತಾಣೆಂ ದೀಂವ್ಕ್ ಆಸಾ. ಹಾಸ್ಯಾಸ್ಪದ್ ಮ್ಹಳ್ಯಾರ್ ಆಜ್ ತೆಂ “ಮನ್ಶಾಪಣ್” ಮನ್ಶಾಲಾಗಿಂ ನಾಸ್ತಾಂ ಪ್ರಕೃತಿ ಆನಿ ಮೊನ್ಜಾತಿಲಾಗಿಂ ಆಸಾ ಮ್ಹಳ್ಳೆಂ!  ತೊ ರಚ್ಣಾರ್ ಆಪ್ಣೆಂ ರಚ್ಲಲ್ಯಾ ಸಂಸಾರಾಚಿ ದೆಸ್ವಾಟ್ ಕೆದಿಂಚ್ ಆಶೆಲ್ಲೊ ನಾ. ತರೀ ಇತ್ಲೆಂ ಸೊಭಿತ್ ಪರಿಸರ್ ವಿಕಾಳ್ ಕರ‍್ನ್ ತಾಂತ್ಲ್ಯಾ ಅದ್ಭುತ್ ಜಿವಿಂಚೆಂ ಸತ್ತ್ಯಾನಾಸ್ ಕರ‍್ಚಿ ಪದ್ವಿ ಖಂಯ್ ಥಾವ್ನ್ ಆಯ್ಲಿ?"-  ಹೆಂ ಜಾಪ್ ನಾತ್‍ಲ್ಲೆಂ ಸವಾಲ್ !

ಕಾಜುಲೆ ಖಂಯ್ ಗೆಲೆ?, ಬಾಳಾ ತಿಂ ತುಜೆಂ ಕಿತೆಂ ಲುಟ್ತಾತ್? ರಾನಾಂತ್ ಆವ್ರ್ ಆಯ್ಲಾಂ, ವ್ಯರ್ಥ್ ಕರ‍್ನಾಕಾ ಉಜ್ವಾಡ್, ಪಿಸೊಳೆಂ ಸರಳ್ ಆನಿ ಸುಟ್ಕಾ, ಹೆಂ ತೋಟ್ ಕೊಣಾಚೆಂ? ಕವಿತೆಕ್ ಪಾಕಾಟೆ ಫುಟ್ತಾನಾ, ವಾಡ್ಕುಳ್ಯಾ ಫಾತ್ರಾಚಿ ಕಾಣಿ, ತುಮಿ ಭುಂಯ್ ಖಾತಿರ್ ಝಗಡ್ತಾತ್, ಜಿವಿಂ ಪಾನಾಂ ಝಡ್ತಾನಾ, ದೆಸ್ವಾಟೆಚೆ ವಾಸ್ತು ಶಿಲ್ಪಿ, ಸಿಮಿಸ್ತ್ರಿಂತ್ಲಿ ಜಾಗೃಣ್, ಬರೊ ಜಾಂವ್ಚಿ ಸುರ್ವಾತ್, ತೆಣೆಂ ತಿಳ್ತಾನಾ, ಮಾತಿ, ತುಕಾ ಸಸಾಯ್ ಜಾಯ್, ಕಾಯ್ಬೆವಾ ರುಕಾಚಿ ಕಾಣಿ, ಪರ್‍ಕಿ, ಘಾಯಾಂಚೆರ್.., ವಾರ್‍ಯಾಚೆಂ ವ್ಯಾಕರಣ್, ನಾರ‍್ಲಾಚಿ ಭೆಟವ್ಣಿ, ತಣಾಕ್ ರಾಗ್ ನಾ, ಲ್ಹಾರ್, ತಯಾರಾಯ್, ಪಾಂಯಾಂ ಪಂದಾ, ತಾನೆಕ್, ಫಳ್ ದಿನಾತ್ಲಲ್ಯಾ ರುಕಾಂಕ್   ಇತ್ಯಾದಿ ಕವಿತಾ ಭಿತರ್ ಕವಿ ಪರಿಸರ್ ಪ್ರೇಮಿ ಜಾಲಾ ಮಾತ್ರ್ ನ್ಹಯ್,  ಪರಿಸರ್ ಮಾಲಿನ್ಯ್ ಕರ‍್ತಲ್ಯಾಂಕ್ ಪ್ರಕೃತಿ ಕಶಿ ಪ್ರತಿಕ್ರಿಯಾ ದಿತಾ ತೆಂ ಸಮ್ಜಾಯ್ತಾ!

ಹ್ಯಾ ಸಗ್ಳ್ಯಾ ಪುಸ್ತಕಾಚೆರ್ ಪಿಸೊಳಿಂ, ವ್ಹಾಳೊ, ಪಾವ್ಸ್, ವೊಡ್ತ್, ಮಾಂಯ್, ಪಾನಾಂ, ವಾರೆಂ, ಮಾತಿ, ಭುಂಯ್, ಆರ್‍ಸೊ, ಉಜೊ, ಸುಕ್ಣಿಂ, ದೊರಿ, ರೂಕ್, ರಾನ್ ಆನಿಕೀ ಶೆಂಭೊರಾಂ ವಯ್ರ್ ಪ್ರತಿಮಾ ಉಟೊನ್ ದಿಸ್ತಾತ್! ಹ್ಯಾ ಪಯ್ಕಿಂ ಚಡಾವತ್ ಕವಿತಾ ವಾಚ್ತಚ್ ನಿಜಾಯ್ಕೀ ದೊಳ್ಯಾಂ ಖಾಂಚಿಂನಿ ದುಕಾಂ ದೆಂವ್ತಾತ್! ಪರತ್ ಪರಿಸರ್ ಆನಿ ಜಿವಿಂಚೊ ಸತ್ತ್ಯಾನಾಸ್! ಫಕತ್ ಇಮಾಜಿ ದವರ‍್ನ್, ತಾಕಾ ವೀಜ್ ದಿವ್ಯಾಂನಿ ಸುಂರ‍್ಗಾರಾವ್ನ್ ಮನ್ಶಾಪಣ್‍ಚ್ ನಾ ತರ್ ತಸಲೆಂ ಆಚರಣ್ ದೇವ್ ಮಾನ್ವತ್? ರೂಕ್ ಕಾತರ‍್ಚೆಂ ತೆಂ ಭಿರಾಂಕುಳ್ ಕಂಪನ್ ಗರ್ಭಾಂತ್ ಆಸ್ಲಲ್ಯಾ ಪಿಂಪ್ರ್ಯಾಕ್ ಕಳಜೆ ತರ್ ಕವಿಚಿ ಚಿಂತ್ಪಾ ಶ್ಯಾಥಿ ವಾಚ್ಪ್ಯಾಂಕ್‍ಚ್ ಥರ್ಥರಾಯ್ತಾ! ಸರ್ಕಾರಾಚ್ಯಾ ನವ್ಯಾ ಯೋಜನಾಕ್ ರಾನಾಂತ್ ಉದಕ್ ನಾತ್ಲಲೆಂ ಉಜ್ವಾಡಾಚ್ಯಾ ಆವ್ರಾಕ್ ರಾನ್ ಕಶೆಂ ಬುಡ್ತಾ ತೆಂ ಕವಿ ಭೋವ್ ನಾಜೂಕಾಯೆನ್ ವಿವರಣ್ ದಿತಾ. ವಿಪರ್ಯಾಸ್ ಮ್ಹಳ್ಯಾರ್, ರಾನಾವಿಶಿಂ ಸರ್ಕಾರಾನ್ ಗುಮಾನ್ ದಿಂವ್ಚೊ ನಾಟಕ್ ಫಕತ್ ನಾಂವಾ ಖಾತಿರ್!?

ಎಕಾ ಕುಟ್ಮಾ ಭಿತರ್ ಜಾಂವ್, ದೇಶಾ ಮಧೆಂ ಜಾಂವ್... ಗಲಾಟೊ ವಾ ಝುಜ್ ಕರ್‍ಚೆಂ ಫಕತ್ ಜಾಗ್ಯಾ ಪಾಸತ್!  ಮನ್ಶ್ಯಾಚೊ ಹೊ ಸ್ವಾರ್ಥ್ ಪಳೆಲ್ಲೆಂ ಉದಕ್ ಮ್ಹಣ್ತಾ, "ಸಗ್ಳೊ ಜಾಗೊ ಮ್ಹಜೊಚ್ ಆಸ್‍ಲ್ಲೊ ಆನಿ ಪರ್‍ತ್ಯಾನ್ ಮ್ಹಜೊ ಜಾಂವ್ಕ್ ಸಕ್ತಾ!" ಕಸಲೆಂ ಮಾರ್ಮಿಕ್ ಸತ್ ಹೆಂ? ಹೆಂ ಚಿಂತಪ್ ಜರ್ ಆಮ್ಚ್ಯಾ ದೇಶಾಚ್ಯಾ ಮುಕೆಲ್ಯಾಂನಿ ಖರ‍್ಯಾನ್  ಮತಿಂ ಘೆತ್‌ಲ್ಲೆಂ ತರ್ ಸಗ್ಳೊ ಸಂಸಾರ್ ಶಾಂತಿ ಸಮಾಧಾನಾಚೆಂ ಬಿಡಾರ್ ಜಾತೆಂ ನ್ಹಯ್!? ದೇವ್ ಮಂದಿರಾಂತ್ ಮೊಬಾಯ್ಲ್ ವ್ಹಾಜ್ತಾನಾ ದೇವ್‌ಪರ್‍ಜೆಚಿ ಪ್ರತಿಕ್ರಿಯಾ ಕಶಿ ಆಸ್ತಾ? ಹೆಂ ದೇವ್ ಮಂದಿರ್ ಸಂಸಾರಾಕ್ ತುಲನ್ ಕೆಲ್ಲೆಂ ಪಳೆತಾನಾ ಕವಿಚಿ ವಿಶೇಸ್ ಜಾಣ್ವಾಯ್ ಪಾರ್ಕುಯೆತಾ!

ಸಿಮೆಸ್ತ್ರ್ ಮೆಲ್ಲ್ಯಾ ಮನ್ಶಾಚೊ ಮಾತ್ರ್ ನ್ಹಯ್, ಜಿವ್ಯಾಂಚೊಯ್ ಜಾಗೊ ಮ್ಹಣುನ್ ಸಿಮೆಸ್ತ್ರಿಂತ್ಲಿ ಜಾಗ್ರಣ್ - ಕವಿತೆಂತ್ ಭೋವ್ ಸುಂದರ್ ಥರಾನ್ ವರ್ಣನ್ ಕೆಲ್ಲೆಂ ಪಳೆತಾನಾ ಮನ್ ಧಾದೊಸ್ ಜಾತಾ. "ಕಾಯ್ಬೆವಾ ರುಕಾಚಿ ಆಶಾ" ಕವಿತಾ ವಾಚ್ತಾನಾ ಪರಿಸರ್, ಸಂಸ್ಕೃತಿ ಆನಿ ಚರಿತ್ರಾ ತೀನ್ ವಿಷಯ್ ಕಶೆ ಎಕಾಚ್ ವಿಷಯಾ ವಯ್ರ್ ಗಾಂಚ್ ಆನಿ ಸಂಪರ್ಕ್ ರಚ್ತಾತ್ ಮ್ಹಳ್ಳ್ಯಾಕ್ ಏಕ್ ಜಿವೆಂಚ್ ನಿದರ್ಶನ್. ಆಮ್ಚ್ಯೆ ದಿಸ್ಪಡ್ತ್ಯೆ ಜಿಣಿಯೆಂತ್ "ಆಪ್ಣಾಚೆಂ, ಆಪ್ಣಾಚೆಂ" ಮ್ಹಣುನ್ ಬಡಾಯ್ ಉಲೊವ್ನ್ ಹೆರ್ ವಸ್ತುಂಕ್ "ಪರ್ಕಿ" ಮ್ಹಣುನ್ ಬೆಪಾರ್‍ವೊ ಕರ‍್ತಾನಾ, ಮಾತಿ "ತುಂ ಮ್ಹಾಕಾ ಪರ್ಕಿ ನ್ಹಯ್, ಮ್ಹಜ್ಯಾಚ್ ವಾಂಟ್ಯಾಚೊ ಆನಿ ಮ್ಹಜ್ಯಾಚ್ ಕಣಾಂಚೊ"- ಮ್ಹಣುನ್ ಪುಸ್ಪುಸ್ತಾನಾ, ಕವಿನ್ ವಾಸ್ತವಿಕತೆಕ್ ಮಹತ್ವ್ ದಿಲ್ಲಿ ಏಕ್ ಅಪ್ರೂಪ್ ಪರ್ಕಿ ಕವಿತಾ ಆಮ್ಕಾಂ ಭೆಟನಾಸ್ತಾಂ ರಾವಾನಾ! ಘಾಯಾಂಚೆರ್, ವಾರ‍್ಯಾಚೆಂ ವ್ಯಾಕರಣ್, ನಾರ್ಲಾಚಿ ಭೆಟೊವ್ಣಿ, ತಣಾಕ್ ರಾಗ್ ನಾ, ಲ್ಹಾರ್ ಆನಿ ಹೆರ್ ಜಾಯ್ತ್ಯೊ ಕವಿತಾ ಆಮ್ಕಾಂ  ಪ್ರಕೃತಿಚ್ಯಾ ಮೊಗಾರ್ ಪಡುಂಕ್ ಉಲೊ ದಿತಾತ್.

ಸಾಮಾಜಿಕ್ ದಿಷ್ಟಿನ್ ಪಳೆಂವ್ಚ್ಯಾ ಕವಿತೆಂ ವಯ್ರ್ ಏಕ್ ನದರ್ ದಿಲಿ ತರ್;

ಫಾತ್ರಾ ಖಾಂಚಿಂನಿ ಪಡುನ್ ಕಿರ್‍ಲಾಲ್ಲೆಂ ಪಿಂಪ್ರೆಂ ಝಾಡ್ ಸುರ್ಯಾಚ್ಯಾ ಕಿರ್ಣಾಂಕ್ ಆನಿ ಫಾತ್ರಾಚ್ಯೆ ಕಠೀಣ್ ಉಬೆಕ್ ಕಿತ್ಲೆಂ ಸೊಶಿತ್?- ಹೆಂ ಸದಾಂನೀತ್ ಪಳೆವ್ನ್ ಆಸ್ಚೆಂ ಫಾತ್ರಾಚೆಂ ಕಾಳಿಜ್ ಸಯ್ತ್ ಕಡೊನ್ ಗೆಲಾಂ ಮ್ಹಣ್ತಾ ಕವಿ. ಅಸಲಿಂ ಝಾಡಾಂ ಆಮ್ಚ್ಯಾ ಸಮಾಜಾಂತ್ ಜಾಯ್ತಿಂ ಆಸಾತ್. ಪುಣ್ 'ಫಾತರ್ ಕಾಳಿಜ್' ಮೋವ್ ಕರ್‍ಚೆ ಕಿತ್ಲೆ ಜಣ್ ಮೆಳ್ತಿತ್ ಮ್ಹಳ್ಳೆಂ ಸವಾಲ್ ಸದಾಂಚ್ ಧೊಸ್ತಾ. (ಖಡ್ಪಿ ಸುವಾತೆರ್ ಪಡ್ಲಲೆಂ ಬಿಂ )

ಆಮ್ಚ್ಯಾ ಸಮಾಜಾಂತ್ ಫಾಲ್ಯಾಂಚಿ ಖಂತ್ ನಾಸ್ತಾಂ, ದಿಸ್ಪಡ್ತೊ ಗ್ರಾಸ್ ಜೊಡ್ಚೊ ಅನಾಥ್ ಲೋಕ್ ಜಾಯ್ತೊ ಆಸಾ. ತ್ಯಾ ತ್ಯಾ ದಿಸಾ ಕಾಮ್ ಕರ‍್ನ್ ಪೋಟ್ ಭರ‍್ಚೆ ತಾಂಚ್ಯೆ ದಿಸ್ಪಟೆಕ್ ಕೋವಿಡಾಚೊ ಕಾಳ್ ಅಡ್ಕಳ್ ಜಾಲ್ಲೊ. ಹಾಂಚೆ ಪಯ್ಕಿಂ ತ್ಯಾ ನೆಣ್ತುಲ್ಯಾ ಭುರ್ಗ್ಯಾಚಿ ಜಾಪ್ ಆಯ್ಕಾತಾನಾ ಕಾಳಿಜ್ ಕಡೊನ್ ವೆತಾ. ಸರ್ಕಾರಾನ್ ಕಾಂಯ್ ಥೊಡೆಂ ಗುಮಾನ್ ಹ್ಯೆ ಕುಶಿನ್ ದಿಲೆಂ ತರ್ ತಾಂಚೆಂಯ್ ಫಾಲೆಂ ಹೆರಾಂಪರಿಂ ಜಾಂವ್ಚೊ ಆಶಾವಾದ್ ಕವಿನ್ ವಾಚ್ಪ್ಯಾಂಕ್ ಸೊಡ್ಲಾ. (ಪೆನ್ನು ಬೇಕಾ ಪೆನ್ನು) ನಿರಾಧಾರಿ ಕುಟಮ್ ಕಥಾವಸ್ತ್ ಘೆವ್ನ್ ,'ಧುಳಿಂತ್ ಸಪ್ಣೆಂವ್ಕ್ ಆನಿ ಜಿಯೆಂವ್ಕ್ ಸೊಡಾ'- ಮ್ಹಣುನ್ ಉಲೊ ದಿತಾನಾ, ಖಂಯ್ಚ್ಯಾಯ್ ಕಠೋರ್ ಮನ್ಶಾಚೆಂ ಕಾಳಿಜ್ ಕಡನಾಸ್ತಾಂ ರಾವಾನಾ! ತರೀ, 'ಹುಷಾರ್ ಧುವ್ ಇಜ್ನೆರ್ ಜಾಂವ್ಚೆಂ' ಸಪಣ್ ವೆಕ್ತ್ ಕರ‍್ತಾಸ್ತಾನಾ ಮತಿಕ್ ಉಲ್ಲಾಸ್ ದಿತಾ. (ಪ್ರಗತೆಚ್ಯಾ ಸಾಂಕ್ಯಾ ಪಂದಾ) ಆಮಿ ವೆಚೆಂಗಿ? - ಕವಿತಾ ಸಮಾಜಾಂತ್ಲ್ಯಾ ಆಮಾಲ್ಯಾಂಕ್ ಏಕ್ ಜಾಗ್ವಣಿ ದಿತಾ.

ಹ್ಯಾ ಪುಸ್ತಾಕಾಂತ್ ಉಂಚ್ಲ್ಯಾ ಮಟ್ಟಾಚ್ಯೊ ವಿಂಚ್ಣಾರ್ ಕವಿತಾ ಆಸಾತ್ ತರೀ ಮ್ಹಾಕಾ ಲ್ಹಾನ್ಪಣಾಲ್ಯೊ ಯಾದಿ, ಕವಿಚ್ಯಾ ಮಾಂಯ್ ಬಾಬಾಚ್ಯಾ ಸಳಾವಳಿಚ್ಯೊ ಕವಿತಾ ಚಡ್ ಪಸಂದ್ ಜಾಲ್ಯೊ. ಮಾಂಯ್ ಬಾಬ್ ಜಿವಂತ್ ಆಸ್ತಾನಾ ಆಸ್ಚ್ಯಾ ಉಗ್ಡಾಸಾಚ್ಯಾಕೀ, ತಿಂ ಮೆಲ್ಯಾ ಉಪ್ರಾಂತ್ ಧೊಸ್ಚೊ ಉಗ್ಡಾಸ್ ಕಠೀಣ್. ಆನಿ ತ್ಯಾ ಯಾದಿಂವಿಶಿಂ ಕಾಂಯ್ ಬರಯ್ಲೆಂ ತರ್ ತೆಂ ಸಾಸ್ಣಾಕ್ ಮಾಜ್ವಾನಾ ತಸಲೆಂ. ಎಕಾಚ್ ಪಾಕ್ಯಾ ಪಂದಾ ಜಿಯೆಂವ್ಚ್ಯಾ ಹರ್ ಎಕಾ ಕುಟ್ಮಾ ಸಾಂದ್ಯಾಚ್ಯೊ ಪ್ರತಿಮಾ ಮಾಂಯ್ನ್ ಶಿಂವ್ಲಲ್ಯಾ ಉಶ್ಯಾ ತಿತ್ಲ್ಯೆಚ್ ನಾಜೂಕಾಯೆನ್ ಕವಿಚ್ಯಾಚ್ ಮೊಗಾಳ್ ಉತ್ರಾಂನಿ ಸಾಂಗ್ಚೆಂ ತರ್, “ಜೊಗಾಸಣೆನ್ ಗುಂತುನ್”, ಹ್ಯಾ ಕವಿತೆಚಿ ಶಿಂವಣ್ ಎಂಬ್ರಾಯ್ಡರಿಪರಿಂ ಸೊಭ್ತಾ ಆನಿ ವಾಚ್ತಾಂ ವಾಚ್ತಾನಾ ಕಾಳಿಜ್ ʼವಾಹ್ ವಾಹ್ʼ ಮ್ಹಣುನ್ ಆಪಾಪಿಂಚ್ ಉದ್ಗಾರ‍್ತಾ! ಕವಿತೆಚ್ಯೆ ಆಕ್ರೇಕ್ ಆಧುನಿಕ್ ಹಕೀಗತ್ ಝಳ್ಕಾತಾ ತರೀ, ಮಾಂಯ್ಚ್ ಏಕ್ ಉಶೆಂ! ತಾಚ್ಯಾಕೀ ವರ್‍ತೆಂ ಮೋವ್ ಕಿತೆಂ ಆಸಾ ಹ್ಯಾ ಸಂಸಾರಾಂತ್! ನ್ಹಯ್ಗಿ? (ಮಾಂಯ್ನ್ ಶಿಂವ್‍ಲ್ಲೆಂ ಉಶೆಂ)

ಆಮ್ಚ್ಯಾ ವಡಿಲಾಂನಿ 'ಮನ್ಶಾಂಕ್ ಮಾತ್ರ್ ಅತ್ಮೊ ಆಸ್ಚೊ, ಮೊನ್ಜಾತಿಂಕ್ ನಾ'- ಅಶೆಂ ಶಿಕಯ್ಲಾಂ. ಪುಣ್ ಆತಾತಾಂ ಪಳೆತಾನಾ ಕವಿಚೊ ಮೊವಾಳ್ ಬಾಬ್ ಸರೊನ್ ಸಭಾರ್ ವರ್ಸಾಂ ಸಂಪ್ಲ್ಯಾಂತ್. ತೊ ಆಜ್ ತಾಚ್ಯಾ ಉತ್ರಾಂನಿ ವಾಡ್ಲಾ. ಆತಾಂ ತಾಕಾ ಬಾಬಾಚಿಂ ಜಾಣ್ತಿಕಾಯೆಚಿಂ ಉತ್ರಾಂ ಎಕೇಕ್ ಸಮ್ಜುಂಕ್ ಲಾಗ್ಲ್ಯಾಂತ್. ಹ್ಯೆ ಕವಿತೆಂತ್ ತಾಚ್ಯಾ ಉತ್ರಾಂಕ್ ಆನಿ ಕವಿತೆಕ್ ಕಾಂಯ್ ಫರಕ್ ನಾ. ತಾಣೆಂ ಕವಿತಾ ತೊಂಡಿಂ (oral) ಉಚಾರ್‍ಲ್ಯಾತ್. ಆಧುನಿಕ್ ಬರೊವ್ಪಿ ತಿಂತೆರಾಂತ್ ಉಚಾರ‍್ತಾತ್.. .ತಿತ್ಲೊಚ್ ಫರಕ್! ತರ್ ಹಾಂವ್ ಚಿಂತ್ತಾಂ, ಜಲ್ಮಾ ಥಾವ್ನ್‌ಚ್ ಕವಿ ಆಂಡ್ರ್ಯೂ ಭಿತರ್ ವ್ಹಾಳ್ಚ್ಯಾ ರಗ್ತಾಂತ್‍ಚ್ ಕವಿತಾಯ್ ವ್ಹಾಳ್ತಾ. ಪಾಕಾಟೆ ಪಾಪುಡ್ಚೊ ರಾಜ, ತಣಾಂ ಪಾನಾಂ ಪಂದಾ, ಮಯ್ಪಾಶಿ ಹಾತ್, ಚುಂಬಳ್, ಕಥೊಲಿಕ್ ಪಂಚಾಂಗ್, ಬಾಳಾನ್ ದಿಲ್ಲೆಂ ಇನಾಮ್, ಮಾಂಯ್ಚೆಂ ಕಾಮ್ 24x7,  ನವ್ಯಾ ವರ್ಸಾಕ್ ತೆಚ್ ಸಬ್ಧ್, ಫಾಂತ್ಯಾಚಿಂ ಪೊಕ್ರಿ ನಾತ್ರಾಂ, ಕೊಂತ್ ಆನಿ ಸುತ್, ತೆ ನೆಣ್ತೆ ಘಾಮಾ ಥೆಂಬೆ, ಸುರ್ಯಾಕ್ ತಾಪ್ ಆಯ್ಲ್ಯಾರ್, ಲಾಂಪ್ಯಾಂವಾಚೊ ಆರ್‍ಸೊ ಫುಟ್ತಾನಾ ಆನಿ ಹೆರ್ ಕವಿತಾ, ಕವಿ ಮಾತ್ರ್ ನ್ಹಯ್, ವಾಚ್ಪ್ಯಾಂಚೆಯ್ ಭುರ್ಗ್ಯಾಪಣಾಲೆ ದೀಸ್ ಉಗ್ಡಾಸ್ ಹಾಡ್ತಾತ್. ತಿತ್ಲೆಂಚ್‌ ನ್ಹಯ್, ಮಾಂಯ್ ಬಾಬಾಚೆಯ್. ಅಸಲಿಂ ಬರ‍್ಪಾಂ ಖಂಯ್ಚ್ಯಾಯ್ ಪ್ರಕಾರಾಂನಿ ದಾಖಲ್ ಕರ‍್ಚೆಂ ಎಕಾ ಬರವ್ಪ್ಯಾಚೆಂ ಕರ್ತವ್ಯ್ . ನಾ ತರ್ ಹಾಂಗಾಸರ್ ಕಾಯ್ಬೆವಾ ರುಕಾಚಿ ಕವಿತಾ ಉಗ್ಡಾಸಾಕ್ ಹಾಡ್ಯೆತ್. ಕವಿ ಸಂಗಿಂ ವಾಚ್ಪಿಯ್ ಆಪಾಪ್ಲ್ಯಾ ಲ್ಹಾನ್ಪಣಾಲ್ಯಾ ಪಾವ್ಲಾಂನಿ ಚಲುನ್ ಆಯಿಲ್ಲೊ ಅನ್ಭೋಗ್ ಹ್ಯಾ ಥೊಡ್ಯಾ ಕವಿತೆಂನಿ ಆಮ್ಕಾಂ ಭೊಗುಂಕ್ ಮೆಳ್ತಾ. ಕವಿನ್ ಬರಯ್ಲಲಿ ಕವಿತಾ ಆಪ್ಲಿಚ್ ಜಾಯ್ಜೆ ಮ್ಹಣುನ್ ನಾ. ಕವಿಚೊ ಗುಂಡಾಯೆಚೊ ಅನ್ಭೋಗ್ ಆನಿ ಹೆರಾಂಚ್ಯಾ ಭೊಗ್ಣಾಂಕ್ ಆನಿ ಸಮಸ್ಯಾಂಕ್ ಸ್ಪಂದನ್ ಕರ‍್ನ್  ತ್ಯೊ ಸಮ್ಜುನ್ ಘೆಂವ್ಚಿ ಸಕತ್ ಆಪ್ಣಾವ್ನ್ ಆಪುಣ್‍ಚ್ ಪಾತ್ರ್‌ಧಾರಿ ಜಾವ್ನ್ ವಾಚ್ಪ್ಯಾಂಕ್ ಪಾವೊಂವ್ಚಿ ಕಲಾ ಕವಿ ಆಂಡ್ರ್ಯೂಲಾಗಿಂ ಯಥೇಶ್ಟ್ ಆಸಾ.

ಉಜ್ಯಾ ತೊಂಡಾಲಾಗಿಂ, ಗಾಜಾಂತ್ಲೆಂ ಶಬೀನಾ, ವಿಮಾನಾಂ ಮೆಜ್ಲ್ಯಾ ಉಪ್ರಾಂತ್, ಸೈರನ್ - ಹ್ಯೊ ಕವಿತಾ ವಾಚ್ಪ್ಯಾಂಚಿ ಲೋಂವ್ ಉಬಿ ಕರ‍್ತಾತ್. ಸಂಸಾರ್ ರಚ್‌ಲ್ಲ್ಯೆ ಸುರ್ವೆರ್‍‌ಚ್, ಕಾಯ್ನಾನ್ ಸುರು ಕೆಲ್ಲಲೆಂ ತೆಂ ಝುಜ್ ಆಜೂನ್ ಅಖ್ಯಾ ಸಂಸಾರಾರ್ ತಾಚ್ಯೊ ಸಂತತಿ ಮುಂದಾರುನ್ ಆಸ್ಚೆಂ ಆಮಿ ದಿಸಾಂದೀಸ್ ಖಬ್ರಾಂನಿ ದೆಕ್ತಾಂವ್!

     ಘಡಿಯಾಳಾಚಿ ಕಾಳ್ಜಾ ಉಡಿ, ತಿ ಪಾಟಿಂ ಗೆಲಿ, ಪಾನ್ ಆನಿ ಉಡಿ, ಎಕಾ ಆರ್‍ಶಾಂತ್ಲಿ ಕಾಣಿ, ದೊಳೆ ಬಾಂದ್ಚೊ ಖೆಳ್, ಕೊಣೀ ಪಳೆತಾತ್‌ಗೀ?, ಫಾಂತ್ಯಾಚಿಂ ಪೊಕ್ರಿ ನಾತ್ರಾಂ ಆನಿ ಹೆರ್ ಕವಿತೆಂನಿ  ಮ್ಹಾತಾರ್‍ಪಣ್ ಎಕೆ ವೆಕ್ತಿಕ್ ಎಕ್ಸುರ್‍ಪಣ್ ಆನಿ  ಕಿತ್ಲಿ ಉಬ್ಗೊಣ್ ಹಾಡ್ತಾ ಮ್ಹಣ್ಚ್ಯಾಕ್ ರುಜ್ವಾತ್  ಮ್ಹಳ್ಳೆಪರಿಂ ಪ್ರತಿಬಿಂಬಿತ್ ಜಾಲ್ಯಾಂತ್ ಹಿಂ ಕವನಾಂ. ಆವಯ್ ಬಾಪಯ್ ಆಪ್ಣಾಕ್‍ಚ್ ಸಮರ್ಪಣ್ ಕರ‍್ನ್ ಆಪ್ಲ್ಯಾ ಭುರ್ಗ್ಯಾಂಕ್ ಆಪ್ಣಾಚ್ಯಾಕೀ ಊಂಚ್ ಮಟ್ಟಾರ್ ದವರ‍್ಲ್ಯಾರೀ, ಭುರ್ಗಿಂ ಆಪಾಪ್ಲ್ಯಾ ಖಾಸ್ ಸಂಸಾರಾಂತ್ ಬುಡೊನ್ ಪ್ರಾಯ್ವಂತಾಂಕ್ ನೆಗಾರ್ ಕರ‍್ಚೆಂ ದಿಸಾಂದೀಸ್ ಚಡೊನ್‌ಚ್ ಆಸಾ. ತಾಂಕಾಂ ಮೊರಾ ಪರ್ಯಾಂತ್ ಆಪ್ಲ್ಯಾ ಭುರ್ಗ್ಯಾಂ ಸಾಂಗಾತಾ ರಾವುಂಕ್ ʼನಾಕ್ ಭರ್ ಆಶಾʼ ಆಸ್ಲ್ಯಾರೀ ಭುರ್ಗಿಂ ತಾಂಚಿ ನಿಮಾಣಿ ಆಶಾ ಪರಿಪೂರ್ಣ್ ಕರುಂಕ್ ತಯಾರ್ ಆಸಾನಾಂತ್. ಹಿ ಖರಿ ಗಜಾಲ್!

“ಪುರಾವ್ಯಾಂಚಿ ಗರ್ಜ್‌ ನಾ”, “sorry sir”, “ಸಂಹಾರ್”, “ಹಿಂಸಾ”, “ಪಾವ್ಸ್” - ಅಸಲ್ಯೆ ಕವಿತೆಂನಿ ಶೆತ್ಕಾರಾಚೆ, ಸೊಜೆರಾಂಚೆ ಆನಿ ಸ್ತ್ರೀಯಾಂಚೆ ಸಮಸ್ಸೆ, ಶೋಷಣ್‌‌ ಆನಿ ತಾಂಚ್ಯಾ ಭಾವನಾಂಕ್‌ ಕವಿ ಸ್ಪಂದನ್‌ ಜಾಲಾ ತೆಂ ಹಾಂಗಾಸರ್‌ ಸ್ಪಷ್ಟ್‌ ಜಾತಾ. “ಪೋಲಿಶ್‌ ಕೆಲ್ಲೊ ಇಟೊ”, “ಸ್ವತಾಚಿ ಭುಕ್”- ಹಾಂಗಾಸರ್‌ ಸ್ತ್ರೀ ಆನಿ ದಾದ್ಲ್ಯಾಂಕ್‌ ವಿಶೇಸ್‌ ಜಾಗ್ವಣಿ ದಿಲ್ಲೆಪರಿಂ ಭೊಗ್ತಾ! ದುಷ್ಟ್‌ ಆಡಳಿತ್‌, ಅವ್ಘಡಾಂ, ಬೇಧ್‌ ಭಾವ್‌,   ದೇಶ್ ಪ್ರೇಮ್‌ ಆನಿಕೀ ಜಾಯ್ತ್ಯಾ ವಿಷಯಾಂ ಬೊಂವ್ತಿಂ ಕವಿನ್‌ ಭೊಂವ್ಡಿ ಮಾರ‍್ಲಲಿ ದಿಸ್ತಾ.

ಆಂಡ್ರ್ಯೂಚಿ ಕವಿತಾ ವಾಚ್ಪ್ಯಾಂಚ್ಯೆ ಮತಿಕ್ ಅಯಸ್ಕಾಂತಾಪರಿಂ ಮ್ಹಣ್ಯೆತ್. ತ್ಯೊ ಮತಿಕ್ ಆದ್ಳೊನ್ ಚಿಡ್ಕಾತಾತ್. ಥಂಯ್ ಥಾವ್ನ್ ಶೀದಾ ಕಾಳ್ಜಾಕ್ ನಾಟ್ವಾತಾತ್ ಆನಿ ಮತಿ ಭಿತರ್ ಎಕಾ ಮೊಗ್ರ್ಯಾಪರಿಂ, ಗುಲೊಬಾಪರಿಂ ಬೊಂಗೊ ಫುಲೊನ್ ಫುಲೊನ್, ಘಡ್ಯೆನ್ ಘಡಿ ಸ್ವಾದ್ ಪ್ರಸಾರುನ್ ಪರ್ತ್ಯಾನ್ ಪರ್ತ್ಯಾನ್ ವಾಚುಂಕ್ ಪ್ರೇರೇಪಣ್ ದಿತಾತ್. 

ಅರ್ಥಾಭರಿ̧ತ್ ಸೊಭಿತ್ ಸುಂದರ್ ಕವಿತೆಂಚೊ ಪುಂಜೊ ಸಕಾಳಿಕ್ ಮ್ಹಳ್ಳೆಪರಿಂ ವಾಚ್ಪ್ಯಾ ಹಾತಿಂ ದಿಲ್ಲಲ್ಯಾ ಆಶಾವಾದಿ ಪ್ರಕಾಶನಾ (ಥಕಾನಾಸ್ಲೊ ಕೊಂಕ್ಣಿ ಮೊಗಿ) ಕ್ ಅಭಿನಂದನ್ ಪಾಟಯ್ತಾಂ. ಆನಿ ಹೆಂ ಪುಸ್ತಕ್ ಸಗ್ಳ್ಯಾ ಸಂಸಾರಾರ್ ಜಿಯೆಂವ್ಚ್ಯಾ ಹರ್ ಪರ್‍ಜೆಕ್ ಪಾವ್ಲ್ಯಾರ್ ಸಂಸಾರ್ ಬದ್ಲುಂಚಿ ತಾಂಕ್ ಹ್ಯೆ ಕವಿತೆಂನಿ ಆಸಾ ಮ್ಹಣ್ ಹಾಂವ್ ಧಯ್ರಾನ್ ಸಾಂಗ್ತಾಂ. ಸಂಸಾರಾಚ್ಯಾ ಹರ್ ಭಾಶೆಂನಿ, ಹರ್ ಲಿಪಿಂನಿ ಹೊ ಬೂಕ್ ಪರ್ಗಟ್ ಜಾಲ್ಯಾರೀ ಕಾಂಯ್ ನವಾಲ್ ನಾ. ಹ್ಯಾ ಪುಸ್ತಕಾಕ್ ಫಾವೊ ತೊ ಪ್ರಾಮಾಣಿಕ್ ಪುರಸ್ಕಾರ್ ಲಾಬುಂ ಮ್ಹಣ್ ಆಶೆತಾಂ. ಕವಿ ಆಂಡ್ರ್ಯೂ ಥಾವ್ನ್ ಫುಡ್ಲ್ಯಾ ವರ್ಸಾಂನಿ ಸಯ್ತ್ ಉಂಚ್ಲಿಂ, ವಿಂಚ್ಣಾರ್ ಪುಸ್ತಕಾಂ ಪರ್ಗಟ್ ಜಾಂವ್ ಮ್ಹಣ್ ಆಪೇಕ್ಷಿತಾಂ.

- ಸಲೋಮಿ ಮಿಯಾಪದವ್, ಮೊಗರ್ನಾಡ್ (ಎಪ್ರಿಲ್, 2026)