ತಿ ಪಾವ್ಸಾಳಿ ಸಾಂಜವೆಳ್ (ಸಾಂಜ್) ಆಸ್ಲಿ. ವಾತಾವರಣಾತ್ ಎಕ್ ಭಂಯಕರ್ ಗೂಢ್ ಪಾತಳಿಲ್ಲೆಂ, ಸಾರ್ಕೆಂ ತಾಚ್ಯಾ ಘಾರಶ್ಯಾ ಗೂಢ್ ದೊಳ್ಯಾವರ್. ಮಳಬಾತಲಿ ನಿಳಿ ನಿಳಾಯ್ ಕಾಳ್ಯಾ ಕಾಳ್ಯಾ ಕುಪಾಂನಿ ಧಾಪೂನ್ ಉಡಯ್ಲ್ಲಿ. ಪಯ್ಸುಲ್ಯಾನ್ ಖಂಯಚ್ಯಾನ್ ತರಿ ಕುಪಾಂರ್ ಕುಪಾಂ ಆಪಟಲ್ಯಾಚೊ ವ್ಹಡ್ ವ್ಹಡ್ ಆವಾಜ್ ಯೆತಾಲೊ ಮದೀಚ್ ಜೊಗುಲ್ ಝಗಝಗತಾಲೆ.

ತಿ ತಾಚೆ ವಾಂಗಡಾ ದರ್ಯಾ ದೆಗೆವೆಲ್ಯಾ ತ್ಯಾ ಲ್ಹಾನಶ್ಯಾ ಗಾಂವಾಚ್ಯಾ ಚಾರ್ ರಸ್ತ್ಯಾಚ್ಯಾ ಮಧ್ಲ್ಯಾ ಮದಿ ತಿಟ್ಯಾರ್ ಉಬಿ ಆಸ್ಲಿ. ತಿಜೆಖಾತೀರ್ ಹೊ ತಿಚ್ಯಾ ಜಿವ್ನ್ ಮರಣಾಚೊ ಪ್ರಸ್ನ್ ಆಸ್ಲೊ. ತ್ಯಾ ಲ್ಹಾನಶ್ಯಾ ಗಾಂವಾ ಕುಶೀಚೊ ತೊ ಯೆದೊ ವ್ಹಡ್ ಆಕಾಂತ್ ದರ್ಯಾ, ಥೆಂಬ್ಯಾ ಥೆಂಬ್ಯಾನ್ ತಿಚ್ಯಾ ದೊಳ್ಯಾಂತ್ ಭರುನ್ ಆಯಿಲ್ಲೊ. ಹೊ ನಿರ್ಣಾಯಕ್ ವೆಳ್ ಆಸ್ಲೊ ಕಾಂಯ್ ವೆಳ್ ಥಂಯ್ ಎಕ್ ವ್ಹಡ್ ಮೌನಾಚೊ ದರ್ಯಾ ಪಾತಳ್ಳೊ ಪಯ್ಸುಲ್ಯಾನ್ ಮಾತ್ ದರ್ಯಾ ನಿರಂತರ್ ಗಾಜ್ತಾಲೊ, ಜಶೆ ಕಾಂಯ್ ಎಕ್ ಆಕಾಂತಾಚೆ ಚಕ್ರಿವಾದಳಚ್ ಯೆವಪಾಚೆ ಆಸ್ಲೆಂ ಸಗ್ಳೆ ನಶ್ಟ್ ಕರಪಿ. ಫಕತ್ ಕಾಂಯಚ್ ದಿಸಾಫಾಟಿ ತಿ ದೊಗಾಯ್ ಎಕಮೆಕಾಚ್ಯಾ ಮೊಗಾನ್ ಪಿಶಿ ಜಾವ್ನ್ ಮೊಗಾಚ್ಯಾ ಮ್ಹವಾಳ್, ದುದಾಳ್ ತಾಂಬ್ಡ್ಯಾ ಗುಂಜ್ ಸಾಳ್ಕಾ ತಳ್ಯಾತ್ ಭೊಂವ್ತಾಲಿ ತೆ ಹಾಂಗಾ ಮುಖಾರ್ ಆಶಿಲ್ಯಾ ಕೊಣಾಕ್‌ಚ್ ಖರೆ ದಿಸ್ಪಾಚೆ ನ್ಹಯ್.

ತೊ ಥೊಡೆಂ ವೆಳ್ ತೊಂಡಾತ್ ಕಿತೆ ತರಿ ಘೊಳಯ್ಲ್ಲೆವರಿ ಉಲಯ್ಲೊ, ತ್ಯಾ ಉತ್ರಾಂ ಉತ್ರಾಂತ್ ಎಕ್ ವಾಯ್ಟ್, ದುಸ್ವಾಸಿ, ಕುಸ್ಕೊ ವಾಸ್ ಆಸಾ ಹೆ ತಿಕಾ ಜಾಣವಲೆಂ., ತೊ ನಶ್ಟೊ ಪಾಡೊ ಪರ್ಮಳ್ ತಿಜ್ಯಾ ರಂದ್ರಾರಂದ್ರಾತ್ ವಚೂನ್ ರಿಗ್ಲೊ. ಹ್ಯಾಚ್ ಖಿಣಾ ಆಪಣೆಂ ಉಬ್ಯಾ ಉಬೆಂ ಮರುನ್ ವಚಚೆಂ, ಕೊಸಳೂನ್ ವಚಚೆಂ, ಮುಖಾವೆಲ್ಯಾ ದರ್ಯಾತ್ ವಿರಗಳೂನ್ ವಚಚೆಂ ಅಶೆಂ ತಿಕಾ ದಿಸ್ಲೆಂ. ಥೊಡೊ ವೆಳ್ ತೊ ವಗೀಚ್ ರಾವಲೊ ಮಾಗೀರ್ ಥೊಡೊಸೊ ಮೊವಾಳ್ ಜಾವ್ನ್ ಉಲಯ್ಲೊ "ಸುಂಗಧಾ ತುಜೊ ಮ್ಹಜೊ ಸಾಂಗಾತ್ ಸೊಪಲೊ. ತುಜೊ ಹಾಂವ್ ಉಪ್ಕಾರಿ ಆಸಾ ಮ್ಹಜೊ ಪುರುಶಾರ್ಥ್ ತುವೆಂ ಜಾಗಯ್ಲೊ, ಎಕಾ ಗೊಬರಾತ್ ಲಿಪೂನ್ ಆಶಿಲ್ಲ್ಯಾ ಕಾಳ್ಯಾ ಕುಳಕುಳೀತ್ ಕೊಳಶ್ಯಾಚೆರ್ ಲ್ಹವಚ್ ಫೂಕ್ ಮಾರೂನ್ ಕೊಣೆತರಿ ತಾಕಾ ಧಗಧಗೀತ್ ತೆಜಿಶ್ಟ್ ಇಂಗಾಳೊ ಕರ್ಚೊ ತಸೊ ಕಿತೆತರಿ ಹಾಂವ್ ಜಾವಂಕ್ ಲಾಗ್ಲಾ. ಎಕಾ ವೆಳಾರ್ ದಿಸ್ತಾಲೆಂ ತುಜೆವಿಣೆಂ ಹಾಂವ್ ಅಪುರ್ಣ್ ಆಸಾ ಪೂಣ್
ಸುಂಗಧಾ ಖರೆ ಮ್ಹಳ್ಯಾರ್ ತುವೆಂ ಮ್ಹಾಕಾ ಪುರ್ಣ್ ಕೆಲೊ, ಹ್ಯಾ ಪುರ್ಣತ್ವಾಚ್ಯಾ ನಾಡ್ಯಾರ್ ಹಾಂವ್ ಸಗ್ಳೊ ಸಂಘರ್ಷ್ ಪೆಲೂಕ್ ಶಕತಲೊ ಕಸ್ಲೆಯ್ ಝೂಜ್ ಝುಜೂಕ್ ಪಾವ್ತಲೊ. ಮ್ಹಜೆ ಭಿತರ್ ಆತಾ ಹಜಾರ್ ಹಾತಾಚೆಂ ಬಳ್ ರಿಗ್ಲಾಂ ಪಳಯ್ ಮ್ಹಜ್ಯಾ ಕರ್ತುತ್ವಾಚಿ ಸಗ್ಳಿ ಮಳಾಂ ಹಾತ್ ಜೊಡೂನ್ ಮ್ಹಜೆ ಮುಖಾರ್ ಉಬಿ ಆಸಾತ್. ತೂಂ ತುಜೆ ವಾಟೆನ್ ವಚ್, ವಚಚ್ ತೂಂ. ತೂಂ ವತಕಚ್ ಎಕ್ ರಿತೆಪಣ್ ಯೆತಲೆಂ ಎಕ್ ನವೆಚ್ ರಿತೆಪಣ್ ಖೊಲ್ ಖಾಲೀಪಣ್ ಪೂಣ್ ಮ್ಹಾಕಾ ರಿತೆಪಣಾಚಿ ಸಂವಯ್ ನಾ ತಿ ರಿತಿ ಸುವಾತ್ ಭರ್ಪಾಕ್ ಹಜಾರ್ ವಾಟೆನ್ ಹಜಾರ್ ಜಾಣಾಂ ಯೆವ್ನ್ ಉಬೀಂ ರಾವ್ತಾಲಿ ಮ್ಹಜ್ಯಾ ಕಾಳ್ಜಾರ್, ತನ್ ಮನಾರ್ ಆಪಲೆ ರಾಜ್ಯ್ ಗಾಜವಪಾಕ್. ಮ್ಹಜ್ಯಾ ವಾಟೆರ್ ಆಡಮೆಳೆಂ ಘಾಲೂ ನಾಕಾ ವಚ್ ತೂಂ, ವಚ್, ವಚಚ್ ತೂಂ."

ತಿಣೆಂ ಆಕ್ರೊಶ್ ಕೆಲೊ ಅಕ್ರಾಳ್, ವಿಕ್ರಾಳ್ ಆಕ್ರೊಶ್. ದರ್ಯಾದೆಗೆವೆಲ್ಯಾ ತ್ಯಾ ಲ್ಹಾನಶ್ಯಾ ಗಾಂವಚ್ಯಾ ಚಾರ್ ರಸ್ತ್ಯಾವೆಲೆಂ ತಿಟ್ಯಾವೆಲೆಂ ಲೊಕ್ ತಾಂಕಾಂ ಥೀರ್ ನದರೆನ್ ಪಳಯ್ತಾಲೆ. ನಿರಂತ್ರ್ ದರ್ಯಾಚಿ ಗಾಜ್, ರಡಪ್ ಆಯಕತ್ ಲ್ಹಾನಾಚೆ ವ್ಹಡ್ ಜಾಲ್ಯಾ ಹ್ಯಾ ಲೊಕಾಂಕ್ ಹ್ಯಾ ಆಕಾಂತಾನ್ ಆಳಖೆ, ವಿಳಖೆ ಘಾಲೀತ್ ಹಾಮೆ-ಯಾನಿ ರಡಪಿ ತರ್ಣ್ಯಾ ಸೊಬೀತ್ ಚಲಯೆಚ್ಯಾ ರಡಪಾಚೆ ಕಾಂಯಚ್ ದಿಸ್ಲೆನಾ. ತಿ ರಡತ್ ಆಸ್ಲಿ ಆನಿ ತಿಜೆ ಮುಖಾವೆಲ್ಯಾನ್ ತೊ ಲಾಂಬ್ ಲಾಂಬ್ ಧೆಂಪಾ ಘಾಲೀತ್ ಗೆಲೊ. ತಿ ತಾಜೆಫಾಟಲ್ಯಾನ್ ಕಾಂಯ್ ವೆಳ್ ಧಾವಂತ್ ಗೆಲಿ ಪೂಣ್ ತೊ ಎಕ್ ವೆಳ್ ಪಸೂನ್ ಫಾಟಿ ಪಳಯನಾಸ್ತಾನಾ ಗೆಲೊ. ಕಾಂಯ್ ವೆಳ್ ತಿ ತಾಚ್ಯಾ ಫಾಟಮೊಯಾ ಆಕೃತೀಕ್ ಪಳಯ್ತ್ ರಾವ್ಲಿ, ಎಕ್ ಖೀಣಾಭರ್ ತಿಕಾ ದಿಸ್ಲೆಂ ತಿ ಪಯ್ಸ್ ಪಯ್ಸ್ ವಚ್ಪಿ ಆಕೃತಿ ಧಾವಂತ್ ಪರತ್ ಯೆತಾಲಿ ತಿಕಾ ಘಟ್ಟ್ ವೆಂಗೆಂತ್ ಘೆತಾಲಿ. ದುಸ್ರ್ಯಾಚ್ ಖಿಣಾ ತಿಕಾ ದಿಸ್ಲೆಂ ಧಾವಂತ್ ವಚಚೆ ತಾಚೊ ಹಾತ್ ಧರ್ಚೊ ಆನಿ ವಿಚಾರ್ಚೆಂ ಮ್ಹಜ್ಯಾ ಎಕಾ ಸ್ಪರ್ಶಾನ್ ಪಳಯ್ ತುಜೆ ಅಸ್ತಿತ್ವ್ ಕಶೆಂ ಚಂವರುನ್ ಫುಲಾರುನ್ ಆಯ್ಲಾ. ಪೂಣ್ ಮ್ಹಾಕಾ ಕಿತೆ ಮೆಳ್ಳೆಂ, ಮೊಗಾಚ್ಯಾ ಯೆದ್ಯಾ ವ್ಹಡ್ ದೊಂಗರ್ ತೆಂಗ್ಶೆರ್ ವ್ಹರುನ್ ಮ್ಹಾಕಾ ಸಕಲ್ ಧುಕಲೂನ್ ಉಡೊವಚೊ ಹಕ್ಕ್ ತುಕಾ ಕೊಣೆ ದಿಲೊ. ಆತಾಂ ವತಾ ತರ್ ವಚ್ ಪೂಣ್ ವತಾ ಆಸ್ತನಾ ಮ್ಹಜ್ಯಾ ದೊಂಳ್ಯಾತ್ ದುಕಾಂಚೊ ಜೊ ದರ್ಯಾ ಉಸಳ್ಳಾ ತೊ ಪಳೊವ್ನ್ ವಚ್ ಜಾತಾ ಜಾಲ್ಯಾರ್ ಥೊಡೆಶೆಂ ತೆ ದೂಖ್ ತುಜ್ಯಾ ಹಾತಾಚ್ಯಾ ಮುಠೀತ್ ಗಚ್ಚ್ ಬಾಂದುನ್ ಘೆವ್ನ್ ವಚ್. ಮುಖಾರ್ ಕೆನ್ನಾಯ್ ಫುಡಾರಾಕ್ ತುಜ್ಯಾಯ್ ವಾಟ್ಯಾಕ್ ಅಸ್ಲೆಚ್ ದೂಖ್ ಆಯ್ಲ್ಯಾರ್ ಹಿ ಮೂಠ್ ಥೊಡೀಶಿ ಸದಿಳ್ ಕರುನ್ ಪಳಯ್ ತುಕಾ ಥಾಕಾಯ್ ಮೆಳ್ಟಲಿ. ಕೊಣೆತರಿ ಕೆನ್ನಾತರಿ ಜೀವ್ ತೊಡೂನ್ ಆಪಲ್ಯಾಚೆರ್ ಮೊಗ್ ಕೆಲ್ಲೊ ಹಿ ಕಲ್ಪನಾಚ್ ಕಿತ್ಲೆ ಸಮಾಧಾನ್ ಆನಿ ಸೂಖ್ ದಿವ್ಪಿ ಆಸ್ತಾ.

ತಿ ಪಾವ್ಸಾಳಿ ಸಾಂಜವೆಳ್ ಆಸ್ಲಿ ತಾಚ್ಯಾ ಗೂಢ್ ಘಾರಶ್ಯಾ ದೊಳ್ಯಾವರೀಚ್ ಪುರಾಯ್ ವಾತಾವರಣ್ ಗೂಢ್ ಆಸ್ಲೆಂ. ತಿ ಕಿತಲೊಸೊಚ್ ವೆಳ್ ಥಂಯಚ್ ಪಡೂನ್ ರಾವಲಿ ಕೊಣೆ ತಿಕಾ ಆತಾ ಹಾತ್ ಪಸೂನ್ ಲಾಯ್ಲ್ಯಾರ್ ತಿ ಆತಾಚ್ ಎಕಾ ಮಾತಯೆಚ್ಯಾ ದಿಪಳ್ಯಾವರಿ ಥಂಯಚ್ ಕೊಸಳೂನ್ ವಚಪಾಚಿ ವಾ ಮುಖಾರ್ ಆಶಿಲ್ಲ್ಯಾ ಆಕಾಂತಾಚ್ಯಾ ದರ್ಯಾತ್ ಜೀವ್ ದಿವಪಾಕ್ ಧಾಂವತ್ ಸುಟಪಾಚಿ.

ಅಚಕೀತ್ ತಿಕಾ ಎಕ್ ಆಕಾಂತಾಚಿ ಭೂಕ್ ಲಾಗ್ಲಿ. ಚರ್ಚರುನ್ ಭೂಕ್ ಆಜ್ ಸಕಾಳಿಂ ಫಡೆ ಉದ್ಕಾಚೊ ಘೊಟ್ ಘೆನಾಸ್ತಾನಾ ತಿ ಭಾಯ್ರ್ ಸರಿಲ್ಲಿ ಕಿತೆಂ ತರಿ ಆಂಬಟ್, ಅರಬಟ್, ಚರಬಟ್ ಕಿತೆ ತರಿ ಖಾಂವಚೆ ಅಶೆಂ ತಿಕಾ ದಿಸ್ಲೆಂ. ರಸ್ತ್ಯಾಚ್ಯಾ ದಾವ್ಯಾ ವಟೆನ್ ಲಾಗೀಚ್ ಎಕ್ ಜಾಣ್ಟೀಚ್ ಬಾಯ್ಲ್ ಹಳದುವ್ಯಾಚ್ ಪಿಕಿಲ್ಲ್ಯಾ ಕೆಳ್ಯಾಂಚೊ ಪಾಟಲೊ ಘೆವ್ನ್ ಬಶಿಲ್ಲೀ, ವೊಡೊಲ್ ಥಾವ್ನ್ ತಿ ತಾಕಾ ಪಳಯ್ತ್ ಆಸ್ಲಿ. ಸುಗಂಧಾ ಉಠೂನ್ ತಿಜ್ಯಾ ಮ್ಹರ್ಯಾತ್ ಗೆಲೆ ಪಾಂಚ್ ಕೆಳಿ ಘೆವ್ನ್ ತಾಣಿ ಖಾಲಿ. ತ್ಯಾ ಬಾಯ್ಲೆನ್ ತಾಕಾ ಮ್ಹಳೆಂ “ರಡಟಾ ಕಿತ್ಯಾಕ್ ಕಿತಲೆ ಸೊಬೀತ್ ದಿಸ್ತಾ ಮುಗೊ ತೂಂ ಕೆಂಸ್ ಪಳಯ್ ಕಶೆ ಕೊಂಗರೆ, ಮುದಯಾಳೆ ಸೊಬೀತ್. ಕಪಲ್ ಪಳೆ ಕಶೆ ವ್ಹಡ್ ಆನಿ ರುಂದ್ ಅಶ್ಯಾ ಕಪಲಾಚಿ ಮನಶಾಂ ಭಾಗ್ಯವಂತ್, ಕಿರ್ತಿವಂತ್, ನಶಿಬವಾನ್ ಆನಿ ಹುಶಾರ್ ಆಸ್ತಾತ್. ಜಿಣ್ಯೆಂತ್ ಬಾಯೆ ಕಿತೆಚ್ ಥೀರ್ ಉರನಾ. ಫಾಟಲಿ ತೀಸ್ ವರ್ಸಾಂ ಹಾಂವ್ ಹಾಂಗಾ ದರ್ಯಾ ಮುಖಾರ್ ಬಸೂನ್ ಕೆಳಿ ವಿಕತಾ, ದೆಗೆರ್ ಯೆವಪಿ ದರ್ ಎಕ್ ಲ್ಹಾರ್ ನವೆಂ ಆಸ್ತಾ ನವಿ ಉರ್ಬಾ ನವಿ ನಜರ್ ಘೆವ್ನ್ ಯೆತಾ. ದೆಗೆವಯ್ಲಿ ದರ್ ಎಕ್ ಬರೀ, ವಾಯ್ಟ್, ಪಾಡಿ, ನಶ್ಟ್ ವಸ್ತ್ ತೊ ಆಪಲ್ಯಾ ಪೊಟಾಂತ್ ಘೆತಾ ಆನಿ ನವೊ ತಾಲ್ಲ್ ಜುವಾನ್ ಜಾಯ್ತ್ ವತಾ. ದರ್ ಖಿಣಾ ಖಿಣಾಕ್ ದರ್ಯಾಯ್ ನವೊ ಜಾತಾ ಆನಿ ದೆಗಯ್ ಬಿ. ಎಕೆಕದಾ ವಾದಳ್ ವಾರೆಂ ಜಾವ್ನ್ ದರ್ಯಾ ಭಿತಲ್ಲೆಂ ಭಿತರ್ ಆಕಾಂತಾಚೊ ಘುಂವ್ತಾ, ಸೊಶೆತಾ, ಘೊಗೆತಾ ಎಕೆಕ್ ಪಾಳ್ ಮಾಡಾ ಯೆದೆಂ ಪಳಯ್ಲ್ಯಾರ್ ದಿಸ್ತಾ ಆತಾ ಹೆ ವಾದಳ್ ವಾರೆಂ ಸೊಂಸೂ ನಜ್ ಜಾವ್ನ್ ದರ್ಯಾ ಪಳ್ ಮಾರೂನ್ ಧಾವ್ತಲೊ ಪೂಣ್ ದರ್ಯಾ ಆಸಾ ತಸೊ ದುಸರೆ ದೀಸ್ ಥಂಡ್ ಜಾವ್ನ್ ಲ್ಹವ್ ಲ್ಹವ್ ಲ್ಹಾರೆತ್ ರಾವ್ತಾ."

ದರ್ಯಾದೆಗೆವೆಲ್ಯಾ ತ್ಯಾ ಗಾಂವಚ್ಯಾ ರುಮಡಾ ಪೆಡಾವೆಲ್ಯಾ ಘುಮಟೆ ಪೊಂದಾ ಕೊಣೆ ತರಿ ಯೆವ್ನ್ ದಿವೊ ಲಾಯ್ಲೊ. ತ್ಯಾ ದಿವ್ಯಾಚ್ಯಾ ಉಜವಾಡಾಕ್ ಪಳಯ್ತ್ ಕಾಂಯ್ ವೆಳ್ ತೆ ತಶೆಚ್ ಬಸೂನ್ ರಾವಲೆಂ ಮಾಗೀರ್ ಲ್ಹವ್ ಲ್ಹವ್ ತಾಚೆ ರಂದ್ರಾನ್ ರಂದ್ರ್ ಜಾಗೆ ಜಾಲೆ. ಎಕಾ ಖಿಣಯಾಳ್ಯಾ ತಾಳಣೆಚ್ಯಾ ಎಕಾ ಭಂಯಕರ್ ಝಪಾಟ್ಯಾತ್ ತೆ ಸಾಪಡಿಲ್ಲೆಂ. ತಿ ತಾಳಣಿ ಆಸ್ಲಿ ರಾಕ್ಷಸಿ ತಾಳಣಿ, ತೊ ಫಟಕಿರೊ ಮೋಹ್ ಆಸ್ಲೊ, ಎಕ್ ಉದ್ಕಾಚೊ ಬುಡಬುಡೊ (ಬುಳ್ಬುಳೊ) ಎಕ್ ಕಾಳೆ ಕಿಟ್ಟ್ ಮೃಗಜಳ್. ಕೊಣೆತರಿ ತಿಕಾ ಫಟಯಿಲ್ಲೆಂ. ಪುರಾಯ್ ವಿಶ್ವಾಸಘಾತ್ ಕೆಲ್ಲೊ. ತಿಚ್ಯಾ ನಿತಳ್, ನಿವಳ್ ನಿರಾಗಸ್ಪಣಾಚೊ ಅಸಹಾಯತಾಯೆಚೊ ಫಾಯದೊ ಘೆತಿಲ್ಲೊ ಆನಿ ಆಪೂಣ್ ಮಾತ್ ಸರಳ್ ಪಣಾನ್ ನಿಸಟೂನ್, ಸುಟೂನ್ ಗೆಲ್ಲೊ. ಕೆದೊ ವ್ಹಡ್ ಅಪಮಾನ್ ತಿಚ್ಯಾ ಭಿತರಲ್ಯಾ ಅಸ್ತುರೆಚೊ ತಿಚ್ಯಾ ಸ್ರೀತತ್ವಾಚೊ ತಿಚ್ಯಾ ಮನಾತ್ ಎಕ್ ಭಂಯಕರ್ ರಾಗ್ ಖತಖತತಾಲೊ. ಎಕ್ ಫುಟೂಕ್ ಸೊದಪಿ ಜ್ವಾಲಾಮುಖಿ ರಸರಸ್ತಾಲೊ.

ತಾಚ್ಯಾ ಗೂಢ್ ಹಾಂಶ್ಯಾಚೆರ್ ತಿ ಪಯ್ಲ್ಯಾಚ್ ನದರೆತ್ ಭಾಳಿಲ್ಲಿ. ಹಿ ರಾನಭೂಲ್ ಆಸ್ಲಿ ತೆಚ್ ಗೂಢ್ ತಾಚ್ಯಾ ಘಾರಶ್ಯಾ ದೊಳ್ಯಾಂತಯ್ ಝಳಕತಾಲೆ, ಹೆ ಗೂಢ್ ಹಾಂಶ್ಯಾ ಫಾಟಲೆ ಸಗ್ಳೆ ಕಾರಸ್ಥಾನ್ ಆತಾ ತಿಕಾ ಪುರಾಯೆನ್ ಕಳಿಲ್ಲೆಂ. ತಿಕಾ ತಾಚಿ ಕಿಳಸ್ ವೀಟ್ ಆಯ್ಲಿ ಎಕ್ ಭಂಯಕರ್ ಬುರ್ಸೊ ಜಾಲ್ಲೊ ಎಕ್ ಮಿಳಮಿಳೀತ್ ಗಾಂಯ್ಡೊಳ್ ಆಪಲ್ಯಾ ಆಂಗಾರ್ ಚಡಲಾ ಅಶೆ ತಿಕಾ ದಿಸೂಂಕ್ ಲಾಗ್ಲೆಂ.

ತಿ ಭಿತರಲ್ಯಾನ್ ಹಾಲ್ಲಿ ತಿಕಾ ಒಂಕಾರೆ ಯೆವಂಕ್ ಲಾಗ್ಲ್ಯೊ. ಎಕಾಫಾಟಲ್ಯಾನ್ ಎಕ್ ಒಂಕಾರೊ ಆಯ್ಲ್ಯೊ, ಸುಕ್ಯೊ ಒಂಕಾರ್ಯೊ ತಿ ತಶೀಚ್ ಹೊಸ್ಟೆಲಾತ್ ಪರತ್ ಆಯ್ಲಿ. ತಿಕಾ ಲ್ಹವ್ ಲ್ಹವ್ ಸಮಜೂಕ್ ಲಾಗ್ಲೆಂ ಆಪೂಣ್ ಆತಾ ಎಕಾ ಮಹಾಸಾಗರಾಚ್ಯಾ ಚಕ್ರಿವಾದಳಾತ್ ಸಾಂಪಡ್ಲಾ ಮ್ಹಜ್ಯಾ ಕುಡಿಚೊ. ಎಕ್ ಭೊಂವರೊ ಜಾವಂಕ್ ಲಾಗ್ಲಾ ತಿಕಾ ಘುಂವಳ್ ಆಯಿಲ್ಲೆಂವರಿ ಜಾಲಿ. ಎಕಾ ಅವ್ಸಾನಘಾತಕಿ ಫಟಕಿರ್ಯಾ ಖಿಣಾಚೊ ಯೆದೊ ವ್ಹಡ್ ಶ್ರಾಪ್ ಆನಿ ತೊ ಫಕತ್ ಮ್ಹಾಕಾಚ್. "ಹಾಂವಚ್ ಕಿತ್ಯಾಕ್", "ಹಾಂವಚ್ ಕಿತ್ಯಾಕ್" ತಿಚ್ಯಾ ಕುಡಿಚೆ ಎಕಾನ್ ಎಕ್ ಸೂತ್ ಕಿಳಾಂಚೂನ್ ಉಠಲೆ. ತಿಜಿ ಪುರಾಯ್ ಕೂಡ್ ಎಕಾ ಆಕಾಂತ್ ಭಿರಾಂತೆನ್ ಥರಥರುಕ್ ಲಾಗ್ಲಿ.

ತೊ ಮಾತ್ ಸಗ್ಳ್ಯಾ ಜವಜಾಳಾಪಸೂನ್ ಪಯ್ಸ್ ಸಾಮಕೊ ಪಯ್ಸ್ ಶಾಂತ್ ಸುಸ್ತ್ ನ್ಹಿದಲಾ ಆಸ್ತಲೊ ವಾ ಆನೀಕ್ ಎಕ್ ನವೆಂ ಜಾಡಜೂಂಡ್ ಜಾಳೆಂ ವಿಣಪಾಚ್ಯಾ ಕಾಮಾತ್ ಗುಂತಲಾ ಆಸ್ತಲೊ.

ತಿಜೆ ರಂದ್ರಾನ್ ರಂದ್ರ್ ತುಟೂಕ್ ಲಾಗ್ಲೆಂ ಪುರಾಯ್ ಶರೀರಾತಲಿ ಎಕಾನ್ ಎಕ್ ಶೀರ್ ಫುಟೂಕ್ ಲಾಗ್ಲಿ. ಪೊಟಾತ್ ಎಕ್ ಆಕಾಂತಾಚೆ ಮೊಡ್ ಉಠಲೆಂ. ಖೊಲ್ ಖಂಯ್ ತರಿ ತಿಕಾ ಜಾಣೀವ್ ಜಾವಂಕ್ ಲಾಗ್ಲೀ, ತಿಕಾ ಖಬರ್ ನಾಸ್ತನಾ ಹೊ ಸಾವಳೊ, ಚಂದನ್ ವರ್ಣಿ ದೆಹ್ ಉಜಳೂಕ್ ಲಾಗ್ಲಾ. ರಾತ್ ರಾಣಯೆಚ್ಯಾ ಝೊಪಾವರಿ ತಿಜೊ ದೆಹ್ ದೆಟಾಂದೆಟಾಂತಲ್ಯಾನ್ ಪರಮಳೂಕ್ ಲಾಗ್ಲಾ. ಕೊಣಾಚ್ಯಾ ಯೆವಕಾರಾಕ್ ಉಸ‌ಉಸೂನ್, ತಟತಟೂನ್ ರಾವಲ್ಯಾ ಹಿ ಕೂಡ್. ರಗತಾಚೊ ಯೆದೊ ಘಸಘಸೊ ತಿಚ್ಯಾ ಕುಡೀಚ್ಯಾ ಪೆಶಿ ಪೆಶೀತಲ್ಯಾನ್ ಘಸಘಸೂನ್, ಫಸಫಸೂನ್ ಕಿತ್ಯಾಕ್ ಮ್ಹಣ್ ವ್ಹಾಂವೂಕ್ ಲಾಗ್ಲಾ. ಪುರಾಯ್ ಶರೀರ್ ಅಶೆಂ ಕಶೆಂ ನಸಾನಸಾನ್ ಭರುಕ್ ಲಾಗ್ಲಾ ಶ್ರೃಂಗಾರೂಕ್ ಲಾಗ್ಲಾ ಕಸ್ಲೆಂ ಹೆ ಜಡ್ ಜಡ್ ವಜೆಂ. ಹಡ್ಯಾ ತಲ್ಯಾನ್ ದುದಾಚೆ ವಝರೆಂ ಕೊಣಾಖಾತೀರ್ ಘಸಘಸೂಕ್ ಫುಟೂಕ್ ಲಾಗ್ಲ್ಯಾತ್. ಕೊಣ್ ತಿಚ್ಯಾ ಪೊಟ್ ಗರ್ಭಾ ಸಕಲ್ ಎಕ್ ಮೊವ್ ಮಖಮಲಿ ವಿಲೂದಿ ಫುಲಾಂಫುಲಾಂಚೆ ಹಾಂತ್ರೂಣ್, ಪಾಂಘರುಣ್ ಪಾತಳೂಕ್ ಲಾಗ್ಲಾ. ತಿಚೊ ಪುರಾಯ್ ದೆಹ್ ಎಕ್ ಖತಖತೀತ್ ಪಂಚರಸಾನ್ ಭರಿಲ್ಲೊ ತೊಪೂಲ್ ಜಾವಂಕ್ ಲಾಗ್ಲಾ, ಎಕ್ ಕಡ್ ನಾಶಿಲ್ಲಿ ಜಡ್ ಕಾಶ್ಯಾಚಿ ವಾಟಲಿ ತಿಚ್ಯಾ ಗರ್ಭಾತ್ ಘುವೂಂಕ್ ಲಾಗ್ಲ್ಯಾ. ಹ್ಯಾ ಪುರಾಯ್ ಭ್ರಂಮಾಡಾರ್ ತಿ ಪಾತಳೂಕ್ ಸೊದತಾ ಭ್ರಂಮಾಡ್ಚ್ಯಾ ಕೊನಶ್ಯಾ ಕೊನಶ್ಯಾರ್ ಆಪಲೊ ಶೆಕ್ ಗಾಜೊವಂಕ್ ಸೊದತಾ.

ತಿಕಾ ಕಳೂಕ್ ಲಾಗ್ಲೊ ಹ್ಯಾ ಸಗ್ಳ್ಯಾಚೊ ಅರ್ಥ್, ಸೈಮಾನ್ ಹೆ ಮಾತೃತ್ವಾಚೆ ಜಡ್ ಜಡ್ ವಜೆಂ ಫಕತ್ ಮ್ಹಜ್ಯಾಚ್ ಮಾಥ್ಯಾರ್ ದವರುನ್ ಮ್ಹಾಕಾ ಫಟಯ್ಲೆಂ. ತಿಕಾ ಆಪಲ್ಯಾ ಗರೀಬ್ ಬಾಬಡ್ಯಾ ಬಾಪಾಯಚಿ ಖೂಬ್ ಖೂಬ್ ಯಾದ್ ಜಾಲಿ. ಫಾಟಲೆಂ ಫಾವಟ್ ಘರಾಕಡಲ್ಯಾನ್ ಹೊಸ್ಟೆಲಾತ್ ಯೆತನಾ ತಾಚ್ಯಾ ದೊಳ್ಯಾತ್ ದುಕಾಂ ಆಯಿಲ್ಲಿ ತಿ ದುಕಾಂ ಪುಶೀತ್ ತಾಣೆಂ ಮ್ಹಣಿಲ್ಲೆಂ "ಸುಂಗಧಾ ಆಮಚ್ಯಾ ಪುರಾಯ್ ಘರವಡಿತಲೆಂ ತೂಂ ಪಯ್ಲೆಂ ಇಂಜೀನಿಯರ್ ಜಾತಲೆಂ, ಮ್ಹಾಕಾ ತುಜೊ ಅಭಿಮಾನ್ ಆಸಾ ತುಜೆ ಫಾಟಲ್ಯಾ ಭಾಂವಡಾಖಾತೀರ್ ತೂಂ ಆದರ್ಶ್" ಆವಯನ್‍ಯೀ ಮುಖಾರ್ ಯೆವ್ನ್ ಮ್ಹಣಿಲ್ಲೆಂ "ಆಪಲೆ ಜೊಡಿತಲೊ ಎಕಾನ್ ಎಕ್ ಪಯ್ಸೊ ತುಜೆ ಶಿಕ್ಷಣಾ ಖಾತೀರ್ ದವರತಾ ತೊ, ತೂಂ ಬರೆ ಕರುನ್ ಶಿಕ್".

ಹ್ಯಾಚ್ ವೆಳಾರ್ ತಿಚ್ಯಾ ಲ್ಹಾನ್ ಭಾಂವಡಾಚ್ಯಾ ದೊಳ್ಯಾಂತ್ ಎಕ್ ಭಾಂಗರಾಳೊ ಚಕಚಕ್ ಆಸ್ಲೊ. ಎಕಾ ಪಯ್ಸುಲ್ಯಾ ವಾಳವಂಟಾತಲ್ಯಾ ಮೃಗಜಳಾಚಿ ಸ್ಪನಾಂ ಸಗ್ಳೀಂಚ್ ಪಳೊವಂಕ್ ಲಾಗಿಲ್ಲೀ,
ಹ್ಯಾ ಯಾದೀನ್ ತಿಚೆಂ ಕಾಳೀಜ್ ಆಕ್ರೊಶ್ ಕರೀತ್ ಧಡಪಡಲೆಂ ಪರತ್ ಎಕ್ ಒಂಕಾರ್ಯಾಚಿ ವ್ಹಡ್ ಉಬಳ್ ಆಯ್ಲಿ ಆಯಕೂನ್ ತಿಜೆ ರುಮಮೆಟ್ ಇಶ್ಟೀಣ್ ಶ್ವೆತಾ ಗಡಬಡೂನ್, ಧಡಪಡೂನ್ ಉಠಲೆ. ಸುಂಗಧಾ ತಾಜ್ಯಾ ಗಳ್ಯಾತ್ ಪಡೂನ್ ಹಾಮೆರ್ಯಾನಿ ರಡಲೆಂ. ದುಸರೆ ದೀಸ್ ದೊಗಾಯ್ ಪಯ್ಸ್ ಶಾರಾಚ್ಯಾ ಕಡೆಕ್ ಝೊಪಡಪಟ್ಟೀತಲ್ಯಾ ಗ್ಲೀತ್ ಆಶಿಲ್ಲ್ಯಾ ದೊತೊರಾಕಡೆನ್ ಗೆಲಿ. ದೊತೊರಾನ್ ಪಯ್ಲಿ ಬರೆಕರುನ್ ತಪಾಸ್ಲೆಂ ತೊ ಎಬೊರ್ಶನ್ ಕರುಕ್ ಪಯ್ಲಿ ತಯಾರ್ ಜಾಲೊ ಪೂಣ್ ಮಾಗೀರ್ ತಿಚ್ಯಾ ಮಹಾವಿದ್ಯಾಲಯಾಚೆ ನಾಂವ್ ಆಯಕೂನ್ ಗಡಬಡಲೊ, ಘಟಘಟೀತ್ ದೊನ್ ಗ್ಲಾಸ್ ಉದಕ್ ಪಿಯೆಲೊ. ಪಯ್ಲೀಚ್ ಗಬಾಳೊ, ಪಿಸಾಟ್ ಕಸೊ ಸಾದೊಚ್ ದೊತೊರ್ ತೊ ಹ್ಯಾ ಝೊಪಡ್ ಪಟ್ಟೀತಲ್ಯಾ ಲೊಕಾಕ್ ಜೊರ್ ಥಂಡಯೆಚೆ ವಖದ್ ದಿವ್ನ್ ಆಪಲಿ ಥಾತೂರ್ ಮಾತೂರ್ ಪ್ರೆಕ್ಟೀಸ್ ಚಲಯ್ತಾಲೊ ತೊ ಆತಾ ಆನೀಕಯ್ ಬಾಬಡೊ ಭಿವಕುರೊ ದಿಸೂಕ್ ಲಾಗ್ಲೊ. ತೊಂಡಾತಲ್ಯಾ ತೊಂಡಾತ್ ಗಾಳ್ ಘಾತಿಲ್ಲೆವರಿ ಕಿತೆ ತರಿ ಉಲಯ್ಲೊ ಆನಿ ಮಾಗೀರ್ ಚಲಾತ್ ಪಯ್ಲಿ ಚಲೂಕ್ ಲಾಗಾತ್ ಮ್ಹಣತ್ ತಾಣಿ ತಾಂಕಾಂ ಧುಕಲೂನಚ್ ಭಾಯರ್ ಕಾಡಲೆ.

ತಿ ತಶೀಚ್ ಖಿನ್ನ್ ಸುನ್ನ್ ಮನಾನ್ ಪರತ್ ಆಯ್ಲಿ ಸುಗಂಧಾಕ್ ಆಪೂಣ್ ಪೂರ್ಣ್ ನಿರಾಧಾರ್ ದಿಸೂಕ್ ಲಾಗ್ಲೆ. ಶ್ವೆತಾ ತಾಕಾ ಪರತ್ ಪರತ್ ಸಮಜಾಯ್ತಾಲೆ ಘರಾ ವಚ್ ಆವಯ್ ಕಿತೆ ತರಿ ವಾಟ್ ಸೊದೂನ್ ಕಾಡಟಲಿ. ಸುಗಂಧಾಕ್ ದಿಸ್ತಾಲೆ ಹಾಕಾ ಕಿತೆ ಖಬರ್ ಮ್ಹಾಕಾ ಹ್ಯಾ ಅವಸ್ಥೆತ್ ಪಳಯ್ಲ್ಯಾರ್ ದೊಗಾಯ್ ಆವಯ್ ಬಾಪೂಯ್ ಘರಾಚ್ಯಾ ಹುಂಬ್ರ್ಯಾರ್ಚ್ ಜೀವ್ ಸೊಡಟಲಿ.

ತೆಂ ದೀಸಭರ್ ಕುಡೀತ್ ಪಡೂನ್ ರಾವ್ತಾಲೆ ರಾತ್ ರಾತ್ ಜಾಗತಾಲೆಂ ಜೆವಣಾವಯ್ಲಿ ವಾನ್ಸಾಚ್ ಗೆಲ್ಲಿ. ಕಸ್ಲೊಚ್ ಮಾರ್ಗ್ ಸುಚನಾಸ್ಲೊ. ತಾಕಾ ಆಪಲ್ಯಾ ಲ್ಹಾನಪಣಾಚಿ ಯಾದ್ ಜಾಲಿ ಘರ್ಚ್ಯಾ ಮಾಂಜರೀಕ್ ಪಿಲಾಂ ಜಾಲ್ಲಿ ಹಿ ಆನೀಕ್ ಪಿಡಾ ನಾಕಾ ಮ್ಹಣ್ ಆವಯ್ ತಾಂಕಾ ಪಯ್ಸ್ ಆರವಾತ್ ಸೊಡೂನ್ ಆಯ್ಲಿ. ಶಾಳೆತಲ್ಯಾನ್ ಯೆತಕಚ್ ಸುಗಂಧಾಕ್ ಕಳ್ಳೆಂ ತಾಣೆ ರಡೂನ್ ಆಕಾಂತ್ ಕೆಲೊ ತೆ ಶೆಜಾರ್ಚ್ಯಾ ಮಹೆಶಾಕ್ ಆನಿ ಸಂಗೀತಾಕ್ ಘೆವ್ನ್ ಆರವಾತ್ ಗೆಲೆ ಎಕಾನ್ ಎಕ್ ಝೊಪ್ ಮಾಡ್ಡೂನ್ ತಾಣೆ ಎಕಾನ್ ಎಕ್ ಮಾಂಜರಾ ಪೀಲ್ ಸೊದೂನ್ ಹಾಡಲೆಂ.

ಆತಾ ಮ್ಹಾಕಾ ಕಿತೆ ಜಾಲಾ ಹಾಂವ್ ಎಕ್ ದುಶ್ಟ್ ರಾಕ್ಷೀಣ್ ಜಾವ್ನ್ ಮ್ಹಜ್ಯಾ ಗರ್ಭಾತ್ ವಾಡಪಿ ಎಕ್ ಲ್ಹಾನ್ ಜಿವಾಕ್ ಮಾರುನ್ ಉಡೊವಂಕ್ ಸೊದತಾ. ಹ್ಯಾ ಸರ್ವಾಗಸುಂದರ್ ಸೈಮರುಪಿ ಬ್ರಮ್ಹಾಂಡಾಚೊ ತೊ ಆನಂದಯಾತ್ರಿ ಜಾವಂಕ್ ಸೊದತಾ ಆನಿ ಹಾಂವ್ ತಾಜೊ ಖೂನ್ ಕರುನ್ ತ್ಯಾ ರಕ್ತಬಂಬಾಳ್ ಹಾತಾಂನಿ ಮ್ಹಜೊ ಫುಡಾರ್ ಘಡೊವಂಕ್ ಸೊದತಾ.

ಇತಲೆ ನಿಶ್ಟುರ್ ಕಶೆ ಜಾಲೆ ಹಾಂವ್, ಕೈದಾಶೀಣೆವರಿ ಕೊಣಾಚೊ ಜೀವ್ ಘೆವಂಕ್ ಸೊದತಾ. ತಾಕಾ ಅಚಕೀತ್ ಪ್ರಾಧ್ಯಾಪಕ್ ಎ. ಜಿ. ನಾಯಕಾಚಿ ಯಾದ್ ಜಾಲಿ. ಸುಗಂಧಾಚೆರ್ ಆಪಲ್ಯಾ ಚಲಯೆವರಿ ತಾಜೊ ಮೊಗ್ ಆಸ್ಲೊ. ತೊ ಕ್ಲಾಸೀತ್ ಯೆವ್ನ್ ಜಿವ್ನ್ ತತ್ವಗಿನ್ಯಾಚ್ಯೊ ಗಜಾಲಿ ಖೂಬ್ ಫಾವಟ್ ಸಾಂಗತಾಲೊ “ತುಮಿ ತಂತ್ರವಿಜ್ಞಾನ್ ಶಿಕತಾತ್ ಹೆರ್ ಲೊಕಾಪರಸ್ ತುಮಚಿ ಬುದ್ದೀ, ಮೆಂದೂ ಚಡ್ ತಲ್ಲಖ್ ಆಸಾ ಹೆ ಲೊಕಾಕ್ ಖಬರ್ ಆಸಾ ಹೆ ಲೊಕ್ ಆಪಲ್ಯಾ ಭೌತೀಕ್ ಉದರಗತೀ ಖಾತೀರ್ ತುಮಚೆರ್ ಪಾತೆವ್ನ್ ಆಸಾತ್. ತುಮಿ ತಾಂಚಿ ಜೀಣ್ ಚಡ್ ಆನಿ ಚಡ್ ಸೊಪಿ ಕರತಲೆ ಹಾಚೊ ತಾಂಕಾಂ ಭರಂವ್ಸೊ ಆಸಾ ಹ್ಯಾ ವಿಸ್ವಾಸಾಚೊ ಕೆನ್ನಾಚ್ ವಿಸ್ವಾಸಘಾತ್ ಕರನಾಕಾತ್. ಜೆ ಕಿತೆ ತುಮಿ ಹ್ಯಾ ಶಿಕ್ಷಣಾಚ್ಯಾ ಬಳಗ್ಯಾರ್ ಮೆಳಯ್ತಲೆ ತೆ ಪುರಾಯ್ ಮನೀಸಜಾತೀಚ್ಯಾ ಹೊ ಸೈಮ್, ಜೀವ್, ಜಂತೂ, ಪುರಾಯ್ ಸೃಶ್ಟೀಚ್ಯಾ ಬರ್ಯಾಖಾತೀರ್‌ಚ್ ಆಸ್ತಲೆ ಹಾಚಿ ಜಾಣವೀಕಾಯ್ ದವರಾತ್”
ಅಪರಾಧೀಪಣಾಚಿ ಎಕ್ ಖೊಲ್ ಭಾವ್ನಾ ತಾಕಾ ಭಿತರಲ್ಯಾನ್ ಖಾವಂಕ್ ಲಾಗ್ಲಿ.

ಸರಾನ್ ತಾಕಾ ಎಕ್ ದೀಸ್ ಮ್ಹಣಿಲ್ಲೆಂ” ಸುಂಗಧಾ ಹೆ ತುಜೆಂ ನಿಮಾಣೆ ವರ್ಸ್ ಹ್ಯಾ ಪುರಾಯ್ ವರ್ಗಾತ್ ತೂಂ ಸಗ್ಳ್ಯಾತ್ ಚಡ್ ಹುಶಾರ್, ಹಾಂಗಾ ಯೆವಚೆ ಪಯ್ಲಿ ಹಾಂವ್ ಮುಂಬಯ್ ಎಚ್. ಎಮ್. ಟಿ. ಸಿ ಕಂಪನೀತ್ ಬರ್ಯಾಚ್ ವ್ಹಡ್ ಹುದ್ದಯಾರ್ ಕಾಮ್ ಕರತಾಲೊ ಕಾಂಯ್ ವೈಯಕ್ತೀಕ್ ಕಾರಣಾಕ್ ಲಾಗೂನ್ ಹಾಂಗಾ ಆಯ್ಲೊ ಪೂಣ್ ತೂಂ ಥಂಯ್ ವಚ್ ತುಜ್ಯಾ ಹುಶಾರ್ಕಾಯೆಕ್ ಎಕ್ ವೆಗಳೆ ಪರೀಮಾಣ್ ಮೆಳಟಲೆ”. ದುಸರೆ ದೀಸ್ ಸುಗಂಧಾನ್ ಸರಾಕ್ ಫೊನ್ ಕರುನ್ ತ್ಯಾ ಕಂಪನೀಚಿ ಸಗ್ಳಿ ಬಾರೀಕಸಾಣೆನ್ ಮ್ಹಾಯಿತಿ ಘೆತಲಿ. ಪರತ್ ಪರತ್ ಸರ್ ಮಹೆಶ್ ಕವಳೆಕರ್ ಹ್ಯಾ ಆಪಲ್ಯಾ ಇಶ್ಟಾಚೆ ನಾಂವ್ ಘೆತಾಲೊ ತೆ ತಾಣೆ ಡಾಯರೆತ್ ಬರೊವ್ನ್ ಘೆತಲೆ. ಆನಿ ದೊನಚ್ ದಿಸಾನ್ ಫಕತ್ ಶ್ವೆತಾಕ್ ಎಕಟ್ಯಾಕಚ್ ಸಾಂಗೂನ್ ಕಾಂಯ್ ಕಪಡೆ, ಪಯಶೆ ಆನಿ ಆಪಲಿ ಸಗ್ಳಿ ಸರ್ಟಿಫಿಕೆಟಾಂ ಘೆವ್ನ್ ಮುಂಬಯಚ್ಯಾ ಟ್ರೆನೀರ್ ಬಸ್ಲೆಂ. ಶ್ವೆತಾಲ್ಯಾ ಬಾಪಾಯ್ಲಿ ಆತೆಭಯಣ್ ನಂದಾ ಮುಂಬಯ್ ಎಕಟೀಚ್ ರಾವ್ತಾಲಿ ಬೆಕೆಂತ್ ನೊಕರಿ ಕರತಾಲಿ ತಿಜ್ಯಾ ಮ್ಹಣ್ ಜಿಣೆಚಿ ಎಕ್ ಕಾಣೀಚ್ ಆಸ್ಲಿ ಗಾಂವ್ ಘರಾ ಸಗ್ಳ್ಯಾಕಡೆನ್ ಸಗ್ಳೆ ಸಂಬಂದ್ ತಿಣೆ ತೊಡಿಲ್ಲೆಂ. ಫಕತ್ ಶ್ವೆತಾಚ್ ತಿಕಾ ಕೆನ್ನಾ ಕೆನ್ನಾ ಫೊನ್ ಕರತಾಲೆ. ಆಪಲ್ಯಾ ಇಶ್ಟೀಣಿಚಿ ಸಗ್ಳಿ ಗಜಾಲ್ ದೊಳ್ಯಾಂತ್ ದುಕಾಂ ಹಾಡೂನ್ ಶ್ವೆತಾನ್ ತಿಕಾ ಸಾಂಗಿಲ್ಲೀ, ಥೊಡೆಚ್ ದೀಸ್ ಆಸರೊ ದಿ ಮ್ಹಣ್ ಮಾಗಿಲ್ಲೆಂ ಆನಿ ವ್ಹಡಲೆಶೆ ಆಡಮೆಳೆ ಹಾಡನಾಸ್ತನಾ ತಿಣೆ ಹಯ್ ಮ್ಹಣಿಲ್ಲೆಂ.
ಕಸ್ಲೀಚ್ ದಿಶಾ ಆನಿ ದಿಕಾ ನಾಶಿಲ್ಲ್ಯಾ ಎಕಾ ಘನಘೊರ್ ದಾಟ್ ರಾನಾತ್ ಆಪೂಣ್ ವಾಟ್ ಸಾಂಡಲಾ ವಾಟ್ ಸೊದತಾ ಅಶೆ ಕಿತೆ ತರಿ ತಾಕಾ ದಿಸ್ತ್ ರಾವಲೆಂ. ಫಾಟಲ್ಯಾನ್ ಕಿತೆ ಜಾತಲೆ ಶ್ವೆತಾ ತಾಕಾ ಕಶೆತ್ರೆನ್ ತೊಂಡ್ ದಿತಲೆ ಹೆ ಚಿಂತೂನಚ್ ತಾಕಾ ಥರಥರೊ ಭರತಾಲೊ.

ಪೂಣ್ ಆತಾ ತಾಣೆ ಆಪಲ್ಯಾ ಮನಾಕ್ ಘಟ್ ಕೆಲ್ಲೆಂ. ಭಾಯರ್ ಸರ್ತನಾ ತೂಂ ಜಿವಾಚೆ ಕಾಂಯಚ್ ಬರೆ ವಾಯ್ಟ್ ಕರ್ಚೆನಾ ಹೊ ಸೊಪೂತ್ ಶ್ವೆತಾನ್ ತಾಚೆಕಡಲ್ಯಾನ್ ಘೆತಿಲ್ಲೊ ಸಾಮಕೊ ಮಾಥ್ಯಾರ್ ಹಾತ್ ದವರುನ್.

ದುಸರೆ ದೀಸ್ ತೆಂ ಮುಂಬಯಚ್ಯಾ ದಾದರ್ ಸ್ಟೆಶನಾರ್ ದೆವಲೆಂ, ಸರಳ್ ಟೆಕ್ಸಿ ಕರುನ್ ತೆ ನಂದಾಲ್ಯಾ ಘರಾ ಗೆಲೆಂ ತಿ ಘರಾಚ್ ಆಸ್ಲಿ ಪನ್ನಾಶೀಚ್ಯಾ ಲಾಗಿ ಆಶಿಲ್ಲಿ ನಂದಾ ಆಪಲ್ಯಾ ಸಿಂಗಲ್ ಬೆಡರುಮ್ ಫ್ಲೆಟಾಂತ್ ಎಕಟೀಚ್ ರಾವ್ತಾಲಿ.

ತಿಚೆ ಘರ್ ಬರೆಚ್ ನಿತಳ್ ನಿವಳ್ ಆಸ್ಲೆಂ. ಕಿಚನಾತ್ ಕುಶೀಕ್ ಎಕ್ ಲ್ಹಾನಶಿ ಉಕ್ತಿ ಸುವಾತ್ ಆಸ್ಲಿ ತುಕಾ ಹಾಂಗಾಚ್ ರಾವಚೆ ಪಡಟಲೆ ತಿಣೆ ಥೊಡೆಶೆ ಥಂಡಸಾಣೆನ್ ಮ್ಹಳೆ. ಸಾಮಾನ್ ಹಾಂಗಾಚ್ ದವರ್ ಆನಿ ಫ್ರೆಶ್ ಜಾ. ತೊಮೆರೆನ್ ಹಾಂವ್ ಚ್ಯಾ ಕರತಾ ಮಾಗೀರ್ ರೆಸ್ಟ್ ಘೆ ಪ್ರವಾಸಾನ್ ಥಕಲಾ ಆಸ್ತಲೆಂ. ಚ್ಯಾ ಪಿವ್ನ್ ಸುಂಗಧಾಕ್ ತಾಣೆ ತ್ಯಾ ಕುಶೀಕಚ್ ಹಾತ್ರೂಣ್ ಘಾಲೂನ್ ನ್ಹಿದಪಾಕ್ ಸಾಂಗ್ಲೆ. ಸುಂಗಧಾನ್ ನ್ಹಿದಿಲ್ಲೆಕಡೆನ್ ಥಾರಾಯ್ಲೆಂ ಹೊ ಮ್ಹಜೊ ನವೊ ಜಲ್ಮ್ ಆತಾಚ್ ಹಾಂವ್ ಹ್ಯಾ ಮಾತಯೆತಲ್ಯಾನ್ ರುಜೂನ್ ಆಯ್ಲಾಂ. ಮ್ಹಜ್ಯಾ ಫಾಟಲ್ಯಾನ್ ಫುಡಲ್ಯಾನ್ ಕಾಂಯಚ್ ನಾ ಕೊಣಾಚ್ಯೊ ಯಾದಿ ನಾ ಕೊಣಾಚಿ ಸಾವಳಿ ನಾ. ಆತಾ ಹಾಂವೆಚ್ ಮ್ಹಜಿ ಸಾವಳಿ ಜಾವಪಾಚೆ ಸಗಳ್ಯಾ ಉಜ್ಯಾ ಧಗಾತಲ್ಯಾನ್ ಉಜ್ಯಾಚಿ ಕೆಣ್ಣಾಂ ಮಾಂಡಯ್ತ್ ಧಗಧಗೀತ್ ಪೆಟಪಿ ಹೊಮಖಣ್ ಜಾವಪಾಚೆ ತಾಣೆ ಮನಾಕ್ ಎಕ್ ಗಾಂಠ್ ಬಾಂದೂನ್ ಘೆತಲಿ.

ಸಾಂಜಚೆ ಉಠೂನ್ ಸುಂಗಧಾನ್ ನಂದಾಕ್ ಜೆವಣ್ ಕರಪಾಕ್ ಆದಾರ್ ಕೆಲೊ. ನಂದಾನ್ ತಾಕಾ ತಾಜ್ಯಾ ವೈಯಕ್ತೀಕ್ ಜಿಣೆ ವಿಶೀಂ ವ್ಹಡಲೆಶೆ ಕಾಂಯಚ್ ವಿಚಾರಲೆನಾ. ತರಿ ಸುಂಗಧಾನ್ ಆಪೂಣ್ ರೊಖಡೆಚ್ ನವಿ ಸುವಾತ್ ಸೊದತಲೆ ಮ್ಹಣ್ ಸಾಂಗ್ಲೆ ತೆನ್ನಾ ತಿಣೆಂ ಪಯ್ಲಿ ನೊಕರಿ ಸೊದಲ್ಯಾರ್ ಬರೆ ಇತಲೆಚ್ ಮ್ಹಳೆ ಸುಂಗಧಾನ್ ತೆನ್ನಾ ಮಾತ್ ಆಪಲ್ಯಾಕ್ ಆಲಾಶಿರೊ ದಿಲ್ಲೆ ಖಾತೀರ್ ತಿಚೆ ಮನಾಪಸೂನ್ ದಿನವಾಸ್ ಮಾನಲೆಂ.

ದುಸರೆ ದಿಸಾ ಸಾವ್ನಚ್ ಸುಂಗಧಾ ನೊಕರೆಚ್ಯಾ ಸೊದಾತ್ ಲಾಗ್ಲೆಂ ಎಕಾ ಮೊಲಾತ್ ಎಕ್ ಸೆಲ್ಸಗರ್ಲಾಲಿ ನೊಕರಿ ಆಸ್ಲಿ ತಿಣೆ ಆಪಲೊ ಅರ್ಜ್ ಆಪಲ್ಯಾ ಸರ್ಟಿಫೀಕೆಟಿ ಸಯ್ತ್ ಇಮೆಲ್ ಕೆಲೊ. ಎಕ್ ವರಾಭಿತರ್ ಫಾಲ್ಯಾಚ್ ರುಜೂ ಜಾ ಅಶಿ ಜಾಪ್ ಆಯ್ಲಿ. ನಂದಾ ಯೆತಕಚ್ ತಾಣೆ ಆಪಲ್ಯಾಕ್ ನೊಕರಿ ಮೆಳ್ಳ್ಯಾ ಇತಲೆಚ್ ಸಾಂಗ್ಲೆ ಖಂಯ್, ಕಸ್ಲಿ ನಂದಾನ್ ಕಾಂಯಚ್ ವಿಚಾರಲೆನಾ. ಫಕತ್ ಫಾಯನೆನ್ಶಿಯ್ಲ್ ಇನ್ಡಿಪೆನಡಸ್ ಖೂಬ್ ಮಹತ್ವಾಚೆ ಆಸ್ತಾ ಇತಲೆಚ್ ಮ್ಹಳೆ ನಂದಾ ಖೂಬಚ್ ಮೆಜೂನ್ ಮಾಪೂನ್ ಉಲಯ್ತಾಲೆಂ.

ದುಸರೆ ದೀಸ್ ಆಪಲಿ ಸಗ್ಳಿ ಸರ್ಟಿಫೀಕೆಟಾಂ ಘೆವ್ನ್ ತೆ ಗೆಲೆಂ. ತೊ ಮೆನೆಜರ್ ತಿಜಿ ಫಾಯ್ಲ್ ಪಳೊವ್ನ್ ಥೊಡೊಸೊ ನರ್ವಸ್ ಜಾಲೊ, ಹೆ ಆನಿ ಮ್ಹಜಿ ನೊಕರಿ ವ್ಹರತ್ ಅಸೊ ಕಿತೆ ಭಾವ್ ತಾಜ್ಯಾ ತೊಂಡಾರ್ ಆಸ್ಲೆ. ತೆನ್ನಾಚ್ ಸುಂಗಧಾನ್ ತಾಕಾ ಸ್ಪಶ್ಟ್ ಉತ್ರಾತ್ ಸಾಂಗ್ಲೆ ಫಕತ್ ಎಕಚ್ ವರ್ಸ್ ಹಾಂವ್ ಹಾಂಗಾ ಕಾಮ್ ಕರತಲೆಂ.

ಮಾಗೀರ್ ಎಚ್. ಎಮ್. ಟಿ. ಸಿ. ಕಂಪನೀತ್ ಜ್ಯೊಯನ್ ಜಾತಲೆ ಭಾರತೀಯ್ ಗಿರಾಯಕಾಲ್ಯೊ ಕಪಡೆಂ ವಿಕತ್ ಘೆವಪಾ ಫಾಟಲ್ಯೊ ಪ್ರೆರಣಾ ಆನಿ ಕಾರಣಾಂ ಹಾಚೆರ್ ಮ್ಹಜೊ ಅಮೆರಿಕನ್ ಫಾಂವಡೆಶನಾನ್ ಸ್ಪೊನ್ಸರ್ ಕೆಲ್ಲೊ ಎಕ್ ಸೊದ್ ಪ್ರಕಲ್ಪ್ ಚಾಲೂ ಆಸಾ ತಾಕಾ ಲಾಗೂನಯ್ ಮ್ಹಾಕಾ ಹಿ ನೊಕರಿ ಜಾಯ್ "ಹೆ ಸಗ್ಳೆ ಮುದ್ದೆಸುದ್ ಪಣಾನ್ ತಾಣೆಂ ತ್ಯಾ ಮೆನೆಜರಾಕ್ ಇತಲೆ ಬರೆ ತರೆನ್ ಪಟೊವ್ನ್ ದಿಲೆಂ. ಕಿ ತಾಣೆ ಹೆರಾಪರಸ್ ತಾಜ್ಯಾ ಪಗಾರಾತ್ ಎಕ್ ಹಜಾರ್ ರುಪಯಾಚಿ ವಾಡ್ ಕೆಲಿ.

ವೆಗವೆಗಳೆ ತರೆಚೆ ಕಪಡೆ ಲೊಕಾಂಕ್ ದಾಖೊವಪ್ ತಾಂಕಾ ಕಪಡೆ ವಿಂಚೂನ್ ಕಾಡಪಾಕ್ ಮದತ್ ಕರಪ್ ಹೆಚ್ ತಾಚೆ ಕಾಮ್ ಆಸ್ಲೆಂ. ಥಂಯಚ್ ತಾಕಾ ಶಾಹೀನ್ ಮೆಳ್ಳೆಂ ಶಾಹೀನಾನ್ ಪಯ್ಲೆಚ್ ಫಾವಟ್ ಮೆಳ್ಳೆಂ ತೆನ್ನಾ ಅಶೆ ಆರ್ ಪಾರ್ ನದರೆನ್ ತಾಕಾ ಪಳಯ್ಲೆ ಜಶೆಂ ತಾಚ್ಯಾ ಕಾಳಜಾತಲ್ಯಾ ದರ್ ಎಕಾ ದುಖಾಂಚಿ ತಾಕಾ ವಳಖ್ ಆಸ್ಲಿ. ಶಾಹೀನ್ ಲ್ಹವ್ ಲ್ಹವ್ ತಾಚಿ ಘಟ್ಟ್ ಇಶ್ಟೀಣ್ ಜಾಲಿ ದರ್ ಎಕಾ ಕಾಮಾತ್ ತೆ ತಾಕಾ ಆದಾರ್ ಕರ್ತಾಲೆ.

ಮ್ಹೊಲಾಂತ್ ಸಗ್ಳ್ಯಾಕ್ ಆಪಲೊ ಘೊವ್ ಗಾಂವಾತ್ ಆಸ್ತಾ ಅಶೆ ತಾಣೆ ಸಾಂಗಿಲ್ಲೆಂ, ಪೂಣ್ ಶಾಹಿನಾಕಡಲ್ಯಾನ್ ಫಟ್ ಚಡ್ ದೀಸ್ ಲಿಪೊವಂಕ್ ತಾಜ್ಯಾನ್ ಜಾಲೆನಾ. ಶಾಹಿನಾಚೀಯ್ ಮ್ಹಣ್ ಎಕ್ ಕಾಣೀಚ್ ಆಸ್ಲಿ ತಾಕಾ ಲಾಗೂನಯ್ ಆಸ್ತ್ ತಾಂಚೆ ನಾತೆಂ ಆನೀಕ್ ಘಟ್ ಜಾಲೆಂ.

ಶಾಹೀನಾಲೆ ಲಗ್ನ್ ಲ್ಹಾನ್ ಆಸ್ತನಾ ಜಾಲ್ಲೆಂ ವೀಸ್ ಬಾವೀಸ್ ವರ್ಸಾರ್‍ಚ್ ಭರಪೂರ್ ಸೊರೊ ಪಿವ್ನ್ ತ್ರಾಸ್ ದಿವಪಿ ಘೊವ್ ಭಾಯರ್ ಪಡ್ಲೊ. ಭುರಗೀಂ ನಾ ಮ್ಹಣ್ ಮಾಂಯ್ ಆನಿ ಮಾಂವಾಕ್ ತೆ ದೊಳ್ಯಾಮುಖಾರ್ ಪಯ್ಲೀಚ್ ನಾಕಾ ಆಸ್ಲೆಂ. ಆತಾ ಆಪಲ್ಯಾ ಚಲ್ಯಾಕ್ ಹ್ಯಾ ಫುಟಕ್ಯಾ ನಶಿಬಾಚ್ಯಾ ರಾಕ್ಷಿಣೀನ್ ಖಾಲೆ ಮ್ಹಣ್ ತಿ ಯೆತಲ್ಯಾ ವತಲ್ಯಾ ಹುಜೀರ್ ಕಪಲ್ ಧಾಡಾಯ್ತಾಲಿ. ಖರೆ ಮ್ಹಳ್ಯಾರ್ ಪೂತಾನ್ ಹ್ಯಾ ದೊಗಾಕಯ್ ಎಕ್ ದೀಸ್ ಪಸೂನ್ ತಶೆ ಸೂಖ್ ದಿವಂಕ್ ನಾಸ್ಲೆಂ. ಘೊವ್ ಮೆಲ್ಲ್ಯಾ ಮೆಜೂನ್ ತೆರಾ ದಿಸಾನ್ ಮಾವಾಂನ್ ತಿಚೆ ಪುರಾಯ್ ಕಪಡೆ ಮ್ಹಾಲ್ ದಾರಾಮುಖಾರ್ ದವರಲೆಂ ಆನಿ ಸಾಂಗ್ಲೆ ಆತಾಚ್ಯಾ ಆತಾ ಘರಾಭಾಯರ್ ಸರ್. ಶೆಜಾರ್ಚ್ಯಾ ಕೊಣೆತರಿ ತಾಕಾ ಆವಯಗೆರ್ ಹಾಡೂನ್ ಸೊಡಲೆಂ.

ಫಕತ್ ಚಾರ್ಚ್ ದಿಸಾನ್ ಆವಯ್ ಆನಿ ಭಾವಜಯೆಮದಿ ವ್ಹಡ್ ಝಗಡೆ ಜಾಲೆಂ, ಝಗಡೆ ಕಸ್ಲೆಯ್ ಆಸೂ ಹ್ಯಾ ಮುಳಾತ್ ಆಪೂಣ್ ಆಸಾ ಹೆ ಶಾಹೀನಾಕ್ ಸಮಜಲೆಂ. ತ್ಯಾಚ್ ದಿಸಾನ್ ಶೆಜಾರ್ಚೊ ಗಾಂವ್ ಭಾವ್ ಮುಂಬಯಚ್ಯಾನ್ ಆಯಿಲ್ಲೊ ಆಸ್ಲೊ, ತಾಣೆ ತಾಕಾ ವಿಚಾರಿಲ್ಲೆಯ್ ತೂಂ ಕಾಮಾಧದ್ಯಾತ್ ಹುಶಾರ್ ಆಸಾ ಮುಂಬಯ್ ಯೊ ಹಾಂವ್ ತುಕಾ ಕಾಮಾಕ್ ಲಾಯ್ತಾ. ಭುರಗೀಂ ಬಾಯ್ಲ್ ಆಶಿಲ್ಲೊ ಹೊ ರಫೀಕ್ ಆಪಲ್ಯಾಚೆರ್ ಇತಲೊ ಉದಾರ್ ಕಸೊ ಜಾಲೊ ಹೆ ತಾಕಾ ಪಯ್ಲಿ ಕಳ್ಳೆಂ ನಾ. ಪೂಣ್ ವಿಖಾಚಿ ಪರಿಕ್ಷಾ ಘೆವಂಕಚ್ ಜಾಯ್. ತೆ ತ್ಯಾಚ್ ಸಾಂಜೆ ರಫಿಕಾಗೆರ್ ಗೆಲೆ. ಆನಿ ಸರಳ್ ಹಾಂವ್ ತುಜೆ ವಾಂಗಡಾ ಮುಂಬಯ್ ಯೆತಾ ಫಕತ್ ಬರೆಂ ಚಾರ್ ಪಯಶೆ ಮೆಳಪಿ ಕಾಮ್ ಮೆಳ್ಳ್ಯಾರ್ ಪುರೊ. ಇತಲೆಚ್ ಮ್ಹಳೆಂ ಆನಿ ಮೆಜ್ಜೂನ್ ಆಠ್ ದಿಸಾನ್ ತೆಂ ತಾಜೆವಾಂಗಡಾ ಮುಂಬಯ್ ಆಯ್ಲೆಂ.

ಗಾಂವಾತ್ ರಫಿಕಾವಿಶೀಂ ಲೊಕಾಲ್ಯಾ ಮನಾತ್ ಆದರ್ ವಿಸ್ವಾಸ್ ಆಸ್ಲೊ, ಘರಾತ್ ಆನಿ ಘರಾಭಾಯರ್ ಕೊಣೆ ಎಕಾ ಉತ್ರಾನ್ ತಾಕಾ ತೂಂ ವಚೂ ನಾಕಾ ಹಾಂಗಾಚ್ ರಾವ್ ಅಶೆಂ ಮ್ಹಳೆನಾ.
ಶಾಹೀನ್ ಸಗ್ಳೆ ಸೊಡೂನ್ ಎಕಾ ಅನವಳಖಿ ಶಾರಾತ್ ಆಯಿಲ್ಲೆಂ. ರಫೀಕಾನ್ ಆಪಲ್ಯಾ ಘರಾತ್ ತಾಕಾ ಆಸರೊ ದಿಲ್ಲೊ ತಾಚೆ ವಿಶೀಂ ತಾಚೆ ಮನ್ ಭರೂನ್ ಆಯ್ಲೆಂ ರಫಿಕಾಲ್ಯಾ ಧುವೆನ್ ದಾರ್ ಉಗಡಲೆಂ ಆನಿ ಉದಕ್ ಹಾಡೂನ್ ದಿಲೆಂ ಅಮ್ಮಾ ಖಂಯ್ ಅಶೆ ಮ್ಹಣಟಕಚ್ ತೆಂ ತಾಕಾ ಒಡೂನ್ ಭಿತರ್ ಘೆವ್ನ್ ಗೆಲೆಂ. ರೆಹಾನಾ ದಿದಿ ಬೆಂಡೀರ್ ನ್ಹಿದಿಲ್ಲಿ. ಕುಡೀತ್ ಭಿತರ್ ಯೆವ್ನ್ ರಫಿಕಾನ್ ಮ್ಹಳೆ ತಿಜೆಂ ಪುರಾಯ್ ಆಂಗ್ ಧಲ್ಲಾ ಉಠೂಕ್ ಬಸೂಕ್ ಜಾಯನಾ. ಶಾಹಿನ್ ತುಕಾ ಹಾಂಗಾ ಆಸರೊ ಮೆಳಟಲೊ ಪೂಣ್ ತಿಚೆ ಆನಿ ಭುರಗ್ಯಾಚೆ ಸಗ್ಳೆ ತುವೆಂ ಕರ್ಚೆ ಪಡಟಲೆಂ. ಮಾಗೀರ್ ತೂಂ ಫಾವ್ತ್ಯಾ ವೆಳಾತ್ ನೊಕರಿ ಕರ್. ಆನಿ ಹೆ ಸಗಳೆ ಸಾಂಬಾಳೂನಚ್ ಶಾಹೀನ್ ನೊಕರಿ ಕರತಾಲೆ.

ಪೂಣ್ ಹಾಲಿ ಹಾಲಿ ರಫಿಕಾಲಿ ತಿಚೆ ಕಡೆನ್ ಪಳೊವಪಾಚಿ ನದರ್ ಬದಲಿಲ್ಲಿ. ತಾಕಾ ಲಾಗೂನ್ ಶಾಹಿನಾಕ್ ಥಂಯಚ್ಯಾನ್ ಭಾಯರ್ ಸರಪಾಕ್ ಕೊಣಾಚೊ ತರಿ ಆದಾರ್ ಜಾಯ್ ಆಸ್ಲೊ.
ಸುಂಗಧಾನ್ ಪಯ್ಲೊ ಪಗಾರ್ ಮೆಳಟಕಚ್ ಲ್ಹಾನ್ ಘರ್ ಪಳೊವಪಾಕ್ ಸುರು ಕೆಲೆಂ ಹ್ಯಾ ಕಾಮಾತ್ ಆತಾ ತಾಕಾ ಶಾಹಿನಯ್ ಆದಾರ್ ಕರತಾಲೆಂ. ಎಕ್ ದೀಸ್ ಶಾಹಿನಾನ್ ತಾಕಾ ಸಾಂಗ್ಲೆ ಆಮಿ ದೊಗಾಯ್ ಮೆಳೂನ್ ಎಕ್ ರುಮ್ ಘೆವಂಯಾ ಹಾಂವ್ ಅರ್ದೆ ಪಯಶೆ ದಿತಾ. ರೊಖಡೊಚ್ ಎಕ್ ಲ್ಹಾನಸೊ ರುಮ್ ತಾಣಿ ಪಳಯ್ಲೊ. ತಾಣೆ ನಂದಾಕ್ ಸಾಂಗ್ಲೆ ನಂದಾನ್ ಇತಲೆಚ್ ಮ್ಹಳೆ “ಆಪಲ್ಯಾ ಪಾಯಾರ್ ಚಡ್ ಬೆಗೀನ್ ಉಬೆಂ ರಾವ್ತಾ ತೆಂ ಬರೆ ಕೆನ್ನಾಯ್ ಗರಜ್ ಪಡಲ್ಯಾರ್ ಮಾತ್ ಸಾಂಗ್”.

ಆನಿ ಸುಂಗಧಾ ರುಮಾರ್ ಆಯ್ಲೆಂ ತಾಜೆ ಉಪರಾಂತ್ ಎಕಾ ಮ್ಹಯನ್ಯಾನ್ ಶಾಹೀನ್ ಆಯ್ಲೆಂ. ಸುಂಗಧಾನ್ ತಾಕಾ ಇತಲೆಚ್ ಮ್ಹಳೆ “ಮ್ಹಜೆ ಜೆವಣ್ ಹಾಂವ್ ರಾಂದತಾ ತುಜೆ ತೂಂ ರಾಂದ್”. ತೆನ್ನಾ ಶಾಹೀನ್ ಖಳಖಳೂನ್ ಹಾಂಸ್ಲೆ “ಹಾಂವ್ ಕರತಾ ತ್ಯೊ ರೊಟಯೊ ತೂಂ ಖಾಲ್ಯಾರ್ ಸೊಡಚೆನಾ”. ಶಾಹೀನಾಕ್ ತೆ ವೆಳಾರ್ ಮನಾತಲ್ಯಾನ್ ದಿಸ್ಲೆಂ ಖರೆಚ್ ಹಾಂವ್ ಖೂಬ್ ತೆಂಪಾನ್ ಮನಾಚೆ ಸಗ್ಳೆ ಬಾಂದ್ ತೊಡೂನ್ ಮೊಡೂನ್ ಪಯ್ಲೆಚ್ ಫಾವಟ್ ಹಾಂಸ್ಲಾ, ತಾಕಾ ಖೂಬ್ ಮೆಕಳೆ ಮೆಕಳೆ ದಿಸ್ಲೆಂ.

ಸುಂಗಧಾಕ್ ಣವ್ ಮ್ಹಯನೆ ಲಾಗಿಲ್ಲೆಂ ಶಾಹಿನಚ್ ತಾಜಿ ಆವಯ್ ಬಾಪೂಯ್ ಜಾಲ್ಲಿ. ಘರಾಕಡಚ್ಯಾನ್ ಎಕ್ ದೀಸ್ ಬಾಪಾಯ್ಚೊ ಫೊನ್ ಆಯ್ಲೊ ದೊಗಾಯ್ ರಡ್ ರಡ್ ರಡಲಿ. .
ಪಿಡಾ, ವೆಗ್, ದೂಖ್ ವಾಡಟಕಚ್ ಸರ್ಕಾರಿ ಹೊಸ್ಪೀಟಲಾತ್ ಶಾಹೀನಾನಚ್ ತಾಕಾ ಭರತಿ ಕೆಲೆಂ. ಸುಗಂಧಾಕ್ ಚಲೊ ಜಾಲೊ ನಾಂವ್ ಮಾತ್ ದೊಗಾನೀಯ್ ಮೆಳೂನ್ ದವರಲೆಂ ಸಾಹಿಲ್. ಶಾಹಿನಾನ್ ಘರ್ ನೊಕರಿ ಸಾಂಬಾಳೂನ್ ಸುಂಗಧಾಚೆ ಸಗ್ಳೆ ಕೆಲೆಂ ಆಪಲ್ಯಾಕ್ ಸಮಜ್ತಾ ಕಳಟಾ ತಶೆಂ.

ಸುಂಗಧಾ ದೊನ್ ಮ್ಹಯನೆ ಘರಾ ರಾವಲೆಂ ಆನಿ ಮಾಗೀರ್ ನೊಕರಿ ಸೊದೂಕ್ ಲಾಗ್ಲೆ. ತಾಕಾ ಅಚಕೀತ್ ದಿಸೂಕ್ ಲಾಗ್ಲೆಂ ಜಿವಿತ್ ಅಚಕೀತ್ ಖೂಬಚ್ ವೆಗಾನ್ ಧಾವಂಕ್ ಲಾಗ್ಲಾಂ ಆತಾ ಎಕ್ ಖೀಣ್ ಜರಿ ಹಾಂವೆ ವ್ಹಗಡಾಯ್ಲೊ ಜಾಲ್ಯಾರ್ ಸಾಹಿಲಾ ಸಯ್ತ್ ಹಾಂವ್ ಖಂಯಚೆ ಖಂಯ್ ನಾ ಜಾವ್ನ್ ಹುಬೂನ್ ಬುಡೂನ್ ವತಲೆಂ.

ಎಚ್. ಎಮ್. ಟಿ. ಸಿ ತ್ ವಚೂನ್ ತೆಂ ಸರಳ್ ಸರಾಲ್ಯಾ ಇಶ್ಟಾಕ್ ಮಹೆಶ್ ಸರಾಕ್ ಮೆಳ್ಳೆಂ, ನಾಯಕ್ ಸರಾಲೊ ರೆಫರನ್ಸ್ ದಿಲೊ ಸರಾಲೊ ನವೊ ಪ್ರೊಜೆಕ್ಟ್ ಚಾಲೂ ಜಾವಪಾಚೊ ಆಸ್ಲೊ ತಾಣಿ ತಾಕಾ ತ್ಯಾ ಜಾಗ್ಯಾರ್ ಘೆತಲೆಂ ಆನಿ ಎಕ್ ತಾರಖೆಚ್ಯಾನ್ ರುಜೂ ಜಾವಂಕ್ ಸಾಂಗ್ಲೆ. ಪಗಾರಯ್ ಬರೊ ಆಸ್ಲೊ.

ಘರಾ ಯೆವ್ನ್ ತಾಣೆ ಶಾಹಿನಾಕ್ ಸಾಂಗ್ಲೆ ತುವೆಂ ಫಕತ್ ಬಾಬಾಚೆರ್ ಲಕ್ಷ್ ದಿವಪ್ ತುಕಾ ಮೊಲಾತ್ ಜೊ ಪಗಾರ್ ಮೆಳಟಾಲೊ ತಿತಲೊ ಹಾಂವ್ ತುಕಾ ದಿತಾ. ಪಗಾರ್ ನಾಕಾ ಹಾಂವ್ ಪಳಯ್ತಾ ಬಾಬೂಕ್ ಶಾಹೀನಾನ್ ತಳಮಳೀನ್ ಮ್ಹಳೆಂ. ಪೂಣ್ ಸುಂಗಧಾನ್ ತಾಕಾ ಸಮಜಾಯ್ಲೆಂ, ದೊಂಗಾಯ್ಲ್ಯಾ ದೊಳ್ಯಾತಲ್ಯಾನ್ ಘಳಘಳೀತ್ ದುಕಾಂ ವ್ಹಾಂವಕ್ ಲಾಗಿಲ್ಲಿ.

ಸುಂಗಧಾಕ್ ಆಪಲ್ಯಾ ಜಿಣೆಚೆ ಹೆ ತಾರೂ ಆತಾ ಖಂಯಚ್ಯಾ ವಟೆನ್ ವಚುಕ್ ಲಾಗ್ಲಾ ಹೆ ಕಳೂಕ್ ಲಾಗಿಲ್ಲೆಂ. ಆಪಲ್ಯಾ ಬುಡಟ್ಯಾ ಜಿಣೆಕ್ ಫಕತ್ ಶಾಹಿನಾಕ್ ಲಾಗೂನಚ್ ತಡ್ ಮೆಳೂಕ್ ಪಾವಲಿ. ಶಾಹಿನಾಚ್ಯಾ ಉಪಕಾರಾ ಖಾಲಾ ಆಪೂಣ್ ಚೆಂಪೂನ್ ಗೆಲಾ ಅಶೆ ತಾಕಾ ದಿಸ್ಲೆಂ.

ದೊನ್ ವರ್ಸಾಂ ಜಾಲಿ ಮದಿ ತಾಚಿ ಆವಯ್ ಬಾಪೂಯ್ ಯೆವ್ನ್ ಗೆಲಿ. ಭುರಗ್ಯಾಂಕ್ ಮಾತ್ ವ್ಹಡಾ ಮಾಯೆನ್ ಅಸೊ ತಾಣಿ ಲಾಗಿ ಕೆಲೊನಾ ನಾ ಮ್ಹಣ್ ದೊಗಾನೀಯ್ ಘರಾ ಯೊ ಮ್ಹಣ್ ಆಪಯ್ಲೆನಾ. ಸುಂಗಧಾಕ್ ವಾಯ್ಟಯ್ ದಿಸ್ಲೆನಾ. ಆತಾ ಮ್ಹಯನ್ಯಾ ಮ್ಹಯನ್ಯಾಕ್ ತೆಂ ನ್ ಚುಕತಾ ತಾಂಕಾಂ ಪಯಶೆಂ ಧಾಡಟಾಲೆಂ.

ಮದಿ ತಾಣೆ ಶಾಹಿನಾಕ್ ಆಪಲ್ಯಾ ಘರಾ ಧಾಡಲೆಂ ಶಾಹಿನ್ ಪರತ್ ಯೆತಲೆಂ ಕಾಂಯ್ ಥಂಯಚ್ ರಾವ್ತಲೆಂ ಥೊಡೊಸೊ ಭಂಯ್ ತಾಜ್ಯಾ ಮನಾತ್ ಆಸ್ಲೊ. ಧಾ ಪಂದರಾ ದೀಸ್ ಮ್ಹಣ್ ಗೆಲ್ಲೆಂ ಶಾಹಿನ್ ಆಠ್ ದಿಸಾನಚ್ ಪರತ್ ಆಯ್ಲೆಂ. ಸಗ್ಳಿ ಜಾಣ್ ಖುಶಾಲ್ ಆಸಾತ್. ಆನಿ ಹಾಂವ್ ಜಂಯ್ ಆಸಾ ಥಂಯ್ ಹಾಂವೆಯ್ ಖುಶಾಲ್ ರಾವಚೆಂ ಅಶೆ ತಾಂಕಾ ದಿಸ್ತಾ. ಹಾಂವೆ ಹಾಡಿಲ್ಲ್ಯೊ ನವ್ಯೊ ಸಾಡಯೊ, ನವೆ ಮೊದೀಚೆ ಸೂಟ್, ಹೆರ್ ಸಾಮಾನ್ ಪಳೊವ್ನ್ ಭಾವಜಯ್ ಮಾತ್ ಖುಬಚ್ ಖುಶಾಲ್ ಜಾಲಿ. ಇತಲೆಚ್ ಮ್ಹಣೂನ್ ತಾಣೆಂ ತೊ ವಿಶಯ್ ಸೊಪಯ್ಲೊ.

ಸುಂಗಧಾನ್ ಜೀವ್ ತೊಡೂನ್ ಮಹೆಶ್ ಸರಾಲ್ಯಾ ಪ್ರಕಲ್ಪಾತ್ ಕಾಮ್ ಕೆಲೆಂ. ಪ್ರಕಲ್ಪ್ ಪುರಾಯೆನ್ ಯಶಸ್ವಿ ರಿತೀನ್ ತಯಾರ್ ಜಾಲೊ ಹಾಚಿ ಆಪಲ್ಯಾಕ್ ಖೊಸ್ ಆಸಾ ಅಶೆಂ ಮ್ಹಣೂನ್ ಸರಾನ್ ಸುಂಗಧಾಚಿ ತೊಂಡ್ ಭರುನ್ ತುಸ್ತ್ ಕೆಲಿ.

ಸರಾನಚ್ ತಾಕಾ ಎಕ್ ದೀಸ್ ಸಾಂಗ್ಲೆ ಕಂಪನೀಚೊ ನವೊ ಬ್ರಾಂಚ್ ದುಬಂಯ್ತ್ ಉಗ್ತೊ ಜಾತಾ ತಾಂಕಾ ಎಕ್ ಹುಶಾರ್ ಬ್ರಾಂಚ್ ಎಡಮೀನ್ ಜಾಯ್ ತುಕಾ ಇಂಟರೆಸ್ಟ್ ಆಸಾ ಜಾಲ್ಯಾರ್ ಹಾಂವ್ ತುಜೆ ನಾಂವ್ ಮುಖಾವೆಲ್ಯಾ ಮಿಟಿಂಗೆಂತ್ ಸಜೆಸ್ಟ್ ಕರ್ತಾಂ.

ತೆ ಘರಾ ಆಯ್ಲೆಂ ನವೊ ಫುಡಾರ್ ಘಡೊವಪಾಚಿ ಹಿ ನವಿ ಸಂದ್ ಆಸ್ಲಿ ಆಯಜಮೆರೆನ್ ಆಪಲ್ಯಾ ಜಿಣೆಚೆಂ ನಿರ್ಣಯ್ ತಾಣೆಚ್ ಘೆತಿಲ್ಲೆಂ, ಕೊಣಾಕ್ ವಿಚಾರಿನಾಸ್ತನಾ ಆತಾ ಮಾತ್ ಶಾಹೀನಾಕ್ ವಿಚಾರುಕ್ ಜಾಯಚ್ ಆಸ್ಲೆಂ..

ಶಾಹೀನಾನ್ ಇತಲೆಚ್ ಮ್ಹಳೆಂ ಖರೆ ಸಾಂಗೂ ಮ್ಹಜ್ಯಾ ಜಿಣೆತ್ ಅಸೊ ಎಕ್ ವೆಳ್ ಆಯಿಲ್ಲೊ ಜೆನ್ನಾ ಹಾಂವ್ ಕೊಣಾಕಚ್ ನಾಕಾ ಆಸ್ಲೆ, ತುವೆಂ ಮ್ಹಜ್ಯಾ ಜಿಣೆಕ್ ಅರ್ಥ್ ದಿಲೊ ಸಗ್ಳೆಚ್ ವಾಟೆನ್ ಹಾಂವ್ ಕೊಸಳೂಕ್ ಲಾಗಿಲ್ಲೆಂ ತೆನ್ನಾ ತೂಂ ಮ್ಹಜ್ಯಾ ಜಿಣೆತ್ ಆಯ್ಲೆಂ. ಆತಾ ತೂಂ ವತಾ ಥಂಯ್ ಹಾಂವ್ ಆಸ್ತಲೆಚ್ ತುಕಾ ಆದಾರ್ ದಿವಂಕ್.

ತಾಜೆ‌ಉಪರಾಂತ್ ಮೆಜೂನ್ ಸ್ ಮ್ಹಯನ್ಯಾನ್ ಶಾಹೀನ್ ಆನಿ ಸುಂಗಧಾ ಲ್ಹಾನ್ ಸಾಹಿಲಾಕ್ ಘೆವ್ನ್ ವಿಮಾನಾರ್ ಬಸ್ಲಿ ವಿಮಾನ್ ಉಂಚ್ ಎಕಾ ನವ್ಯಾ ದಿಕೆನ್ ಉಡೂಕ್ ಲಾಗ್ಲೆಂ. ಸುಂಗಧಾನ್ ವಿಮಾನಾತಲ್ಯಾ ಖಿಡಕೆತಲ್ಯಾನ್ ಸಕಯ್ಲ್ ಪಳಯ್ಲೆಂ... ವಿಮಾನ್ ಲ್ಹವ್ ಲ್ಹವ್ ಉಡೂಕ್ ಲಾಗಿಲ್ಲೆಂ ಸಕಯ್ಲ್ ಅಫಾಟ್ ಅಂತ್ ಥಾವ್ ನಾಶಿಲ್ಲೊ ಅರಬಿ ಸಮುದ್ರ್ ಪಾತಳಿಲ್ಲೊ ಪೂಣ್ ಸುಂಗಧಾಕ್ ಮಾತ್ ಆಪಲಿ ತಡ್ ಆನಿ ದೆಗ್ ಸ್ಪಶ್ಟ್ ದಿಸೂಕ್ ಲಾಗಿಲ್ಲಿ.- ರಾಜಶ್ರೀ ಸೈಲ್ [ಮಾಯ್,  2025]

ರಾಜಶ್ರೀ ಸೈಲ್: ಫಾ.ಆಗ್ನೆಲ್ ಕೊಲೆಜ್ (ಪಿಲಾರ್, ಗೊಂಯ್) ಹಾಂಗಾಸರ್ ಕೊಂಕಣಿ ಪ್ರಾಧ್ಯಾಪಕಿ ತಶೆಂಚ್ ಕೊಂಕಣಿ ವಿಭಾಗಾಚಿ ಮುಖೆಸ್ತ್ ಜಾವ್ನ್ ವಾವ್ರ್ ಕರ್ನ್ ಆಸಾ. ಕವಿ, ಕಥಾಕಾರ್ ತಶೆಂಚ್ ಸಮೀಕ್ಷಕಿ.

ದಾಯ್ಜ್.ಕೊಮ್