ಕಾಲ್ಪನಿಕ್ ಕಥೆಕ್ ಮೇರ್ (ಸೀಮಾ) ಆಸಾ ತರ್ ತಿ ಕಸ್ಲಿ ಆನಿ ತಿ ಥಿರಾಂವ್ಚಿ ಕೊಣೆಂ?. ಕಥಾ ಏಕ್ ಕ್ರಿಯಾತ್ಮಕ್ ರಚನ್ ಜಾಲ್ಲ್ಯಾನ್ ಕಾಲ್ಪನಿಕತೆಕ್ ಹಾತೆರ್ ಕರುನ್ ಕಥಾಕಾರ್ ಅಪ್ಲಿಂ ಚಿಂತ್ನಾಂ ವ್ಹಾಳಯ್ತಾ ಆನಿ ವಾಚ್ಪ್ಯಾಚ್ಯಾ ಮತಿಂತ್, ತಿ ಕಥಾ ವಾಚುನ್ ಗೆಲ್ಲೆಪರಿಂಚ್ ಚಿಂತ್ನಾಂಚೆಂ ಭಿಂ ವೊಂಪುನ್ ವೆತಾ. ಹಾಂಗಾಸರ್ ಸ್ವಾಭಾವಿಕ್/ಅಸ್ವಾಭಾವಿಕ್ ಮ್ಹಳ್ಳೆಂ ತ್ಯಾ ತ್ಯಾ ವಾಚ್ಪ್ಯಾಚ್ಯಾ ಮನೋಗತೆಚೆರ್ ಹೊಂದ್ವೊನ್ ಆಸ್ತಾ. ಹಾಂಗಾಸರ್ ಸಯ್ತ್ ಏಕ್ ಕಾಳ್ಜಾಕ್ ಕಡಂವ್ಚಿ ಕಥಾ ಆಸಾ, ಆನಿ ಹಿ ಕಥಾ ವಾಚುಂಕ್ ತಸಲೆಂಚ್ ಸಂವೇದನ್ ಸಮ್ಜುಂಚೆ ವಾಚ್ಪಿ ಖರೆಂಚ್ ಜಾವ್ನ್ ಹ್ಯಾ ಕಥೆಕ್ ಸಮ್ಜುಂಕ್ ಸಕ್ತಾತ್.

’ನವಿ ದಿಶಾ’ ಹಿಚೊ ಪಯ್ಲೊ ಕಥಾಜಮೊ. ಕೊಂಕಣಿಂತ್ ಆಸ್ಚ್ಯಾ ಭೋವ್ ಥೊಡ್ಯಾ ಸ್ತ್ರೀವಾದಿ ಕಥಾಕಾರಾಂಚ್ಯಾ ಮೆಳಿಂತ್ ಹಿ ಎಕ್ಲಿ. ಹಿಚ್ಯಾ ಬರ್ಪಾಂನಿ ಪ್ರತ್ಯೇಕ್ ಜಾವ್ನ್ ಕಥೆಂನಿ ಸ್ತ್ರೀ ಸಂವೇದನಾಂ, ಮನ್ಶಾ ಭಾಂದ್, ಆನಿ ನಾತಿಂ (ಸಂಬಂಧ್) ಸಂಘರ್ಶ್ ಆನಿ ಮೌಲ್ಯಾಂ ಪಾರ್ಕುಂಕ್ ಮೆಳ್ಚಿಂ ಪ್ರಮುಕ್ ಜಾವ್ನಾಸಾತ್. ನವಿ ದಿಶಾ ಪುಸ್ತಕಾಚೆಂ ಸಂಪಾದನ್ ತಶೆಂಚ್ ಪ್ರಸ್ತಾವನ್ ಬರಯ್ಲಾಂ ವಲ್ಲಿ ಕ್ವಾಡ್ರಸಾನ್ ಅಪ್ಲ್ಯಾ ಆಶಾವಾದಿ ಪ್ರಕಾಶನ್ ಮುಖಾಂತ್ರ್ ಹೆಂ ಪುಸ್ತಕ್ ಪ್ರಕಾಶಿತ್ ಕೆಲಾಂ. ಥೊಡ್ಯೊ ಕಥಾ ಕನ್ನಡ್, ಎಂಗ್ಲಿಸ್ ತಶೆಂಚ್ ಹಿಂದಿ ಭಾಸೆಂನಿ ತರ್ಜಣ್ ಜಾಲ್ಯಾತ್. ನವಿ ದಿಶಾ ನಾಂವಾಚಿ ಕಥಾ ರಾಶ್ಟ್ರೀಯ್ ಮಟ್ಟಾಚ್ಯಾ ಕೊಂಕಣಿ ಕಥೆಂಚ್ಯಾ ’ಸುರ್ಯೊ ಉದೆಲಾ’ ನಾಂವಾಚ್ಯಾ ಪುಸ್ತಕಾಂತ್ ಡಿಜಿಟಲ್ ಆಡಿಯೊ ಪುಸ್ತಕಾರುಪಾರ್ ಪ್ರಚಾರಿತ್ ಜಾಲ್ಯಾ.

- ಸಂ

[ಮಟ್ವಿ ಕಥಾ]: ನವಿ ದಿಶಾ [- ಮೊನಿಕ ಮತಾಯಸ್ ಡಬ್ಲಿನ್]

“ರೊಬಿ, ಅಶೆಂ ಕಿತ್ಯಾಕ್ ಕೆಲೆಂಯ್? ಜೀವ್ಘಾತ್ ಕರ್ಚ್ಯಾ ತಿತ್ಲೊ ಭಿಂವ್ಕುರೊ ತುಂ ಕಸೊ ಜಾಲೊಯ್ ರೊಬಿ? ಜರ್ ತುಕಾ ಕಿತೆಂಯ್ ಜಾಲ್ಲೆಂ ತರ್?” ಅಮ್ಸೊರಾನ್ ದಾಂವೊನ್ ಆಯಿಲ್ಲೆಂ ಸೊನಿಯಾ ರೊಬಿನಾಚ್ಯಾ ಖಾಟಿರ್ ಕುಸ್ಕಾಲೆಂ.

“ಹಾಂವ್ ಮೆಲ್ಯಾರ್ ಮಜ್ಯಾ ಪಾಟ್ಲ್ಯಾನ್ ರಡ್ಚಿಂ ಕೊಣೀ ನಾಂತ್”
ರೊಬಿನಾನ್ ತಕ್ಲಿ ಪಂದಾ ಘಾಲಿ.

“ಕಿತ್ಯಾಕ್ ರೊಬಿ ತುಂ ಮಕಾ ಅಪ್ಲೆಂ ಮುಣ್ ಲೆಖಿನಾಂಯ್ಗಿ?”

ಸೊನಿಚೊ ತಾಳೊ ರಡ್ಕುರೊ ಜಾಲೊ.

“ಸೊನಿ, ಹಾಂವ್ ತುಜೊ ಲೆಕ್ಚರರ್. ತುಂ ಮಕಾ ರೊಬಿ, ರೊಬಿ ಮುಣ್ ಆಪಂವ್ಚೆಂ ಬಂದ್ ಕರ್. ತುಂ ಎಕ್ ಬ್ರಿಲಿಯೆಂಟ್ ಸ್ಟುಡೆಂಟ್, ಕೊಣಾ ಕೊಣಾ ಪಾಟ್ಲ್ಯಾನ್ ತುಜೊ ಮೊಲಾದಿಕ್ ವೆಳ್ ಪಾಡ್ ಕರಿನಾಕ.” ರೊಬಿನಾನ್ ಹಳ್ತಾರ್ ಆಸ್ ಲ್ಲೆ ಕಡೆಚ್ಚ್ ನೀಟ್ ಬಸ್ಲೊ.

“ತುಂ ಕಿತೆಂಯ್ ಸಾಂಗ್ ರೊಬಿ ಹಾಂವೆ ಫಕತ್ತ್ ತುಜೊಚ್ಚ್ ಮೊಗ್ ಕೆಲ್ಲೊ, ತುಜೊಚ್ಚ್ ಮೊಗ್ ಕರ್ತಾಂ ಅನಿಂ ಮುಖಾರಿ ತುಜೊಚ್ಚ್ ಮೊಗ್ ಕರ್ತಾಲಿಂ. ತುಜ್ಯಾ ಕಾಳ್ಜಾಂತ್ ಮಕಾ ಜಾಗೊ ನಾತ್ಲ್ಯಾರಿ ಪರ್ವಾ ನಾಂ, ಹಾಂವ್ ಮಾತ್ರ್ ತುಕಾ ಕೆದಿಂಚ್ಚ್ ವಿಸರ್ಚಿಂ ನಾಂ” ಸೊನಿ ದಯ್ರಾದಿಕ್ ತಾಳ್ಯಾನ್ ಉಲವ್ನ್ಂಚ್ಚ್ ವೆತಾಲೆಂ.

“ಮೊಗ್, ಮೊಗ್, ಮೊಗ್. ‘ಮೊಗ್’ ಮುಳ್ಳ್ಯಾ ಸಬ್ದಾಕ್ ಆರ್ಥ್ ದೀಂವ್ಕ್ ತುಂ ಜಾಣಾಂಯ್ಗಿ? ಆಜ್ ಮಜೆಂ ತರ್ನಾಟ್ಪಣ್, ಮಜಿ ಸೊಭಾಯ್ ಪಳೆವ್ನ್ ತುಂ ಮಜೊ ಮೊಗ್ ಕರ್ತಾಯ್. ಪೂಣ್ ಪಾಲ್ಯಾಂ ಗ್ರೆಸ್ತಾಂಚೊ ಪಿಲೊ ತುಕಾ ಭೆಟಾತ್ ತರ್ ಮಜ್ಯಾ ಮೊಗಾಕ್ ತುಂ ವಿಸ್ರಾತೆಲೆಂಯ್. ಎಕ್ ಪಾವ್ಟಿಂ ಫೊಂಡಾಂತ್ ಪಡ್ಲಾಂ ಪರತ್ ಪಡೊಕ್ ಮಕಾ ಖುಶಿ ನಾಂ” ರೊಬಿ ಮಾತ್ಸೊ ಶಿಣ್ಲೊ.

“ರೊಬಿ, ಕಿತ್ಯಾಕ್ ಚಲಿಯಾಂಕ್ ತುಂ ಇತ್ಲ್ಯಾ ಕೀಳ್ ನದ್ರೆನ್ ಪಳೆತಾಯ್?” ಸೊನಿ ಥಂಯ್ಚೆ ಹಾಲ್ಲೆಂ ನಾಂ.

“ತುಜ್ಯಾ ಹರ್ಯೆಕಾ ಸವಾಲಾಕ್ ಹೊ ಎಕ್ ಲಾನ್ಸೊ ಕಾಗ್ದಾ ಕುಡ್ಕೊ ಜಾಪ್ ದಿತಾಲೊ ಸೊನಿ.” ಅಪ್ಲ್ಯಾ ಖಾಟಿಚ್ಯಾ ದೆಗೆನ್ ಆಸ್ಲ್ಯಾ ಲೊಕರಾ ಥಾವ್ನ್ ಅಪ್ಲಿ ಪರ್ಸ್ ಕಾಡ್ನ್ ಎಕ್ ಲಾನ್ ಕಾಗ್ದಾ ಕುಡ್ಕೊ ಸೊನಿಚ್ಯಾ ಹಾತಾಂತ್ ಚೆಪ್ಲೊ ರೊಬಿನ್.

ಗುಲೊಬಿ ವರ್ಣಾಚೊ ತೊ ಕಾಗ್ದಾ ಕುಡ್ಕೊ ಮುದೊ ಮುದೊ ಜಾಲ್ಲೊ ತರಿ ಸಾಂಭಾಳ್ನ್ ದವರ್ ಲ್ಲ್ಯಾ ಬರಿಂ ದಿಸ್ತಾಲೊ. ಸೊನಿನ್ ಹಳ್ತಾರ್ ತೊ ಸೊಡಾಯ್ಲೊ ಅನಿಂ ಅಪ್ಲಿ ನದರ್ ತಾಚೆರ್ ಭೊಂವ್ಡಾಯ್ಲಿ.

“ಮೊಗಾಚ್ಯಾ ರೊಬಿ,

ಜಾಂವ್ಕ್ ಪುರೊ ಹೆಂ ಮಜೆಂ ಆಖೆರಿಚೆಂ ಕಾಗಾದ್. ಕಿತ್ಯಾಕ್ ಮುಳ್ಳ್ಯಾರ್ ಹ್ಯಾಚ್ಚ್ ಮಹಿನ್ಯಾಚ ಆಟ್ ತಾರಿಕೆರ್ ಹಾಂವೆ ಗ್ಲ್ಯಾಡ್ಸನಾ ಕಡೆ ಲಗ್ನಾ-ಭೆಸಾಂತ್ ಎಕ್ವಟ್ಚೊ ನಿರ್ದಾರ್ ಕೆಲಾ. ತೊ ಅಮೆರಿಕಾಂತ್ ವಡ್ಲೊ ಸರ್ಜನ್ ಜಾವ್ನಾಸಾ. ಹೆಂ ಆಯ್ಕೊನ್ ಖಂಡಿತ್ ಜಾವ್ನ್ ತುಕಾ ದೂಖ್ ಬೊಗ್ತಾಲೆಂ. ಹಾಂವೆ ತುಜೊ ಮೊಗ್ ಕೆಲ್ಲೊ ವಯ್ ಪೂಣ್, ರೊಬಿ ಹಾಂವ್ ಮಸ್ತ್ ಚಿಂತ್ಲ್ಯಾ ಉಪ್ರಾಂತ್ ಹ್ಯಾ ನಿರ್ದಾರಾಕ್ ಆಯ್ಲ್ಯಾಂ. ದಯಾಕರ್ನ್ ಮಕಾ ಭೊಗ್ಶಿ.

ತುಜೆಂ ಜಾವ್ನಾಸ್'ಲ್ಲೆಂ,
ಮೆಬಲ್.”

ಕಾಗಾದ್ ವಾಚುನ್ ಅಪ್ಲಿ ಗೊಮ್ಟಿ ಉಕುಲ್ನ್ ರೊಬಿಕ್ ಚೊಯ್ಲೆಂ ಸೊನಿನ್. ತೊ ಅಪ್ಣಾಚೆರ್ ಕಿತೆಂಚ್ಚ್ ಪ್ರಭಾವ್ ಪಡೊಕ್ ನಾಂ ಮುಳ್ಳ್ಯಾ ಬರಿಂ ದಿಸಾಳ್ಯಾ ಪತ್ರಾಚೆರ್ ಮಗ್ನ್ ಆಸ್'ಲ್ಲೊ.

“ರೊಬಿ” ಸೊನಿಚ್ಯಾ ತಾಳ್ಯಾಕ್ ದಿಸಾಳೆಂ ಪತ್ರ್ ತಾಣೆಂ ದೊಡ್ಲೆಂ. ಅನಿಂ ಸೊನಿಚ್ಯಾ ಹಾತಾಂತ್ಲೆಂ ಪತ್ರ್ ಘೆತ್ಲೆಂ. ಸೊನಿಕ್ ಉತ್ರಾಂಚ್ ಬಾಯ್ರ್ ಸರ್ಲಿಂ ನಾಂತ್.
“ತುಜ್ಯಾ ಸವಾಲಾಕ್ ತುಕಾ ಜಾಪ್ ಲಾಗ್ಲಿ ಮುಣ್ ಚಿಂತ್ತಾ. ಹಾಂವ್ ಎಕ್ ಸಂಪ್ ಲ್ಲಿ ಕಾಣಿ ಸೊನಿ. ಮಜ್ಯಾ ಜಿವಿತಾಚೆ ಸರ್ವ್ ಆವಸ್ವರ್ ಮುಗ್ದಾಲ್ಯಾತ್ ಅನಿಂ ಫಕತ್ತ್ ಸಮಾಪ್ತ್ ಮುಣ್ ಪಡೊಂಕ್ ಬಾಕಿ ಆಸಾ. ತಾಚ್ಯಾ ಪಯ್ಲೆಂಚ್ ತುಂ ನವೊ ಆವಸ್ವರ್ ಸುರು ಕರಿನಾಕಾ. ತಾಚ್ಯಾ ಬದ್ಲಾಕ್ ತುಜಿಚ್ ಎಕ್ ನವಿ ಕಾಣಿಂ ತುಂ ಸುರು ಕರ್ ಅನಿಂ ಖಂಡಿತ್ ತುಕಾ ಯಶಸ್ವಿ ಲಾಬ್ಲೆಲಿ.”

ರೊಬಿಚೊ ತಾಳೊ ಹಳ್ತಾರ್ ಕಾಂಪೊಂಕ್ ಲಾಗ್ಲೊ.

“ಎಕ್ಸ್ ಕ್ಯುಜ್ ಮಿ ಮೆಡಂ ತಾಕ ವಿರಾಮಾಚಿ ಗರ್ಜ್ ಆಸಾ. ಪ್ಲಿಜ್ ತುಮಿಂ ಬಾಯ್ರ್ ವೆತಾತ್ ಗಿ?” ನರ್ಸಾಚ್ಯಾ ಮೊವಾಳ್ ವಿನತೆಕ್ ಸೊನಿ ಬೆಡ್ಡಾ ವಯ್ಲೆಂ ಉಟೊನ್ ಉಬೆಂ ಜಾಲೆಂ.

“ರೊಬಿ, ಹಾಂವ್ ಚಲ್ತಾಂ. ಪೂಣ್ ತುಜ್ಯಾ ಜಿವಿತಾ ಥಾವ್ನ್ ನಂಯ್. ತುಜಿ ಕಾಣಿಂ ಇತ್ಲ್ಯಾರ್ ಚ್ಚ್ ಸಂಪಂವ್ಕ್ ಹಾಂವ್ ಸೊಡ್ಚಿಂ ನಾಂ. ಹಾಂವ್ ತುಕಾ ಭಾಸ್ ದಿತಾಂ ತುಜ್ಯಾ ಜಿವಿತಾಕ್ ಎಕ್ ‘ನವಿ ದಿಶಾ’ ಹಾಂವ್ ಲಾಬಯ್ತೆಲಿಂ. ಒ ಕೆ ದೆನ್ ಸಿ ಯು ಟುಮಾರೊ.” ಸೊನಿ ಚಲ್ತಚ್ಚ್ ರಾವ್ಲೆಂ.

***

ದೀಸ್, ಹಪ್ತೆ, ಮಹಿನೆಂ ಪಾಶಾರ್ ಜಾಲೆ. ಹ್ಯಾ ಆವ್ದೆಂತ್ ಸೊನಿನ್ ರೊಬಿಚ್ಯಾ ಕಾಳ್ಜಾಂಂತ್ ಜಾಗೊ ಆಪ್ಣಾಯಿಲ್ಲೊ. ಸೊನಿಚ್ಯಾ ನಿರಂತರ್ ಪ್ರಯತ್ನಾನ್ ರೊಬಿಚ್ಯಾ ಕಾಳ್ಜಾಂತ್ ಖಂಚ್ ಲ್ಲೆಂ ಮೆಬಲಾಚೆಂ ರುಪ್ಣೆಂ ಹಳ್ತಾರ್ ಮಾಜ್ವೊನ್ ಯೆತಾಲೆಂ. ಸೊನಿ ಹ್ಯಾ ದಿಸಾಂನಿಂ ಬೊವ್ ಚ್ಚ್ ಸಂತೊಸ್ಬರಿತ್ ದಿಸ್ತಾಲೆಂ. ತಾಣೆಂ ಚಿಂತ್ ಲ್ಲಿಂ ಸ್ವಪ್ಣಾಂ ನೀಜ್ ಜಾಂವ್ಚೊ ವೆಳ್ ಲಾಗಿಂ ಪಾವ್ ಲ್ಲೊ. ಪೂಣ್ ವಿಧಿಕ್ ದುಸ್ರೆಂಚ್ಚ್ ಪಸಂದ್ ಆಸ್ ಲ್ಲೆಂ. ಮೆಬಲ್ ವಯ್ ತೆಂಚ್ಚ್ ತೆಂ ರೊಬಿಚ್ಯಾ ಕಾಳ್ಜಾಚಿ ರಾಣಿ ಮೆಬಲ್ ಪಾಟಿಂ ಅಯಿಲ್ಲೆಂ ರೊಬಿ ಸರ್ಶಿಂ ಆಸ್ರೊ ಸೊದುನ್.

***

“ರೊಬಿ, ಹಾಂವ್ ತುಜ್ಯಾ ಖರ್ರ್ಯಾ ಮೊಗಾಕ್ ಸಮ್ಜೊಂಕ್ ಸಕ್ಲಿಂ ನಾಂ. ಹಾಂವೆಂ ಮೊಗಾಚೆಂ ಮೋಲ್ ಬಾಂದ್ಲೆಂ ಅನಿಂ ಪಯ್ಶೆಚ್ಚ್ ಸರ್ವಸ್ವ್ ಮುಣ್ ಚಿಂತ್ಲೆಂ. ಕಾಜಾರಾಚ್ಯಾ ಸುರ್ವೆರ್ ಗ್ಲ್ಯಾಡಿ ಮಜೊ ಮಸ್ತ್ ಮೊಗ್ ಕರ್ತಾಲೊ. ಹ್ಯಾ ಸಂಸಾರಾಂತ್ ಮಜೆ ತಿತ್ಲೆಂ ಅದ್ರಶ್ಟ್ ವಂತ್ ಕೊಣೀ ನಾಂ ಮುಣ್ ಸಂತೊಸಾನ್ ನಾಚ್ತಾಲಿಂ. ಮಜೊ ಸಂತೊಸ್ ಚಡ್ ತೆಂಪ್ ಬಾಳ್ವಾಲೊನಾಂ. ಲ್ಯಾಬಾಂತ್ ಕಾಮಾರ್ ಅಸ್ತಾನಾಂ ಜಾಲ್ಯಾ ಕೆಮಿಕಲ್ ಎಕ್ಸ್ ಪ್ಲೊಶನಾಂತ್ ಹಾಂವೆ ಮಜೆ ದೊಳೆ ಹೊಗ್ಡಾಯ್ಜಯ್ ಪಡ್ಲೆ. ಥೊಡೊ ತೇಂಪ್ ಮಜಿ ಚಾಕ್ರಿ ಕರ್ನ್ ಥಕ್ ಲ್ಲೊ ಮಜೊ ನೊವ್ರೊ ಅಪ್ಲ್ಯಾ ಕುಡ್ಡ್ಯಾ ಬಾಯ್ಲೆಕ್ ಸಾಂಡುನ್ ದುಸ್ರ್ಯಾ ಚಲಿಯೆಚ್ಯಾ ಪಾಲ್ವಾ ಬಿತರ್ ರಿಗ್ಲೊ. ಹಾಂವೆ ತಾಕಾ ಆಡಾಯ್ಲೆಂ ನಾಂ. ಮಜೆ ಖಾತಿರ್ ತಾಣೆಂ ಅಪ್ಲಿ ಜಿಣಿ ವಿಬಾಡ್ಚಿ ನಾಕಾ ಮುಣ್ ‘ಮಕಾ ಮಜ್ಯಾ ಮಾಂಯ್ ಗಾಂವಾಕ್ ಪಾವಯ್ ಉಪ್ರಾಂತ್ ಹಾಂವ್ ತುಜ್ಯಾ ವಾಟೆಕ್ ಆಡ್ ಯೆಂವ್ಚಿಂ ನಾಂ’ ಮುಣ್ ಭಾಸ್ ದಿಲ್ಲ್ಯಾನ್ ತೊ ಮಕಾ ಮಜ್ಯಾ ಮಾಂಯ್ ಗಾಂವಾಕ್ ಪಾವ್ನ್ ಪರತ್ ಪಾಟಿಂ ಅಮೆರಿಕಾ ಉಬ್ಲೊ.

ತುಜೊ ಉಗ್ಡಾಸ್ ಮಕಾ ಸದಾಂಚ್ಚ್ ದೊಸ್ತಾಲೊ ರೊಬಿ. ಮಜಿ ಪರಿಸ್ಥಿತಿ ಪಳೆಂವ್ಕ್ ತಾಂಕಾನಾಸ್ತಾಂ ಮಜ್ಯಾ ಡ್ಯಾಡಿನ್ ತುಕಾ ಸೊದುನ್ ಮಜೆಲಾಗಿಂ ಆಪವ್ನ್ ಹಾಡ್ಲೊ. ರೊಬಿ, ಮಕಾ ಕೊಣಾಯ್ಚಿಯ್ ಜಿಣಿ ವಿಭಾಡ್ಚೆಂ ಹಕ್ಕ್ ನಾಂ. ತುಜ್ಯಾ ಮೊಗಾಕ್ ಹಾಂವೆ ತಿರಸ್ಕಾರ್ ಕರ್ನ್ ತುಕಾ ಹಾಂವೆ ಧಖೊ ದಿಲಾ. ತುಜ್ಯಾ ಕಡೆ ಬೊಗ್ಸಾಣೆಂ ಮಾಗೊಂಕಿ ಹಾಂವ್ ಫಾವೊ ನಂಯ್. ರೊಬಿ, ಯೆದೊಳ್ ಚ್ಚ್ ತುವೆಂ ಮಕಾ ವಿಸರ್ನ್ ಎಕ್ ನವಿ ಜಿಣಿ ಸುರು ಕೆಲ್ಯಾಯ್ ಮುಣ್ ಚಿಂತ್ತಾ. ತೆಂ ಕೊಣೀ ಅಸ್ಲ್ಯಾರೀ ನಿಜಾಯ್ಕಿ ನಶೀಬ್ ವಂತ್ ರೊಬಿ. ಮಕಾ ತೆಂ ನಶೀಬ್ ಹ್ಯಾ ಜಲ್ಮಾಂತ್ ಫಾವೊ ಜಾಲೆಂ ನಾಂ” ಮೆಬಲ್ ಅಪ್ಲೆಂ ಮುಖಮಳ್ ಅಪ್ಲ್ಯಾ ಹಾತಾಂನಿಂ ಲಿಪವ್ನ್ ಹುಸ್ಕಾರ್ನ್ ಹುಸ್ಕಾರ್ನ್ ರಡ್ಲೆಂ.
ರೊಬಿನ್ ಹಳ್ತಾರ್ ಮೆಬಲಾಚ್ಯಾ ಮುಖಮಳಾ ವಯ್ಲೆ ಹಾತ್ ವೊಂದ್ವಾವ್ನ್ ತಾಚಿಂ ದುಖಾಂ ಪುಸ್ಲಿಂ. “ಹಾಂವೆ ತುಕಾ ಭೊಗ್ಶಿಲಾಂ ಮೆಬಲ್” ಅಪ್ಲ್ಯಾ ವೆಂಗೆಂತ್ ಆರಾಯ್ಲೆಂ ರೊಬಿನ್ ಮೆಬಲಾಕ್.

***

“ರೊಬಿ, ತುಂ ಪರತ್ತ್ ಮೆಬಲಾಕ್ ಆಪ್ಣಾಯ್ತೊಲೊಯ್ಗಿ?” ರೊಬಿ ಎಕ್ಸುರೊ ಆಸ್ ಲ್ಲೊ ಪಳೆವ್ನ್ ಹೊಚ್ಚ್ ಆಯಿನ್ನ್ ವೇಳ್ ಮುಣ್ ಚಿಂತುನ್ ಹಳ್ತಾರ್ ಉತ್ರಾಂ ವಿಂಚ್ಲಿಂ ಸೊನಿನ್.

“ಕಿತ್ಯಾಕ್ ಸೊನಿ ದುಬಾವ್ ಗಿ? ಮಕಾಚ್ಚ್ ಪಾತ್ಯೆವ್ನ್ ತೆಂ ಪಾಟಿಂ ಆಯ್ಲಾಂ. ಸಗ್ಳ್ಯಾಂನಿಂ ಹಾತ್ ಸೊಡ್ ಲ್ಲ್ಯಾ ಹ್ಯಾ ವೆಳಾ ಹಾಂವೆಯ್ ತಾಚೊ ಹಾತ್ ಸೊಡ್ಲ್ಯಾರ್ ದೇವ್ ಮಕಾ ಭೊಗ್ಶಿತ್ ಗಿ? ಸೊನಿ, ಸುಕೊನ್ ವೆಚ್ಯಾ ಝಡಾಕ್ ಹಾಂವೆ ಉದಾಕ್ ವೊತುಂಕ್ ಚ್ಚ್ ನಜೊ ಆಸ್ ಲ್ಲೆಂ ಪೂಣ್ ಹಾಂವ್ ತಾಂತು ಆಂಕ್ರಿ ಪಳೆಂವ್ಕ್ ಆಶೆಲೊಂ. ಅನಿಂ ಆಜ್...” ರೊಬಿ ಬೆಜಾರಾಯೆನ್ ಉಲಯ್ಲೊ.

“ತುಜ್ಯಾ ಉತ್ರಾಂಚೊ ಮತ್ಲಬ್ ಕಿತೆಂ ರೊಬಿ” ಸೊನಿಚ್ಯಾ ಕಪಾಲಾರ್ ಮಿರಿಯೊ ಪಡ್ಲ್ಯೊ. ಹಾಂವೆ ಜರ್ ತುಜ್ಯಾ ಮೊಗಾಕ್ ಪಾಟಿಂ ಮೊಗ್ ದೀಂವ್ಕ್ ನಾತ್ ಲ್ಲೊ ತರ್ ತುಂ ಆಜ್ ಖಂಯ್ ಪುಣೀ ಸುಖಾನ್ ಆಸ್ತಾ ಆಸ್ ಲ್ಲೆಂಯ್. ಅಜೂನ್ ವೇಳ್ ಉತ್ರೊಂಕ್ನಾ ಸೊನಿ. ತುಜ್ಯಾ ಜಿವಿತಾಕ್ ಎಕ್ ನವೊ ಆವಸ್ವರ್ ದಿ ಅನಿಂ ಎಕಾ ಬರ್ರ್ಯಾ ಚಲ್ಯಾ ಕಡೆ ಕಾಜಾರ್ ಜಾವ್ನ್ ಸುಖಾನ್ ಜಿಯೆ ಸೊನಿ. ಹಾಂವೆ ಮೆಬಲಾಕ್ ಮಜ್ಯಾ ದೊಳ್ಯಾಂನಿಂ ಸಂಸಾರ್ ದಾಕಂವ್ಚೊ ನಿರ್ದಾರ್ ಕೆಲಾ. ಮೆಬಲ್ ಮಕಾ ರಾಕ್ತಾಸ್ತಲೆಂ ಹಾಂವ್ ಚಲ್ತಾಂ ಸೊನಿ”

ಸೊನಿಚ್ಯಾ ಜಾಪಿಕ್ ರಾಕನಾಸ್ತಾಂ ಚಲ್ತಚ್ಚ್ ರಾವ್ಲೊ ರೊಬಿ. ಅಪ್ಲ್ಯಾ ದೊಳ್ಯಾಂನಿಂ ವಾಳ್ಚ್ಯಾ ಝರಿಕ್ ಆಡಾಂವ್ಚೆಂ ನಿರ್ಫಳ್ ಪ್ರಯತ್ನ್ ಕೆಲೆಂ ನಾಂ ಸೊನಿನ್.

***

“ಗುಡ್ ಮೊರ್ನಿಂಗ್ ಮೆಬಲ್, ಹಾಂವ್ ತುಕಾ ನಾಸ್ಟೊ ಘೆವ್ನ್ ಆಯ್ಲ್ಯಾಂ” ಸೊನಿ ಮೆಬಲಾ ಲಾಗಿಂಚ್ಚ್ ಖಾಟಿರ್ ಬಸ್ಲೆಂ.
“ಸೊನಿ, ಹಾಂವ್ ನಿಜಾಯ್ಕಿ ಮಸ್ತ್ ನಶೀಬ್ ವಂತ್, ಮಜ್ಯಾ ಅಪ್ಲ್ಯಾಂನಿ ಮಜೊ ಸಾಂಗಾತ್ ಸೊಡ್ತಾನಾ ಮಕಾ ತುವೆಂ ಅನಿಂ ರೊಬಿನ್ ತುಮ್ಚೊ ಸಾಂಗಾತ್ ದಿಲೊ. ಹಾಂವ್ ತುಮ್ಚೆಂ ಹೆಂ ರುಣ್ ಕೆದಿಂಚ್ಚ್ ಫಾರಿಕ್ ಕರುಂಕ್ ಸಕ್ಚಿಂ ನಾಂ.” ಸೊನಿಚ್ಯಾ ಹಾತಾಕ್ ಸಾಸ್ಪಲೆಂ ಮೆಬಲ್. ಸೊನಿನ್ ಅಪ್ಲೊ ಹಾತ್ ಮುಖಾರ್ ಕರ್ನ್ ತಾಚ್ಯಾ ಹಾತಾಕ್ ಮೆಳಯ್ಲೊ.

“ತುಂ ನಿಜಾಯ್ಕಿ ಮಸ್ತ್ ನಶೀಬ್ ವಂತ್ ಮೆಬಲ್” ಅಪ್ಲೆಂ ದೂಖ್ ದಾಂಬುನ್ ದರ್ನ್ ನಾಸ್ಟೊ ಮೆಬಲಾಕ್ ಖಾವಯ್ಲೊ ಸೊನಿನ್. ವಾಟ್ಲಿ ಘೆವ್ನ್ ತೆಂ ಬಾತ್ ರೂಮಾ ಕುಶಿನ್ ಚಮ್ಕಾಲೆಂ. ತಿತ್ಲ್ಯಾರ್ ರೊಬಿ ಥಂಯ್ ಯೆವ್ನ್ ಪಾವ್ಲೊ.

“ಸೊರಿ ಮೆಬಲ್ ಇಲ್ಲೊ ವೇಳ್ ಜಾಲೊ. ಸೊನಿನ್ ತುಕಾ ನಾಸ್ಟೊ ದಿಲೊ ಮುಣ್ ಚಿಂತ್ತಾ” ಮೆಬಲಾಚ್ಯಾ ಕಪಾಲಾಕ್ ಉಮೊ ದಾಂಬ್ಲೊ ರೊಬಿನ್. ಹೆಂ ದ್ರಶ್ಯ್ ಪಳೆವ್ನ್ ಪರತ್ತ್ ಬಾತ್ ರೂಮಾಚೆಂ ದಾರ್ ದಾಂಪುನ್ ಘಳ್ಗಾಳ್ಯಾಂ ರಡ್ಲೆಂ ಸೊನಿ. ಕಿತ್ಲೆಂ ಆಶೆಲ್ಲೆಂ ತೆಂ ರೊಬಿಚ್ಯಾ ಎಕಾ ಉಮ್ಯಾ ಖಾತಿರ್, ತಾಚ್ಯಾ ತ್ಯಾ ಎಕಾ ಸ್ಪರ್ಶ್ಯಾ ಖಾತಿರ್ ಪೂಣ್....
ಬಾತ್ ರೂಮಾಚ್ಯಾ ಅರ್ಶ್ಯಾಂತ್ ಆಪ್ಲೆಂ ಮುಖಮಳ್ ಪಳೆವ್ನ್ ತೊಂಡ್ ದುವ್ನ್ ತೆಂ ಹಳ್ತಾರ್ ಬಾಯ್ರ್ ಆಯ್ಲೆಂ.

“ಸೊನಿ, ತುವೆಂ ಮಕಾ ಎಕ್ ಉಪ್ಕಾರ್ ಕರಿಜೆ. ಹಾಂವ್ ಎಕಾ ಹಪ್ತ್ಯಾ ಖಾತಿರ್ ಗರ್ಜೆಚ್ಯಾ ಕಾಮಾನ್ ಡೆಲ್ಲಿ ವೆತೆ ಅಸಾಂ. ಹಾಂವೆ ಯೆತಾ ಪರ್ಯಾಂತ್ ಮಜ್ಯಾ ಮೆಬಲಾಕ್ ಸಾಂಬಾಳ್ತೆಲೆಂಯ್ಮು ಸೊನಿ?”

ರೊಬಿಚ್ಯಾ ಮೊವಾಳ್ ವಿನಂತೆಕ್ ತೆಂ ಘಡ್ಯೆನ್ ಒಪ್ಪಾಲೆಂ.

***

“ಮೆಬಲ್, ಹೆಂ ಕಿತೆಂ ತುಂ ಎಕ್ಸುರೆಂಚ್ಚ್ ಅಸಾಯ್? ಸೊನಿ ಕಂಯ್ ಆಸಾ?”
ಹಪ್ತ್ಯಾ ಉಪ್ರಾಂತ್ ಪಾಟಿಂ ಆಯಿಲ್ಲೊ ರೊಬಿ ಮೆಬಲಾಕ್ ಎಕ್ಸುರ್ರ್ಯಾಕ್ ಪಳೆವ್ನ್ ಸೊನಿಚೆರ್ ರಾಗಾರ್ ಜಾಲೊ.

“ಆಯ್ಲೊಯ್ಗಿ ರೊಬಿ ಬರೆಂ ಜಾಲೆಂ. ಹಾಂವ್ ತುಜಿಚ್ಚ್ ವಾಟ್ ರಾಕ್ತಾಲಿಂ. ಸೊನಿ ಚಾರ್ – ಪಾಂಚ್ ದೀಸ್ ಥಾವ್ನ್ ಯೆಂವ್ಕ್ ನಾಂ. ತಾಣೆಂ ಅಪ್ಲಿ ಜವಾಬ್ದಾರಿ ಎಕಾ ನರ್ಸಾಕ್ ಒಪ್ಸಿತಾನಾ ಹಾಂವೆ ಆಯ್ಕಾಲೆಂ. ಹಾಂವೆ ವಿಚಾರ್ ಲ್ಲ್ಯಾಕ್ ಬಲಾಯ್ಕಿ ಬರಿ ನಾಂ ಮುಣ್ ನೀಬ್ ದೀವ್ನ್ ಚಲ್ಲೆಂ” ಮೆಬಲ್ ರೊಬಿಚೊ ಹಾತ್ ದರ್ನ್ ಉಲಯ್ತಾಲೆಂ.

“ಹಿ ದೊಳ್ಯಾಂಕ್ ಕಸಲಿ ಪಟ್ಟಿ ಬಾಂದ್ಲ್ಯಾ ಮೆಬಲ್?” ರೊಬಿ ಮಾತ್ಸೊ ಆಕಾಂತ್ಲೊ.

“ತುಕಾ ಎಕ್ ಬರಿ ಖಬರ್ ದೀಂವ್ಕ್ ರಾಕೊನ್ ಆಸ್ ಲ್ಲಿಂ ರೊಬಿ. ಕೊಣೆಂಗಿ ಎಕಾ ಪುನೆವಂತಾನ್ ಮೊರ್ಚ್ಯಾ ಪಯ್ಲೆಂ ಅಪ್ಲೆ ದೊಳೆ ಮಕಾ ದಿಲ್ಲೆ. ದೆಕುನ್ ಮಜಿ ಕಾರ್ನಿಯಲ್ ಟ್ರಾನ್ಸ್ ಪ್ಲಾಂಟೇಶನ್ ಸರ್ಜರಿ ಜಾಲಿ. ಆಜ್ ಮಜ್ಯಾ ದೊಳ್ಯಾಂಚಿ ಪಟ್ಟಿ ಕಾಡುಂಕ್. ಉಪ್ರಾಂತ್ ಹಾಂವ್ ದೆಕೊಂಕ್ ಸಕ್ತೆಲಿಂ ರೊಬಿ. ಆಜ್ ಥಾವ್ನ್ ಪರತ್ತ್ ಮೆಳ್ಚ್ಯಾ ದಿಶ್ಟಿ ಸವೆಂ ಹಾಂವ್ ಸಂಪೂರ್ಣ್ ಬದಲ್ತೆಲಿಂ. ತುಜೆ ಸಂಗಿ ಎಕ್ ನವಿ ಜಿಣಿ ಜಿಯೆಂವ್ಚೊ ನಿರ್ದಾರ್ ಹಾಂವೆ ಕೆಲಾ, ತುಜಿ ಪರ್ವಣ್ಗಿ ಆಸ್ಲ್ಯಾರ್..” ಮೆಬಲಾಚೆಂ ಮುಖಮಳ್ ಪರ್ಜಳ್ಳೆಂ.

ತಿತ್ಲ್ಯಾರ್ ಡಾ| ಸಂತೊಶ್ ಕುಡಾ ಬಿತರ್ ರಿಗ್ಲೊ.

“ಕಶೆಂ ಅಸಾಯ್ ಮೆಬಲ್? ತುಜ್ಯಾ ದೊಳ್ಯಾಂಚಿ ಪಟ್ಟಿ ಸುಟಂವ್ಕ್ ಅಸಾ. ಪಯ್ಲ್ಯಾನ್ ಪಯ್ಲೆಂ ತುಂ ಕೊಣಾಕ್ ಪಳೆಂವ್ಕ್ ಆಶೆತಾಯ್?” ಡಾ| ಸಂತೊಶ್ ಮೆಬಲಾಕ್ ತಪಾಸ್ತಾನಾ ಸವಾಲ್ ಕರಿಲಾಗ್ಲೊ.

“ಖಂಡಿತ್ ಜಾವ್ನ್ ಮಕಾ ನವೆಂ ಜೀವನ್ ಲಾಬಯಿಲ್ಲ್ಯಾ ತ್ಯಾ ಮಹಾನ್ ವ್ಯಕ್ತಿಚಿ ತಸ್ವೀರ್ ಪುಣೀ ಪಳೆಂವ್ಕ್ ಆಶೆತಾಂ ಡಾಕ್ಟರ್” ಮೆಬಲಾಚ್ಯಾ ವಿನಂತೆಕ್ ಡಾ| ಸಂತೊಶ್ ಒಪ್ಲೊ. ಅನಿಂ ಎಕ್ ತಸ್ವೀರ್ ಮೆಬಲಾಚ್ಯಾ ಹಾತಿಂ ದೀವ್ನ್ ಹಳ್ತಾರ್ ತಾಚ್ಯಾ ದೊಳ್ಯಾಂಚಿ ಪಟ್ಟಿ ಸುಟಂವ್ಕ್ ಸುರು ಕೆಲಿ ಡಾ| ಸಂತೊಶಾನ್.

“ನಿಜಾಯ್ಕಿ ತಿ ಎಕ್ ಮಹಾನ್ ವ್ಯಕ್ತಿಚ್ಚ್ ಸಯ್. ಅಪ್ಣೆಂ ಜೀವ್ ಅಸ್ತಾನಾಂಚ್ ಅಪ್ಲೆ ದೊಳೆ ತುಕಾ ದೀಂವ್ಕ್ ತಿಣೆಂ ವಿನಂತಿ ಕೆಲ್ಲಿ. ಅಪ್ರೆಶನ್ ಜಾವ್ನ್ ದೊನ್ ದಿಸಾಂನಿಂ ತಿಣೆಂ ಜೀವ್ಘಾತ್ ಕೆಲೊ. ಅಮಿಂ ಕಿತ್ಲೆಂ ಪ್ರಯತ್ನ್ ಕೆಲ್ಯಾರಿ ತಿಚೊ ಜೀವ್ ವಾಂಚಂವ್ಕ್ ಸಕ್ ಲ್ನಾಂವ್. ತಿಕಾ ಹಾಂವೆ ಭಾಸ್ ದಿಲ್ಯಾ. ತಿಚೆಂ ನಾಂವ್ ಮಾತ್ರ್ ತುಕಾ ಸಾಂಗೊಂಕ್ ಹಾಂವ್ ಸಕ್ಚೊ ನಾಂ.” ಉಲಯ್ತಾಂ ಉಲಯ್ತಾಂ ಹಳ್ತಾರ್ ಮೆಬಲಾಚ್ಯಾ ದೊಳ್ಯಾಂಚಿ ಪಟ್ಟಿ ಸುಟಯ್ತಲೊ ಡಾ| ಸಂತೊಶ್.

“ಮಿ| ರೊಬಿನ್ ಥೊಡೊ ವೇಳ್ ತುಂ ಬಾಯ್ರ್ ರಾವ್ಶಿಗಿ?” ದಾಕ್ತೆರಾಚ್ಯಾ ವಿನಂತೆಕ್ ಖಾಲ್ ಜಾವ್ನ್ ರೊಬಿ ರುಮಾ ಬಾಯ್ರ್ ಚಲ್ಲೊ.

“ಅತಾಂ ತುವೆಂ ದೊಳೆ ಉಘಡ್ಯೆತ್ ಹಿಚ್ಚ್ ತಿ ಚಲಿ ತುಜ್ಯಾ ಜಿವಿತಾಚಿ ಪಾಲ್ವಲ್ಲಿ ವಾತ್ ಪರತ್ತ್ ಪೆಟಯಿಲ್ಲಿ. ತುಂ ಪಳೆಂವ್ಕ್ ಸಕ್ತಾಯ್ಮು?” ಡಾ| ಸಂತೊಶಾಚ್ಯಾ ತಾಳ್ಯಾಂತ್ ಸಂತೊಸ್ ಲಿಪೊನ್ ಆಸ್ಲೊ.

“ವಯ್ ಡಾಕ್ಟರ್ ಹಾಂವ್ ಪಳೆಂವ್ಕ್ ಸಕ್ತಾಂ, ಹಾಂವ್ ಪಳೆಂವ್ಕ್ ಸಕ್ತಾಂ” ಖಾಟಿರ್ ಬಸ್ ಲ್ಲ್ಯಾ ಕಡೆಚ್ಚ್ ಉಡಿ ಮಾರುಂಕ್ ಲಾಗ್ಲೆಂ ಮೆಬಲ್. ಅಪ್ಲ್ಯಾ ಹಾತಾಂತ್ಲಿ ತಸ್ವೀರ್ ಪರತ್ತ್ ಪರತ್ತ್ ಪಳೆವ್ನ್ ಉಪ್ಕಾರ್ ಬಾವ್ಡಿಲಾಗ್ಲೆಂ ಮೆಬಲ್.

“ಕಿತ್ಲಿ ಸೊಬಿತ್ ಅಸಾ ಹಿ ಚಲಿ. ಕಿತ್ಯಾ ಖಾತಿರ್ ತಿಣೆಂ ಅಪ್ಲೆ ದೊಳೆ ಮಕಾ ಸಂಪುನ್ ಜೀವ್ಘಾತ್ ಕೆಲೊಗಾಯ್?” ಮೆಬಲಾಚ್ಯಾ ಸವಾಲಾಕ್ ಜಾಪ್ ಲಾಬ್ಲಿ ನಾಂ.

“ಬರೆಂ ತರ್ ಹಾಂವ್ ರೊಬಿಕ್ ಬಿತರ್ ದಾಡ್ತಾಂ.” ಡಾ| ಸಂತೊಶ್ ಥಂಯ್ಚೊ ಚಲ್ಲೊ.
ರೂಮಾ ಬಾಯ್ರ್ ಆಸ್ಲ್ಯಾ ಬಾಂಕಾರ್ ರೊಬಿ ತಕ್ಲಿ ಪಂದಾ ಘಾಲ್ನ್ ಬಸ್'ಲ್ಲೊ.

“ ಮಿ| ರೊಬಿನ್” ಡಾ| ಸಂತೊಶಾನ್ ಹಳ್ತಾರ್ ಅಪ್ಲೊ ಹಾತ್ ತಾಚ್ಯಾ ಖಾಂದ್ಯಾರ್ ದವರ್ಲೊ. ರೊಬಿ ಎಕಾಚ್ಪಾಣೆಂ ಉಡೊನ್ ಪಡೊನ್ ಉಟೊನ್ ಉಬೆ ರಾವ್ಲೊ.

“ರೊಬಿನ್, ಸೊನಿ ಸುವಾರಿಸಾನ್ ಹೆಂ ಕಾಗಾದ್ ತುಕಾ ದೀಂವ್ಕ್ ಸಾಂಗ್ ಲ್ಲೆಂ.” ಡಾ| ಸಂತೊಶ್ ಅಪ್ಲ್ಯಾ ಬೊಲ್ಸಾಂತ್ಲೊ ಕಾಗ್ದಾ ಕುಡ್ಕೊ ರೊಬಿಚ್ಯಾ ಹಾತಾಂತ್ ಚೆಪುನ್ ರೊಬಿಚಿಂ ಬುಜಾಂ ಥಾಪುಡ್ನ್ ಚಲ್ತಚ್ಚ್ ರಾವ್ಲೊ.

ಸೊನಿನ್ ಕಿತ್ಯಾಕ್ ದಾಕ್ತೆರಾ ಕಡೆ ಕಾಗಾದ್ ಬರವ್ನ್ ದೀಲಾಂ. ಅಮ್ಸರಾನ್ ರೊಬಿನ್ ತೊ ಕಾಗ್ದಾ ಕುಡ್ಕೊ ಸೊಡಯ್ಲೊ.

ಮೊಗಾಚ್ಯಾ ರೊಬಿ,

ಹಾಂವೆ ತುಕಾ ಪಳೆಯಿಲ್ಲ್ಯಾ ಥಾವ್ನ್ ಹರ್ಯೆಕ್ ಘಡಿ ಹಾಂವ್ ತುಕಾ ಆಶೆವ್ನ್ ಆಸ್ ಲ್ಲಿಂ. ಮಜಿಂ ಸ್ವಪ್ಣಾಂ ಸಾಕಾರ್ ಜಾತಾತ್ ಮುಣ್ತಾನಾ ಆಯಿಲ್ಲ್ಯಾ ವಾದಾಳಾನ್ ತುಕಾ ಮಜ್ಯಾ ಥಾವ್ನ್ ಪಯ್ಸ್ ವೆಲೆಂ. ಮಜ್ಯಾ ಮೊಗಾಕ್ ತುಂ ಸಮ್ಜೊಂಕ್ ಸಕ್ಲೊ ನಾಂಯ್ ರೊಬಿ. ಹಾಂವೆ ತುಕಾ ದಿಲ್ಲ್ಯಾ ಭಾಶೆ ಪರ್ಮಾಣೆಂ ತುಜ್ಯಾ ಜಿವಿತಾಕ್ ಎಕ್ ‘ನವಿ ದಿಶಾ’ ಲಾಬಯ್ಲ್ಯಾ. ಹೆಂ ಕಾಗಾದ್ ತುಜ್ಯಾ ಹಾತಾಂತ್ ಪಾವ್ತಾನಾ ಹಾಂವ್ ತುಜ್ಯಾ ಥಾವ್ನ್ ಅನಿಂ ಹ್ಯಾ ಸಂಸಾರಾ ಥಾವ್ನ್ ಮಸ್ತ್ ಪಯ್ಸ್ ಪಾವ್ಲ್ಯಾಂ ಆಸ್ತಾಲಿಂ. ಹಾಂವ್ ತುಜ್ಯಾ ಅನಿಂ ಮೆಬಲಾ ಮದೆಂ ಕಾಂಟೊ ಜಾಂವ್ಕ್ ಆಶೆನಾಂ. ಹ್ಯಾ ಜಲ್ಮಾಂತ್ ತುಜೊ ಮಾತ್ರ್ ಹಾಂವೆ ಮೊಗ್ ಕೆಲ್ಲೊ ರೊಬಿ ಪೂಣ್, ಹ್ಯಾ ಜಲ್ಮಾಂತ್ ತುಜೆಂ ಸಾಂಗಾತಿಣ್ ಜಾಂವ್ಚೆ ಭಾಗ್ ಮಕಾ ಲಾಬೊಂಕ್ನಾ. ಮೆಬಲಾಚೆ ದೊಳೆ ಜಾವ್ನ್ ಹಾಂವ್ ಸದಾಂಚ್ಚ್ ತುಜೆ ಸಾಂಗಾತಾ ಆಸ್ತಾಲಿಂ. ಹೊ ವಿಶಯ್ ಮೆಬಲಾಕ್ ಮಾತ್ರ್ ಕೆದಿಂಚ್ಚ್ ಕಳೊಂಕ್ ನಜೊ.

ಆದೇವ್ಸ್ ಮೊಗಾ,

ಸದಾಂಕಾಳ್ ತುಜೆಂಚ್ಚ್,
ಸೊನಿ.

ಸೊನಿಚಿಂ ಹರ್ಯೆಕ್ ಉತ್ರಾಂ ರೊಬಿಚೆಂ ಕಾಳಿಜ್ ಭೆಸಾಂ ಕರುಂಕ್ ಪಾವ್ಲಿಂ. ತೊ ಪರತ್ತ್ ಬಾಂಕಾರ್ ಕುಸ್ಕಾಲೊ. ತಾಚ್ಯಾ ಪರ್ವಣ್ಗೆ ವಿಣೆಂ ದೊನ್ ಥೆಂಬೆ ದುಖಾಂ ತ್ಯಾ ಕಾಗ್ದಾರ್ ಪಡ್ಲಿಂ. ಉಪ್ರಾಂತ್ ಎಕ್ ಲಾಂಬ್ ಶ್ವಾಸ್ ಸೆವ್ನ್ ಕಾಗ್ದಾಚೆ ಚುರೆ ಲಾಗಿಂಚ್ಚ್ ಅಸ್ಲ್ಯಾ ಕಚ್ರ್ಯಾ ಡಬ್ಬ್ಯಾಂತ್ ಲಿಪವ್ನ್ ದೊಳೆ ಪುಸುನ್ ತೊ ಮೆಬಲಾ ಸರ್ಶಿಂ ಪಾವ್ಲೊ.

“ಹಾಂವ್ ಪಳೆಂವ್ಕ್ ಸಕ್ತಾಂ ರೊಬಿ, ಹಾಂವ್ ಪಳೆಂವ್ಕ್ ಸಕ್ತಾಂ. ಹ್ಯಾ ಮಹಾನ್ ಚಲಿಯೆನ್ ಅಪ್ಲೆ ದೊಳೆ ಮಕಾ ದಿಲ್ಯಾತ್. ಉಪ್ರಾಂತ್ ತಾಣೆಂ ಜೀವ್ಘಾತ್ ಕೆಲೊ ಕಂಯ್. ಬಿರ್ಮತ್... ” ಮೆಬಲ್ ಉಲಯಿತ್ತ್ ವೆತಾಲೆಂ. ಅಪ್ಲ್ಯಾ ಹಾತಾಂತ್ಲಿ ತಸ್ವೀರ್ ತಾಣೆಂ ರೊಬಿ ಸಾಮ್ಕಾರ್ ದರ್ಲಿ. ರೊಬಿ ಕಿತೆಂಚ್ಚ್ ಉಲಂವ್ಕ್ ಸಕ್ಲೊ ನಾಂ. ತಾಣೆಂ ಮೆಬಲಾಕ್ ವೆಂಗ್ಲೆಂ.

“ಹಾಂವ್ ಸ್ವಾರ್ಥಿ ಸೊನಿ ಮಕಾ ಭೊಗ್ಶಿ” ಮತಿಂತ್ ಚ್ಚ್ ಸೊನಿಕಡ್ಚೆಂ ಭೊಗ್ಸಾಣೆಂ ಮಾಗೊನ್ ಮೆಬಲಾಚ್ಯಾ ದೊಳ್ಯಾಂಕ್ ಅಪ್ಲೆ ವೊಂಟ್ ದಾಂಬ್ಲೆ ರೊಬಿನ್.

*** - ***

- ಮೊನಿಕಾ ಮತಾಯಸ್ [ಮಾರ್ಚ್,  2021]

ಮೊನಿಕಾ ಮತಾಯಸ್: ಶಾಂತಿಪುರ್ ಫಿರ್ಗಜೆಚಿ ಬಾಯ್ ಮೊನಿಕಾ ಡೆ’ಸಾ, ಕೊಂಕಣಿ, ಕನ್ನಡ, ಇಂಗ್ಲಿಶ್, ಹಿಂದಿ ಭಾಸೆಂನಿ 1995 ಇಸ್ವೆಥಾವ್ನ್ ಕೊಂಕಣಿ ಸಾಹಿತಿಕ್ ವರ್ತುಲಾಂತ್ ವ್ಹಳ್ಕಿಚೆಂ ನಾಂವ್. ಅಪ್ಲ್ಯಾ ಕುಟ್ಮಾಸವೆಂ ಡಬ್ಲಿನಾಂತ್ ವಸ್ತಿ ಕರುನ್ ಆಸಾ, ತಶೆಂಚ್ ಎಕಾ ಪ್ರತಿಶ್ಟಿತ್ ಹೊಸ್ಪಿಟ್ಲಾಂತ್ ’ನರ್ಸಿಂಗ್ ಮ್ಯಾನೆಜರ್’ ಜವಾಭ್ದಾರೆಚೊ ಹುದ್ದೊ ಸಾಂಭಾಳುನ್ ಆಸ್ಚಾ ಹಿಚ್ಯಾ ಕೊಂಕಣಿ ಮಟ್ವ್ಯಾಕಾಣಿಯಾಂಚೆಂ ಪುಸ್ತಕ್ ’ನವಿ ದಿಶಾ’ 2020 ಇಸ್ವೆಂತ್ ಪರ್ಗಟ್ಲಾ ತಶೆಂಚ್ ಹ್ಯಾ ಪುಸ್ತಕಾಕ್ ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚೊ ಪುರಸ್ಕಾರ್ ಸಯ್ತ್ ಲಾಭ್ಲಾ.

ದಾಯ್ಜ್.ಕೊಮ್