![]() |
|
[ಖಬರ್:]
ವಲ್ಲಿ ಕ್ವಾಡ್ರಸಾಕ್
ದಾಯ್ಜಿ ದುಭಾಯ್ ಸಾಹಿತಿಕ್ ಪುರಸ್ಕಾರ್ 2023 |
|
ದುಭಾಯ್, ದಸೆಂಬರ್ 21:
ಫಾಮಾದ್ ಕೊಂಕಣಿ ಸಾಹಿತಿ, ವಾವ್ರಾಡಿ, ಕಾದಂಬರಿಕಾರ್,
ಕಥಾಕಾರ್, ಕವಿ ವಲ್ಲಿ ಕ್ವಾಡ್ರಸಾಕ್ 2023 ಇಸ್ವೆಚೊ
ಪ್ರತಿಶ್ಟಿತ್ ದಾಯ್ಜಿ ದುಭಾಯ್ ಸಾಹಿತಿಕ್ ಪುರಸ್ಕಾರಾಕ್
ವಿಂಚ್ಲಾ. ದಸೆಂಬರ್ 18 ತಾರಿಕೆರ್ ದುಭಯಾಂತ್ ಚಲ್‌ಲ್ಲ್ಯಾ
ದಾಯ್ಜಿ ದುಭಾಯ್ ಜೆರಾಲ್ ಜಮಾತೆಚೆರ್ ವಿಂಚವ್ಣ್ ಜಾಲಿ.
ವಲ್ಲಿ ಕ್ವಾಡ್ರಸ್ (23
ಜುಲಾಯ್ 1967, ಅಜೆಕಾರ್) ಹಾಣೆಂ 1984 ಇಸ್ವೆಂತ್ ಅಪ್ಲಿ
ಸಾಹಿತಿಕ್ ಸುರ್ವಾತ್ ಕೆಲ್ಲೊ ಏಕ್ ಬರವ್ಪಿ, ಸಂಪಾದಕ್,
ಅಂಕಣ್‌ಕಾರ್, ವಿಮರ್ಶಕ್, ಭಾಶಾಂತರ್/ಲಿಪಿಯಂತರ್‌ಕಾರ್
ತಶೆಂಚ್ ಪ್ರಾಧ್ಯಾಪಕ್. 250 ವಯ್ರ್ ಮೊಟ್ವ್ಯೊ ಕಥಾ, 350
ವಯ್ರ್ ಕವಿತಾ, 6 ಕಾದಂಬರಿ, 250 ವಯ್ರ್ ಲೇಖನಾಂ, 8
ನಾಟ್ಕುಳೆ ಬರಯಿಲ್ಲ್ಯಾ ಹಾಚಿಂ ಬರ್ಪಾಂ ಇಂಗ್ಲಿಶ್,
ಕನ್ನಡ, ಹಿಂದಿ, ಮರಾಠಿ ಆನಿ ತುಳು ಭಾಶೆಂನಿ ತರ್ಜಣ್
ಜಾವ್ನ್ ವೆವೆಗ್ಳ್ಯಾ ನೇಮಾಳ್ಯಾಂನಿ ತಶೆಂಚ್
ಜಾಳಿಜಾಗ್ಯಾಂನಿ ಪರ್ಗಟ್ಲ್ಯಾಂತ್. ಅಪ್ಲ್ಯಾ ಆಶಾವಾದಿ
ಪ್ರಕಾಶನ್ ಥಾವ್ನ್ ಪನ್ನಾಸ್ ಪುಸ್ತಕಾಂ (ಪ್ರಿಂಟ್), 40
ಡಿಜಿಟಲ್ ಇ-ಪುಸ್ತಕಾಂ, ಆನಿ 130 ಮೊಟ್ವ್ಯೊ ಕಥಾ
ಆಟಾಪ್ಚಿಂ ಪಾಂಚ್ ಆಡಿಯೊ ಪುಸ್ತಕಾಂ ಯೂ-ಟ್ಯೂಬ್
ಚ್ಯನಲಾಚೆರ್ ಪ್ರಸಾರ್ ಕೆಲ್ಯಾಂತ್. ಗೊಂಯ್ಚ್ಯಾ
ಕೊಂಕಣ್‌ಗಾರ್ ಪ್ರಕಾಶನ್ ಥಾವ್ನ್ ಲಿಪಿಯಂತರ್, ಸಂಪಾದನ್
ಕೆಲ್ಲಿಂ ಪಾಂಚ್ ಪುಸ್ತಕಾಂ ಪರ್ಗಟ್ಲ್ಯಾಂತ್. ರಾಶ್ಟ್ರೀಯ್
ಮಟ್ಟಾಚ್ಯಾ ಕೊಂಕಣಿ ಮೊಟ್ವ್ಯಾ ಕಥೆಂಚಿಂ ತೀನ್ ಸಂಕಲನಾಂ
ಸಂಪಾದನ್ ಕರುನ್ ಪರ್ಗಟ್ಲ್ಯಾಂತ್; 20ವ್ಯಾ ಶೆಕ್ಡ್ಯಾಚ್ಯೊ
ಕೊಂಕಣಿ ಕಥಾ (2006), ಸುರ‍್ಯೊ ಉದೆತಾ (2019), ಸುರ‍್ಯೊ
ಉದೆಲಾ (2022).
ದಾಯ್ಜ್.ಕೊಮ್
(2003-2011), ಪಯ್ಣಾರಿ.ಕೊಮ್ (2015 ಥಾವ್ನ್) ಸಾಹಿತಿಕ್
ಜಾಳಿಜಾಗ್ಯಾಚೊ ತಶೆಂಚ್ ಪಯ್ಣಾರಿ ಸಾಹಿತಿಕ್ ಡಿಜಿಟಲ್
ಜರ್ನಲಾಚೊ, ಕೊಂಕಣ್‌ಗಾರ್ ಪ್ರಕಾಶನ್ ಗೊಂಯ್‌ಚೊ ಸಂಪಾದಕ್
ಜಾವ್ನ್ ವಾವ್ರ್ ಕರುನ್ ಆಸ್ಚ್ಯಾ ವಲ್ಲಿ ಕ್ವಾಡ್ರಸಾಕ್
ದಿವೊ ಸಾಹಿತಿಕ್ ಪುರಸ್ಕಾರ್ (2003), ಕರ್ನಾಟಕ್ ಕೊಂಕಣಿ
ಸಾಹಿತ್ಯ್ ಅಕಾಡೆಮಿಚೆ ಪುರಸ್ಕಾರ್ ತೀನ್ ಪಾವ್ಟಿಂ
ಮೆಳ್ಳ್ಯಾತ್; ಕವಿತಾಪಾಠ್ (2005), ದರ‍್ಭಾರಾಂತ್ಲಿ
ಪಿಂರ‍್ಗೊಣ್ (2006), ಬಂದ್ (2018). ತಶೆಂಚ್ ಮಥಾಯಸ್
ಕುಟ್ಮಾಚೊ ಕವಿತಾ ಟ್ರಸ್ಟಾಚೊ ಪುರಸ್ಕಾರ್ (2019)
ಲಾಭ್ಲಾ. ಮಿನಿಸ್ಟ್ರಿ ಆಫ್ ಕಲ್ಚರ್ ಥಾವ್ನ್ 2021-23 ಚೊ
ಸೀನಿಯರ್ ಫೆಲೋಶಿಪ್ (ಸಾಹಿತ್ಯ್) ಲಾಭ್ಲಾ.
ಸಾಹಿತಿಕ್ ವಾವ್ರಾಶಿವಾಯ್
50 ವಯ್ರ್ ರಾಶ್ಟ್ರೀಯ್/ಅಂತರ್‌ರಾಶ್ಟ್ರೀಯ್ ಕಾಮಾಸಾಳಾಂ,
ವೆಬಿನಾರಾಂ ಗೊಂಯ್ ವಿಶ್ವ್‌ವಿಧ್ಯಾಲಯ್ ಆನಿ ಮಂಗ್ಳುರ್
ವಿಶ್ವ್‍ವಿಧ್ಯಾಲಯಾಂನಿ ತಶೆಂಚ್ ಗೊಂಯ್, ಮಂಗ್ಳುರ್‌ಚ್ಯಾ
ಸಭಾರ್ ಕೊಲೆಜಿಂನಿ ಚಲಯ್ಲ್ಯಾಂತ್. ಮ್ಯಾನೇಜ್‌ಮೆಂಟಾಂತ್
ಪದ್ಯುತ್ತರ್ (MBA) ಶಿಕುನ್ ಪ್ರಸ್ತುತ್ ಶ್ರೀನಿವಾಸ್
ಯುನಿವರ್ಸಿಟಿ ಕೋಲೆಜ್ ಆಫ್ ಇಂಜಿನಿಯರಿಂಗ್ ಎಂಡ್
ಟೆಕ್ನೋಲೊಜೀಸ್ ಹಾಂಗಾಸರ್ ಪ್ರಾಧ್ಯಾಪಕ್ ಜಾವ್ನಾಸಾ
ತಶೆಂಚ್ ಪಿ.ಎಚ್.ಡಿ.ಚಿ ತಯಾರಾಯ್ ಕರುನ್ ಆಸಾ. ಓವೇಶನ್
ವರ್ಕ್‌ಪ್ಲೇಸ್ ಸರ್ವಿಸಸ್ ಮ್ಹಳ್ಳ್ಯಾ ಎಕಾ ಅಮೆರಿಕಾಚ್ಯಾ
ಬಹು-ರಾಶ್ಟ್ರೀಯ್ ಕಂಪ್ಣೆಚೊ ಗ್ಲೋಬಲ್ ಡೆಲಿವರಿ ಆನಿ
ಕಂಪ್ಲಾಯನ್ಸ್ ಹೆಡ್ ಜಾವ್ನ್ ವಾವ್ರ್ ಕರುನ್ ಆಸಾ.
ಕೊಂಕ್ಣೆಂತ್ಲೊ ಭೋವ್
ಪ್ರತಿಶ್ಟಿತ್ ’ದಾಯ್ಜಿ ದುಭಾಯ್ ಸಾಹಿತಿಕ್ ಪುರಸ್ಕಾರ್’
2023 ಇಸ್ವೆಚ್ಯಾ ಎಪ್ರಿಲಾಚ್ಯಾ 30 ತಾರಿಕೆರ್
ದುಭಾಯಾಂತ್ಲ್ಯಾ ’ಎಮಿರೇಟ್ಸ್ ಆಡಿಟೋರಿಯಮ್’ ಹಾಂಗಾಸರ್
ಚಲುಂಕ್ ಆಸ್ಚ್ಯಾ ದಾಯ್ಜಿ ದುಭಾಯ್ ವರ್ಸುಗೆಚ್ಯಾ
ಕಾರ್ಯಾವೆಳಾರ್ ಲಾಭ್ತಲೊ. ಪುರಸ್ಕಾರ್ ರು.75000,
ಯಾದಿಸ್ತಿಕಾ ತಶೆಂಚ್ ಮಾನ್‌ಪತ್ರ್ ಆಟಾಪ್ತಾ. ಪಾಟ್ಲ್ಯಾ
ದೋನ್ ದಾಕಡ್ಯಾಂ ಥಾವ್ನ್ ದಾಯ್ಜಿ ದುಭಾಯ್ ಸಂಘಟನ್ ಕೊಂಕಣಿ
ಸಾಹಿತಿಂಕ್ ಪಾಟಿಂಬೊ/ಪ್ರೋತ್ಸಾಹ್ ದಿಂವ್ಚೆಂ ಮಿಸಾಂವ್
ಚಲವ್ನ್ ಆಯ್ಲಾಂ.
|
|
[खबर:]
वल्ली क्वाड्रसाक दायजी दुभाय साहितीक पुरसकार
२०२३ |
|
दुभाय, दसेंबर २१: फामाद कोंकणी साहिती, वावराडी,
कादंबरिकार, कथाकार, कवी वल्ली क्वाड्रसाक २०२३
इस्वेचो प्रतिश्टीत दायजी दुभाय साहितीक पुरसकाराक
विंचला. दसेंबर १८ तारिकेर दुभयांत चलल्ल्या
दायजी दुभाय जेराल जमातेचेर विंचवण जाली.
वल्ली क्वाड्रस (२३ जुलाय १९६७, अजेकार) हाणें
१९८४ इस्वेंत अपली साहितीक सुर्वात केल्लो एक
बरवपी, संपादक, अंकणकार, विमर्शक,
भाशांतर/लिपियंतरकार तशेंच प्राध्यापक. २५० वयर
मोटव्यो कथा, ३५० वयर कविता, ६ कादंबरी, २५० वयर
लेखनां, ८ नाटकुळे बरयिल्ल्या हाचीं बर्पां
इंगलीश, कन्नड, हिंदी, मराठी आनी तुळू भाशेंनी
तर्जण जावन वेवेगळ्या नेमाळ्यांनी तशेंच
जाळिजाग्यांनी पर्गटल्यांत. अपल्या आशावादी
प्रकाशन थावन पन्नास पुसतकां (प्रिंट), ४० डिजिटल
ई-पुसतकां, आनी १३० मोटव्यो कथा आटापचीं पांच
आडियो पुसतकां यू-ट्यूब च्यनलाचेर प्रसार
केल्यांत. गोंयच्या कोंकणगार प्रकाशन थावन
लिपियंतर, संपादन केल्लीं पांच पुसतकां
पर्गटल्यांत. राश्ट्रीय मट्टाच्या कोंकणी मोटव्या
कथेंचीं तीन संकलनां संपादन करून पर्गटल्यांत;
२०व्या शेकड्याच्यो कोंकणी कथा (२००६), सूर्यो
उदेता (२०१९), सूर्यो उदेला (२०२२).
दायज.कोम (२००३-२१११), पयणारी.कोम (२०१५ थावन)
साहितीक जाळिजाग्याचो तशेंच पयणारी साहितीक डिजिटल
जर्नलाचो, कोंकणगार प्रकाशन गोंयचो संपादक जावन
वावर करून आसच्या वल्ली क्वाड्रसाक दिवो साहितीक
पुरसकार (२००३), कर्नाटक कोंकणी साहित्य अकाडेमिचे
पुरसकार तीन पावटीं मेळ्ळ्यात; कवितापाठ (२००५),
दर्भारांतली पिंर्गोण (२००६), बंद (२०१८). तशेंच
मथायस कुटमाचो कविता ट्रसटाचो पुरसकार (२०१८)
लाभला. मिनिसट्री आफ कल्चर थावन २०२१-२३ चो सीनियर
फेलोशीप (साहित्य) लाभला.
साहितीक
वावराशिवाय ५० वयर राश्ट्रीय/अंतरराश्ट्रीय
कामासाळां, वेबिनारां गोंय विश्वविध्यालय आनी
मंगळूर विश्वविध्यालयांनी तशेंच गोंय,
मंगळूरच्या सभार कोलेजिंनी चलयल्यांत.
म्यानेजमेंटांत पद्युत्तर (MBA) शिकून प्रसतूत
श्रीनिवास युनिवर्सिटी कोलेज आफ इंजिनियरिंग एंड
टेक्नोलोजीस हांगासर प्राध्यापक जावनासा तशेंच
पी.एच.डी.ची तयाराय करून आसा. ओवेशन वर्कप्लेस
सर्विसस म्हळ्ळ्या एका अमेरिकाच्या बहू-राश्ट्रीय
कंपणेचो ग्लोबल डेलिवरी आनी कंपलायन्स हेड जावन
वावर करून आसा.
कोंकणेंतलो भोव प्रतिश्टीत
’दायजी दुभाय साहितीक पुरसकार’ २०२३ इस्वेच्या
एपरिलाच्या ३० तारिकेर दुभायांतल्या ’एमिरेटस
आडिटोरियम’ हांगासर चलुंक आसच्या दायजी दुभाय
वर्सुगेच्या काऱ्यावेळार लाभतलो. पुरसकार
रू.७५०००, यादिसतिका तशेंच मानपत्र आटाप्ता.
पाटल्या दोन दाकड्यां थावन दायजी दुभाय संघटन
कोंकणी साहितिंक पाटिंबो/प्रोत्साह दिंवचें मिसांव
चलवन आयलां. |
|
[Kobor] Valley
Quadrosak Daijiduboi Sahitik Puroskar 2023 |
|
|
|
Dubai, Dosembr 21:
Famad konkanni sahiti, vauraddi, kadomborikar,
kotakar, kovi Valley Quadrosak 2023 isvecho
protixttit Daiji Dubai Sahitik Puroskarak
vinchla. dasembr 18 tariker Duboiyant chol'lea
daiji duboi jeral jomatecher hi vinchounn zali.
Valley Quadros
(23 Jul 1967, Ajekar) hannem 1984 isvent apli
sahitik suruat kello ek boroupi, sompadak,
onkonnkar, vimorxok, bhaxantor/lipiontorkar
toxens pradheapok. 250 voir motveo kotha, 350
vois kovita, 6 kadambori, 250 voir lekhonam, 8
nattkulle boroilea hachim borpam English,
Kannad, Hindi, Marathi ani Tulu
baxemni torjonn zaun vevegllea nemalleani
toxench zallijageani porgottleant. Oplea
Ashawadi Prakashan thaun 50 pustok (Print),
40 pustok ddijitol (e-book), ani 130 mottveo
kotha ottapchim 5 adio pustokam Yu-Tube
channelacher prosar keleant. Goenchea Konkonngar
Prokaxon thaun lipiontor, sompadon kellim 5
pustokam porgottleant. Raxttriy mottachea
konkanni mottvea kothenchim 3 sonkolonam; 20 Vea
Xekddeacheo Konkanni Kota (2006), Sureo Udeta
(2019), Suryo Udela (2022) sompadon korun
porgottleant.
Daaiz.com
(2003-2011),
Poinnari.com (2015 thaun) sahitik
zallijagecho toxench Poinnari dijittol sahitik
jornolacho, Konkonngar Prokoxonacho sompadok
zaun vaur korun aschea Valley Quadrosak
2003 isvent 'Divo Sahitik Puroskar', Karnaka
Konkonni Sahitia Akademiche pustok puroskar 3
fautt; Kavithapatt (2005), Dorbharantli Pirngonn
(2006), Bondh (2018) melleat. Ministry of
Culture thaun 2021-23 cho 'Senior Fellowship
(Literature)' mella.
Sahitik vauraxivai 50
voir raxttriy/ontor'raxttriy kamasollam,
webinaram Goa University, Mangalore University
toxench sobhar collejint choloileant.
Management postgraduate zaun asco ho
soddeak Srinivas University Mangalore
thaun PhD toyarai korun asa ani
Professor zaun vaur koron asa. Ovation Work
Place Services mullea USA based MNC
cher 'Global head of Delivery and
Compliance' kam korun asa. Prostut Mumboint
vosti korun asa.
Konkannintlo bhov
protixttit 'Daiji Duboi Sahitik Puroskar' 2023
isvechea 30 tariker Duboiantlea 'Emirates
Auditorium' hangasor colunk aschea Daiji Dubai
varsugechea kareavellar labhtolo. Puroskar Rs.
75,000, Yadistika ani Manpotr attapta. Pattlea
don doxokam thaun Daiji Dubai songhotton
Konkanni sahitik pattimbo/protsau diunchem
misamv choloun ailam. |
|
|
ದಾಯ್ಜಿದುಭಾಯ್
2020 ಪುರಸ್ಕಾರ್
ದಾಯ್ಜಿದುಭಾಯ್ 2018 ಪುರಸ್ಕಾರ್
ದಾಯ್ಜಿದುಭಾಯ್ 2017 ಪುರಸ್ಕಾರ್
ದಾಯ್ಜಿದುಭಾಯ್ 2016 ಪುರಸ್ಕಾರ್ |
|
2004 ಥಾವ್ನ್
2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ
ದಾಯ್ಜ್.ಕೊಮ್ ಚೆರ್
ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ
ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್
ಲಾಭಯ್ತೆಲ್ಯಾಂವ್. | |
| |
![]() |
|
.gif){kind=small}
