![]() |
|
[ಲೇಕನ್]
ಡಿಜಿಟಲ್
ಮಾಧ್ಯಮಾಂನಿ ಕೊಂಕಣಿ ಸಾಹಿತಿಕ್ ಸ್ಪರ್ಧೆ |
|
|
|
ಮನ್ಶ್ಯಾಚೆಂ ಜಿವಿತ್ ಎಕ್ ಸ್ವರ್ಧೊ ಖಂಡಿತ್ ನ್ಹಯ್, ಪುಣ್
ಹರ್ಯೆಕ್ಲ್ಯಾನ್ ಜಿವಿತಾಚೆಂ ಪಯ್ಣ್ ಕರುಂಕ್ ಅಸಾ ಅನಿ
ಅಸಲೆಂ ಪಯ್ಣ್ ಉಲ್ಲಾಸಿತ್, ಉತ್ತೇಜಿತ್ ಜಾವ್ನ್ ಅಪ್ಣಾಂಕ್
ಅನಿ ಹೆರಾಂಚ್ಯಾ ಉಗ್ಡಾಸಾಂತ್ ಉರಾಜಯ್ ತರ್, ಸ್ವರ್ಧೊ
ಆಸುಂಕ್ ಜಾಯ್. ಅಸಲ್ಯಾ ಸ್ವರ್ಧ್ಯಾಂನಿ ಹಾಂವೆಂ ಮ್ಹಾಕಾಚ್
ಸಲ್ವೊಂಕ್ ಅಸಾ. ಪ್ರಖ್ಯಾತ್ ಗಾವ್ಪಿಣ್ ಸೆಲಿನ್ ಡಿಯೊನ್ (Celine
Dion) ಅಶೆಂ ಮ್ಹಣ್ತಾ 'I am not in
competition with anybody but myself. My goal is
to beat my last performenece' ಹ್ಯಾಚ್
ಕಾರಣಾಕ್ ಲಾಗುನ್ ಜಾಂವ್ಕ್ ಪುರೊ ಸೆಲಿನ್ ಡಿಯೊನ್
(Celine Dion) ಹಿಚೆ ಸಂಗೀತ್ ಪಯ್ಣ್, ಹಿಣೆಂ ಗಾಯಿಲ್ಲಿ
ಪೊದಾಂ ಸಬಾರ್ ಲೊಕಾಚ್ಯಾ ಉಡಾಸಾಂತ್ ಅಸಾತ್.
ಪಯ್ಣಾರಿ-ವೀಜ್ ಹಾಣಿಂ ಮಾಂಡುನ್ ಹಾಡ್ಲ್ಲ್ಯಾ 2019
ಇಸ್ವೆಂತ್ಲ್ಯಾ ದೆ| ವಿಲ್ಪಿ ರೆಬಿಂಬಸ್ ಸ್ಮಾರಕ್
ರಾಶ್ಟ್ರೀಯ್ ಮಟ್ಟಾಚ್ಯಾ ಸಾಹಿತಿಕ್ ಸ್ವರ್ಧ್ಯಾಚ್ಯಾ
ಬರ್ಪಾಂಚೆರ್ ನದರ್ ಘಾಲ್ನ್ ಬರಯಿಲ್ಲ್ಯಾ ಲೇಖನಾಚೆರ್ ಬಾಪ್
ಜೇಸನ್ ಪಿಂಟೊ ಅಶೆಂ ಬರಯ್ತಾ "ಸಾಹಿತ್ಯಾಂತ್
ಜಾಯ್ತೆ ಪ್ರಕಾರ್ ಅಸಾತ್, ಫಕತ್ ಹೆಂಚ್ ’ಸಾಹಿತಿಕ್
ಬರವ್ಪ್’ ಅನಿ ಹೆಂ ’ಅ-ಸಾಹಿತಿಕ್ ಬರವ್ಪ್’ ಮ್ಹಣುಂಕ್
ಅಮ್ಚ್ಯಾನ್ ಜಾಯ್ನಾ, ಹರ್ಯೆಕ್ಲೊ ಬರವ್ಪಿ ಸಮಾಜೆಂತ್
ಸುಧಾರಣ್/ಸುಧ್ರಾಪ್ ಹಾಡುಂಕ್ ಬರಯ್ತಾ, ಕೋಣ್ ಮನೊರಂಜನಾ
ಖಾತಿರ್ ಬರಯ್ತಾ, ಕೊಣೆ ಎಕ್ಲೊ ಮಹೆತ್ ಪ್ರಸಾರ್ ಕರುಂಕ್
ಬರಯ್ತಾ, ತಿಸ್ರೊ ಉತ್ರಾಂನಿ ಖೆಳುಂನ್ ಭಾಶೆಚಿ
ಗ್ರೇಸ್ತ್ಕಾಯ್ ಲೊಕಾಂ ಮಧೆಂ ಶಿಂಪ್ಡಾಯ್ತಾ.. ಇತ್ಯಾದಿ,
ಸಾಹಿತ್ಯಾವರ್ವಿಂ ಸಮಾಚೆರ್ ಅನಿ ಖರೆಪಣಿ ಅಮ್ಚ್ಯಾ
ಚಿಂತ್ಪಾಚೆರ್ ವರ್ತೊ ಪ್ರಭಾವ್ ಪಡುಂಕ್ ಸಕ್ತಾ."
ಹರ್ಯೆಕಾ ಸಾಹಿತ್ಯಾಚೆ ಮೂಳ್ ಉದ್ದೇಶ್ ಸೊಂಪ್ಯಾ ಉತ್ರಾಂನಿ
ಉಡಾಸಾಕ್ ಹಾಡ್ಚಿಂ ಹಿಂ ಉತ್ರಾಂ ಖಂಡಿತ್ ಜಾಂವ್ನ್
ಉಗ್ತ್ಯಾ ಚಿಂತ್ಪಾಕ್ ಇಡೆಂ ದಿತಾತ್.
ಎಕಾ
ಮನ್ಶಾನ್, ತಾಚೆಂ ಚಿಂತಾಪ್ ಸಾಹಿತ್ಯಾಚ್ಯಾ ಖಂಚ್ಯಾಯಿ ಎಕಾ
ಪ್ರಕಾರಾ ಮುಖಾಂತ್ರ್ ಸಮಾಜೆ ಮುಖಾರ್ ದವರ್ಯೆತ್, ಜಾಂವ್
ತಿ ಕಾಣಿ, ಕವಿತಾ, ಕಾದಂಬರಿ, ಲೇಖನ್, ನಾಟಕ್, ಸಿನೆಮಾ..
ಇತ್ಯಾದಿ, ಪುಣ್ ಹಾಂಗಾಸರ್ ಸವಾಲ್... ಅಶೆಂ ಬರಯಿಲ್ಲೆಂ
ಕೊಣ್ ಪ್ರಸಾರ್/ಪರ್ಗಟ್ ಕರ್ತಾ? ಹರ್ಯೆಕಾ ಪತ್ರಾಕ್
ತಾಂಚಿಂಚ್ ಮಳ್ಳಿಂ ಧ್ಯೇಯಾಂ ಅಸಾತ್, ಅನಿ ಹಿಂ ಪತ್ರಾಂ
ತಾಂಚ್ಯಾ ಧ್ಯೇಯಾನುಸಾರ್ ವಿಶಯ್ ಪ್ರಸಾರ್ ಕರ್ತಾತ್,
ನ್ಹಯ್ ತರ್ ಬರವ್ಪಿ ಎಕ್ ಲೊಕಾಮೊಗಾಳ್ ಲೇಖಕ್ (Established
Writer) ಮ್ಹಳ್ಳೆ ಸಂಪಾದಕಾಕ್ ಕಳಿತ್ ಅಸ್ಲ್ಯಾರ್,
ತ್ಯಾ ಬರವ್ಪ್ಯಾಚೆಂ ಸಾಹಿತ್ಯ್ ಪರ್ಗಟ್ ಕರ್ತಾತ್. ಅಸಲ್ಯಾ
ಸಂದಿಗ್ದ್ ಪರಿಸ್ಥಿತೆಂತ್, ನವ್ಯಾ ಅನಿ ಉದೆವ್ನ್ ಯೆಂವ್ಚಾ
ಸಾಹಿತಿಂಕ್ ಅಪ್ಲಿ ಸಾಹಿತಿಕ್ ಪ್ರತಿಭಾ ಸಂಸಾರಾ ಮುಕಾರ್
ಹಾಡುಂಕ್ ಆಸ್ಚಿ ವೇದಿಚ್ ಅಸಲೆ ಸಾಹಿತಿಕ್ ಸ್ಪರ್ಧೆ.
ಸಾಹಿತಿಕ್ ಸ್ವರ್ಧೆ ನವ್ಯಾ ಅನಿ ಉದೆವ್ನ್ ಯೆಂವ್ಚಾ
ಸಾಹಿತಿಕ್ ಅಪ್ಲ್ಯಾ ಪರಿಸರಾಂತ್ ಹೆರಾಂನಿ ದೆಕನಾತಲ್ಲೆಂ
ಪಳೊಂವ್ಕ್, ಅವಾಜ್ ನಾಸ್ತಾಂ ಅಯ್ಕ್ಲ್ಲೆಂ ಜ್ಯೊರಾನ್
ಸಾಗೊಂಕ್ ಅವ್ಕಾಸ್ ಕರ್ನ್ ದೀತಾತ್, ಸಾಗಾಂತಾಚ್
ಸಂಪಾದಕಾಂಚ್ಯಾ ವೊಳಿಂತ್ ನವೊ ಸಾಹಿತಿ, ವಾಚ್ಪ್ಯಾಂಕ್ ನವೊ
ಬರವ್ಪಿ ಜಲ್ಮ್ ಘೆತಾ, ಹಾಂಗಾಸರ್ ಪ್ರಮುಖ್ ಜಾವ್ನ್
ಸಮಾಜೆಚೆಂ ಬರೆಪಣ್ ಅಶೆವ್ನ್, ಅಪ್ಲಿ ಸಮಾಜ್ ಅನಿ
ಮನ್ಶ್ಯಾಂ ಖಾತಿರ್ ಅವಾಜ್ ಕರುಂಕ್ ಎಕ್ ನವೊ ಸಾಂದೊ
ಉದೆತಾ. ’ಸಾಹಿತಿಕ್ ಸ್ವರ್ಧ್ಯಾಂಕ್’ ಖಂಚ್ಯಾಯಿ ನದ್ರೆನ್
ಪಳೆಲ್ಯಾರ್ ಹಿ ಎಕ್ ಬರೆಪಣಾ ಕುಶಿನ್ ಮೆಟಾಂ ಕಾಡ್ಚಿ
ಪ್ರಕ್ರಿಯಾ ಜಾವ್ನಾಸಾ, ತೆಂ ನ್ಹಯ್ ಅಸ್ತಾಂ ಹಾಂಗಾಸರ್
ಎಕಾ ವಿಷಯಾಚೆರ್ ವಿವಿದ್ ಥರಾಂಚ್ಯಾ ಚಿಂತ್ಪಾಚೆಂ
ಸಮ್ಮೇಳನ್ ಜಾತಾ. Competition on anything is
good, because it makes everybody better ಅಸೆ
ಮಣ್ತಾ ಎಡ್ಡಿ ಕ್ಯೂ (Eddy Cue Apple Senior Vice
President ). ಕೊಂಕ್ಣಿ ಸಾಹಿತ್ಯಾಂತ್ ಅಸಲೆಂ
’ಸಾಹಿತಿಕ್ ಸ್ವರ್ಧೆ’ ಸಭಾರ್ ವರ್ಸಾಂ ಥಾವ್ನ್ ಚಲೊನ್
ಆಯ್ಲ್ಯಾತ್; ಪ್ರಿಂಟ್ ಮೀಡಿಯಾ ಆಪ್ಲ್ಯಾ ಪತ್ರಾಚೆರ್
ಪರ್ಗಟುನ್ ಯೆಂವ್ಚ್ಯಾ ಸಾಹಿತಿಕ್ ಮಟ್ಟಾಕ್ ಸುಧ್ರಾಂವ್ಕ್,
ತಶೆಂಚ್ ಪತ್ರಾಚೊ ಪ್ರಚಾರ್ ಚಡಂವ್ಕ್ ಅಸಲೆ ಸ್ಪರ್ದೆ
ಚಲವ್ನ್ ಸಾಹಿತಿಕ್ ಪ್ರತಿಭಾ ಆಸ್ಚ್ಯಾಂಕ್ ಏಕ್ ಆವ್ಕಾಸ್
ರಚುನ್ ದಿತಾ. ಅಸಲೆಚ್ ಪ್ರಯೋಗ್ ಡಿಜಿಟಲ್ ಮಾಧ್ಯಮಾಂನಿ
ಅಸಲ್ಯಾ ಸಬಾರ್ ಸಾಹಿತಿಕ್ ಸ್ವರ್ಧ್ಯಾಂ ಮುಖಾಂತ್ರ್ ಸಬಾರ್
ನವ್ಯಾ ಸಾಹಿತಿಂಕ್ ಅವ್ಕಾಸ್ ಕರ್ನ್ ದಿಲ್ಲೊ ಪ್ರಶಂಶನೀಯಾ
ಜಾವ್ನಾಸಾ, ಅಶೆಂ ಹ್ಯಾ ಪತ್ರಾಂನಿ ಸಾಹಿತಿಕ್
ಸ್ವರ್ಧ್ಯಾಂಧ್ವಾರಿ ರೊಯಿಲ್ಲೆ ಭಿಂ ಅಜ್ ಸಭಾರ್
ನಾವಾಡ್ದಿಕ್ ಸಾಹಿತಿಂಚ್ಯಾ ನಾಂವಾನ್ ಕೊಂಕ್ಣಿ
ಸಾಹಿತ್ಯಾಂತ್ ಫಳ್ ದೀವ್ನ್ ಅಸಾತ್.
ಡಿಜಿಟಲ್
ಮಾಧ್ಯಮಾಕ್ ಲಾಂಬ್ ಕಾಳಾಚೊ ಇತಿಹಾಸ್ ನಾ. 2000 ಇಸ್ವೆ
ಉಪ್ರಾಂತ್ ಕೊಂಕಣಿ ಸಾಹಿತಿಕ್ ಜಾಳಿಜಾಗೆ ಉದೆಲ್ಲೆ
ಮ್ಹಣ್ತಚ್. ತೆದ್ನಾ ಥಾವ್ನ್ ಆಜ್ ಪಾಸೊನ್ ಜಾಳಿಜಾಗ್ಯಾಂನಿ
ಮಾಂಡುನ್ ಹಾಡ್ಲ್ಲ್ಯಾ ವೆವೆಗ್ಳ್ಯಾ ಸಾಹಿತಿಕ್
ಸ್ಪರ್ಧ್ಯಾಂಚೊ ಇರಾದೊ ಖಂಡಿತ್ ವರ್ಗಣಿ ಚಡಂವ್ಚೊ ನ್ಹಯ್,
ಕಿತ್ಯಾಕ್ ಮ್ಹಳ್ಯಾರ್ ಜಾಳಿಜಾಗೊ ಏಕ್ ಉಗ್ತೊ ಜಾಗೊ, ಜೊ
ಕೊಣೆಂಯ್ ಫುಂಕ್ಯಾಕ್ ವಾಚುಂಕ್ ಸಕ್ಚೊ. ತ್ಯಾ ದಿಶೆನ್
ಅಸಲೆ ಸಾಹಿತಿಕ್ ಸ್ಪರ್ಧೆ ಮಾಂಡುನ್ ಹಾಡ್ಚೆ ಪಾಟ್ಲ್ಯಾನ್
ಆಸ್ಲೊ ಶೆವೊಟ್ ಫಕತ್ ಕೊಂಕಣಿ ಸಾಹಿತಿಕ್ ಮಟ್ಟ್ ಸುಧ್ರಾಪ್
ಮ್ಹಳ್ಳೆಂ ಪರತ್ ಸಾಂಗ್ಚಿ ಗರ್ಜ್ ನಾ.
ವರ್ಸಾಳೆ ಸಾಹಿತಿಕ್ ಸ್ಪರ್ಧೆ:
www.daaiz.com
’ನವ್ಯಾ ತಾಲೆತಾಂಕ್ ಅವ್ಕಾಸ್ ಮೆಳಾಜಾಯ್ ಅನಿ
ಕೊಂಕ್ಣೆಂತ್ ಸಾಹಿತ್ಯಾಚೆಂ ಮಟ್ಟ್ ಅನಿಕ್ಯೀ ಊಂಚ್
ವಚಾಜಯ್’ ಮ್ಹಳ್ಳೊ ಇರಾದೊ ಮನಾಂತ್ ದವರುನ್ 2004
ಇಸ್ವೆಂತ್ ಕುವೆಯ್ಟಾಂತ್ ಕಾಮ್ ಕರುನ್ ಆಸ್ಲೆ ವೆಳಾರ್
ವಲ್ಲಿ ಕ್ವಾಡ್ರಸಾಚ್ಯಾ ದಾಯ್ಜ್.ಕೊಮ್ (www.daaiz.com)
ಜಾಳಿಜಾಗ್ಯಾನ್ ಕೊಂಕಣಿಂತ್ಲ್ಯಾ (ಕನ್ನಡ ಲಿಪಿಂತ್)
ಪಯ್ಲ್ಯಾ ಸಾಹಿತಿಕ್ ಸ್ವರ್ಧಾಚಿ ಸುರ್ವಾತ್ ಕೆಲಿ.
ಮಟ್ವ್ಯೊ ಕಾಣಿಯೊ, ಲೇಕನಾ ಅನಿ ಕವಿತಾ ಅಶೆಂ ತೀನ್
ಪ್ರಕರಾಂತ್ ಅಸಾ ಕೆಲ್ಲ್ಯಾ ಹ್ಯಾ ಸ್ವರ್ಧ್ಯಾಂತ್
ಅರ್ಕಶಿತ್ ಇನಾಮಾಂ ನಗ್ದಿ ರುಪಾನ್ ದಿಲ್ಲಿಂ, ಅಜೀಕ್
ಸುಮಾರ್ 16 ವರ್ಸಾಧಿಂ (2004), ಸ್ವರ್ಧ್ಯಾಚ್ಯಾ ಎಕೇಕಾ
ಪ್ರಕರಾಂತ್ ಪಯ್ಲೆಂ, ದುಸ್ರೆಂ ಆನಿ ತಿಸ್ರೆಂ ಇನಾಮ್
ಜಾವ್ನ್ 5000, 3000, 2000 ಅನಿ 1000 ರುಪಯ್ ಇನಾಮ್
ತ್ಯಾ ಕಾಳಾರ್ ಬರೊ ಅಯ್ವಜ್ ಜಾವ್ನಾಸ್ಲೊ. ಕೊಂಕ್ಣೆಂತ್ಲೆ
ನಾಮ್ಣೆಚೆ ಕವಿ, ಕಾಣ್ಯೆಗಾರ್ ವೊರಯ್ಣಾರ್ ಜಾವ್ನಾಸ್ಲ್ಯಾ
ಹ್ಯಾ ಸಾಹಿತಿಕ್ ಸ್ಪರ್ಧ್ಯಾಂತ್ ಇನಾಮಾಂ ಜೊಡ್ಲ್ಲಿಂ
ಬರ್ಪಾಂ ದಾಯ್ಜ್.ಕೊಮ್ ಜಾಳಿಜಾಗ್ಯಾಚೆರ್ ತಶೆಂಚ್ ’ದಿವೊ’
ಹಫ್ತ್ಯಾಳ್ಯಾಚೆರ್ ಪರ್ಗಟ್ಲಿಂ.
2005 ಇಸ್ವೆಂತ್
ಹೊ ಸ್ವರ್ಧೊ ಮುಕಾರ್ ವೆಲೊ, ಪುಣ್ 2006 ಅನಿ 2007
ಇಸ್ವೆಂತ್ ’ಮಿತ್ರ್’ ಪತ್ರಾ ಸಾಗಾತಾ ಮೆಳೊನ್
ದಾಯ್ಜಾ-ಮಿತ್ರ್ ನಾಂವಾಖಾಲ್ ಹೊ ಸಾಹಿತಿಕ್ ಸ್ವರ್ಧೊ
ಚಲುನ್ ಸಾಹಿತಿಕ್ ಪ್ರತಿಭಾ ಆಸ್ಚ್ಯಾ ಸಭಾರ್ ಕಾಣ್ಯೆಗಾರ್,
ಕವಿ, ಲೇಖಕಾಂಚ್ಯಾ ಬರ್ಪಾಂಕ್ ಇನಾಮಾಂ ಲಾಭ್ಲಿಂ. ಇನಾಮಾಂ
ಜೊಡ್ಪಿ ಕಾಣ್ಯೆಗಾರಾಂ ಪಯ್ಕಿಂತ್; ಸಾಹಿತ್ ಅಕಾಡೆಮಿ
ಪುರಸ್ಕಾರ್ ಜೊಡ್ಪಿ ಜೆ. ಬಿ. ಮೊರಾಯಸ್, ಡಾ|ಎಡ್ವರ್ಡ್
ನಜ್ರೆತ್, ಕ್ಯಾಥರಿನ್ ರೊಡ್ರಿಗಸ್, ಕೆವಿನ್ ಡಿ’ಮೆಲ್ಲೊ
ಕಾರ್ಕಳ್, ಎಚ್ಚೆಮ್ ಪೆರ್ನಾಲ್, ಎಲ್ಯೆರ್ ತಾಕೊಡೆ,
ಮಾ|ಬಾ|ಮೆಲ್ವಿನ್ ಪಿಂಟೊ ನೀರುಡೆ, ಸ್ಟೀಫನ್ ಕ್ವಾಡ್ರಸ್
ಪೆರ್ಮುದೆ, ಮಾ|ಜೊ. ಸಿ. ಸಿದ್ದಕಟ್ಟೆ, ಆಂಟನಿ ಬಾರ್ಕುರ್
ಆನಿ ಸಭಾರ್ ಹೆರಾಂನಿ ವಾಂಟೊ ಘೆವ್ನ್ ಇನಾಮಾಂ
ಆಪ್ಣಾಯ್ಲ್ಯಾಂತ್.
ಮಯ್ನ್ಯಾಳೆ
ಸಾಹಿತಿಕ್ ಸ್ಪರ್ಧೆ
2006 ಇಸ್ವೆಂತ್
ದಾಯ್ಜ್.ಕೊಮ್ ಹಾಣೆಂ ’ತಿಂತೆರಾಂತ್ ಪಿಂತುರಾಂ’
ಮ್ಹಳ್ಳೊ ಮಯ್ನ್ಯಾಳೊ ಕವಿತಾ ಸ್ಪರ್ಧೊ ಸುರು ಕೆಲೊ. ಏಕ್
ಪಿಂತುರ್ ದಿವುನ್ ತ್ಯಾ ಪಿಂತುರಾಚೆರ್ ಪ್ರೇರಿತ್ ಜಾವ್ನ್
ಕವಿತಾ ಬರೊಂವ್ಚೊ ಸ್ಪರ್ಧೊ. ಭಾರಾ ಮಯ್ನ್ಯಾಂನಿ ಭಾರಾ
ಪಿಂತುರಾಂ ದಿಲ್ಲ್ಯಾ ಹ್ಯಾ ಸ್ಪರ್ಧ್ಯಾಂತ್ 210 ಕವಿತಾ
ಪರ್ಗಟ್ಲ್ಯೊ. ಎಚ್ಚೆಮ್, ಅನಿಲ್ ಪೆರ್ನಾಲ್, ಮ್ಯಾಕ್ಸಿಮ್
ಲೋಬೊ, ವಿಲ್ಸನ್ ಕಟೀಲ್, ಮೆಲ್ವಿನ್ ಪೆರ್ನಾಲ್, ಪ್ರಸನ್ನ್
ನಿಡ್ಡೋಡಿ, ವಿಲ್ಫ್ರೆಡ್ ಲೋಬೊ ಪಡೀಲ್, ವಿನ್ಸಿ ಪಿಂಟೊ
ಆಂಜೆಲೊರ್, ಅವಿನಾ ಮಿಯಾರ್, ನಂದಿನಿ (ಸ್ಟೆಲ್ಲಾ
ಡಿ’ಕೊಸ್ತಾ), ರೊಬರ್ಟ್ ಫೆರ್ನಾಂಡಿಸ್ ಉದ್ಯಾವರ್, ಆರ್ಥರ್
ಪಿರೇರಾ ಒಮ್ಜೂರ್. ಆನಿ ಎಚ್ಚೆಮ್ ಪೆರ್ನಾಲ್ ಹಾಕಾ
’ವರ್ಸಾಚೊ ಕವಿ’ ಪುರಸ್ಕಾರ್ ಅನಿ ಪಂಚ್ವೀಸ್ ಹಜಾರ್ ರುಪಯ್
ಇನಾಮ್ ಮೆಳ್ಳೆ (ಪಂದ್ರಾ ಹಜಾರ್ ದಾಯ್ಜ್.ಕೊಮ್ ಥಾವ್ನ್
ತಶೆಂಚ್ ಧಾ ಹಜಾರ್ ಇನಾಮ್ ಆಸ್ಟಿನ್ ಪ್ರಭುಥಾವ್ನ್).
2007 ಹ್ಯಾ ಸ್ಪರ್ಧ್ಯಾಂತ್ ಪಿಂತುರಾ ಬದ್ಲಾಕ್ ಏಕ್
ವಿಶಯ್ ದಿವುನ್ ತ್ಯಾ ವಿಶಯಾಚೆರ್ ಕವಿತಾ ಬರಂವ್ಚೊ
ಸ್ಪರ್ಧೊ ’ಉತ್ರಾಂತ್ ಸೂತ್ರಾಂ’ ಅಸಾ
ಕೆಲ್ಲೊ. ಲಿಯಾಬ್ (ಕಾವ್ಯಾದಾಸ್), ಮಾ|ಮೆಲ್ವಿನ್ ಪಿಂಟೊ
ನೀರುಡೆ, ಎಡ್ಡಿ ಸಿಕೇರ್, ಜೆರಿ ಡಿ’ಮೆಲ್ಲೊ ಬೆಂದುರ್,
’ಆಂಟನಿ ಬಾರ್ಕುರ್’, ’ಕ್ಲೆರೆನ್ಸ್ ಕೈಕಂಬ’, ’ಮೆಲ್ವಿನ್
ಜೆ. ವಾಸ್ ಕೆಲರಾಯ್’, ಮಾ|ಜೋರ್ಜ್ ಒಲಿವೆರಾ, ಫ್ರಾನ್ಸಿಸ್
ಫುರ್ತಾದೊ, ವಿನ್ಸಿ ಮೆಲ್ಕಾರ್, ಆರ್ಯನ್ ತಾಕೊಡೆ ತಶೆಂಚ್
ವಾಯ್ಲೆಟ್ ಪಿರೇರಾ ಹಿಂ ಭಾರಾ ಮಯ್ನ್ಯಾಚಿಂ ಇನಾಮಾಂ
ಆಪ್ಣಾಯಿಲ್ಲಿಂ ತರ್; ಭಾರಾ ಮಯ್ನ್ಯಾಚ್ಯಾ ಕವಿಸವೆಂ
ಮಯ್ನ್ಯಾಚೊ ಕವಿ ಇನಾಮ್ ’ಆಂಟನಿ ಬಾರ್ಕುರ್’ ತಶೆಂಚ್
ದೊಗಾಂ ಹೆರ್ ಕವಿಂಕ್; ’ವಿಲ್ಸನ್ ಕಟೀಲ್’, ಆನಿ
’ಮಾ|ಮೆಲ್ವಿನ್ ಪಿಂಟೊ ನೀರುಡೆ’ ಹಾಂಕಾಂ ದುಸ್ರೆಂ ಆನಿ
ತಿಸ್ರೆಂ ಇನಾಮ್ ಲಾಭ್ಲೆಂ.
ದಾಯ್ಜ್
ವರ್ಸಾಚೊ ಕಾಣ್ಯೆಗಾರ್ - 2005: ಸ್ಟೇನ್
ಅಗೇರಾಕ್ ದಾಯ್ಜ್ 2005 ವರ್ಸಾಚೊ ಕಾಣ್ಯೆಗಾರ್ ಇನಾಮ್
ಲಾಭ್ಲೆಂ.
ದಾಯ್ಜ್ ವರ್ಸಾಚೊ ಕಾಣ್ಯೆಗಾರ್ -
2006: ಕ್ಲೆರೆನ್ಸ್ ಕೈಕಂಬ ಮಸ್ಕತ್ ಹಾಕಾ
ದಾಯ್ಜ್ 2006 ವರ್ಸಾಚೊ ಕಾಣ್ಯೆಗಾರ್ ಇನಾಮ್ ಲಾಭ್ಲೆಂ.
ದಾಯ್ಜ್ 2006 ವರ್ಸಾಚೊ ಕವಿ:
ಎಚ್ಚೆಮ್ ಪೆರ್ನಾಲ್ ಹಾಕಾ ದಾಯ್ಜ್ 2006 ವರ್ಸಾಚೊ ಕವಿ
ಇನಾಮ್ ಲಾಭ್ಲೆಂ.
ದಾಯ್ಜ್ 2007 ವರ್ಸಾಚೊ
ಕವಿ : ಆಂಟನಿ ಬಾರ್ಕುರ್ ಹಾಕಾ ದಾಯ್ಜ್ 2007
ವರ್ಸಾಚೊ ಕವಿ ಇನಾಮ್ ಲಾಭ್ಲೆಂ.
ಸುಮಾರ್ 13-16
ವರ್ಸಾಧಿಂ ಇನಾಮಾಂ ಜಿಕಲ್ಲ್ಯಾ ನಾಂವಾಂಚೆರ್ ದೀಶ್ಟ್
ಘಾಲ್ಯಾರ್ ಅಮ್ಕಾಂ ಕಳ್ತಾಗಿ, ಹಾತ್ಲಿಂ ಸಭಾರ್ ನಾಂವಾಂ
ಅಜ್ ಕೊಂಕ್ಣಿ ಸಾಹಿತ್ಯಾತ್ ಅಪ್ಲ್ಯಾ ಕಾಮಾಂ ಮುಕಾಂತ್ರ್
ಲೊಕಾಮೊಗಾಳ್ ಜಾವ್ನಾಸಾತ್. ಹಾಣಿ ಉಂಚ್ಲ್ಯಾ ಸಾಹಿತ್ಯಾ
ಸವೆಂ ಸ್ವರ್ಧ್ಯಾಂನಿ ಭಾಗ್ ಘೆಂವ್ನ್ ಕೊಂಕ್ಣೆಂತ್
ಸಾಹಿತ್ಯಾಚೆಂ ಮಟ್ಟ್ ಅನಿಕ್ಯೀ ಊಂಚ್ ವರುಂಕ್ ಕೆಲ್ಲೆ
ಪ್ರಯತ್ನ್ ಖಂಡಿತ್ ಜಾವ್ನ್ ಉತ್ತೇಜನ್ ದಿಂವ್ಚೆ ತಸಲೆಂ
ಜಾವ್ನಾಸಾ.
ಹಾಚೆ ಉಪ್ರಾಂತ್ ಸುಮಾರ್ ಧಾ ವರ್ಸಾಂ
ಪ್ರಿಂಟ್ ಮೀಡಿಯಾ ಅನಿ ವೇದಿ ಪ್ರದರ್ಶನ್ (Stage
performence) ಮುಕಾಂತ್ರ್ ಸಾಹಿತಿಕ್ ಸ್ವರ್ಧೆ
ಚಲ್ಲೆ, ಪುಣ್ ಡಿಜಿಟಲ್ ಮಿಡಿಯಾ ತರ್ಫೆನ್ ಸಾಹಿತಿಕ್
ಸ್ವರ್ಧೆ ಚಲಲ್ಲೆ ದಾಖ್ಲೆ ನಾಂತ್, ತಸೆಂ ಮ್ಹಣ್ ಹ್ಯಾಚ್
ವೆಳಾರ್ ಕವಿತಾ ಟ್ರಸ್ಟ್ ಹಾಣಿ ಕವಿತಾ ಪ್ರಕಾರಾಂತ್ ಸಬಾರ್
ಸ್ವರ್ಧೆ, ಪ್ರತ್ಯೇಕ್ ಜಾಂವ್ನ್ ಭುರ್ಗ್ಯಾಂಕ್ ಅಸಾ
ಕೆಲ್ಲೆ ದಾಕ್ಲೆ
www.kavitaa.com ಹಾಚಾ Competition
ವಿಭಾಗಾಂತ್ ಅಸಾತ್.
ರಾಶ್ಟ್ರೀಯ್
ಮಟ್ಟಾಚೆ ಕೊಂಕಣಿ ಸಾಹಿತಿಕ್ ಸ್ಪರ್ಧೆ
www.poinnri.com
2017 ಇಸ್ವೆಂತ್ ಮುಂಬಯ್ ಥಾವ್ನ್ ವಲ್ಲಿ
ಕ್ವಾಡ್ರಸಾಚ್ಯಾ ಪಯ್ಣಾರಿ.ಕೊಮ್ ಥಾವ್ನ್ ಪಯ್ಲೊ
ರಾಶ್ಟ್ರೀಯ್ ಮಟ್ಟಾಚೊ, ತೀನ್ ಲಿಪಿಯಾಂಚೊ (ಕನ್ನಡ, ನಾಗರಿ
ಅನಿ ರೊಮಿ) ’ಪಯ್ಣಾರಿ
ಸಾಹಿತಿಕ್ ಸ್ಪರ್ಧೊ 2017’ ಸುರು ಕೆಲೊ. ಮಟ್ವಿ
ಕಾಣಿ, ಕವಿತಾ, ಲೇಕನಾಂ ಬರಂವ್ಚಿಂ ಹ್ಯಾ ತೀನ್
ವಿಶ್ಯಾಂಚೆರ್ ಹೊ ಸ್ಪರ್ಧೊ ಚಲ್ಲೊ. ಗೊಂಯ್,
ಮಹಾರಾಶ್ಟ್ರ್, ಕರ್ನಾಟಕ್ ತಶೆಂಚ್ ಕೇರಳ್ ಥಾವ್ನ್ ಸಭಾರ್
ಸಾಹಿತಿಕ್ ಪ್ರತಿಭೆಂನಿ ಹ್ಯಾ ಸ್ಪರ್ಧ್ಯಾಂತ್ ಇನಾಮಾಂ
ಆಪ್ಣಾಯ್ಲಿಂ.
2018 ಇಸ್ವೆಂತ್ ಪಯ್ಣಾರಿ- ವೀಜ್ ಹಾಂಚ್ಯಾ ಜೋಡ್
ಆಯೋಗಾಖಾಲ್ ದೋನ್ ಲಿಪಿಯಾಂನಿ (ಕನ್ನಡ ಆನಿ ನಾಗರಿ),
ಸುರ್ವಾತ್ ಕೆಲ್ಲ್ಯಾ ಹ್ಯಾ ಸ್ಪರ್ಧ್ಯಾಂತ್, ಅನುವಾದಿತ್
ಮಟ್ವ್ಯೊ ಕಾಣಿಯೊ, ಸ್ವಂತ್ ಮಟ್ವೊ ಕಾಣಿಯೊ, ಲೇಕನಾ ಅನಿ
ಕವಿತಾ ಮ್ಹಳ್ಳೆ ಚ್ಯಾರ್ ವಿಭಾಗ್ ಆಸ್ಲೆ.
2019 ಇಸ್ವೆಂತ್ ಪಯ್ಣಾರಿ- ವೀಜ್ ಹಾಂಚ್ಯಾ ಜೋಡ್
ಆಯೋಗಾಖಾಲ್ ದೋನ್ ಲಿಪಿಯಾಂನಿ (ಕನ್ನಡ ಆನಿ ನಾಗರಿ),
ಸುರ್ವಾತ್ ಕೆಲ್ಲ್ಯಾ ಹ್ಯಾ ಸ್ಪರ್ಧ್ಯಾಂತ್, ಅನುವಾದಿತ್
ಮಟ್ವ್ಯೊ ಕಾಣಿಯೊ, ಸ್ವಂತ್ ಮಟ್ವೊ ಕಾಣಿಯೊ, ಲೇಕನಾ ಅನಿ
ಕವಿತಾ ಮ್ಹಳ್ಳೆ ಚ್ಯಾರ್ ವಿಭಾಗ್ ಆಸ್ಲೆ.
2020 ಇಸ್ವೆಂತ್ ತೀನ್ ಲಿಪಿಯಾಂನಿ ಹೊ ಸ್ಪರ್ಧೊ
ಚಲ್ಚೆವಿಶಿಂ ಪರ್ಗಟ್ಣಿ ಕೆಲ್ಯಾ. ಕನ್ನಡ, ನಾಗರಿ ಅನಿ
ರೊಮಿ ಅಶೆಂ ತೀನ್ ಲಿಪಿಂನಿ ಚಲ್ಚ್ಯಾ ಹ್ಯಾ ರಾಶ್ಟ್ರೀಯ್
ಮಟ್ಟಾಚ್ಯಾ ಸಾಹಿತಿಕ್ ಸ್ಪರ್ಧ್ಯಾಮುಖಾಂತ್ರ್ ಸಾಹಿತಿಕ್
ಪ್ರತಿಭೆಕ್ ನವೊ ಆವ್ಕಾಸ್ ಲಾಭಂವ್ಚೊ ಪ್ರಮುಕ್ ಇರಾದೊ
ಸುಸ್ತತಾ. ಬಾರಿಕಾಯೆನ್ ಪಳೆಯಿಲ್ಯಾರ್, ಅಸಲೆ ಸ್ವರ್ಧೆ
ಮಾಡುಂನ್ ಹಾಡುಂಕ್ ಖೂಬ್ ಮಿನತ್ ಅಸಾ, ಸ್ವರ್ಧ್ಯಾಂಚೊ
ಪ್ರಸಾರ್, ವ್ಹೂರಯ್ಣಾರಾಂಚಿ ವಿಚಂವ್ಣಿ, ಸ್ವರ್ಧೊ ಎಕಾ
ಲಿಪಿಚ್ಯಾಕಿ ಚಡ್ ಲಿಪಿಂತ್ ಅಸ್ಲ್ಯಾರ್ ಸ್ವರ್ಧಿಂಕಾಂನಿ
ಎಕಾ ಲಿಪಿಂತ್ ಬರೆಯಿಲ್ಲೆಂ ಸ್ವರ್ಧ್ಯಾಚ್ಯಾ ಹೆರ್
ಲಿಪಿಂತ್ಲ್ಯಾ ವೊರಯ್ಣಾರಾಂಕ್ ಲಿಪಿಂಯಂತರ್ ಕರ್ನ್
ವ್ಹೂರಯ್ಣಾರಾಂಕ್ ದಿಂವ್ಚೆ ಪ್ರಮುಕ್ ಜಾವ್ನಾಸಾ.
ಹಾಂಗಾಸಾರ್ ಹ್ಯಾ ಸ್ವರ್ಧ್ಯಾಚ್ಯಾ ವ್ಹೊರಯ್ಣಾರಾಂಕ್
ಪಳೆತಾನಾ ಕಳ್ತಾಗಿ ಹೆ ಸರ್ವ್ ಕೊಂಕ್ಣೆಂತ್ಲೆ ಅನ್ಭೋಗಿ
ಅನಿ ನಾವಾಂಡ್ದಿಕ್ ಸಾಹಿತಿ ಜಾವ್ನಾಸಾತ್, ಹಾಣಿಂ ಹೆಂ
ಮಿನತೆಚೆಂ ಕಾಮ್ ಕಿಂತೆಚ್ ಪ್ರತಿಫಳ್ ನಾಸ್ತಾನಾ ಕೆಲ್ಲೆಂ
ಖಂಡಿತ್ ಜಾವ್ನ್ ಪ್ರಶಂಶನೀಯಾ ಜಾವ್ನಾಸಾ.
ನವ್ಯಾ
ಚಿಂತ್ಪಾಚ್ಯಾ ಹ್ಯಾ 21 ವ್ಯಾ ಶತಮಾನಾಂತ್ ಸಕ್ಕಡ್ ವೇಗಾನ್
ಜಾವ್ನ್ ವೆತಾ, ಡಿಜಿಟಲ್ ಮಾಧ್ಯಮಾಚೊ ಇತಿಹಾಸ್ ಮಟ್ವೊ
ಆಸುಂಕ್ ಪುರೊ ಪುಣ್ ಫುಡಾರ್ ಲಾಂಬ್ ಆಸಾ. ಅಶೆಂ
ಪಳೆಲ್ಯಾರ್ ಪ್ರಿಂಟ್ ಮಾಧ್ಯಮಾಕ್ ಲಾಂಬ್ ಕಾಳ್ ನಾ
ಮ್ಹಳ್ಯಾರೀ ಫಟ್ ಜಾಂವ್ಚೆಂ ನಾ. ಎಕಾ ವಾಟೆನ್ ಚಡುನ್
ಯೆಂವ್ಚೊ ಪ್ರಿಂಟಾಚೊ ಖರ್ಚ್, ಪೆಪರಾಂಚೊ ಖರ್ಚ್, ತಪ್ಪಾಲ್
ಘಳಾಯ್ ಆನಿ ಪ್ರಮುಕ್ ಜಾವ್ನ್ ವಾಚ್ಪ್ಯಾಂಚೊ ಸಂಖೊ
ದೆಂವ್ಚೊ ತರ್ ಅನ್ಯೇಕಾ ವಾಟೆನ್ ಯುವಜಣ್ ಚಡ್ ಕರುನ್
ತಾಂತ್ರಿಕತೆಕ್ ಗಳ್ಸುನ್ ಡಿಜಿಟಲ್ ಮಾಧ್ಯಮಾಂ ತೆವ್ಶಿನ್
ಪಾವ್ಲಾಂ ಕಾಡ್ತಾತ್, ದಾಕ್ಲ್ಯಾಂಕ್, ಆಯ್ಲೆವಾರ್ ಮಾ|ಜೊ.
ಸಿ. ಸಿದ್ದಕಟ್ಟೆ ಹಾಚೊ ’ಕವಿತಾ ಮಾಟೊವ್’ SKA
London ಹಾಂಚೊ ’ಒನ್ಲೈನ್ ಸಂಗೀತ್ ಸ್ವರ್ಧೊ’.
ಮಾತ್ರ್ ನ್ಹಯ್, ಡಿಜಿಟಲ್ ಮಾಧ್ಯಮಾಂನಿ ಚಡ್ತಿಕ್ ಮಾಪಾನ್
ಸಾಹಿತಿಕ್ ಕೃಶಿ ಜಾವ್ನ್ ಆಸಾ ಮ್ಹಳ್ಳೆಂ ಕೊಂಕಣಿ ಸಾಹಿತ್
ಪರ್ಗಟ್ಚೆ ವೆವೆಗ್ಳೆ ಜಾಳಿಜಾಗೆ ಗವಾಯ್ ದಿತಾತ್. ಅಖೆರಿಕ್
ಇತ್ಲೆಂಚ್ ಆಶೆವ್ಯಾಂ - ಕೊಂಕಣಿಕ್ ಬರೊ ಫುಡಾರ್ ಯೇಂವ್,
ಡಿಜಿಟಲ್ ಮಾಧ್ಯಮ್ ಕೊಂಕಣಿಕ್ ನವೆಂ ತ್ರಾಣ್ ದೀಂವ್ಕ್
ಸಕುಂ.
- ಲಾರೆನ್ಸ್ ವಿ.
ಬಾರ್ಬೋಜ್, ಮ್ಯಾನಚೆಸ್ಟರ್-ಯು.ಕೆ. (ಅಗೊಸ್ತ್, 2020) |
|
|
 |
ಲಾರೆನ್ಸ್ ವಿನೋದ್ ಬಾರ್ಬೋಜ್:
ಶಿರ್ವಾಂ ಗಾಂವಾಂತ್ ಜಲ್ಮುನ್ ಇಜ್ನೆರಾಚೆಂ ಶಿಕಪ್ ಜೊಡುನ್
ಸದ್ದ್ಯಾಕ್ ಮಾಂಚೇಸ್ಟರ್ ಯು.ಕೆ.ಂತ್ ಅಪ್ಲ್ಯಾ
ಕುಟ್ಮಾಸವೆಂ ವಸ್ತಿ ಕರ್ಚೊ ಹೊ ಬರೊ ವಾಚ್ಪಿ ತಶೆಂಚ್
ಸಾಹಿತಿಕ್ ಅಭಿಮಾನಿ ಜಾವ್ನಾಸಾ. ಕವಿತಾ, ಲೇಖನಾಂ ತಶೆಂಚ್
ಸಮೀಕ್ಶಾ ಬರವ್ನ್ ಆಸ್ಚಾ ಹಾಣೆಂ ಡಿಜಿಟಲ್ ಕೊಂಕಣಿಂತ್
ಸಯ್ತ್ ವಾವ್ರ್ ಕರುನ್ ಆಸಾ. |
|
[लेकन]
डिजिटल माध्यमांनी कोंकणी साहितीक स्पर्धे |
मनश्याचें जिवीत एक स्वर्धो खंडीत न्हय, पूण
हऱ्येकल्यान जिविताचें पयण करुंक असा अनी असलें
पयण उल्लासीत, उत्तेजीत जावन अपणांक अनी हेरांच्या
उगडासांत उराजय तर, स्वर्धो आसुंक जाय. असल्या
स्वर्ध्यांनी हांवें म्हाकाच सलवोंक असा. प्रख्यात
गावपीण सेलीन डियोन (Celine Dion) अशें म्हणता 'I
am not in competition with anybody but myself.
My goal is to beat my last performenece'
ह्याच कारणाक लागून जावंक पुरो सेलीन डियोन
(Celine Dion) हिचे संगीत पयण, हिणें गायिल्ली
पोदां सबार लोकाच्या उडासांत असात.
पयणारी-वीज हाणीं मांडून हाडल्ल्या २०१९
इस्वेंतल्या दे| विल्पी रेबिंबस स्मारक राश्ट्रीय
मट्टाच्या साहितीक स्वर्ध्याच्या बर्पांचेर नदर
घालन बरयिल्ल्या लेखनाचेर बाप जेसन पिंटो अशें
बरयता "साहित्यांत जायते प्रकार असात, फकत हेंच
’साहितीक बरवप’ अनी हें ’अ-साहितीक बरवप’ म्हणुंक
अमच्यान जायना, हऱ्येकलो बरवपी समाजेंत
सुधारण/सुध्राप हाडुंक बरयता, कोण मनोरंजना खातीर
बरयता, कोणे एकलो महेत प्रसार करुंक बरयता, तिस्रो
उत्रांनी खेळुंन भाशेची ग्रेसतकाय लोकां मधें
शिंपडायता.. इत्यादी, साहित्यावर्वीं समाचेर अनी
खरेपणी अमच्या चिंत्पाचेर वर्तो प्रभाव पडुंक
सक्ता." हऱ्येका साहित्याचे मूळ उद्देश सोंप्या
उत्रांनी उडासाक हाडचीं हीं उत्रां खंडीत जांवन
उग्त्या चिंत्पाक इडें दितात.
एका मनशान,
ताचें चिंताप साहित्याच्या खंच्यायी एका प्रकारा
मुखांत्र समाजे मुखार दवऱ्येत, जांव ती काणी,
कविता, कादंबरी, लेखन, नाटक, सिनेमा.. इत्यादी,
पूण हांगासर सवाल... अशें बरयिल्लें कोण
प्रसार/पर्गट कर्ता? हऱ्येका पत्राक तांचिंच
मळ्ळीं ध्येयां असात, अनी हीं पत्रां तांच्या
ध्येयानुसार विशय प्रसार कर्तात, न्हय तर बरवपी एक
लोकामोगाळ लेखक (Established Writer) म्हळ्ळे
संपादकाक कळीत असल्यार, त्या बरवप्याचें साहित्य
पर्गट कर्तात. असल्या संदिगद परिस्थितेंत, नव्या
अनी उदेवन येंवचा साहितिंक अपली साहितीक प्रतिभा
संसारा मुकार हाडुंक आसची वेदीच असले साहितीक
स्पर्धे.
साहितीक स्वर्धे नव्या अनी उदेवन
येंवचा साहितीक अपल्या परिसरांत हेरांनी
देकनातल्लें पळोवंक, अवाज नासतां अयकल्लें
ज्योरान सागोंक अवकास कर्न दीतात, सागांताच
संपादकांच्या वोळिंत नवो साहिती, वाचप्यांक नवो
बरवपी जल्म घेता, हांगासर प्रमूख जावन समाजेचें
बरेपण अशेवन, अपली समाज अनी मनश्यां खातीर अवाज
करुंक एक नवो सांदो उदेता. ’साहितीक स्वर्ध्यांक’
खंच्यायी नद्रेन पळेल्यार ही एक बरेपणा कुशीन
मेटां काडची प्रक्रिया जावनासा, तें न्हय असतां
हांगासर एका विषयाचेर विवीद थरांच्या चिंत्पाचें
सम्मेळन जाता. Competition on anything is
good, because it makes everybody better असे
मणता एड्डी क्यू ( Eddy Cue Apple Senior Vice
President ). कोंकणी साहित्यांत असलें ’साहितीक
स्वर्धे’ सभार वर्सां थावन चलोन आयल्यात; प्रिंट
मीडिया आपल्या पत्राचेर पर्गटून येंवच्या साहितीक
मट्टाक सुध्रावंक, तशेंच पत्राचो प्रचार चडवंक
असले स्पर्दे चलवन साहितीक प्रतिभा आसच्यांक एक
आवकास रचून दिता. असलेच प्रयोग डिजिटल माध्यमांनी
असल्या सबार साहितीक स्वर्ध्यां मुखांत्र सबार
नव्या साहितिंक अवकास कर्न दिल्लो प्रशंशनीया
जावनासा, अशें ह्या पत्रांनी साहितीक
स्वर्ध्यांध्वारी रोयिल्ले भीं अज सभार नावाडदीक
साहितिंच्या नांवान कोंकणी साहित्यांत फळ दीवन
असात.
डिजिटल माध्यमाक लांब काळाचो इतिहास
ना. २००० इस्वे उपरांत कोंकणी साहितीक जाळिजागे
उदेल्ले म्हणतच. तेदना थावन आज पासोन
जाळिजाग्यांनी मांडून हाडल्ल्या वेवेगळ्या
साहितीक स्पर्ध्यांचो इरादो खंडीत वर्गणी चडंवचो
न्हय, कित्याक म्हळ्यार जाळिजागो एक उग्तो जागो,
जो कोणेंय फुंक्याक वाचुंक सकचो. त्या दिशेन असले
साहितीक स्पर्धे मांडून हाडचे पाटल्यान आसलो शेवोट
फकत कोंकणी साहितीक मट्ट सुध्राप म्हळ्ळें परत
सांगची गर्ज ना.
वर्साळे साहितीक
स्पर्धे:
www.daaiz.com
’नव्या तालेतांक अवकास मेळाजाय अनी कोंकणेंत
साहित्याचें मट्ट अनीकयी ऊंच वचाजय’ म्हळ्ळो
इरादो मनांत दवरून २००४ इस्वेंत कुवेयटांत काम
करून आसले वेळार वल्ली क्वाड्रसाच्या दायज.कोम
(www.daaiz.com) जाळिजाग्यान कोंकणिंतल्या (कन्नड
लिपिंत) पयल्या साहितीक स्वर्धाची सुर्वात केली.
मटव्यो काणियो, लेकना अनी कविता अशें तीन प्रकरांत
असा केल्ल्या ह्या स्वर्ध्यांत अर्कशीत इनामां
नगदी रुपान दिल्लीं, अजीक सुमार १६ वर्साधीं
(२००४), स्वर्ध्याच्या एकेका प्रकरांत पयलें,
दुस्रें आनी तिस्रें इनाम जावन ५०००, ३०००, २०००
अनी १००० रुपय इनाम त्या काळार बरो अयवज जावनासलो.
कोंकणेंतले नामणेचे कवी, काण्येगार वोरयणार
जावनासल्या ह्या साहितीक स्पर्ध्यांत इनामां
जोडल्लीं बर्पां दायज.कोम जाळिजाग्याचेर तशेंच
’दिवो’ हफ्त्याळ्याचेर पर्गटलीं.
२००५
इस्वेंत हो स्वर्धो मुकार वेलो, पूण २००६ अनी २००७
इस्वेंत ’मित्र’ पत्रा सागाता मेळोन दायजा-मित्र
नांवाखाल हो साहितीक स्वर्धो चलून साहितीक प्रतिभा
आसच्या सभार काण्येगार, कवी, लेखकांच्या बर्पांक
इनामां लाभलीं. इनामां जोडपी काण्येगारां पयकिंत;
साहीत अकाडेमी पुरसकार जोडपी जे. बी. मोरायस,
डा|एडवर्ड नज्रेत, क्याथरीन रोड्रिगस, केवीन
डी’मेल्लो कार्कळ, एच्चेम पेर्नाल, एल्येर ताकोडे,
मा|बा|मेलवीन पिंटो नीरुडे, स्टीफन क्वाड्रस
पेर्मुदे, मा|जो. सी. सिद्दकट्टे, आंटनी बार्कूर
आनी सभार हेरांनी वांटो घेवन इनामां आपणायल्यांत.
मयन्याळे साहितीक स्पर्धे
२००६ इस्वेंत दायज.कोम हाणें ’तिंतेरांत
पिंतुरां’ म्हळ्ळो मयन्याळो कविता स्पर्धो सुरू
केलो. एक पिंतूर दिवून त्या पिंतुराचेर प्रेरीत
जावन कविता बरोंवचो स्पर्धो. भारा मयन्यांनी भारा
पिंतुरां दिल्ल्या ह्या स्पर्ध्यांत २१० कविता
पर्गटल्यो. एच्चेम, अनील पेर्नाल, म्याक्सीम लोबो,
विल्सन कटील, मेलवीन पेर्नाल, प्रसन्न निड्डोडी,
विलफ्रेड लोबो पडील, विन्सी पिंटो आंजेलोर, अविना
मियार, नंदिनी (स्टेल्ला डी’कोसता), रोबर्ट
फेर्नांडीस उद्यावर, आर्थर पिरेरा ओमजूर. आनी
एच्चेम पेर्नाल हाका ’वर्साचो कवी’ पुरसकार अनी
पंचवीस हजार रुपय इनाम मेळ्ळे (पंद्रा हजार
दायज.कोम थावन तशेंच धा हजार इनाम आसटीन
प्रभुथावन).
२००७ ह्या स्पर्ध्यांत
पिंतुरा बदलाक एक विशय दिवून त्या विशयाचेर कविता
बरंवचो स्पर्धो ’उत्रांत सूत्रां’ असा केल्लो.
लियाब (काव्यादास), मा|मेलवीन पिंटो नीरुडे, एड्डी
सिकेर, जेरी डी’मेल्लो बेंदूर, ’आंटनी बार्कूर’,
’क्लेरेन्स कैकंब’, ’मेलवीन जे. वास केलराय’,
मा|जोर्ज ओलिवेरा, फ्रान्सीस फुर्तादो, विन्सी
मेल्कार, आऱ्यन ताकोडे तशेंच वायलेट पिरेरा हीं
भारा मयन्याचीं इनामां आपणायिल्लीं तर; भारा
मयन्याच्या कविसवें मयन्याचो कवी इनाम ’आंटनी
बार्कूर’ तशेंच दोगां हेर कविंक; ’विल्सन कटील’,
आनी ’मा|मेलवीन पिंटो नीरुडे’ हांकां दुस्रें आनी
तिस्रें इनाम लाभलें.
दायज वर्साचो
काण्येगार - २००५: स्टेन अगेराक दायज २००५ वर्साचो
काण्येगार इनाम लाभलें.
दायज वर्साचो काण्येगार
- २००६: क्लेरेन्स कैकंब मसकत हाका दायज २००६
वर्साचो काण्येगार इनाम लाभलें.
दायज २००६
वर्साचो कवी: एच्चेम पेर्नाल हाका दायज २००६
वर्साचो कवी इनाम लाभलें.
दायज २००७ वर्साचो
कवी : आंटनी बार्कूर हाका दायज २००७ वर्साचो कवी
इनाम लाभलें.
सुमार १३-१६ वर्साधीं इनामां
जिकल्ल्या नांवांचेर दीश्ट घाल्यार अमकां कळतागी,
हातलीं सभार नांवां अज कोंकणी साहित्यात अपल्या
कामां मुकांत्र लोकामोगाळ जावनासात. हाणी उंचल्या
साहित्या सवें स्वर्ध्यांनी भाग घेंवन कोंकणेंत
साहित्याचें मट्ट अनीकयी ऊंच वरुंक केल्ले
प्रयत्न खंडीत जावन उत्तेजन दिंवचे तसलें जावनासा.
हाचे उपरांत सुमार धा वर्सां प्रिंट
मीडिया अनी वेदी प्रदर्शन (Stage performence)
मुकांत्र साहितीक स्वर्धे चल्ले, पूण डिजिटल
मिडिया तर्फेन साहितीक स्वर्धे चलल्ले दाखले नांत,
तसें म्हण ह्याच वेळार कविता ट्रसट हाणी कविता
प्रकारांत सबार स्वर्धे, प्रत्येक जांवन
भुर्ग्यांक असा केल्ले दाकले
www.kavitaa.com
हाचा Competition विभागांत असात.
राश्ट्रीय मट्टाचे कोंकणी साहितीक
स्पर्धे
www.poinnari.com
२०१७ इस्वेंत मुंबय
थावन वल्ली क्वाड्रसाच्या पयणारी.कोम थावन पयलो
राश्ट्रीय मट्टाचो, तीन लिपियांचो (कन्नड, नागरी
अनी रोमी) ’पयणारी साहितीक स्पर्धो २०१७’ सुरू
केलो. मटवी काणी, कविता, लेकनां बरंवचीं ह्या तीन
विश्यांचेर हो स्पर्धो चल्लो. गोंय, महाराश्ट्र,
कर्नाटक तशेंच केरळ थावन सभार साहितीक प्रतिभेंनी
ह्या स्पर्ध्यांत इनामां आपणायलीं.
२०१८
इस्वेंत पयणारी- वीज हांच्या जोड आयोगाखाल दोन
लिपियांनी (कन्नड आनी नागरी), सुर्वात केल्ल्या
ह्या स्पर्ध्यांत, अनुवादीत मटव्यो काणियो, स्वंत
मटवो काणियो, लेकना अनी कविता म्हळ्ळे च्यार विभाग
आसले.
२०१९ इस्वेंत पयणारी- वीज हांच्या
जोड आयोगाखाल दोन लिपियांनी (कन्नड आनी नागरी),
सुर्वात केल्ल्या ह्या स्पर्ध्यांत, अनुवादीत
मटव्यो काणियो, स्वंत मटवो काणियो, लेकना अनी
कविता म्हळ्ळे च्यार विभाग आसले.
२०२०
इस्वेंत तीन लिपियांनी हो स्पर्धो चल्चेविशीं
पर्गटणी केल्या. कन्नड, नागरी अनी रोमी अशें तीन
लिपिंनी चल्च्या ह्या राश्ट्रीय मट्टाच्या साहितीक
स्पर्ध्यामुखांत्र साहितीक प्रतिभेक नवो आवकास
लाभंवचो प्रमूक इरादो सुसतता. बारिकायेन
पळेयिल्यार, असले स्वर्धे माडुंन हाडुंक खूब मिनत
असा, स्वर्ध्यांचो प्रसार, व्हूरयणारांची विचंवणी,
स्वर्धो एका लिपिच्याकी चड लिपिंत असल्यार
स्वर्धिंकांनी एका लिपिंत बरेयिल्लें
स्वर्ध्याच्या हेर लिपिंतल्या वोरयणारांक
लिपिंयंतर कर्न व्हूरयणारांक दिंवचे प्रमूक
जावनासा. हांगासार ह्या स्वर्ध्याच्या
व्होरयणारांक पळेताना कळतागी हे सर्व कोंकणेंतले
अनभोगी अनी नावांडदीक साहिती जावनासात, हाणीं हें
मिनतेचें काम किंतेच प्रतिफळ नासताना केल्लें
खंडीत जावन प्रशंशनीया जावनासा.
नव्या
चिंत्पाच्या ह्या २१ व्या शतमानांत सक्कड वेगान
जावन वेता, डिजिटल माध्यमाचो इतिहास मटवो आसुंक
पुरो पूण फुडार लांब आसा. अशें पळेल्यार प्रिंट
माध्यमाक लांब काळ ना म्हळ्यारी फट जांवचें ना.
एका वाटेन चडून येंवचो प्रिंटाचो खर्च, पेपरांचो
खर्च, तप्पाल घळाय आनी प्रमूक जावन वाचप्यांचो
संखो देंवचो तर अन्येका वाटेन युवजण चड करून
तांत्रिकतेक गळसून डिजिटल माध्यमां तेवशीन पावलां
काडतात, दाकल्यांक, आयलेवार मा|जो. सी. सिद्दकट्टे
हाचो ’कविता माटोव’ SKA London हांचो ’ओनलैन
संगीत स्वर्धो’. मात्र न्हय, डिजिटल माध्यमांनी
चडतीक मापान साहितीक कृशी जावन आसा म्हळ्ळें
कोंकणी साहीत पर्गटचे वेवेगळे जाळिजागे गवाय
दितात. अखेरीक इतलेंच आशेव्यां - कोंकणीक बरो
फुडार येंव, डिजिटल माध्यम कोंकणीक नवें त्राण
दीवंक सकूं.
-
लारेन्स वी. बारबोज, म्यानचेसटर
(अगोसत, 2020)
|
| |
|
|
लारेन्स विनोद बारबोज: शिर्वां गांवांत जल्मून
इजनेराचें शिकप जोडून सद्द्याक मांचेसटर यू.के.ंत
अपल्या कुटमासवें वसती कर्चो हो बरो वाचपी तशेंच
साहितीक अभिमानी जावनासा. कविता, लेखनां तशेंच
समीक्षा बरवन आसचा हाणें डिजिटल कोंकणिंत सयत वावर
करून आसा. |
|
[lekon] Ddijittol
madhyomamni Konkonni sahitik spordhe |
|
Monxeachem jivit ek svordho
khonddit nhoi, punn horyeklean jivitachem poinn
korunk osa oni osolem poinn ul'lasit, ut'tejit
zaun opnnank oni heranchea ugddasant urazoi tor,
svordho asunk zai. Osolea svordheamni hamvem
mhakach solvonk osa. Prokheat gaupinn selin
ddion (Celine Dion) oxem mhonnta 'I am not in
competition with anybody but myself. My goal is
to beat my last performenece' heach karonnak
lagun zaunko puro selin ddion (Celine Dion)
hiche songit poinn, hinnem gayil'li podam sobar
lokachea uddasant osat.
Poinnari-viz
hannim manddun haddl'lea 2019 isventlea de|
vilpi rebimbos smarok raxttri-i mott'ttachea
sahitik svordheachea borpancher nodor ghaln
boroyil'lea lekhonacher bap jeson pintto oxem
boroita "sahiteant zaite prokar osat, fokot
hench ’sahitik boroup’ oni hem ’o-sahitik
boroup’ mhonnunk omchean zaina, horyeklo boroupi
somajent sudharonn/sudhrap haddunk boroita, konn
monoronzona khatir boroita, konne eklo mohet
prosar korunk boroita, tisro utramni khellumn
bhaxechi grestkai lokam modhem ximpddaita..
Iteadi, sahiteavorvim somacher oni khoreponni
omchea chintpacher vorto probhavo poddunk
sokta." horyeka sahiteache mull ud'dex sompea
utramni uddasak haddchim him utram khonddit
zamvn ugtea chintpak iddem ditat.
Eka monxan, tachem chintap
sahiteachea khoncheayi eka prokara mukhantr
somaje mukhar douryet, zamv ti kanni, kovita,
kadombori, lekhon, nattok, sinema.. Iteadi, punn
hangasor soval... Oxem boroyil'lem konn
prosar/porgott korta? horyeka potrak tanchinch
moll'llim dhyeyam osat, oni him potram tanchea
dhyeyanusar vixoi prosar kortat, nhoi tor
boroupi ek lokamogall lekhok (Established
Writer) mholl'lle sompadokak kollit oslear, tea
boroupeachem sahity porgott kortat. Osolea
sondigd poristhitent, novea oni udeun yemvcha
sahitink opli sahitik protibha somsara mukar
haddunk aschi vedich osole sahitik spordhe.
Sahitik svordhe novea oni udeun yemvcha
sahitik oplea porisorant heramni dekonatol'lem
pollounko, ovaz nastam oykl'lem jeoran sagonk
ovkas korn ditat, sagantach sompadokanchea
vollint novo sahiti, vachpeank novo boroupi
zolm' gheta, hangasor promukh zaun somajechem
boreponn oxeun, opli somaz oni monxeam khatir
ovaz korunk ek novo sando udeta. ’sahitik
svordheank’ khoncheayi nodren pollelear hi ek
boreponna kuxin mettam kaddchi prokria zaunasa,
tem nhoi ostam hangasor eka vixoyacher vivid
thoranchea chintpachem som'mellon zata.
"Competition on anything is good, because it
makes everybody better" ose monnta edd'ddi
kyu (Eddy Cue Apple Senior Vice President ).
Konknni sahiteant osolem ’sahitik svordhe’
sobhar vorsam thaun cholon aileat; printt middia
aplea potracher porgottun yemvchea sahitik
mott'ttak sudhraunko, toxench potracho prochar
choddounko osole sporde choloun sahitik protibha
ascheank ek aukas rochun dita. Osolech proyog
ddijittol madhyomamni osolea sobar sahitik
svordheam mukhantr sobar novea sahitink ovkas
korn dil'lo proxonxoniya zaunasa, oxem hea
potramni sahitik svordheandhvari royil'le bhim
oz sobhar navadd'dik sahitinchea namvan konknni
sahiteant foll diun osat.
Ddijittol madhyomak lamb
kallacho itihas na. 2000 isve uprant konkonni
sahitik zallizage udel'le mhonntoch. Tedna thaun
az pason zallizageamni manddun haddl'lea
vevegllea sahitik spordheancho irado khonddit
vorgonni choddomvcho nhoi, kiteak mhollear
zallizago ek ugto zago, zo konnem-i funkeak
vachunk sokcho. Tea dixen osole sahitik spordhe
manddun haddche pattlean aslo xevott fokot
konkonni sahitik mott'tt sudhrap mholl'llem
porot sangchi gorz na.
Vorsalle
sahitik spordhe:
www.daaiz.com
’novea taletank ovkas
mellazai oni konknnent sahiteachem mott'tt
onikyi unch vochazoi’ mholl'llo irado monant
dourun 2004 isvent kuveyttant kam' korun asle
vellar vol'li kvaddrosachea daaiz.com
(www.daaiz.com) zallizagean konkonnintlea
(kon'noddo lipint) poilea sahitik svordhachi
survat keli. Mottveo kannio, lekona oni kovita
oxem tin prokorant osa kel'lea hea svordheant
orkoxit inamam nogdi rupan dil'lim, ojik sumar
16 vorsadhim (2004), svordheachea ekeka
prokorant poilem, dusrem ani tisrem inam' zaun
5000, 3000, 2000 oni 1000 rupoi inam' tea kallar
boro oyvoz zaunaslo. Konknnentle namnneche kovi,
kannyegar voroinnar zaunaslea hea sahitik
spordheant inamam zoddl'lim borpam daaiz.com
zallizageacher toxench ’divo’ hoftealleacher
porgottlim.
2005 isvent ho svordho mukar
velo, punn 2006 oni 2007 isvent ’mitr’ potra
sagata mellon daiza-mitr namvakhal ho sahitik
svordho cholun sahitik protibha aschea sobhar
kannyegar, kovi, lekhokanchea borpank inamam
labhlim. Inamam zoddpi kannyegaram poikint;
sahit okaddemi puroskar zoddpi je. Bi. Morais,
dda|eddvordd nojret, keathorin roddrigos, kevin
ddi’mel'lo karkoll, echchem' pernal, elyer
takodde, ma|ba|melvin pintto nirudde, sttifon
kvaddros permude, ma|zo. Si. Sid'dokott'tte,
anttoni barkur ani sobhar heramni vantto gheun
inamam apnnaileant.
Moinealle
sahitik spordhe
2006 isvent daaiz.com hannem
’tinterant pinturam’ mholl'llo
moineallo kovita spordho suru kelo. Ek pintur
divun tea pinturacher prerit zaun kovita
boromvcho spordho. Bhara moineamni bhara
pinturam dil'lea hea spordheant 210 kovita
porgottleo. Echchem', onil pernal, meaksim'
lobo, vilson kottil, melvin pernal, proson'n
nidd'ddoddi, vilfredd lobo poddil, vinsi pintto
anjelor, ovina miar, nondini (sttel'la
ddi’kosta), robortt fernanddis udeavor, arthor
pirera omzur. Ani echchem' pernal haka ’vorsacho
kovi’ puroskar oni ponchvis hozar rupoi inam'
mell'lle (pondra hozar daaiz.com thaun toxench
dha hozar inam' asttin probhuthaun).
2007 hea spordheant pintura
bodlak ek vixoi divun tea vixoyacher kovita
boromvcho spordho ’utrant sutram’
osa kel'lo. Liab (kaveadas), ma|melvin pintto
nirudde, edd'ddi siker, jeri ddi’mel'lo bendur,
’anttoni barkur’, ’Clarence Kaikamba’, ’melvin
je. Vas kelorai’, ma|zorz olivera, fransis
furtado, vinsi melkar, aryon takodde toxench
vailett pirera him bhara moineachim inamam
apnnayil'lim tor; bhara moineachea kovisovem
moineacho kovi inam' ’anttoni barkur’ toxench
dogam her kovink; ’vilson kottil’, ani
’ma|melvin pintto nirudde’ hankam dusrem ani
tisrem inam' labhlem.
Daiz
vorsacho kannyegar - 2005: stten ogerak
daiz 2005 vorsacho kannyegar inam' labhlem.
Daiz vorsacho kannyegar - 2006: klerens
koikombo moskot haka daiz 2006 vorsacho
kannyegar inam' labhlem.
Daiz 2006
vorsacho kovi: echchem' pernal haka
daiz 2006 vorsacho kovi inam' labhlem.
Daiz 2007 vorsacho kovi : anttoni
barkur haka daiz 2007 vorsacho kovi inam'
labhlem.
Sumar 13-16 vorsadhim inamam
jikol'lea namvancher dixtt ghalear omkam
kolltagi, hatlim sobhar namvam oz konknni
sahiteat oplea kamam mukantr lokamogall
zaunasat. Hanni unchlea sahitea sovem
svordheamni bhag ghemvn konknnent sahiteachem
mott'tt onikyi unch vorunk kel'le proitn
khonddit zaun ut'tezon dimvche tosolem zaunasa.
Hache uprant sumar dha vorsam printt
middia oni vedi prodorxon (Stage performence)
mukantr sahitik svordhe chol'le, punn ddijittol
middia torfen sahitik svordhe cholol'le dakhle
nant, tosem mhonn heach vellar kovita ttrostt
hanni kovita prokarant sobar svordhe, protyek
zamvn bhurgeank osa kel'le dakle
www.kavitaa.com
hacha Competition vibhagant osat.
Raxttri-i mott'ttache konkonni sahitik
spordhe
www.poinnari.com
2017 isvent mumboi
thaun vol'li kvaddrosachea poinnari.com thaun
poilo raxttri-i mott'ttacho, tin lipiancho
(kon'noddo, nagori oni romi) ’poinnari sahitik
spordho 2017’ suru kelo. Mottvi kanni, kovita,
lekonam boromvchim hea tin vixeancher ho spordho
chol'lo. Gõy, moharaxttr, kornattok toxench
keroll thaun sobhar sahitik protibhemni hea
spordheant inamam apnnailim.
2018 isvent
poinnari- viz hanchea zodd ayogakhal don
lipiamni (kon'noddo ani nagori), survat kel'lea
hea spordheant, onuvadit mottveo kannio, svont
mottvo kannio, lekona oni kovita mholl'lle chear
vibhag asle.
2019 isvent poinnari- viz
hanchea zodd ayogakhal don lipiamni (kon'noddo
ani nagori), survat kel'lea hea spordheant,
onuvadit mottveo kannio, svont mottvo kannio,
lekona oni kovita mholl'lle chear vibhag asle.
2020 isvent tin lipiamni ho spordho
cholchevixim porgottnni kelea. Kon'noddo, nagori
oni romi oxem tin lipimni cholchea hea raxttri-i
mott'ttachea sahitik spordheamukhantr sahitik
protibhek novo aukas labhomvcho promuk irado
sustota. Barikayen polleyilear, osole svordhe
maddumn haddunk khub minot osa, svordheancho
prosar, vhuroinnaranchi vichomvnni, svordho eka
lipicheaki chodd lipint oslear svordhinkamni eka
lipint boreyil'lem svordheachea her lipintlea
voroinnarank lipimyontor korn vhuroinnarank
dimvche promuk zaunasa. Hangasar hea
svordheachea vhoroinnarank polletana kolltagi he
sorv konknnentle onbhogi oni navandd'dik sahiti
zaunasat, hannim hem minotechem kam' kintech
protifoll nastana kel'lem khonddit zaun
proxonxoniya zaunasa.
Novea chintpachea
hea 21 vea xotomanant sokkodd vegan zaun veta,
ddijittol madhyomacho itihas mottvo asunk puro
punn fuddar lamb asa. Oxem pollelear printt
madhyomak lamb kall na mholleari fott zamvchem
na. Eka vatten choddun yemvcho printtacho
khorch, peporancho khorch, toppal ghollai ani
promuk zaun vachpeancho sonkho demvcho tor
onyeka vatten yuvozonn chodd korun tantrikotek
gollsun ddijittol madhyomam teuxin paulam
kaddtat, dakleank, ailevar ma|zo. Si.
Sid'dokott'tte hacho ’kovita mattovo’ SKA London
hancho ’onloin songit svordho’. Matr nhoi,
ddijittol madhyomamni choddtik mapan sahitik
krixi zaun asa mholl'llem konkonni sahit
porgottche veveglle zallizage govai ditat.
Okherik itlench axeveam - konkonnik boro fuddar
yemv, ddijittol madhyom' konkonnik novem trann
diunko sokum.
- Lawrence
Vinod Barboza, Manchester, UK. (Aug,
2020)
|
|
|
|
|
Lawrence Vinod Barboza: Shirvam gamvant zolmun
ijnerachem xikop zoddun sod'deak Manchester UK.
oplea kuttmasovem vosti korcho ho boro vachpi
toxench sahitik obhimani zaunasa. Kovita,
lekhonam toxench somikxa boroun ascha hannem
ddijittol konkonnint soit vaur korun asa. |
|
|
|
 |
|
ದಾಯ್ಜ್.ಕೊಮ್ |
|
2004 ಥಾವ್ನ್
2011 ಪರ್ಯಾಂತ್ ಕಾರ್ಯಾಳ್ ಆಸ್ಲ್ಲ್ಯಾ
ದಾಯ್ಜ್.ಕೊಮ್ ಚೆರ್
ಪರ್ಗಟ್ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ
ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್
ಲಾಭಯ್ತೆಲ್ಯಾಂವ್. | |
| |
![]() |
|
