![]() |
|
ಚಿಂತ್ನಾಂಕ್ ರೂಪ್ ದಿಲ್ಲಿ ಚಿತ್ರ್ಕಲಾ |
|
|
|
|
ಕವಿತಾ ಮ್ಹಳ್ಯಾರ್ ಥೊಡ್ಯಾಚ್ ಉತ್ರಾಂನಿ ಅಭಿವ್ಯಕ್ತ್
ಕರ್ಚಿ ಏಕ್ ಕಲಾ ತರ್, ಎಕ್ ಚಿತ್ರ್/ಪಿಂತುರ್ ಜಾವ್ನಾಸಾ
’ಉತ್ರಾಂವಿಣೆಂ ಆಸ್ಚಿ ಕವಿತಾ’. ಪೂಣ್ ಚಿತ್ರ್ಕಲೆಚಿ
ಸಮ್ಜಣಿ/ಜಾಣ್ವಾಯ್ ಸೊಡ್ಯಾಂ, ಒಳೊಕ್ ಆಸ್ಚಿ ಸಯ್ತ್
ಥೊಡ್ಯಾಂಕ್. ಹಾಂಗಾಸರ್ ನಾಮ್ನೆಚೊ ಸಂಶೋಧಕ್ ಕಾದಂಬರಿಕಾರ್
’ಸುನಂದ್’ ಹಾಣೆಂ ಸವಿಸ್ತಾರ್ ರಿತಿನ್ ಹ್ಯಾ
ಚಿತ್ರ್ಕಲೆಚೆರ್ ಬರಯಿಲ್ಲೆಂ ಅಪುರ್ಭಾಯೆಚೆಂ ಲೇಖನ್
ತುಮ್ಕಾಂ ಆವಡ್ತೆಲೆಂ ಮ್ಹಳ್ಳೊ ಮ್ಹಜೊ ಭರ್ವಸೊ. |
|
ಸುನಂದ್
(ಜೊಸೆಫ್ ಡಿಮೆಲ್ಲೊ) |
|
ಸುನಂದ್
’ಸುನಂದ್’ ಲಿಖ್ಣೆ
ನಾಂವಾನ್ ಬರಂವ್ಚೊ ಕುಲ್ಶೆಕರ್ಚೊ ಜೊಸೆಫ್
ಡಿಮೆಲ್ಲೊ, ಪ್ರಸ್ತುತ್ ಆಸ್ಟ್ರೇಲಿಯಾಂತ್ ಆಪ್ಲ್ಯಾ
ಕುಟ್ಮಾಸಂಗಿಂ ಜಿಯೆತಾ.
ಕೊಂಕ್ಣೆಂತ್
ಬರಂವ್ಚಿ ಉರ್ಭಾ ಲ್ಹಾನ್ಪಣಿ ಉದೆಲ್ಲಿ ತಿ,
ಮಂಗ್ಳುರ್ಚ್ಯಾ ಪಾದ್ವಾ ಹೈಸ್ಕೂಲಾಂತ್ ಶಿಕ್ತಾನಾ,
ಮಾನೆಸ್ತ್ ಲಿಯೊ ಸೊಜ್, ಕದ್ಳೆ, ಹಾಚ್ಯಾ
ಮಾರ್ಗ್ದರ್ಶನಾನ್ ಫಳಾಧೀಕ್ ಜಾವ್ನ್ ಆಯ್ಲಿ.
ತ್ಯಾ ಉಪ್ರಾಂತ್, ’ಸಾಳಕ್’ ಪ್ರಕಾಶನಾಚೊ ದೆವಾಧೀನ್
ಸಿರಿವಂತ್, ಕಾಣಿಕ್ ನೆಮಾಳ್ಯಾಚೊ ಆಧ್ಲೊ ಸಂಪಾದಕ್;
ಆವಿಲ್ ರಾಸ್ಕೀನಾ, ’ಉಮಾಳೊ’ ನೆಮಾಳ್ಯಾಚೊ
ದೆವಾಧೀನ್ ವಿಲ್ಫಿ ರೆಬಿಂಬಸ್ ಆನಿ ’ರಾಕ್ಣೊ’
ನೆಮಾಳ್ಯಾಚೊ ಆಧ್ಲೊ ಸಂಪಾದಕ್, ದೆವಾಧೀನ್ ಫಾ| ವಿ.
ವಿ. ಮಿನೇಜಾಚ್ಯಾ ಉತ್ತೇಜನಾನ್, ತಾಚ್ಯೊ ಜಾಯಿತ್ಯೊ
ಕೃತಿಯ್ಯೊ ಉಜ್ವಾಡಾಕ್ ಆಯ್ಲ್ಯೊ.
ತಾಚಿಂ ಯೆದೊಳ್
ಫಾಯ್ಸ್ ಜಾಲ್ಲಿಂ ಪುಸ್ತಕಾಂ ಹಿಂ:
ವಾಂಕ್ಡ್ಯೊ ವಾಟೊ
ಶಿರ್ಶಿರೊ
ರಾಯ್
ಉಂದಿರ್
ಭುಂಯ್ಕಾಂಪ್
ಲೂಟ್
(ಕೊಂಕ್ಣಿ ಆನಿ ಇಂಗ್ಲಿಷ್ ಭಾಶೆಂತ್)
|
|
ಚಿಂತ್ನಾಂಕ್ ರೂಪ್ ದಿಲ್ಲಿ ಚಿತ್ರ್ಕಲಾ |
ಮನ್ಶ್ಯಾಕುಳಾಚ್ಯಾ ಆರಂಭಾ ಥಾವ್ನ್, ಆಪ್ಣಾಚಿಂ
ಚಿಂತ್ನಾಂ, ಭೊಗ್ಣಾಂ ಆನಿ ಭಾವನಾಂ ವ್ಯಕ್ತ್ ಕರುಂಕ್,
ಮನ್ಶ್ಯಾನ್ ಏಕ್ ನಾ ತರ್ ಏಕ್ ವಾಟ್ ಸೊಧ್ಲ್ಯಾ.
ಥೊಡ್ಯಾಂನಿ ಮಾತಿಯೆಂತ್ ಬೊಟಾಂನಿ ಸೊಡವ್ನ್, ಥೊಡ್ಯಾಂನಿ
ಖಡ್ಪಾ-ಫಾತ್ರಾಂಚ್ಯೆರ್ ಕಾಂತವ್ನ್, ಹೆರ್ ಥೊಡ್ಯಾಂನಿ
ರುಕಾಡಾಂತ್ ಪೊಕೊರ್ನ್, ಆಪ್ಣಾ ಥಂಯ್ ಭಾಯ್ರ್ ಯೇಂವ್ಕ್
ಒದ್ದಾಡ್ಚ್ಯಾ ಕಲೆಕ್ ಏಕ್ ಅವ್ಕಾಸ್ ದಿಲಾ. ಕಲಾ ವಿವಿಧ್
ಥರಾಂಚಿ ಆಸಾ ತರೀ, ಚಿತ್ರ್ಕಲಾ ಸಕ್ಕಡ್ ಕಲೆಂಚ್ಯಾಂಕೀ
ಪಯ್ಲೆಂಚ್ಯಾ ಸ್ಥಾನಾರ್ ಆಸಾ ಮ್ಹಣ್ಯೆತ್. ಚಿತ್ರ್ಕಲೆ
ದ್ವಾರಿಂ ಮನ್ಶ್ಯಾನ್, ಸಂಸ್ಕೃತ್ಯಾಂ ಮಧೆಂ ಬಾಂದ್ ಆಸಾ
ಕೆಲ್ಯಾತ್, ಸಂಸ್ಕೃತ್ಯಾಂಚ್ಯೆ ಸಂಪ್ರದಾಯ್ ಹೆರಾಂಕ್
ದಾಕವ್ನ್ ದಿಲ್ಯಾತ್ ಮಾತ್ರ್ ನ್ಹಯ್, ಫಲಾಣ್ಯಾ ಕಾಳಾರ್
ಪರಿಗತ್ ಕಶಿ ಆಸ್ಲ್ಲಿ ಮ್ಹಳ್ಳೆಂ, ಚಿತ್ರಾಂ ದ್ವಾರಿಂ
ದಾಕಯ್ಲಾಂ. ಹಜಾರ್ ಉತ್ರಾಂನಿ ವಿವರುಂಚ್ಯಾಕೀ, ಏಕ್
ಚಿತ್ರ್ ಸೊಡವ್ನ್ ದಾಕಂವ್ಚ್ಯೆಂ ಚಡಿತ್ ಸಮ್ಜಣಿ ದೀಂವ್ಕ್
ಸಕ್ತಾ ಮ್ಹಣ್ ಜಾಣ್ತ್ಯಾಂನಿ ಮ್ಹಣ್ಚ್ಯಾಂತ್ ರಾಜಾಂವ್
ಆಸಾ.
ಚಿತ್ರ್ಕಲೆಚಿ ಸುರ್ವಾತ್:
ಬರ್ಪಾಚಿ ಸುರ್ವಾತ್ ಜಾಂವ್ಚ್ಯಾಕೀ ಪಯ್ಲೆಂ,
ಮನ್ಶ್ಯಾನ್ ಉಜೊ ಸೊಧುನ್ ಕಾಡ್ಚ್ಯಾಕೀ ಪಯ್ಲೆಂ, ಶಹರಾಂ
ರೂಪಿತ್ ಜಾಂವ್ಚ್ಯಾಕೀ ಪಯ್ಲೆಂ, ರಾಷ್ಟ್ರಾಂಚ್ಯೊ ಗಡಿ
ಅಸ್ತಿತ್ವಾಂತ್ ಯೆಂವ್ಚ್ಯಾಕೀ ಪಯ್ಲೆಂ, ಚಿತ್ರ್ಕಲಾ
ಆಸ್ಲ್ಲಿ. ಮನ್ಶ್ಯಾನ್ ಉಲಂವ್ಕ್ ಆನಿ ಬರಂವ್ಕ್
ಶಿಕ್ಚ್ಯಾಕೀ ಪಯ್ಲೆಂ, ತಾಚಿಂ ಭೊಗ್ಣಾಂ ವ್ಯಕ್ತ್ ಕರುಂಕ್
ಚಿತ್ರ್ಕಲೆಚೊ ಉಪ್ಯೋಗ್ ಕೆಲ್ಲೊ ಮ್ಹಣ್ಚ್ಯಾಕ್ ರುಜ್ವಾತಿ
ಆಸಾತ್. ಹಜಾರೊಂ ವರ್ಸಾಂ ಆದಿಂ, ಫಾತ್ರಾಂಚ್ಯೆರ್
ಕಾಂತಯಿಲ್ಲಿಂ ವಾ ರಂಗ್ ವಾಪರುನ್ ಮಾಟ್ಯಾಂಚ್ಯಾ
ವಣದಿಂಚೆರ್ ಸೊಡಯಿಲ್ಲಿಂ ಚಿತ್ರಾಂ, ತ್ಯಾ ಕಾಳಾಚ್ಯಾ
ಮನ್ಶ್ಯಾಕ್ ಕಿತೆಂ ಪಳೆಂವ್ಕ್ ಮೆಳ್ತಾಲೆಂ ಆನಿ ತೊ ಕಿತೆಂ
ಚಿಂತ್ತಾಲೊ ಮ್ಹಳ್ಳ್ಯಾ ವಿಶಿಂ ಮಾಹೆತ್ ದಿತಾತ್.
ಫ್ರಾನ್ಸಾಚ್ಯಾ, ಲಾಸ್ಕೋ ಆನಿ ಶೊವೆ (Lascaux and
Chauvet) ಮ್ಹಳ್ಳ್ಯಾ ಸುವಾತೆಂನಿ ಪಳೆಂವ್ಕ್
ಮೆಳ್ಲ್ಲಿಂ, 30,000 ವರ್ಸಾಂ ಆದ್ಲಿಂ ಚಿತ್ರಾಂ,
ಪುರಾತನ್ ಕಾಳಾಚ್ಯಾ ಚಿತ್ರ್ಕಲೆಚ್ಯೆಂ ಏಕ್ ಪ್ರತಿರೂಪ್
ಜಾವ್ನಾಸಾತ್.
ಲಾಸ್ಕೋಂತ್ಲೆಂ ಏಕ್ ಚಿತ್ರ್
ಶೊವೆಂತ್ಲೆಂ ಏಕ್ ಚಿತ್ರ್
ಹಿಂ
ಚಿತ್ರಾಂ, ಇಂಗ್ಳೊ, ರಂಗಾಳ್ ಶೆಡ್ಮಾತಿ ಆನಿ ಕಠೀಣ್
ಕಾಳ್ಬಾಣೆಚ್ಯೆಂ ಮ್ಯಾಂಗನೀಸ್ ಡೈ ಆಕ್ಸೈಡ್ (charcoal,
ochre, and manganese dioxide) ಹಾತಾಂನಿ
ಮುರ್ಡುನ್, ಬೊಟಾಂನಿ ವಾ ಮನ್ಜಾತಿಂಚ್ಯೆ ಕೇಸ್ ಬಾಂದುನ್
ಕೆಲ್ಲ್ಯಾ ಬುರುಸಾನ್ (brush) ವಣದಿರ್
ಸಾರವ್ನ್ ಕೆಲ್ಲೆ ತಸಲಿಂ ಜಾವ್ನಾಸಾತ್.
ತೆಣೆ
ಆಸ್ಟ್ರೇಲಿಯಾಂತ್, 60,000 ವರ್ಸಾಂ ಆದ್ಲಿಂ ಚಿತ್ರಾಂ
ಪಳೆಂವ್ಕ್ ಮೆಳ್ಳ್ಯಾಂತ್ ಮ್ಹಳ್ಯಾರ್ ಅಜಾಪ್ ಜಾಂವ್ಚ್ಯೆಂ
ಸ್ವಾಭಾವಿಕ್. ಆಸ್ಟ್ರೇಲಿಯಾಚ್ಯೆ ಮೂಳ್ನಿವಾಸಿ
ಜಾವ್ನಾಸ್ಚ್ಯೆಂ ಎಬೊರಿಜಿನಿ ಜನಾಂಗ್ (Aboriginal
people), ತಿತ್ಲ್ಯಾ ಹಜಾರ್ ವರ್ಸಾಂ ಪಯ್ಲೆಂ
ಆಫ್ರಿಕಾ ಥಾವ್ನ್ ಹಾಂಗಾಸರ್ ಪಾವ್ಲ್ಲೆಂ ಕಂಯ್. ತ್ಯಾ
ತೆಂಪಾರ್ ತಾಂಕಾಂ ಪಳೆಂವ್ಕ್ ಮೆಳ್ಲ್ಲ್ಯಾ ಮನ್ಜಾತಿಂಚಿಂ
ಚಿತ್ರಾಂ ತಾಣಿಂ ಮಾಟ್ಯಾಂಚ್ಯಾ ವಣದಿನಿ ಸೊಡಯಿಲ್ಲಿಂ,
ಆಜುನೀ ಪಳೆಂವ್ಕ್ ಮೆಳ್ತಾತ್.
ಎಬೊರಿಜಿನಾಂಚ್ಯೆಂ ಚಿತ್ರ್
ಚಿತ್ರ್ಕಲೆಂತ್ ಪ್ರಗತಿ:
ಮಧ್ಯ್ಯುಗಾಂತ್ಲ್ಯಾ ಗ್ರೀಕ್ ಸಂಸ್ಕೃತೆಂತ್, ಚಡ್
ಸ್ವಾಭಾವಿಕ್ ದಿಸ್ಚ್ಯೊ ಇಮಾಜಿ ಕರುಂಕ್ ಮಹತ್ವ್ ದಿತಾನಾ,
ರೋಮೀ ಸಂಸ್ಕೃತೆಂತ್, ರಂಗಾಂಕ್ ಮಹತ್ವ್ ದೀವ್ನ್
ವಣದಿಂಚ್ಯೆರ್ ಚಿತ್ರಾಂ ಸೊಡಂವ್ಚಿ ಸವಯ್ ಮುಂದರುನ್ ಗೆಲಿ.
ಕ್ರಮೇಣ್ ರೋಮನಾಂಚೊ ಪಾಡಾವ್ ಜಾವ್ನ್ ಕಥೊಲಿಕ್ ಧರ್ಮ್
ಬಳಾಧೀಕ್ ಜಾಂವ್ಚ್ಯಾ ಸಂಗಿಂ, ಚಿತ್ರ್ಕಲಾ, ಧಾರ್ಮಿಕ್
ಚಿತ್ರಾಂ ಸೊಡಂವ್ಚ್ಯಾ ಕುಶಿನ್ ಮಾಲ್ವಲಿ. ತ್ಯಾ
ಚಿಂತ್ಪಾಕ್ ಲಾಗೊನ್, ಇಗರ್ಜಾಂಚ್ಯಾ ಜನೆಲಾಂಚ್ಯಾ
ಆರ್ಶ್ಯಾಂಚೆರ್ ಧಾರ್ಮಿಕ್ ಚಿಂತ್ಪಾಕ್ ಲಗ್ತಿ ಜಾಲ್ಲಿಂ
ಜೆಜುಕ್ರೀಸ್ತಾಚಿಂ, ಭಾಗೆವಂತ್ ಕುಟ್ಮಾಚಿಂ ಆನಿ
ಸಾಂತ್-ಸಾಂತಿಣ್ಯಾಂಚಿಂ ಚಿತ್ರಾಂ ದಿಸೊಂಕ್ ಲಾಗ್ಲಿಂ.
ಇಸ್ಲಾಮಿಕ್ ಧರ್ಮಾಚ್ಯಾಂನಿ, ತಾಂಚ್ಯೊ ಮಸ್ಜಿದ್ಯೊ
ದೆವಾಂಚ್ಯಾ ಚಿತ್ರಾಂ ಬದ್ಲಾಕ್, ರಂಗೋಲಿ ತಸಲಿಂ ವಿವಿಧ್
ಆಕರ್ಷಕ್ ವಿನ್ಯಾಸಾಂ ಸೊಡವ್ನ್ ಸೊಭಯ್ಲ್ಯೊ. ಭಾರತಾಂತ್,
ಇಮಾಜಿ ಆನಿ ರಂಗಾಂಕ್ ಮಹತ್ವ್ ದೀವ್ನ್ ತೆಂಪ್ಲಾಂ
ಉಬಾರ್ಲಿಂ. ಚೀನಾಂತ್, ಕಲಿಗ್ರಾಫಿ (calligraphy)
ನಾಂವಾಚ್ಯಾ ಚಿತ್ರ್ಕಲೆಚಿ ಸುರ್ವಾತ್ ಜಾಲಿ. ತೆಣೆ
ಜಪಾನಾಂತ್, ಯಮಾಟೊ-ಇ (Yamato-e painting)
ನಾಂವಾಚ್ಯಾ ಚಿತ್ರ್ಕಲೆಚಿ ಸುರ್ವಾತ್ ಜಾಲಿ.
ಪಂದ್ರಾವ್ಯಾ ಶೆಕ್ಡ್ಯಾಯಿತ್ಲ್ಯಾಕ್, ಯುರೊಪಾಂತ್,
ಮನ್ಶ್ಯಾಚ್ಯೆಂ ಚಿಂತಪ್ ಎಕಾಚ್ಚಾಣೆ ಬದ್ಲಲೆಂ. ಹಾಕಾ
ಕಾರಾಣ್ ಜಾಲ್ಲ್ಯಾಂ ಪಯ್ಕಿ, ಲಿಯೊನಾರ್ಡೊ ದ ವಿನ್ಚಿ (Leonardo
da Vinci) ಪ್ರಮುಖ್ ಮ್ಹಣ್ಯೆತ್.
1452
ಇಸ್ವೆಂತ್ಲ್ಯಾ ಎಪ್ರಿಲ್ 15 ತಾರ್ಕೆರ್, ಇಟೆಲಿಚ್ಯಾ
ಫ್ಲೊರೆನ್ಸಾಂತ್ ಜಲ್ಮಲ್ಲೊ ಲಿಯೊನಾರ್ಡೊ, ಫಕತ್ ಏಕ್
ಚಿತ್ರ್ಕಾರ್ ನ್ಹಯ್ ಆಸ್ತಾಂ, ಏಕ್ ಸಂಸೋಧಕ್, ವಿಜ್ಞಾನಿ,
ಇಜ್ನೆರ್, ಶಿಲ್ಪಿ, ಶರೀರ್ಶಾಸ್ತ್ರಜ್ಞ್ ಆನಿ ಏಕ್ ಶಾಣೊ
ತತ್ವ್ಶಾಸ್ತ್ರಿ ಮ್ಹಣ್ ಸಗ್ಳೊ ಸಂಸಾರ್ ಮಾಂದ್ತಾ. ತಾಣೆ
ಪಿಂತ್ರಾಯಿಲ್ಲ್ಯಾ ಸಬಾರ್ ಪಿಂತುರಾಂ ಪಯ್ಕಿ, ಮೊನಾ ಲಿಸಾ
(Mona Lisa) ಆನಿ ನಿಮಾಣೆ ಜೆವಣ್ (The
Last Supper) ಪಿಂತುರಾಂ, ಆಜ್-ಕಾಲ್ ಕೊರೊಡಾಂನಿ
ಪಯ್ಶೆ ಯೆಟುನ್ ಲೋಕ್ ಘೆಂವ್ಕ್ ತಯಾರ್ ಆಸಾ ಮ್ಹಳ್ಯಾರ್,
ಲಿಯೊನಾರ್ಡೊ ಕಿತ್ಲೊ ಪ್ರಭಾವಿತ್ ಮ್ಹಳ್ಳೊ ಅಂದಾಜ್
ಕರಯೆತ್.
ಲಿಯೊನಾರ್ಡೊಚ್ಯಾ ನೋಟ್-ಬುಕಾಂನಿ,
ಮನ್ಶ್ಯಾ ಕುಡಿಚ್ಯಾ ವಿವಿಧ್ ಭಾಗಾಂಚಿಂ ಚಿತ್ರಾಂ, ವಿಮಾನ್
ಕಿತೆಂ ಮ್ಹಣ್ ಕಳಿತ್ ನಾತ್ಲ್ಲ್ಯಾ ತ್ಯಾ ಕಾಳಾರ್, ತಾಣೆ
ಸೊಡಯಿಲ್ಲಿಂ ಉಬ್ಚಿಂ ಮೆಶಿನಾಂ ಮಾತ್ರ್ ನ್ಹಯ್ ಆಸ್ತಾಂ,
ವಿವಿಧ್ ಥರಾಂಚಿಂ ಝಜಾಚಿಂ ಹಾತೆರಾಂ ಆನಿ ವೈಜ್ಞಾನಿಕ್
ಪ್ರಯೋಗಾಂ ವಿಶಿಂ ಬರಯಿಲ್ಲಿಂ ಲೇಖನಾಂ ಆನಿ ನಕ್ಷಾ
ಆಸ್ಲ್ಲ್ಯೊ. ತ್ಯಾ ಕಾಳಾರ್ಚ್ ತಾಣೆ, ಹೆಲಿಕೊಪ್ಟರಾಂ
ಆನಿ ಸಬ್ಮೆರಿನಾಂಚೊ ಉಲ್ಲೇಖ್ ಕೆಲ್ಲೊ ಮ್ಹಣ್ತಾನಾ, ತಾಚಿ
ಬುದ್ವಂತ್ಕಾಯ್ ಕಿತ್ಲಿ ಮ್ಹಳ್ಳೆಂ, ಸಾಧ್ಯಾ ಮತಿಕ್
ಚಿಂತುಂಕ್ ಅಸಾಧ್ಯ್ ಮ್ಹಣ್ಯೆತ್.
ಲಿಯೊನಾರ್ಡೊ ದ ವಿನ್ಚಿ ಆನಿ ಮೊನಾ ಲಿಸಾ
ಲಿಯೊನಾರ್ಡೊ ಜಲ್ಮಲ್ಲ್ಯಾ ತ್ಯಾಚ್ ಪಂದ್ರಾವ್ಯಾ
ಶೆಕ್ಡ್ಯಾಂತ್, ಆನ್ಯೆಕ್ಲೊ ಪ್ರಖ್ಯಾತ್ ಚಿತ್ರ್ಕಾರ್
ಜಲ್ಮಲೊ. ತೊ ಜಾವ್ನಾಸ್ಲ್ಲೊ, ಮೈಕಲ್ಯಾಂಜೆಲೊ (Michelangelo).
ತಾಣೆ ಚಿತ್ರ್ಕಲೆಂತ್ ಆನಿ ಇಮಾಜಿ ಕರ್ಚ್ಯಾ ಕಲೆಂತ್ ಏಕ್
ವಾದಾಳ್ಚ್ ಉಟಯ್ಲೆಂ ಮ್ಹಣ್ಯೆತ್. ಸತ್ರಾವ್ಯಾ
ಶೆಕ್ಡ್ಯಾಂತ್, ಚಿತ್ರ್ಕಲೆಂತ್ ಬಾರೂಕ್ ಕ್ರಾಂತಿ
ಉದೆಲಿ. ಹ್ಯಾ ಕಾಳಾಕ್ ಬಾರೂಕ್ ಆವ್ದಿ (Baroque
period) ಮ್ಹಣ್ತಾತ್. ಬಾರೂಕ್ ಮ್ಹಳ್ಳೊ ಸಬ್ದ್,
ಪೊರ್ಚುಗೀಸ್ ಭಾಶೆಚ್ಯಾ ಬೊರೊಕ್ಕೊ ಸಬ್ದಾ ಥಾವ್ನ್
ಉದೆಲ್ಲೊ ಜಾವ್ನಾಸಾ. ಚಡಾವತ್ ಜಾವ್ನ್ ಮೊತಿಯಾಂಚೊ ಆಕಾರ್
ಉರುಟ್ ಆಸ್ತಾ ತರೀ, ಥೊಡೆ ಪಾವ್ಟಿಂ, ವಾಂಕ್ಡಿಂ-ತಿಂಕ್ಡಿಂ
ಮೊತಿಯಾಂಯೀ ಮೆಳ್ತಾತ್. ತಸಲ್ಯಾ ಮೊತಿಯಾಂಕ್, ಬೊರೊಕ್ಕೊ
ಮ್ಹಣ್ತಾತ್. ಸತ್ರಾವ್ಯಾ ಶೆಕ್ಡ್ಯಾಂತ್, ಕಲಾಕ್ಷೇತ್ರಾಂತ್
ಜಾಲ್ಲ್ಯೊ ಬದ್ಲಾವಣ್ಯೊ, ಸಂಪ್ರಾದಾಯಾಂಚಿಂ ಪಾಳಾಂ
ರೊಂಬ್ಲ್ಲ್ಯಾ ಸಮಾಜೆಂತ್ ಠೀಕೆಕ್ ವಳಗ್ ಜಾಲ್ಯೊ ಅನಿ
ಬದ್ಲಲ್ಲ್ಯಾ ಕಲೆಂಕ್ ಹಲ್ಕುನ್, ಬಾರೂಕ್ ಮ್ಹಣ್ ನಾಂವ್
ದಿಲೆಂ.
ತೆದೊಳ್ ಪರಯಾಂತ್, ಎಕಾಚ್ ಥರಾಚಿಂ
ಚಿತ್ರಾಂ ಪಿಂತ್ರಾವ್ನ್ ಆಸ್ಲ್ಲ್ಯಾಂಕ್ ನವೆಂ ಚಿಂತಪ್
ದೀಂವ್ಕ್, ಕಾರಾವಾಜ್ಜ್ಯೊ (Caravaggio)
ನಾಂವಾಚೊ ನವೊ ಕಲಾಕಾರ್ ಕಾರಾಣ್ ಜಾಲೊ. ತಾಚ್ಯಾ
ಚಿತ್ರಾಂನಿ, ಪ್ರಕೃತೆಂತ್ಲೊ ಸ್ವಾಭಾವಿಕ್ ಉಜ್ವಾಡ್ ಕಸೊ
ಪಿಂತ್ರಾಂವ್ಚೊ ಮ್ಹಳ್ಳೆಂ ತಾಣೆ ದಾಕಯ್ಲೆಂ.
ತ್ಯಾಚ್ ಶೆಕ್ಡ್ಯಾಂನಿ, ನೆದರ್ಲೆಂಡಾಚೊ ಡಚ್ಚ್
ಪೆಂಯ್ಟರ್, ರೆಂಬ್ರಾಂಟ್ Rembrandt) ಹಾಣೆ,
ಬೈಬಲಾಚಿಂ ಸನ್ನಿವೇಶಾಂ ಮಾರ್ಮಿಕ್ ರಿತಿರ್ ಪಿಂತ್ರಾವ್ನ್
ದಾಕಯ್ಲಿಂ.
ಎಕುಣಿಸಾವ್ಯಾ ಶೆಕ್ಡ್ಯಾಯಿತ್ಲ್ಯಾಕ್,
ಚಿತ್ರ್ಕಲೆಂತ್ ವಿಶೇಸ್ ಬದ್ಲಾವಣ್ಯೊ
ಝಳ್ಕೊಂಕ್ಲಾಗ್ಲ್ಯೊ. ವಿನ್ಸೆಂಟ್ ವ್ಯಾನ್ ಗೋ (Vincent
van Gogh) ಹಾಣೆ, ಉಜ್ವಾಡ್, ಹವೊ ಆನಿ ಚಲಾವಣ್
ದಾಕಂವ್ಕ್, ಬ್ರಶ್ಯಾಂನಿ ರಂಗ್ ವಾಪರ್ಚ್ಯಾ ರಿತಿಂತ್
ನವೆಸಾಂವ್ ದಾಕವ್ನ್, ಪಳೆತೆಲ್ಯಾಂಕ್ ಚಕಿತ್ ಕೆಲೆಂ.
ವಿನ್ಸೆಂಟ್ ವ್ಯಾನ್ ಗೋ ಆನಿ ತಾಚ್ಯೆಂ ಚಿತ್ರ್
(Starry night over Rhone)
ತಾಂಚ್ಯಾ ಪಾಟ್ಲ್ಯಾನ್ ಆಯ್ಲೆ, ಪಾಬ್ಲೊ ಪಿಕಾಸೊ (Pablo
Picasso) ಆನಿ ಜೋರ್ಜ್ ಬ್ರಾಖ್ (Georges
Braque). ಹಾಣಿ ಚಿತ್ರ್ಕಲೆಂತ್ ಆಧುನೀಕತಾ ಸುರು
ಕೆಲಿ. ಎದೊಳ್ ಮಸ್ಕ್ ಜಾವ್ನಾಸ್ಲ್ಲೆ ಗೀಟ್, ಸೂಕ್ಷ್ಮ್
ಜಾಲೆ ಆನಿ ಹರಯೇಕ್ ಗೀಟ್, ಭಾವನಾಂ ವ್ಯಕ್ತ್ ಕರ್ಚ್ಯಾ
ಸಾಧನಾಂತ್ ಮಹತ್ವಾಚೊ ಜಾಲೊ.
ಚರಿತ್ರೆಂತ್ ವಿವಾಧಾಕ್ ಒಳಗ್ ಜಾಲ್ಲೆ ಚಿತ್ರ್ಕಾರ್:
1. ಮೈಕಲ್ಯಾಂಜೆಲೊ (Michelangelo)
1475 ಇಸ್ವೆಂತ್, ಮಾರ್ಚಾಚ್ಯಾ 6 ತಾರ್ಕೆರ್,
ಇಟೆಲಿಚ್ಯಾ ಫ್ಲೊರೆನ್ಸಾಂತ್, ಎಕಾ ದುಬ್ಳ್ಯಾ ಕುಟ್ಮಾಂತ್
ಜಲ್ಮಲ್ಲ್ಯಾ ಮೈಕಲ್ಯಾಂಜೆಲೊಚಿ ಜಿಣಿಯೆ ಕಥಾ ಆತುರಾಯೆಚಿ
ಮ್ಹಣ್ಯೆತ್. 13 ವರ್ಸಾಂ ಪ್ರಾಯೆರ್, ವ್ಹಡಿಲಾಂಚ್ಯಾ
ಖುಶೆಕ್ ವಿರೋಧ್ ವಚುನ್, ದೊಮಿನಿಕೊ (Domenico
Ghirlandaio) ನಾಂವಾಚ್ಯಾ ಪೆಂಯ್ಟರಾಚೊ ಶಿಸ್
ಜಾವ್ನ್ ಪೆಂಯ್ಟಿಂಗಾಂತ್ ತರ್ಭೆತಿ ಜೊಡ್ಲೆಲ್ಯಾ ತಾಚ್ಯಾ
ಉತ್ತೀಮ್ ಚಿತ್ರಾಂಕ್ ಲಾಗುನ್, ಫ್ಲೋರೆನ್ಸಾಂತ್ ಅಧಿಕಾರ್
ಚಲವ್ನ್ ಆಸ್ಲ್ಲ್ಯಾ, ಲೊರೆನ್ಜೊ ಡಿಮೆಡಿಚಿ (Lorenzo
de' Medici ) ಮ್ಹಳ್ಳ್ಯಾನ್, ಮೈಕಲ್ಯಾಂಜೆಲೊಕ್ ಆಪ್ಲ್ಯಾ
ತಾಬೆಂತ್ ಘೆತ್ಲೊ.
ಚಿತ್ರ್ಕಲೆಚೊ ಆರಾಧಕ್
ಲೊರೆನ್ಜೊಚ್ಯಾ ಹಾತಾಖಾಲ್, ಬರಿಚ್ ಸಮ್ಜಣಿ ಜೊಡ್ಲ್ಲ್ಯಾ
ಮೈಕಲ್ಯಾಂಜೆಲೊನ್, 1499 ಇಸ್ವೆಂತ್ ಮಾರ್ಬಲ್ ವಾಪರ್ನ್
ರಚ್ಲ್ಲಿ, ಪಿಯೆಟಾ (Pietà) ನಾಂವಾಚಿ,
ಮರಿಯೆನ್ ಜೆಜುಚಿ ನಿರ್ಜೀವ್ ಕೂಡ್ ಆಪ್ಲ್ಯಾ ಉಸ್ಕ್ಯಾರ್
ಘೆತ್ಲ್ಲಿ ಇಮಾಜ್, ಅಜೂನ್ ವಾತಿಕಾನಾಚ್ಯಾ ಸಾಂತ್
ಪೆದ್ರುಚ್ಯಾ ಬಾಸಿಲಿಕಾಂತ್ ಆಸಾ ಆನಿ ಪಳೆಯ್ತೆಲ್ಯಾಂಚಿಂ
ಮನಾಂ ಪಿಸ್ವಾಯ್ತಾ. ತ್ಯಾ ಉಪ್ರಾಂತ್, ಆನ್ಯೇಕ್ ವಿಶೇಸ್
ಇಮಾಜ್ 1501-1504 ಇಸ್ವ್ಯಾಂ ಮಧೆಂ ಕೆಲ್ಲಿ, ದಾವಿದ್ (David)
ನಾಂವಾಚಿ, ಫ್ಲೊರೆನ್ಸಾಚ್ಯಾ ಸ್ವತಂತ್ರಾಕ್ ಪಾಚಾರ್ಚಿ
ಜಾವ್ನಾಸ್ಲ್ಲಿ.
ಪಿಯೆಟಾ (Pietà)
1508 ಇಸ್ವೆಂತ್, ದುಸ್ರೊ ಪಾಪಾ ಜೂಲಿಯಸಾನ್ (Pope
Julius II), ಮೈಕಲ್ಯಾಂಜೆಲೊಕ್ ವಾತಿಕಾನಾಂತ್ಲ್ಯಾ
ಸಿಸ್ಟೀನ್ ಚಾಪೆಲಾಚ್ಯೆಂ (Sistine Chapel)
ಸೀಲಿಂಗ್ ಸಜಂವ್ಕ್ ನಮಿಯಾರ್ಲೊ. 1508 ಥಾವ್ನ್ 1512
ಇಸ್ವೆ ಮಧೆಂ ಪಿಂತ್ರಾಯಿಲ್ಲೆಂ ಹೆಂ ಸೀಲಿಂಗ್, ಅಜೂನ್
ಮನ್ಶ್ಯಾನ್ ಸೊಡಯಿಲ್ಲ್ಯಾ ಚಿತ್ರಾಂ ಪಯ್ಕಿ ಅತ್ಯುತ್ತಮ್
ಮ್ಹಳ್ಳಿ ಅಭಿಪ್ರಾಯ್ ಆಸಾ.
ಮೈಕಲ್ಯಾಂಜೆಲೊಚಿ ನಿಮಾಣಿ ಝಡ್ತಿ (The
Last Judgment)
ಸಿಸ್ಟೀನ್
ಚಾಪೆಲಾಂತ್ಲ್ಯಾ ಚಿತ್ರಾಂ ಸಂಗಿಂ, ಮೈಕಲ್ಯಾಂಜೆಲೊಚಿ ಠೀಕಾ
ಸುರು ಜಾಲಿ ಮ್ಹಣ್ಯೆತ್. ತಾಣೆ ಪಿಂತ್ರಾಯಿಲ್ಲ್ಯಾ
ಚಿತ್ರಾಂನಿ ವಿಣ್ಗೆಪಣ್ ದಾಕಯಿಲ್ಲೆಂ, ಇಗರ್ಜೆಚ್ಯಾ
ಮ್ಹಣಿಯಾರಯಾಂಕ್ ಮಾತ್ರ್ ನ್ಹಯ್, ಸಾಧ್ಯಾ ಭಕ್ತಾಂಕೀ
ಆಂವಡ್ಲೆಂನಾ. 1564 ಇಸ್ವೆಂತ್, ಮೈಕಲ್ಯಾಂಜೆಲೊಚ್ಯಾ ಮರಣಾ
ಉಪ್ರಾಂತ್, ಹೆರ್ ಚಿತ್ರ್ಕಾರಾಂಕ್ ವಾಪರ್ನ್, ಚಿತ್ರಾಂನಿ
ಉಗ್ತೆ ಆಸ್ಲ್ಲೆ ಲೈಂಗಿಕ್ ವಿಶ್ವೆ ಧಾಂಪ್ಚಿ ವಿಲೆವಾರಿ
ಕೆಲ್ಲಿ ತೆಂ ವಾಚುಂಕ್ ಮೆಳ್ತಾ.
2.
ಕಾರಾವಾಜ್ಜ್ಯೊ (Michelangelo Merisi da
Caravaggio):
1571 ಇಸ್ವೆಂತ್ ಇಟೆಲಿಚ್ಯಾ
ಮಿಲಾನ್ ಶಹರಾಂತ್ ಜಲ್ಮಲ್ಲೊ ಕಾರಾವಾಜ್ಜ್ಯೊ, ಫೊಟೊ
ಕಾಡ್ತಾನಾ ಉಜ್ವಾಡ್ ಕಸೊ ದಿಸ್ತಾಗೀ ತ್ಯಾ ರಿತಿರ್
ಉಜ್ವಾಡ್ ಆನಿ ಕಾಳೊಕ್ ಮೆಳವ್ನ್ ಪಿಂತುರಾಂ ರಚ್ಚ್ಯಾಂತ್
ನಾಂವಾಡ್ಲೊಲೊ ಜಾವ್ನಾಸಾ.
ಆಪ್ಣಾಚಿ ಜಿಣಿ
ಹೆರಾಂಲಾಗಿಂ ಝಗಡ್ಚ್ಯಾಂತ್ ಖರ್ಚಿಲ್ಲ್ಯಾ ತಾಣೆ, 1606
ಇಸ್ವೆಂತ್ ಎಕ್ಲ್ಯಾಚೊ ಜೀವ್ ಕಾಡ್ಲ್ಲ್ಯಾ ಆಪ್ರಾಧಾಕ್
ಲಾಗೊನ್, ರೊಮಾ ಥಾವ್ನ್ ಪೊಳಾಪಳ್ ಘೆಜೆ ಪಡ್ಲಿ. ತ್ಯಾ
ಉಪ್ರಾಂತ್ಲಿ ಜಿಣಿ ತಾಣೆ ಗುಪ್ತಿಂ ಖರ್ಚಿಜೆ ಪಡ್ಲಿ ತರೀ,
ತಾಚಿ ಚಿತ್ರಾಂ ಸೊಡಂವ್ಚಿ ಸವಯ್ ಮುಂದರೊನ್ ಗೆಲಿ. ತೊ 38
ವರ್ಸಾಂ ಪ್ರಾಯೆರ್ ಅಂತರ್ಲೊ.
ಕಾರಾವಾಜ್ಜ್ಯೊಚ್ಯೆಂ ಚಿತ್ರ್
3.
ಎಡ್ವಾ ಮನೇ (Édouard Manet)
1832 ಇಸ್ವೆಂತ್ ಫ್ರಾನ್ಸಾಚ್ಯಾ ಪ್ಯಾರಿಸಾಂತ್ ಜಲ್ಮಲ್ಲೊ
ಎಡ್ವಾ ಮನೇ, ಚಿತ್ರ್ಕಲೆಂತ್ ಆಧುನೀಕತೆಚಿ ಸುರ್ವಾತ್
ಕೆಲ್ಲ್ಯಾ ಚಿತ್ರ್ಕಾರಾಂ ಪಯ್ಕಿ ಎಕ್ಲೊ ಮ್ಹಣ್ಯೆತ್.
ಆಜ್-ಕಾಲ್, ಆಧುನಿಕ್ ಚಿತ್ರ್ಕಲೆಚೊ ಬಾಪಯ್ ಮ್ಹಣ್ ತಾಕಾ
ಪುಕಾರ್ತಾತ್ ತರೀ, ತಾಚ್ಯಾ ಜಿಣಿಯೆ ಆವ್ದೆಂತ್ ತಾಣೆ
ವಾಸ್ತವಿಕತೆಚ್ಯಾ ನಿಬಾನ್ ಪಿಂತ್ರಾಯಿಲ್ಲೆಂ ವಿಣ್ಗೆಪಣ್,
ಸಬಾರಾಂಚ್ಯಾ ರಾಗಾಕ್ ಬಲಿ ಜಾಲ್ಲೆಂ ಆಸಾ. ಚಡ್
ವಿವಾದಾತ್ಮಕ್ ಜಾಲ್ಲೆ ಪಿಂತುರ್, 1963 ಇಸ್ವೆಂತ್
ಸೊಡಯಿಲ್ಲೆಂ ಒಲಿಂಪಿಯಾ (Olympia-1863).
4. ಪಾಬ್ಲೊ ಪಿಕಾಸೊ (Pablo Picasso)
1881 ಇಸ್ವೆಂತ್ ಸ್ಪೇಯ್ನಾಂತ್ ಜಲ್ಮಲ್ಲ್ಯಾ
ಪಿಕಾಸೊಕ್ ಒಳ್ಕಾನಾತ್ಲ್ಲೆ ಭೋವ್ಚ್ ಉಣೆ ಮ್ಹಣ್ಯೆತ್.
ತಾಣೆ ವಿಸಾವ್ಯಾ ಶೆಕ್ಡ್ಯಾಂತ್ ಚಿತ್ರ್ಕಲೆಂತ್ ಆಸಾ
ಕೆಲ್ಲಿಂ, ಎದೊಳ್ಚ್ಯಾ ಚಿತ್ರ್ಕಲೆಕ್ ಸವಾಲ್ ಉಡಂವ್ಚಿಂ
ಚಿತ್ರಾಂ, ಭಾರಿಚ್ ಪ್ರಖ್ಯಾತ್ ಜಾಲ್ಯಾಂತ್ ಮ್ಹಣ್ಚ್ಯಾಕ್
ದೋನ್ ಉತ್ರಾಂ ನಾಂತ್.
ಪಾಬ್ಲೊ ಪಿಕಾಸೊಚ್ಯೆಂ ಗುಯೆರ್ನಿಕಾ (Guernica)
ತಾಚ್ಯಾ ಜಿಣಿಯೆ ಆವ್ದೆಂತ್ ತಾಣೆ, ವೀಸ್ ಹಜಾರಾಂ
ವಯ್ರ್ ಚಿತ್ರಾಂ ಪಿಂತ್ರಾಯ್ಲ್ಯಾಂತ್ ಮ್ಹಳ್ಯಾರ್ ಅಜಾಪ್
ಭೊಗಾತ್ ತರೀ, ತಾಣೆ ಸ್ತ್ರೀಯಾಂಚ್ಯೆರ್ ತಿರಸ್ಕಾರ್
ದಾಕಯಿಲ್ಲ್ಯಾ ವಿಶಿಂ ದುರ್ಸೊಣೆ ಆಯ್ಕೊಂಕ್ ಮೆಳ್ತಾ.
ತಾಚ್ಯೊ ಕೃತಿಯೊ ಉಂಚ್ಲ್ಯಾ ಮಟ್ಟಾಚ್ಯೊ ತರೀ, ತಾಚ್ಯಾ
ಖಾಸ್ಗಿ ಜೀವನಾಂತ್ ಸ್ತ್ರೀಯಾಂಕ್ ದಣ್ಸಿಲಾಂ ಮ್ಹಳ್ಳ್ಯಾ
ಕಾರಣಾನ್, ತಾಕಾ ಫಾವೊತೆಂ ಹೊಗ್ಳಾಪ್ ಮೆಳಾನಾ ಜಾಲಾಂ.
5. ಐ ವೆಯ್ವೆಯ್ (Ai Weiwei)
1957 ಇಸ್ವೆಂತ್ ಚೀನಾಚ್ಯಾ ಬೆಯ್ಜಿಂಗಾಂತ್ ಜಲ್ಮಲ್ಲ್ಯಾ
ವೆಯ್ವೆಯ್ಚಿಂ ಚಿತ್ರಾಂ, ರಾಜಕೀಯ್ ದಭಾವಾ ವಿರೋಧ್
ಆವಾಜ್ ಉಟಂವ್ಚಿಂ ಜಾವ್ನಾಸಾತ್ ಜಾಲ್ಲ್ಯಾನ್, ತಾಕಾ
ವಿವಾದಾತ್ಮಕ್ ಚಿತ್ರ್ಕಾರ್ ಮ್ಹಳ್ಳೆಂ ನಾಂವ್ ಪಡ್ಲಾಂ.
ಚೀನೀ ಸರ್ಕಾರಾನ್ ಚಲಂವ್ಚಿಂ ಅತರ್ವಣಾಂ,
ಭೆಂ-ಭಿರಾಂತ್ ನಾಸ್ತಾಂ ಆಪ್ಲ್ಯಾ ಚಿತ್ರಾಂನಿ ದಾಕಂವ್ಕ್
ತೊ ಪಾಟಿಂ-ಫುಡೆಂ ಪಳೆಯ್ನಾ. 2011 ಇಸ್ವೆಂತ್ ತಾಕಾ
ಬಂದಿತ್ ಕೆಲ್ಲೊ ಆನಿ ತಾಚ್ಯಾ ಚಿತ್ರ್ಕಲೆಚ್ಯಾ
ಸ್ಟುಡಿಯೊಚಿ ದೆಸ್ವಾಟ್ ಕೆಲ್ಲಿ ತರೀ, ತೊ ಅಜೂನ್ ಸರ್ಕಾರಾ
ವಿರೋಧ್ ಆಪ್ಲೆಂ ಮಿಸಾಂವ್ ಮುಂದರುನ್ ಆಸಾ.
6.
ಎಮ್. ಎಫ್. ಹುಸೆಯ್ನ್ (M. F. Husain)
1915 ಇಸ್ವೆಂತ್ ಮಹಾರಾಷ್ಟ್ರಾಚ್ಯಾ ಪಂಡಾರ್ಪುರಾಂತ್
ಜಲ್ಮಲ್ಲೊ, ಮಕ್ಮೂಲ್ ಫಿದಾ ಹುಸೆಯ್ನ್, ಭಾರತಾಚೊ ಪಿಕಾಸೊ
ಮ್ಹಳ್ಳ್ಯಾ ನಾಂವಾನ್ ಫಾಮಾದ್ ಜಾಲಾ. ತಾಚ್ಯಾ ಚಿತ್ರಾಂನಿ,
ಆಧುನೀಕತಾ, ಭಾರತೀಯ್ ಗ್ರಾಮ್ಯ್ ಜೀವನ್ ಆನಿ ಹಿಂದೂ
ಪವಿತ್ರ್ ಗೃಂಥಾಂತ್ಲ್ಯಾ ಸಂಗ್ತಿಂ ವಿಶಿಂ ಪಿಂತ್ರಾವ್ಣಿ
ಪಳೆಂವ್ಕ್ ಮೆಳ್ತಾ.
1990 ಧಾಕ್ಡ್ಯಾಯಿತ್ಲ್ಯಾಕ್,
ತಾಣೆ ಹಿಂದೂ ದೇವತೆಂಕ್ ವಿಣ್ಗಿಂ ಪಿಂತ್ರಾಂವ್ಚ್ಯೆ ಧಯ್ರ್
ಘೆತ್ಲ್ಲ್ಯಾಚ್ಯೆಂ ಕಾರಾಣ್ ಜಾವ್ನ್, ಹಿಂದ್ವಾಂಕ್
ತಾಚ್ಯೆರ್ ಕ್ರೋಧ್ ಉಬ್ಜಾಲೊ ಮ್ಹಣ್ಯೆತ್. ತ್ಯಾ ಕ್ರೋಧಾಕ್
ಲಾಗೊನ್, ತಾಚ್ಯೆರ್ ಆನಿ ತಾಚ್ಯಾ ಸ್ಟುಡಿಯೊಚ್ಯೆರ್ ಹಲ್ಲೊ
ಚಲೊನ್, ಜಿವಾಚ್ಯಾ ಭಿಯಾನ್ ತಾಣೆ ಗಾಂವ್ ಸೊಡ್ಚೊ ಪಡ್ಲೊ.
2010 ಇಸ್ವೆಂತ್, ಖಟಾರ್ ದೇಶಾನ್ ತಾಕಾ ನಾಗರೀಕತಾ ದಿಲಿ
ಆನಿ 2011 ಇಸ್ವೆಂತ್ ತೊ ಅಂತರ್ಲೊ.
7. ಬ್ಯಾಂಕ್ಸಿ (Banksy)
ಆಪ್ಣಾಕ್ ಬ್ಯಾಂಕ್ಸಿ ಮ್ಹಣ್ ಆಪಂವ್ಚೊ ಹೊ
ಚಿತ್ರ್ಕಲಾಕಾರ್, ಇಂಗ್ಲೆಂಡಾಂತ್ಲೊ ಮ್ಹಣ್ ಸರ್ವ್
ಚಿಂತ್ತಾತ್ ತರೀ, ತೊ ನಿಜಾಯ್ಕಿ ಕೋಣ್ ಮ್ಹಳ್ಳೆಂ
ಕೊಣಾಯ್ಕಿ ಕಳಿತ್ ನಾ.
1990-ಚ್ಯಾ ಧಾಕ್ಡ್ಯಾಂತ್,
ಬೃಹತ್ ಗಾತ್ರಾಚಿಂ ತಾಚಿಂ ಚಿತ್ರಾಂ, ರಸ್ತ್ಯಾಂ
ಬಗ್ಲೆಚ್ಯಾ ವಣದಿಂಚ್ಯೆರ್ ದಿಸೊಂಕ್ ಸುರು ಜಾಲಿಂ.
ತಾಚ್ಯೆಂ, ಗರ್ಲ್ ವಿದ್ ಬೆಲೂನ್ (Girl with
Balloon) ಚಿತ್ರ್, ಸಂಸಾರಾರ್ ಪ್ರಖ್ಯಾತ್ ಜಾಲಾಂ.
ಗರ್ಲ್ ವಿದ್ ಬೆಲೂನ್ (Girl with
Balloon)
ತವಳ್-ತವಳ್ ಹ್ಯಾ
ಚಿತ್ರ್ಕಾರಾಚಿಂ, ಝುಜಾ ವಿರೋಧಿ, ಬಂಡ್ವಾಳ್ಶಾಹಿ
ಕಾಲೆತಿಚ್ಯಿಂ ಖೆಳ್ಕುಳಾಂ ಕರ್ಚಿಂ, ರಾಜಕೀಯ್ ಪರಿಗತೆಚೆಂ
ವಿಡಂಬನ್ ಕರ್ಚೆ ತಸಲಿಂ, ಕೊಣಾಯ್ಚ್ಯಾ ಭೊಗ್ಣಾಂಕ್ ಖೊಟ್
ಮಾರ್ನ್ ಉಸ್ಕಾಂವ್ಕ್ ಸಕ್ಚಿಂ ಚಿತ್ರಾಂ, ಇಂಗ್ಲೆಂಡಾಂತ್
ಮಾತ್ರ್ ನ್ಹಯ್, ಸಂಸಾರಾಚ್ಯಾ ಹೆರ್ ಶಹರಾಂಚ್ಯಾ
ವಣದಿಂಚ್ಯೆರೀ ಪಳೆಂವ್ಕ್ ಮೆಳ್ಳ್ಯಾಂತ್.
8. ಟ್ರೇಸೀ
ಅಮೀನ್ (Tracey Emin)
1963
ಇಸ್ವೆಂತ್ ಲಂಡನಾಂತ್ ಜಲ್ಮಲ್ಲೆಂ ಟ್ರೇಸೀ, ಆಪ್ಲ್ಯಾ
ಲೈಂಗಿಕತಾ, ವ್ಯಕ್ತಿತ್ವತಾ, ಅಘಾತ್ ಆನಿ ಜಿಣಿಯೆಚೊ
ಅನ್ಬೊಗ್ ಆಪ್ಲ್ಯಾ ಚಿತ್ರಾಂನಿ ಪಿಂತ್ರಾಯ್ತಾ.
ಸ್ತ್ರೀಯೆಚ್ಯಾ ಲೈಂಗಿಕತೆ ವಿಶಿಂ ಆಸ್ಚಿ ನಾ-ಸಮ್ಜಣಿ,
ಸ್ತ್ರೀಯಾಂಚಿ ಮಾನಸಿಕ್ ಭಲಾಯ್ಕಿ ಆನಿ ಸ್ತ್ರೀಯಾಂಕ್
ಸಮಾಜೆಂತ್ ಕೀಳ್ ಮಟ್ಟಾನ್ ಪಳೆಂವ್ಚ್ಯಾ ವಿಶಿಂ ಆಪ್ಲ್ಯಾ
ಪಿಂತುರಾಂನಿ ದಾಕಂವ್ಚ್ಯಾ ಟ್ರೇಸಿಚ್ಯೆಂ, ಮೈ ಬೆಡ್ (My
Bed) ನಾಂವಾಚ್ಯೆಂ ಚಿತ್ರ್ ಪುರಸ್ಕಾರಾಂಕ್ ಪಾತ್ರ್
ಜಾಲೆಂ ತರೀ, ಆಪ್ಲ್ಯಾ ಬೆಡ್ರೂಮಾಂತ್ ಆಪ್ಲೆಂ
ಅಸ್ತ್ವೆಸ್ತ್ ಜಾಲ್ಲೆಂ ಖಟ್ಲೆಂ, ಖತಾಂ ಜಾಲ್ಲ್ಯೊ ವೊಲಿ
ಆನಿ ಆಪ್ಣಾಚ್ಯೊ ಖಾಸ್ಗಿ ವಸ್ತು ದಾಕಂವ್ಚ್ಯೆಂ ಹೆಂ
ಚಿತ್ರ್, ದಾಕವ್ಣೆಕ್ ಯೋಗ್ಯ್ ನ್ಹಯ್ ಮ್ಹಳ್ಳೊ ವಾದ್
ಸಬಾರಾಂನಿ ಮಾಂಡ್ಲೊ ತರೀ, ತಾಂಚ್ಯೆಂ ಗುಮಾನ್
ಕರಿನಾಸ್ತಾಂ, ಟ್ರೇಸೀ ಆಪ್ಲೆಂ ಕಾಮ್ ಮುಂದರುನ್ ಆಸಾ.
ಚಿತ್ರ್ಕಲಾ ಆನಿ ಆರ್ಥಿಕ್ ಮೋಲ್:
ಚಿತ್ರ್ಕಲಾಕಾರಾಂ ಪಯ್ಕಿ ಕೊಣಾಕ್ ಚಡ್
ಮಾನ್ ಆಸಾ ಮ್ಹಳ್ಳಿ ಸಂಗತ್, ತಾಂಚಿಂ ಚಿತ್ರಾಂ ಕಿತ್ಲ್ಯಾ
ಮೊಲಾಕ್ ಗೆಲ್ಯಾಂತ್ ಮ್ಹಳ್ಳ್ಯಾಚ್ಯೆರ್ ತುಕ್ಚಿ ತರ್, ತಿ
ಪಟ್ಟಿ ಅಶಿ ಆಸಾ:
1. ಲಿಯೊನಾರ್ಡೊ ದ ವಿನ್ಚಿ ಪಯ್ಲ್ಯಾ
ಸ್ಥಾನಾರ್ ಯೆತಾ. ತಾಚ್ಯೆಂ, ಮೊನಾ ಲಿಸಾ ಪಿಂತುರ್
ಪ್ರಖ್ಯಾತ್ ವ್ಹಯ್ ತರೀ, ತಾಣೆ ಪಿಂತ್ರಾಯಿಲ್ಲೆಂ,
ಸಾಲ್ವಾತೊರ್ ಮಂಡಿ (Salvator Mundi)
ನಾಂವಾಚ್ಯೆಂ ಪಿಂತುರ್, ಸಂಸಾರಾಂತ್ ಅತೀ ಚಡ್ ಮೊಲಾಚ್ಯೆಂ
ಪಿಂತುರ್ ಜಾವ್ನಾಸಾ. 2017 ಇಸ್ವೆಂತ್ ಹೆಂ ಪಿಂತುರ್,
450.3 ಮಿಲಿಯಾ ಅಮೆರಿಕನ್ ಡೊಲ್ಲರಾಂಕ್ ವಿಕುನ್ ಗೆಲೆಂ.
2. ದುಸ್ರ್ಯಾ ಸ್ಥಾನಾರ್ ಯೆತಾ - ವಿಲ್ಲೆಮ್ ದ
ಕೂನಿಂಗ್ (Willem de Kooning) ಹಾಚ್ಯೆಂ,
ಇಂಟರ್ಚೇಂಜ್ (Interchange). 1904
ಇಸ್ವೆಂತ್, ನೆದರ್ಲೆಂಡಾಚ್ಯಾ ರೊಟ್ಟರ್ಡ್ಯಾಮಾಂತ್
ಜಲ್ಮಲ್ಲೊ ವಿಲ್ಲೆಮ್, ಅಮೂರ್ತ್ ಅಭಿವೆಕ್ತಿವಾದಿ (Abstract
Expressionism) ಶೈಲೆಚ್ಯಾ ಚಿತ್ರಾಂಕ್
ಪ್ರಖ್ಯಾತ್. ಕ್ರಮೇಣ್ ಅಮೆರಿಕಾಂತ್ ವಸ್ತಿ ಕೆಲ್ಲ್ಯಾ
ತಾಚ್ಯಾ ಚಿತ್ರಾಂ ದ್ವಾರಿಂ, ಅಮೆರಿಕಾಕ್ ಜಾಗತಿಕ್
ಚಿತ್ರ್ಕಲೆಂತ್ ಆಪ್ಲೆಂಚ್ ಏಕ್ ಸ್ಥಾನ್ ಫಾವೊ ಜಾಲೆಂ.
ತಾಚೆಂ ಇಂಟರ್ಚೇಂಜ್ ಚಿತ್ರ್, 300 ಮಿಲಿಯಾ ಅಮೆರಿಕನ್
ಡೊಲ್ಲರಾಂಕ್ ವಿಕುನ್ ಗೆಲಾಂ.
3. ತಿಸ್ರ್ಯಾ
ಸ್ಥಾನಾರ್ ಯೆತಾ, 1839 ಇಸ್ವೆಂತ್ ಫ್ರಾನ್ಸಾಂತ್
ಜಲ್ಮಲ್ಲೊ. ಪಾವ್ಲ್ ಶೆಜಾನ್ನ್ (Paul Cézanne).
ತಾಚ್ಯಾ ಉಪ್ರಾಂತ್ಲ್ಯಾ ಪಿಕಾಸೊ, ಮಟೀಸ್ ಆನಿ ಹೆರ್
ಕಲಾಕಾರಾಂನಿ ತಾಕಾ ಚಿತ್ರ್ಕಲೆಂತ್ಲ್ಯಾ ಆಧುನಿಕ್ಪಣಾಚೊ
ಬಾಪಯ್ ಮ್ಹಣ್ ನಾಂವ್ ದಿಲಾಂ ಮ್ಹಣ್ತಾನಾ, ತಾಕಾ ಕಿತ್ಲೊ
ಮಾನ್ ಆಸಾ ತೆಂ ಸಮ್ಜಾತಾ. ತಾಚೆಂ ದ ಕಾರ್ಡ್ ಪ್ಲೇಯರ್ಸ್
(The Card Players) ನಾಂವಾಚ್ಯೆಂ ಪಿಂತುರ್,
2011 ಇಸ್ವೆಂತ್, ಖಟಾರಾಚ್ಯಾ ರಾಯಾಳ್ ಕುಟ್ಮಾನ್, 250
ಮಿಲಿಯಾ ಅಮೆರಿಕನ್ ಡೊಲ್ಲರಾಂಕ್ ಘೆತ್ಲೆಂ.
4.
ಚೊವ್ತ್ಯಾ ಸ್ಥಾನಾರ್ ಆಸಾ, 1912 ಇಸ್ವೆಂತ್ ಜಲ್ಮಲ್ಲೊ,
ಅಮೆರಿಕಾಚೊ, ಜಾಕ್ಸನ್ ಪೊಲ್ಲೊಕ್ (Jackson Pollock).
ಹೆರಾಂಬರಿ ತೊ ಬ್ರಶ್ಯಾನ್ ಚಿತ್ರಾಂ ಪಿಂತ್ರಾಯ್ನಾ ಬಗಾರ್,
ಕೆನ್ವಾಸಾಚ್ಯೆರ್ ಪೇಂಯ್ಟ್ ವೊತುನ್ ತಾಚಿಂ ಚಿತ್ರಾಂ ಆಸಾ
ಕರ್ತಾ ಜಾಲ್ಲ್ಯಾನ್, ತಾಚ್ಯಾ ಚಿತ್ರಾಂನಿ, ತಾಚಿಚ್ ಏಕ್
ವೈಶಿಷ್ಟತಾ ಆಸಾ. ತಾಣೆ ಪಿಂತ್ರಾಯಿಲ್ಲೆಂ, ನಂಬರ್ 17 ಎ (Number
17A ) ನಾಂವಾಚ್ಯೆಂ ಪಿಂತುರ್, 2016 ಇಸ್ವೆಂತ್ ಎಕಾ
ಕೊರೊಡ್ಪತಿನ್, 200 ಮಿಲಿಯಾ ಅಮೆರಿಕನ್ ಡೊಲ್ಲರಾಂಕ್
ಮೊಲಾಕ್ ಘೆತ್ಲಾಂ.
ನಂಬರ್ 17 ಎ (Number
17A )
5.
1903 ಇಸ್ವೆಂತ್ ರಶ್ಯಾಂತ್ ಜಲ್ಮೊನ್ ಉಪ್ರಾಂತ್
ಅಮೆರಿಕಾಂತ್ ವಸ್ತಿ ಕೆಲ್ಲೊ, ಮಾರ್ಕ್ ರೊತ್ಕೊ (Mark
Rothko), ಪಾಂಚ್ವ್ಯಾ ಸ್ಥಾನಾರ್ ಯೆತಾ. ತಾಚೆಂ
ನಂಬರ್ 6 ಬ್ಲೂ, ವಾಯೊಲೆಟ್ ಎಂಡ್ ರೆಡ್ (No. 6 -
Violet, Green and Red) ನಾಂವಾಚ್ಯೆಂ ಪಿಂತುರ್,
2014 ಇಸ್ವೆಂತ್, 186 ಮಿಲಿಯಾ ಅಅಮೆರಿಕನ್ ಡೊಲ್ಲರಾಂಕ್
ವಿಕುನ್ ಗೆಲಾಂ.
6. ಸ್ಪೇಯ್ನಾಂತ್ 1881
ಇಸ್ವೆಂತ್ ಜಲ್ಮಲ್ಲೊ ಪಾಬ್ಲೊ ಪಿಕಾಸೊ ಸವ್ಯಾ ಸ್ಥಾನಾರ್
ಯೆತಾ. ತಾಚೆಂ, ಲೆ ಫಮ್ ದಲ್ಜಿ (Les Femmes
d'Alger - Version O ) ನಾಂವಾಚ್ಯೆಂ ಪಿಂತುರ್,
2015 ಇಸ್ವೆಂತ್, 179.4 ಮಿಲಿಯಾ ಅಮೆರಿಕನ್ ಡೊಲ್ಲರಾಂಕ್
ವಿಕುನ್ ಗೆಲಾಂ.
7. ಸಾತ್ವ್ಯಾ ಸ್ಥಾನಾರ್ ಯೆತಾ,
1884 ಇಸ್ವೆಂತ್ ಇಟೆಲಿಂತ್ ಜಲ್ಮೊನ್, ಉಪ್ರಾಂತ್
ಫ್ರಾನ್ಸಾಂತ್ ವಸ್ತಿ ಕೆಲ್ಲೊ, ಅಮೆದೀಯೊ ಮೊಡಿಲಿಯಾನಿ (Amedeo
Modigliani). ತೊ ವಿಣ್ಗಿಂ ಚಿತ್ರಾಂ
ಸೊಡಂವ್ಚ್ಯಾಂತ್ ನಾಂವಾಡ್ಲ್ಲೊ ತರಿಪುಣ್, ಲೊಕಾನ್
ತಾಚೆರ್ ಕಾಂಠಾಳೊ ದಾಕಯ್ಲೊ ಜಾಲ್ಲ್ಯಾನ್, ತೊ ಜಿವಂತ್
ಆಸ್ತಾನಾ ತಾಕಾ ಮಾನ್ ಮೆಳ್ಳೊನಾ ತರೀ, ಕ್ರಮೇಣ್ ತಾಚ್ಯಾ
ಕಲೆಚಿ ಒಳೊಕ್ ಸಂಸಾರಾರ್ ಹೆರಾಂಕ್ ಕಳೊನ್ ಯೆಂವ್ಚ್ಯಾ
ಸಂಗಿಂ, ತಾಚ್ಯಾ ಪಿಂತುರಾಂಕ್ ಖಾಯ್ಸ್ ಚಡ್ಲೊ. ತಾಚೆಂ ನು
ಕೂಶ್ (Nu couché) ನಾಂವಾಚ್ಯೆಂ ಪಿಂತುರ್,
2015 ಇಸ್ವೆಂತ್, 170.4 ಮಿಲಿಯಾ ಅಮೆರಿಕನ್ ಡೊಲ್ಲರಾಂಕ್
ವಿಕುನ್ ಗೆಲೆಂ.
ವಯ್ಲ್ಯೊ ಸಂಗ್ತಿ ಪಳೆತಾನಾ, ಏಕ್
ಚಿಂತಪ್ ಮತಿಂತ್ ಯೆಂವ್ಚ್ಯಾಂತ್ ನವಾಲ್ ನಾ. ಚಡಾವತ್
ಹರಯೆಕಾ ಕಲಾಕಾರಾಕ್, ತೆ ಮೆಲ್ಯಾ ಉಪ್ರಾಂತ್ ಮಾತ್ರ್ ಮಾನ್
ಮೆಳ್ಳಾ ಆನಿ ತ್ಯಾ-ತ್ಯಾ ಕಲಾಕಾರಾಚಿ ಜಿಣಿ ಸುಗಮ್ ಕರುಂಕ್
ಗರ್ಜ್ ಆಸ್ಲ್ಲೆ ಪಯ್ಶೆ, ಕೊಣಾ-ಕೊಣಾಚ್ಯಾ ಹಾತಾಂತ್
ಪಡ್ಲ್ಯಾತ್ ಮ್ಹಳ್ಳೆಂ ಸತ್, ನಾ-ಪಾತ್ಯೆಣೆನ್ ತಕ್ಲಿ
ಹಾಲಂವ್ಕ್ ಕರ್ತಾ.
ಚಿತ್ರ್ಕಲೆಚ್ಯೆಂ ಭವಿಶ್ಯ್ ಕಿತೆಂ
ಚಿತ್ರ್ಕಲಾ ಏಕ್ ವೆಳಾಕಾಳಾಚಿ ಪರ್ವಾ ನಾಸ್ತಾಂ,
ಜನಾಂಗಾಂ ಥಾವ್ನ್ ಜನಾಂಗಾಂಕ್, ಸಂಸ್ಕೃತ್ಯಾಂ ಥಾವ್ನ್
ಸಂಸ್ಕೃತ್ಯಾಂಕ್ ವ್ಹಾಳೊನ್ ಆಯಿಲ್ಲಿ, ಸಕ್ಡಾಂಕ್ ಅರ್ಥ್
ಜಾಂವ್ಚಿ ಏಕ್ ಸಾರ್ವಜನಿಕ್ ಭಾಸ್ ಮ್ಹಳ್ಯಾರ್ ಚೂಕ್
ಜಾಂವ್ಚಿನಾ. ಪುರಾತನ್ ಮಾಟ್ಯಾ-ಚಿತ್ರಾಂ ಥಾವ್ನ್,
ಆಯ್ಚ್ಯಾ ಆಧುನಿಕ್ ಡಿಜಿಟಲ್ ಯುಗಾ ಪರಯಾಂತ್, ಹರಯೇಕ್
ಚಿತ್ರ್ಕಲಾಕಾರ್ ಏಕ್ ಕಾಣಿ ಸಾಂಗೊಂಕ್ ಆಶೆತಾ ಮ್ಹಳ್ಳೆಂ
ಸತ್ ಕೊಣೇಂಯ್ ನೆಗಾರ್ ಕರ್ಚೆಬರಿ ನಾ. ಚರಿತ್ರೆಂತ್,
ಚಿತ್ರ್ಕಲಾಕಾರ್ ದುಬ್ಳೆಪಣ್, ಎಕ್ಸುರ್ಪಣ್, ಮಾನಸಿಕ್
ದಬಾವ್ ಆನಿ ಸಾಮಾಜಿಕ್ ಒತ್ತಡಾಕ್ ಲಾಗೊನ್ ಅಡ್ಚಲ್ಯಾತ್
ತರೀ, ತಾಣಿ ಕೆಲ್ಲಿಂ ಚಿತ್ರಾಂ ಸಂಸಾರಾರ್ ಮೆಚ್ವಣೆಚಿಂ
ಜಾವ್ನ್ ಅಮರ್ ಜಾಲ್ಯಾಂತ್.
ಆದಿಂ ಥಾವ್ನ್, ಎಕಾ
ಪಾಟ್ ಏಕಾ ಕಲಾಕಾರಾನ್ ನವ್ಯೊ-ನವ್ಯೊ ರಿತಿ ವಾಪರ್ನ್
ಕೆಲ್ಲಿಂ ಚಿತ್ರಾಂ ಪ್ರಖ್ಯಾತ್ ಜಾಲ್ಲೆಬರಿ, ಆಜ್-ಕಾಲ್
ಚಿತ್ರ್ಕಲೆಕ್ ನವಿ ವಾಟ್ ದಾಕಂವ್ಚಿ ಡಿಜಿಟಲ್ ಮಾದ್ಯಮಾಂ
ಉದೆಲ್ಯಾಂತ್. ಎದೊಳ್ ಆಪ್ಲ್ಯೊ ಕೃತಿಯೊ ಹೆರಾಂಕ್
ದಾಕಂವ್ಕ್ ಒದ್ದಾಡ್ಚೆಕಡೆ, ಆತಾಂ ಅಂತರ್ಜಾಳಿಚ್ಯೆರ್
ಪ್ರಚಾರ್ ಕರುಂಕ್ ಸುಲಭ್ ಜಾಲಾಂ. ಎದೊಳ್ ಬೊಟಾಂನಿ ಲೆಖ್ಣಿ
ಧರುನ್ ಬರವ್ನ್ ಆಸ್ಲ್ಲಿ ಮನ್ಶ್ಯಾಚಿ ಸವಯ್,
ಕಂಪ್ಯೂಟರಾಚ್ಯೆರ್ ಟೈಪ್ ಕರ್ಚ್ಯಾಂತ್ ಬದಲ್ಲ್ಯಾ ತರೀ,
ಬರಾಪ್ ಮ್ಹಳ್ಳೆಂ ತೆಂ ಜಿವಂತ್ ಉರ್ಲಾಂ ತಶೆಂಚ್,
ಚಿತ್ರ್ಕಲಾ ಕರ್ಚಿ ರೀತ್ ಬದ್ಲೊಂಕ್ ಪುರೊ ಪುಣ್
ಚಿತ್ರ್ಕಲಾ ಖಂಡಿತ್ ಮೊರ್ಚಿನಾ ಮ್ಹಳ್ಳಿ ಮ್ಹಜಿ
ಪಾತ್ಯೆಣಿ.
|
|
चिंत्नांक रूप दिल्ली चित्रकला |
कविता
म्हळ्यार थोड्याच उत्रांनी अभिव्यक्त कर्ची एक
कला तर, एक चित्र/पिंतूर जावनासा ’उत्रांविणें
आसची कविता’. पूण चित्रकलेची समजणी/जाण्वाय
सोड्यां, ओळोक आसची सयत थोड्यांक. हांगासर
नाम्नेचो संशोधक कादंबरिकार ’सुनंद’ हाणें
सविसतार रितीन ह्या चित्रकलेचेर बरयिल्लें
अपुर्भायेचें लेखन तुमकां आवडतेलें म्हळ्ळो
म्हजो भर्वसो.
|
|
सुनंद
(जोसेफ
डिमेल्लो) |
सुनंद
’सुनंद’ लिखणे नांवान बरंवचो कुलशेकर्चो जोसेफ
डिमेल्लो, प्रसतूत आसट्रेलियांत आपल्या कुटमा
संगीं जियेता.
कोंकणेंत बरंवची उर्भा ल्हानपणी उदेल्ली ती,
मंगळुर्च्या पाद्वा हैसकूलांत शिक्ताना,
मानेसत लियो सोज, कदळे, हाच्या मार्गदर्शनान
फळाधीक जावन आयली. त्या उपरांत, ʼसाळकʼ
प्रकाशनाचो देवाधीन सिरिवंत, माजी ’काणीक’
संपादक; आवील रासकीना, ’उमाळो’ पत्राचो,
देवाधीन विलफी रेबिंबस आनी ’राकणो’ माजी
संपादक, देवाधीन फा| वी. वी. मिनेजाच्या
उत्तेजनान, ताच्यो जायित्त्यो कृतिय्यो
उज्वाडाक आयल्यो.
ताचीं एदोळ फायस जाल्लीं
पुसतकां हीं:
वांकड्यो वाटो
शिर्शिरो
राय उंदीर
भुंयकांप
लूट (कोंकणी आनी
इंगलीष भाशेंत) |
|
|
|
चिंत्नांक रूप दिल्ली चित्रकला |
मनश्याकुळाच्या आरंभा थावन, आपणाचीं
चिंत्नां, भोगणां आनी भावनां व्यक्त करुंक,
मनश्यान एक ना तर एक वाट सोधल्या. थोड्यांनी
मातियेंत बोटांनी सोडवन, थोड्यांनी
खडपा-फात्रांच्येर कांतवन, हेर थोड्यांनी
रुकाडांत पोकोर्न, आपणा थंय भायर येवंक
ओद्दाडच्या कलेक एक अवकास दिला. कला विवीध
थरांची आसा तरी, चित्रकला सक्कड कलेंच्यांकी
पयलेंच्या स्थानार आसा म्हण्येत. चित्रकले
द्वारीं मनश्यान, संसकृत्यां मधें बांद आसा
केल्यात, संसकृत्यांच्ये संपरदाय हेरांक दाकवन
दिल्यात मात्र न्हय, फलाण्या काळार परिगत कशी
आसल्ली म्हळ्ळें, चित्रां द्वारीं दाकयलां.
हजार उत्रांनी विवरुंच्याकी, एक चित्र सोडवन
दाकंवच्यें चडीत समजणी दीवंक सक्ता म्हण
जाणत्यांनी म्हणच्यांत राजांव आसा.
चित्रकलेची सुर्वात:
बर्पाची सुर्वात
जांवच्याकी पयलें, मनश्यान उजो सोधून
काडच्याकी पयलें, शहरां रूपीत जांवच्याकी
पयलें, राषट्रांच्यो गडी असतित्वांत
येंवच्याकी पयलें, चित्रकला आसल्ली. मनश्यान
उलवंक आनी बरवंक शिकच्याकी पयलें, ताचीं
भोगणां व्यक्त करुंक चित्रकलेचो उप्योग
केल्लो म्हणच्याक रुज्वाती आसात. हजारों
वर्सां आदीं, फात्रांच्येर कांतयिल्लीं वा रंग
वापरून माट्यांच्या वणदिंचेर सोडयिल्लीं
चित्रां, त्या काळाच्या मनश्याक कितें पळेवंक
मेळतालें आनी तो कितें चिंत्तालो म्हळ्ळ्या
विशीं माहेत दितात.
फ्रान्साच्या,
लासको आनी शोवे (Lascaux and Chauvet)
म्हळ्ळ्या सुवातेंनी पळेवंक मेळल्लीं, ३०,०००
वर्सां आदलीं चित्रां, पुरातन काळाच्या
चित्रकलेच्यें एक प्रतिरूप जावनासात.
लासकोंतलें एक चित्र
शोवेंतलें एक चित्र
हीं चित्रां,
इंगळो, रंगाळ शेडमाती आनी कठीण काळबाणेच्यें
म्यांगनीस डै आक्सैड (charcoal, ochre,
and manganese dioxide) हातांनी मुर्डून,
बोटांनी वा मनजातिंच्ये केस बांदून केल्ल्या
बुरुसान (brush ) वणदीर सारवन केल्ले
तसलीं जावनासात.
तेणे आसट्रेलियांत,
६०,००० वर्सां आदलीं चित्रां पळेवंक
मेळ्ळ्यांत म्हळ्यार अजाप जांवच्यें
स्वाभावीक. आसट्रेलियाच्ये मूळनिवासी
जावनासच्यें एबोरिजिनी जनांग (Aboriginal
people), तितल्या हजार वर्सां पयलें
आफ्रिका थावन हांगासर पावल्लें कंय. त्या
तेंपार तांकां पळेवंक मेळल्ल्या मनजातिंचीं
चित्रां ताणीं माट्यांच्या वणदिनी सोडयिल्लीं,
आजुनी पळेवंक मेळतात.
एबोरिजिनांच्यें
चित्र
चित्रकलेंत प्रगती:
मध्ययुगांतल्या ग्रीक संसकृतेंत, चड
स्वाभावीक दिसच्यो इमाजी करुंक महत्व दिताना,
रोमी संसकृतेंत, रंगांक महत्व दीवन वणदिंच्येर
चित्रां सोडंवची सवय मुंदरून गेली. क्रमेण
रोमनांचो पाडाव जावन कथोलीक धर्म बळाधीक
जांवच्या संगीं, चित्रकला, धार्मीक चित्रां
सोडंवच्या कुशीन मालवली. त्या चिंत्पाक लागोन,
इगर्जांच्या जनेलांच्या आर्श्यांचेर धार्मीक
चिंत्पाक लग्ती जाल्लीं जेजुक्रीसताचीं,
भागेवंत कुटमाचीं आनी सांत-सांतिण्यांचीं
चित्रां दिसोंक लागलीं. इसलामीक धर्माच्यांनी,
तांच्यो मसजिद्यो देवांच्या चित्रां बदलाक,
रंगोली तसलीं विवीध आकरषक विन्यासां सोडवन
सोभयल्यो. भारतांत, इमाजी आनी रंगांक महत्व
दीवन तेंपलां उबारलीं. चीनांत, कलिग्राफी (calligraphy)
नांवाच्या चित्रकलेची सुर्वात जाली. तेणे
जपानांत, यमाटो-ई (Yamato-e painting)
नांवाच्या चित्रकलेची सुर्वात जाली.
पंद्राव्या शेकड्यायितल्याक, युरोपांत,
मनश्याच्यें चिंतप एकाच्चाणे बदललें. हाका
काराण जाल्ल्यां पयकी, लियोनार्डो द विनची (Leonardo
da Vinci) प्रमूख म्हण्येत.
१४५२
इस्वेंतल्या एपरील १५ तार्केर, इटेलिच्या
फ्लोरेन्सांत जल्मल्लो लियोनार्डो, फकत एक
चित्रकार न्हय आसतां, एक संसोधक, विज्ञानी,
इजनेर, शिल्पी, शरीरशासत्रज्ञ आनी एक शाणो
तत्वशासत्री म्हण सगळो संसार मांदता. ताणे
पिंत्रायिल्ल्या सबार पिंतुरां पयकी, मोना
लिसा (Mona Lisa) आनी निमाणे जेवण (The
Last Supper) पिंतुरां, आज-काल
कोरोडांनी पयशे येटून लोक घेवंक तयार आसा
म्हळ्यार, लियोनार्डो कितलो प्रभावीत म्हळ्ळो
अंदाज करयेत.
लियोनार्डोच्या
नोट-बुकांनी, मनश्या कुडिच्या विवीध भागांचीं
चित्रां, विमान कितें म्हण कळीत नातल्ल्या
त्या काळार, ताणे सोडयिल्लीं उबचीं मेशिनां
मात्र न्हय आसतां, विवीध थरांचीं झजाचीं
हातेरां आनी वैज्ञानीक प्रयोगां विशीं
बरयिल्लीं लेखनां आनी नक्षा आसल्ल्यो. त्या
काळारच ताणे, हेलिकोपटरां आनी सबमेरिनांचो
उल्लेख केल्लो म्हणताना, ताची बुद्वंत्काय
कितली म्हळ्ळें, साध्या मतीक चिंतुंक असाध्य
म्हण्येत.
लियोनार्डो द विनची
आनी मोना लिसा
लियोनार्डो
जल्मल्ल्या त्याच पंद्राव्या शेकड्यांत,
आन्येकलो प्रख्यात चित्रकार जल्मलो. तो
जावनासल्लो, मैकल्यांजेलो (Michelangelo).
ताणे चित्रकलेंत आनी इमाजी कर्च्या कलेंत एक
वादाळच उटयलें म्हण्येत. सत्राव्या
शेकड्यांत, चित्रकलेंत बारूक क्रांती उदेली.
ह्या काळाक बारूक आवदी (Baroque period)
म्हणतात. बारूक म्हळ्ळो सब्द, पोर्चुगीस
भाशेच्या बोरोक्को सब्दा थावन उदेल्लो
जावनासा. चडावत जावन मोतियांचो आकार उरूट आसता
तरी, थोडे पावटीं, वांकडीं-तिंकडीं मोतियांयी
मेळतात. तसल्या मोतियांक, बोरोक्को म्हणतात.
सत्राव्या शेकड्यांत, कलाक्षेत्रांत जाल्ल्यो
बदलावण्यो, संपरादायांचीं पाळां रोंबल्ल्या
समाजेंत ठीकेक वळग जाल्यो अनी बदलल्ल्या कलेंक
हल्कून, बारूक म्हण नांव दिलें.
तेदोळ
परयांत, एकाच थराचीं चित्रां पिंत्रावन
आसल्ल्यांक नवें चिंतप दीवंक, कारावाज्ज्यो (Caravaggio)
नांवाचो नवो कलाकार काराण जालो. ताच्या
चित्रांनी, प्रकृतेंतलो स्वाभावीक उज्वाड कसो
पिंत्रांवचो म्हळ्ळें ताणे दाकयलें.
त्याच शेकड्यांनी, नेदरलेंडाचो डच्च पेंयटर,
रेंबरांट (Rembrandt) हाणे,
बैबलाचीं सन्निवेशां मार्मीक रितीर पिंत्रावन
दाकयलीं.
एकुणिसाव्या शेकड्यायितल्याक,
चित्रकलेंत विशेस बदलावण्यो झळकोंकलागल्यो.
विन्सेंट व्यान गो (Vincent van Gogh ) हाणे,
उज्वाड, हवो आनी चलावण दाकवंक, ब्रश्यांनी रंग
वापर्च्या रितिंत नवेसांव दाकवन, पळेतेल्यांक
चकीत केलें.
विन्सेंट व्यान गो आनी
ताच्यें चित्र (Starry night over Rhone)
तांच्या पाटल्यान आयले, पाबलो पिकासो (Pablo
Picasso) आनी जोर्ज ब्राख (Georges
Braque). हाणी चित्रकलेंत आधुनीकता सुरू
केली. एदोळ मसक जावनासल्ले गीट, सूक्ष्म जाले
आनी हरयेक गीट, भावनां व्यक्त कर्च्या साधनांत
महत्वाचो जालो.
चरित्रेंत विवाधाक ओळग
जाल्ले चित्रकार:
१. मैकल्यांजेलो (Michelangelo)
१४७५ इस्वेंत, मार्चाच्या ६ तार्केर,
इटेलिच्या फ्लोरेन्सांत, एका दुबळ्या कुटमांत
जल्मल्ल्या मैकल्यांजेलोची जिणिये कथा
आतुरायेची म्हण्येत. १३ वर्सां प्रायेर,
व्हडिलांच्या खुशेक विरोध वचून, दोमिनिको (Domenico
Ghirlandaio) नांवाच्या पेंयटराचो शीस
जावन पेंयटिंगांत तर्भेती जोडलेल्या ताच्या
उत्तीम चित्रांक लागून, फ्लोरेन्सांत अधिकार
चलवन आसल्ल्या, लोरेनजो डिमेडिची (Lorenzo
de' Medici) म्हळ्ळ्यान, मैकल्यांजेलोक
आपल्या ताबेंत घेतलो.
चित्रकलेचो
आराधक लोरेनजोच्या हाताखाल, बरीच समजणी
जोडल्ल्या मैकल्यांजेलोन, १४९९ इस्वेंत मारबल
वापर्न रचल्ली, पियेटा (Pietà)
नांवाची, मरियेन जेजुची निर्जीव कूड आपल्या
उसक्यार घेतल्ली इमाज, अजून वातिकानाच्या
सांत पेद्रुच्या बासिलिकांत आसा आनी
पळेयतेल्यांचीं मनां पिस्वायता. त्या उपरांत,
आन्येक विशेस इमाज १५०१-१५०४ इस्व्यां मधें
केल्ली, दावीद (David) नांवाची,
फ्लोरेन्साच्या स्वतंत्राक पाचार्ची
जावनासल्ली.
पियेटा (Pietà)
१५०८ इस्वेंत, दुस्रो पापा जूलियसान (Pope
Julius II), मैकल्यांजेलोक
वातिकानांतल्या सिसटीन चापेलाच्यें (Sistine
Chapel) सीलिंग सजवंक नमियारलो. १५०८
थावन १५१२ इस्वे मधें पिंत्रायिल्लें हें
सीलिंग, अजून मनश्यान सोडयिल्ल्या चित्रां
पयकी अत्युत्तम म्हळ्ळी अभिपराय आसा.
मैकल्यांजेलोची निमाणी झडती (The Last
Judgment)
सिसटीन चापेलांतल्या
चित्रां संगीं, मैकल्यांजेलोची ठीका सुरू जाली
म्हण्येत. ताणे पिंत्रायिल्ल्या चित्रांनी
विणगेपण दाकयिल्लें, इगर्जेच्या म्हणियारयांक
मात्र न्हय, साध्या भक्तांकी आंवडलेंना. १५६४
इस्वेंत, मैकल्यांजेलोच्या मरणा उपरांत, हेर
चित्रकारांक वापर्न, चित्रांनी उग्ते आसल्ले
लैंगीक विश्वे धांपची विलेवारी केल्ली तें
वाचुंक मेळता.
२. कारावाज्ज्यो (Michelangelo
Merisi da Caravaggio):
१५७१
इस्वेंत इटेलिच्या मिलान शहरांत जल्मल्लो
कारावाज्ज्यो, फोटो काडताना उज्वाड कसो
दिसतागी त्या रितीर उज्वाड आनी काळोक मेळवन
पिंतुरां रच्च्यांत नांवाडलोलो जावनासा.
आपणाची जिणी हेरांलागीं झगडच्यांत
खर्चिल्ल्या ताणे, १६०६ इस्वेंत एकल्याचो जीव
काडल्ल्या आपराधाक लागोन, रोमा थावन पोळापळ
घेजे पडली. त्या उपरांतली जिणी ताणे गुप्तीं
खर्चिजे पडली तरी, ताची चित्रां सोडंवची सवय
मुंदरोन गेली. तो ३८ वर्सां प्रायेर अंतरलो.
कारावाज्ज्योच्यें चित्र
३. एडवा
मने (Édouard Manet)
१८३२
इस्वेंत फ्रान्साच्या प्यारिसांत जल्मल्लो
एडवा मने, चित्रकलेंत आधुनीकतेची सुर्वात
केल्ल्या चित्रकारां पयकी एकलो म्हण्येत.
आज-काल, आधुनीक चित्रकलेचो बापय म्हण ताका
पुकार्तात तरी, ताच्या जिणिये आवदेंत ताणे
वासतविकतेच्या निबान पिंत्रायिल्लें विणगेपण,
सबारांच्या रागाक बली जाल्लें आसा. चड
विवादात्मक जाल्ले पिंतूर, १९६३ इस्वेंत
सोडयिल्लें ओलिंपिया (Olympia-१८६३
).
४. पाबलो पिकासो (Pablo Picaso)
१८८१ इस्वेंत स्पेयनांत जल्मल्ल्या
पिकासोक ओळकानातल्ले भोवच उणे म्हण्येत.
ताणे विसाव्या शेकड्यांत चित्रकलेंत आसा
केल्लीं, एदोळच्या चित्रकलेक सवाल उडंवचीं
चित्रां, भारीच प्रख्यात जाल्यांत म्हणच्याक
दोन उत्रां नांत.
पाबलो पिकासोच्यें
गुयेर्निका (Guernica )
ताच्या जिणिये
आवदेंत ताणे, वीस हजारां वयर चित्रां
पिंत्रायल्यांत म्हळ्यार अजाप भोगात तरी, ताणे
स्त्रीयांच्येर तिरसकार दाकयिल्ल्या विशीं
दुर्सोणे आयकोंक मेळता. ताच्यो कृतियो उंचल्या
मट्टाच्यो तरी, ताच्या खासगी जीवनांत
स्त्रीयांक दणसिलां म्हळ्ळ्या कारणान, ताका
फावोतें होगळाप मेळाना जालां.
५. ऐ वेयवेय
(Ai Weiwei )
१९५७ इस्वेंत चीनाच्या
बेयजिंगांत जल्मल्ल्या वेयवेयचीं चित्रां,
राजकीय दभावा विरोध आवाज उटंवचीं जावनासात
जाल्ल्यान, ताका विवादात्मक चित्रकार
म्हळ्ळें नांव पडलां.
चीनी सर्कारान
चलंवचीं अतर्वणां, भें-भिरांत नासतां आपल्या
चित्रांनी दाकवंक तो पाटीं-फुडें पळेयना. २०११
इस्वेंत ताका बंदीत केल्लो आनी ताच्या
चित्रकलेच्या स्टुडियोची देस्वाट केल्ली तरी,
तो अजून सर्कारा विरोध आपलें मिसांव मुंदरून
आसा.
६. एम. एफ. हुसेयन (M. F.
Husain)
१९१५ इस्वेंत
महाराषट्राच्या पंडारपुरांत जल्मल्लो, मक्मूल
फिदा हुसेयन, भारताचो पिकासो म्हळ्ळ्या नांवान
फामाद जाला. ताच्या चित्रांनी, आधुनीकता,
भारतीय ग्राम्य जीवन आनी हिंदू पवित्र
गृंथांतल्या संग्तीं विशीं पिंत्रावणी पळेवंक
मेळता.
१९९० धाकड्यायितल्याक, ताणे
हिंदू देवतेंक विणगीं पिंत्रांवच्ये धयर
घेतल्ल्याच्यें काराण जावन, हिंद्वांक
ताच्येर क्रोध उबजालो म्हण्येत. त्या क्रोधाक
लागोन, ताच्येर आनी ताच्या स्टुडियोच्येर
हल्लो चलोन, जिवाच्या भियान ताणे गांव सोडचो
पडलो. २०१० इस्वेंत, खटार देशान ताका नागरीकता
दिली आनी २०११ इस्वेंत तो अंतरलो.
७.
ब्यांक्सी (Banksy)
आपणाक
ब्यांक्सी म्हण आपंवचो हो चित्रकलाकार,
इंगलेंडांतलो म्हण सर्व चिंत्तात तरी, तो
निजायकी कोण म्हळ्ळें कोणायकी कळीत ना.
१९९०-च्या धाकड्यांत, बृहत गात्राचीं
ताचीं चित्रां, रसत्यां बगलेच्या वणदिंच्येर
दिसोंक सुरू जालीं. ताच्यें, गरल वीद बेलून (Girl
with Balloon) चित्र, संसारार प्रख्यात
जालां.
गरल वीद बेलून (Girl with
Balloon)
तवळ-तवळ ह्या
चित्रकाराचीं, झुजा विरोधी, बंडवाळशाही
कालेतिच्यीं खेळकुळां कर्चीं, राजकीय
परिगतेचें विडंबन कर्चे तसलीं, कोणायच्या
भोगणांक खोट मार्न उसकावंक सकचीं चित्रां,
इंगलेंडांत मात्र न्हय, संसाराच्या हेर
शहरांच्या वणदिंच्येरी पळेवंक मेळ्ळ्यांत.
८. ट्रेसी अमीन (Tracey Emin)
१९६३ इस्वेंत लंडनांत जल्मल्लें ट्रेसी,
आपल्या लैंगिकता, व्यक्तित्वता, अघात आनी
जिणियेचो अनबोग आपल्या चित्रांनी पिंत्रायता.
स्त्रीयेच्या लैंगिकते विशीं आसची
ना-समजणी, स्त्रीयांची मानसीक भलायकी आनी
स्त्रीयांक समाजेंत कीळ मट्टान पळेंवच्या
विशीं आपल्या पिंतुरांनी दाकंवच्या
ट्रेसिच्यें, मै बेड (My Bed)
नांवाच्यें चित्र पुरसकारांक पात्र जालें तरी,
आपल्या बेडरूमांत आपलें असतवेसत जाल्लें
खटलें, खतां जाल्ल्यो वोली आनी आपणाच्यो खासगी
वसतू दाकंवच्यें हें चित्र, दाकवणेक योग्य
न्हय म्हळ्ळो वाद सबारांनी मांडलो तरी,
तांच्यें गुमान करिनासतां, ट्रेसी आपलें काम
मुंदरून आसा.
चित्रकला आनी आर्थीक मोल:
चित्रकलाकारां पयकी कोणाक चड मान आसा
म्हळ्ळी संगत, तांचीं चित्रां कितल्या मोलाक
गेल्यांत म्हळ्ळ्याच्येर तुकची तर, ती पट्टी
अशी आसा:
१. लियोनार्डो द विनची पयल्या
स्थानार येता. ताच्यें, मोना लिसा पिंतूर
प्रख्यात व्हय तरी, ताणे पिंत्रायिल्लें,
सालवातोर मंडी (Salvator Mundi)
नांवाच्यें पिंतूर, संसारांत अती चड मोलाच्यें
पिंतूर जावनासा. २०१७ इस्वेंत हें पिंतूर,
४५०.३ मिलिया अमेरिकन डोल्लरांक विकून गेलें.
२. दूसऱ्या स्थानार येता - विल्लेम द
कूनिंग (Willem de Kooning) हाच्यें,
इंटरचेंज (Interchange). १९०४
इस्वेंत, नेदरलेंडाच्या रोट्टरड्यामांत
जल्मल्लो विल्लेम, अमूर्त अभिवेक्तिवादी (Abstract
Expressionism) शैलेच्या चित्रांक
प्रख्यात. क्रमेण अमेरिकांत वसती केल्ल्या
ताच्या चित्रां द्वारीं, अमेरिकाक जागतीक
चित्रकलेंत आपलेंच एक स्थान फावो जालें.
ताचें इंटरचेंज चित्र, ३०० मिलिया अमेरिकन
डोल्लरांक विकून गेलां.
३. तीसऱ्या
स्थानार येता, १८३९ इस्वेंत फ्रान्सांत
जल्मल्लो. पावल शेजान्न (Paul Cézanne).
ताच्या उपरांतल्या पिकासो, मटीस आनी हेर
कलाकारांनी ताका चित्रकलेंतल्या आधुनीकपणाचो
बापय म्हण नांव दिलां म्हणताना, ताका कितलो
मान आसा तें समजाता. ताचें द कार्ड प्लेयर्स
(The Card Players) नांवाच्यें
पिंतूर, २०११ इस्वेंत, खटाराच्या रायाळ
कुटमान, २५० मिलिया अमेरिकन डोल्लरांक घेतलें.
४. चोवत्या स्थानार आसा, १९१२ इस्वेंत
जल्मल्लो, अमेरिकाचो, जाक्सन पोल्लोक (Jackson
Pollock). हेरांबरी तो ब्रश्यान चित्रां
पिंत्रायना बगार, केन्वासाच्येर पेंयट वोतून
ताचीं चित्रां आसा कर्ता जाल्ल्यान, ताच्या
चित्रांनी, ताचीच एक वैशिषटता आसा. ताणे
पिंत्रायिल्लें, नंबर १७ ए (Number १७A)
नांवाच्यें पिंतूर, २०१६ इस्वेंत एका
कोरोडपतीन, २०० मिलिया अमेरिकन डोल्लरांक
मोलाक घेतलां.
नंबर १७ ए (Number
१७A)
५. १९०३ इस्वेंत रश्यांत
जल्मोन उपरांत अमेरिकांत वसती केल्लो, मार्क
रोत्को (Mark Rothko), पांचव्या
स्थानार येता. ताचें नंबर ६ ब्लू, वायोलेट एंड
रेड (No. ६ - Violet, Green and Red)
नांवाच्यें पिंतूर, २०१४ इस्वेंत, १८६ मिलिया
अअमेरिकन डोल्लरांक विकून गेलां.
६.
स्पेयनांत १८८१ इस्वेंत जल्मल्लो पाबलो पिकासो
सव्या स्थानार येता. ताचें, ले फम दलजी (Les
Femmes d'Alger - Version O) नांवाच्यें
पिंतूर, २०१५ इस्वेंत, १७९.४ मिलिया अमेरिकन
डोल्लरांक विकून गेलां.
७. सात्व्या
स्थानार येता, १८८४ इस्वेंत इटेलिंत जल्मोन,
उपरांत फ्रान्सांत वसती केल्लो, अमेदीयो
मोडिलियानी (Amedeo Modigliani). तो
विणगीं चित्रां सोडंवच्यांत नांवाडल्लो
तरिपूण, लोकान ताचेर कांठाळो दाकयलो
जाल्ल्यान, तो जिवंत आसताना ताका मान मेळ्ळोना
तरी, क्रमेण ताच्या कलेची ओळोक संसारार हेरांक
कळोन येंवच्या संगीं, ताच्या पिंतुरांक खायस
चडलो. ताचें नू कूश (Nu couché)
नांवाच्यें पिंतूर, २०१५ इस्वेंत, १७०.४
मिलिया अमेरिकन डोल्लरांक विकून गेलें.
वयल्यो संग्ती पळेताना, एक चिंतप मतिंत
येंवच्यांत नवाल ना. चडावत हरयेका कलाकाराक,
ते मेल्या उपरांत मात्र मान मेळ्ळा आनी
त्या-त्या कलाकाराची जिणी सुगम करुंक गर्ज
आसल्ले पयशे, कोणा-कोणाच्या हातांत पडल्यात
म्हळ्ळें सत, ना-पात्येणेन तकली हालवंक कर्ता.
चित्रकलेच्यें भविश्य कितें
चित्रकला एक वेळाकाळाची पर्वा
नासतां, जनांगां थावन जनांगांक, संसकृत्यां
थावन संसकृत्यांक व्हाळोन आयिल्ली, सकडांक
अर्थ जांवची एक सार्वजनीक भास म्हळ्यार चूक
जांवचिना. पुरातन माट्या-चित्रां थावन, आयच्या
आधुनीक डिजिटल युगा परयांत, हरयेक
चित्रकलाकार एक काणी सांगोंक आशेता म्हळ्ळें
सत कोणेंय नेगार कर्चेबरी ना. चरित्रेंत,
चित्रकलाकार दुबळेपण, एक्सूरपण, मानसीक दबाव
आनी सामाजीक ओत्तडाक लागोन अडचल्यात तरी, ताणी
केल्लीं चित्रां संसारार मेचवणेचीं जावन अमर
जाल्यांत.
आदीं थावन, एका पाट एका
कलाकारान नव्यो-नव्यो रिती वापर्न केल्लीं
चित्रां प्रख्यात जाल्लेबरी, आज-काल
चित्रकलेक नवी वाट दाकंवची डिजिटल माद्यमां
उदेल्यांत. एदोळ आपल्यो कृतियो हेरांक दाकवंक
ओद्दाडचेकडे, आतां अंतरजाळिच्येर प्रचार
करुंक सुलभ जालां. एदोळ बोटांनी लेखणी धरून
बरवन आसल्ली मनश्याची सवय, कंप्यूटराच्येर
टैप कर्च्यांत बदल्ल्या तरी, बराप म्हळ्ळें
तें जिवंत उरलां तशेंच, चित्रकला कर्ची रीत
बदलोंक पुरो पूण चित्रकला खंडीत मोर्चिना
म्हळ्ळी म्हजी पात्येणी. |
|
ಆಧ್ಲಿಂ ಲೇಖನಾಂ | आधलीं लेखनां |
ನಾಟಕ್ - ಏಕ್ ಪಡ್ದ್ಯಾ ಪಾಟ್ಲಿ ಕಥಾ
नाटक - एक पडद्या
पाटली कथा |
|
|
|
 |
|
ದಾಯ್ಜ್.ಕೊಮ್font> |
|
2004 ಥಾವ್ನ್
2011 ಪರ್ಯಾಂತ್ ಕಾರ್ಯಾಳ್ ಆಸ್ಲ್ಲ್ಯಾ
ದಾಯ್ಜ್.ಕೊಮ್ ಚೆರ್
ಪರ್ಗಟ್ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ
ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್
ಲಾಭಯ್ತೆಲ್ಯಾಂವ್. | |
| |
 |
| ಆಶಾವಾದಿ
ಪ್ರಕಾಶನ್ |
|
|
| ಆಶಾವಾದಿ
ಪ್ರಕಾಶನ್ |
 | |
| |
