ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] ಸಾಂಚೊ ಮೊಡ್ಟನಾ (- ಶಯ್ಲೇಂದ್ರ ಮೆಹ್ತಾ)

ಎಕ್ ಸಮಾಜ್ ಮ್ಹಣ್ತಚ್ ತಾಂತೂನ್ ದಾದ್ಲೊ ತಶೆಂಚ್ ಅಸ್ತುರಿ ದೊಗಾಂಕ್ ಸ್ಥಾನ್-ಮಾನ್ ಆಸುಂಕ್ ಜಾಯ್: ಹೆಂ ಪುಸ್ತಕಾಂನಿ ಆಮ್ಕಾಂ ವಾಚುಂಕ್ ಮೆಳ್ಚೆಂ ವ್ಯಾಖ್ಯಾನ್. ಪುಣ್ ಹಕೀಗತೆಂತ್ ಹೆಂ ಕಿತ್ಲೆಂ ಸತ್? ಆಯ್ಚ್ಯಾ ಸಮಾಜೆಂತ್ ಎಕಾ ಅಸ್ತುರಿಕ್ ಕಿತ್ಲೆಶ್ಯೊ ಬಂದಡ್ಯೊ’ ಜಾಂವ್ ಧಾರ್ಮಿಕ್, ಜಾಂವ್ ಸಾಮಾಜಿಕ್ ವಾ ಹೆರ್ ಪುಣ್ ಹ್ಯೊ ಬಂದಡ್ಯೊ ಆಸಾತ್ ಕಿತ್ಯಾಕ್? ಹ್ಯಾ ಬಂದೆಡೆಂತ್ ಸಮಾಜೆನ್ ಠರಾಯಿಲ್ಲ್ಯಾ ನೇಮಾಂ ಪ್ರಕಾರ್ ಜಿಯೆಂವ್ವೆಂ ಆನಿ ಎಕಾ ಪಿಂಜ್ರ್ಯಾಂತ್ ಸುಕ್ಣೆಂ ಜಿಯೆಂವ್ಚೆ ಮಧೆಂ ಕಾಂಯ್ ತಫಾವತ್ ಆಸಾಕಾಯ್? ಎಕ್ ಅಪುರ್ಭಾಯೆಚೆಂ ಅಸ್ತುರಿವಾದ್ ಚಿಂತ್ಪಾಕ್ ಘೆವ್ನ್ ಆಯ್ಲಾ ಬಾಬ್ ಶೈಲೇಂದ್ರ ಮೆಹ್ತಾ.

ಕೊಂಕಣಿಂತ್ ಬಾಬ್ ಶೈಲೇಂದ್ರ ಮೆಹ್ತಾಚ್ಯೊ ಕವಿತಾ ಎಕಾ ವಿಶಿಷ್ಟ್ ವರ್ಗಾಚ್ಯೊ ಜಾಂವ್ಕ್ ತಾಚೆಂ ವಾಚಪ್ ತಶೆಂಚ್ ಅಧ್ಯಯನ್ ಕಾರಣ್ ಮ್ಹಣ್ ತಾಕಾ ಲಾಗ್ಶಿಲ್ಯಾನ್ ಒಳ್ಕೊಂಚೆ ಸಮ್ಜತಾತ್. ತಾಚ್ಯಾ ಕವಿತೆಂನಿ ಉತ್ರಾಂಚಿ ರಾಸ್ ನಾ, ಪ್ರಾಸ್-ಅಲಂಕಾರಾಚೊ ಭೊರೊ ನಾ, ಪುಣ್ ಅಪುರ್ಭಾಯೆಚೆಂ ವಯ್ಚಾರಿಕ್ ಚಿಂತಪ್ ಆಸಾ. ಏಕ್ ವಾವ್ರಾಡಿ (Activist), ಚಿಂತ್ಪಿ, ವಿಮರ್ಶಕ್ ಜಾವ್ನಾಸ್ಚೊ ಹೊ ಉಪ್ರಾಂತ್ ’ಕವಿ’ ಜಾವ್ನಾಸಾ ದೆಕುನ್ ತಾಚಿ ದರೇಕ್ ಕವಿತಾ ಅಭ್ಯಾಸ್‌ಯೋಗ್ಯ್ ಜಾವ್ನಾಸಾ ಮ್ಹಣ್ಚ್ಯಾಕ್ ಹಿ ಕವಿತಾ ಗವಾಯ್ ದಿತಾ. ಬಾಕಿಚೆಂ ಪಾರ್ಕುಂಕ್ ತುಕಾಚ್ ಉಲೊ ದಿತಾಂ.

- ಸಂ

[ಕವಿತಾ] ಸಾಂಚೊ ಮೊಡ್ಟನಾ (- ಶಯ್ಲೇಂದ್ರ ಮೆಹ್ತಾ)

ಸಾಂಚೊ ಮೊಡ್ಟನಾ ತಾಂಣಿ ಮ್ಹಾಕಾ ಶೀದಾ ಚಲೊಂಕ್ ಸಾಂಗ್ಲೆಂ, ಅದೃಶ್ಯ್ ಹಾತಾಂನಿ ಕಾಡಿಲ್ಲ್ಯಾ ಒಳೀಂಭಿತರ್, ಬಸ್ಪಾಕ್ ಬೊಕ್ಸಾ ಭಿತರ್, ವೆವಸ್ಥಿತ್ ಆನಿ ನಿವಳ್, ಪೂಣ್ ಮ್ಹಜ್ಯಾ ಪಾಂಯಾಂಕ್ ವಾಂಕ್ಡ್ಯಾ ಮಾರ್ಗಾಚಿ ತಳ್ಮಳ್ ಆಶಿಲ್ಲಿ, ಜಂಯ್ ಫುಲ್ತಾಲಿಂ ರಾನ್-ಫುಲಾಂ ರೂಢಿವಾದಾಚ್ಯಾ ಖಾಚೀಂಮದಿಂ. ತಾಂಣಿ ಮ್ಹಣ್ಲೆಂ ಮ್ಹಜೊ ಆವಾಜ್ ಮೊವಾಳ್ ಆಸೂಂಕ್ ಜಾಯ್, ಕೊಂಡ್ಯಾಂಚ್ಯಾ ರಾನಾಂತ್ಲ್ಯಾನ್ ವ್ಹಾಂವ್ಪಿ ವಾರ್ಯಾವರಿ, ಪೂಣ್ ಹಾಂವೆ ತೊ ವಾಡಯ್ಲೊ ವಾದಾಳಾ ಭಾಶೆನ್, ನಿಶ್ಚಲ್ ಹವೆಆಡ್ ಎಕ್ ಹುಂಕಾರ್, ಪುರ್ವಿಲ್ಲ್ಯಾ ಝಾಡಾಂಚಿಂ ಪಾನಾಂ ಹಾಲೊವಂಕ್ ಜಿಂ ರಾವ್ಲ್ಯಾಂತ್ ಉಬಿಂ ಚಡ್ ಕಾಳ್ ಮೌನಾಂತ್. ತಾಂಣಿ ಮ್ಹಾಕಾ ಸಾಂಗ್ಲೆಂ ತಾಂಚೆ ರಂಗ್ ನ್ಹೆಸ್ಪಾಕ್ , ಇತಿಹಾಸಾಚ್ಯಾ ಕಾಪ್ಡಾಂತ್ ಛಾಪಿಲ್ಲೆ ಪೂಣ್ ಹಾಂವೆ ರಂಗಯ್ಲಿ ಮ್ಹಜಿ ಕಾತ್ ನವ್ಯಾ ರಂಗಾಂನಿ , ಸೂರ್ಯಾಸ್ತ್ ಆನಿ ದರ್ಯಾ ಹಾಂಚೆಕಡ್ಲ್ಯಾನ್ ರಿಣಾನ್ ಘೆತಿಲ್ಲ್ಯಾ, ಆನಿ ತ್ಯಾ ದೊಳ್ಯಾಂತ್ಲ್ಯಾ ಉಜ್ಯಾಕಡ್ಲ್ಯಾನ್ ಜೆ ಕರ್ತಾತ್ ಧಾಡಸ್ ಕ್ಷಿತೀಜಾ ಪಲ್ತಡಿಂ ಪಳೊವ್ಪಾಚೆಂ. ತಾಂಕಾಂ ಹಾಂವ್ ಲ್ಹಾನಚ್ ರಾವ್ಪಾಕ್ ಜಾಯ್ ಆಶಿಲ್ಲೆಂ, ಪಾಖಾಂ ಗುಠ್ಲಾವನ್ ಘೊಂಟೆರಾಂತ್ ಜ್ಞಾತಾಚೆ ಸುರಕ್ಷೆಂತ್, ಪೂಣ್ ಹಾಂವೆಂ ತಿಂ ಪಾಖಾಂ ರೂಂದ್ ಪಾತ್ಳಾಯಲಿಂ, ಶಕ್ಯತಾಯೆಚೆಂ ವಾರೆಂ ಪಳೊವ್ನ್, ಆನಿ ಗೆಲೆಂ ಉಡೂನ್ ಸಾವ್ಳಿ ಸೊಡೂನ್. ತಾಂಣಿ ಕಾಡಿಲ್ಲ್ಯೊ ಒಳಿ ಜಾತಾತ್ ಫೀಕ್ಯೊ , ತಾಂಚೆ ಫುತ್ಫುತಪಿ ಆವಾಜ್ ಜಾತಾತ್ ಚಡ್ ಮೊಟೆ, ಪೂಣ್ ಧೈರ್ಯವಂತ್ ದಿತಾತ್ ನ್ಹಯ್ಕಾರ್ ತಾಂಚೆ ಬಂದ್ಖಣೀಂತ್ ರಾವ್ಪಾಕ್. ಹಾಂವ್ ತಾಂಚೆ ಪರಂಪರೆಚಿ ಬೆರೀಜ್ ನ್ಹಯ್; ನವ್ಯಾ ಫಾಂತೊಡೆಚೊ ಉಜ್ವಾಡ್ ಹಾಡ್ಪಿ ಉಜ್ಯಾ ಕಿಟಾಳ್ ಹಾಂವ್. **** - ಶಯ್ಲೇಂದ್ರ ಮೆಹ್ತಾ**. [ಎಪ್ರಿಲ್, 2020]

	ಶಯ್ಲೇಂದ್ರ ಮೆಹ್ತಾ: ನಾಮ್ನೆಚೊ ಕವಿ, ಅಂಕಣಕಾರ್ ಆನಿ ಸಾಹಿತ್ಯಿಕ್ ವಿಶ್ಲೇಷಕ್. ಸಿಸಿಫಸ್ ತೆಂಗ್‌ಶೆರ್, ವಿಶನ್‌ವಾಸಾಂತ್ಲೊ ಭಂವ್ಡೇಕಾರ್ (ನಿರ್ವಾಸಿತ್ ಯಾತ್ರಿಚಿ ಭಂವ್ಡಿ) ಹಾಚಿಂ ದೋನ್ ಕವಿತಾಸಂಗ್ರಹ್ ನಾಗರಿಂತ್ ತಶೆಂಚ್ ಕನ್ನಡ ಲಿಪಿಂತ್ ಪರ್ಗಟ್ಲ್ಯಾಂತ್. ’ಸಿಸಿಫಸ್ ತೆಂಗ್‌ಶೆರ್’ ಪುಸ್ತಕಾಕ್ 2020 ಇಸ್ವೆಂತ್ ವಿಶ್ವ ಕೊಂಕಣಿ ಕೇಂದ್ರಚೊ ವಿಮಲಾ ವಿ ಪೈ. ಫೌಂಡೇಶನಾಚೊ ಪುರಸ್ಕಾರ್ ಲಾಭ್ಲಾ. ’ನಿರ್ವಾಸಿತ್ ಯಾತ್ರಿಚಿ ಭಂವ್ಡಿ’ ಪುಸ್ತಕಾಕ್ ಡೆನಿಸ್ ಡಿಕುನ್ಹಾ ಸ್ಮಾರಕ್ ಆಶಾವಾದಿ ಪ್ರಕಾಶನಾಚೊ ಉತ್ಕೃಷ್ಟ್ ಲಿಪ್ಯಂತರ್ ಪುಸ್ತಕ್ ಪುರಸ್ಕಾರ್ ಲಾಭ್ಲಾ. ಪಯ್ಣಾರಿಚೆರ್ ’ಕವಿ ಆನಿ ಹಕ್ಕ್-ಮಾನ್’ ಕವಿತೆಚೆಂ ಅಂಕಣ್ ಹಾಣೆಂ ಚಲಯ್ಲಾಂ. ಪ್ರಸ್ತುತ್ ಗೊಂಯಾಂತ್ ವಸ್ತಿ ಕರುನ್ ಆಸಾ ಆನಿ ’ವರ್ಣಮುದ್ರ’ ತ್ರೈಮಾಸಿಕ್ ಪತ್ರಿಕೆಚೊ ಸಂಪಾದಕ್ ಜಾವ್ನಾಸಾ.
[Kovita] Sancho Moddttona* (- Shailendra Mehta)*
Ek somaz mhonntoch tantun dadlo toxench osturi dogank sthan-man asunk zai: hem pustokamni amkam vachunk mellchem veakhean. Punn hokigotent hem kitlem sot? aichea somajent eka osturik kitlexeo bondoddeo’ zamv dharmik, zamv samajik va her punn heo bondoddeo asat kiteak? hea bondeddent somajen tthorayil'lea nemam prokar jiemvvem ani eka pinjreant suknnem jiemvche modhem kaim tofaut asakai? ek opurbhayechem osturivad chintpak gheun aila Bab Shailendra Mehta. Konkonnint bab Shailendra Mehta-cheo kovita eka vixixtt vorgacheo zaunko tachem vachop toxench odhyoin karonn mhonn taka lagxilean ollkonche somzotat. Tachea kovitemni utranchi ras na, pras-olonkaracho bhoro na, punn opurbhayechem voicharik chintop asa. Ek vauraddi (Activist), chintpi, vimorxok zaunascho ho uprant ’kovi’ zaunasa dekun tachi dorek kovita obheas‌yogy zaunasa mhonncheak hi kovita govai dita. Bakichem parkunk tukach ulo ditam. - Som
[Kovita] Sancho Moddttona* (- Shailendra Mehta)*
Sancho Moddttona Tamnni mhaka soroll cholpak sanglem, Odrixy hatamni kaddil'lea ollimbhitor, Bospak boksa bhitor, veusthit ani nivll, Punn mhojea pamyank vankddea margachi tollmoll axil'li, Zom-i fultalim ranfulam ruddhivadachea khachim'modim. Tamnni mhonnlem mhozo avaz soumy asunk zai, Konddeanchea ranantlean vhamvpi vareavori, Punn hamve to vaddoilo vadlla bhoxen, Nixchol hoveadd ek hunkar, Purvil'lea zhaddanchim panam halounk jim rauleant ubim chodd kall mounant. Tamnni mhaka sanglem tanche rong nhespak , Itihasachea kapddant chhapil'le Punn hamve rongoili mhoji kat novea rongamni , Sureast ani dorea hanchekoddlean rinnan ghetil'lea, Ani tea dolleantlea ujeakoddlean Je kortat dhaddos kxitiza poltoddim polloupachem. Tankam hamv lhanoch raupak zai axil'lem, Pakham gutthlaun ghontterant goneatache surkxent, Punn hamvem tim pakham rund patllailim, Xokyotayechem varem polloun, Ani gelem uddun saulli soddun. Tamnni kaddil'leo olli zatat fikeo , Tanche futfutopi avaz zatat chodd motte, Punn dhoiryount ditat nhoikar tanche bondkhonnint raupak. Hamv tanche poromporechi beriz nhoi; Povea fantoddecho ujvadd haddpi ujea kitt hamv. **** - Shailendra Mehta** [February, 2026]

	Shailendra Mehta: Namnecho kovi, onkonnokar ani sahityik vixlexok. Sisifos Teng‌xer, Vixon‌vasantlo Bhomvddekar (Nirvasit Yatrichi Bhomvddi) hachim don kovitasongroh nagorint toxench kon'noddo lipint porgottleant. ’Sisifos Teng‌xer’ pustokak 2020 isvent vixv konkonni kendrocho Vimala V Pai. Founddexonacho puroskar labhla. ’Nirvasit Yatrichi Bhomvddi’ pustokak Denis Dcunha smarok Ashawadi Prakashan-acho utkrixtt lipyontor pustok puroskar labhla. Poinnaricher ’Kovi ani Hokk-Man’ kovitechem onkonn hannem choloilam. Prostut Gõyant vosti korun asa ani ’Varnamudra’ troimasik potrikecho sompadok zaunasa.
[कविता] सांचो मोडटना (- शयलेंद्र मेहता)
एक समाज म्हणतच तांतून दादलो तशेंच असतुरी दोगांक स्थान-मान आसुंक जाय: हें पुसतकांनी आमकां वाचुंक मेळचें व्याख्यान. पूण हकीगतेंत हें कितलें सत? आयच्या समाजेंत एका असतुरीक कितलेश्यो बंदड्यो’ जांव धार्मीक, जांव सामाजीक वा हेर पूण ह्यो बंदड्यो आसात कित्याक? ह्या बंदेडेंत समाजेन ठरायिल्ल्या नेमां प्रकार जियेंव्वें आनी एका पिंजऱ्यांत सुकणें जियेंवचे मधें कांय तफावत आसाकाय? एक अपुर्भायेचें असतुरिवाद चिंत्पाक घेवन आयला बाब शैलेंद्र मेहता. कोंकणिंत बाब शैलेंद्र मेहताच्यो कविता एका विशिषट वर्गाच्यो जावंक ताचें वाचप तशेंच अध्ययन कारण म्हण ताका लागशिल्यान ओळकोंचे समजतात. ताच्या कवितेंनी उत्रांची रास ना, प्रास-अलंकाराचो भोरो ना, पूण अपुर्भायेचें वयचारीक चिंतप आसा. एक वावराडी (Activist), चिंत्पी, विमर्शक जावनासचो हो उपरांत ’कवी’ जावनासा देकून ताची दरेक कविता अभ्यास‌योग्य जावनासा म्हणच्याक ही कविता गवाय दिता. बाकिचें पार्कुंक तुकाच उलो दितां. - सं
[कविता] सांचो मोडटना (- शयलेंद्र मेहता)
सांचो मोडटना तांणी म्हाका सरळ चलपाक सांगलें, अदृश्य हातांनी काडिल्ल्या ओळींभितर, बसपाक बॉक्सा भितर, वेवस्थीत आनी निवळ, पूण म्हज्या पांयांक वांकड्या मार्गाची तळमळ आशिल्ली, जंय फुलतालीं रानफुलां रूढिवादाच्या खाचींमदीं. तांणी म्हणलें म्हजो आवाज सौम्य आसूंक जाय, कोंड्यांच्या रानांतल्यान व्हांवपी वाऱ्यावरी, पूण हांवे तो वाडयलो वादळा भशेन, निश्चल हवेआड एक हुंकार, पुर्विल्ल्या झाडांचीं पानां हालोवंक जीं रावल्यांत उबीं चड काळ मौनांत. तांणी म्हाका सांगलें तांचे रंग न्हेसपाक , इतिहासाच्या कापडांत छापिल्ले पूण हांवे रंगयली म्हजी कात नव्या रंगांनी , सूर्यास्त आनी दर्या हांचेकडल्यान रिणान घेतिल्ल्या, आनी त्या दोळ्यांतल्या उज्याकडल्यान जे करतात धाडस क्षितीजा पलतडीं पळोवपाचें. तांकां हांव ल्हानच रावपाक जाय आशिल्लें, पाखां गुठलावन घोंटेरांत ज्ञाताचे सुरक्षेंत, पूण हांवें तीं पाखां रूंद पातळायलीं, शक्यतायेचें वारें पळोवन, आनी गेलें उडून सावळी सोडून. तांणी काडिल्ल्यो ओळी जातात फीक्यो , तांचे फुतफुतपी आवाज जातात चड मोटे, पूण धैर्यवंत दितात न्हयकार तांचे बंदखणींत रावपाक. हांव तांचे परंपरेची बेरीज न्हय; नव्या फांतोडेचो उजवाड हाडपी उज्या कीट हांव. **** - शयलेंद्र मेहता.** [फेब्रेर, २०२६]

	शयलेंद्र मेहता: नाम्नेचो कवी, अंकणकार आनी साहित्यीक विशलेषक. सिसिफस तेंग‌शेर, विशन‌वासांतलो भंवडेकार (निर्वासीत यात्रिची भंवडी) हाचीं दोन कवितासंग्रह नागरिंत तशेंच कन्नड लिपिंत पर्गटल्यांत. ’सिसिफस तेंग‌शेर’ पुसतकाक २०२० इस्वेंत विश्व कोंकणी केंद्रचो विमला वी पै. फौंडेशनाचो पुरसकार लाभला. ’निर्वासीत यात्रिची भंवडी’ पुसतकाक डेनीस डिकुन्हा स्मारक आशावादी प्रकाशनाचो उत्कृषट लिप्यंतर पुसतक पुरसकार लाभला. पयणारिचेर ’कवी आनी हक्क-मान’ कवितेचें अंकण हाणें चलयलां. प्रसतूत गोंयांत वसती करून आसा आनी ’वर्णमुद्र’ त्रैमासीक पत्रिकेचो संपादक जावनासा.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.