|
11 ಎಪ್ರಿಲ್ 2026: ರೋಮಿ, ಕನ್ನಡ, ನಾಗರಿ ಆನಿ
ಮಲಯಾಳಂ ಲಿಪಿಚ್ಯಾ ’ಕೊಂಕಣಿ ಕಾದಂಬರಿಂಚೆರ್ ಏಕ್
ಸುಕ್ಣ್ಯಾನದರ್’ ಅಂತರ್ರಾಷ್ಟ್ರೀಯ್ ವೆಬಿನಾರ್ 11
ಎಪ್ರಿಲ್ 2026 ವೆರ್ ಆಶಾವಾದಿ ಪ್ರಕಾಶನಾನ್ ಮಾಂಡುನ್
ಹಾಡ್ಲೆಂ. ಮೊನಿಕಾ ಡೆಸಾ ಮಥಾಯಸ್ (ಡಬ್ಲಿನ್,
ಅಯರ್ಲೆಂಡ್) ಹಿಚಿ ತೀನ್ ಲಿಪಿಂತ್ ಪುಸ್ತಕಾರುಪಾರ್
ಪರ್ಗಟ್ ಜಾಲ್ಲಿ ನವಾಲಿಕಾ ’ಜಿಣ್ಯೆ ಕಾಣಿಕ್’ ಹ್ಯಾಚ್
ಸಂಧರ್ಭಾರ್ ಹ್ಯಾ ವೆಬಿನಾರಾಚೆಂ ಉಗ್ತಾವ್ಪಿ ಮಾ.ಬಾ.ಚೇತನ್
ಲೊಬೊನ್ ಲೊಕಾರ್ಪಣ್ ಕೆಲೆಂ.
ಸಾಂಜೆರ್ 4 ವೊರಾಂಕ್ ಸುರು ಜಾಲ್ಲ್ಯಾ ಹ್ಯಾ ವೆಬಿನಾರಾಚೆಂ
ಉಗ್ತಾವಣ್ ಕರುನ್ ಮಾ.ಬಾ.ಚೇತನಾನ್ "ಅಪ್ಣಾನ್ ಬರಯಿಲ್ಲಿ
ಕಾದಂಬರಿ ಫಕತ್ ಏಕ್, ಪುಣ್ ಕಾದಂಬರಿ ಬರಂವ್ಕ್ ಕರುಂಕ್
ಆಸ್ಚಿ ತಯಾರಾಯ್ ತಶೆಂಚ್ ಮಿನತೆವಿಶಿಂ ಅಪ್ಣಾಕ್ ಕಳಿತ್
ಆಸಾ. ಆಜ್ ಸಮಾಜಿಕ್ ಮಾಧ್ಯಮಾಚ್ಯಾ ಕಾಳಾಂತ್ ಲಾಂಬ್
ವಾಚ್ಪಾಂ ವಾಚುಂಕ್ ಲೊಕಾಂಕ್ ವೇಳ್ ನಾ ದೆಕುನ್ ಕೊಂಕಣಿ
ಕಾದಂಬರಿಂಚೊ ಫುಡಾರ್ ಕಸೊ ಆಸತ್ ಮ್ಹಳ್ಳೆಂ ಕೊಣಾಯ್ಚಾನ್
ನಖ್ಖೆಂ ಸಾಂಗೊಂಕ್ ಜಾಯ್ನಾಂ. ಪುಣ್ ಅಧ್ಯಯನಾಚ್ಯಾ
ನದ್ರೆನ್ ಸಮಗ್ರ್ ಕೊಂಕಣಿ ಕಾದಂಬರಿಂಚೆರ್ ಚಡಿತ್ ಸಮ್ಜೊಣಿ
ಘೆಂವ್ಚ್ಯಾ ದಿಶೆನ್ ಹೆಂ ವೆಬಿನಾರ್ ಏಕ್ ಮಹತ್ವಾಚಿ
ಸುರ್ವಾತ್ ಕರುನ್ ದಿತಾ" ಮ್ಹಣಾಲೊ.
ಮುಖೆಲ್ ಸಯ್ರೊ ದೊ.ಪೂರ್ಣಾನಂದ ಚಾರಿ (ಅಧ್ಯಕ್ಷ್ -
ಕೊಂಕಣಿ ಅಕಾಡೆಮಿ ಗೊಂಯ್) ಅಪ್ಲ್ಯಾ ಉಲವ್ಪಾಂತ್ "ಕೊಂಕಣಿ
ಸಾಹಿತ್ಯ್ ಸಭಾರ್ ಲಿಪಿಂನಿ ಆಸಾ, ಆನಿ ಹೆಂ ಡಿಜಿಟಲ್
ಮಾಧ್ಯಮಾಂತ್ ಎಕಾ ಸಮಗ್ರ್ ವಾವ್ರಾಮುಖಾಂತ್ರ್ ಸಂಗ್ರಹ್ (Archieve)
ಕೆಲೆಂ ತರ್, ಶೈಕ್ಷಣಿಕ್ ನದ್ರೆನ್ ಹೆಂ ಭೋವ್ ಮಹತ್ವಾಚೆಂ
ಜಾಂವ್ಕ್ ಪಾವ್ತೆಲೆಂ. ಹ್ಯಾ ದಿಶೆನ್ ಆಶಾವಾದಿ ಪ್ರಕಾಶನ್
ಕಾಂಯ್ ವರ್ಸಾಂ ಥಾವ್ನ್ ವಾವ್ರ್ ಕರುನ್ ಆಸಾ, ಆನಿ ತ್ಯಾ
ವಾವ್ರಾಕ್ ಆಮಿ ಹಾತ್ ಮೆಳಯ್ಲೊ ತರ್ ತಾಚೊ ಫಾಯ್ದೊ
ಕೊಂಕಣಿಕ್ ಜಾತಲೊ" ಮ್ಹಣಾಲೊ.
ಉಪ್ರಾಂತ್ ಲಾರೆನ್ಸ್ ವಿನೋದ್ ಬಾರ್ಬೊಜಾನ್ ಮೊನಿಕಾ ಡೆಸಾ
ಮಥಾಯಸಾಚಿ ತಶೆಂಚ್ ’ತಿಚಿ ಕಾಣಿಕ್’ ಪುಸ್ತಕಾಚಿ ಒಳೊಕ್
ಕರುನ್ ದಿತಚ್, ಮಾ.ಬಾ.ಚೇತನ್ ಲೋಬೊನ್ ಪುಸ್ತಕಾಚೆಂ
ಲೊಕಾರ್ಪಣ್ ಕರ್ತಚ್ ಉಲಯಿಲ್ಲ್ಯಾ ಬಾಯ್ ಮೊನಿಕಾನ್
"ಜಿಣ್ಯೆ ಕಾಣಿಕ್" ಅಪ್ಲ್ಯಾ ವಾವ್ರಾಂತ್ ದೊಳ್ಯಾಂ ಸಮೊರ್
ಜಾಲ್ಲ್ಯಾ ಘಡಿತಾಂಕ್ ಸಂಏದನಾತ್ಮಕ್ ಚಿಂತಾಂಕ್ ಸ್ಪಂದನ್
ದಿಂವ್ಚ್ಯಾ ಇರಾದ್ಯಾನ್ ಬರಯಿಲ್ಲಿ. ಕನ್ನಡ ಲಿಪಿಂತ್
ಬರಯಿಲ್ಲ್ಯಾ ಹ್ಯಾ ನವಾಲಿಕಾಕ್ ನಾಗರಿ ಆನಿ ರೊಮಿ ಲಿಪಿಂನಿ
ಲಿಪ್ಯಂತರಣ್ ಕೆಲ್ಲ್ಯಾ ವಲ್ಲಿ ಕ್ವಾಡ್ರಸಾಕ್ ತಶೆಂಚ್
ಜೊಕ್ತಿಂ ಪ್ರಸ್ತಾವನಾಂ ಬರಯಿಲ್ಲ್ಯಾ ಶೈಲೇಂದ್ರ ಮೆಹ್ತಾ
(ನಾಗರಿ), ವಿನ್ಸಿ ಕ್ವಾಡ್ರಸ್ (ರೊಮಿ) ಧಿನ್ವಾಸ್ಲೆಂ.
ಕನ್ನಡ ಲಿಪಿಂತ್ಲೆ ಕಾದಂಬರಿಕಾರ್ ವಿಶ್ಯಾಚೆರ್ ನಾಮ್ನೆಚೊ
ಕಾದಂಬರಿ ಸುನಂದ್ (ಮಾನೆಸ್ತ್ ಜ್ಯೊ ಡಿಮೆಲ್ಲೊ,
ಆಸ್ಟ್ರೇಲಿಯಾ) ಉಲವ್ನ್, ಅಪ್ಣಾಕ್ ಏಕ್ ಕಾದಂಬರಿ
ಜಾಂವ್ಚಾಕ್ ಕೊಂಕಣಿ ಕಾದಂಬರಿಂನಿ ಕಶೆಂ ಪ್ರೇರಿತ್ ಕೆಲೆಂ
ಮ್ಹಣಾಲೊ. ಕಾದಂಬರಿ ಆನಿ ನವಾಲಿಕಾ ಮಧೆಂ ಆಸ್ಲೊ
ತಫಾವತಾವಿಶ್ಯಾಚೆರ್ ಉಲವ್ನ್ ವಲ್ಲಿ ಕ್ವಾಡ್ರಸಾನ್
ಮಲಯಾಳಮ್ ಲಿಪಿಚ್ಯಾ ಕೊಂಕಣಿಂತ್ ಆಯಿಲ್ಲಿ ಕಾದಂಬರಿ ಫಕತ್
ಏಕ್: ಆನಂದಿನ್ 2008 ಇಸ್ವೆಚಿ ಮುಂಬಯ್ ಥಾವ್ನ್
ಹಾಡ್ಲ್ಲಿ ’ಅಯೋಧ್ಯ’ ಕಾದಂಬರಿ ಕೊಂಕಣಿ ಅಕಾಡೆಮಿ ಗೊಂಯ್
ಹಾಣಿಂ ನಾಗರಿ ಲಿಪಿಂತ್ ಪ್ರಕಾಶಿತ್ ಕೆಲ್ಲಿ ಮಾಹೆತ್
ದಿಲಿ. ಶೈಲೇಂದ್ರ ಮೆಹ್ತಾನ್ ನಾಗರಿ ಲಿಪಿಚ್ಯಾ ಕೊಂಕಣಿ
ಕಾದಂಬರೆಂಚೆರ್ ಉಲವ್ನ್ "ಜಾಗತಿಕ್ ವಾ ಸಮಕಾಳಿನ್ ಹೆರ್
ಭಾಸೆಂನಿ ಪರ್ಗಟ್ ಜಾಂವ್ಚ್ಯಾ ಕಾದಂಬರಿಂಕ್ ವಾಚ್ತಾನಾ,
ಕೊಂಕಣಿ ಕಾದಂಬರಿ ಖೂಬ್ ಪಾಟಿಂ ಆಸಾತ್ ಅಶೆಂ ಭಗ್ತಾ"
ಮ್ಹಣಾಲೊ. ವಿನ್ಸಿ ಕ್ವಾಡ್ರಸ್ ಆನಿ ವಿಲ್ಲಿ ಗೋಯೆಸ್
ಹಾಣಿಂ ರೋಮಿ ಲಿಪಿಂತ್ಲ್ಯೊ ಕಾದಂಬರಿಂಚೆರ್ ಉಲವ್ಪ್ ಕರುನ್
ಮ್ಹಣಾಲೆ "ಪುಸ್ತಕಾರುಪಾಚೆರ್ ಆಜ್ ಆಮ್ಕಾಂ 1911
ಇಸ್ವೆಂತ್ ಪಯ್ಲಿ ಕಾದಂಬರಿ ವಾಚುಂಕ್ ಮೆಳ್ತಾ ಪುಣ್ ರೋಮಿ
ಲಿಪಿಂತ್ ಕಾದಂಬರಿ ಹಾಚ್ಯಾಕೀ ಪಯ್ಲೆಂಚ್ ಬರಯ್ಲ್ಯಾತ್
ಪುಣ್ ಜೊಕ್ತೆ ದಾಕ್ಲೆ ನಾಸ್ತಾನಾ ತೊ ಇತಿಹಾಸ್ ಫಕತ್
ಇತಿಹಾಸ್ ಜಾವ್ನ್ ಉರ್ಲಾ".
ಡೊ.ಚಂದ್ರಲೇಖ ಡಿಸೋಜಾನ್ ಅಪ್ಲ್ಯಾ ಉಲವ್ಪಾಂತ್ "ಆಮಿ
ಸಮಗ್ರ್ ಕೊಂಕಣಿ ಸಾಹಿತ್ಯಾಚಿ ಜಾಣ್ವಾಯ್ ಜೊಡ್ಚಿ ತರ್ ಆಮಿ
ಲಿಪಿಚೆ ದೊರೆ ಉತ್ರೊಂಕ್ ಜಾಯ್, ಆಮ್ಚೆ ಭಂವಾರಿಂ ಕಿತೆಂ
ಜಾತಾ, ಹೆರ್ ಲಿಪಿಂನಿ, ಹೆರ್ ಭಾಸೆಂನಿ ಕಸಲೆಂ ಸಾಹಿತ್ಯ್
ಪರ್ಗಟೊನ್ ಯೆತಾ ಮ್ಹಳ್ಳೆಂ ಜಾಣಾಂ ಜಾಂವ್ಕ್ ಜಾಯ್"
ಮ್ಹಣಾಲಿ.
ಡೊ.ಎಡ್ವರ್ಡ್ ಎಲ್. ನಜ್ರೆತ್ ಅಪ್ಲ್ಯಾ ಉಲವ್ಪಾಂತ್
ಮ್ಹಣಾಲೊ "ಸಮಗ್ರ್ ಕೊಂಕಣಿ ಕಾದಂಬರಿ ವಾ ಸಾಹಿತ್ಯಾಚೆಂ
ಅಧ್ಯಯನ್ ಕರ್ತಾನಾ ಆಮಿ ಫಕತ್ ಲಿಪಿ ಮಾತ್ರ್ ನ್ಹಯ್,
ಬೊಲಿಂಕ್ ಸಯ್ತ್ ಸಮ್ಜೊಂಕ್ ಏಕ್ ವಾಟ್ ಕರುನ್ ದಿತಾ.
ಸಮಗ್ರ್ ಕೊಂಕಣಿ ಕಾದಂಬರಿಂಚೆರ್ ಎಕಾಮೆಕಾ ಸಮ್ಜೊಂಕ್
ಆಶಾವಾದಿ ಪ್ರಕಾಶನಾನ್ ಆಮ್ಕಾಂ ಎಕಾಮೆಕಾ ಒಳೊಕ್ ಕರುನ್
ದಿಂವ್ಚೆಂ ಕಾಮ್ ಕೆಲಾಂ. ಹೆಂ ವೆಬಿನಾರ್ ಏಕ್ ಸುರ್ವಾತ್
ಮಾತ್ರ್, ಫುಡೆಂ ಅಸಲಿಂಚ್ ವೆಬಿನಾರಾಂ ಜಾಂವ್ಚಿ ಗರ್ಜ್
ಆಸಾ".
ಕಾಣಿಕ್ ನೆಮಾಳ್ಯಾಚೊ ಆಧ್ಲೊ ಸಂಪಾದಕ್ ಆವಿಲ್
ರಸ್ಕೀನ್ಹಾನ್ "ಕನ್ನಡ ಲಿಪಿಚ್ಯಾ ಕೊಂಕಣಿ ಕಾದಂಬರಿ
ಶೆತಾಂತ್ ವಾವ್ರ್ ಕೆಲ್ಲ್ಯಾಂಚೊ ಉಲ್ಲೇಕ್ ಕರುನ್,
ಕೊಂಕಣಿಂತ್ ಸಯ್ತ್ ಉತ್ತೀಮ್ ಕಾದಂಬರಿ ಆಸಾತ್ ಆನಿ ಹ್ಯಾ
ಕಾದಂಬರಿಂಚೆರ್ ಅಧ್ಯಯನ್ ಜಾಲೆಂ ತರ್ ಕಳ್ತಾ" ಮ್ಹಣಾಲೊ.
ಡೊ.ಚಾರ್ಲ್ಸ್ ಲೋಬೊ ಅಪ್ಲ್ಯಾ ಉಲವ್ಪಾಂತ್ "ಕೊಂಕಣಿ
ಕಾದಂಬರಿಂಕ್, ಹೆರ್ ಸಮಕಾಳೀನ್ ಕಾದಂಬರಿಂಸವೆಂ
ತುಲನಾತ್ಮಕ್ ಕೆಲೆಂ ತರ್ ಕೊಂಕಣಿ ಕಾದಂಬರಿ ಹೆರ್
ಭಾಸೆಂತ್ಲ್ಯಾ ಕಾದಂಬರೆಂ ಸಮೊರ್ ಖಂಚ್ಯಾ ಪಾಂವ್ಡಾರ್
ಆಸಾತ್ ಮ್ಹಳ್ಳೆಂ ಗಮ್ತಾ" ಮ್ಹಣಾಲೊ.
ವಲ್ಲಿ ಕ್ವಾಡ್ರಸಾನ್ ಧಿನ್ವಾಸ್ ಉಲವ್ಪಾಂತ್
"ನೆಮಾಳ್ಯಾಂಚೆ ಸಂಪಾದಕ್ ಕಾದಂಬರಿ ಬರವ್ಪಿ ಆಸ್ಚೊ ಕಾಳ್
ಚಡುಣೆಂ ಸಂಪ್ಲಾ. ಕೊಂಕಣಿ ಕಾದಂಬರಿಚಿ ಗರ್ಜ್ ಆನಿ ಮಹತ್ವ್
ಸಮ್ಜೊಂಚ್ಯಾ ನದ್ರೆನ್ ಹೆಂ ಮಹತ್ವಾಚೆಂ. ಅಶೆಂ ಆಸ್ತಾಂ
ಕೊಂಕಣಿ ಕಾದಂಬರಿಂಚೊ ಫುಡಾರ್ ಏಕ್ ಸವಾಲ್ ಜಾವ್ನ್ ಮಾತ್ರ್
ಉಭೆಂ ಜಾತಾ" ಮ್ಹಣಾಲೊ.
ಲಾರೆನ್ಸ್ ವಿ.
ಬರ್ಬೋಜಾನ್ ಹ್ಯಾ ವೆಬಿನಾರಾಚೆಂ ಸೂತ್ರ್ ಸಂಚಾಲನ್ ಕೆಲೆಂ.
| 
