ಜಾಗತಿಕ್ ರಾಜಕೀಯ್ ಪರಿಗತ್ ಆಜ್ ದೇಶಾಚ್ಯಾ ಹಳ್ಳೆ ಹಳ್ಳೆಂನಿ ಪಾವಂವ್ಕ್ ವೆಗ್-ವೆಗ್ಳಿಂ ಮಾಧ್ಯಮಾಂ ಕಾರಣ್. ಹಿಂ ಮಾಧ್ಯಮಾಂ ಸಯ್ತ್ ’ಅಪ್ಲೊ ಮುನಾಫೊ’ ಪಯ್ಲೆಂ ಹಾತೆರ್ ಕರುನ್ ಹಾಕಾ ವೆಗ್-ವೆಗ್ಳೆ ರಂಗ್ ದಿತಾತ್. ಆನಿ ತಾಚೊ ಪರಿಣಾಮ್ ಜಾವ್ನ್ ಆಜ್ ಸಮಾಜೆಚೊ ತೀರ್ ತಿರ್ಕುಟ್ ಜಾಲ್ಲ್ಯಾಚೊ ಪರಿಣಾಮ್ ಆಮಿ ಭಗುನ್ ಆಸಾಂವ್. ಕೊಣಾಯ್ಕ್‌ಯೀ ಸಮಧಾನ್ ಮ್ಹಳ್ಳೆಂ ನಾ, ಎಕಾಮೆಕಾ ಸಗ್ಳೆ ದುಸ್ಮಾನ್ಕಾಯೆಂತ್, ಹಗ್ಯಾನ್ ತಶೆಂಚ್ ಮೊಸ್ರಾನ್ ದೀಸ್ ಕಾಡ್ಚೆಂ ಸದಾಂಚೆಂ ಜಾಲಾಂ. ಕಾಂಯ್ ಏಕ್ ತೇಂಪ್ ಆಸ್ಲೊ; ಹೆರಾಂಚ್ಯಾ ದುಕಿಂತ್ ದೂಕ್ ಪಾಂವ್ಚೊ, ಹೆರಾಂಚ್ಯಾ ಸಂತೊಸಾಂತ್ ಸಂತೊಸ್ ಪಾಂವ್ಚೊ ಲೋಕ್ ಸಮಾಜೆಂತ್ ಚಡಿತ್ ಮಾಪಾನ್ ಆಸ್ಲೊ. ಪುಣ್ ಆಯ್ಚ್ಯಾ ಕಾಳಾರ್ ತಿ ಪರಿಗತ್ ಉಲ್ಟಿ ಜಾಲ್ಯಾ ದೆಕುನ್ ಹೆರಾಂಚ್ಯಾ ದುಕಾಂತ್ ಸಂತೊಸ್ ಪಾಂವ್ಚೆಂ ತಶೆಂಚ್ ಹೆರಾಂಚ್ಯಾ ಸಂತೊಸಾಂವ್ ಮೊಸ್ರಾನ್ ಭರ್ಚೆಂ ಮೆಟಾಂ ಮೆಟಾಂನಿ ದಿಸೊನ್ ಯೆತಾ.

ರೊನಾಲ್ಡ್ ಮೊಂತೆರೊ ಏಕ್ ವಿಭಿನ್ನ್ ಕಥಾಕಾರ್ ಮ್ಹಣುನ್ ತಾಚ್ಯೊ ಎಕೇಕ್ ಕಥಾ ಗವಾಯ್ ದಿತಾತ್. ಹಿ ಕಥಾ ಸಾಂಕೇತಿಕ್ ರಿತಿನ್ ಜಾಗತಿಕ್ ರಾಜಕೀಯ್ ಪಿಂತುರಾಕ್ ಸಮಾಜೆಂತ್ ಕಿತ್ಲ್ಯಾ ಸೊಭಿತ್ ರಿತಿನ್ ಆರ್ಸೊ ಧರ್ತಾ ಮ್ಹಳ್ಳೆಂ ಕಾಣಿ ವಾಚುನ್ ಗೆಲ್ಲೆಪರಿಂ ಕಳ್ತಾ. ಕೊಂಕಣಿಂತ್ ಕಥಾಕಾರ್ ಉಣೆಂ ಜಾವ್ನ್ ಗೆಲ್ಯಾತ್ ಪುಣ್ ಡಿಜಿಟಲ್ ಮಾಧ್ಯಮಾನ್ ಥೊಡ್ಯಾಂಕ್ ತರ್‌ಯೀ ಪರತ್ ಕಥಾ ಬರಂವ್ಚ್ಯಾ ವಾಟೆಕ್ ಪರತ್ ವೋಡ್ನ್ ಹಾಡ್ಲಾಂ ತೆಂ ಖರೆಂಚ್ ದಾಧೊಸ್ಕಾಯೆಚೆಂ.

- ಸಂ

[ಮಟ್ವಿ ಕಥಾ]: ವಯ್ಟ್ ಹೌಸ್ [- ರೊನಿ ಮೊಂತೆರೊ ಕಟ್ಪಾಡಿ]

White House

ವೊರಾಂ ಸಕಾಳಿಂಚಿಂ 05.05 ಜಾಲ್ಲಿಂ. ದೊಳೆ ಗಸ್ಟುನ್ ಕಷ್ಟಾಂನಿ ಮ್ಹಳ್ಳ್ಯಾ ಬರಿಂ ಕೆವಿನ್ ಖಟ್ಲ್ಯಾರ್ ಥಾವ್ನ್ ಉಟ್ಲೊ. ಟ್ರ್ಯಾಕ್ ಸೂಟ್ ನ್ಹೆಸೊನ್ ಧಾ ಮಿನುಟಾಂನಿ ಭಿತರ್ ತೊ ಜೊಗಿಂಗ್ ಕರ್‍ಚೆ ಖಾತಿರ್ ರಸ್ತ್ಯಾಕ್ ದೆಂವ್ಲೊ. ದುಬಾಯ್ ಥಾವ್ನ್ ರಜೆರ್ ಗಾಂವಾಂಕ್ ಆಯಿಲ್ಲ್ಯಾ ಉಪ್ರಾಂತ್ ಸದಾಂಚ್ಯಾ ದಿಸ್ಪಡ್ತೆ ಥಾವ್ನ್ ತೊ ನಿಸ್ರಾಲ್ಲೊ. ಹ್ಯಾ ವಿಶಿಂ ಕಾಲ್ಚ್ಯಾ ಸಾಂಜೆರ್ ಗ್ಲಾಸಾಕ್ ತಿಸ್ರೊ ಪೆಗ್ಗ್ ವೊತ್ತಾನಾ ಬಾಯ್ಲೆನ್ ಚತ್ರಾಯ್ ದಿಲ್ಲಿ.

ಗಾಂವ್ಚ್ಯಾ ಮಾತಿಯೆಚೊ ಪರ್ಮಳ್‌ಚ್ ವಿಂಗಡ್ ತೊ. ಗಲ್ಫಾಚಿಂ ರೆಂವೆಂತ್ ಜೀವ್ ನಾತ್‌ಲ್ಲೊ ಭುರ್ಗ್ಯಾಪಣಾಚ್ಯಾ ದಿಸಾಂನಿಂ ನಾಚೊನ್ ಖೆಳ್‌ಲ್ಲ್ಯಾ ಸುವಾತೆರ್ ಜಾಯ್ತಿ ಬದ್ಲಾವಣ್ ಜಾಲ್ಲಿ. ಮಾತಿಯೆಚಿಂ ರಸ್ತ್ಯಾಕ್ ಡಾಮರ್ ಪಡ್‌ಲ್ಲೊ ತರಿ ಥಂಯ್ ಥಂಯ್ ಉದೆವ್ನ್ ಆಯಿಲ್ಲ್ಯಾ ವ್ಹಡ್ ವ್ಹಡ್ ಫೊಂಡ್ಕುಲಾ ಥಾವ್ನ್ ತಾಂಬ್ಡಿ ಮಾತಿ ಆಪ್ಲೆಂ ಅಸ್ತಿತ್ವ್ ಪಾಚಾರ್‍ತಾಲೆಂ.

ಹ್ಯಾ ಲಾಂಬ್ ವೆಳಾಂತ್ ಮೆಟಾಂ ಮೆಟಾಂನಿ ಬದ್ಲಾಪ್ ಜಳ್ಕಾತಾಲೆಂ. ಜಿಣಿಯೆಚ್ಯಾ ಸಂಘರ್ಷಾಂತ್ ಆದ್ಲ್ಯಾ ದಿಸಾಂಚಿ ತಾಕಾ ವಿಸರ್ ಪಡ್‌ಲ್ಲಿ. ಕಾಮಾಚ್ಯಾ ರಾಟಾವಾಳ್ಯಾಂನಿ ತೊ ಸಂಸಾರ್ ವಿಸ್ರಾಲ್ಲೊ. ಕಾಮಾ ನಿಮ್ತಿಂ ಸಬಾರ್ ರಾಷ್ಟ್ರಾಂ ತೊ ಭೊಂವ್‌ಲ್ಲೊ ತರೀ ಹಾಚ್ಯೆ ಮಧೆಂ ಆಪ್ಲ್ಯಾಚ್ ಮಾಂಯ್ ಗಾಂವಾಂಕ್ ತೊ ಪರ್ಕಿ ಜಾಲ್ಲೊ. ಗಲ್ಫಾ ಥಾವ್ನ್ ಗಾಂವಾಂಕ್ ದೆಂವ್‌ಲ್ಲಿ ಖಬಾರ್ ಆಯ್ಕೊನ್ ಗೀದಾಬರಿಂ ಧಾವ್ಣಿ ಮಾರ್‍ಚ್ಯಾ ಇನ್ಸುರೆನ್ಸ್ ಏಜೆಂಟಾಂ ಥಾವ್ನ್ ತಶೆಂಚ್ ಆವ್ಕಾಸ್ ಸೊಧುನ್ ರೀಣ್ ವಿಚಾರ್‍ತೆಲ್ಯಾಂ ಥಾವ್ನ್ ಚುಕಾರಿ ಮಾರ್‍ಚೆಂ ಇರಾದ್ಯಾನ್ ಉಜ್ವಾಡ್ಚೆ ಆದಿಂಚ್ ಜೋಗಿಂಗ್ ಸಂಪಂವ್ಕ್ ತಾಣೆಂ ಚಿಂತ್‌ಲ್ಲೆಂ. ಸಕಾಳಿಂಚಿಂ ಶೆಳೊರ್ ವಾರ್‍ಯಾ ಸವೆಂ ಸುರ್ಯೊ ತಾಂಬ್ಡ್ಯಾ ರಂಗಾಂತ್ ಮೋಡಾಂಕ್ ಚೀರ್‍ನ್ ಮ್ಹಳ್ಳೆ ಬರಿಂ ದಿಗಂತಾಕ್ ಚಡ್ತಾಲೊ. ತಾಚಿಂ ತಿಂ ರಂಗಾಳ್ ಕೀರ್ಣಾಂ ಪಾಚ್ವ್ಯಾ ಧರ್ತೆಕ್ ವೆಂಗ್ತಾನಾ ಕೆವಿನಾಚ್ಯಾ ಜಿವಾಂತ್ ಎಕಾ ಥರಾಚೊ ಉಲ್ಲಾಸ್ ಭೊಗ್ಲೊ.

ಪ್ರಥ್ವೆಚ್ಯಾ ಸೊಭಾಯೆಚೆರ್ ಥಂಯ್ ಹಾಂಗಾ ಅತ್ಯಾಚಾರ್ ಜಾಲ್ಲೊ ತರೀ ಬದ್ಲಾವಣೆಚಿ ಗರ್ಜ್ ಆಸ್‌ಲ್ಲಿ. ತವಳ್ಚೆಂ ಕ್ರಿಕೆಟ್ ಖೆಳ್ಚೆಂ ಮೈದಾನಾಂತ್ ಟೆರೆಸಾಚಿಂ ಘರಾಂ ಉಬಿಂ ಜಾಲ್ಲಿಂ.

ಹಳ್ಳಿ ‘ಹಳ್ಳಿ’ ಜಾವ್ನ್ ಉರೊಂಕ್ ನಾಂ. ಹಳ್ಳೆಕ್ ಗಾಂವ್ಚ್ಯಾ ರೂಪಾಚೊ ಸಂದ್ರಾಪ್ ಆಯಿಲ್ಲೊ. ಹೊ ವೆಗಿಂಚ್ಚ್ಯಾಕ್ ಬದ್ಲಾಲ್ಯಾ ಬರಿಂ ನಾಂ. ಸಬಾರ್ ವರ್‍ಸಾಂ ಲಾಗ್ತಾಲಿಂ ಮ್ಹಳ್ಳೆಂ ಕೆವಿನಾಚೆಂ ಚಿಂತಾಪ್ ಸತ್ ಜಾವ್ನಾಸ್‌ಲ್ಲೆಂ. ತಿಂ ಸಬಾರ್ ವರ್‍ಸಾಂ ಉತ್ರೊನ್ ಗೆಲ್ಲಿಂ ತೆಂ ಕೆವಿನಾಚ್ಯಾ ಗಮನಾಂತ್ ಗೆಲ್ಲೆಂಚ್ ನಾಂ.

ಸಾಂಜೆಚ್ಯಾ ಜೆವ್ಣಾ ಪಯ್ಲೆಂ ಕೆವಿನಾಚ್ಯಾ ಆವಯ್ನ್ ಸಬಾರ್‌ಶಿ ಮಾಹೆತ್ ದಿಲ್ಲಿ. ಜೆಮಿಯಾಬ್, ಮಾರ್ಕಾಬ್, ಫೆಲಿಸಾಬಾ, ಬೆಜ್ಮಿಯಾಬ್ ಆನಿ ರೆನ್ನಿ ಅಶೆಂ ಸಂವಾದ್ ಭೊವ್ ಕುತೂಹಲ್ಬರಿತ್ ಜಾವ್ನಾಸ್‌ಲ್ಲೊ. ಹಾಚೆ ಸಂವೆಂ ಸೊರ್‍ಯಾಚ್ಯಾ ಗ್ಲಾಸಾಂತ್ ಚ್ಯಾರ್ ಪೆಗ್ಗ್ ಖಾಲಿ ಜಾಲ್ಲೆಚ್ ಕಳಂವ್ಕ್ ನಾತ್‌ಲ್ಲೆಂ.

ಎಕಾ ಗುಂವ್ಡೆ ಸಂಗಿಂ ದೆಂವ್ಣೆರ್ ಉಜ್ವ್ಯಾ ದೆಗೆನ್ ಆಸ್‌ಲ್ಲೆಂ ಜೆಮಿಯಾಬಾಚೆಂ ಘರ್ ಕೊಲ್ವಾಚೆಂ ಘರ್ ಮಾಜ್ವೊನ್ ಆತಾಂ ಟೆರೆಸಾಚೆಂ ಜಾಲ್ಲೆಂ. ವರ್‍ಸಾಂ ಆದಿಂ ಗೊರ್‍ವಾಂ ಯೇನಾಶೆಂ ಸಾರ್‍ಯಾ ರುಕಾಚೊ, ಬೊಡಿಯಾಂನಿಂ ಬಾಂದ್‌ಲ್ಲೊ ಅಕಾಡೊ ವಚೊನ್ ಆಜ್ ಸಿಮಿಟೆಚೊ ದೊರೊ ಉಬೊ ಜಾಲ್ಲೊ. ಜೆಮಿಯಾಬಾಚೊ ಪೂತ್ ಜೆರಿ ಪಂದ್ರಾ ವರ್‍ಸಾಂ ಥಾವ್ನ್ ದುಬಾಯಾಂತ್ ಇಲೆಕ್ಟ್ರಿಶಿಯನಾಚಿಂ ಕಾಮ್ ಕರ್‍ತಾಲೊ. ಗಲ್ಫಾಚ್ಯಾ ದುಡ್ವಾನ್ ಜೆಮಿಯಾಬಾ ಥಂಯ್ ಉದರ್ಗತ್ ಹಾಡ್‌ಲ್ಲಿ ಶೆಣ್ ಕಾಡ್‌ಲ್ಲ್ಯಾ ಆಂಗ್ಣಾಂತ್ ’ಇಂಟರ್‌ಲೋಕ್’ ಲಾಗಯಿಲ್ಲೆ.

ಸಕಾಳಿಂಚೆಂ ವೋತ್ ತೀಕ್ಷ್ಣ್ ಜಾವ್ನಾಸ್‌ಲ್ಲೆಂ!!!

MAR HABA

ರಸ್ತ್ಯಾಚ್ಯಾ ದಾವ್ಯಾಕ್ ಆಸ್ಚ್ಯಾ ಮಾರ್ಕಾಬಾಚ್ಯಾ ದೊರ್‍ಯಾ ವಯ್ಲೊ ಹೊ ಬೋರ್ಡ್ ಭೊವ್ ಪರಿಚಿತ್. ಸ್ಟೀಲಾಚ್ಯಾ ದಾಟ್ ಅಕ್ಷರಾಂನಿ ವಣದಿರ್ ಲಾವ್ನ್ ಸಬಾರಾಶಿಂ ವರ್ಸಾಂ ಜಾಲ್ಲಿಂ. ಅಶೆಂ ಮೆಳ್ಳ್ಯಾರ್ ಅರ್‍ಭಿ ಬಾಶೇಂತ್ ಸ್ವಾಗತ್ ಮ್ಹಣೊನ್ ಮಾರ್ಕಾಬಾನ್ಂಚ್ ಸಾಂಗ್‌ಲ್ಲೆಂ. ಸಬಾರ್ ವರ್‍ಸಾಂ ತೊ ಕುವೆಯ್ಟಾಂತ್ ಶೇಖಾಂ ಗೆಲ್ಲ್ಯಾ ಘರಾಂತ್ ಡ್ರಾವರ್ ಜಾವ್ನ್ ಕಾಮ್ ಕೆಲ್ಲ್ಯಾಂತ್. ಶೇಖಾಂಚ್ಯಾ ಘರಾಂನಿಂ ಘಡ್ಚೆಂ ತಸಲೆ ಸಬಾರ್ ಕಾಣಿಯೊ ತಾಚೆಲಾಗಿಂ ಆಸ್‌ಲ್ಲ್ಯೊ. ಆರ್ಬಿ ಚೆಡ್ವಾಂಕ್ ತೊ ’ಹಸ್ತಿ ಪಿಲಾಂ’ ಮ್ಹಣೊನ್ ಉಲ್ಲೇಖ್ ಕರ್‍ತಾಲೊ ತರೀ ಕೆವಿನ್ ಆನಿ ತಾಚೆ ಸಾಂಗಾತಿ ಮಾರ್ಕಾಬಾಚೆ ಶಿರ್ಪುಟ್ಯೊ ಸೊಭಿತ್ ಧುವಾಂಕ್ ಪಳೆಂವ್ಕ್ ಗೇಟಿ ಮುಖಾರ್ ಉಮ್ಕಾಳ್ತಾಲೆ.

ಬೋರ್ಡಾ ವಯ್ಲೆಂ ’H’ ಅಕ್ಷರ್ ಝಡೊನ್ ಪಡ್‌ಲ್ಲೆಂ. ಯಾ ಕೊಣೀ ತರಿ ಪೋಲಿ ಭುರ್ಗ್ಯಾಂನಿಂ ನಿಕ್ಳಾಯಿಲ್ಲೆಂ ಜಾಂವ್ಕ್ ಪುರೊ. ಕೆವಿನ್ ಆಪ್ಲೆಸ್ತಕಿಂ ಹಾಸೊಂಕ್ ಲಾಗ್ಲೊ ಗಲ್ಫ್ ರಾಷ್ಟ್ರಾಚೆರ್ ಆನಿ ಆಪ್ಲ್ಯಾ ನಾವಾಂಚೆರ್ ಮಾರ್ಕಾಬಾಕ್ ಆಸ್‌ಲ್ಲೆಂ ಘಮಂಡ್ ಹಾಂಗಾಸರ್ ಉಟೊನ್ ದಿಸ್ತಾಲೆಂ. ಬಾಯ್ಲೆಚ್ಯಾ ನಾಂವಾಂ ಸಂಗಿಂ ಜೊಡುನ್ ಯಾ ಭುರ್ಗ್ಯಾಂಚ್ಯಾ ನಾಂವಾಂ ಮೆಳವ್ನ್ ಘರ್‍ಚಿಂ ನಾಂವಾಂ ದವರ್‍ಚ್ಯಾ ಹ್ಯಾ ಕಾಳಾರ್ ಮಾರ್ಕಾಬಾಚಿ ವಿಭಿನ್ನತಾ ಚಿಂತುನ್ ಕೆವಿನ್ ಮತಿ ಭಿತರ್‌ಚ್ ಗುಣ್ಗುಣ್ಲೊ. ಸಂಸಾರಾಚ್ಯಾ ಖಂಚ್ಯಾ ಮುಲ್ಯಾರ್ ಪಾವ್ಲ್ಯಾರೀ ಅಸಲೆಂ ಏಕ್ ಕ್ಯಾರೆಕ್ಟರ್ ಸಗ್ಳ್ಯಾಂನಿಯಿ ಆಸ್ತಾ! ಕೆವಿನಾಚೆಂ ಮುಖ್ಲಿಂ ಮೆಟಾಂ ಥೊಡಿಂ ಜಡಾಯೆಚಿಂ ಜಾಲಿಂ. ಕದಮಾಂ ಅಡ್ಚಲ್ಲ್ಯಾಬರಿ ಭೊಗ್ಲೆಂ. ಸದಿಳ್ ಜಾಲ್ಲೆ ಮೊಚ್ಯಾಂಚೆ ನಾಡೆ ಅರ್ಸುಂಕ್ ತೊ ಬಾಗ್ವತಾನಾ ಧರ್ತೆಚೊ ಪರ್ಮಳ್ ತಾಚ್ಯಾ ನಾಕಾಚಿಂ ಫುಡಾಂ ಉಸಂವ್ಕ್ ಲಾಗ್ಲೊ. ಆಜೂನ್ ತೊ ಪರ್ಮಳ್ ಮಾಜ್ವೊಂಕ್ ನಾತ್‌ಲ್ಲೊ! ವರ್‍ಸಾಂ ಆದ್ಲಿಂ ಸಿಂತಿಮೆಂತಾಂ ಆತಾಂ ತಾಚೆಂ ಭುರ್ಗ್ಯಾಪಣಾಚೆ ಕಿತ್ಲೆಶೆ ದೀಸ್ ಹಾಂಗಾಸರ್ ಪಾಶಾರ್ ಜಾಲ್ಲೆಂ!!! ಉಜ್ವ್ಯಾ ಕುಶಿನ್ ರೇಗನ್ ಪಿಂಟೊ ಆನಿ ದಾವ್ಯಾ ಕುಶಿನ್ ರೆನ್ನಿ ಲೋಬೊನ್ ರೇಗನಾಚ್ಯಾ ಘರಾಚೆರ್ ದೀಷ್ಟ್ ಉಬಾರುನ್ ಪಳೆಂವ್ಚಿ ಸಕತ್ ಕೆವಿನಾ ಥಂಯ್ ನಾತ್‌ಲ್ಲಿ. ಭುರ್ಗ್ಯಾಪಣಾಚೊ ಅಧೀಕ್ ಮೊಗಾಚೊ ಈಷ್ಟ್ ಆಜ್ ಸಿಂಗಾಪುರ್ ಪಾವ್‌ಲ್ಲೊ!

ಪಯ್ಶೆ, ಅಂತಸ್ತ್ ಆನಿ ಹುದ್ದೊ ಆಪ್ಣಾವ್ಚ್ಯಾ ಧಾಂವ್ಣೆಂತ್ ತಾಣೆಂ ಲಾಗ್ಶಿಲ್ಯಾ ಸಂಬಂಧಾಂಕ್ ತುಟಯಿಲ್ಲೆಂ

ಶಿಂಪ್ಡೊನ್ ಗೆಲ್ಲ್ಯಾ ಇಷ್ಟಾಗತಿಚ್ಯಾ ಗಾಂಚಾಂಕ್ ಮೆಳಂವ್ಕ್ ಜಾಯ್ತಿಂ ಪೇಸ್‌ಬುಕ್ ಆನಿ ವಾಟ್ಸಪ್ ತಸಲಿಂ ಮಾಧ್ಯಮಾಂ ಆಸ್‌ಲ್ಲಿಂ. ಪೂಣ್ ತುಟಾಯಿಲ್ಲ್ಯಾ ಗಾಂಚಾಂಕ್ ಪರ್ತ್ಯಾನ್ ಗಾಂಟಾಂವ್ಕ್ ತಿಂ ಅಸಫಲ್ ಜಾಲ್ಲಿಂ!

ತಿಂ ಸಾಂಗಾತಾಂ ಚೊರಿಯಾಂ ಇಸ್ಕೊಲಾಕ್ ಚಕ್ಕರ್ ಮಾರುನ್ ಪಳೆಯಿಲ್ಲಿಂ ಪಿಂತುರಾಂ...

ವಾಂಟುನ್ ಖೆಲ್ಲಿಂ ತಿಂ ಆಂಗ್ಡಿಚಿಂ ಆಡ್ ಖಾಣಾಂ...

ಪಯ್ಲೆ ಪಾವ್ಟಿಂ ಸಾಂಗಾತಾಂ ಚಾಕ್‌ಲ್ಲಿ ತಿ ಬಿಯರಿಚಿ ರೂಚ್... ರೇಗನಾ ಮಾರಿಫಾತ್ ರೆನ್ನಿ ಥಂಯ್ ವಾಡಯಿಲ್ಲಿ ತಿ ಸಳಾವಳ್ ರೆನ್ನಿಚೊ ಹಾತ್ ಪಯ್ಲ್ಯಾ ಪಾವ್ಟಿಂ ಆಪ್ಲ್ಯಾ ಹಾತಾಂತ್ ಘೆತಾನಾ ಜಾಲ್ಲೊ ತೊ ಅನ್ಭೋಗ್!!

ಪಯ್ಲ್ಯಾ ಪಾವ್ಟಿಂ ರೆನ್ನಿಚ್ಯಾ ಗಾಲಾರ್ ದಿಲ್ಲ್ಯಾ ಉಮ್ಯಾಚೊ ಸ್ವಾದ್!! ಕೆವಿನಾಚ್ಯಾ ದೊಳ್ಯಾಂ ಮುಖಾರ್ ಪಿಂತುರಾಂ ಬರಿಂ ಉದೆಲಿಂ!! ಕೆವಿನಾನ್ ಜಿಣ್ಯೆಚ್ಯಾ ಹರ್ಯೆಕಾ ಪಾಂವ್ಡ್ಯಾರ್ ನವೆಂ ಸಂಬಂಧ್ ರಚ್‌ಲ್ಲೆಂ ಆನಿ ಪರ್ನ್ಯಾಂಕ್ ಕಚ್ರ್ಯಾಂತ್ ಉಡಯಿಲ್ಲೆ!!

ರೆನ್ನಿಚೊ ಬಾಪುಯ್ ಬೆಬ್ದೊ ತೋಮಸ್ ಮಳ್ಬಾಕ್ ಚೊಯ್ತಾಲೊ!!! ರೆನ್ನಿ ಸೌದಿ ಅರೇಬಿಯಾಂತ್ ಸಬಾರ್ ವರ್‍ಸಾಂ ಕಾಮ್ ಕರುನ್ ಗಾವಾಂಕ್ ಆಯಿಲ್ಲಿ ಖಬರ್ ಆಸ್ಲ್ಯಾರೀ ತಾಕಾ ಮೆಳ್ಚೆಂ ಧೈಯ್ರ್ ಪಾವ್ಲೆಂ ನಾಂ! ಘಾಮ್ ಕಪಲಾರ್ ಥಾವ್ನ್ ನಿರಂತರಿ ದೆಂವ್ತಾಲೊ. ಸಿಕೆರಾಮಾಚ್ಯಾ ’White House’ ಮುಖಾರ್ ರಾವೊನ್ ತಾಣೆಂ ಸಿಗ್ರೆಟ್ ಜಳಯ್ಲಿ.

’White House’ ಚೆರ್ ನದರ್ ಮಾರ್‍ತಾನಾ ಸಬಾರ್ ತೆಂಪಾ ಥಾವ್ನ್ ತಾಣೆಂ ಪಾತ್ಯೆವ್ನ್ ಆಯಿಲ್ಲೆಂ ರಾಜಾಂವ್ ಆಜ್ ಸತ್ ಮ್ಹಣೊನ್ ರುಜು ಜಾಲೆಂ. ವೆಳಾರೊದಾಚಿ ಪರ್ತವ್ಣಿ!!!

ಬೊರಿಯಾಂನಿ ಭರ್‌ಲ್ಲ್ಯಾ ಸಿಗ್ರೆಟಿಚ್ಯಾ ಧುಂವ್ರಾನ್ ತಾಕಾ ಚಿಂತ್ಪಾಕ್ ಅಸ್ಪದ್ ಕರುನ್ ದಿಲ್ಲೊ. ಎಕಾ ಕಾಳಾರ್ ಗಾಂವಾಂಕ್ ಸರಿ ಜಾವ್ನ್ ದೂದಾಬರಿಂ ಧವ್ಯಾ ಆಯಿಲ್ ಪೆಂಯ್ಟಾಂತ್ ಪರ್ಜಳ್ಚೆಂ ’ White House’ ಆಜ್ ಬದ್ಲೊನ್ ಲೊಣಿಯೆ ಬರಿಂ ಮಂದ್ ಜಾಲ್ಲೆಂ.

ಜಯ್ತ್ ಗೇಟಿಚೆರ್ ಪೊಡ್‌ಲ್ಲೊ ಭಾಂಗ್ರಾಳೊ ರಂಗ್ ಮಾತಿ ಖಾವ್ನ್ ಯೆಂವ್ಚ್ಯಾ ಲೊಂಕ್ಡಾಕ್ ಚಿಡ್ಕೊನ್ ರಾವೊಂಕ್ ಸಕ್ಲೊನಾಂ. ತವಳ್ಚ್ಯಾ ಕಾಲಾರ್ ಅಪ್ರೂಪ್ ಪಳೆಂವ್ಕ್ ಮೆಳ್ಚೆ ವಿದೇಶಿ ಡೂಮ್ ಲಾಯ್ಟಾ ಫುಟೊನ್ ಆನಿ ಮೊಡೊನ್ ವಾಯರಾಂಚೆರ್ ಉಮ್ಕಾಳ್ತಾಲೆ. ನಾಜೂಕ್ ರಿತಿರ್ ಮಾರ್ಬಲಾರ್ ಕಾಂತಾಯಿಲ್ಲಿಂ ಹೆನ್ರಿ ಸಿಕ್ವೇರಾ ಧುಳ್ ಆನಿ ಪಾವ್ಸಾ ಸಂಗಿಂ ಜಗಡ್ನ್ ಮ್ಹಳ್ಳ್ಯಾಬರಿಂ ಶ್ಹೆಳೊ ಮಾಂಡ್‌ಲ್ಲ್ಯಾ ಕುಂದ್ಯಾ ಮಧೆಂ ಅಪ್ಲೆಂ ಅಸ್ತಿತ್ವ್ ಉರಂವ್ಚೆಂ ಪ್ರಯತ್ನ್ ಕರ್‍ನ್ ಆಸಾ ತಶೆಂ ದಿಸ್ತಾಲೆಂ.

ಸದಾಂಚ್ ಬಂಧ್ ಆಸ್‌ಲ್ಲ್ಯಾ ಗೆಟಿ ಪಾಟ್ಲ್ಯಾನ್ ಗರ್ಜೊಂಚ್ಯಾ ಸುಣ್ಯಾಂಚೊ ಆವಾಜ್ ನಪಂಯ್ಚ್ ಜಾಲೊ! ಬಂದ್ ಗೇಟಿ ಉಗ್ತ್ಯೊ ಜಾಲ್ಲ್ಯೊ! ವಠಾರಾಂತ್ ಎಕ್ಲ್ಯಾ ಕಡೆನ್ ಮಾತ್ರ್ ಆಸ್‌ಲ್ಲೆಂ ನವೆಂಚ್ ಕಾರ್ ಆತಾಂ ಪರ್ನೆಂ ಜಾಲ್ಲೆಂ!

ಬುರುಜಾ ಬರಿಂ ಉಬೆಂ ಆಸ್‌ಲ್ಲೆಂ ಘರ್ ಆತಾಂ ಆದಿಂ ಮಾಗಾಂ ಕೊಲ್ವಾಚ್ಯಾ ಆನಿ ನಳ್ಯಾಂಚ್ಯಾ ಘರಾ ಥಾವ್ನ್ ಬದ್ಲಾಲ್ಲ್ಯಾ ಟೆರಿಸಾಚ್ಯಾ ಸುತ್ತುರಾಂಚ್ಯಾ ಘರಾಂನಿ ಧಾಡ್ ಘಾಲ್ಲೆ ಬರಿ ಭಾಸ್ ಜಾತಾಲೆಂ. ತಾರ್‍ವಾಟಿ ಸಿಕೆರಾಮಾಚ್ಯಾ ಜಿಣ್ಯೆಚಿ ನಕ್ಷಾಚ್ ಬದ್ಲಾಲಿಗಾಯ್? ರಾಕ್ಸಾಖಾಸ್ತಾಚ್ಯಾ ಪೆಟ್ಯಾಚಿ ಘರ್ಜೊಣಿ ಕೆದಾಳಾ ಥಾಂಬ್ಲಿ?
ವ್ಹಯ್ ರಾಜಾಂವ್ ಸಾರ್ಕೆಂ ಜಾವ್ನಾಸ್‌ಲ್ಲೆಂ!!!

ಆದಿಂ ಗ್ರೇಸ್ತ್ ಆಸ್‌ಲ್ಲೆ ಕ್ರಮೇಣ್ ಆಪ್ಲೊ ವೈಭವ್ ಹೊಗ್ಡಾಯಿಲ್ಲೆ. ಉಂಚಾಯೆರ್ ರಾಜ್ ಕರ್‍ತೆಲೆ ಕಿತ್ಲೆಶೆ ಧರ್ಣಿಕ್ ಶೆವ್ಟಾಲ್ಲೆ ಉನ್ನತ್ ಹುದ್ದ್ಯಾರ್ ಆಸ್‌ಲ್ಲೆ ಅಧೋಗತಿಕ್ ಪಾವ್‌ಲ್ಲಿಂ ನಿದರ್ಶನಾಂ ಭಂವ್ತಿಂ ಜಾಯ್ತಿಂ ಆಸ್‌ಲ್ಲಿಂ.

ಅಧಾನಕ್ ಮ್ಹಳ್ಳೆಬರಿಂ ಅಮೇರಿಕಾಚೆಂ ಚಿತ್ರಣ್ ಕೆವಿನಾ ಮುಖಾರ್ ಉದೆಲೆಂ ಬಹುಶಾ ’ White House’ ಚ್ಯಾ ನಾಂವಾಂ ವರ್ವಿಂ ಜಾಂವ್ಕೀ ಪುರೊ.

ಕೆವಿನ್ ಗಲ್ಫಾಚಿಂ ಸರ್ವ್ ರಾಷ್ಟ್ರಾಂ ಭೊಂವ್‌ಲ್ಲೊ. ಉದೆಂತಿಂಚಿ ರಾಷ್ಟ್ರಾಂ ಪರ್ಯಾಂತ್ ತಾಣೆಂ ಪಳಯಿಲ್ಲಿಂ. ತಾಚೆಂ ಕಾಮ್‌ಚ್ ಅಂತರ್‌ರಾಷ್ಟ್ರೀಯ್ ಮಟ್ಟಾಚೆಂ ಜಾವ್ನಾಸ್‌ಲ್ಲೆಂ. ಸಿಂಗಾಪುರ್ ಆನಿ ದುಬಾಯಾಂತ್ಲಿಂ ದಿಗಂತಾಕ್ ಚುಂಬನ್ ದಿಂವ್ಚಿಂ ಬಾಂದ್ಪಾಂ ತಾಣೆಂ ಹರ್ಶೆಂ ಮ್ಹಳ್ಳ್ಯಾಬರಿಂ ಪಳಯಿಲ್ಲೆಂ. ದುಬಾಯಾಂತ್ಲ್ಯಾ ತ್ಯಾ ಬಂಜರ್ ಮರುಭೂಮಿಂತ್ ಧರೊಣ್ ಫುಟೊನ್ ಮಳ್ಬಾಬರಿಂ ತಾಚ್ಯಾ ದೊಳ್ಯಾಂ ಮುಖಾರ್ ಜಯ್ತ್ ಮಾಳಯಾಂಚಿಂ ಬಾಂದ್ಪಾಂ ಅಳ್ಮ್ಯಾಬರಿಂ ಉದೆವ್ನ್ ಯೆತಾನಾ ತಾಣೆಂ ಸಾಕ್ಸ್ ದಿಲ್ಲಿ. ಪಂಚ್ವೀಸಾ ವರ್ನಿ ಚಡಿತ್ ರಾಷ್ಟ್ರಾಂ ಭೊಂವ್‌ಲ್ಲೊ ಅನ್ಭೋಗ್ ಆಸ್‌ಲ್ಲೊ ತರೀ ಅಮೇರಿಕಾ ವಿಣೆಂ ತೆಂ ಅಧುರೆಂ ದಿಸ್‌ಲ್ಲೆಂ.

ಅಮೇರಿಕಾ ಪ್ರಗತೆಂತ್ ಸರ್ವಾಂ ಪ್ರಾಸ್ ಊಂಚ್!!! ತಾಂತ್ರಿಕತೆಚೆಂ ಭಂಡಾರ್ ಸರ್ವ್ ಕ್ಷೇತ್ರಾಂತ್ ಏಕ್ ಮೇಟ್ ಮುಖಾರ್!! ಪೂಣ್!?

ಥಂಯ್ಸರ್ ಪಾವ್‌ಲ್ಲೆ ತವಳ್ ತಾಕಾ ನಿರಾಶಾ ಭೊಗ್‌ಲ್ಲಿ. ತಾಣೆಂ ಅಪೇಕ್ಷಾ ಕೆಲ್ಲೆಂ ಕಿತೆಂಚ್ ನವೆಸಾಂವ್ ತಾಚ್ಯಾ ದೊಳ್ಯಾಂಕ್ ಜಳ್ಕಾಲೆಂ ನಾಂ. ’Manhatten’ ಚ್ಯಾ ಬಾಂದ್ಪಾ ಮದ್ಲೆ ರಸ್ತೆ ತಾಕಾ ಪರ್ನೆಂ ದಿಸ್ಲೆಂ. ಬಾಂದ್ಪಾಂಚಿ ಉಂಚಾಯ್ ಪ್ರಸ್ತುತ್ ಕಾಳಾರ್ ಸಾಮಾನ್ಯ್ ದಿಸ್ಲಿ. ’Brokline’ ನ್ಹಂಯ್ಚೊ ಪ್ರಖ್ಯಾತ್ ಸಾಂಕೊವ್ ಕೂಳೂರ್‍ಚ್ಯಾ ಸಂಖ್ಯಾ ಥಾವ್ನ್ ಕಿತೆಂಚ್ ವಿಬಿನ್ ಮ್ಹಣ್ ತಾಕಾ ಭಗ್ಲೆಂ ನಾಂ! ವೇಳ್ ಬದ್ಲಾಲ್ಲೊ!!

ಪನ್ನಾಸ್ ಶೆಂಬರ್ ವರ್‍ಸಾ ಆದಿಂ ಸಂಸಾರ್ ಬಂಜರ್ ಆಸ್ತಾನಾ ಆತಾಂ ದೊಳ್ಯಾಂ ಮುಖಾರ್ ದಿಸ್ಚಿ ಪ್ರಗತಿ ತವಳ್ ಹಾಂಗಾಸರ್ ಆಸ್‌ಲ್ಲಿ ಮ್ಹಣೊನ್ ಪಾರ್ಕುಂಕ್ ತೊ ಸಕ್ಲೊ ನಾ!

ಹಾಂಗಾಚ್ಯಾ ನಾಗರೀಕತೆಚಿ ಗ್ರೇಸ್ತ್‌ಕಾಯ್ ಸಂಸಾರಾಚ್ಯಾ ಉರ್‌ಲ್ಲ್ಯಾ ದೇಶಾಂಚ್ಯಾಚಿ ಕಿತ್ಲ್ಯಾಕೀ ಮುಖಾರ್ ಆಸಾ ಮ್ಹಳ್ಳೆಂ ಕೆವಿನಾಚ್ಯಾ ಗಮನಾಕ್ ಗೆಲೆಂ ನಾಂ. ತೊ ವರ್ತಮಾನಾಂತ್ ಆಸ್‌ಲ್ಲೊ!!!

ಲ್ಹಾನ್ ರಾಷ್ಟ್ರಾಂನಿ ಉಬಿಂ ಕೆಲ್ಲಿಂ ಕಾಂಕ್ರಿಟಾಚಿ ರಾನಾಂ ಝಿಳ್ಮಿಳ್ತಾನಾ ನ್ಯೂಯಾರ್ಕಾ ಶಹರಾಚ್ಯಾ ಬಾಂದ್ಪಾಂನಿ ರಂಗ್ ಹೊಗ್ಡಾಯಿಲ್ಲೊ!! ಬಿಲ್ಕುಲ್ ಸಿಕೆರಾಮಾಚ್ಯಾ ’ White House’ ಚ್ಯಾ ವಣದಿ ಬರಿಂ. ಸುರ್ಯೊ ತೇಜ್ ಜಾವ್ನ್ ಯೆತಾಲೊ. ವೇಳ್ ಉತರ್‍ನ್ ವೆತಾಲೊ. ಫರ್ಲಾಂಗೊ ಪಯ್ಸ್ ಚಿಕ್ಕೆಶೆಂ ಉಬಾರ್ ಗುಡ್ಯಾ ಸುವಾತೆರ್ ದೋನ್ ಘರಾಂ ದಿಸ್ತಾಲಿಂ.

ಇಸ್ರಾಯೆಲ್‌ಗಾರ್ ಬೆಜ್ಮಿಯಾಬ್ ಆನಿ ಪಾವೊಸ್ತಿನ್ ಬಾಯ್!! ಪಯ್ಸಾ ಥಾವ್ನ್ ಪಳೆತಾನಾ ಎಕಾಮೆಕಾಕ್ ಲಾಗೊನ್ ಆಸ್‌ಲ್ಲ್ಯಾ ಬರಿಂ ದಿಸ್ತಾಲೆಂ ತರೀ ಹಾಂಚೆ ಮಧೆಂ ಅಂತರ್ ಭಾವ್ ಚಡ್ ಆಸ್‌ಲ್ಲೊ. ವರ್‍ಸಾಂ ಆದಿ ಥಾವ್ನ್ ಚಲೊನ್ ಆಯಿಲ್ಲಿ ಹಾಂಚೆ ಮದ್ಲಿ ಲಡಾಯ್ ಆಜೂನ್ ಥಾಂಬೊಂಕ್ ನಾತ್‌ಲ್ಲಿ. ಹಾಂಚೆಂ ಹೆಂ ಝಗ್ಡೆಂ ಫಕತ್ತ್ ಹ್ಯಾ ವಠರಾಕ್ ಮಾತ್ರ್ ಸೀಮಿತ್ ಜಾವ್ನ್ ನಾತ್‌ಲ್ಲೆಂ.

ಗಾಳಿ, ಶಿರಾಪಾ ಥಾವ್ನ್ ಕೊಯ್ತಿ ಆನಿ ದಾಂಡೆ ಪರ್ಯಾಂತ್! ಫಿರ್ಗಜ್ ಪಾದ್ರಿ ಥಾವ್ನ್ ಬಿಸ್ಪಾಚ್ಯಾ ದಫ್ತರಾ ಮ್ಹಣಾಸರ್!! ಪಂಚಾಯತಾ ಥಾವ್ನ್ ಪೊಲಿಸ್ ಸ್ಟೇಶನಾ ಪರ್ಯಾಂತ್!! ಫಕತ್ ಕೋಡ್ತಿಚಿಂ ಮೆಟಾಂ ಚಡ್ಚೆಂ ಏಕ್ ಬಾಕಿ ಉರ್‌ಲ್ಲೆಂ. ಇಸ್ರಾಯೆಲ್‌ಗಾರ್ ಬೆಜ್ಮ್ಯಾಬಾನ್ ಆಪ್ಲೊ ಜಾಗೊ ಫಾರ್‍ಲಾ. ಜಾಗೊ ಮೆಜ್ತಾನಾ ಶಿಂತ್ರ್ಯಾಂನಿ ಭಿತರ್ ಘಾಲಾ ಮ್ಹಣೊನ್ ಫಾವೊಸ್ತಿನ್‌ಬಾಯ್‌ಚೆಂ ಕಂಪ್ಲೈಂಟ್ ಜಾವ್ನಾಸ್‌ಲ್ಲೆಂ.

ಇಸ್ರಾಯೆಲಾಕ್ ಆದೇವ್ಸ್ ಮಾಗೊನ್ ಆಯಿಲ್ಲ್ಯಾಉಪ್ರಾಂತ್ ಥಂಯ್ಚ್ಯಾ ಅನ್ಭೋಗಾಂತ್ ಆಪ್ಲ್ಯಾ ಜಾಗ್ಯಾರ್ ಆಧುನಿಕ್ ತಾಂತ್ರಿಕತೆಂತ್ ಕೃಷಿ ಕರ್‍ಚೆಂ ಪಳೆವ್ನ್ ಫಾವೊಸ್ತಿನಾಕ್ ಮೊಸೊರ್ ಮ್ಹಣೊನ್ ಬೆಜ್ಮ್ಯಾಬಾಚಿ ಪಿರ್ಯಾದ್.

ಪಾಗೊರಾಕ್ ತೆಂಕುನ್ ಮಾಡಾ ರೊಂಪಿಯೊ ದವರ್‍ಲ್ಯಾಂತ್ ಆಪ್ಲ್ಯಾ ಪಾಕ್ಸಾರ್ ನಾರ್ಲ್ ಪಡೊನ್ ನಳೆ ಫುಟ್ತಾತ್ ಮ್ಹಣೊನ್ ಫಾವೊಸ್ತಿನಾಚೆಂ ರುದಾನ್ ತರ್ ಪಡ್‌ಲ್ಲಿಂ ಮೊಡ್ಲಾಂ ಆನಿ ನಾರ್ಲ್ ಚೊರಿ ಕರ್‍ತಾ ಮ್ಹಣೊನ್ ಬೆಜ್ಮ್ಯಾಬಾಚಿಂ ದುರಾಂ!

ಪೆಟ್ಯಾಕ್ ವಿಕಾಳ್ ಖಾಣ್ ದೀವ್ನ್ ಜಿವಿಶಿಂ ಮಾರ್ಲಾ ಮ್ಹಣ್ ಪಾವೊಸ್ತಿನಾನ್ ಬೆಜ್ಮ್ಯಾಬಾಚೆರ್ ಗಂಭೀರ್ ಆರೋಪ್ ಘಾಲ್ಲೊ ತರ್ ಗೊರ್ವಾಂಚ್ಯಾ ಗೊಟ್ಯಾ ಥಾವ್ನ್ ಯೆಂವ್ಚೆಂ ಮ್ಹೆಳೆಂ ಉದಕ್ ಆಪ್ಲ್ಯಾ ಪಾಗೊರಾ ಮುಳಾಂತ್ ವ್ಹಾಳೊಂಕ್ ದಿಲಾ ಮ್ಹಣೊನ್ ಬೆಜ್ಮ್ಯಾಬಾಚೊ ಗಾಲಾಟೊ!!

ಕಿತ್ಲೆಶ್ಯಾ ವರ್‍ಸಾಂ ಥಾವ್ನ್ ಏಕ್ ನ್ಹಯ್ ತರ್ ಅನ್ಯೆಕಾ ಕಾರಣಾಂತ್ ಝಗ್ಡೆಂ! ಸುತ್ತುರಾಂತ್ಲಿಂ ಫಾವೊಸ್ತಿನಾಕ್ ಗುಪ್ತಿಂ ಸಾಂಗಾತ್ ದಿತಾಲಿಂ ತರೀ ಉಗ್ತ್ಯಾನ್ ಬೆಜ್ಮ್ಯಬಾಚ್ಯಾ ತೊಂಡಾಕ್ ಪಡ್ಚೆಂ ಧರ್ಯಾ ಕೊಣಾಯ್ಕಿ ನಾತ್‌ಲ್ಲೆಂ. ಸಾಂಜೆಚ್ಯಾ ಉಲವ್ಣ್ಯಾಂತ್ ಕೆವಿನಾಚ್ಯಾ ಆವಯ್ನ್ ಹಾಚೆವಿಶಿಂ ಸಾಂಗ್‌ಲ್ಲೆಂ. ಆನಿ ಹ್ಯಾ ನಿಮ್ತಿಂ ವಿಗಾರಾನ್ ದುಸ್ರ್ಯಾ ಮಿಸಾ ಉಪ್ರಾಂತ್ ವಾಡ್ಯಾಗಾರಾಂಚಿ ಜಮಾತ್ ಆಪಯಿಲ್ಲಿ. ಅಶೆಂ ಕೆವಿನಾಚ್ಯಾ ಆವಯ್ನ್ ಆದ್ಲ್ಯಾ ರಾತಿಕ್‌ಚ್ ದುಸ್ರ್ಯಾ ದಿಸಾಚೆಂ ರಾಂದುನ್ ದವರ್‌ಲ್ಲೆಂ.

ತಕ್ರಾರ್!!! ತರ್ಕ್ ಆನಿ ಇತ್ಯರ್ಥ್!!!

ಇಸ್ರಾಯೆಲ್‌ಗಾರ್ ಆನಿ ಪಾವೊಸ್ತಿನಾ ಮಧೆಂ!!!

ವೊರಾಂ 12:35 ದನ್ಪರಾಚಿಂ...!!

ಮಾತಿ ಪಡೊಂಕ್ ಹಾಂಚಿ ಸದಾಂಚಿ ಕರಾಂದಾಯ್ ಕೆವಿನಾಚಿ ಮಾಂಯ್ ಕಪಾಲಾ ವಯ್ಲೊ ಘಾಮ್ ಕಾಪ್ಡಾಚ್ಯಾ ಪಾಲ್ವಾಂತ್ ಪುಸುನ್ ಮೆಟಾಂ ಚಡಾಲಾಗ್ಲಿ.
’ಖಂಯ್ಸರ್ ಪಾವ್ಲೆಂ ತುಮ್ಚೆಂ ಮೀಟಿಂಗ್?’ ಕೆವಿನಾಕ್ ಗಾಂವ್ಚ್ಯಾ ರಾಜಕೀಯಾಂತ್ ಅಛಾನಕ್ ಮ್ಹಳ್ಳ್ಯಾ ಬರಿಂ ಆಸಕ್ತ್ ಉದೆಲಿ. ದುಬಾಯ್‌ಗಾರ್ ಜೆಮಿಯಾಬ್ ಚುಪ್!!
ಕುವೆಯ್ಟ್‌ಗಾರ್ ಮಾರ್ಕಾಬಾಚಿ ಜೀಬ್ ಬಂಧ್! ಸಿಂಗಾಪುರ್‌ಗಾರ್ ಫೆಲಿಸಾಬಾಕ್ ವೊಗೆಚ್‌ಚ್ ಬಸೊಂಕ್ ಬಾಯ್ಲೆಚಿ ತಾಕಿದ್ ದಿಲ್ಲಿ ದಿಸ್ತಾ.

ಸೌದಿಗಾರ್‍ನ್ ರೆನ್ನಿ ಮೊಬಾಯ್ಲಾರ್ ಖೆಳ್ತಾಲೆಂ. ಬಾಪಯ್ ತೊಮಾಸಾಕ್ ಕಾಲ್ಚೆಂ ಪಿರ್ವೊಂಕ್ ನಾತ್‌ಲ್ಲೆಂ ದಿಸ್ತಾ ದೊಳೆ ಪಿಳಿ ಪಿಳಿ ಕರ್ನ್ ಪಳೆತಾಲೊ ಕೆವಿನಾಚಿ ಮಾಂಯ್ ಪುರ್ಪುರಾತ್ತ್ ವೆತಾಲಿ.

ತುವೆಂ ಅಶೆಂ ದುಬಾಯ್‌ಗಾರ್, ಕುವೇಯ್ಟ್‌ಗಾರ್ ಮ್ಹಣೊನ್ ಸರ್ವಾಂಕ್ ವೊಲಾಯ್ಲ್ಯಾರ್ ತಿಂಯ್ ತುಕಾ ’ಗಲ್ಫಾಗಾರ್‍ನ್’ ಮ್ಹಣೊನ್ ಆಪಯ್ತಲಿಂ. ತುಜೊ ಎಕ್ಲೊ ಪೂತ್ ದುಬಾಯಾಂತ್ ತರ್ ದುಸ್ರೊ ಬಾಯ್ರೆಯ್ನಾಂತ್ ಆನಿ ತಿಸ್ರೊ ಮಸ್ಕತ್ ಆಸಾ ನ್ಹಯ್‌ಗೀ? ಕೆವಿನಾನ್‌ಯಿ ಆವಯ್ಕ್ ಸೊಡ್ನ್ ದಿಲೆಂ ನಾಂ.

ಫಾವೊಸ್ತಿನ್ ಉಜೊ ವೊಂಕ್ತಾಲೆಂ ಇಸ್ರಾಯೆಲ್‌ಗಾರ್ ಮುಂಗುಸಾಬರಿಂ ಗುಸು ಗುಸು ಕರ್‍ನ್ ಘಡ್ಯೆಕ್ ಏಕ್ ಪಾವ್ಟಿಂ ವೊಟಾಚೆರ್ ದೀಷ್ಟ್ ಘಾಲ್ತಾಲೊ. ವಿಗಾರ್ ಮಟ್ವೆಂ ಮಾಗ್ಣೆಂ ಕರುನ್ ಭುರ್ಗ್ಯಾಂಚಿ ದೊತೊರ್‍ನ್ ಆಸಾ ಮ್ಹಣೊನ್ ಗುರ್ಕಾರ್ ಸಿಕೆರಾಮಾಚ್ಯಾ ಹಾತಾಂತ್ ಒಪ್ಪೊನ್ ದೀವ್ನ್ ಚುಕಾರಿ ಮಾರ್‍ನ್ ಧಾಂವ್ಲೊ.

ಸಿಕೆರಾಮ್... ಗುರ್ಕಾರ್! ಕೆವಿನಾಚ್ಯಾ ಆವಯ್ನ್ ದೀರ್ಘ್ ಶ್ವಾಸಾಸಂಗಿಂ ಮುಖಾರ್ಸಿಲೆಂ.

ಸಿಕರೆಮಾನ್ ಗತ್ತಾನ್ ದಾಟ್ ಮಿಶಿಯೊ ವೊಳಾಯ್ಲ್ಯೊ! ಖಾಂದ್ಯಾ ವಯ್ಲೆಂ ನಿಸ್ರಾಲ್ಲೆಂ ಶಾಲ್ ದೋನ್ ಪಾವ್ಟಿಂ ಸಾರ್ಕೆಂ ಕೆಲೆಂ. ತೀನ್ ಪಾವ್ಟಿಂ ಧವ್ಯಾ ಮುಂಡುಚೆ ಮಿರಿಯೊ ಮೆಚ್ಲ್ಯೊ ಆನಿ ಧವ್ಯಾ ಶರ್ಟಾಚೆ ಬುತಾಂವ್ ಸಾರ್ಕೆ ಕೆಲೆ. ಎಕಾಮೆಕಾ ಥಂಯ್ ಸೊಡ್‌ದೊಡ್ ದಾಖಂವ್ಚೆ ವಿಶಿಂ ಫಾವೊಸ್ತಿನಾಕ್ ಆನಿ ಇಸ್ರಾಯೆಲ್‌ಗಾರಾಕ್ ಸಮ್ಜೊಂವ್ಚ್ಯಾ ವಗ್ತಾ ಹಾತಾಚ್ಯಾ ಬೊಟಾಂಚೆ ಚ್ಯಾರ್ ಮುದಿಯೊ ಝಳ್ಕಾಂವ್ಕ್ ವಿಸ್ರಾಲೊ ನಾಂ ತಿಚ್ಯಾ ಉತ್ರಾಂನಿ ವ್ಯಂಗ್ಯ್ ಆಸ್‌ಲ್ಲೆಂ. ಸಿಕೆರಾಮ್ ನಾಸ್ತಾನಾ ಹಾಂಗಾಸರ್ ಕಿತೆಂಚ್ ಚಲಾನಾ. ಕೊಣೀ ಮೆಲ್ಲ್ಯಾರ್ ಫೊಂಡ್ ಖೊಂಡುಂಕ್ ಚಾಮಾದೊರಾಕ್ ಪರ್ಯಾಂತ್ ಹುಕುಮ್ ಸಿಕೆರಾಮಾ ಥಾವ್ನ್ಂಚ್! ಇಗರ್ಜೆಚೆ ನಾರ್ಲ್ ಕಾಡುಂಕ್ ಸಯ್ತ್ ತಾಣೆಂ ಸಾಂಗ್‌ಲ್ಲ್ಯಾ ಬರಿ ತೊಚ್ ಗುರ್ಕಾರ್ ತೊಚ್ ಆಡಳ್ತೆದಾರ್. ತಿತ್ಲೆಂ ಮಾತ್ರ್ ನ್ಹಯ್ ಆಸ್ತಾಂ ಹ್ಯಾ ವರ್‍ಸಾಚ್ಯಾ ಫಿರ್ಗಜ್ ಫೆಸ್ತಾಕ್ ತೊಚ್ ಫಿರ್ಜೆಂತ್! ಹೆನ್ರಿ ಸಿಕರೇರಿಚೆಂಚ್ ರಾಜ್ ಕೆವಿನಾಚಿ ಆವಯ್ ಪುರ್ಪುರೊನ್ಂಚ್ ವೆತಾಲಿ.

ಸಕಾಳಿಂಚ್ಯಾ ಪೇಪರ್‌ವಾಲ್ಯಾಚ್ಯಾ ಕಾಂಪಿಣೆಕ್ ಕೆವಿನ್ ಜಾಗೊ ಜಾಲೊ. ಕೆವಿನಾಚಿ ಮಾಂಯ್ ಚ್ಹಾಯೆಚ್ಯಾ ಕಪ್ಪಾಸವೆಂ ಫೊನಾರ್ ಕಾಲ್ಚ್ಯಾ ಮೀಟಿಂಗಾ ವಿಶಿಂ ಗಜಾಲಿ ಕರ್‍ತಾಲಿ.

ಅಖ್ರೇಕ್ ಖಂಯ್ಸರ್ ಪಾವ್ಲೆಂ? ಧರ್ಣಿ ವಯ್ಲೆಂ ದಿಸಾಳೆಂ ಉಬಾರ್‍ನ್ ಕೆವಿನಾನ್ ಆವಯ್ಕ್ ಸವಾಲ್ ಕೆಲೆಂ.

ಕಾಲ್ ಸಾಂಜೆರ್ ಕಾಳೊಕ್ ಪಡ್ತಾನಾ ದುಬಾಯ್‌ಗಾರ್ ಜೆಮಿ. ಕುವೇಯ್ಟ್‌ಗಾರ್ ಮಾರ್ಕು, ಸಿಂಗಾಪುರ್‌ಗಾರ್ ಫೆಲಿಸ್ ಆನಿ ಸೌದಿಗಾರ್‍ನ್ ರೆನ್ನಿ ಮೆಳೊನ್ ಫಾವೊಸ್ತಿನಾಕ್ ಧೈರ್ಯ್ ದಿತಾಲಿಂ ಕಂಯ್ ಸರ್ವಾಂ ಸಾಂಗಾತಾಂ ಮೆಳೊನ್ ಇಸ್ರಾಯೆಲ್‌ಗಾರಾಕ್ ಗಾಳಿ ಯೆಟ್ತಾಲಿಂ ಕಂಯ್. ಪಂಚಾಯತಾಕ್ ಸಾಂಗಾವ್ನ್ ಪರ್ತ್ಯಾನ್ ಜಾಗೊ ಮೆಜವ್ನ್ ಫಾರ್‌ಲ್ಲೊ ಜಾಗೊ ಪಾಟಿಂ ಘೆಂವ್ಕ್ ಸಲಹಾ ದಿತಾಲಿಂ. ಖಂಯ್ ತಕ್ರಾರ್ ವೈಯಕ್ತಿಕ್ ಜಾಲ್ಲ್ಯಾನ್ ಉಗ್ತ್ಯಾನ್ ಸಹಕಾರ್ ದಿಂವ್ಕ್ ಜಾಯ್ನಾ ತರೀ ನೈತಿಕ್ ಕುಮ್ಕೆಚೊ ಭರ್ವಸೊ ದಿಲೊ ಕಂಯ್. ಕೆವಿನಾಚಿ ಆವಯ್ ಪುಸ್ಪುಸ್ಲಿ.

ಆನಿ ತುಜೊ ಇಸ್ರಾಯೆಲ್‌ಗಾರ್? ಕೆವಿನಾನ್‌ಯಿ ಆವಾಜ್ ತಗ್ಸಿಲೊ. ತಾಚೆಂ ಸ್ಕೂಟರ್ ಸಿಕೆರಾಮಾಚ್ಯಾ ಆಂಗ್ಣಾಂತ್ ವೇಳ್ ರಾತಿಂ ಪರ್ಯಾಂತ್ ಆಸ್‌ಲ್ಲೆಂ ಕಂಯ್. ಎಕಾ ವೊರಾ ಪರ್ಯಾಂತ್ ರಾತಿಂ ಸಿಕೆರಾಮಾಗೆರ್ ದಿವೊ ಜಳ್ತಾಲೊ ಕಂಯ್. ಇಸ್ರಾಯೆಲ್‌ಗಾರ್ ಆನಿ ಸಿಕೆರಾಮ್ ರಾತ್‌ಭರ್ ಪಿಯೆವ್ನ್ ಮಜಾ ಮಾರ್‍ತಾಲೆ ಕಂಯ್ ಕೆವಿನಾಚ್ಯಾ ಆವಯ್ ಕಡೆನ್ ಸರ್ವ್ ಖಬ್ರೊ ಪಾವ್‌ಲ್ಲ್ಯೊ.
ತೆಂ ಸರ್ವ್ ಕಾಟಾಂತ್ ಪಡೊಂದಿ ಆಯ್ಚ್ಯಾ ದಿಸಾಳ್ಯಾರ್ ಕಸಲಿ ಖಬಾರ್? ಕೆವಿನಾಚೆಂ ಗಮನ್ ದಿಸಾಳ್ಯಾಚೆರ್ ಆಸಲ್ಲೆಂ ಪಳೆವ್ನ್ ಆವಯ್ನ್ ವಿಚಾರ್‍ಲೆಂ. ಕೆವಿನ್ ವಾಚಿತ್ತ್ ಗೆಲೊ!! ಆನಿ ಆವಯ್ ಆಯ್ಕಾತ್ತ್ ರಾವ್ಲಿ...

ಪಾಲೆಸ್ತಿನಾಚ್ಯಾ ಹಮಾಸ್ ಉಗ್ರಾಂಚ್ಯಾ ಪಂಗ್ಡಾನ್ ಇಸ್ರಾಯೆಲಾಚೆರ್ ತಿನ್ಶ್ಯಾಂ ವಯ್ರ್ ಮಿಸಾಯ್ಲಾಂನಿ ಹಮ್ಲೊ ಕೆಲೊ. ಹಾಚೆ ವರ್ವಿಂ ಇಸ್ರಾಯೆಲಾಂತ್ ವಸ್ತಿ ಕರ್‍ನ್ ಆಸ್ಚ್ಯಾ ತೆರಾ ಜಣಾಂಚೊ ಜೀವ್ ಉಬ್ಲೊ. ಪ್ರತಿ ಜವಾಬ್ ಜಾವ್ನ್ ಇಸ್ರಾಯೆಲಾನ್ ಫಾಲೆಸ್ತಿನಾಚ್ಯಾ ಗಾಜಾ ಪ್ರಾಂತಾಚೆರ್ ತೀವ್ರ್ ಹಲ್ಲೊ ಕೆಲೊ. ಜಾಯ್ತೊ ಲುಕ್ಸಾಣ್ ಜಾಲೊ. ತಿನ್ಶ್ಯಾಂ ವಯ್ರ್ ಲೊಕಾಂನಿ ಆಪ್ಲೊ ಜೀವ್ ಹೊಗ್ಡಾಯ್ಲೊ. ಮಧ್ಯ್ ಪ್ರಾಚ್ಯಾಂತ್ಲ್ಯಾ ಮುಸ್ಲಿಂ ರಾಷ್ಟ್ರಾಂನಿ ಇಸ್ರಾಯೆಲಾಚೆರ್ ತೀವ್ರ್ ಖಂಡನ್ ಕೆಲೆಂ ಆನಿ ಫಾಲೆಸ್ತಿನಾಕ್ ಪಾಟಿಂಬೊ ದಿಲೊ! ಅಮೇರಿಕಾನ್ ಮಧೆಂ ಪಡೊನ್ ತುರ್ತಾನ್ ಝುಜ್ ರಾವೊಂಕ್ ಜಾಯ್ ಆನಿ ಪ್ರಾಂತ್ಯಾಂತ್ ಶಾಂತಿ ರುತಾ ಕರುಂಕ್ ಸರ್ವ್ ಗಲ್ಫ್ ರಾಷ್ಟ್ರಾಂನಿಂ ಒತ್ತಾಯ್ ಕೆಲಿ!!!

*** - ***

[ಜುಲಾಯ್, 2021]

ರೊನಿ ಮೊಂತೇರೊ ಕಟ್ಪಾಡಿ: ಅಜೀಕ್ ತೀಸ್ ವರ್ಸಾಧಿಂ ಹೆಂ ಲಿಖ್ಣೆಂನಾಂವ್ ಝೆಲೊ/ಮಿತ್ರ್ ತಶೆಂಚ್ ಹೆರ್ ಕೊಂಕ್ಣಿ ಪತ್ರಾಂನಿ ಕೊಂಕ್ಣಿ ಸಾಹಿತಿಕ್ ಮೊಗಿಂಕ್ ವಳ್ಕಿಚೆಂ ಜಾಲ್ಲೆಂ. ಝೆಲೊ ಪತ್ರಾಚೆರ್ ಪರ್ಗಟುನ್ ಆಯಿಲ್ಲಿ ಹಾಚಿ ಮಟ್ವಿಕಾಣಿ ವಾಚುನ್ ಹಾಕಾ ಸೊಧುನ್ ಹಾಚ್ಯಾ ಕಟ್ಪಾಡಿ ಘರಾಂತ್ ಜಾಯ್ತಿ ಸಾಹಿತಿಕ್ ಚರ್ಚಾ ಕೆಲ್ಲಿ. ಲಾಂಬ್ ಆವ್ದೆ ಉಪ್ರಾಂತ್ ಪರತ್ ಕೊಂಕ್ಣಿ ಸಾಹಿತಿಕ್ ಸಂಸಾರಾಕ್ ಪಾಟಿಂ ಪರ್ತಲ್ಲೊ ರೊನಾಲ್ಡ್ ಮೊಂತೇರೊ  ಏಕ್ ಅಪುರ್ಭಾಯೆಚೊ ಮಟ್ವಿಕಾಣಿ ಬರಯ್ಣಾರ್. ಹಾಚ್ಯಾ ಮಟ್ವ್ಯಾ ಕಾಣಿಯಾಂಚೊ ಪಯ್ಲೊ ಜಮೊ ’ಚಾಬೂಕ್ ಆನಿ ಹೆರ್ ಕಥಾ’ ವೆಗಿಂಚ್ ಪರ್ಗಟುನ್ ಯೆಂವ್ಚಾರ್ ಆಸಾ.

ದಾಯ್ಜ್.ಕೊಮ್