ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] ಜಿಣಿಯೆ ಪಯ್ಣ್ (- ಕ್ಲೆರೆನ್ಸ್ ಕೈಕಂಬ)

ದೀಸ್ಪಡ್ತ್ಯಾ ಜಿಣ್ಯೆಚೊ ಗ್ರಾಸ್ ಸೊಧುನ್, ಅಪ್ಲ್ಯಾ ಕುಟ್ಮಾಚೊ ಬರೊ ಫುಡಾರ್ ಭಾಂದುಂಕ್ ಲಾಗುನ್ ಎಕೇಕ್ ಕಣ್ ವಿಂಚುನ್ ಘಾಮ್-ರಗತ್ ಜಿರವ್ನ್ ಪರ್ಕಿ ಗಾಂವಾಂನಿ ದೀಸ್ ಕಡ್ತೆಲ್ಯಾಂಕ್ ಜೆದ್ನಾಂ ವೆಳಾನ್ ಧರ್ಣಿಕ್ ಶೆವ್ಟಾಯ್ತಾನಾ ತಾಣಿಂ ಪಾತ್ಯೆವ್ನ್ ಆಯಿಲ್ಲ್ಯಾ ಕುಮ್ಕೆದಾರಾಂನಿ ಸಯ್ತ್ ಹಾಂಚ್ಯಾ ಹಾತಾಂಕ್ ಬಂದಿ ಕರುನ್ ಅಪಾಪ್ಲೆ ಹಾತ್ ಧುಲೆ. ಆನಿ ಸಗ್ಳೆಂ ಸಾಂಡುನ್ ಗೆಲ್ಲೆಂಚ್, ಅಪ್ಲೊಚ್ ಗಾಂವ್ ಮ್ಹಣುನ್ ಹಜಾರೊಂ ಮಯ್ಲಾಂಚ್ಯಾ ಪಯ್ಣಾಕ್ ದೆಂವ್ಲೆಲ್ಯಾಂಕ್ ಅಖೇರಿಕ್ ಅಪ್ಲ್ಯಾಚ್ ಗಾಂವಾಂತ್ ಪರ್ಕಿ ಮ್ಹಳ್ಳೆಂ ಚಿಂತಪ್ ಖರೆಂಚ್ ಜಾವ್ನ್ ಮನ್ಶಾಪಣಾಚಿಂ ಸೊಭಿತ್ ರಿತಿನ್ ಖೆಳ್ಕುಳಾಂ ಕರ್ಚೆಂ ಆಮಿ ಸಗ್ಳ್ಯಾಂನಿ ಭಂವ್ತೊಣಿ ಪಳೆವ್ನ್ ಆಸಾಂವ್. ಹ್ಯಾ ಅಮಾನವೀಯ್ ಕಾಳಾರ್ ಸಯ್ತ್ ಮನ್ಶಾಪಣಾಚೆಂ ಚಿಂತಪ್ ಕಾಂಯ್ ದಿಸ್ತಾ ತರ್ ಅಸಲ್ಯಾ ಕವಿತೆಂನಿ. ಹ್ಯೊ ಕವಿತಾಚ್ ಭಳ್ವಂತ್ ತಾಳೊ ಜಾವ್ನ್ ಕೆದ್ನಾಂಕಿ ನಿದೊನ್ ಪಡ್ಲೆಲ್ಯಾ ಕುಮ್ಕೆದಾರಾಂಚ್ಯಾ ಕಾಳ್ಜಾಂತಲ್ಯಾ ದಾರಾಂಕ್ ಬಡಂವ್ಕ್ ಸಕುಂದಿ ಮ್ಹಳ್ಳೆಂಚ್ ಮ್ಹಜೆಂ ಮಾಗಣೆಂ.

- ಸಂ

[ಕವಿತಾ] ಜಿಣಿಯೆ ಪಯ್ಣ್ (- ಕ್ಲೆರೆನ್ಸ್ ಕೈಕಂಬ)

ಜಿಣಿಯೆ ಪಯ್ಣ್ ಕಿಟಾಳ್ ಪುಟ್ಲೆಂ ಕಾಳ್ಜಾ ಗೊಪಾಂತ್ ಉಜೊ ಬಿಲ್ಕುಲ್ ನಾ.... ಭರ‍್ವಾಸೊ ರಾಸ್ ಆಕಾಸಾರ್ ಕೆಂಡಾಂ ಜಾಲ್ಲ್ಯಾ ಭಗ್ಣಾಂಚೊ ಉಮಾಳೊ ಥಾಂಬಂವ್ಕ್ ಸಕ್ಲೊ ನಾ ಧರ‍್ಣಿರ್ ಆಮ್ಚಿ ಚಾಲ್ ಆಕಾಸಾರ್ ಆಮ್ಚಿ ದೀಷ್ಟ್ ಮೊಡಾಂ ಪಾಟ್ಲೊ ಸರ‍್ಗ್ ಮಾತ್ರ್ ದಿಸ್ಲೊ ನಾ ಸಂಪೂರ‍್ಣ್ ಕರುಂಕ್ ಜಿಣಿಯೆ ವೋಳ್ ಅಸ್ಕತ್ ಮೆಟಾಂಚೆಂ ಮಿಸಾಂವ್ ತಡಿಕ್ ಮಾರ‍್ಲಿಂ ನಾಂತ್ ಕಾಳ್ಜಾ ಉಡಿಯೆ ಲ್ಹಾರಾಂ ಅಧುರೆಂ ಮಿಸಾಂವ್ ಖಾಂದ್ಯಾರ್ ಏಕ್‍ಚ್ಚ್ ಆಶಾ ಮನಾಂತ್ ಮಾಂಯ್ ಗಾಂವ್ಚೆಂ ವಾರೆಂ ಪೊಪ್ಸಾಂತ್ ಭರ‍್ಚೆಂ ದೆಶಾಚೊ ಫುಡಾರ್ ಹಾಂಡಿ ಮಾರುನ್ ಝೆಂಜ್ರಾಲ್ಲ್ಯಾ ಪಾಯಾಂನಿ ಇರೆಲ್ಲ್ಯಾ ಖಾತ್ರ್ಯಾಂನಿ ವಾಳ್ಚೆಂ ರಗಾತ್ ವಾಟೆ ಸಾರಿಯೆರ್ ಸಾಕ್ರಿಫಿಸ್ ಪೊಪ್ಸಾಕ್ ಫಾಪ್ಸುಚಿಂ ಉಸ್ವಾಸ್ ಬಾಂದ್ಚಿ; ಮರಣ್ ಹಾಡ್ಚಿ ಮಾರೆಕಾರ್ ಖ್ಯಾಸ್ತ್ ಪಿಡಾ ಹಿ ಗಾವಾರ್ ಕಾಳ್ಜಾ ಉಡಿಯೆಕ್ ಚಿಂವ್ಚ್ಯಾ ಪುಡೆಂ ಹಾಂಗಾಥಾವ್ನ್ ಪೊಳಾಪಳ್ ಉಗ್ತ್ಯಾ ವಾಟೆರ್ ಪುಣ್, ಹ್ಯಾ ಸ್ವತಂತ್ರ್ ದೆಶಾಂತ್‌ಯ್ ಆಮ್ಕಾಂ ಬಂಧಡೆಚಿ ಭಿರಾಂತ್ ಅಂತಸ್ಕ್ರನ್ ವಿಕ್‌ಲ್ಲೆ ದುಷ್ಟ್ ತೆ ಆಮ್ಚ್ಯಾ ಘಾಮಾ ತಳ್ಯಾಂತ್ ನಾಲ್ಲೆ ವಿಲಾಸಿ ಆತಾಂ, ಉದ್ಕಾ ಥೆಂಬೊ ಜಿಬೆರ್ ವೊತುನ್ ಸುಕಿ ಭಾಕ್ರಿ ಹಾತಿಂ ಉಡವ್ನ್ ಹಜಾರ್ ತಸ್ವಿರ‍್ಯೊ ಕಾಡಯ್ತಾತ್ ಪಕತ್ ಗಾಂವ್ಚ್ಯಾಕ್ ರುಜ್ವಾತ್ ದಿಂವ್ಚ್ಯಾಕ್.... ಆಮ್ಚೊ ದೇವ್ ಹಾಂಕಾ ಪಳೆಯ್ನಾ ಕಿತೆಂಗಾಯ್ ??? ಪೊಟಾ ಭುಕೆನ್ ರಗ್ತಾ ಶಿರೊ ಸುಕ್ಲ್ಯಾತ್ ಫಾತ್ರಾಂಕ್ ದಪ್ಟೊನ್ ಬೊಟಾಂ ಸುಜ್ಲ್ಯಾಂತ್ ಪುಣ್, ಆಮ್ಚ್ಯಾ ಚಾಲಿಕ್ ಕೋಣ್ ಖಾಡುಂ ಘಾಲಿತ್? ವೋಡ್ ಏಕ್‌ಚ್ಚ್ ಮನಾಂತ್ ಸ್ವಾಸ್ ಸೊಡ್ಲೊ ತರ್‌ಯ್ ಸೊಡ್ಯಾಂ ಆಮ್ಚ್ಯಾ ಗಾವಾ-ಮಾತಿಯೆಕ್ ಉಮೊ ದಿಲ್ಯಾ ಉಪ್ರಾಂತ್..... **** - ಕ್ಲೆರೆನ್ಸ್ ಕೈಕಂಬ**. [ಜೂನ್, 2020]

	ಕ್ಲೆರೆನ್ಸ್ ಕೈಕಂಬ: ನಾಂವಾರ್ ಲಿಖ್ಚೊ ಭಳ್ವಂತ್ ಕಾಣಿಯೆಗಾರ್ ಏಕ್ ಕವಿ ಸಯ್ತ್ ಮ್ಹಳ್ಳೆಂ ಯೆದೊಳ್‌ಚ್ ರುಜು ಕೆಲಾಂ. ’ತಿಂತೆರಾಂತ್ ಪಿಂತುರಾಂ (2005)’, ತಶೆಂಚ್ ’ಉತ್ರಾಂತ್ ಸೂತ್ರಾಂ (2006)’ ಮ್ಹಳ್ಳ್ಯಾ ದೋನ್ ’ಮಯ್ನ್ಯಾಳ್ಯಾ ಕವಿತಾ ಸ್ಪರ್ಧ್ಯಾಂನಿ’ ಹಾಚಿಂ ಕವಿತಾ ದಾಯ್ಜ್.ಕೊಮ್‌ಚೆರ್ ಪರ್ಗಟ್‌ಲ್ಲಿಂ. ’ದಾಯ್ಜ್ ವರ್ಸಾಚೊ ಕಥಾಕಾರ್ 2006 ಪುರಸ್ಕಾರ್ ಸಯ್ತ್ ಹಾಣೆಂ ಜೊಡ್ಲಾ. ಮಾಯಾಮೊಗಾಳ್ ವೆಕ್ತಿತ್ವಾಚ್ಯಾ ಹಾಣೆಂ ಕಥಾ, ಕಾದಂಬರಿ ಬರಂವ್ಚೆಸವೆಂ ಮಸ್ಕತಾಂತ್ಲ್ಯಾ ಒಮನಾಂತ್ ಕೊಂಕಣಿ ಸಂಘಟನಾಂತ್ ಭರ್ಪೂರ್ ವಾವ್ರ್ ಕರುನ್ ಆಸಾ.
[kovita] Jinnie poinn* (- Clarence Kaikamba)*
Dispoddtea jinnyecho gras sodhun, oplea kuttmacho boro fuddar bhandunk lagun ekek konn vinchun gham'-rogot jiroun porki gamvamni dis koddteleank jednam vellan dhornnik xeuttaitana tannim patyeun ayil'lea kumkedaramni soit hanchea hatank bondi korun opaple hat dhule. Ani sogllem sanddun gel'lench, oploch gamv mhonnun hozarom moilanchea poinnak demvleleank okherik opleach gamvant porki mholl'llem chintop khorench zaun monxaponnachim sobhit ritin khellkullam korchem ami soglleamni bhomvtonni polleun asamv. Hea omanovi-i kallar soit monxaponnachem chintop kaim dista tor osolea kovitemni. Heo kovitach bhollvont tallo zaun kednanki nidon poddlelea kumkedaranchea kallzantolea darank boddounko sokundi mholl'llench mhojem magonnem. - Som
[kovita] Jinnie poinn* (- Clarence Kaikamba)*
Jinnie poinn Kittall puttlem kallza gopant uzo bilkul na.... Bhoro‍vaso ras akasar kenddam zal'lea bhognnancho umallo thambounko soklo na dhoro‍nnir amchi chal akasar amchi dixtt moddam pattlo soro‍g matr dislo na sompuro‍nn korunk jinnie voll oskot mettanchem misamv toddik maro‍lim nant kallza uddie lharam odhurem misamv khandear ek‍chch axa monant mam-i gamvchem varem popsant bhoro‍chem dexacho fuddar handdi marun jhenjral'lea payamni irel'lea khatreamni vallchem rogat vatte sarier sakrifis popsak fapsuchim usvas bandchi; moronn haddchi marekar kheast pidda hi gavar kallza uddiek chimvchea puddem hangathaun pollapoll ugtea vatter punn, hea svotontr dexant‌y amkam bondhoddechi bhirant ontoskron vik‌l'le duxtt te amchea ghama tolleant nal'le vilasi atam, udka thembo jiber votun suki bhakri hatim uddoun hozar tosviro‍eo kaddoitat pokot gamvcheak rujvat dimvcheak.... Amcho devo hanka polleyna kitengai ??? potta bhuken rogta xiro sukleat fatrank doptton bottam sujleant punn, amchea chalik konn khaddum ghalit? vodd ek‌chch monant svas soddlo tor‌y soddeam amchea gava-matiek umo dilea uprant..... **** - Clarence Kaikamba.** [June, 2020]

	Clarence Kaikamba: Namvar likhcho bhollvont kanniegar ek kovi soit mholl'llem yedoll‌ch ruzu kelam. ’Tinterant Pinturam (2005)’, toxench ’Utrant Sutram (2006)’ mholl'llea don ’moineallea kovita spordheamni’ hachim kovita daiz.Kom'‌cher porgott‌l'lim. ’Daaiz vorsacho kothakar 2006 puroskar soit hannem zoddla. Mayamogall vektitvachea hannem kotha, kadombori boromvchesovem moskotantlea omonant konkonni songhottonant bhorpur vaur korun asa.
[कविता] जिणिये पयण (- क्लेरेन्स कैकंब)
दीस्पडत्या जिण्येचो ग्रास सोधून, अपल्या कुटमाचो बरो फुडार भांदुंक लागून एकेक कण विंचून घाम-रगत जिरवन पर्की गांवांनी दीस कडतेल्यांक जेदनां वेळान धर्णीक शेवटायताना ताणीं पात्येवन आयिल्ल्या कुमकेदारांनी सयत हांच्या हातांक बंदी करून अपापले हात धुले. आनी सगळें सांडून गेल्लेंच, अपलोच गांव म्हणून हजारों मयलांच्या पयणाक देंवलेल्यांक अखेरीक अपल्याच गांवांत पर्की म्हळ्ळें चिंतप खरेंच जावन मनशापणाचीं सोभीत रितीन खेळकुळां कर्चें आमी सगळ्यांनी भंवतोणी पळेवन आसांव. ह्या अमानवीय काळार सयत मनशापणाचें चिंतप कांय दिसता तर असल्या कवितेंनी. ह्यो कविताच भळवंत ताळो जावन केदनांकी निदोन पडलेल्या कुमकेदारांच्या काळजांतल्या दारांक बडवंक सकुंदी म्हळ्ळेंच म्हजें मागणें. - सं
[कविता] जिणिये पयण (- क्लेरेन्स कैकंब)
जिणिये पयण किटाळ पुटलें काळजा गोपांत उजो बिल्कूल ना.... भर‍्वासो रास आकासार केंडां जाल्ल्या भगणांचो उमाळो थांबवंक सकलो ना धर‍्णीर आमची चाल आकासार आमची दीषट मोडां पाटलो सर‍्ग मात्र दिसलो ना संपूर‍्ण करुंक जिणिये वोळ असकत मेटांचें मिसांव तडीक मार‍्लीं नांत काळजा उडिये ल्हारां अधुरें मिसांव खांद्यार एक‍च्च आशा मनांत मांय गांवचें वारें पोप्सांत भर‍्चें देशाचो फुडार हांडी मारून झेंज्राल्ल्या पायांनी इरेल्ल्या खातऱ्यांनी वाळचें रगात वाटे सारियेर साक्रिफीस पोप्साक फाप्सुचीं उस्वास बांदची; मरण हाडची मारेकार ख्यासत पिडा ही गावार काळजा उडियेक चिंवच्या पुडें हांगाथावन पोळापळ उग्त्या वाटेर पूण, ह्या स्वतंत्र देशांत‌य आमकां बंधडेची भिरांत अंतसक्रन वीक‌ल्ले दुषट ते आमच्या घामा तळ्यांत नाल्ले विलासी आतां, उदका थेंबो जिबेर वोतून सुकी भाक्री हातीं उडवन हजार तस्वीर‍्यो काडयतात पकत गांवच्याक रुज्वात दिंवच्याक.... आमचो देव हांका पळेयना कितेंगाय ??? पोटा भुकेन रग्ता शिरो सुकल्यात फात्रांक दपटोन बोटां सुजल्यांत पूण, आमच्या चालीक कोण खाडूं घालीत? वोड एक‌च्च मनांत स्वास सोडलो तर‌य सोड्यां आमच्या गावा-मातियेक उमो दिल्या उपरांत..... **** - क्लेरेन्स कैकंब.** [जून, २०२०]

	क्लेरेन्स कैकंब: नांवार लिखचो भळवंत काणियेगार एक कवी सयत म्हळ्ळें येदोळ‌च रुजू केलां. ’तिंतेरांत पिंतुरां (२००५)’, तशेंच ’उत्रांत सूत्रां (२००६)’ म्हळ्ळ्या दोन ’मयन्याळ्या कविता स्पर्ध्यांनी’ हाचीं कविता दायज.कोम‌चेर पर्गट‌ल्लीं. ’दायज वर्साचो कथाकार २००६ पुरसकार सयत हाणें जोडला. मायामोगाळ वेक्तित्वाच्या हाणें कथा, कादंबरी बरंवचेसवें मसकतांतल्या ओमनांत कोंकणी संघटनांत भर्पूर वावर करून आसा.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.