[ಖಬಾರ್:] ವಸಯಾಂತ್ ಕೊಂಕ್ಣಿ ನಾಟಕ್ ’ನಿರ್ಮಿಲ್ಲೆಂ ಚುಕಾನಾಂ’

ವಸಯ್ (ಎಪ್ರಿಲ್ 10) (ಮುಂಬಯ್) ವಸಯ್ ಕೊಂಕಣಿ ಅಸೋಸಿಯೇಶನ್ ಸಾಂದ್ಯಾಂನಿ ಹೆಚ್ಚ್ ಎಪ್ರಿಲಾಚ್ಯಾ ಧಾ ತಾರಿಕೆರ್ ಮಾಣಿಕ್‌ಪುರಾಂತ್ಲ್ಯಾ ವೈ.ಎಮ್.ಸಿ.ಎ. ಸಭಾಸಾಲಾಂತ್ ಸರ್ವ್ ಮಾನೆಸ್ತ್ ಜೋಸೆಫ್ ಡಿ’ಸೋಜಾಚ್ಯಾ ಲಿಖ್ಣೆಥಾವ್ನ್ ಉದೆಲ್ಲೊ, ವಿಲಿಯಂ ಮಚಾದೊ ನಿರ್ದೇಶನಾಖಾಲ್ ’ನಿರ್ಮಿಲ್ಲೆಂ ಚುಕಾನಾ’ ಮ್ಹಳ್ಳೊ ನಾಟಕ್ ಖೆಳಯ್ಲೊ.

ಸಾಂಜೆರ್ 6:30 ಕ್ ಸುರ್ವಾತ್ ಜಾಲ್ಲ್ಯಾ ಕಾರ್ಯಾಂತ್ ಸಂಸ್ಥ್ಯಾಚೊ ಕಾರ್ಯದರ್ಶಿ ಜೋನ್ ಡಿ’ಸೋಜಾನ್ ವಳೊಕ್ ಕರುನ್ ದಿತೆಚ್ಚ್ ದೇಶ್‌ಭಕ್ತ್ ಗೀತ್ ’ಜನಗಣಮನ’ ಥಾವ್ನ್ ಸುರ್ವಾತ್ ಕೆಲೆಂ.

ಸಂಸ್ಥ್ಯಾಚೊ ಅಧ್ಯಕ್ಷ್ ರೆಜಿನಾಲ್ಡ್ ಸಾಂತುಮಾಯೆರಾನ್ ಆಪ್ಲ್ಯಾ ಸ್ವಾಗತ್ ಉತ್ರಾಂನಿ, ಲೊಕಾಂಕ್, ನಾಟಕಾಚ್ಯಾ ಕಲಾಕಾರಾಂಕ್ ತಶೆಂಚ್ ಮಾನ್ ಸಯ್ರ್ಯಾಂಕ್ ಸ್ವಾಗತ್ ಕೆಲೊ. ಮಾನಾಧಿಕ್ ಬಾಪ್ ಫ್ರಾನ್ಸಿಸ್ ಫೆರ್ನಾಂಡಿಸಾನ್ ಮಾಗ್ಣ್ಯಾಮುಖಾಂತ್ರ್ ಸುರ್ವಾತ್ ಕೆಲೆಂ. ತೆಚ್ಚ್‌ಪರಿಂ ಭುರ್ಗ್ಯಾಂನಿ ಆಪ್ಲೊ ಸ್ವಾಗತ್ ನಾಚ್ ಪ್ರಸ್ತುತ್ ಕೆಲೊ.

ತ್ಯೇ ಉಪ್ರಾಂತ್ ಕಾರ್ಯದರ್ಶಿ ಜೋನ್ ಡಿ’ಸೋಜಾನ್ ಮಾನಾಚ್ಯಾ ಸಯ್ರ್ಯಾಂಕ್; ಮಾ|ಬಾ|ಫ್ರಾನ್ಸಿಸ್ ಫೆರ್ನಾಂಡಿಸ್, ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾ, ಮಾ|ಬಾ|ನಜರೆತ್ ಸಿಕ್ವೇರಾ, ಮಾ|ಬಾ|ಮೆಲ್ವಿನ್ ಸಿಕ್ವೇರಾ, ಜೋಸೆಫ್ ಡಿ’ಸೋಜ, ವಿಲಿಯಮ್ ಮಚಾದೊ, ಆಧ್ಲೊ ಅಧ್ಯಕ್ಶ್ ಸ್ಟೀಫನ್ ಫೆರ್ನಾಂಡಿಸ್, ಆಧ್ಲೊ ಅಧ್ಯಕ್ಷ್ ಆನಿ ಸಲ್ಹಾದಾರ್ ಆನ್ಸಿ ಪಾಲಡ್ಕಾ ಆನಿ ಅಧ್ಯಕ್ಷ್ ರೆಜಿನಾಲ್ಡ್ ಸಾಂತುಮಾಯರ್ ಹಾಂಕಾಂ ಉಪಾಧ್ಯಕ್ಶಿಣ್ ಸರ್ವ್ ಮಾನೆಸ್ತಿಣ್ ಹಿಲ್ಡಾ ಡಿ’ಸೋಜಾ, ಜೂಲಿಯೆಟ್ ಮೊಂತೇರೊ ತಶೆಂಚ್ ಸ್ತ್ರೀಯಾಂಚ್ಯಾ ಘಟಯಾಚ್ಯಾ ಕಾರ್ಯದರ್ಶಿ ಲುವಿಜಾ ದಿ’ಸೋಜಾನ್ ಫುಲಾಂಚೊ ತುರೊ ದಿವುನ್ ವೆದಿಚೆರ್ ಸ್ವಾಗತ್ ಕೆಲೊ.

ಬರಯ್ಣಾರ್ ಜೋಸೆಫ್ ಡಿ’ಸೋಜ್, ನಿರ್ದೇಶಕ್ ವಿಲಿಯಮ್ ಮಚಾದೊ ಹಾಂಕಾಂ ಸ್ಟೀಫನ್ ಫೆರ್ನಾಂಡಿಸ್ ಆನಿ ಆನ್ಸಿ ಪಾಲಡ್ಕಾ ಹಾಣಿಂ ಫುಲಾಂಚೆ ತುರೆ ಆನಿ ಫಳಾಂ ದೀವ್ನ್ ತಶೆಂಚ್ ಶಾಲ್ ಪಾಂಗ್ರುನ್ ಮಾನ್ ಕೆಲೊ.

ಉಪ್ರಾಂತ್ ಮಾ|ಬಾ|ಫ್ರಾನ್ಸಿಸಾನ್ ಆಪ್ಲ್ಯಾ ಉಲವ್ಪಾಂತ್, ಕೊಂಕ್ಣಿ ಕಾರ್ಯಾಂಕ್ ಲೊಕಾಂನಿ ಸಹಕಾರ್ ದಿಂವ್ಚಿ ಗರ್ಜ್ ಆಸಾ, ಆನಿ ತಾಚೆಮುಖಾಂತ್ರ್ ಆಮ್ಚ್ಯಾ ಭುರ್ಗ್ಯಾಂಕ್ ಆಮಿ ಕೊಂಕ್ಣಿ ಶಿಕಂವ್ಚೊ ಆಮ್ಚೊ ಕಾಯ್ದೊ ಜಾವ್ನಾಸಾ ಮ್ಹಣಾಲೊ.

ಮುಖೆಲ್ ಸಯ್ರೊ ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾನ್ ವೆಗಿಂಚ್ ಆಪ್ಲೊ ನವೊ ನಾಟಕ್ ’ಫುಟ್‌ಲ್ಲಿ ಮೊಡ್ಕಿ’ ವಸಯಾಂತ್ ಖೆಳಂವ್ಚಿ ಭಾಸಾವ್ಣಿ ಕೆಲಿ.

ಸಂಸ್ಥ್ಯಾಚೊ ಉಪಾಧ್ಯಕ್ಷ್ ರಿಚಾರ್ಡ್ ಲುವಿಸ್, ಖಜಾಂಚಿ ಆಲ್ಬರ್ಟ್ ಡಿ’ಕೋಸ್ತಾ, ಸಹ ಕಾರ್ಯದರ್ಶಿ ಮಾನೆಸ್ತ್ ಎಡ್ವರ್ಡ್ ಗೋಮ್ಸ್, ಸಹ ಖಜಾಂಚಿ ವಿನ್ಸೆಂಟ್ ಫೆರ್ನಾಂಡಿಸ್, ಸಮಿತಿಚೆ ಸಾಂದೆ ಲಾರೆನ್ಸ್ ಮೆಂಡೊನ್ಸಾ, ಗ್ರೆಗರಿ ಮೊನಿಸ್, ನೋವೆಲ್ ಅಲ್ವಾರಿಸ್, ಹೆನ್ರಿ ಪಿಂಟೊ ಆನಿ ವಿನ್ಸೆಂಟ್ ಡಿ’ಮೆಲ್ಲೊ ವೆದಿಚೆರ್ ಉಪಸ್ತಿತ್ ಆಸ್ಲೆ.

ತ್ಯೇ ಉಪ್ರಾಂತ್ ’ನಿರ್ಮಿಲ್ಲೆಂ ಚುಕಾನಾ’ ನಾಟಕಾಚೆಂ ಪ್ರದರ್ಶನ್ ಸುರು ಜಾಲೆಂ, ಮಧ್ಯಂತರಾಂತ್ ಸಲ್ಹಾದಾರ್ ಜೋಸ್ಸಿ ಮಿನೇಸಾನ್ ನಾಟಕಾಚ್ಯಾ ಸರ್ವ್ ಕಲಾಕಾರಾಂಕ್ ಫುಲಾಂ, ಫಳಾಂ ತುರೆ ದೀವ್ನ್ ಮಾನ್ ಕೆಲೊ.

’ಕೊಂಕ್ಣಿ ಉಲಯ್, ಕೊಂಕ್ಣಿ ವಾಡಯ್ ಆನಿ ಕೊಂಕ್ಣಿ ಉರಯ್’ ಧ್ಯೇಯಾಖಾಲ್ ನಾಯ್ಗಾಂವ್, ಭಯಾಂದರ್, ನಾಲ್ಲಸೊಪಾರ, ಜೆರಿಮೆರಿ, ಮಾಲ್ವಾನಿ, ಮಿರಾರೋಡ್ ಅಶೆಂ ವೆವೆಗ್ಳ್ಯಾ ಪ್ರಾಂತ್ಯಾಂಚೆ ಕೊಂಕ್ಣಿ ಕಲಾಕಾರ್ ಆನಿ ಮೋಗಿ ಹಾಜರ್ ಆಸ್ಲೆ.

ಕಾರ್ಯಾಚಿ ಸಂಪ್ಣಿ ಉಪಾಧ್ಯಕ್ಶ್ ಎಡ್ವರ್ಡ್ ಗೋಮ್ಸಾಚ್ಯಾ ಉಪ್ಕಾರ್ ಆಟವ್ಣೆಂತ್ ಜಾಲಿ, ಆನಿ ಸ್ತ್ರೀಯಾಂಚ್ಯಾ ಘಟಕಾಚ್ಯಾ ಸಾಂದ್ಯಾಂನಿ ಅರ್ಗಾಂ ಗೀತ್ ಗಾಯ್ತಚ್ಚ್, ತೆಗಾಂ ವಿಜೇತಾಂಕ್ ’ಲಕ್ಕಿ ಕೂಪನ್ಸ್ ಡ್ರಾಚಿಂ’ ಇನಾಮಾಂ ವಾಂಟ್ಲಿಂ. ಹಾಜರ್ ಆಸ್‌ಲ್ಲ್ಯಾ ಸರ್ವ್ ಲೊಕಾಂನಿ ಹ್ಯಾ ನಾಟಕಾಚೊ ಆನಂದ್ ಜೊಡ್ಲೊ.

- ಆಮ್ಚೊ ಭಾತ್ಮಿ