|
(15-02-1945 - 21-07-2025)
ಏಕ್ ಪಾವ್ಟಿಂ ಎಕಾ ಫೊಟೊಗ್ರಾಫರಾಚ್ಯಾ ಪನ್ನಾಸಾವ್ಯಾ
ವರ್ಸುಗೆಚ್ಯಾ ಸಂಭ್ರಮಾರ್, ಮೀಡಿಯಾಚ್ಯಾ ಎಕ್ಲ್ಯಾನ್ ತಾಕಾ
ಸವಾಲ್ ಕೆಲೆಂ;
"ಪನ್ನಾಸ್ ವರ್ಸಾಂ ಥಾವ್ನ್ ಫೊಟೊ
ಸ್ಟುಡಿಯೊಂತ್ ತುವೆಂ ಕಾಮ್ ಕೆಲಾಂಯ್, ತುಜ್ಯಾ ಪಸಂದೆಚೊ
ಫೊಟೊ ಖಂಚೊ ಮ್ಹಣ್ ಸಾಂಗ್ಯೆತ್?"
ಏಕ್ ಘಡಿ
ಚಿಂತುನ್ ತ್ಯಾ ಫೊಟೊಗ್ರಾಫರಾನ್ ಜಾಪ್ ದಿಲಿ;
"ಮ್ಹಜ್ಯಾ ಪಸಂದೆಚೊ ಏಕ್ ಫೊಟೊಯೀ ಹಾಂವೆಂ ಅಜೂನ್ ಕಾಡುಂಕ್
ನಾ"
ಮೀಡಿಯಾಚೊ ಪರತ್ ವಿಚಾರಿ; "ತರ್ ತುಜಿ ಪಸಂದ್
ಕಸಲಿ ಮ್ಹಣುನ್ ಸಾಂಗ್ಶಿ?"
ಜಾಪ್ ದೀವ್ನ್ ತೊ
ಫೊಟೊಗ್ರಾಫರ್ ಮ್ಹಣಾಲೊ; "ಅಜೀಕ್ ಪನ್ನಾಸ್ ವರ್ಸಾಂ-ಧಿಂ
ಹೊ ಫೊಟೊ ಸ್ಟುಡಿಯೊ ಸುರು ಕರ್ತಾನಾ ಹಾಂವೆಂ ಏಕ್ ಬೋರ್ಡ್
ಲಾಯಿಲ್ಲೊ; ಹಾಂಗಾಸರ್ ದೋನ್ ಪ್ರಕಾರಾಂಚೆ ಫೊಟೊ
ಮೆಳ್ತಾತ್;
ಪಯ್ಲೊ: ಆಸ್ಚೊ ಆಸಾ ತಸೊ ದಿಸ್ಚೊ ಫೊಟೊ -
ಫಕತ್ ಧಾ ರುಪ್ಯಾಂಚೊ.
ದುಸ್ರೊ: ಪಳೆಂವ್ಕ್
ಸೊಭಿತ್/ಆಕರ್ಷಕ್ ದಿಸ್ಚೊ (ಕೃತಕ್/ಬನಾವಟಿ) - ಫಕತ್ ವೀಸ್
ರುಪ್ಯಾಂಚೊ.
ಪುಣ್ ಹ್ಯಾ ಪನ್ನಾಸ್ ವರ್ಸಾಂನಿ ಹ್ಯಾ
ಸ್ಟುಡಿಯೊಂತ್ ಯೇವ್ನ್ ಫೊಟೊ ಕಾಡಯ್ಲೆಲ್ಯಾ ಸರ್ವಾಂನಿ
ಪಸಂದ್ ಕೆಲ್ಲೊ; ದುಸ್ರೊ ಪ್ರಕಾರ್ ಶಿವಾಯ್ ಎಕ್ಲ್ಯಾನ್
ಲೆಗುನ್ ಪಯ್ಲೊ ಪ್ರಕಾರ್ ವಿಂಚ್ಲೊನಾ. ಮ್ಹಾಕಾ ಪಯ್ಲೊ
ಪ್ರಕಾರ್ ಪಸಂದೆಚೊ.
ಹಿ ಕಾಣಿ ಹ್ಯಾ ಮ್ಹಜ್ಯಾ
ಬರ್ಪಾಕ್ ತಾಳ್ ಪಡ್ತಾ. ಆಯ್ಚೊ ಸಂಸಾರ್, ಆಮ್ಚಿ ಸಮಾಜ್,
ಆಮ್ಕಾಂಚ್ ಆಮಿ ಬಾರ್ಕಾಯೆನ್ ಪಳೆಲೆಂ ತರ್ ಆಮಿಂ
ಜಿಯೆಂವ್ಚೊ ಸಂಸಾರ್ ಸಯ್ತ್ ದುಸ್ರ್ಯಾ ಪ್ರಕಾರಾಚೊ.
ದೆಕುನ್ ಆಮ್ಕಾಂ ಪಾಳುಂಕ್ ಏಕ್ ಜಿಣಿ ಆನಿ ದಾಕಂವ್ಕ್
ಅನ್ಯೇಕ್ ಜಿಣಿ. ಆಮಿ ಪಾಳ್ಚಿ ಜಿಣಿ ಕಿತ್ಲಿಯ್ ಮ್ಹೆಳಿ
ಆಸುಂ, ಬುರ್ಶಿ ಆಸುಂ, ಖೊಟಿ ಆಸುಂ ಪುಣ್ ಆಮ್ಚಿ ದಾಕಂವ್ಚಿ
ಜಿಣಿ ಭಾಗೆವಂತ್, ಆದರ್ಶ್, ಆನಿ ಆಕರ್ಶಕ್. ದೆಕುನ್
ಜಾವ್ಯೆತ್ ಆಮ್ಚೆಚ್ ಪಯ್ಕಿಂತ್ಲೆ ಅಸಲ್ಯಾಚ್ ದಾಕವ್ಪಾಚೆ,
ಆಕರ್ಷಕ್ ದಿಸ್ಚೆ, ಮಂತನಾಚೆ ಆಮ್ಚೆ ಲಾಗ್ಶಿಲೆ ಮ್ಹಣುನ್
ಆಮಿಂ ಗಾಜಂವ್ಕ್ ಪೆಚಾಡ್ತಾಂವ್, ತಾಂಚೆಸವೆಂ ಸೆಲ್ಫಿ
ಕಾಡ್ತಾಂವ್. ಆಮ್ಚ್ಯಾ ಸೋಶಿಯಲ್ ಮೀಡಿಯಾಂನಿ ತಾಂಚಿಚ್
ತಸ್ವೀರ್ ಘಾಲ್ನ್ ಆಮ್ಕಾಂಚ್ ಆಮಿ ತಾಂಚೆ ಬರಾಬರ್
ಮೆಜ್ತಾಂವ್. ಪುಣ್ ಆಮ್ಚೆಚ್ ಪಯ್ಕಿಂತ್ಲೊ ಎಕ್ಲೊ ಪಡ್ಲೊ
ತರ್, ಅಸ್ಕತ್, ಗರೀಬ್, ಸಾದೊ ದಿಸ್ಲೊ ತರ್ ತಸಲ್ಯಾಂಕ್
ಮೆಳ್ಚೆಂ ಸೊಡ್, ತಾಂಚಿ ಒಳೊಕ್ಚ್ ನಾತ್ಲೆಪರಿಂ
ಕರ್ತಾಂವ್.
ಸಾಹಿತಿಕ್ ಸ್ಥರಾಂತ್ ’ನಿಸ್ವಾರ್ಥಿ’
ಮ್ಹಳ್ಳ್ಯಾ ಸಬ್ಧಾಕ್ ಕಾಂಯ್ ಮಹತ್ವ್ ಆಸಾಕಾಯ್? ಕಿತ್ಯಾಕ್
ಮ್ಹಳ್ಯಾರ್ ’ಫುಲ್/ಫಳ್’ ದಿಂವ್ಚೆಂ ಏಕ್ ಝಡ್ ಸಯ್ತ್
ಅಪ್ಲ್ಯಾಚ್ ಫಾಯ್ದ್ಯಾಕ್ ತೆಂ ದಿತಾ ಮ್ಹಳ್ಳೆಂ ನಿರ್ಣಾಯಕ್
(Judgemental) ಚಿಂತ್ಪಾಂತ್ ಭರೊನ್ ಗೆಲ್ಲ್ಯಾ
ಅಭಿಪ್ರಾಯ್ವಾದಿ (Opinionistic) ಸಮಾಜೆಂತ್
ಗ್ಲೇಡಿಸ್ ರೇಗೊ ತಸಲ್ಯಾಂನಿ ಜಲ್ಮ್ ಘೆಂವ್ಚೆಂಚ್ ಏಕ್
ಗುನ್ಯಾಂವ್ಕಾರಿ ಘಟನ್ ಮ್ಹಣ್ಚ್ಯಾಂತ್ ಚೂಕ್ ಜಾಂವ್ಚಿನಾ.
ಸಂಸಾರಾಂತ್ ಜೆರಾಲ್ ರಿತಿನ್ ಸಾಂಗ್ಚೆಂ ತರ್
’ಜಲ್ಮ್, ಜಿವಿತ್ ಆನಿ ಮರಣ್’ ಹಿಂ ತೀನ್ ಹಂತಾಂ ಸರ್ವ್
ಜೀವಿಂಕ್ ಲಾಗು ಜಾತಾ. ಕಿತೆಂಚ್ ಥಿರ್/ಶಾಶ್ವತ್ ಮ್ಹಳ್ಳೆಂ
ನಾ, ಕೊಣಾಕ್ ಪಯ್ಲೆಂ ವಚೊಂಕ್ ಆಸಾ ಆನಿ ಕೊಣಾಕ್ ತಡವ್
ಕರುನ್ ಪುಣ್ ಆಯಿಲ್ಲ್ಯಾಕ್ ವಚೊಂಕ್ ಆಸಾ; ಜಾಂವ್ಕ್ ಪುರೊ
ಪಾಟಿಂ ಫುಡೆಂ. ಹ್ಯಾ ತೀನ್ ಹಂತಾಂಪಯ್ಕಿಂತ್ ಖಂಚ್ಯಾಯ್
ಹಂತಾಚೆರ್ ಕೊಣಾಯ್ಕ್ಯೀ ನಿಯಂತ್ರಣ್ ಆಸುಂಕ್ ಅಸಾಧ್ಯ್;
ಜಾಂವ್ ತೊ ರಾಯಾಳ್ ಕುಳಿಯೆಚೊ ವಾ ಗರೀಬಾಂತ್ಲ್ಯಾ
ಗರೀಬಾಂತ್ಲೊ ಪುಣ್ ಜಲ್ಮ್ ಜಾಂವ್ ಮರಣ್ ತಶೆಂಚ್ ಜಿವಿತಾಚಿ
ವಾಟ್ ಜಾಂವ್, ಕೊನಾಯ್ಚ್ಯಾಯ್ ನಿಯಂತ್ರಾಣಾಂತ್ ನಾ.
ಚ್ಯಾರ್ ದಿಸಾಂಚ್ಯಾ ಹ್ಯಾ ಜಿವಿತಾಂತ್ ಎಕೆಕ್ಲ್ಯಾಕ್
ಎಕೆಕ್ ಶೆವೊಟ್ ಆನಿ ಇರಾದೊ. ಕೊಣಾಕ್ ದುಡು ಕಮಾಂವ್ಚೊಚ್
ಶೆವೊಟ್ ತರ್ ಆನಿ ಕೊಣಾಕ್ ನಾಂವ್ ಕಮಾಂವ್ಚೊಚ್ ಇರಾದೊ ತರ್
ಆನಿ ಕೊಣಾಕ್ ಪುಂಜಾಂವ್ಚೊ; ಆಸ್ತ್-ಬದಿಕ್, ಗಾಡಿ-ಬಂಗ್ಲೊ,
ಭಾಂಗಾರ್-ಶೃಂಗಾರ್; ಪುಣ್ ಹೆಂ ಕಿತೆಂಚ್ ಸ್ಥಿರ್/ಶಾಶ್ವತ್
ನ್ಹಯ್, ಹೆಂ ಸೊಪೆಂ ತತ್ವ್ ಸರ್ವಾಂಕ್ ಸಮ್ಜತಾ ತರ್ಯೀ ಹಿ
ಧಾಂವ್ಣಿ, ಆನಿ ಪಡ್ಣೆ/ಉಡ್ಣೆಂತ್ ಖರ್ಶೆವ್ಣಿ ಕಿತ್ಯಾಕ್?
ಹೆಂ ಮಾತ್ರ್ ಅಧುರೆಂ ಸವಾಲ್. ಪುಣ್ ಹ್ಯಾ ಪಯ್ಕಿಂತ್
ಕಾಂಯ್ ಏಕ್-ದೊಗಾಂ ಅಥ್ವೆ ಚಿಂತ್ಪಾಚಿಂ ಜಲ್ಮೊನ್ ಯೆತಾತ್.
ತಿಂ ಚಿಂತಾತ್ ಹೆರಾಂವಿಶಿಂ, ತಾಂಚೆಂ ಜಿವಿತ್ ಸಮರ್ಪಿತಾತ್
ಹೆರಾಂ ಪಾಸತ್. ಆಪ್ಲ್ಯಾ ಜಿವಿತಾ ಆವ್ದೆಂತ್ ಕಿತೆಂ
ತರ್ಯೀ ಹೆರಾಂ ಪಾಸತ್ ಕರುನ್ ವೆತಾತ್. ಫಕತ್ ದಿವುನ್
ವೆತಾತ್ ಶಿವಾಯ್ ಕಿತೆಂಚ್ ಪಾಟಿಂ ಅಪೇಕ್ಶಾ ಕರಿನಾಂತ್.
ಹ್ಯಾ ಸಂಸಾರಾಚೆಂ ’ದಿಂವ್ಚೆಂ-ಘೆಂವ್ಚೆಂ ಲೇಕ್’ ತಾಂಚ್ಯಾ
ಮತಿಕ್ ಸಮ್ಜನಾತ್ಲೆಂ ಲಿಸಾಂವ್.
ಬಾಯ್ ಗ್ಲೇಡಿಸ್
ರೇಗೊಚೆಂ ನಾಂವ್ ಹಾಂವೆಂ ಕೊಂಕಣಿ ನೆಮಾಳ್ಯಾಂನಿ ವಾಚ್ತಾನಾ
ತಿ ಪಯ್ಶಿಲ್ಯಾ ಅಮೆರಿಕಾಂತ್ ಕಾಮ್ ಕರ್ನ್ ಆಸ್ಲಿ. ತಿಚಿಂ
ಬರ್ಪಾಂ; ಕಥಾ, ಕವಿತಾ, ಲೇಖನಾಂ ತಶೆಂಚ್ ಅಭಿಪ್ರಾಯ್ ತವಳ್
ತವಳ್ ನೇಮಾಳ್ಯಾಂನಿ ಪರ್ಗಟೊನ್ ಯೆತಾಲೆಂ. ತಿ ಚಡಿತ್
ಶಿಕ್ಪಿ ನ್ಹಯ್ ಪುಣ್ ಜಿಣ್ಯೆಂತ್ ಆಪ್ಣಾಯಿಲ್ಲ್ಯಾ
ಅನ್ಭೋಗಾಂಕ್ ಲಾಗ್ಶಿಲ್ಯಾನ್ ಸಮ್ಜೊನ್ ಅಪ್ಲ್ಯಾ
ಲಿಖ್ಣೆಂತ್ ಅಭಿವ್ಯಕ್ತ್ ಕರ್ನ್ ಆಸ್ಲಿ. ಅಶೆಂ ಖೊಲಾಯೆನ್
ಪಳೆಲ್ಯಾರ್ ಶಿಕಪ್ ಮ್ಹಳ್ಯಾರ್ ಕಿತೆಂ?
’ಕೊಲೆಜ್/ಯುನಿವರ್ಸಿಟಿಂನಿ ವೆಚೆಂ, ವರ್ಸಾಂ ಖರ್ಚುಂಚಿಂ,
ಆನಿ ಡಿಗ್ರಿ ಮ್ಹಳ್ಳೆಂ ಏಕ್ ಕಾಗದ್ ಜೊಡ್ಚೆಂ ಮಾತ್ರ್?’,
ಖರೆಂ ಶಿಕಪ್ ಮ್ಹಳ್ಯಾರ್ ಅಪ್ಲ್ಯಾ ಜಿಣ್ಯೆಂತ್ ಆಮಿ
ಕಿತ್ಲಿಂ ಬರಿಂ ಆನಿ ಹೆರಾಂಚಿ ಸಹಾನುಭೂತೆನ್ ಮನ್ಶಾಪಣಾಚೆಂ
ಜಿವಿತ್ ಜಿಯೆತಾಂವ್ ಮ್ಹಳ್ಳೆಂ. ಪುಣ್ ಸಂಸಾರಾಚೆಂ ವ್ಹಡ್
ವಿಪರ್ಯಾಸ್ ಮ್ಹಳ್ಯಾರ್ ’ಶಿಕಪ್ ಮ್ಹಳ್ಯಾರ್ ದುಡು
ಕಮಾಂವ್ಚಿ ವಾಟ್’ ಜಾಲ್ಯಾ. ದೆಕುನ್ ಕಮಾಂವ್ಚಿ ವಾಟ್
ಕಸ್ಲೀಯ್ ಜಾಂವ್, ಪುಣ್ ತ್ಯಾ ವಾಟೆರ್ ಧಾಂವ್ಣಿ ಕರ್ಚಿ.
ಸಮಾಜೆಂತ್ ಸ್ಥಾನ್-ಮಾನ್ ಮೆಳ್ಚೊ ಸೌಯ್ ಕಿತ್ಲೊ ದುಡು
ಆಸಾ, ಕಿತ್ಲಿ ಆಸ್ತ್ ಆಸಾ, ನ್ಹೆಸಪ್-ಅಂತಸ್ತ್ ಪಳೆವ್ನ್
ಶಿವಾಯ್ ಎಕ್ಲ್ಯಾಥಂಯ್ ಆಸ್ಚ್ಯಾ ಜಾಣ್ವಾಯ್-ಮನ್ಶಾಮೊಲಾಂಕ್
ನ್ಹಯ್. ಹ್ಯೇ ದಿಶೆನ್ ಪಳೆಲ್ಯಾರ್ ಕೊಂಕಣಿಂತ್ ಮ್ಹಾಕಾ ಜೆ
ಕೊಣ್ ’ಶಿಕ್ಪಿ ವರ್ಗಾಚೆ" ಬರವ್ಪಿ ಆಸಾತ್, ತಾಂಚ್ಯಾಕೀ
ಶೆಂಬೊರ್ ವಾಂಟ್ಯಾಂನಿ ಬಾಯ್ ಗ್ಲೇಡಿಸ್ ರೇಗೊ ತಸಲಿಂ
ಆಂವಡ್ತಾತ್.
ಅಮೆರಿಕಾಂತ್ ಕಾಮ್ ಕರ್ನ್ ಆಸ್ಚೆ
ಪಯ್ಲೆಂ ತಿಣೆಂ ಬೊಂಬೊಂಯ್ತ್, ಕುವೆಯ್ಟಾಂತ್ ಕಾಮ್ ಕೆಲಾಂ.
ತಿಣೆಂ ಕಾಮ್ ಕರ್ನ್ ಆಸ್ಲೆಲ್ಯಾ ಸರ್ವ್ ಪ್ರದೇಶಾಂನಿ
ತಿಣೆಂ ಚಡ್ ಆನಿ ಚಡ್ ಮೋಗ್ ಕೆಲ್ಲೊ ಜಾವ್ನಾಸಾ ’ಕೊಂಕಣಿ
ವಾವ್ರಾಚೊ’. ಚ್ಯಾರ್ ಗಾಂವಾಂನಿ ಭಂವ್ಲ್ಲಿ ತಿ,
ಬಾಂಯ್ತ್ಲ್ಯಾ ಮಾಣ್ಕ್ಯಾಚೆಂ ಚಿಂತಪ್ ತಿಚೆಂ ನ್ಹಯ್.
ಕೊಂಕಣಿ ಪುಸ್ತಕಾಂ, ಕೊಂಕಣಿ ಸಂಗೀತ್ ಕೆಸೆಟ್ಯೊ/ಕೊವ್ಳ್ಯೊ
(ಸಿಡಿ) ಘೆವ್ನ್ ಲೊಕಾಂಲಾಗಿಂ ವೆತಾಲಿ. ಗಲ್ಫಾಂತ್ ಕಾಮ್
ಕೆಲ್ಲ್ಯಾಂಕ್ ಕಳಿತ್ ಆಸಾ; ಓಫಿಸಾಂನಿ ಕಾಮ್
ಕರ್ತೆಲ್ಯಾಂಕ್ ಚಡ್ ಕರುನ್ ಸುಕ್ರಾರಾ ರಜಾ ಮೆಳ್ತಾ ತರ್
ಘರ್-ಕಾಮಾಚ್ಯಾಂಕ್ ಫಕತ್ ಆಯ್ತಾರಾ ಅರ್ದೊ ದೀಸ್ ರಜಾ
ಮೆಳ್ತಾ. ಆನಿ ಹ್ಯಾ ಅರ್ಧ್ಯಾ ದಿಸಾ ಸಗ್ಳಿಂ ಇಗರ್ಜೆಕ್
ಯೇವ್ನ್ ಮೀಸ್ ಆಯ್ಕತಾಲಿಂ. ಮೀಸ್ ಸಂಪ್ತಚ್ ಗಾಂವ್ಚ್ಯಾ
ಹೆರ್ ಭಾವ್-ಭಯ್ಣಿಂಕ್, ಸಯ್ರ್ಯಾಂಕ್ ಮೆಳ್ಚೊ ಸಂಧರ್ಭ್.
ಹ್ಯಾ ಥೊಡ್ಯಾ ವೊರಾಂನಿ ಕೊಣೆಂ ಗಾಂವಾಥಾವ್ನ್ ಹಾಡ್ಲ್ಲಿಂ
ಕಾಗ್ದಾಂ, ಪುಸ್ತಕಾಂ, ವಾ ವಸ್ತು ಎಕಾಮೆಕಾ ವಾಂಟ್ಚೆಂ
ಜಾಂವ್, ವಾ ಎಕ್ಲೊ ಗಾಂವಾಕ್ ವೆಚೊ ಆಸಾ ತರ್ ತಾಚೆಲಾಗಿಂ
ಕಾಗ್ದಾಂ, ವಸ್ತು ದೀವ್ನ್ ಧಾಡ್ಚೆಂ ಸದಾಂಚೆಂ. ತಾಚೆಸವೆಂ
ಗಾಂವ್ಚಿ ಖಬರ್ ಎಕಾಮೆಕಾ ಉಲಂವ್ಚಿ ರಿವಾಜ್ ಆಸ್ಲಿ.
ಚಡ್ತಾವ್ ಜಾವ್ನ್ ಲೋಕ್ ಇಗರ್ಜೆಲಾಗ್ಶಿಲ್ಯಾ ಎಕಾಚ್
ಜಾಗ್ಯಾರ್ ಜಮ್ತಾಲಿಂ; ಜಾಂವ್ ಮಂಗ್ಳುರ್ಕಾರ್,
ಗೊಂಯ್ಕಾರ್, ವಾ ಹೆರಾಂ.. ಕಾಂಯ್ ಹಜಾರ್-ಹಜಾರಾಂನಿ ಲೋಕ್
ಜಮ್ತಾಲೊ. ಬಾಯ್ ಗ್ಲೇಡಿಸ್ ರೇಗೊ ಹ್ಯಾ ಲೊಕಾಂಲಾಗಿಂ
ವಚೊನ್ ಕೊಂಕಣಿ ಪುಸ್ತಕಾಂ, ಕೊಂಕಣಿ ಸಂಗೀತ್
ಕೆಸೆಟ್ಯೊ/ಕೊವ್ಳ್ಯೊ ಪಾವಯ್ತಾಲಿ. ಪರ್ಗಾಂವಾಂತ್ ಕೊಂಕಣಿ
ಮೋಗ್ ಅಜೂನ್ ಜಿವಾಳ್ ಆಸಾ ದೆಕುನ್ ಪರ್ಗಾಂವಾಂತ್ ಕಾಮ್
ಕರ್ನ್ ಆಸ್ಚಿಂ ಜಾಯ್ತಿಂ (ಚಡ್ತಾವ್ ಜಾವ್ನ್
ಘರ್-ಕಾಮಾಚಿಂ) ಕೊಂಕಣಿ ನೆಮಾಳಿಂ, ಕೊಂಕಣಿ ಪುಸ್ತಕಾಂ
ಮೊಲಾಕ್ ಘೆಂವ್ಕ್ ಸೊಧುನ್ ವೆತಾತ್. ಎಕಾಮೆಕಾ ಸುಕ್-ದುಕ್
ವಾಂಟುನ್ ಘೆಂವ್ಕ್ ಮೆಳ್ಚಿಂ ಥೊಡಿಂ ವೊರಾಂ ಸಂಪವ್ನ್
ಧರ್ತೆಚೆರ್ ಕಾಳೊಕ್ ಪಡ್ತಚ್ ಸಗ್ಳಿಂ ಆಪಾಪ್ಲ್ಯಾ ಕಾಮ್
ಕರ್ನ್ ಆಸ್ಚ್ಯಾ ಘರಾಕ್ ಪಾಟಿಂ ವೆತಾಲಿಂ.
2020
ಇಸ್ವೆಂತ್ ಕುವೆಯ್ಟಾಕ್ ಪಾವ್ಲ್ಲ್ಯಾ ಹಾಂವೆಂ 2004
ಇಸ್ವೆಂತ್ ಮ್ಹಜೆ ತಸಲ್ಯಾ ಥೊಡ್ಯಾಂಕ್ ಘೆವ್ನ್ ’ಕೊಂಕಣಿ
ಅಭಿಯಾನ್ ಸಮಿತಿ’ ಘಡ್ಲಿ. ಹಾಚೊ ಪ್ರಮುಕ್
ಇರಾದೊ ಜಾವ್ನಾಸ್ಲೊ, ಕೊಂಕಣಿ ನೆಮಾಳ್ಯಾಂಕ್ ವರ್ಗಣ್ದಾರ್
ಚಡಂವ್ಚೊ. ಹ್ಯಾ ಪಾಸತ್ ಥೊಡ್ಯಾಚ್ ತೆಂಪಾನ್ ಪಾಂ-ಪಾಂಚ್
ವರ್ಸಾಚ್ಯೊ ಕಾಂಯ್ ದೊನ್ಶಿಂ-ತಿನ್ಶಿಂ ವರ್ಗಣ್ಯೊ
ಜಮಯ್ಲ್ಯೊ. ಚಡ್ತಾವ್ ಗಾಂವ್ಚ್ಯೊ ವರ್ಗಣ್ಯೊ. ಹೆಂ ಎಕಾ
ನಿರ್ದಿಶ್ಟ್ ಕಾಳಾಂತ್ ಚಲ್ಚೆಂ ವೆವಸ್ತಿತ್ ಕಾಮ್. ದೆಕುನ್
ಆಮಿಂ ಒಳೊಕ್ ಆಸ್ಚ್ಯಾಂಕ್ ಮೆಳೊನ್ ತಾಂಚ್ಯಾ ಘರಾ ವಚೊನ್
ಹ್ಯೊ ವರ್ಗಣ್ಯೊ ಎಕ್ಟಾಂಯ್ಲ್ಯೊ. ಹೆಚ್ ಸಂಧರ್ಭಾರ್
ಗ್ಲೇಡಿಸ್ ರೇಗೊಚೊ ಉಡಾಸ್ ಲೊಕಾಂನಿ ಕಾಡ್ನ್, ತಿಣೆಂ
ಕರ್ನ್ ಆಸ್ಲ್ಯಾ ಕೊಂಕಣಿ ವಾವ್ರಾಚಿ ಥೊಕ್ಣಾಯ್ ಕೆಲ್ಲಿ.
ಪುಣ್ ವಿಜ್ಮಿತ್ಕಾಯೆಚಿ ಗಜಾಲ್ ಮ್ಹಳ್ಯಾರ್ ಹಿಚ್ಯಾ
ವಾವ್ರಾಚೆರ್ ಚಿಲ್ಲರ್ ಉಲಂವ್ಚಿಂಯ್ ಆಸ್ಲಿಂ. ’ತಿಣೆಂ
ಕೆಲ್ಲೊ ವಾವ್ರ್ ಮಹಾನ್ ನ್ಹಯ್, ತಿಂ ಪುಸ್ತಕಾಂ,
ಕೆಸೆಟ್ಯೊ ವಿಕುನ್ ದುಡು ಕಮಾಯ್ತಾಲಿ’. ಹಾಂಗಾಸರ್ ವಿಶೇಸ್
ಖಂಯ್ಚೆಂ ಮ್ಹಳ್ಯಾರ್ ಹೆಂ ಆಲ್ಬೆಂ ಉತರ್ ನ್ಹಯ್, ಬಗಾರ್
ಹೆಂ ಉಚಾರ್ ಕೆಲ್ಲಿಂ ಚಡ್ತಾವಾಂ ’ಕೊಂಕಣಿ ಬರವ್ಪಿ’
ವರ್ಗಾಂತ್ಲಿಂ. ಹ್ಯಾ ಅಶೀರ್ ಚಿಂತ್ಪಾಚ್ಯಾ ’ಬರವ್ಪಿ’
ವರ್ಗಾಂತ್ಲ್ಯಾ ಬಾಂಯ್ತ್ಲ್ಲ್ಯಾ ಮಾಣ್ಕ್ಯಾಂಚ್ಯಾ
ಚಿಂತ್ಪಾಂತ್ ಭರೊನ್ ಗೆಲ್ಲ್ಯಾಂಚ್ಯಾ ಮಧೆಂ ನಿರಂತರ್
ವಾವ್ರ್ ಕರ್ನ್ ಥಕ್ಲ್ಲಿ ಬಾಯ್ ಗ್ಲೇಡಿಸ್ ರೇಗೊ ಜುಲಾಯ್
21 ತಾರಿಕೆರ್ ಹೊ ಸಂಸಾರ್ ಸಾಂಡುನ್ ಗೆಲಿ. ತಿಚ್ಯಾ
ವಾವ್ರಾಚಿ ಮೊಟ್ವಿ ಝಳಕ್ ದಿಂವ್ಚೆಂ ಪಾಸತ್ ಹೆಂ ಬರವ್ಪ್.
(ಕುವೇಯ್ಟಾಂತ್ ಹಾಂವ್
ಕಾಮ್ ಕರ್ನ್ ಆಸ್ತಾನಾ ರಜೆರ್ ಆಯಿಲ್ಲ್ಯೆವೆಳಾರ್ ಬಾಯ್
ಗ್ಲೇಡಿಸ್ ರೇಗೊಸವೆಂ ಕಾಡ್ಲ್ಲಿ ತಸ್ವೀರ್)
ಬಾಯ್ ಗ್ಲೇಡಿಸ್ ರೇಗೊನ್ ಕಾಮ್ ಕರ್ನ್ ಆಸ್ಲೆವೆಳಾರ್
ಚಡುಣೆಂ ಸರ್ವ್ ಕೊಂಕಣಿ ನೆಮಾಳ್ಯಾಂಕ್ ತಿಣೆಂ ಸಾಹಿತಿಕ್
ಸೆವಾ ತಶೆಂಚ್ ಆರ್ಥಿಕ್ ರಿತಿನ್ ಸಯ್ತ್ ಕುಮೊಕ್ ಕೆಲ್ಯಾ.
ತಿಚ್ಯಾಚ್ ಮಜತೆನ್ ನೆಮಾಳ್ಯಾಂನಿ ಸಾಹಿತಿಕ್ ಸ್ಪರ್ದೆ
ಚಲವ್ನ್ ವೆಲ್ಯಾತ್. ಸಭಾರ್ ಬರವ್ಪ್ಯಾಂನಿ, ಥೊಡ್ಯಾ
ಪ್ರಕಾಶಕಾಂನಿ ಸಯ್ತ್ ಅಪ್ಲಿಂ ಪುಸ್ತಕಾಂ ಪರ್ಗಟುಂಕ್
ತಿಣೆಂಚ್ ಆರ್ಥಿಕ್ ಕುಮೊಕ್ ದಿಲ್ಯಾ. ಜೊಡುನ್ ಅಪ್ಲ್ಯಾ
ಭುರ್ಗ್ಯಾಂಕ್ ದಿಲ್ಲ್ಯಾ ತಿಣೆಂ ಅಪ್ಣಾಖಾತಿರ್ ಮ್ಹಣುನ್
ಕಿತೆಂಚ್ ಪುಂಜಾವ್ನ್ ದವರುಂಕ್ ನಾ. ಉಪ್ರಾಂತ್
ತಿಚೆಥಾವ್ನ್ ಆರ್ಥಿಕ್ ಕುಮೊಕ್ ಘೆತ್ಲೆಲ್ಯಾಂನಿ ಸಯ್ತ್
ತಿಕಾ ಒಳ್ಕೊಂಚೆಂ ರಾವಯ್ಲೆಂ ಮ್ಹಳ್ಳೆಂ ಅಡ್ಹೂಕ್ ಸತ್
ಥೊಡ್ಯಾಂಕ್ ತರ್ಯೀ ಕಳಿತ್ ಆಸಾ.
೨೦೧೩ ಇಸ್ವೆಂತ್
ಹಾಂವ್ ಸ್ವೀಡನಾಂತ್ ಕಾಮ್ ಕರ್ನ್ ಆಸ್ಲೊಂ ಪಾಟಿಂ ಬೊಂಬೊಯ್
ಪಾವ್ತಚ್ ಗ್ಲೇಡಿಸ್ ಬಾಯೆಲಾಗಿಂ ಫೊನಾರ್ ಉಲಂವ್ಚೆಂ
ಆಸ್ಲೆಂ ತಶೆಂಚ್ ಮಂಗ್ಳುರಾಕ್ ಆಯಿಲ್ಲೆವೆಳಾರ್ ಮ್ಹಾಕಾ
ಮೆಳುಂಕ್ ತಿ ಯೆತಾಲಿ. ಆಶಾವಾದಿ ಪ್ರಕಾಶನಾಚಿಂ ಪ್ರಕಾಶಿತ್
ಜಾಲ್ಲಿಂ ಪುಸ್ತಕಾಂ ಎಕಾ ನೆಮಾಳ್ಯಾನ್ ಅಪ್ಲ್ಯಾ
ವರ್ಗಣ್ದಾರಾಂಕ್ ಧಾಡ್ನ್, ಬಾಕಿ ಉರ್ಲಲಿಂ ಪುಸ್ತಕಾಂ
ಗ್ಲೇಡಿಸ್ ಬಾಯೆಕ್ ದಿಲ್ಲಿಂ. ತಶೆಂಚ್ ಮ್ಹಜಿಂ ಹೆರ್
ಸತ್ತಾವೀಸ್ ಪುಸ್ತಕಾಂಚ್ಯೊ ಪನ್ನಾಸ್ ಪ್ರತಿಯಾಂ ಲೆಕಾರ್
ಆಸ್ಲಲಿಂ ಪುಸ್ತಕಾಂ ಸಯ್ತ್ ತಿ ವ್ಹರುನ್ ವಿಖ್ತಾಂ
ಮ್ಹಣಾಲಿ ಆನಿ ವ್ಹರುನ್ ಗೆಲಿ. ಪುಸ್ತಕಾಂ ಕೊಲೊ
ವ್ಹರುಂದಿ, ಪುಣ್ ತಿಚಿ ಭಲಾಯ್ಕಿ ತೆದ್ನಾಂ ಭಿಗ್ಡೊನ್
ತಿಕಾ ಕಾಪಿತಾನಿಯೊ ಲಾಗ್ಸಾರ್ ಆಸ್ಚ್ಯಾ ಸೈಂಟ್ ಆನ್ಸ್
ಕೊವೆಂತಾಚ್ಯಾ ಬಗ್ಲೆನ್ ಆಸ್ಚ್ಯಾ ಆಶ್ರಮಾಂತ್ ಆಸ್ಚಿ
ವಿಶಯ್ ಕಳ್ತಚ್ ತಿಕಾ ಯೇವ್ನ್ ಮೆಳ್ಳೊಂ. ಉಪ್ರಾಂತ್
ಕೆದ್ನಾಂಯ್ ಮಂಗ್ಳುರ್ ಆಯ್ಲೆಲ್ಯಾವೆಳಾರ್ ತಿಕಾ ಮ್ಹಜಿ
ಏಕ್ ಭೆಟ್ ಖಾಯಮ್ ಆಸ್ಲಿ. ತಿಣೆಂ ಆಶಾವಾದಿ ಪ್ರಕಾಶನಾಚಿಂ
ಸರ್ವ್ ಪುಸ್ತಕಾಂ ವ್ಹರುನ್ ಕಲಾಂಗಣಾಂತ್ಲ್ಯಾ ಲೈಬ್ರೆರಿಕ್
ದಿಲ್ಯಾಂತ್ ಮ್ಹಣುನ್ ತಿಣೆಂ ಉಚಾರ್ಲೆಂ. ಮ್ಹಾಕಾ
ಪುಸ್ತಕಾಚ್ಯಾಕೀ ಚಡ್ ತಿಚ್ಯಾ ಭಲಾಯ್ಕೆಚಿ ಕಾಳ್ಜಿ ಆಸ್ಲಿ.
2015-16 ಇಸ್ವೆಂತ್ ಜಿಯೋ ಆಗ್ರಾರಾಚ್ಯಾ ಘರಾ ಏಕ್
ಕವಿಗೋಶ್ಟಿ ಆಸಾ ಕೆಲ್ಲಿ, ಆನಿ ತ್ಯಾ ಕವಿಗೋಶ್ಟಿಕ್ ಹಾಂವ್
ಯೆತಾನಾ ’ಖಂಚ್ಯಾಯ್ ಹೊಟೆಲಾಂನಿ ರಾವಾನಾಕಾ,
ಏರ್ಪೊರ್ಟಾಥಾವ್ನ್ ಶೀದಾ ಘರಾ ಯೇ’ ಮ್ಹಣುನ್ ಮಿತ್ರ್
ಜಿಯೋ ಆಗ್ರಾರಾನ್ ಸಾಂಗ್ಲ್ಲೆಂ ದೆಕುನ್ ಹಾಂವ್
ಏರ್ಪೊರ್ಟಾಥಾವ್ನ್ ಶೀದಾ ಆಗ್ರಾರ್ ವೆಚ್ಯಾ ವಾಟೆರ್
"ಮ್ಹಾಕಾ ಮೆಳುಂಕ್ ಯೇನಾಂಯ್ಗಿ?" ಮ್ಹಳ್ಳ್ಯಾ ಗ್ಲೇಡಿಸ್
ಬಾಯೆಚ್ಯಾ ಉತ್ರಾಂಕ್ ಮಾನ್ ದೀವ್ನ್ ಹಾಂವ್ ಸೈಂಟ್ ಆನ್ಸ್
ಆಶ್ರಮಾಕ್ ಗೆಲೊಂ. ತಿಚ್ಯಾ ಪೆಂಕ್ಟಾರ್ ಬೆಲ್ಟ್
ಭಾಂದ್ಲ್ಲೆಂ ಆನಿ ತಿ ಚಲುಂಕ್ ಕಸ್ಟತಾಲಿ. ಪುಣ್ ತಿಕಾಯೀ
ಮ್ಹಜೆಸವೆಂ ಆಗ್ರಾರ್ ಯೇಂವ್ಕ್ ಮನ್ ಆಸ್ಲೆಂ. ಹಾಂವೆಂಚ್
ತಿಕಾ ಸಮ್ಜಾಯ್ಲೆಂ ’ಬಾಯೆ ತುಜಿ ಭಲಾಯ್ಕಿ ಬರಿ ನಾ,
ದೆಕುನ್ ತುಂ ಪಯ್ಲಿ ಬರಿ ಜಾ’ ಅಶೆಂ ಮ್ಹಣುನ್ ಹಾಂವ್
ಮ್ಹಜೆಂ ಪಯ್ಣ್ ಮುಖಾರುನ್ ಬಿ.ಸಿ.ರೋಡ್ ಪಾವ್ತಾನಾ ತಿಚೆಂ
ಫೋನ್ ಆಯ್ಲೆಂ. ಹಾಂವೆಂ ರಿಸೀವ್ ಕರ್ತಾನಾ ತಿಚೆಂ ಉತರ್
ತಯಾರ್ ಆಸ್ಲೆಂ "ಜಾವ್ಯೆತ್.. ತುಂ ಮ್ಹಾಕಾ ಸೊಡ್ನ್
ಗೆಲೊಯ್ ನೆ?". ಹಾಂವೆಂ ತಿಕಾ ಮೊವಾಳಾಯೆನ್ ಜಾಪ್ ದಿಲಿ;
"ಬಾಯೆ, ತುಜ್ಯಾ ಪೆಂಕ್ಟಾಕ್ ಬೆಲ್ಟ್ ಭಾಂದ್ಲಾಂ ಆನಿ ತುಕಾ
ಪಯ್ಣ್ ಕೆಲ್ಯಾರ್ ತುಜಿ ದೂಕ್ ಚಡೊಂಕ್ ಆಸಾ ದೆಕುನ್ ತುಕಾ
ಆಪವ್ನ್ ವ್ಹರುಂಕ್ ನಾ".
ತಿ ಮ್ಹಜೆಂ ಉತರ್ ಆಯ್ಕುಂಕ್
ತಯಾರ್ ನಾಸ್ತಾಂ ಮ್ಜಣಾಲಿ "ಪುರೊ... ಸೊಡ್.. ಮ್ಹಾಕಾ
ಪಯ್ಣ್ ಕರುಂಕ್ ಕಾಂಯ್ ತ್ರಾಸ್ ನಾಂತ್. ತುಜೆಸವೆಂ ಮ್ಹಾಕಾ
ಆಪವ್ನ್ ವ್ಹರುಂಕ್ ತುಕಾ ಮನ್ ನಾತ್ಲೆಂ ದೆಕುನ್ ಸೊಡ್ನ್
ಗೆಲೊಯ್ ಮ್ಹಣ್.."
ಹಾಂವೆಂ ಜಾಪ್ ದೀವ್ನ್
ಮ್ಹಳೆಂ "ಬಾಯೆ.. ತಶೆಂ ಭಿಲ್ಕುಲ್ ನ್ಹಯ್, ತುಕಾ ಯೇಂವ್ಕ್
ಜಾತಾ ಆನಿ ಯೇಜೆಚ್ ತರ್ ಹಾಂವ್ ಗಾಡಿ ಧಾಡ್ತಾಂ.. ತುಂ
ಆಯ್ತಿ ರಾವ್" ಅಶೆಂ ಮ್ಹಣೊನ್ ಮ್ಹಾಕಾ ಜಿಯೋ ಆಗ್ರಾರಾಚ್ಯಾ
ಘರಾ ಪಾವಯಿಲ್ಲ್ಯಾ ಟೆಕ್ಸೆಗಾರಾಕ್ ಪರತ್ ವಚೊನ್ ಗ್ಲೇಡಿಸ್
ಬಾಯೆಕ್ ಆಪವ್ನ್ ಹಾಡುಂಕ್ ಧಾಡ್ಲೊ, ಆನಿ ತಿ ಆಯ್ಲಿ,
ಮ್ಹಜೆಸವೆಂ ಜಿಯೋ ಆಗ್ರಾರಾಚ್ಯಾ ಘರಾಂತ್ ದೋನ್ ದೀಸ್
ರಾವೊನ್ ತಿಸ್ರ್ಯಾ ದಿಸಾ ಮ್ಹಾಕಾ ಮಂಗ್ಳುರಾಕ್ ಪಾವಂವ್ಕ್
ಜಿಯೋನ್ ಅಪ್ಲೆಂ ಜೀಪ್ ಸ್ಟಾರ್ಟ್ ಕೆಲೆಂ. ಜಿಪಾರ್
ಜಿಯೋಸವೆಂ ವಿಲ್ಸನ್ ಕಟೀಲ್, ತಾಚೊ ಪೂತ್ ಆನಿ ತಾಚಿ
ಪತಿಣ್, ಗ್ಲೇಡಿಸ್ ಬಾಯ್ ಆನಿ ಹಾಂವ್ ಆಸ್ಲ್ಯಾಂವ್. ತ್ಯೆ
ದಿಸಾ ಕರ್ನಾಟಕ್ ಬಂಧ್ ಆಸ್ಲೆಂ ದೆಕುನ್ ವಾಟೆ-ವಾಟೆರ್
ಪರ್ನಿಂ ಟಯರಾಂ ಹುಲ್ಪತಾಲಿಂ ಪುಣ್ ಮ್ಹಾಕಾ ಬೊಂಬೊಯ್
ವಚೊಂಕ್ ಆಸ್ಲೆಂ ಜಾಲ್ಲ್ಯಾನ್ ಸ್ವತಾ ಜಿಯೋ ಆಗ್ರಾರ್
ಡ್ರಾಯ್ವ್ ಕರ್ನ್ ಮಧೆಂ ಮಧೆಂ ರಾವವ್ನ್ ಕಶೆಂಯ್ ಆಮಿಂ
ಮಂಗ್ಳುರ್ ಪಾವ್ಲ್ಯಾಂವ್.
ಹಾಂವ್ ಬೊಂಬೊಯ್
ಪಾವ್ತಚ್ ಗ್ಲೇಡಿಸ್ ಬಾಯೆಕ್ ಫೋನ್ ಕರ್ತಾನಾ ತಿ ಫೋನ್
ರಿಸೀವ್ ಕರಿನಾ. ಉಪ್ರಾಂತ್ ಮ್ಹಾಕಾ ಕಳೊನ್ ಆಯ್ಲೆಂ ಕಿ,
ಆಗ್ರಾರ್ ಥಾವ್ನ್ ಮಂಗ್ಳುರಾಕ್ ಜೀಪಾರ್ ಯೇವ್ನ್ ತಿಚಿ
ಪೆಂಕ್ಟಾಚಿ ದೂಕ್ ಚಡ್ಲ್ಲಿ ಆನಿ ತಿಕಾ ಫಾ|
ಮುಲ್ಲರ್ಸಾಂತ್ ಭರ್ತಿ ಕೆಲಾಂ ಮ್ಹಣೊನ್.
ಥೊಡ್ಯಾ
ತೆಂಪಾನ್ ತಿ ಥಂಯ್ಚಿ ಸುಟ್ಲಿ, ಆನಿ ’ಆತಾಂ ಹಾಂವ್
ಕಲ್ಯಾಣ್ಪುರಾಂತ್ಲ್ಯಾ ಒಝೊನಾಮ್ ಆಶ್ರಮಾಂತ್ ಆಸಾ’
ಮ್ಹಣಾಲಿ. ಹಾಂವ್ ಸಯ್ತ್ ಬೊಂಬೊಯ್ ಥಾವ್ನ್ ಯೆತಾನಾ
ವಾಟೆರ್ ಪಯ್ಲೆಂ ತಿಕಾ ವಚೊನ್ ಮೆಳೊನ್ ಉಪ್ರಾಂತ್
ಮಂಗ್ಳುರಾಕ್ ವೆಚೆಂ ಆಸ್ಲೆಂ. ಒಝೊನಾಮ್ ಆಶ್ರಮಾಂತ್ ತಿಕಾ
ಬರಿ ಸವ್ಲತಾಯ್ ಆಸ್ಲಿ. ತಿಚೆಂ ಮ್ಹಳ್ಳೆಂ ಏಕ್ ನಿತಳ್
ರೂಮ್ ತಿಕಾ ದಿಲ್ಲೆಂ. ತಿಚಿ ಜತನ್ ಬರಿಚ್ ಕರ್ನ್
ಘೆತಾಲಿಂ. ಕೊಂಕಣಿ ನೆಮಾಳಿಂ ತಿಚ್ಯಾ ಕುಡಾಂತ್ ಆಸ್ಲಿಂ,
ನವೆ ಬೂಕ್ ಸಯ್ತ್ ತಿಚ್ಯಾ ಖಟ್ಲ್ಯಾರ್ ಆಸ್ಲೆ ಆನಿ ತಿ
ತೆದಾಳಾ ವಾಚ್ತಾಲಿ.
ಕಲ್ಯಾಣ್ಪುರಾಂತ್ಲ್ಯಾ ಒಝೊನಾಮ್ ಆಶ್ರಮಾಂತ್ ತಿಚ್ಯಾ
ಕುಡಾಂತ್ ಕಾಡ್ಲೆಲಿ ತಸ್ವೀರ್
ಆಜ್ ಹಾಂವ್
(ಬಾಯ್ ಗ್ಲೇಡಿಸ್ ರೇಗೊಚಿ ಅಖ್ರೇಚಿ ಕವಿತಾ)
ತಿಚಿ ಏಕ್ ಕವಿತಾ ತಿಣೆಂ ಮ್ಹಾಕಾ ದಿಲಿ ಆನಿ ತೆಂ ಹಾಂವೆಂ
ಪಯ್ಣಾರಿಚೆರ್ ಪರ್ಗಟ್ಲಿ. ಭೋವ್ಶಾ ಹಿಚ್ ತಿಚಿ ನಿಮಾಣಿ
ಕವಿತಾ. ತಿಚ್ಯಾ ಶಿರಾಂ ಶಿರಾಂನಿ ಕೊಂಕಣಿ ಮೋಗ್
ವ್ಹಾಳ್ತಾಲೊ. ಮಿಲಾಗ್ರಿಸ್ ಕೊಲೆಜಿಂತ್ ಆಸಾ ಕೆಲ್ಲ್ಯಾ
ಕಾರ್ಯಾಕ್ ಅಪ್ಣಾಕ್ ವ್ಹರುಂಕ್ ತಿಣೆಂ ಮ್ಹಾಕಾ ಆದೇಸ್
ದಿಲೊ ಆನಿ ಹಾಂವೆಂ ತೊ ಆದೇಸ್ ಪಾಳ್ಳೊ. ಹಾತಿಂ ಚಲ್ಚೆಂ
ಬೇತ್ ಘೆವ್ನ್ ತಿ ವೆದಿಕ್ ಚಡ್ಲಿ ಆನಿ ಕಾರ್ಯಾಂತ್
ಸಕ್ರಿಯ್ ರಿತಿನ್ ಹಾಜರ್ ಜಾಲ್ಲಿ. ತಿಕಾ ಪಾಟಿಂ ಆಶ್ರಮಾಕ್
ಪಾವವ್ನ್ ವೆಚ್ಯಾದಿಂ ತಿಣೆಂ ಮ್ಹಜೆಲಾಗಿಂ ಏಕ್ ಲ್ಹಾನ್
ವಿನತಿ ಕೆಲಿ. "ತುಂ ಸರ್ವಾಂಚೆಂ ಬೂಕ್ ಪರ್ಗಟ್ತಾಯ್,
ಮ್ಹಜ್ಯಾ ಧುವೆಚೊ ವಿಲ್ಮಾಚೊ (ಕಲಾರಾಣಿ ಕುಲ್ಶೇಕರ್) ಬೂಕ್
ಕಾಡ್ಸಿವೆ?" ಮ್ಹಣಾಲಿ. ತಿಚಿ ಒಳೊಕ್ ಜಾಲ್ಲ್ಯಾ ಥಾವ್ನ್
ಕೆದಿಂಚ್ ತಿಣೆಂ ಕೊಣಾಯ್ ಸಮೊರ್ ಹಾತ್ ಉದಾರೆ ಕೆಲ್ಲೆ
ನಾಂತ್. ಕಠೀಣ್ ಸ್ವಾಭಿಮಾನಿ ತಿ ಜಾವ್ನಾಸ್ಲಿ. ಮ್ಹಾಕಾ
ಅಪ್ಣಾಚೊಚ್ ಲ್ಹಾನ್ ಭಾವ್ ಮ್ಹಣ್ ತಿಣೆಂ ಕೆದ್ನಾಂಗಿ
ಮಾಂದುನ್ ಘೆತ್ಲ್ಲೆಂ ದೆಕುನ್ ತಿಣೆಂ ಮ್ಹಜೆಲಾಗಿಂ ಹಿ
ವಿನತಿ ಕೆಲ್ಲಿ. ಆನಿ ಹಾಂವೆಂ ಜಾಪ್ ದೀವ್ನ್ ಮ್ಹಳೆಂ "ತುಂ
ಬರ್ಪಾಂ ಮ್ಹಾಕಾ ಪಾವಿತ್ ಕರ್ಶೆಂ ಪಳೆ, ಉಪ್ರಾಂತ್ಲೆಂ
ಮ್ಹಜೆರ್ ಸೊಡ್". ಪುಣ್ ತಿಂ ಬರ್ಪಾಂ ತಯಾರ್ ಜಾಲಿಂಚ್
ನಾಂತ್, ಆಶಾವಾದಿ ಪ್ರಕಾಶನಾಥಾವ್ನ್ ಬೂಕ್ ಪರ್ಗಟೊನ್
ಆಯ್ಲೊಚ್ ನಾ, ಗ್ಲೇಡಿಸ್ ಬಾಯೆಚಿ ವಿನತಿ ಮ್ಹಜ್ಯಾನ್
ಸುಫಳ್ ಕರುಂಕ್ ಸಯ್ತ್ ಜಾಲಿನಾ.
ಜಿಣ್ಯೆಚಿ
ಅನ್ಯೇಕ್ ಘುಂವ್ಡಿ ತಯಾರ್ ಆಸ್ಲಿ. ಹಾಂವ್ ಸಯ್ತ್ ಕಾಮಾರ್
ಮೆತೆರ್ ಜಾವ್ನ್ ಆಸ್ತಾನಾ ಸಯ್ತ್ ತವಳ್ ತವಳ್ ತಿಕಾ
ಫೊನಾಚೆರ್ ಉಲಯ್ತಾಲೊಂ. ಅಶೆಂ ಕಾಂಯ್ ತೆಂಪ್ ಪರ್ಯಾಂತ್
ತಿಚೆಂ ಫೋನ್ ಚಲಾನಾತ್ಲೆಂ. ಹಾಂವೆಂ ಫೋನ್ ಕೆಲ್ಯಾರ್
ತಿಚೆಂ ಫೋನ್ ಬಂಧ್ ಆಸಾ ವಾ ನೆಟ್ವರ್ಕಾರ್ ನಾ ಅಶೆಂ
ಮೆಸೇಜ್ ಯೆತಾ ದೆಕುನ್ ಹಾಂವೆಂಯ್ ಕಾಂಯ್ ತೇಂಪ್ ಅಸೊಚ್
ಬೊಂಬೊಯ್ ಉರ್ಲೊಂ. ಗ್ಲೇಡಿಸ್ ಬಾಯೆಲಾಗಿಂ ಫೊನಾರ್
ಉಲಾಂವ್ಕ್ ವಾ ತಿಕಾ ಮೆಳುಂಕ್ ಸಯ್ತ್ ವಚಾನಾಸ್ತಾಂ ಕಾಂಯ್
ವರಸ್ ಉತ್ರಲ್ಲೆಂ. ಅಶೆಂ ಏಕ್ ಪಾವ್ಟಿಂ ತಿಚೆವಿಶಿಂ ಖಬರ್
ಘೆಂವ್ಕ್ ಸಭಾರ್ ಬರವ್ಪ್ಯಾಂಕ್, ಸಂಪಾದಕಾಂಕ್ ಫೋನ್ ಕೆಲೊ
ಪುಣ್ ಎಕ್ಲ್ಯಾಕೀ ತಿಚಿ ಖಬರ್ ನಾತ್ಲಿ. ಅಖ್ರೇಕ್ ಹಾಂವೆಂ
ಒಝೊನಾಮ್ ಆಶ್ರಮಾಚ್ಯಾ ಬಗ್ಲೆನ್ ಆಸ್ಚ್ಯಾ ಡೊ|ಜೆರಿ
ನಿಡ್ಡೋಡಿಕ್ ಫೋನ್ ಕರುನ್ "ದಯಾಕರುನ್ ಗ್ಲೇಡಿಸ್ ಬಾಯೆಚಿ
ಖಬರ್ ಕಾಡ್ನ್ ಮ್ಹಾಕಾ ಕಳಯ್ಶಿಗಿ?" ಮ್ಹಣ್ ವಿನತಿ ಕೆಲಿ.
ತಾಣೆಂ ಖಬರ್ ಕಾಡ್ತಾನಾ ಕಳೊನ್ ಆಯ್ಲೆಂಕಿ ’ಗ್ಲೇಡಿಸ್
ಬಾಯ್ ಆತಾಂ ಒಝೊನಾಮ್ ಆಶ್ರಮಾಂತ್ ನಾ, ಕಂಯ್ ಗೆಲ್ಯಾ
ಮ್ಹಣ್ ಕೊಣಾಯ್ಕೀ ಕಳಿತ್ ನಾ’. ಆಯ್ಕೊನ್ ಏಕ್ ಪಾವ್ಟಿಂ
ಹಾಂವ್ ಶೆರ್ಮೆಲೊಂ. ದುಸ್ರೆಚ್ ದಿಸಾ ಫಾಂತ್ಯಾರ್ ಸಾಡೆ
ತಿನಾಂಕ್ ಬೊಂಬೊಯ್ ಥಾವ್ನ್ ಗಾಡಿಯೆರ್ ಗಾಂವಾಕ್ ಆಯ್ಲೊಂ.
ಸಾಂಜೆರ್ ಚಡುಣೆಂ ಸಾಡೆ ತೀನ್ ಜಾತಿತ್. ಹಾಂವ್ ಶೀದಾ
ಒಝೊನಾಮ್ ಆಶ್ರಮಾಕ್ ಗೆಲೊಂ. ತಿಚ್ಯಾಕ್ ಕುಡಾಸಮೊರ್
ಹಾಂವೆಂ ಮ್ಹಜಿ ಗಾಡಿ ಪಾರ್ಕ್ ಕರ್ಚಿ ಆಸ್ಲಿ. ಪುಣ್
ಗ್ಲೇಡಿಸ್ ಬಾಯೆಚ್ಯಾ ಕುಡಾಕ್ ಭೀಗ್ ಘಾಲ್ಲೆಂ. ಅಶೆಂ
ಮ್ಹಾಕಾ ಪಳೆವ್ನ್ ಥೊಡಿಂ ಒಳ್ಕತಾಲಿಂ. ತಿಚ್ಯಾ ಕುಡಾಚ್ಯಾ
ಬಗ್ಲೆನ್ ಏಕ್ ಉತರ್ ಪ್ರಾಯೆಚಿ ಬಾಯ್ಲ್ ಆನಿ ತಿಚೊ ಘೊವ್
ಆಸ್ಲಿಂ. ತ್ಯೇ ಬಾಯ್ಲೆನ್ ಮ್ಹಾಕಾ ವಿಚಾರ್ಲೆಂ "ತುಂ ಖಂಯ್
ಥಾವ್ನ್ ಆಯ್ಲೊಯ್? ಗ್ಲೇಡಿಸ್ ಬಾಯ್ ಆತಾಂ ಹಾಂಗಾ ನಾ
ಮ್ಹಣ್ ತುಕಾ ಖಬರ್ ನಾ? ಭೊವ್ಶಾ ಸಾಂತ್ ಆಂತೊನಿ
ಆಶ್ರಮಾಂತ್ ಆಸಾ"
ಹಾಂವೆಂ ಜಾಪ್ ದೀವ್ನ್ ಮ್ಹಳೆಂ
"ಹಾಂವ್ ಬೊಂಬೊಯ್ ಥಾವ್ನ್ ಆಯ್ಲಾಂ, ಮ್ಹಾಕಾ ಖಬರ್
ನಾತ್ಲಿ, ತಿಚೆಂ ಫೋನ್ ಚಲಾನಾಸ್ತಾಂ ತಿಚೆಲಾಗಿಂ
ಉಲಯ್ನಾಸ್ತಾಂ ಕಾಂಯ್ ತೇಂಪ್ ಜಾಲೊ".
ತಿಣೆಂ
ಮ್ಹಾಕಾ ಏಕ್ ನಂಬರ್ ದೀವ್ನ್ ಮ್ಹಳೆಂ "ಹೊ ನಂಬರ್ ತಿಚ್ಯಾ
ನಾತಿಚೊ, ತುಂ ತಿಚೆಲಾಗಿಂ ಫೋನ್ ಕರ್ನ್ ವಿಚಾರ್, ಪುಣ್ ತೊ
ನಂಬರ್ ಆಮಿ ದಿಲ್ಲೊ ಮ್ಹಣಾನಾಕಾ". ಹಾಂವೆಂ ತೊ ನಂಬರ್
ಮೊಜ್ಯಾ ಮೊಬಾಯ್ಲಾಚೆರ್ ಫೀಡ್ ಕರ್ತಾನಾ ತಿಚೊ ಘೊವ್ ದಾರಾ
ಭಾಯ್ರ್ ಯೇವ್ನ್ ಬಾಯ್ಲೆಕ್ ಕಿತೆಂಗೀ ಹಿಶಾರೆ ಕರ್ತಾಲೊ.
ತಕ್ಷಣ್ ತಿಣೆಂ ಮ್ಹಾಕಾ ಮ್ಹಳೆಂ "ತಿ ಖಂಯ್ ಆಸಾ ಮ್ಹಳ್ಳಿ
ಆಮ್ಕಾಂ ಕಿತೆಂಚ್ ಖಬರ್ ನಾ. ದಯಾಕರುನ್ ಆಮ್ಚೆಂ ನಾಂವ್
ಕೊಣಾಯ್ಕೀ ಸಾಂಗಿನಾಕಾ". ಹಾಂವೆಂ ತಿಕಾ ಸಮಾಧಾನ್ ಕೆಲೆಂ
’ಬಾಯೆ, ಭಿಯೆನಾಕಾ, ಮ್ಹಾಕಾ ತುಮ್ಚೆಂ ನಾಂವ್ ವಾ ಒಳೊಕ್
ಸಯ್ತ್ ನಾ. ಆನಿ ತುಮ್ಚೆವಿಶಿಂ ಕೊಣಾಯ್ಕೀ ಸಾಂಗಿನಾ"
ಹಾಂವ್ ಗಾಡಿಯೆರ್ ಬಸೊನ್ ತಿಣೆಂ ದಿಲ್ಲ್ಯಾ
ಮೊಬಾಯ್ಲಾಚೆರ್ ಫೋನ್ ಕೆಲೊ. ಎಕ್ಲ್ಯಾ ಚೆಡ್ವಾನ್ ತೆಂ
ಫೋನ್ ರಿಸೀವ್ ಕೆಲೆಂ, ಹಾಂವೆಂ ಮ್ಹಜಿ ಒಳೊಕ್ ದಿಲಿ
"ಬಾಯೆ, ಹಾಂವ್ ವಲ್ಲಿ ಕ್ವಾಡ್ರಸ್, ಬೊಂಬೊಯ್ ಥಾವ್ನ್
ಆಯಿಲ್ಲೊಂ. ಗ್ಲೇಡಿಸ್ ಬಾಯೆಕ್ ಮೆಳೊನ್ ತಿಕಾ ದೋನ್ ಬೂಕ್
ದಿವ್ಯಾಂ ಮ್ಹಣುನ್ ಕಲ್ಯಾಣ್ಪುರ್ ಆಯಿಲ್ಲೊಂ ಪುಣ್ ತಿ
ಆತಾಂ ಹಾಂಗಾಸರ್ ನಾ ಮ್ಹಣ್ ಕಳೊನ್ ಆಯ್ಲೆಂ, ದೆಕುನ್
ದಯಕರ್ನ್ ಮ್ಹಾಕಾ ತಿ ಆತಾಂ ಕಶಿ ಆಸಾ ಆನಿ ಖಂಯ್ ಆಸಾ
ಮ್ಹಣ್ ಸಾಂಗ್ಶಿ?"
ತಿಣೆಂ ಮ್ಹಾಕಾ ಜಾಪ್ ದಿಲಿ;
"ವ್ಹಯ್, ತಿ ಆತಾಂ ಕಲ್ಯಾಣ್ಪುರ್ ನಾ, ಮಂಗ್ಳುರಾಂತ್
ಆಸಾ". ಹಾಂವೆಂ ಪರತ್ ವಿಚಾರ್ಲೆಂ "ಮಂಗ್ಳುರಾಂತ್ ಖಂಯ್
ಆಸಾ? ತಿಕಾ ಮೆಳಾಜಯ್ ಮ್ಹಾಕಾ"
ತಿಣೆಂ ಮ್ಹಾಕಾ
ವಿಚಾರ್ಲೆಂ "ಕಿತೆಂ ಕಾಮ್ ಆಸಾ?"
ಹಾಂವೆಂ ಜಾಪ್
ದಿಲಿ; "ಕಿತೆಂಯ್ ಕಾಮ್ ನಾ ಬಾಯೆ, ಫಕತ್ ತಿಕಾ ದೋನ್ ಬೂಕ್
ದೀಂವ್ಕ್ ಆಸ್ಲೆ ದೆಕುನ್ ಹಾಂವ್ ತಿಕಾ ಮೆಳೊಂಕ್ ಆಶೆತಾಂ,
ದಯಾಕರುನ್ ತಿ ಮಂಗ್ಳುರಾಂತ್ ಖಂಯ್ ಆಸಾ ಸಾಂಗ್. ಸಾಂತ್
ಆಂತೊನಿ ಆಶ್ರಮಾಂತ್ ಪುಣಿ ಆಸಾ?"
ತಿಣೆಂ ಜಾಪ್
ದೀವ್ನ್ "ವ್ಹಯ್"
ಹಾಂವೆಂ ತಿಚೊ ಉಪ್ಕಾರ್
ಬಾವ್ಡುನ್ ಶೀದಾ ಮಂಗ್ಳುರಾಕ್ ಪಾವ್ಲೊಂ. ಸಾಂತ್
ಆಂತೊನಿಚ್ಯಾ ಆಶ್ರಮಾಕ್ ರಿಗ್ಲೊಂ, ಗಾಡಿ ಪಾರ್ಕ್ ಕರ್ನ್
ಶೀದಾ ಎಕ್ಲ್ಯಾ ದೊಗಾಂಲಾಗಿಂ ವಿಚಾರ್ ಕೆಲೊ "ಗ್ಲೇಡಿಸ್
ಬಾಯ್... ಗ್ಲೇಡಿಸ್ ರೇಗೊ... ಹಾಂಗಾ ಆಸಾ ಕಂಯ್.. ಖಂಯ್
ಆಸಾ ಮ್ಹಣ್ ಸಾಂಗ್ಶಾತ್?"
ಪುಣ್ ಕೊಣಾಯ್ಕೀ
ಕಳಿತ್ ನಾತ್ಲೆಂ ದೆಕುನ್ ತಾಣಿಂ ಮ್ಹಾಕಾ
ಪಾದ್ರ್ಯಾಬಾಲಾಗಿಂ ವಿಚಾರುಂಕ್ ಸಾಂಗ್ಲೆಂ.
ಹಾಂವ್
ಪಾದ್ರ್ಯಾಬಾಕ್ ಮೆಳ್ಳೊಂ ಆನಿ ಗ್ಲೇಡಿಸ್ ಬಾಯೆಚೊ ವಿಚಾರ್
ಕೆಲೊ. ತೊ ಜಾಪ್ ದೀವ್ನ್ ಮ್ಹಣಾಲೊ; "ಗ್ಲೇಡಿಸ್ ಬಾಯೆಕ್
ಎಕಾ ಮಯ್ನ್ಯಾದಿಂ ಹಾಂಗಾ ಹಾಡ್ಲ್ಲೊ ವ್ಹಯ್, ಪುಣ್ ಆತಾಂ
ತಿ ಹಾಂಗಾ ನಾ."
ಪರತ್ ಮ್ಹಜ್ಯಾ ಆಂಗಾರ್ ಶೆಳೆಂ
ಉದಕ್ ವೊತ್ಲ್ಲೊ ಅನ್ಭೋಗ್ ಜಾಲೊ "ಫಾದರ್.. ಆತಾಂ ಖಂಯ್
ಆಸಾ ತಿ? ತಿಕಾ ಕೊಣೆಂ ಹಾಂಗಾ ಹಾಡ್ಲೊ? ತೆಂ ಪುಣಿಂ
ಸಾಂಗ್ಶಾತ್?"
ಪಾದ್ರ್ಯಾಬ್ ಜಾಪ್ ದೀವ್ನ್
ಮ್ಹಣಾಲೊ "ಮ್ಹಾಕಾ ಎಕೀ ಕಳಿತ್ ನಾ, ತಿಕಾ ಕೊಣ್ ಹಾಂಗಾ
ಹಾಡ್ನ್ ಆಯಿಲ್ಲೆಗಿ, ತಾಣಿಂಚ್ ವೆಲಾ, ಖಂಯ್ ಮ್ಹಣ್
ಮ್ಹಾಕಾ ಕಳಿತ್ ನಾ"
ಆಯ್ಕುನ್ ಎಕಾ ವಾಟೆನ್
ನಿರಾಸ್ ಅನ್ಯೇಕಾ ವಾಟೆನ್ ರಾಗ್ ಯೇವ್ನ್ ಪರತ್ ಹಾಂವೆಂ
ತ್ಯಾ ಮೊಬಾಯ್ಲಾಚೆರ್ ಫೋನ್ ಕರ್ನ್ ಸಾಂಗ್ಲೆಂ; "ಅಳೆ,
ಹಾಂವ್ ಸಾಂತ್ ಆಂತೊನಿಚ್ಯಾ ಆಶ್ರಮಾಂತ್ ಆಯ್ಲಾಂ,
ಗ್ಲೇಡಿಸ್ ಬಾಯ್ ಹಾಂಗಾ ನಾ ಮ್ಹಣ್ತಾ ಪಾದ್ರ್ಯಾಬ್.."
ಮ್ಹಜಿಂ ಉತ್ರಾಂ ಆಯ್ಕೊನ್ ತೆಂ ಚೆಡುಂ ಸಯ್ತ್
ವಿಜ್ಮಿತ್ ಪಾವ್ಲೆಂ, ಆನಿ ಜಾಪ್ ದೀವ್ನ್ ಮ್ಹಣಾಲೆಂ "ನಾ,
ತಿ ಥಂಯ್ಚ್ ಆಸಾ..."
ಆಯ್ಕುನ್ ಹಾಂವ್
ಮ್ಹಜೆಯಿತ್ಲ್ಯಾಕ್ ಚಿಂತುಂಕ್ ಲಾಗ್ಲೊಂ, ಕಾಂಯ್ ಹೆರಾಂಕ್
ಕಳಂವ್ಕ್ ನ್ಹಜೊ ಮ್ಹಳ್ಳ್ಯಾ ಇರಾದ್ಯಾ ತಿ ಹಾಂಗಾ ಆಸ್ಚಿ
ಖಬರ್ ಮ್ಹಾಕಾ ಪಾದ್ರ್ಯಾಬಾನ್ ಲಿಪಯ್ಲ್ಯಾ ಕೊಣ್ಣಾ
ಮ್ಹಣುನ್ ತಿಕಾ ವಿಚಾರ್ಲೆಂ "ತರ್ ತಿಣೆಂ ಹಾಂಗಾ ಆಸ್ಚಿ
ಖಬರ್ ಕೊಣಾಯ್ಕೀ ಸಾಂಗ್ಚಿ ನ್ಹಯ್ ಮ್ಹಣ್ ಪಾದ್ರ್ಯಾಬಾಕ್
ತುಮಿ ಪುಣಿಂ ಸಾಂಗ್ಲಾಂಸ್ತಲೆಂ?"
ತಿಣೆಂ
"ವ್ಹಯ್" ಮ್ಹಳೆಂ.
ಹಾಂವ್ ಪರತ್ ಪಾಟಿಂ ವಚೊನ್
ಪಾದ್ರ್ಯಾಬಾಕ್ ಮೆಳ್ಳೊಂ "ಫಾದರ್.. ಹಾಂವ್ ಬೊಂಬೊಯ್
ಥಾವ್ನ್ ಆಯ್ಲಾಂ, ಫಕತ್ ತಿಕಾ ದೋನ್ ಬೂಕ್ ದಿವ್ಯಾಂ ಮ್ಹಣ್
ಆಯ್ಲಾಂ, ಹೆರ್ ಕಸ್ಲೊಯ್ ಇರಾದೊ ನಾ.."
ತಿತ್ಲ್ಯಾರ್ ಪಾದ್ರ್ಯಾಬಾನ್ ಮ್ಹಾಕಾ ಮಧೆಂಚ್ ರಾವವ್ನ್
ವಿಚಾರಿ "ತುಂ ವಲ್ಲಿ ಕ್ವಾಡ್ರಸ್ ನೆ?"
"ವ್ಹಯ್
ಫಾದರ್"
"ಮ್ಹಜಿ ಒಳೊಕ್ ಜಾಂವ್ಕ್ ನಾ?"
"ಮಾಪ್ ಕರಾ ಫಾದರ್, ನಾ" ಹಾಂವೆಂ ಜಾಪ್ ದಿವ್ನ್ ಮ್ಹಳೆಂ.
"ಹಾಂವ್ ಫಾ| ಮುಕ್ತಿ ಪ್ರಕಾಶ್, ತುಜಿಂ ಸಭಾರ್
ಬರ್ಪಾಂ ಜಾಂವೆಂ ಆಮ್ಚಿ ಮಾಂಯ್ ಪತ್ರಾಚೆರ್
ಪರ್ಗಟ್ಲ್ಯಾಂತ್"
ಹಾಂವೆಂ ಪರತ್ ಮ್ಹಜೆಂ ರುದಾನ್
ತಾಚೆಸಮೊರ್ ದವರ್ಲೆಂ "ಫಾದರ್ ಗ್ಲೇಡಿಸ್ ಬಾಯೆವಿಶಿಂ,
ತಿಣೆಂ ಹಾಂಗಾ ಆಸ್ಚೆವಿಶಿಂ ಹಾಂವ್ ಕೊಣಾಯ್ಕೀ ಸಾಂಗೊಂಕ್
ವ್ಹಚಾನಾ, ಪುಣ್ ದಯಾಕರುನ್ ಮ್ಹಾಕಾ ತಿಕಾ ಮೆಳೊಂಕ್
ದಿಶ್ಯಾತ್?"
ಪಾದ್ರ್ಯಾಬಾನ್ ಜಾಪ್ ದಿವ್ನ್ ಮ್ಹಳೆಂ
"ಸತ್ ಸಾಂಗ್ತಾಂ, ತಿ ಆತಾಂ ಹಾಂಗಾ ನಾ, ತಿಕಾ ಕೊಣೆಂ
ಹಾಂಗಾ ಹಾಡ್ನ್ ಆಯಿಲ್ಲೆಗಿ ತಾಣಿಂಚ್ ವೆಲಾ, ಖಂಯ್
ಮ್ಹಳ್ಳಿ ಮಾಹೆತ್ ಮ್ಹಾಕಾ ನಾ, ಮೆಳ್ತಚ್ ತುಕಾ ಕಳಯ್ತಾಂ"
ಆಯ್ಕುನ್ ಮ್ಹಾಕಾ ಕಿತೆಂ ಕರ್ಚೆಂ ಮ್ಹಣುನ್ ಸುಸ್ತಾಲೆಂ
ನಾಂ. ಹಾಂವ್ ಥಂಯ್ ಥಾವ್ನ್ ಶೀದಾ ’ಮಂಗಳ ಜ್ಯೋತಿ’
ಪಾವ್ಲೊಂ, ಥಂಯ್ ಮ್ಹಾಕಾ ರಾವೊಂಕ್ ಏಕ್ ಭಾಡ್ಯಾಚೆಂ ರೂಮ್
ಬುಕ್ ಕೆಲ್ಲೆಂ. ಮ್ಹಜೆಂ ಬೇಗ್ ದವರ್ನ್ ನಿತಳ್ ಜಾವ್ನ್
ಮ್ಹಜ್ಯಾ ’ಪಯ್ಣಾರಿ ವಾಟ್ಸಾಪ್ ಪಂಗ್ಡಾಂತ್’ ಆಜ್
ಘಡ್ಲ್ಲಿ ಸಗ್ಳಿ ವಿಶಯ್’ ಪೋಸ್ಟ್ ಕೆಲಿ.
ಕೊಂಕಣಿಚಿ ಮಹಾನ್ ಸ್ತ್ರೀ, ಧೀರ್ ಸ್ತ್ರೀ, ಉಂಚ್ಲೆ
ಪುರಸ್ಕಾರ್ ಜೊಡ್ಲಲಿ ಪುಣ್ ತಿಚಿ ಖಬರ್ ಜಾಂವ್ ಫಿಕಿರ್
ಜಾಂವ್ ಆಸ್ಲೆ ಕೊಣ್ಯೀ ಮ್ಹಾಕಾ ಮೆಳ್ಳೆನಾಂತ್.
ಫಾಂತ್ಯಾಚ್ಯಾ ಸಾಡೆತಿನಾಕ್ ಸುಟ್ಲಲೊಂ ಹಾಂವ್ ಡ್ರಾರ್ವ್
ಕರ್ನ್ ಥಕ್ಲ್ಲೊಂ ಪುಣ್ ಮತಿಂತ್ ತೆಂಚ್ ಅಧುರೆಂ ಸವಾಲ್
ಜಾಗೆಂ ಆಸ್ಲೆಂ ’ಗ್ಲೇಡಿಸ್ ಬಾಯ್ ಖಂಯ್ ಗೆಲಿ?, ಏಕ್ ಖಬರ್
ತಿಕಾ ದೀಂವ್ಕ್ ಜಾಂವ್ಕ್ ನಾ?’
ಕಾಂಯ್ ಸಾಡೆ ಇಕ್ರಾಶೆಂ
ಪಯ್ಣಾರಿ ವಾಟ್ಸಾಪ್ ಪಂಗ್ಡಾಚೆರ್ ಮ್ಹಜಿ ಮೆಸೇಜ್ ವಾಚುನ್
ಮ್ಹಜ್ಯಾ ಮಾವ್ಶೆಚ್ಯಾ ಧುವೆನ್ ಕ್ಲಾರಾನ್ ಮೆಸೇಜ್
ಧಾಡ್ಲೆಲಿ "ವಲ್ಲಿ, ತುಂ ಗ್ಲೇಡಿಸ್ ರೇಗೊಕ್ ಸೊಧುನ್
ಆಸಾಯ್ ಮ್ಹಣ್ ಕಳ್ಳೆಂ, ತುವೆಂ ಭಿಯೆಂವ್ಚಿ ಗರ್ಜ್ ನಾ, ತಿ
ಬರಿ ಆಸಾ, ತಿಕಾ ಉಲ್ಲಾಳ್-ಸೊಮೆಶ್ವರಾಂತ್ಲ್ಯಾ ಪಶ್ಚಿಮ್
ರಿಹ್ಯಾಬಿಲೇಶನ್ ಸೆಂಟರಾಂತ್ ಮ್ಹಜೆಸವೆಂಚ್ ಕಾಮ್ ಕರ್ನ್
ಆಸ್ಲಲೊ ಸೋಶಿಯಲ್ ವರ್ಕರ್ ತಿಚಿ ಜತನ್ ಘೆವ್ನ್ ಆಸಾ"
ಮೆಸೇಜ್ ವಾಚುನ್ ಮ್ಹಜ್ಯಾ ಸಗ್ಳ್ಯಾ ದಿಸಾಚಿ ಥಕಾಯ್
ಮಾಯಾಗ್ ಜಾಲಿ.
ದುಸ್ರ್ಯಾ ಮೆಸೇಜಿಂತ್ ಕ್ಲಾರಾನ್
ಮ್ಹಾಕಾ ರೋಹಿತ್ ಸಾಂಕ್ತುಸಾಚೆಂ ನಂಬರ್ ಆನಿ ಪಶ್ಛಿಮ್
ರಿಹ್ಯಾಬಿಲೇಶನಾಚೊ ವಿಳಾಸ್ ಧಾಡ್ಲೊ.
ಹಾಂವೆಂ ಘಳಾಯ್
ಕರಿನಾಸ್ತಾಂ ರೋಹಿತಾಕ್ ಏಕ್ ಸಂಧೇಶ್ ಧಾಡ್ಲೊ "ಹಾಂವ್
ವಲ್ಲಿ ಕ್ವಾಡ್ರಸ್, ಬೊಂಬೊಯ್ ಥಾವ್ನ್ ಆಯ್ಲಾಂ, ಮ್ಹಾಕಾ
ಬಾಯ್ ಗ್ಲೇಡಿಸ್ ರೇಗೊಕ್ ಮೆಳುಂಕ್ ಜಾಯ್ ದೆಕುನ್ ಫಾಲ್ಯಾಂ
ಸಕಾಳಿಂ ಸಾತಾಂಕ್ ಯೆತಾಂ"
ಹಿ ಮೆಸೇಜ್ ಧಾಡ್ನ್ ಹಾಂವ್
ನಿದ್ಲೊಂ.
ಸಕಾಳಿಂ ಹರ್ಶೆಂಚೆಪರಿಂ ಮ್ಹಜೊ ದೀಸ್
ವೆಗಿಂಚ್ ಸುರು ಜಾಂವ್ಚೊ ದೆಕುನ್ ವೊರಾಂ ಸಾತ್
ಜಾಂವ್ಚ್ಯಾಧಿಂಚ್ ಹಾಂವ್ ತೊ ಎಡ್ರೆಸ್ ಸೊಧುನ್
ಪಾವ್ಲ್ಲೊಂ ಆನಿ ಗೇಟಿಚೆರ್ ಭಿತರ್ಲ್ಯಾನ್ ಭೀಗ್ ಆಸ್ಲೆಂ
ದೆಕುನ್ ಕಾಲ್ಬೆಲ್ ಮಾರ್ಲೆಂ. ಥೊಡೊ ವೇಳ್ ರಾವ್ಲೊಂ ಪುಣ್
ಕೊಣೆಂಯ್ ಗೇಟ್ ಉಗ್ತಿ ಕೆಲಿನಾ. ರೋಹಿತಾಕ್ ಫೋನ್
ಕೆಲ್ಯಾರೀ ತಾಣೆಂ ಮ್ಹಜೆಂ ಕೋಲ್ ರಿಸೀವ್ ಕೆಲೆಂನಾ,
ದೆಕುನ್ ರೋಹಿತಾಕ್ ಅಪ್ಣಾನ್ ಆಶ್ರಮಾಕ್ ಆಯಿಲ್ಲಿ ಆನಿ
ಕೊಣೆಂಯ್ ಗೇಟ್ ಉಗ್ತಿ ಕರಿನಾತ್ಲಿ ವಿಶಯ್ ಮೆಸೇಜಿರ್
ಧಾಡ್ನ್’ ಚಡುಣೆಂ ಸಾಡೆ ಸಾತಾಂಕ್ ಹಾಂವ್ ಪಾಟಿಂ ’ಮಂಗಳ
ಜ್ಯೋತಿ’ ಆಯ್ಲೊಂ.
ಕಾಂಯ್ ಸಾಡೆ ನೊವಾಂಕ್ ಮ್ಹಾಕಾ
ರೋಹಿತಾಚೆಂ ಫೋನ್ ಆಯ್ಲೆಂ. ತಾಣೆಂ ಮ್ಹಜಿ ಕಾಲ್ಚಿ ತಶೆಂಚ್
ಆಯ್ಚಿ ಮೆಸೇಜ್ ವಾಚ್ಲ್ಲಿ ಆನಿ ಹಾಂವ್ ಬೊಂಬೊಯ್ ಥಾವ್ನ್
ಆಯಿಲ್ಲೊಂ ಪುಣ್ ಮೆಳಾನಾಸ್ತಾಂ ಪಾಟಿಂ ಗೆಲೊಂ ಮ್ಹಳ್ಳಿ
ಬೆಜಾರಾಯ್ ತಾಚ್ಯಾ ಉತ್ರಾಂನಿ ಆಸ್ಲಿ. "ಹಾಂವೆ ಪರತ್
ಯೇವ್ನ್ ತಿಕಾ ಮೆಳ್ಯೆತ್?" ಹಾಂವೆಂ ವಿಚಾರ್ಲೆಂ. ತಾಣೆಂ
"ಜರೂರ್ ಯೆಯಾ ಬ್ರದರ್" ಮ್ಹಣ್ತಚ್ ಹಾಂವ್ ಪರತ್ ಥಂಯ್
ಗೆಲೊಂ.
ಗ್ಲೇಡಿಸ್ ಬಾಯ್ ಜಿರ್ಲ್ಲಿ. ಅಸ್ಕತ್
ಜಾಲ್ಲಿ ಪುಣ್ ಮ್ಹಜೊ ಒಳೊಕ್ ಧರ್ನ್ ಉಲಯ್ಲಿ. ಕಾಂಯ್
ಪನ್ನಾಸ್-ಸಾಠ್ ಪಿಡೆಸ್ತಾಂ, ಪ್ರಾಯೆಸ್ತಾಂ, ಭುರ್ಗಿಂ
ಆಸ್ಲಿಂ.
ರೋಹಿತಾನ್ ಮ್ಹಾಕಾ ಸಕಾಳಿಂ ಕಿತ್ಯಾಕ್
ಗೇಟ್ ಉಘಡುಂಕ್ ನಾ ಮ್ಹಣ್ ಸಮ್ಜಾಯ್ಲೆಂ. ಥೊಡಿಂ ಮಾನಸಿಕ್
ಪಿಡೆಚಿಂ ಭುರ್ಗಿಂ ಥಂಯ್ ಆಶ್ರಮಾಂತ್ ಆಸಾತ್. ತಿಂ ಸಕಾಳಿಂ
ಮ್ಹೆಳೆಂ ಕರ್ತಾತ್ ಆನಿ ತೆಂ ಮೆಳೆಂ ಥಂಯ್ ಹಾಂಗಾ
ಉಡಯ್ತಾತ್ ದೆಕುನ್ ಸಕಾಳಿಂ ಸಗ್ಳ್ಯಾನ್ ಘಾಣ್ ಆಸ್ತಾ, ತಿ
ನಿತಳ್ ಕರುಂಕ್ ದೋನ್-ತೀನ್ ವೊರಾಂ ಲಾಗ್ತಾತ್ ದೆಕುನ್
ಸಕಾಳಿಂ ನೋವ್ ಪರ್ಯಾಂತ್ ಕೊಣಾಯ್ಕೀ ಆಮಿಂ ಭಿತರ್ ಘೆನಾಂವ್
ಮ್ಹಣ್. ತೆಂ ಪರಿಸರ್ ಆನಿ ಪರಿಗತ್ ಪಳೆವ್ನ್ ಮ್ಹಾಕಾ
ಅಜ್ಯಾಪ್ ಜಾಲೆಂ. ಅಪ್ಣಾಚೆಂಚ್ ಘರ್ ಹೆಂ ಬ್ರದರ್, ಪುಣ್
ಪಯ್ಲೆಂ ಎಕ್ಲೊ ಉಪ್ರಾಂತ್ ಅನ್ಯೇಕ್ಲೊ ಅಶೆಂ ಆತಾಂ
ಪನ್ನಾಸಾಂ ವಯ್ರ್ ಪ್ರಾಯೆಸ್ತಾಂ, ಪಿಡೆಸ್ತಾಂ ಆಸಾತ್
ದೆಕುನ್ ಹಾಂವ್ ಏಕ್ ಭಾಡ್ಯಾಚ್ಯಾ ಘರಾ ವಸ್ತಿ ಕರ್ತಾಂ ಆನಿ
ಹೆಂ ಘರ್ ಹ್ಯಾ ಪ್ರಾಯೆಸ್ತಾಂಚ್ಯಾ ಸೆವೆಕ್ ಮ್ಹಣ್
ದವರ್ಲಾಂ ಮ್ಹಣುನ್ ರೋಹಿತ್ ಸಾಂಗ್ತಾಲೊ.
ರೋಹಿತ್
ಸಾಂಕ್ತುಸ್ ತಸಲೆ ಆಯ್ಚ್ಯಾ ಕಾಳಾರ್ ಸಯ್ತ್ ಜಿಯೆತಾತ್ ಆನಿ
ನಿಸ್ವಾರ್ಥಿ ಸೆವಾ ದೀವ್ನ್ ಆಸಾತ್ ಮ್ಹಳ್ಳಿ ದಾಧೊಸ್ಕಾಯ್
ಮ್ಹಾಕಾ ಆಸ್ಲಿ.
ಉಪ್ರಾಂತ್ ಹಾಂವ್ ಗ್ಲೇಡಿಸ್
ಬಾಯೆಚ್ಯಾ ಖಟ್ಲ್ಯಾಲಾಗಿಂ ವಚೊನ್ ತಿಚ್ಯೆ ಬಗ್ಲೆರ್
ಬಸ್ಲೊಂ. ತಿ ಹರ್ಶೆಂಚೆಪರಿಂ ಮ್ಹಜೆಲಾಗಿಂ ಖುಶಾಲಾಯೆನ್
ಉಲಯ್ತಾಲಿ. ತಿಣೆಂ ಕೆದಿಂಚ್ ಅಪ್ಲೆಂ ದೂಕ್ ಮ್ಹಜೆಲಾಗಿಂ
ವಾಂಟುನ್ ಘೆತ್ಲ್ಲೆಂ ನಾ. ಪುಣ್ ಪಯ್ಲೆ ಪಾವ್ಟಿಂ ಮ್ಹಾಕಾ
ವಿಚಾರ್ಲೆಂ "ಮ್ಹಾಕಾ ಮೆಳೊಂಕ್ ಆಯ್ಲಾಯ್, ಮ್ಹಾಕಾ
ಕಿತೆಂಯ್ ಖಾಂವ್ಕ್ ಹಾಡ್ನ್ ಯೇವ್ನಾಂಯ್?". ಆಯ್ಕುನ್
ಮ್ಹಾಕಾ ಮ್ಹಜ್ಯಾ ಅಸ್ಕತಾಕೆಚೆರ್ ಶಿಣ್ ಆಯ್ಲೊ. ಹಾಂವ್
ತುರಂತ್ ಭಾಯ್ರ್ ಯೇವ್ನ್ ಗಾಡಿ ಚಾಲು ಕರ್ನ್ ಲಾಗ್ಶಿಲ್ಯಾ
ಎಕಾ ಆಂಗ್ಡೆಕ್ ವಚೊನ್ ಥೊಡ್ಯೊ ಪೆಕೆಟ್ಯೊ ಬಿಸ್ಕಿಟ್ಯೊ
ಆನಿ ಚೊಕ್ಲೆಟಾಂ ಹಾಡ್ನ್ ಆಯ್ಲೊಂ ಆನಿ ತಿಕಾ ದಿಲ್ಯೊ.
ಹೆಂ ಪಳೆಲ್ಲ್ಯಾ ತಿಚಿ ಸೆವಾ ಕರ್ನ್ ಆಸ್ಚ್ಯಾ
ಸಿಸ್ಟರಿಕ್ ಅಜ್ಯಾಪ್ "ತಿ ಅಶೆಂ ಕೊಣಾಯ್ಲಾಗಿಂ ಮಾಗಿನಾ"
ಹಾಂವೆಂ ತಿಕಾ ಜಾಪ್ ದೀವ್ನ್ ಸಮ್ಜಾಯ್ಲೆಂ "ಹಾಂವ್
ತಿಚೊ ಕೊಣ್ಯೀ ನ್ಹಯ್, ತಿಚೊ ಖಾಸ್ ಭಾವಾ ಸಾರ್ಕೊ"
ಗ್ಲೇಡಿಸ್ ಬಾಯೆಕ್ ಮೆಳ್ಳಲಿ ಗಜಾಲ್ ಆನಿ ತಸ್ವೀರ್
ಹಾಂವೆಂ ಸೋಶಿಯಲ್ ಮೀಡಿಯಾಂತ್ ಘಾಲಿ, ಸಿಜ್ಯೆಸ್ ತಾಕೊಡೆನ್
ಮ್ಹಜೆಥಾವ್ನ್ ತಿಚಿ ಮಾಹೆತ್ ಘೆತ್ಲಿ ಆನಿ ಉಪ್ರಾಂತ್
ಸಿಜ್ಯೆಸ್ ಆನಿ ಥೊಡೆ ಕೊಂಕಣಿ ಲೇಖಕ್ ತಿಚ್ಯಾ ಭೆಟೆಕ್
ಗೆಲೆ. ಅಶೆಂ ತಿಚಿ ಖಬರ್ ಕೊಂಕಣಿ ಲೊಕಾಕ್ ಮೆಳೊಂಕ್
ಲಾಗ್ಲಿ. ತಿಚ್ಯಾ ಸಭಾರ್ ಅಭಿಮಾನಿ ವಾಚ್ಪ್ಯಾಂನಿ
ಪರ್ಗಾಂವಾಥಾವ್ನ್ ಸಯ್ತ್ ಮ್ಹಾಕಾ ಸಂಪರ್ಕ್ ಕೆಲೊ ಪುಣ್
ಭೋವ್ ಧಾರುಣಾಯೆನ್ ಸಾಂಗ್ಚೆಂ ತರ್, ಕೊಂಕಣಿ ಬರವ್ಪಿ,
ಸಂಪಾದಕ್, ತಿಚೆ ಸಮಕಾಳೀನ್, ತಿ ಜೊಡಿರ್ ಆಸ್ತಾನಾ
ತಿಚೆಥಾವ್ನ್ ಫಾಯ್ದೊ ಜೊಡ್ಲಲೆ ತಿಚೆವಿಶಿಂ ಖೊಡಿ ಕುಲ್ಪಾಂ
ಕಾಡ್ನ್ ತಿಕಾ ಹಲ್ಕ್ ಕರ್ನ್, ತಿಕಾ ಸಕ್ಲಾ ಘಾಲ್ನ್
ಉಲಯ್ತಾಲೆ. ವಿಚಿತ್ರ್ ಮ್ಹಳ್ಯಾರ್ ಅಸಲ್ಯಾ ಜಾಯ್ತ್ಯಾಂನಿ
ಸಭಾರ್ ಪಾವ್ಟಿಂ ಮಂಗ್ಳುರ್ ಥಾವ್ನ್ ಮ್ಹಾಕಾ ಬೊಂಬೊಯ್
ಫೋನ್ ಕರ್ನ್ ’ಗ್ಲೇಡಿಸ್ ಬಾಯ್ ಕಶಿ ಆಸಾ?’ ಮ್ಹಣ್
ವಿಚಾರ್ಚೆಂ ಆಸ್ಲೆಂ.
ದೀಸ್ ಗೆಲ್ಲೆಪರಿಂ ತಿಕಾ
ವಾಚುಂಕ್ ಜಾಯ್ನಾ, ದೀಶ್ಟ್ ಗಯ್ರಿ ಜಾಲ್ಯಾ. ಒಳೊಕ್
ಮೆಳಾನಾ ಮ್ಹಣ್ತಾಲಿ. ಹಾಂವ್ ಚಡುಣೆಂ ದೋನ್-ತೀನ್
ಮಯ್ನ್ಯಾಕ್ ಏಕ್ ಪಾವ್ಟಿಂ ಮಂಗ್ಳುರಾಕ್ ಯೆತಾಲೊಂ ಆನಿ
ಹರ್ಯೆಕ್ ಪಾವ್ಟಿಂ ಹಾಂವ್ ತಿಕಾ ಮೆಳೊಂಕ್ ವೆತಾಲೊಂ,
ಪಯ್ಲೆಂ ಥೊಡೆಪಾವ್ಟಿಂ ಸೋಮೆಶ್ವರಾಂತ್ ತರ್ ಉಪ್ರಾಂತ್
ಥೊಡೆಪಾವ್ಟಿಂ ಉಚ್ಚಿಲಾ (ಬೀಚಾಲಾಗಿಂ) ಆಸ್ಚ್ಯಾ ಅನ್ಯೇಕಾ
ಆಶ್ರಮಾಂತ್ ತಿಕಾ ಮೆಳ್ತಾಲೊಂ. ಮ್ಹಜೆಸವೆಂ ಸಭಾರ್ ಲೇಖಕ್
ಮಿತ್ರ್ ಮ್ಹಜೆಸವೆಂ ಆಯ್ಲ್ಯಾತ್; ಡೊ.ಆಸ್ಟಿನ್ ಪ್ರಭು,
ಮಾವ್ರಿಸ್ ಶಾಂತಿಪುರ್, ರಿಚ್ಚಿ ಪಿರೇರ್, ಆಂಡ್ರ್ಯೂ
ಡಿಕುನ್ಹಾ, ರೋನ್ ರೊಚ್ ಕಾಸ್ಸಿಯಾ, ಎಚ್ಚೆಮ್... ಆನಿ
ಹೆರ್ ಥೊಡೆ.
ಎಕೇಕಾ ಭೆಟೆವೆಳಾರ್ ಮ್ಹಾಕಾ
ಪಾರ್ಕುಂಕ್ ಮೆಳ್ತಾಲೆಂ; ಗ್ಲೇಡಿಸ್ ಬಾಯ್ ಚಡ್ ಆನಿ ಚಡ್
ಅಸ್ಕತ್ ಜಾಲ್ಲಿ, ತಿಕಾ ಒಳೊಕ್ ಮೆಳಾನಾತ್ಲಿ. ಪುಣ್
ಮ್ಹಾಕಾ ಒಳ್ಕತಾಲಿ ಪುಣ್ ಮ್ಹಜೆಂ ನಾಂವ್ ತಿಕಾ ಉಡಾಸಾಕ್
ಯೇನಾತ್ಲೆಂ. ಪುಣ್ ಮ್ಹಜೆಲಾಗಿಂ ’ಮ್ಹಾಕಾ ಕಿತೆಂ ಖಾಂವ್ಕ್
ಹಾಡ್ನ್ ಆಯ್ಲಾಯ್ ಆಜ್’ ಮ್ಹಣ್ ಮೊಗಾನ್ ವಿಚಾರ್ತಾಲಿ. ಹೆಂ
ಆಯ್ಕುನ್ ಆಶ್ರಮಾಂತ್ಲಿ ಸಿಸ್ಟರಾಂ ಮ್ಹಾಕಾ ಸಾಂಗ್ತಾಲಿಂ;
"ತಿ ಕೊಣಾಯ್ಲಾಗಿಂ ಅಶೆಂ ವಿಚಾರಿನಾ, ಪುಣ್ ಮ್ಹಜೆಲಾಗಿಂ
ವಿಚಾರ್ತಾ".
ಉಪ್ರಾಂತ್ ತಿಕಾ ಪಶ್ಚಿಮ್
ರಿಹ್ಯಾಬಿಲೇಶನ್ ಸೆಂಟರಾ ಥಾವ್ನ್ ಕೋಟೆಕಾರ್ ಕೊವೆಂತಾಕ್
ವ್ಹರುನ್ ಥಂಯ್ ತಿಚಿ ಜತನ್ ಘೆಂವ್ಚಿ ವಿಲೇವಾರಿ ಕೆಲ್ಲಿ.
ಬ್ರದರ್ ರೋಹಿತ್ ಮ್ಹಾಕಾ ತವಳ್ ತವಳ್ ಫೊನಾಚೆರ್ ತಿಚಿ
ಖಬರ್, ತಿಚ್ಯಾ ಭಲಾಯ್ಕೆಚಿ ಮಾಹೆತ್ ದಿತಾಲೊ.
ಅಜೀಕ್ ಎಕಾ ಹಾಫ್ತ್ಯಾದಿಂ (15 ಜುಲಾಯ್) ರೋಹಿತಾನ್
ಮ್ಹಾಕಾ ಫೋನ್ ಕರ್ನ್ ಸಾಂಗ್ಲ್ಲೆಂ "ಬ್ರದರ್, ಗ್ಲೇಡಿಸ್
ಬಾಯೆಚೆಂ ಆಂಗ್ ಸುಜ್ಲಾಂ, ಆಂಗಾಂತ್ಲೆಂ ಉದಕ್ ದೆಂವ್ತಾ
ದೆಕುನ್ ಏಕ್ ದೋನ್ ಪಾವ್ಟಿಂ ಡೊಕ್ಟರಾಂಕ್ ಹಾಂಗಾ ಹಾಡ್ಲೆಂ
ಆನಿ ತಾಣಿಂ ಸಾಂಗ್ಲಲೆಪರಿಂ ಆಮಿ ತಿಕಾ ದೇರಳಕಟ್ಟೆಚ್ಯಾ
ಯೆನಪೋಯಾಂತ್ಲ್ಯಾ ಐಸಿಯುಂತ್ ಭರ್ತಿ ಕೆಲಾಂ’. ಮ್ಹಣಾಲೊ.
ಕಿತೆಂಯ್ ಗರ್ಜ್ ಪಡ್ಲಿ ತರ್ ಮ್ಹಾಕಾ ಕಳಯ್ ಬ್ರದರ್ ಮ್ಹಣ್
ಹಾಂವೆಂ ತಾಕಾ ಸಾಂಗ್ಲೆಂ.
ಹಿ ಖಬರ್ ಹಾಂವೆಂ
ಮ್ಹಜ್ಯಾ ವಾಟ್ಸಾಪ್ ಪಂಗ್ಡಾಂನಿ ಆಸ್ಚ್ಯಾ ಒಳ್ಕಿಚ್ಯಾಂಕ್
ಧಾಡುನ್ ತಿಚ್ಯಾ ಭಲಾಯ್ಕೆಪಾಸತ್ ಮಾಗೊಂಕ್ ಉಲೊ ದಿಲೊ.
ಪುಣ್ ಹಾಂತು ಸಯ್ತ್ ಸ್ವ-ಫಾಯ್ದೊ ಜೊಡ್ಚಾಂತ್ ಆಮ್ಚಾ
ಸಮಾಜೆಂತ್ ಉಣೆಂ ನಾಂತ್. ಎಕ್ಲ್ಯಾ ದೊಗಾಂನಿ ತಿಚೆವಿಶಿಂ
ಶೃದ್ದಾಂಜಲಿ ಲೇಖನ್ ಬರಂವ್ಕ್ ಸುರು ಕರ್ನ್ ಸಯ್ತ್
ಜಾಲ್ಲೆಂ ಮ್ಹಳ್ಯಾರ್ ಕೊಣ್ಯೀ ಪಾತ್ಯೆತಿತ್? ತೆಂಯ್
’ಶಿಕ್ಪಿ’ ವರ್ಗಾಂತ್ ಆಸ್ಚಾಂನಿ. ತಿಚ್ಯಾ ಉತರ್ ಪ್ರಾಯೆರ್
ತಿಣೆಂ ಕರ್ನ್ ಆಸ್ಲ್ಯಾ ನಿಸ್ವಾರ್ಥಿ ಕೊಂಕಣಿ ವಾವ್ರಾಕ್
ಸಯ್ತ್ ಅಪ್ಲ್ಯಾ ಫಾಯ್ದ್ಯಾಕ್ ಗಳ್ಸುಂಕ್ ಹೆ
ಪಾಟಿಂ-ಮುಕಾರ್ ಚಿಂತುಂಕ್ ಗೆಲ್ಲೆ ನ್ಹಯ್. ಬರೆಂಚ್ ಜಾಲೆಂ
ಚಡಿತ್ ಶಿಕ್ಪಿ ನ್ಹಯ್ ಆಸೊನ್ಯೀ ಬಾಯ್ ಗ್ಲೇಡಿಸ್ ರೇಗೊನ್
ಪಯ್ಲೆಂಚ್ ಜಿಣ್ಯೆಚೆಂ ಅಡ್ಹೂಕ್ ಲಿಸಾಂವ್ ಶಿಕೊನ್
ಜಾಲ್ಲೆಂ.
ಸನ್ವಾರಾ (19 ಜುಲಾಯ್) ತಿಕಾ
ಆಸ್ಪತ್ರೆಂತ್ಲೊ ಡಿಸ್ಚಾರ್ಜ್ ಕರುನ್ ಆಶ್ರಮಾಕ್ ಹಾಡ್ಲೊ.
ಪುನ್ ಸೊಮಾರಾ (21 ಜುಲಾಯ್) ಸಕಾಳಿಂ ತಿಣೆಂ ಹ್ಯಾ ಕ್ರೂರ್
ಸಂಸಾರಾಕ್ ಸಾಸ್ಣಾಚೊ ಆಧೇವ್ಸ್ ಮಾಗ್ಲೊ. ಹಿ ಖಬರ್ ಬ್ರದರ್
ರೋಹಿತಾನ್ ಫಾಂತ್ಯಾರ್ ದಿತಾಸ್ತಾಂ ಹಾಂವ್ ಅನ್ಯೇಕಾ
ಫೊನಾರ್ ಆಸ್ಲೊಂ. ತಿಣೆಂ ಕಾಂಯ್ ತೆಂಪಾದಿಂಚ್ ಮ್ಹಾಕಾ
ಸಾಂಗ್ಲ್ಲೆಂ ಆಸಾ ’ಹಾಂವ್ ಮೆಲ್ಯಾರ್ ಮ್ಹಜಿ ಕೂಡ್
ಕೆ.ಎಮ್.ಸಿ.ಕ್ ದಾನ್ ದಿಲ್ಯಾ, ತಿ ಪಳೆವ್ನ್ ಘೆತಲಿಂ.
ಅಪ್ಣಾಕ್ ಕಸ್ಲಿಚ್ ಮೊರ್ನಾಚಿ ವಿಧಿ ನಾಕಾ, ನಾಕಾ
ಸುಂರ್ಗಾರ್, ನಾಕಾ ಬನಾವಟಿ ಉತ್ರಾಂಚಿ ತಾರಿಫ್, ನಾಕಾ
ಮ್ಹಜೊ ಉಡಾಸ್, ಮ್ಹಜೆಸವೆಂ ಮ್ಹಜೆಂ ನಾಂವ್ ಸಯ್ತ್ ಅಖೇರ್
ಜಾಂವ್’ ತಿಚ್ಯಾ ಉತ್ರಾಂನಿ ಆಸ್ಚಾ ದುಕಿಚಿ ಗುಂಡಾಯ್
ಪಾರ್ಕುಂಚಿ ಸಮ್ಜಣಿ ಜಾಂವ್ ಶಿಕಪ್ ಜಾಂವ್ ಮ್ಹಜೆಲಾಗಿಂ
ನಾ.
ಆಜ್ ಗ್ಲೇಡಿಸ್ ಬಾಯ್ ಆಮ್ಚೆಮಧೆಂ ನಾ ಪುಣ್
ತಿಣೆಂ ಉಟಯಿಲ್ಲೆಂ ಸವಾಲ್ ಅಧುರೆಂಚ್ ಆಸಾ ಆನಿ ಆಮ್ಕಾಂ
ಉಭೆಂಚ್ ಚಿರುನ್ ಆಸಾ;
ತಿ ಅಪ್ಣಾಚಿ ಖಾಸ್, ವ ಒಳ್ಕಿಚಿ
ಮ್ಹಣ್ತೆಲ್ಯಾಂನಿ ಅಪ್ಣಾಕ್ ಅಪ್ಣಾನ್ ವಿಚಾರ್ ಕರ್ಚೊ
’ಅಖೇರಿಚೆಂ ಕೆದ್ನಾಂ ಹಾಂವ್ ತಿಕಾ ಮೆಳ್ಳೊಂ?’
ಪುಣ್ ಏಕ್ ನಖ್ಖೆಂ ಸಾಂಗ್ಯೆತಾ; ಶೆಕ್ಡ್ಯಾಂತ್ ಅಸಲೆಂ
ವೆಕ್ತಿತ್ವ್ ಕಾಂಯ್ ಏಕ್ ದೋನ್ ಮೆಳತ್. ಅಪ್ಲಿ ಜಿಣಿಂಚ್
ಕೊಂಕಣಿ ಆನಿ ಹೆರಾಂ ಪಾಸತ್ ಖರ್ಚಿಲ್ಲಿ, ಅಪ್ಣಾಪಾಸತ್
ಕಿತೆಂಚ್ ಕರಿನಾಸ್ತಾಂ, ಅಪ್ಲ್ಯಾ ಥಾವ್ನ್ ಪರ್ಕಿ
ಜಾವ್ನ್ ಜಿವಿತಾಚಿಂ ಅಖೇರಿಚಿಂ ವರ್ಸಾಂ ತಿಣೆಂ ಖರ್ಚಿಲಿಂ
ಆನಿ ಹ್ಯಾ ಜಿವಿತಾ ಹಂತಾಚಿ ಉತ್ರೊಣ್ ಕರುನ್ ತಿ ಗೆಲಿ.
ತಿಚ್ಯಾ ಜಿವಿತಾಥಾವ್ನ್ ತಿಚ್ಯಾ ಚಿಂತ್ಪಾಥಾವ್ನ್ ತಿಚ್ಯಾ
ವೆಕ್ತಿತ್ವಾಥಾವ್ನ್ ಆಮ್ಕಾಂ ಶಿಕುಂಕ್ ಜಾಯ್ತೆಂ ಆಸಾ.
(ಬಾಯ್ ಗ್ಲೇಡಿಸ್ ರೇಗೊಕ್
ಅಖೇರಿಚಿ ಭೆಟ್ ದೀಂವ್ಕ್ ಗೆಲ್ಲ್ಯೆವೆಳಾರ್ ಕಾಡ್ಲ್ಲಿ
ತಸ್ವೀರ್)
ದೇವ್ ಬರೆಂ ಕರುಂ
ವಲ್ಲಿ ಕ್ವಾಡ್ರಸ್
(ಏಕ್ ಕೊಂಕಣಿ
ಚಾಕೊರ್)
- ವಲ್ಲಿ ಕ್ವಾಡ್ರಸ್
[ಜುಲಾಯ್, 2025] |
