![]() |
|
ಕಾವ್ಯದರ್ಶನ್ - 1 ಜಿಗಿಬಿಗಿ ರಾತಿಂ
ಕಾಜುಲ್ಯಾಂಚೆಂ ಸೊಭಾಣ್ |
|
|
|
|
ಹ್ಯಾ ಅಂಕಣಾಚೆರ್ ತುಮ್ಚಿ ಪ್ರತಿಕ್ರಿಯಾ ತುಮಿ
ಆಮ್ಕಾಂ ಬರವ್ನ್ ಧಾಡ್ಯೆತಾ. ಜೊಕ್ತಿಂ ಬರ್ಪಾಂ ಆಮಿಂ
ಪಯ್ಣಾರಿಚೆರ್ (ಉಪ್ರಾಂತ್ ಪುಸ್ತಕಾಚೆರ್)
ಪರ್ಗಟ್ತೆಲ್ಯಾಂವ್.
|
|
ಅಂಕಣ್ಕಾರ್: ಆಂಡ್ರ್ಯೂ ಎಲ್. ಡಿಕುನ್ಹಾ |
ವೃತ್ತೆನ್
ಫೈನಾನ್ಸಿಯಲ್ ಕನ್ಸಲ್ಟೆಂಟ್, ಸ್ವತಾಚಿ ’ವಿನ್-ವಿನ್
ಕನ್ಸಲ್ಟೆನ್ಸಿ’ ಚಲವ್ನ್ ಆಸಾ. ಕವಿ, ಕಥಾಕಾರ್,
ಸಮೀಕ್ಷಕ್ ಆನಿ ಸಂಪಾದಕ್.
ವ್ಹಳೂ ವ್ಹಳೂ
ವ್ಹಾಳ್ ವ್ಹಾಳ್ಯಾ
(2003),
ಅಂಜುರಾಚೆಂ ಪಾನ್
(2013),
ಆಯೆರಾಚೊ ಬೂಕ್
(2014),
ಉಜ್ವಾಡಾಚ್ಯೆ
ವೆಂಗೆಂತ್
(2025) ಹಾಚೆ ಕವಿತಾ
ಸಂಗ್ರಹ್. ಹೆರ್ ಕವಿತಾ ಸಂಕಲಾಂನಿ ಕವಿತಾ ತಶೆಂಚ್
ಪ್ರಸ್ತಾವನಾಂ ಬರಯ್ಲ್ಯಾಂತ್. 2002 ಇಸ್ವೆಂತ್ ’ಕವಿತಾ
ವ್ಹಾಳೊ’
ನಾಂವಾಚೆಂ ಕವಿತಾ ಅಂಕಣ್ ಮಾಯ್ಭಾಸ್.ಕೊಮ್ಚೆರ್
ಸಂಪಾದಕ್ಪಣ್ ಕೆಲಾಂ. ಕವಿತಾ ಟ್ರಸ್ಟಾಚೊ
ಕಾರ್ಯದರ್ಶಿ ಜಾವ್ನಾಸ್ಚೊ ಆಂಡ್ರ್ಯೂ ಕೊಂಕಣಿಂತ್ಲೊ
ಉಂಚ್ಲೊ ವಿಮರ್ಶಕ್.
ಕರ್ನಾಟಕ್ ಕೊಂಕಣಿ
ಸಾಹಿತ್ಯಾಚೊ, ಟಿ.ಎಮ್.ಎ. ಪೈ. ಫೌಂಡೇಶನಾಚೊ,
ಜಾಗತಿಕ್ ಕೊಂಕಣಿ ಲೇಖಕ್ ಸಂಘಟನಾಚೊ, ವಿಶ್ವ ಕೊಂಕಣಿ
ಕೇಂದ್ರಚ್ಯಾ ವಿಮಲಾ ವಿ. ಪೈ. ಫೌಂಡೇಶನಾಚೊ ಪುಸ್ತಕ್
ಪುರಸ್ಕಾರ್, ಸಂಧೇಶ ಪುರಸ್ಕಾರ್
(ಕೊಂಕಣಿ ಸಾಹಿತ್ಯ್)
ಹಾಕಾ ಯೆದೊಳ್ ಲಾಭ್ಲಲೆ ಪ್ರಮುಕ್ ಪುರಸ್ಕಾರ್.
ಅಪ್ಲ್ಯಾ ಕುಟ್ಮಾಸವೆಂ ಮಂಗ್ಳುರಾಂತ್ಲ್ಯಾ ಬಿಜಯ್
ಫಿರ್ಗಜೆಂತ್ ವಸ್ತಿ ಕರುನ್ ಆಸಾ. |
|
ಜಿಗಿಬಿಗಿ ರಾತಿಂ ಕಾಜುಲ್ಯಾಂಚೆಂ ಸೊಭಾಣ್ |
ಜಿಗಿಬಿಗಿ ರಾತಿಂ ಕಾಜುಲ್ಯಾಂಚೆಂ ಸೊಭಾಣ್
ಶಾಂತ್ ಸೊಭಿತ್ ರೊಮಾಂಟಿಕ್ ರಾತ್
ಸೂರ್ಯೊ ದಿಗಂತಾ
ಪಂದಾ ಲಿಪ್ತಾನಾ, ಸಂಸಾರ್ ಮೌನಾಂತ್ ವಿಲೀನ್ ಜಾತಾನಾ,
ಅಮರ್ ಕವಿ ಚಾ.ಫ್ರಾ ಅಮ್ಕಾಂ ಕಾಳೊಕಾಚ್ಯಾ ಮಾಟ್ವಾಂತ್
ಕಾಜುಲ್ಯಾಂಚ್ಯಾ ಜಿವಂತ್ ದಿವ್ಯಾಂನಿ ಸಜಯಿಲ್ಲ್ಯಾ ಎಕಾ
ಸಂಭ್ರಮಾಕ್ ಅಪವ್ನ್ ವ್ಹರ್ತಾ. ಕಾಜುಲೆ ಉಜ್ವಾಡಾಚಿ ವಾತ್
’ಜಾವ್ನ್’ ಅಮ್ಕಾಂ ಸ್ವಾಗತ್ ಕರುಂಕ್ ರಾಕೊನ್
ರಾವ್ಲ್ಯಾತ್. ಹೊ ಉಜ್ವಾಡ್ ಕಾಜುಲ್ಯಾಂಚ್ಯಾ ಸ್ವಾಸಾಂತ್
ವ್ಹಾಳ್ಚೊ ಏಕ್ ಜಳನಾತಲ್ಲೊ ಶಾಂತ್ ಪರ್ಜಳ್. ತಾಂಚೊ
ಉಜ್ವಾಡ್ ಕಾಳೊಕಾಕ್ ಧಾಂವ್ಡಾಯ್ನಾ, ಕಾಳೊಕಾಕ್ ’ಸೊಭಿತ್’
ಕರ್ತಾ
ಹ್ಯಾ ಕಾಳೊಕಾಂತ್ ಮಿಣ್ಮಿಣ್ಚ್ಯಾ ಮೌನ್
ಆಂಗ್ಣಾಂತ್ ಕವಿಚೆ ಸಬ್ದ್ ’ಜಿಗಿಬಿಗಿ’ ನಾಚ್ತಾತ್.
’ಜಿಗಿಬಿಗಿ’ ಮ್ಹಳ್ಯಾರ್ ಅಸ್ತಿತ್ವಾಚೆಂ ಸ್ಪಂದನ್.
ಉಜ್ವಾಡ್ ಪೆಟ್ತಾ ಆನಿ ಲಿಪ್ತಾ. ಸತ್ ಆಪ್ಲೆಂ ಮುಖಮಳ್
ದಾಕಂವ್ಕ್ ಕಾಳೊಕಾಚಿ ರಾತ್ಚ್ ವಿಂಚ್ತಾ! ಪುಣ್ ಹ್ಯಾ
ರಾತಿಂ ಸತ್ ಹಾಂಗಾ ಕುಡ್ಕ್ಯಾಂನಿ ಮಾತ್ರ್ ದರ್ಶನ್ ದಿತಾ.
ಖಿಣಾಕ್ ಉದೆತಾ ಆನಿ ಖಿಣಾಕ್ ಲಿಪ್ತಾ. ಇಲ್ಲೆಂ ಲಿಪಂವ್ಚಿ,
ಇಲ್ಲೆಂ ಇಲ್ಲೆಂ ದಾಕಂವ್ಚಿ ಹಿ ಏಕ್ ಜಿಗಿಬಿಗಿ ರಾತ್. ಎಕ್
ಶಾಂತ್ ಸೊಭಿತ್ ರೊಮಾಂಟಿಕ್ ರಾತ್. ಸತ್ ಆಪ್ಲೆಂ ಮುಖಮಳ್
ದಾಕಂವ್ಕ್ ಕಾಳೊಕಾಚಿ ರಾತ್ಚ್ ವಿಂಚ್ತಾ ಕವಿತಾ
ಕಾಜುಲ್ಯಾಂಪರಿಂಚ್ ಕಾಳೊಕಾಂತ್ ಸುರು ಜಾತಾ ಆನಿ
ಅತ್ಮ್ಯಾಚ್ಯಾ ಉಜ್ವಾಡಾಂತ್ ಸಂಪ್ತಾ.
ಜಿಗಿಬಿಗಿ ರಾತ್
ಜಿಗಿಬಿಗಿ ರಾತ್ ಆಜ್
ಕಾಜುಲ್ಯಾಂಚಿ ವಾತ್
ಕಾಜುಲ್ಯಾಂಚೆ ವಾತಿಂತ್
ಕಿತ್ಲೆಂ ಮ್ಹಣ್ ದಿಸತ್?
ಕಾಜುಲ್ಯಾಂಚೆ ಝಳ್ಕೆಂತ್
ಫಿಂತ್ಶೆಂ ದಿಸತ್
ಫಿಂತಾಚೆ ಉಬ್ಣೆಂತ್
ಕೇಸ್ಶೆ ಸುಸತ್
ಆಸ್ತಲೆ ಮುದ್ಯಾಳೆ,
ಕೊಂಗ್ರ್ಯಾಳೆ, ಜಿರ್ಸಾಳೆ
ದೊಳ್ಯಾಂಕ್ ಜರಿ ದಿಸ್ಲೆಂ
ನಾ ಅತ್ಮ್ಯಾಕ್ ದಿಸತ್
ಜಿಗಿಬಿಗಿ ರಾತ್ ಆಜ್
ಕಾಜುಲ್ಯಾಂಚಿ ವಾತ್
ಕಾಜುಲ್ಯಾಂಚೆ ವಾತಿಂತ್
ಕಿತ್ಲೆಂ ಮ್ಹಣ್ ದಿಸತ್?
ಜಿಗಿಬಿಗಿ ಝಳ್ಮೆಂತ್
ಆಸ್ಡಿಶಿ ದಿಸತ್
ಆಸ್ಡೆಚೆ ಉಡ್ಕೆಂತ್
ತೊಂಡ್ಶೆಂ ಸುಸತ್
ಆಸ್ತಲೆಂ ವಾಡ್ಕುಳೆಂ,
ಮಾಣ್ಕುಲೆಂ, ಗುಳ್ಗುಳೆಂ
ದೊಳ್ಯಾಂಕ್ ಜರಿ ದಿಸ್ಲೆಂ
ನಾ, ಅತ್ಮ್ಯಾಕ್ ದಿಸತ್
ಜಿಗಿಬಿಗಿ ರಾತ್ ಆಜ್
ಕಾಜುಲ್ಯಾಂಚಿ ವಾತ್
ಕಾಜುಲ್ಯಾಂಚೆ ವಾತಿಂತ್
ಕಿತ್ಲೆಂ ಮ್ಹಣ್ ದಿಸತ್?
ಚಿಟಿಪಿಟಿ ಚಾಲಿಂತ್
ಆಂಗ್ಲೆಂ ದಿಸತ್
ಆಂಗ್ಲ್ಯಾಚೆ ಮೊಡಿಂತ್
ಕೂಡ್ಶಿ ಸುಸತ್
ಆಸ್ತಲಿ ರಸ್ಮಾಳ್ಯಾ
ಕೆಂಳ್ಬ್ಯಾಚಿ ಕಾಂಡಿಶಿ
ದೊಳ್ಯಾಂಕ್ ಜರಿ ದಿಸ್ಲೆಂ
ನಾ ಅತ್ಮ್ಯಾಕ್ ದಿಸತ್
ಜಿಗಿಬಿಗಿ ರಾತ್ ಆಜ್
ಕಾಜುಲ್ಯಾಂಚಿ ವಾತ್
ಕಾಜುಲ್ಯಾಂಚೆ ವಾತಿಂತ್
ಕಿತ್ಲೆಂ ಮ್ಹಣ್ ದಿಸತ್?
ಅಶೀಚ್ ಸದಾಂಕಾಳಿಂ ರಾತ್
ಜರ್ ಆಸತ್
ದೆವಾ ಧನ್ಯಾಕ್ ಮುಗೆಲಿಂ
ಅರ್ಗಾಂ ಆಸಾತ್
ದೊಳ್ಯಾಂಕ್ ನ್ಹಯ್
ದಿಸ್ಚಿ ಸೊಭಾಯ್ ಆಸ್ತಾ ಸೊಸ್ಚಿ
ದೊಳ್ಯಾಂಕ್ ಜರಿ ದಿಸ್ಲಿ
ನಾ ಅತ್ಮ್ಯಾಕ್ ದಿಸತ್
ಜಿಗಿಬಿಗಿ ರಾತ್ ಆಜ್
ಕಾಜುಲ್ಯಾಂಚಿ ವಾತ್
ಕಾಜುಲ್ಯಾಂಚೆ ವಾತಿಂತ್
ಕಿತ್ಲೆಂ ಮ್ಹಣ್ ದಿಸತ್?
-ಚಾ.ಫ್ರಾ. ದೆಕೊಸ್ತಾ
ಕುರ್ಪಾ: ಸೊಂಶಾಚೆ ಕಾನ್ ಕವಿತಾ ಪುಸ್ತಕ್, (ಚಾ.ಫ್ರಾ.
ದೆಕೊಸ್ತಾ)
ಹರ್ಯೆಕ್ ಮನಿಸ್ ಏಕ್
ಕಾಜುಲೊ
ಮನ್ಶ್ಯಾಚೆ ದೊಳೆ ಭೌತಿಕ್
ವಿಜ್ಞಾನಾಚೆ ಕ್ಯಾಮರಾ ಜಾವ್ನ್ ಆಸಾತ್. ಮನಿಸ್ ಚಿಂತಾ
ಸಂಸಾರ್ ಆಮ್ಚ್ಯಾ ಮುಖಾರ್ ಪುರ್ತೊ ಸಾದರ್ ಜಾತಾ ಮ್ಹಣ್.
ಹ್ಯಾ ಸೀಮಿತ್ ದಿಷ್ಟಿಂತ್ ಏಕ್ ಗುಪಿತ್ ಗರ್ವ್ ಲಿಪೊನ್
ಆಸಾ. ತೆಂ ಗರ್ವ್ ಮ್ಹಣ್ತಾ "ಜೆಂ ಸಗ್ಳೆಂ ದಿಸ್ತಾ, ತೆಂಚ್
ಖರೆಂ." ಪೂಣ್ ಚಾ.ಫ್ರಾಚೊ “ಜಿಗಿಬಿಗಿ” ಸಬ್ದ್ ಹ್ಯಾ
ಗರ್ವಾಕ್ ಮುಳಾಂತ್ಚ್ ಹಾಲಯ್ತಾ. ಪೂರ್ಣ್ ಸತ್ ಸೊಸ್ಚೆಂ
ತ್ರಾಣ್ ಮನ್ಶ್ಯಾಚ್ಯಾ ಭೌತಿಕ್ ದೊಳ್ಯಾಂಕ್ ನಾ. ಪ್ರಖರ್
ಉಜ್ವಾಡಾಂತ್ ವಸ್ತು ಸ್ಪಷ್ಟ್ ದಿಸ್ತಾತ್, ಪುಣ್ ತ್ಯಾ
ಸ್ಪಷ್ಟತೆಂತ್ ವಸ್ತುಂಚೊ ’ಆತ್ಮೊ’ ಲಿಪೊನ್ ಉರ್ತಾ.
ಚಾ.ಫ್ರಾ ಸಾಂಗ್ತಾ, ಸತ್ ಮ್ಹಳ್ಯಾರ್ ದೊಳ್ಯಾಂಕ್ ದಿಸ್ಚೆಂ
ದೃಶ್ಯ್ ನ್ಹಯ್, ಬಗರ್ ಅತ್ಮ್ಯಾನ್ ಸೊಸ್ಚಿ ಸೊಭಾಯ್
ದೊಳ್ಯಾಂಕ್ ನ್ಹಯ್ ದಿಸ್ಚಿ ಸೊಭಾಯ್ ಆಸ್ತಾ ಸೊಸ್ಚಿ
ದೊಳ್ಯಾಂಕ್ ಜರಿ ದಿಸ್ಲಿ ನಾ ಅತ್ಮ್ಯಾಕ್ ದಿಸತ್
ಅತ್ಮ್ಯಾಕ್ ದಿಸ್ಚಿ ಸೊಭಾಯ್ ಮ್ಹಳ್ಯಾರ್ ವಸ್ತುಂಕ್
ಪಳಂವ್ಚೆಂ ನ್ಹಯ್, ವಸ್ತುಂಕ್ ಕಾಳ್ಜಾ ಮನಾನ್ “ಭೆಟ್ಚೆಂ”.
ಹ್ಯಾ ಸಂಸಾರಾಂತ್ಲ್ಯಾ 8 ಬಿಲಿಯನ್ ಮಿಣ್ಮಿಣ್ಚ್ಯಾ
ಜಿವಿತಾಂತ್, ಹರ್ಯೆಕ್ ಮನಿಸ್ ಸ್ವತಃ ಏಕ್ ಕಾಜುಲೊ, ಏಕ್
ಲ್ಹಾನ್, ಅಪೂರ್ಣ್ ಮಿಣ್ಮಿಣ್ ಜೊ ಅಮರ್ ಸತಾಚೊ ಏಕ್ ವಾಂಟೊ
ಜಾವ್ನ್ ಆಸಾ.
ಕೆತ್ತಿಕಲ್ ಗುಡ್ಯಾರ್
ಕಾಜುಲ್ಯಾಂಚೆಂ ಮಾಂಡ್ ಸೊಭಾಣ್!
ಮಹಾನ್
ಕವಿಂಚ್ಯೊ ಕವಿತಾ ವಾಚ್ಬ್ಯಾ ಪಯ್ಲೆಂಚ್ ಆಮ್ಚ್ಯಾ
ಜಿವಿತಾಂತ್ ಘಡ್ತಾತ್. ಅಮರ್ ಚಾ.ಫ್ರಾಚಿ ಕವಿತಾ ವಾಚ್ಬ್ಯಾ
ಪಯ್ಲೆಂಚ್ ಮಾಕಾ ಜಿಗಿಬಿಗಿ ರಾತಿಚೊ ಅನ್ಭೊಗ್ ಜಾಲ್ಲೊ.
ಕೆತ್ತಿಕಲ್ ಗುಡ್ಯಾರ್ ಕಾಜುಲ್ಯಾಂಚೆಂ ಮಾಂಡ್ ಸೊಭಾಣ್
ಪಳೆತಾನಾ. ಮ್ಹಜ್ಯಾ ಅಟ್ರಾ ವರ್ಸಾಂಚೆ ಪ್ರಾಯೆರ್ ಚಾ.ಫ್ರಾ
ಮ್ಹಳ್ಳ್ಯಾ ಕೊಂಕ್ಣಿ ಪ್ರವಾದ್ಯಾಚೊ ತಾಳೊ ಆಯ್ಕೊಂಕ್
ವಾಮಂಜೂರ್ ಇಗರ್ಜೆ ಆಂಗ್ಣಾಂತ್ ಜಾಲ್ಲ್ಯಾ ಮಾಂಡ್ ಸೊಭಾಣ್
ಕಾರ್ಯಾಕ್ ಹಾಜರ್ ಜಾಲ್ಲೊಂ. ತಾಚಿಂ ಉತ್ರಾಂ ಅನಿ ತಾಳೊ
ಆಯ್ಕೊಂಚೆಚ್ ಏಕ್ ಭಾಗ್. ತಾಚಿಂ ಉತ್ರಾಂ ಏಕ್
ಅಧ್ಯಾತ್ಮಿಕ್ ಕಂಪನ್. ಕಾರ್ಯೆಂ ಸಂಪವ್ನ್ ತಾಂಚೆಲಾಗಿಂ
ಏಕ್ ಸಬ್ದ್ ಉಲವ್ನ್ ಪಾಟಿಂ ಮ್ಹಜ್ಯಾ
ಕಿನ್ನಿಕಂಬ್ಳಂತ್ಲ್ಯಾ ಘರಾ ವಚೊಂಕ್ ಮೆಟಾಂ ಕಾಡ್ತಾನಾ
ತ್ಯಾ ಕುಶಿಕ್ ವೆಚೆಂ ಬಸ್ಸ್ ಮೆಳ್ಳೆಂನಾ. ಪುಣ್ ಹಾಂವ್
ಎಕ್ಸುರೊಂ ಮ್ಹಣ್ ಮಾಕಾ ಭೊಗ್ಲೆಂ ನಾ. ಚಾ.ಫ್ರಾಚಿಂ
ಉತ್ರಾಂಚೊ ನಾದ್ ಮ್ಹನಾಂತ್ ಗಾಜ್ತ್ತಾಲೊ ತರ್ ಮಾಂಡ್
ಸೊಭಾಣಾಂಚಿಂ ಗಿತಾಂ ಕಾಳ್ಜಾಂತ್ ಗಾಯ್ತಾಲಿಂ.
ವಾಮಂಜೂರ್ ರಸ್ತ್ಯಾಚ್ಯಾ ಉಜ್ವಾಡಾಂತ್ಲ್ಯಾನ್ ಪಾಶಾರ್
ಜಾವ್ನ್ ಕೆತ್ತಿಕಲ್ ಗುಡ್ಯಾಚ್ಯಾ ಧಾಟ್ ಕಾಳೊಕಾಂತ್
ಪ್ರವೇಶ್ ಜಾತಾನಾ ದಾವ್ಯಾ ಕುಶಿಚ್ಯಾ ಗುಡ್ಯಾಚ್ಯಾ ರೂಕ್
ಝಾಡಾಂಚೆರ್ ಸಜವ್ನ್ ರಾವಲ್ಲ್ಯಾ ಜಿಗಿ ಬಿಗಿ ಕಾಜುಲ್ಯಾಂನಿ
ಮಾಕಾ ಸಾಂಗಾತ್ ದಿಲ್ಲೊ. ಮ್ಹಾಕಾ ತ್ಯೊ ಘುಡಿಯೊ ಅಜೂನ್
ಉಡಾಸ್ ಆಸಾತ್ ; ಜೆದ್ನಾಂ ಹಾಂವೆಂ ವಯ್ರ್ ಪಳೆಲೆಂ,
ನೆಕೆತ್ರಾಂ ಪರ್ಜಳ್ತಾಲಿಂ ಪುಣ್ ಮ್ಹಜೆಂ ಕಾಳಿಜ್ ಧರ್ತೆ
ವಯ್ಲ್ಯಾ ದಿವ್ಯಾಂಚೆರ್ ಪರ್ತಾಲ್ಲೆಂ. ಗಾಂವ್ಚ್ಯಾ ಘರಾಂನಿ
ಪೆಟ್ಲಲೆ ದಿವೆ ಮನ್ನ್ಶ್ಯಾ ಸಂಬಂಧಾನ್ ಮಾಕಾ ”ಆಪ್ತ್’
ಜಾವ್ನ್ ಭೊಗ್ಲೆ ಆನಿ ಕಾಜುಲ್ಯಾಂಚೊ ಪವಿತ್ರ್ ಪರ್ಜಳ್ ’
ಸತ್’ ಜಾವ್ನ್ ದಿಸ್ಲೊ.
ಅಸತೋ ಮಾ
ಸದ್ಗಮಯ, ತಮಸೋ ಮಾ ಜ್ಯೋತಿರ್ಗಮಯ”
ತ್ಯಾ ಕಾಳೊಕಾಚ್ಯೆ ವಾಟೆಂತ್ ಮ್ಹಜ್ಯಾ ಭೊವಾಂರಿಂ
ಕಾಜುಲ್ಯಾಂನಿ ಜಿವಂತ್ ದಿವ್ಯಾಂಚೊ ಪುರ್ಶಾಂವ್
ಮಾಂಡ್ಲ್ಲೊ. ಹರ್ಯೆಕಾ ದಿಸಾ ಹಾಂವೆಂ ಉಜ್ವಾಡಾಂತ್
ಬಸ್ಸಾರ್ ಬಸೊನ್ ಪಳೆವ್ನ್ ವಿಸ್ರೊನ್ ಸೊಡ್ಚಿ ವಾಟ್ ತಿ.
ಪುಣ್ ತ್ಯಾ ರಾತಿಂ, ದಿಸಾ ಉಜ್ವಾಡಾಂತ್ ಲಿಪ್ಲ್ಲ್ಯಾ
ಸಂಸಾರಾಚೆಂ ಸೊಭಿತ್ ಸುಂದರ್ ರುಪಾಂತರ್ ಮ್ಹಜ್ಯಾ ದೊಳ್ಯಾಂ
ಮುಖಾರ್ ಉಬೆಂ ಜಾಲ್ಲೆಂ. ಚಾ. ಫ್ರಾಚಿ ಜಿಗಿಬಿಗಿ ರಾತ್
ಕವಿತಾ ಹಾಂವೆಂ ವಾಚುಂಕ್ ನಾತಲ್ಲಿ. ಪುಣ್ ಕನ್ನಡ
ಸಾಹಿತ್ಯ್ ಶಿಕ್ತಾನಾ ವಾಚ್ಲ್ಲಿ ಸಂಸ್ಕೃತ್ ವೋಳ್ ಮತಿಂತ್
ಉದೆಲಿ. "ಅಸತೋ ಮಾ ಸದ್ಗಮಯ, ತಮಸೋ ಮಾ ಜ್ಯೋತಿರ್ಗಮಯ’.
ಕಾಳೊಕಾಚ್ಯಾ ಕಾಳ್ಜಾಂತ್ ಆಸ್ಚ್ಯಾ ಸತಾಂಚ್ಯಾ ತ್ಯಾ
ಅನ್ಭೊಗಾಂತ್ ಮಾಕಾಚ್ ಹಾಂವ್ ವಿಸ್ರಾಲ್ಲೊಂ.
ಕಾಜುಲ್ಯಾಚ್ಯಾ ಉಜ್ವಾಡಾಂತ್ ಥೊಡ್ಯಾಚ್ ಮೆಟಾಂಚಿ ವಾಟ್
ಮಾಕಾ ದಿಸ್ತಾಲಿ. ಪುಣ್ ಜಿವಿತಾಚೊ ಅಧ್ಯಾತ್ಮಿಕ್ ಪ್ರಕಾಸ್
ಜಿಯೆಂವ್ಕ್, ಮೆಟಾಂ ಸಾರ್ಕಿಂ ದವ್ರುಂಕ್, ತಿತ್ಲೊಚ್
ಪವಿತ್ರ್ ಉಜ್ವಾಡ್ ಗಮ್ಮತ್ ಪಾವ್ತಾ ತಶೆಂ ಭೊಗ್ಲೆಂ.
ಕೆತ್ತಿಕಲ್ ಗುಡ್ಯಾರ್ ಸಾದರ್ ಜಾಲ್ಲೆಂ
ಕಾಜುಲ್ಯಾಂಚೆಂ ಸಾಹಿತ್ಯ್ ಅಜೂನ್ ಮಜ್ಯಾ ಮನಾ ಸ್ಕ್ರೀನರ್
ಜಿಗಿಬಿಗಿ ಕರ್ನ್ ಪಾಶಾರ್ ಜಾತಾ. ಆತಾಂ ಗುಡ್ಯಾರ್ ಕಾಜುಲೆ
ನಾಂತ್ ಆಸ್ತಲೆ, ಪೂಣ್ ಚಾ.ಫ್ರಾಚ್ಯಾ ಕವಿತೆಂತ್ಲೆ ಕಾಜುಲೆ
ಮ್ಹಜ್ಯಾ ಮನಾಂತ್ ಸದಾಂಕಾಳ್ ಪೆಟೊನ್ ಆಸಾತ್. ಜಿಗಿಬಿಗಿ
ರಾತಿಚ್ಯಾ ಪಾಂಗ್ರುಣಾ ಪಂದಾ, ಚಾ. ಫ್ರಾಚೆ ಸಬ್ದ್
ಕಾಜುಲ್ಯಾಂ ಬರಿ ಉಡ್ತಾತ್ ಅನಿ ಕಾಜುಲೆ ಪಾಸ್ಕಾಂಚ್ಯಾ
ರಾತಿಚ್ಯಾ ವಾತಿಂಪರಿಂ ಕಾಳೊಕಾಂತ್ ಉಮೆ ದೀವ್ನ್
ಎಕಾಮೆಕಾಚಿಂ ಕಾಳ್ಜಾಂ ಪೆಟಯ್ತಾತ್. ಆಮಿ ಸಕ್ಕಡ್ ಎಕಾಮೆಕಾ
ಕುಶಿಕ್ ಬಾಗ್ವಲ್ಲಿಂ ’ಜಿಗಿಬಿಗಿ’ ಕಣಾಂ. ತ್ಯಾ
ಖಾಲ್ತ್ಯಾಪಣಾಂತ್ ಏಕ್ ನಾಜೂಕ್ ಮೋಗ್ ಜಲ್ಮ್ ಘೆತಾ:
’ಸಾಂಗಾತಾ ಪರ್ಜಳ್ಚೊ ಉಜ್ವಾಡ್’.
ದಿಸತ್
- ಸುಸತ್- ಅತ್ಮ್ಯಾಕ್ ದಿಸತ್
ಹ್ಯಾ
ಕವಿತೆಚೆಂ ದರ್ಶನ್ ತೀನ್ ಪಾಂವ್ಣ್ಯಾಂನಿ ಉಗ್ತೆಂ ಜಾತಾ:
-ದಿಸತ್ (ದೈಹಿಕ್ ದೊಳ್ಯಾಂಕ್), ಸುಸತ್ (ಕಲ್ಪನೆಚ್ಯಾ
ಕಾಳ್ಜಾಕ್), ಆನಿ ಅತ್ಮ್ಯಾಕ್ ದಿಸತ್ (ಅತ್ಮ್ಯಾಚ್ಯಾ
ದಯ್ವಿಕ್ಪಣಾಕ್). ಹರ್ಯೆಕ್ ಮೆಟ್ ಪಯ್ಲೆಂಚ್ಯಾ ಮೆಟಾಕ್
ಆನಿಕೀ ಗೂಂಡ್ ಕರ್ತಾ, ವಾಚ್ಪ್ಯಾಕ್ ಇಂದ್ರಿಯಾಂಚ್ಯಾ ಮಿತಿ
ಥಾವ್ನ್ ಸುಟವ್ನ್ ಅತ್ಮ್ಯಾಚ್ಯಾ ಅನಂತ್ ದರ್ಶನಾ ಲಾಗಿಂ
ಪಾವಯ್ತಾ.
ದೈಹಿಕ್ ದೊಳ್ಯಾಂಚಿ ದೀಷ್ಟ್
(ದಿಸತ್):
ಪಯ್ಣ್ ಸುರು ಜಾತಾ ದೈಹಿಕ್
ದೊಳ್ಯಾಂಚ್ಯಾ ಸಾಮಾನ್ಯ್ ದೀಷ್ಟಿನ್ ಪುಣ್ ಮೊಗಾಳ್
ಅತ್ರೆಗಾನ್. ಜೆಂ ದಿಸ್ತಾ ತಾಕಾ ಮಾತ್ರ್ ಪಾರ್ಕುಂಚಿ
ದೀಷ್ಟ್ ಹಿ. ಪಯ್ಲ್ಯಾ ಕಡ್ವ್ಯಾಂತ್ ಕಾಜುಲ್ಯಾಂಚೆ
ಝಳ್ಕೆಂತ್ ಫಿಂತ್ಶೆಂ ದಿಸ್ತಾ ತರ್, ದುಸ್ರ್ಯಾ
ಕಡ್ವ್ಯಾಂತ್ ಆಸ್ಡಿಶಿ ದಿಸ್ತಾ ಅನಿ ತಿಸ್ರ್ಯಾ
ಕಡ್ವ್ಯಾಂತ್ ಆಂಗ್ಲೆಂ ದಿಸ್ತಾ. ಕೂಡಿಚೆ ದೊಳೆ ಉಜ್ವಾಡ್
ಆನಿ ಆಕಾರ್ ಪಳೆಂವ್ಕ್ ಸಕ್ತಾತ್, ಅಶೆಂ ಪಳೆತಾನಾ
ಖರ್ಯಾನ್ ದೊಳ್ಯಾಂಕ್ ಹಿಶಾರೆ ಮಾತ್ರ್ ಮೆಳ್ತಾತ್,
ಜಿವಿತಾಚೊ ಜಿವಂತ್ ಕಂಪನ್ ಧರುಂಕ್ ಸಕನಾಂತ್. ಆಮ್ಚ್ಯಾ
ದೊಳ್ಯಾಂಚೊ ಸ್ವಭಾವ್ಚ್ ಅಸಲೊ- ವಯ್ಲ್ಯಾಬಾರ್ ಪಳೆವ್ನ್
ತರ್ಕ್ ಕರ್ಚೆಂ, ವೊಟ್ರಾಸಿ ಫೈಸಲ್ ದಿಂವ್ಚೆಂ. ಹಾಂಗಾ
“ಆಂಗ್ಲೆಂ” ಫಕತ್ ಏಕ್ ವಸ್ತ್ ಜಾವ್ನ್ ದಿಸ್ತಾ. ಪುಣ್
ಚಾ.ಫ್ರಾಚ್ಯಾ ಜಿಗಿಬಿಗಿ ರಾತಿಂತ್ ಮನ್ಶ್ಯಾಚೆ ಸೀಮಿತ್
ದೊಳೆ ಸಲ್ವತಾತ್. .
ಕಲ್ಪಾನಾ ಸಕ್ತೆಚಿ
ದೀಷ್ಟ್ (ಸುಸತ್)
ದೊಳೆ ಸಲ್ವಣಿ
ಮಾಂದ್ತಾನಾ ಕಲ್ಪನಾ ಸಕತ್ ಜಾಗೃತ್ ಜಾತಾ. ಕಲ್ಪನಾ ದೀಷ್ಟ್
ಕಾಳೊಕಾಕ್ ಸಜಯ್ತಾ. ಕವಿತೆಂತ್ಲೊ ’ಸುಸತ್’
ಕಲ್ಪನಾಸಕ್ತೆನ್ ಸತಾ ಕಡೆನ್ ಧರಲ್ಲೆಂ ಏಕ್ ಪವಿತ್ರ್
ಜಿಗಿಬಿಗಿ ಪಯ್ಣ್. ಕಲ್ಪನಾ ಸಕತ್ ಅತ್ಮ್ಯಾಚೆ ದೊಳೆ.
ಕವಿತಾ ಅತಾಂ ಭಾವನಾತ್ಮಕ್ ಸ್ಪರ್ಶಾಕ್ ಪಯ್ಣ್ ಕರ್ತಾ.
“ಫಿಂತಾಚೆ ಉಬ್ಣೆಂತ್ ಕೇಸ್ಶೆ ಸುಸತ್”-ಝಳ್ಕೆಚ್ಯಾ
ಉಬ್ಣೆಂತ್ ಸೊಭಾಯ್ ಭೊಗ್ತಾ.
“ಆಸ್ಡೆಚೆ ಉಡ್ಕೆಂತ್
ತೊಂಡ್ಶೆಂ ಸುಸತ್”-ಉಡ್ಕೆಂತ್ ಏಕ್ ಗೊಡ್ಸಾಣ್ ಮೆಳ್ತಾ.
“ಆಂಗ್ಲ್ಯಾಚೆ ಮೊಡಿಂತ್ ಕೂಡ್ಶೆಂ ಸುಸತ್”-ರೊಮಾಂಚನ್!
ಕಲ್ಪನಾ ಸಕ್ತೆಕ್ ಉಜ್ವಾಡಾಚಿ ಗರ್ಜ್ ನಾ. ಕವಿಚ್ಯಾ
ಪ್ರತಿಭೆಚೊ ಉಜ್ವಾಡ್ ಪಾವ್ತಾ. ಅಸ್ತಿತ್ವಾಚೆಂ ಸತ್ ಎಕಾ
ಝಳ್ಕ್ಯಾಂತ್ ಧರ್ಚಿ ಕಲಾ! ಪರ್ನೊ ಅನ್ಭೊಗ್ ನವೆಂ ರೂಪ್
ಘೆತಾ. ಕವಿಚ್ಯಾ ಸುಪ್ತ್ ಮತಿಂತ್ಲಿಂ ಸೊಭಾಯೆಚಿಂ ರುಪಾಂ
ಮುದ್ಯಾಳೆ, ಕೊಂಗ್ರ್ಯಾಳೆ, ಜಿರ್ಸಾಳೆ ಜಿವಂತ್ ಜಾತಾತ್.
ವಾಡ್ಕುಳೆಂ, ಮಾಣ್ಕುಲೆಂ, ಗುಳ್ಗುಳೆಂ ಮುಖಮಳ್ ದಿಶ್ಟಿಕ್
ಪಡ್ತಾ. ಚಾ.ಫ್ರಾಚಿ ರೊಮಾಂಟಿಕ್ ಪ್ರತಿಭೆಚ್ಯಾ ದೊಳ್ಯಾಂಕ್
ಆತಾಂ ಚಿಟಿಪಿಟಿ ಚಾಲ್ ದಿಸ್ತಾ. ಆಂಗ್ಲ್ಯಾಚೆ ಮೊಡಿಂತ್
ಸತ್ ಸೊಧ್ತಾನಾ ಕಲ್ಫನ್ ಅನಿಕೀ ಫುಲ್ತಾ. ಆಂಗ್ಲ್ಯಾಚೆ
ಮೊಡಿಂತ್ ದಿಸ್ಚಿ ರಸ್ಮಾಳ್ಯಾ ಕೆಂಳ್ಬ್ಯಾಚಿ ಕಾಂಡಿಶಿ
ಕೂಡ್ ಕವಿಚ್ಯಾ ಅತ್ಮ್ಯಾಕ್ ಸ್ಪರ್ಶ್ ಕರ್ತಾ
ಮೊಗಾಂತ್ ಅನಿ ಭಕ್ತಿಪಣಾಂತ್ ದೊಳ್ಯಾಂಕ್ ದಿಸನಾತ್ಲೆಲ್ಯಾ
ವಸ್ತುಂಕ್ ಭೊಗ್ಚಿ ಸಕತ್ ಆಸ್ತಾ. ಸೊಭಾಯ್ ಪಳೆಂವಚಿ ವಸ್ತು
ನ್ಹಯ್; ತಿ ಅನ್ಭೊಗಾಂಚಿ ಏಕ್ ಜಿವಿ ಝರ್ ಜಾತಾ. ಪೂಣ್
ಕವಿತಾ ಹಾಂಗಾಚ್ ಥಾಂಬನಾ.
ಆತ್ಮ್ಯಾಚಿ
ದೀಷ್ಟ್ (ಅತ್ಮ್ಯಾಕ್ ದಿಸತ್).
ಹರ್ಯೆಕ್ ಮಿಣ್ಮಿಣ್ ಏಕ್ ಧ್ಯಾನ್. ಜೆದ್ನಾ ದೊಳೆ
ಧಾಂಪ್ತಾತ್, ತೆದ್ನಾ ಮನಾಚೊ ಕಾಳೊಕ್ ಸಂಪ್ತಾ ಅನಿ
ಅತ್ಮೊಚ್ ದಿವೊ ಜಾವ್ನ್ ಪರ್ಜಳ್ತಾ. ಹಿ ಕವಿತೆಚಿ ಅತೀ
ಉಂಚ್ಲಿ ಸ್ಥಿತಿ. ಹಾಂಗಾ ಪಳೆಂವ್ಚೊ ಆನಿ ಪಳೆಂವ್ಚಿ ವಸ್ತ್
ಎಕ್ವಟ್ತಾತ್. ಮನ್ ಉಜ್ವಾಡಾಂತ್ ಅಸ್ತಾನಾ ರಾತ್ ಆತಾಂ
ಆಮ್ಚ್ಯಾ ಸುತ್ತುರಾಂತ್ ಉರನಾ: “ದೊಳ್ಯಾಂಕ್ ಜರಿ ದಿಸ್ಲೆಂ
ನಾ ಅತ್ಮ್ಯಾಕ್ ದಿಸತ್. ಕವಿಚೆ ಸಬ್ದ್ ಉಜ್ವಾಡ್ ಜಾತಾತ್.
ಹ್ಯಾ ಉನ್ನತ್ ದರ್ಶನಾಂತ್ ಆಮಿ ಆಮ್ಕಾಂಚ್ ಸಂಸಾರ್ ಜಾವ್ನ್
ವೊಳ್ಕತಾಂವ್.
ಕಾಳೊಕಾಚ್ಯಾ ಗರ್ಭಾಂತ್
ಧನಾ ದೆವಾಕ್ ಅರ್ಗಾಂ
ಕವಿತೆಚಿಂ
ನಿಮಾಣಿ ಸಾಕ್ಸ್ ವ್ಹರ್ತಿ ನಾಜೂಕ್ ಆಸಾ: “ಅಶೀಚ್
ಸದಾಂಕಾಳಿಂ ರಾತ್ ಜರ್ ಆಸತ್ / ದೆವಾ ಧನ್ಯಾಕ್ ಮುಗೆಲಿಂ
ಅರ್ಗಾಂ ಆಸಾತ್”. "ಅಶೀಚ್ ಸದಾಂಕಾಳಿಂ ರಾತ್ ಜರ್ ಆಸತ್"
ಮ್ಹಣ್ ಕವಿ ಮ್ಹಣ್ತಾನಾ, ತೊ ದೀಸ್ ನಾಕಾ ಮ್ಹಣ್ ಸಾಂಗನಾ;
ಬಗರ್ ತೊ ತ್ಯಾ ಕಾಳೊಕಾಚ್ಯಾ ಗರ್ಭಾಂತ್ ಆಸ್ಚ್ಯಾ ಸತಾಚೊ
ಅನಿ ಸೊಭಾಯೆಚೊ ಮೋಗ್ ಕರ್ತಾ. ಕಾಳೊಕಾಚ್ಯಾ ಗರ್ಭಾಂತ್
ದೆವಾಚೊ ಸ್ವಾಸ್ ಭೊಗ್ಚೆಂಚ್ ’ಅರ್ಗಾಂ’. ಕವಿತಾ
ಉಜ್ವಾಡಾಚ್ಯಾ ಗರ್ಜೆನ್ ಮುಗ್ದನಾ, ಅರ್ಗಾಂಚ್ಯಾ
ಸಮರ್ಪಣಾಂತ್ ಪೆಟ್ತಾ!
ತ್ಯಾ ವೆಳಿಂ ಕವಿತೆಂತ್ಲಿ
ಅಂತಿಮ್ ಶಿಕೊವ್ಣ್ ಮೆಳ್ತಾ: “ದೊಳ್ಯಾಂಕ್ ನ್ಹಯ್ ದಿಸ್ಚಿ
ಸೊಭಾಯ್ ಆಸ್ತಾ ಸೊಸ್ಚಿ”. ಜೆದಾನಾ ಆಮಿ ಸತಾಚ್ಯಾ
’ಜಿಗಿಬಿಗಿ’ ಪ್ರಕಾಸಾಕ್ ಪಳೆತಾಂವ್, ತೆದಾನಾ ದೊಳೆ
ಆಪಾಪಿಂಚ್ ಬಂದ್ ಜಾತಾತ್. ಖರಿ ಸೊಭಾಯ್ ಆಮ್ಚ್ಯಾ
ತಾಬ್ಯಾಂತ್ ಆಸನಾ, ಬಗರ್ ಆಮಿ ತ್ಯಾ ಸೊಭಾಯೆಚ್ಯಾ
ತಾಬ್ಯಾಂತ್ ಆಸ್ತಾಂವ್. ತಿ ಸೊಭಾಯ್ ಅಮ್ಚ್ಯಾ
ಇಂದ್ರಿಯಾಂಕ್ ಅಟಾಪುಂಕ್ ಜಾಯ್ನಾತ್ಲ್ಲಿ. ಮೀತ್ಮೇರ್
ನಾತ್ಲ್ಲಿ. ಅಸಲ್ಯಾ ಸೊಭಾಯೆಕ್ ’ಸೊಸ್ಚೆಂ’ ಆತ್ಮ್ಯಾಕ್
ಮಾತ್ರ್ ಸಾಧ್ಯ್ ಮ್ಹನ್ಸ್ಯಾಚೊ ಸಂತೊಸ್ ಮಾತ್ರ್ ನ್ಹಯ್,
ದೂಕ್ ಸಯ್ತ್ ಹ್ಯಾ ಘಡ್ಯೆ ಏಕ್ ಸುಂದರ್ ಕವಿತಾ ಜಾವ್ನ್
ಬದಲ್ತಾ. ಏಕ್ ಕವಿ ಜಾವ್ನ್ ಹಾಂವೆಮ್ ಸಾಂಗ್ಚೆಂ ತರ್,
ಕವಿತಾ ಜಲ್ಮೊಂಚಿ ಘಡಿ ಹಿಚ್ಚ್!
ಸಂಸಾರ್
ಏಕ್ ಜಿವಿ ಜಿವಿ ಕವಿತಾ!
ಸೊಭಾಯೆಚೊ
ಅಂತಿಮ್ ಉದ್ದೇಶ್ ಮನ್ಶ್ಯಾಕ್ ಮನ್ಶ್ಯಾ ಕಡೆನ್ ಆನಿ
ಮನ್ಶ್ಯಾಕ್ ಸೃಶ್ಟಿ ಕಡೆನ್ ಮೊಗಾಚ್ಯಾ ಬಾಂಧಾನ್
ಎಕ್ವಟ್ಚೊ. ಮೋಗ್ ದಿಸನಾ, ಸೊಸ್ಣಿಕಾಯ್ ಮೆಜುಂಕ್ ಜಾಯ್ನಾ,
ಆನಿ ತ್ಯಾಗ್ ಫೋಟೊಂತ್ ಯೇನಾ. ಹರ್ಯೆಕ್ ಮನಿಸ್ ಆಪ್ಲ್ಯಾ
ಭಿತರ್ ಸಾಹಿತ್ಯ್ ಘೆವ್ನ್ ಜಿಯೆತಾ, ಪುಣ್ ಸಂಸಾರಾಚ್ಯಾ
ಗಲಾಟ್ಯಾಂತ್ ಸದಾಂ ಪ್ರಕಟ್ ಜಾಯ್ನಾ. ಎಕ್ಯೆ ಮೌನ್ ಘಡ್ಯೆ
ಜೆದ್ನಾಂ ತೆಂ ’ಜಿಗಿಬಿಗಿ’ ಪೆಟ್ತಾ, ತೆದ್ನಾಂಚ್
ದುಸ್ರ್ಯಾ ಅತ್ಮ್ಯಾಕ್ ತಾಚಿ ವೊಳಕ್ ಮೆಳ್ತಾ,
ಕಾಳೊಕಾಂತ್ಲ್ಯಾ ಜಿಗಿಬಿಗಿಂತ್ ಚಿಟಿಪಿಟಿ ಚಾಲಿಚಿ
“ರಸ್ಮಾಳಿ” ಜಿಣಿ ಝಳ್ಕತಾ. ಹರ್ಯೆಕ್ ಮನ್ಶ್ಯಾಚೊ ಹೊ
ಜಿಗಿಬಿಗಿ ಉಜ್ವಾಡ್ ಅಖಂಡ್ ಸತಾಚ್ಯಾ ಕೊಲಾಜ್ಯಾಚೊ ಏಕ್
ಗರ್ಜೆಚೊ ವಾಂಟೊ. ಸಂಸಾರಾಂತ್ಲೆ ೮ ಬಿಲಿಯನ್ ಅತ್ಮೆ ಹ್ಯಾ
’ಕಾಜುಲ್ಯಾಚ್ಯಾ ಸಾಹಿತ್ಯಾಂತ್’ ಎಕಾಚ್ ಮಹಾಕಾವ್ಯಾಚಿಂ
ಅಕ್ಷರಾಂ ಜಾವ್ನ್ ಎಕ್ವಟ್ತಾನಾ ಸಂಸಾರ್ ಏಕ್ ಜಿವಂತ್
ಕವಿತಾ’ ಜಾತಾ. ಹಾಂಗಾ ಹರ್ಯೆಕ್ಲೊ ಮನಿಸ್ ಆಪ್ಲ್ಯಾ
ಅಸ್ತಿತ್ವಾಚೊ ಪವಿತ್ರ್ ಸಬ್ದ್.
ಜಿಗಿಬಿಗಿ ರಾತಿಚೆಂ ದರ್ಶನ್
ಚಾ.ಫಾಚೆಂ ’ಜಿಗಿಬಿಗಿ’ ಮಂತ್ರ್ ತ್ಯಾ ಏಕ್ ಕಾಳೊಕಾಚ್ಯಾ
ರಾತಿಕ್ ಅಮರ್ ಕರುನ್ ದವರ್ತಾ. ’ಜಿಗಿಬಿಗಿ ರಾತ್’
ಮುಗ್ದನಾ. ತಿ ವಾಚ್ಪ್ಯಾ ಭಿತರ್ ಮಿಣ್ಮಿಣುನ್ ಉರ್ತಾ. ತಿ
ಆಮ್ಕಾಂ ಬದಲ್ತಾ, ನವ್ಯಾ ರಿತಿನ್ ಜಾಗೆಂ ಕರ್ತಾ. ನಾಜೂಕ್
ದೋಳೆ, ಉಗ್ತೆಂ ಕಾಳಿಜ್ ಆನಿ ಅತ್ಮ್ಯಾಚ್ಯಾ ದರ್ಶನಾಂತ್
ಪರ್ಜಳ್ಳೆಂ ಜಿವಿತಾಚೆಂ ಸತ್.
- ಆಂಡ್ರ್ಯೂ ಎಲ್ ಡಿಕುನ್ಹಾ
|
|
काव्यदर्शन - १. जिगिबिगी रातीं
काजुल्यांचें सोभाण |
ह्या अंकणाचेर
तुमची प्रतिक्रिया तुमी आमकां बरवन धाड्येता.
जोक्तीं बर्पां आमीं पयणारिचेर (उपरांत
पुसतकाचेर) पर्गटतेल्यांव.
|
|
अंकणकार: आंडऱ्यू एल. डिकुन्हा |
वृत्तेन
फैनान्सियल कन्सल्टेंट, स्वताची ’वीन-वीन
कन्सल्टेन्सी’ चलवन आसा. कवी, कथाकार, समीक्षक
आनी संपादक.
व्हळू व्हळू व्हाळ व्हाळ्या
(२००३), अंजुराचें पान (२०१३),
आयेराचो बूक
(२०१४), उज्वाडाच्ये वेंगेंत (२०२५) हाचे
कविता संग्रह. हेर कविता संकलांनी कविता तशेंच
प्रसतावनां बरयल्यांत. २००२ इस्वेंत ’कविता
व्हाळो’ नांवाचें कविता अंकण मायभास.कोमचेर
संपादकपण केलां. कविता ट्रसटाचो काऱ्यदर्शी
जावनासचो आंडऱ्यू कोंकणिंतलो उंचलो विमर्शक.
कर्नाटक कोंकणी साहित्याचो, टी.एम.ए. पै.
फौंडेशनाचो, जागतीक कोंकणी लेखक संघटनाचो,
विश्व कोंकणी केंद्रच्या विमला वी. पै.
फौंडेशनाचो पुसतक पुरसकार, संधेश पुरसकार
(कोंकणी साहित्य) हाका येदोळ लाभलले प्रमूक
पुरसकार. अपल्या कुटमासवें मंगळुरांतल्या बिजय
फिर्गजेंत वसती करून आसा. |
|
|
|
जिगिबिगी
रातीं काजुल्यांचें
सोभाण |
जिगिबिगी रातीं काजुल्यांचें सोभाण
शांत सोभीत रोमांटीक रात
सूऱ्यो
दिगंता पंदा लिप्ताना, संसार मौनांत विलीन
जाताना, अमर कवी चा.फ्रा अमकां काळोकाच्या
माटवांत काजुल्यांच्या जिवंत दिव्यांनी
सजयिल्ल्या एका संभ्रमाक अपवन व्हर्ता. काजुले
उज्वाडाची वात ’जावन’ अमकां स्वागत करुंक
राकोन रावल्यात. हो उज्वाड काजुल्यांच्या
स्वासांत व्हाळचो एक जळनातल्लो शांत पर्जळ.
तांचो उज्वाड काळोकाक धांवडायना, काळोकाक
’सोभीत’ कर्ता
ह्या काळोकांत मिणमिणच्या
मौन आंगणांत कविचे सब्द ’जिगिबिगी’ नाचतात.
’जिगिबिगी’ म्हळ्यार असतित्वाचें स्पंदन.
उज्वाड पेटता आनी लिप्ता. सत आपलें मुखमळ
दाकवंक काळोकाची रातच विंचता! पूण ह्या रातीं
सत हांगा कुडक्यांनी मात्र दर्शन दिता. खिणाक
उदेता आनी खिणाक लिप्ता. इल्लें लिपंवची,
इल्लें इल्लें दाकंवची ही एक जिगिबिगी रात. एक
शांत सोभीत रोमांटीक रात. सत आपलें मुखमळ
दाकवंक काळोकाची रातच विंचता कविता
काजुल्यांपरिंच काळोकांत सुरू जाता आनी
अत्म्याच्या उज्वाडांत संप्ता.
जिगिबिगी
रात
जिगिबिगी रात आज
काजुल्यांची वात
काजुल्यांचे
वातिंत कितलें म्हण दिसत?
काजुल्यांचे
झळकेंत फिंतशें दिसत
फिंताचे उबणेंत
केसशे सुसत
आसतले मुद्याळे,
कोंगऱ्याळे, जीरसाळे
दोळ्यांक जरी
दिसलें ना अत्म्याक दिसत
जिगिबिगी रात आज
काजुल्यांची वात
काजुल्यांचे
वातिंत कितलें म्हण दिसत?
जिगिबिगी झळमेंत
आस्डिशी दिसत
आस्डेचे उडकेंत
तोंडशें सुसत
आसतलें वाडकुळें,
माणकुलें, गुळगुळें
दोळ्यांक जरी
दिसलें ना, अत्म्याक दिसत
जिगिबिगी रात आज
काजुल्यांची वात
काजुल्यांचे
वातिंत कितलें म्हण दिसत?
चिटिपिटी चालिंत
आंगलें दिसत
आंगल्याचे मोडिंत
कूडशी सुसत
आसतली रस्माळ्या
केंळब्याची कांडिशी
दोळ्यांक जरी
दिसलें ना अत्म्याक दिसत
जिगिबिगी रात आज
काजुल्यांची वात
काजुल्यांचे
वातिंत कितलें म्हण दिसत?
अशीच सदांकाळीं
रात जर आसत
देवा धन्याक
मुगेलीं अर्गां आसात
दोळ्यांक न्हय
दिसची सोभाय आसता सोसची
दोळ्यांक जरी
दिसली ना अत्म्याक दिसत
जिगिबिगी रात आज
काजुल्यांची वात
काजुल्यांचे
वातिंत कितलें म्हण दिसत?
-चा.फ्रा.
देकोसता
कुर्पा: सोंशाचे
कान कविता पुसतक, चा.फ्रा. देकोसता
हरयेक मनीस एक काजुलो
मनश्याचे दोळे
भौतीक विज्ञानाचे क्यामरा जावन आसात. मनीस
चिंता संसार आमच्या मुखार पुर्तो सादर जाता
म्हण. ह्या सीमीत दिषटिंत एक गुपीत गर्व लिपोन
आसा. तें गर्व म्हणता "जें सगळें दिसता, तेंच
खरें." पूण चा.फ्राचो “जिगिबिगी” सब्द ह्या
गर्वाक मुळांतच हालयता. पूर्ण सत सोसचें
त्राण मनश्याच्या भौतीक दोळ्यांक ना. प्रखर
उज्वाडांत वसतू स्पषट दिसतात, पूण त्या
स्पषटतेंत वसतुंचो ’आत्मो’ लिपोन उर्ता.
चा.फ्रा सांग्ता, सत म्हळ्यार दोळ्यांक दिसचें
दृश्य न्हय, बगर अत्म्यान सोसची सोभाय
दोळ्यांक न्हय दिसची सोभाय आसता सोसची
दोळ्यांक जरी दिसली ना अत्म्याक दिसत
अत्म्याक दिसची सोभाय म्हळ्यार वसतुंक पळंवचें
न्हय, वसतुंक काळजा मनान “भेटचें”.
ह्या
संसारांतल्या ८ बिलियन मिणमिणच्या जिवितांत,
हऱ्येक मनीस स्वतः एक काजुलो, एक ल्हान,
अपूर्ण मिणमीण जो अमर सताचो एक वांटो जावन
आसा.
केत्तिकल गुड्यार काजुल्यांचें
मांड सोभाण!
महान कविंच्यो कविता
वाचब्या पयलेंच आमच्या जिवितांत घडतात. अमर
चा.फ्राची कविता वाचब्या पयलेंच माका जिगिबिगी
रातिचो अनभोग जाल्लो. केत्तिकल गुड्यार
काजुल्यांचें मांड सोभाण पळेताना. म्हज्या
अट्रा वर्सांचे प्रायेर चा.फ्रा म्हळ्ळ्या
कोंकणी प्रवाद्याचो ताळो आयकोंक वामंजूर
इगर्जे आंगणांत जाल्ल्या मांड सोभाण काऱ्याक
हाजर जाल्लों. ताचीं उत्रां अनी ताळो आयकोंचेच
एक भाग. ताचीं उत्रां एक अध्यात्मीक कंपन.
काऱ्यें संपवन तांचेलागीं एक सब्द उलवन पाटीं
म्हज्या किन्निकंबळंतल्या घरा वचोंक मेटां
काडताना त्या कुशीक वेचें बस्स मेळ्ळेंना. पूण
हांव एक्सुरों म्हण माका भोगलें ना.
चा.फ्राचीं उत्रांचो नाद म्हनांत गाजत्तालो तर
मांड सोभाणांचीं गितां काळजांत गायतालीं.
वामंजूर रसत्या च्या उज्वाडांतल्यान पाशार
जावन केत्तिकल गुड्याच्या धाट काळोकांत प्रवेश
जाताना दाव्या कुशिच्या गुड्याच्या रूक
झाडांचेर सजवन रावल्ल्या जिगी बिगी
काजुल्यांनी माका सांगात दिल्लो. म्हाका त्यो
घुडियो अजून उडास आसात ; जेदनां हांवें वयर
पळेलें, नेकेत्रां पर्जळतालीं पूण म्हजें
काळीज धर्ते वयल्या दिव्यांचेर पर्ताल्लें.
गांवच्या घरांनी पेटलले दिवे मन्नश्या संबंधान
माका ”आप्त’ जावन भोगले आनी काजुल्यांचो
पवित्र पर्जळ ’ सत’ जावन दिसलो.
असतो
मा सदगमय, तमसो मा ज्योतिर्गमय”
त्या
काळोकाच्ये वाटेंत म्हज्या भोवांरीं
काजुल्यांनी जिवंत दिव्यांचो पुर्शांव
मांडल्लो. हऱ्येका दिसा हांवें उज्वाडांत
बस्सार बसोन पळेवन विस्रोन सोडची वाट ती. पूण
त्या रातीं, दिसा उज्वाडांत लीपल्ल्या
संसाराचें सोभीत सुंदर रुपांतर म्हज्या
दोळ्यां मुखार उबें जाल्लें. चा. फ्राची
जिगिबिगी रात कविता हांवें वाचुंक नातल्ली.
पूण कन्नड साहित्य शिक्ताना वाचल्ली संसकृत
वोळ मतिंत उदेली. "असतो मा सदगमय, तमसो मा
ज्योतिर्गमय’. काळोकाच्या काळजांत आसच्या
सतांच्या त्या अनभोगांत माकाच हांव
विस्राल्लों. काजुल्याच्या उज्वाडांत थोड्याच
मेटांची वाट माका दिसताली. पूण जिविताचो
अध्यात्मीक प्रकास जियेवंक, मेटां सार्कीं
दवरुंक, तितलोच पवित्र उज्वाड गम्मत पावता
तशें भोगलें.
केत्तिकल गुड्यार सादर
जाल्लें काजुल्यांचें साहित्य अजून मज्या मना
स्क्रीनर जिगिबिगी कर्न पाशार जाता. आतां
गुड्यार काजुले नांत आसतले, पूण चा.फ्राच्या
कवितेंतले काजुले म्हज्या मनांत सदांकाळ पेटोन
आसात. जिगिबिगी रातिच्या पांग्रुणा पंदा, चा.
फ्राचे सब्द काजुल्यां बरी उडतात अनी काजुले
पासकांच्या रातिच्या वातिंपरीं काळोकांत उमे
दीवन एकामेकाचीं काळजां पेटयतात. आमी सक्कड
एकामेका कुशीक बाग्वल्लीं ’जिगिबिगी’ कणां.
त्या खाल्त्यापणांत एक नाजूक मोग जल्म घेता:
’सांगाता पर्जळचो उज्वाड’.
दिसत - सुसत- अत्म्याक दिसत
ह्या कवितेचें दर्शन तीन पांवण्यांनी उग्तें
जाता: -दिसत (दैहीक दोळ्यांक), सुसत
(कल्पनेच्या काळजाक), आनी अत्म्याक दिसत
(अत्म्याच्या दयवीकपणाक). हऱ्येक मेट
पयलेंच्या मेटाक आनिकी गूंड कर्ता, वाचप्याक
इंद्रियांच्या मिती थावन सुटवन अत्म्याच्या
अनंत दर्शना लागीं पावयता.
दैहीक दोळ्यांची दीषट (दिसत):
पयण सुरू जाता दैहीक दोळ्यांच्या सामान्य
दीषटीन पूण मोगाळ अत्रेगान. जें दिसता ताका
मात्र पार्कुंची दीषट ही. पयल्या कडव्यांत
काजुल्यांचे झळकेंत फिंतशें दिसता तर,
दूसऱ्या कडव्यांत आस्डिशी दिसता अनी तीसऱ्या
कडव्यांत आंगलें दिसता. कूडिचे दोळे उज्वाड
आनी आकार पळेवंक सक्तात, अशें पळेताना खरयान
दोळ्यांक हिशारे मात्र मेळतात, जिविताचो जिवंत
कंपन धरुंक सकनांत. आमच्या दोळ्यांचो स्वभावच
असलो- वयल्याबार पळेवन तर्क करचें, वोट्रासी
फैसल दिंवचें. हांगा “आंगलें” फकत एक वसत जावन
दिसता. पूण चा.फ्राच्या जिगिबिगी रातिंत
मनश्याचे सीमीत दोळे सलवतात. .
कल्पाना सक्तेची दीषट (सुसत)
दोळे सलवणी मांदताना कल्पना सकत जागृत
जाता. कल्पना दीषट काळोकाक सजयता. कवितेंतलो
’सुसत’ कल्पनासक्तेन सता कडेन धरल्लें एक
पवित्र जिगिबिगी पयण. कल्पना सकत अत्म्याचे
दोळे.
कविता अतां भावनात्मक
स्पर्शाक पयण कर्ता.
“फिंताचे उबणेंत
केसशे सुसत”-झळकेच्या उबणेंत सोभाय भोग्ता.
“आस्डेचे उडकेंत तोंडशें सुसत”-उडकेंत एक
गोडसाण मेळता.
“आंगल्याचे मोडिंत कूडशें
सुसत”-रोमांचन! कल्पना सक्तेक उज्वाडाची गर्ज
ना. कविच्या प्रतिभेचो उज्वाड पावता.
असतित्वाचें सत एका झळक्यांत धर्ची कला! पर्नो
अनभोग नवें रूप घेता. कविच्या सुप्त मतिंतलीं
सोभायेचीं रुपां मुद्याळे, कोंगऱ्याळे,
जीरसाळे जिवंत जातात. वाडकुळें, माणकुलें,
गुळगुळें मुखमळ दिश्टीक पडता. चा.फ्राची
रोमांटीक प्रतिभेच्या दोळ्यांक आतां चिटिपिटी
चाल दिसता. आंगल्याचे मोडिंत सत सोधताना कलफन
अनिकी फुल्ता. आंगल्याचे मोडिंत दिसची
रस्माळ्या केंळब्याची कांडिशी कूड कविच्या
अत्म्याक स्पर्श कर्ता
मोगांत अनी
भक्तिपणांत दोळ्यांक दिसनातलेल्या वसतुंक
भोगची सकत आसता. सोभाय पळेंवची वसतू न्हय; ती
अनभोगांची एक जिवी झर जाता. पूण कविता हांगाच
थांबना.
आत्म्याची दीषट
(अत्म्याक दिसत).
हऱ्येक मिणमीण एक
ध्यान. जेदना दोळे धांप्तात, तेदना मनाचो
काळोक संप्ता अनी अत्मोच दिवो जावन पर्जळता.
ही कवितेची अती उंचली स्थिती. हांगा पळेंवचो
आनी पळेंवची वसत एकवटतात. मन उज्वाडांत असताना
रात आतां आमच्या सुत्तुरांत उरना: “दोळ्यांक
जरी दिसलें ना अत्म्याक दिसत. कविचे सब्द
उज्वाड जातात. ह्या उन्नत दर्शनांत आमी आमकांच
संसार जावन वोळकतांव.
काळोकाच्या गर्भांत धना देवाक अर्गां
कवितेचीं निमाणी साक्स व्हरती नाजूक आसा:
“अशीच सदांकाळीं रात जर आसत / देवा धन्याक
मुगेलीं अर्गां आसात”. "अशीच सदांकाळीं रात जर
आसत" म्हण कवी म्हणताना, तो दीस नाका म्हण
सांगना; बगर तो त्या काळोकाच्या गर्भांत
आसच्या सताचो अनी सोभायेचो मोग कर्ता.
काळोकाच्या गर्भांत देवाचो स्वास भोगचेंच
’अर्गां’. कविता उज्वाडाच्या गर्जेन मुगदना,
अर्गांच्या समर्पणांत पेटता!
त्या
वेळीं कवितेंतली अंतीम शिकोवण मेळता:
“दोळ्यांक न्हय दिसची सोभाय आसता सोसची”.
जेदाना आमी सताच्या ’जिगिबिगी’ प्रकासाक
पळेतांव, तेदाना दोळे आपापिंच बंद जातात. खरी
सोभाय आमच्या ताब्यांत आसना, बगर आमी त्या
सोभायेच्या ताब्यांत आसतांव. ती सोभाय अमच्या
इंद्रियांक अटापुंक जायनातल्ली. मीतमेर
नातल्ली. असल्या सोभायेक ’सोसचें’ आत्म्याक
मात्र साध्य म्हन्स्याचो संतोस मात्र न्हय,
दूक सयत ह्या घड्ये एक सुंदर कविता जावन
बदल्ता. एक कवी जावन हांवेम सांगचें तर, कविता
जल्मोंची घडी हिच्च!
संसार एक
जिवी जिवी कविता!
सोभायेचो
अंतीम उद्देश मनश्याक मनश्या कडेन आनी मनश्याक
सृश्टी कडेन मोगाच्या बांधान एकवटचो. मोग
दिसना, सोसणिकाय मेजुंक जायना, आनी त्याग
फोटोंत येना. हऱ्येक मनीस आपल्या भितर साहित्य
घेवन जियेता, पूण संसाराच्या गलाट्यांत सदां
प्रकट जायना. एक्ये मौन घड्ये जेदनां तें
’जिगिबिगी’ पेटता, तेदनांच दूसऱ्या अत्म्याक
ताची वोळक मेळता, काळोकांतल्या जिगिबिगिंत
चिटिपिटी चालिची “रस्माळी” जिणी झळकता. हऱ्येक
मनश्याचो हो जिगिबिगी उज्वाड अखंड सताच्या
कोलाज्याचो एक गर्जेचो वांटो. संसारांतले ८
बिलियन अत्मे ह्या ’काजुल्याच्या साहित्यांत’
एकाच महाकाव्याचीं अक्षरां जावन एकवटताना
संसार एक जिवंत कविता’ जाता. हांगा हऱ्येकलो
मनीस आपल्या असतित्वाचो पवित्र सब्द.
जिगिबिगी रातिचें दर्शन
चा.फाचें ’जिगिबिगी’ मंत्र त्या एक
काळोकाच्या रातीक अमर करून दवर्ता. ’जिगिबिगी
रात’ मुगदना. ती वाचप्या भितर मिणमिणून उर्ता.
ती आमकां बदल्ता, नव्या रितीन जागें करता.
नाजूक दोळे, उग्तें काळीज आनी अत्म्याच्या
दर्शनांत पर्जळ्ळें जिविताचें सत.
- आंडऱ्यू एल डिकुन्हा |
|
|
|
|
|
|
|
 |
|
ದಾಯ್ಜ್.ಕೊಮ್ |
|
2004 ಥಾವ್ನ್
2011 ಪರ್ಯಾಂತ್ ಕಾರ್ಯಾಳ್ ಆಸ್ಲ್ಲ್ಯಾ
ದಾಯ್ಜ್.ಕೊಮ್ ಚೆರ್
ಪರ್ಗಟ್ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ
ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್
ಲಾಭಯ್ತೆಲ್ಯಾಂವ್. | |
| |
 |
| ಆಶಾವಾದಿ
ಪ್ರಕಾಶನ್ |
|
|
| ಆಶಾವಾದಿ
ಪ್ರಕಾಶನ್ |
 | |
| |
