ಕೊಂಕ್ಣಿ ಕಾರ್ಯಿಂ

ರಾವ್‌ಲ್ಲೆಂ ಘಡಿಯಾಳ್

ರಾವ್‌ಲ್ಲೆಂ ಘಡಿಯಾಳ್
ದಿಸಾಕ್ ದೋನ್ ಪಾವ್ಟಿಂ
ಸಾರ್ಕೊ ವೇಳ್ ದಾಕಯ್ತಾ ಖಂಯ್!

ಹೆತ್ತ್ ಪಿಶ್ಯಾ,
ಅಸ್ಲಿ ಆಲೋಚನ್ ಕಿತ್ಯಾ?
ರಾವ್ಲ್ಯಾರ್ ತುಕಾ ದೋನ್ ಪಾವ್ಟಿಂ
ಯೇವ್ನ್ ಪಳೆತಾ ಕೋಣ್?

ಸೆಕುಂದಾಂಕ್ ಸೆಕುಂದಾಂ
ಮಿನುಟಾಂಕ್ ಮಿನುಟಾಂ
ಘಡ್ಶಿಲ್ಯಾರ್ ಮಾತ್ರ್
ವಾಜ್ತಲ್ಯೊ ಘಾಂಟಿ.

ತುಕಾ ಹುಂಗ್ಚೆಂ ಧಾಂವ್ತಾನಾ
ಮಾತ್ರ್, ಘಾಂಟ್
ವಾಜ್ತಾನಾ ತುಜೆರ್ ನದರ್.

ಮಧೆಂ ಕೊಣೆಂಯ್
ಯಾದ್ ಕೆಲಿ ತರ್
ಫುಗಾನಾಕಾ...
ಹರ್ಯೆಕಾಂತಿ ಸ್ವಾರ್ಥ್ ಹಾಂಗಾ...

ಪಾತ್ಯೆನಾಂಯ್ ತರ್
ಥೊಡೊ ವೇಳ್ ರಾವ್.
ಪಳೆ ಸಂಸಾರಾಕ್
ಬಾರ್ಕಾಯೆನ್ ಏಕ್ ಪಾವ್ಟಿಂ
ರಾವ್‌ಲ್ಲೆಂ ಘಡಿಯಾಳ್ ಜಾವ್ನ್!!

- ರೋಹನ್ ಅಡ್ಕಬಾರೆ [ಫೆಬ್ರೆರ್ 2018]

कविता

आमच्या दीस्पडतेंत कितलेशेपावटीं आमीं वणदिच्या घडियाळाचेर नदर घाल्तांव, हाताचेर भांद‌ल्ल्या वोचाचेर नदर घाल्तांव पूण त्या घड्याळाचे दोन कांटे जिण्येलिसांव दिंवचें एका कवीक नासताना आनी कोणाक दिसत? जिण्येचो खरो मतलब‌च्च व्हाळचें शिवाय रांवचें न्हय. देकून ज्ये कितें व्हाळता तें बाळता आनी ज्ये कितें रावता तें संप्ता. हो मतलभी संसार रुकार थावन सुकोन पडलेल्या खोलियेंत सयत अपलो मतलब सोधताना मनशामोलां, नयतिकता आनी बरें-फालें फकत मोन्यो इमाजी जावन ऊर‌तात ईर‌तात आनी जीर‌तात - हेंच चाल्त्या जिविताचें हकीगत.

रोहन अडकाबारे ल्हान प्रायेर सयत इतल्या अपुर्भायेची काव्याळ नदर घेवन आयला. ही कविता वाचतां वाचतां कोंकणी कविताशेताच्या फाल्याचेर अप्सोच्च अभिमान उदेताना म्हजें काळीज मोराचीं पाकां न्हेसून नाचताना. रोहन थावन असलिंच अपुर्भायेचीं कविता व्हाळून येंवदी म्हळ्ळेच म्हजे आंवडे.

- सं

राव‌ल्लें घडियाळ

राव‌ल्लें घडियाळ
दिसाक दोन पावटीं
सार्को वेळ दाकयता खंय!

हेत्त पिश्या,
असली आलोचन कित्या?
रावल्यार तुका दोन पावटीं
येवन पळेता कोण?

सेकुंदांक सेकुंदां
मिनुटांक मिनुटां
घडशिल्यार मात्र
वाजतल्यो घांटी.

तुका हुंगचें धांवताना
मात्र, घांट
वाजताना तुजेर नदर.

मधें कोणेंय
याद केली तर
फुगानाका...
हऱ्येकांती स्वार्थ हांगा...

पात्येनांय तर
थोडो वेळ राव.
पळे संसाराक
बार्कायेन एक पावटीं
राव‌ल्लें घडियाळ जावन!!

- रोहन अडकबारे [फेबरेर २०१८]

रोहन अडकबारे: कोंकणी कला, साहीत शेतांत आतां पर्जळून आसच्या थोड्या प्रतिभावंत युवजणां पयकिंतलो हो एकलो. अपुर्भायेचें नटन कर्चो, तशेंच अखील भारतीय मट्टाच्या कवितावाचन सर्तेंत पयलें इनाम लाभ‌ल्लो हो एक कवी सयत. सां| लुवीस कोलेजिंत पद्वेचें शिकप संपयिल्लो हो, फुडल्या दिसांनी कोंकणेचो एक भळवंत कवी जांवचीं जायतीं खुणां म्हाका तर‌यी हाचेथंय दिसून येतात.

Amchea dispoddtent kitlexepauttim amim vonnodichea ghoddiallacher nodor ghaltamv, hatacher bhand‌l'lea vochacher nodor ghaltamv punn tea ghoddeallache don kantte jinnyelisamv dimvchem eka kovik nastana ani konnak disot? jinnyecho khoro motlob‌chch vhallchem xivai ramvchem nhoi. Dekun jye kitem vhallta tem ballta ani jye kitem rauta tem sompta. Ho motlobhi somsar rukar thaun sukon poddlelea kholient soit oplo motlob sodhtana monxamolam, noitikota ani borem-falem fokot moneo imaji zaun ur‌tat ir‌tat ani jir‌tat - hench chaltea jivitachem hokigot.

Rohon oddkabare lhan prayer soit itlea opurbhayechi kaveall nodor gheun aila. Hi kovita vachtam vachtam konknni kovitaxetachea faleacher opsochch obhiman udetana mhojem kalliz morachim pakam nhesun nachtana. Rohon thaun osolinch opurbhayechim kovita vhallun yemvdi mholl'llech mhoje amvdde.

- Som.

KOVITA

Ravo‌l'lem ghoddiall

ravo‌l'lem ghoddiall
disak don pauttim
sarko vell dakoita khoim!

het't pixea,
osli alochon kitea?
raulear tuka don pauttim
yeun polleta konn?

sekundank sekundam
minuttank minuttam
ghoddxilear matr
vajtoleo ghantti.

Tuka hungchem dhamvtana
matr, ghantt
vajtana tujer nodor.

Modhem konnem-i
yad keli tor
fuganaka...
Horyekanti svarth hanga...

Patyenam-i tor
thoddo vell ravo.
Polle somsarak
barkayen ek pauttim
ravo‌l'lem ghoddiall zaun!!

- Rohan Adkabare [Febrer, 2018]

Rohan Adkabare: Konknni kola, sahit xetant atam porzollun aschea thoddea protibhaunt yuvozonnam poikintlo ho eklo. Opurbhayechem notton korcho, toxench okhil bharoti-i mott'ttachea kovitavachon sortent poilem inam' labh‌l'lo ho ek kovi soit. Sam| luvis kolejint podvechem xikop sompoyil'lo ho, fuddlea disamni konknnecho ek bhollvont kovi zamvchim zaitim khunnam mhaka tor‌yi hachethoim disun yetat.

ದಾಯ್ಜ್.ಕೊಮ್