ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] ಪಾವ್ಸ್ (- ಉರ್ಜಿತಾ ಭೊಬೆ)

ಪಾವ್ಸಾಳ್ ಆನಿ ಗಿಮಾಳ್ ಪ್ರಕೃತಿಚ್ಯಾ ಕಾಳಾಚಿಂ ರೊದಾಂ. ಪಾವ್ಸಾಳ್ ಆನಿ ಪಾವ್ಸಾಂತ್ ಸಾರ್‌ಲ್ಲೆಂ ಭುರ್ಗೆಂಪಣ್ ಮನ್ಶಾಚ್ಯಾ ಮತಿಚ್ಯಾ ಪಡ್ದ್ಯಾಂತ್ ಸದಾಂ ಜಿವಾಳ್ ಉರ್ಚೆತಸಲೆಂ. ಇಸ್ಕೊಲಾಚ್ಯಾ ದಿಸಾಂನಿ ಪಾವ್ಸಾಂತ್ ಭಿಜೊನ್ ಖೆಳ್ಚೆ ಖೆಳ್, ಆನಿ ಪಾವ್ಸಾಂತ್ ಭಿಜೊನ್ ಖೆಳ್‌ಲ್ಲೆವರ್ವಿಂ ಯೆಂವ್ಚೊ ತಾಪ್, ಆನಿ ತಾಪಾಂತ್ ನಿದೊನ್ ಆಸ್ತಾನಾ ಆವಯ್-ಬಾಪಾಯ್ಚೊ ಮಾಯ್ಪಾಸಿ ಮೋಗ್ ಸರ್ವ್ ಸಂಪ್ಲೆಲ್ಯಾ ಕಾಳಾಸವೆಂ ಆಮ್ಚೆಥಾವ್ನ್ ಪಯ್ಸ್ ವೆತಾ ಪುಣ್ ಸದಾಂ ಯಾದಿಂತ್ ಉರ್ತಾ.

ಬಾಯ್ ಉರ್ಜಿತಾನ್ ಹಿ ಎಕಾಥರಾಚಿ ಫ್ಲ್ಯಾಶ್‌ಬ್ಯಾಕ್ ಚಿಂತ್ಪಾಚಿ ಕವಿತಾ ಆಮ್ಚೆಮುಕಾರ್ ಉಭಿ ಕೆಲ್ಯಾ. ಪಾವ್ಶಿಲೊ ಕಾಳ್ ಹೊ, ಖೂಪ್ ಪಾವ್ಸ್ ಪಡೊನ್ ಆಸಾ; ಮುಂಬಂಯ್ತ್, ಕೇರಳಾಂತ್, ಮಂಗ್ಳುರಾಂತ್ ತಶೆಂಚ್ ಗೊಯಾಂತ್. ಹ್ಯಾ ಸಂಧರ್ಭಿಂ ಆಮಿಂ ಪಾಟಿಂ ಘುಂವೊನ್ ಆಮಿಂ ಸಾರ್‌ಲ್ಲೆಂ ಆಮ್ಚೆಂ ಭುರ್ಗೆಂಪಣ್, ತಶೆಂಚ್ ತೆ ಪಾವ್ಶಿಲೆ ದೀಸ್ ಯಾದಿಕ್ ಹಾಡ್ಲೆ ತರ್ ಆಮ್ಕಾಂ ಜಾಂವ್ಚೊ ಅನ್ಭೋಗ್ ಖರೊಚ್ ಆಮ್ಕಾಂ ಎಕಾ ವೆಗ್ಳ್ಯಾ ಚಿಂತ್ಪಾಕ್ ವ್ಹರುನ್ ವೆತಾ. ಆತಾಂ ತೊ ಅನ್ಭೋಗ್ ಜೊಡ್ಚಾಕ್, ಹ್ಯಾ ಕವಿತೆಚೊ ಅಸ್ವಾದ್ ಕರುಂಕ್ ತುಕಾ ಉಲೊ ದಿತಾಂ.

- ಸಂ

[ಕವಿತಾ] ಪಾವ್ಸ್ (- ಉರ್ಜಿತಾ ಭೊಬೆ)

ಪಾವ್ಸ್ ಭುರ್ಗೆಪಣಾಂತ್ ಪಾವ್ಸ್ ಮ್ಹಾಕಾ ಖೂಬ್ ಖೂಬ್ ಆವ್ಡಟಾಲೊ. ಜಿತ್ಲೆಂ ಮ್ಹಾಕಾ ಭೀಜನ್ ದಿಸಂ ತಿತ್ಲೊ ತೊ ಝಡ್ಟಾಲೊ ಪಾವ್ಸಾ ವಾಂಗ್ಡಾ ಖೆಳ್ಟಾಲೆಂ ಸರೀಂಕ್ ವಚೂನ್ ಮೆಳ್ಟಾಲೆಂ ಪಾವ್ಳ್ಯೊ ಆಂಗಾರ್ ಝೆಲ್ತಾಲೆಂ ಪಾವ್ಸಾಂತ್ ಭೀಜತ್ ಚಲ್ತಾಲೆಂ ಮಾಯೆನ್ ಕೆನ್ನಾ ಪೊಶೆತಾಲೊ ಕೆನ್ನಾ ನೆಟಾನ್ ಝಡ್ಟಾಲೊ ಭುರ್ಗೆಪಣಾಂತ್ ಪಾವ್ಸ್ ಮ್ಹಾಕಾ ಖೂಬ್ ಖೂಬ್ ಆವ್ಡಟಾಲೊ ವ್ಹಡ್ ಹಾಂವ್ ಜಾತಾ ತಶೆಂ ಬದ್ಲಲೆಂ ರೂಪ್ ತಾಜೆಂ ಮಜಾ ಜಾಲಿ ಉಣಿ ಆನಿ ವಜೆಂ ಜಾಲೆಂ ಖೂಪ್ ತಾಜೆಂ ಬದ್ ನಾಸ್ಲೊ ವಿಣವ್ಣೆಕ್ ವಾಟೆರ್ ಮದೀಂಚ್ ಯೆತಾಲೊ ಖೆಳೂಂಕ್ ಮ್ಹಾಕಾ ನಾಸ್ಲೊ ವೆಳ್ ವೆಂಗೆತ್ ತರಿ ಘೆತಾಲೊ ಭುರ್ಗೆಪಣಾಂತ್ ಪಾವ್ಸ್ ಮ್ಹಾಕಾ ಜಿತ್ಲೊ ಮ್ಹಣೂನ್ ಆವ್ಡಟಾಲೊ ಬದ್ಲಿಲ್ಲ್ಯಾ ರೂಪಾನ್ ತಾಜ್ಯಾ ಜೀವ್ ತಿತ್ಲೊಚ್ ಘುಸಮ್ಟ್ಟಾಲೊ ಕೆನ್ನಾ ಕೆನ್ನಾಯ್ ಬರಿ ದಿಸ್ತಾ ಹಿ ಪಾವ್ಸಾಚಿ ಅಪುರಬಾಯ್ ಆತಾಂ ಹಾಂವ್ ವ್ಹಡ್ ಜಾಲಾಂ ಪಾವ್ಸಾಕ್ ಹ್ಯಾ ಕಳ್ನಾ ಕಾಯ್? ಫುಡೆಂ ಚಡಚ್ ಕಡಕ್ ಜಾಲೊ ಆಡಾಂವ್ಕ್ ಲಾಗ್ಲೊ ವಾಟ್ ಮ್ಹಜಿ ಕಶೆಂಯ್ ಕರೂನ್ ಚುಕೊವ್ಚೆಂ ಹಾಕಾ ಖಾತ್ರಿ ಜಾಲಿ ದಾಟ್ ಮ್ಹಜಿ ಪಾವ್ಸಾಚ್ಯಾ ಹ್ಯಾ ಶಿಂವ್ರಾನ್ ಆತಾಂ ಹಾಂವ್ ಥಕ್ಲೆಂ ಪಾವ್ಸಾಕ್ ಹ್ಯಾ ಚುಕೊಂವ್ಕ್ ಆತಾಂ ಹಾಂವ್ ಶಿಕ್ಲೆಂ ಪಾವ್ಸಾಚಿ ಸರ್ ಚುಕೊವಂಕ್ ಸತ್ರಿ ಹಾಂವ್ ಧರ್ತಾಲೆಂ ಘೊಘ್ಯಾಚ್ಯಾ ಪಾವ್ಸಾಂತ್ ಲೆಗೀತ್ ಸುಕೆಂಚ್ ಹಾಂವ್ ಉರ್ತಾಲೆಂ ಲ್ಹಾನ್ಪಣಾಂತ್ಲ್ಯಾ ಪಾವ್ಸಾಚಿ ನಕ್ಳತ್ ಮ್ಹಾಕಾ ಜಾಲ್ಲಿ ನಸಾಯ್ ಪಾವ್ಳಿಂ ಮ್ಹಜೆರ್ ಗಳತ್ ರಾವ್ಲಿ ಪೂಣ್ ಪಾವ್ಸ್ ಮ್ಹಾಕಾ ಕಳ್ಳೊ ಕಾಯ್? ಆತಾಂ ಪಾವ್ಸ್ ಜಾಣ್ಟೊ ಜಾಲಾ ಅದಿಂ ಮದೀಂಚ್ ತೊ ಝಡ್ಟಾ ದಾಟೂನ್ ಯೆತಾತ್ ಕುಪಾಂ ತರಿ ತೊ ಫಕತ್ ಶಿಡ್ಶಿಡಟಾ ಶಾಂತ್ ಜಾಲಾ, ಥಂಡ್ ಜಾಲಾ ಸುರ್ಕುತ್ಲ್ಯಾತ್ ಸರಿ ತಾಜ್ಯೊ ಮ್ಹಾಕಾ ಭೀಜೊಂವ್ಕ್ ವ್ಹಾವ್ಝಡಿ ಆಸೂಸ್ಲ್ಯಾತ್ ತರಿ ತಾಜ್ಯೊ ಆತಾಂ ಪಾವ್ಸ್ ಜಾಣ್ಟೊ ಜಾಲಾ ಥೆಂಬ್ಯಾ ಥೆಂಬ್ಯಾನ್ ಶಿರ್ಶಿರತಾ ಕೊಸ್ಳಪಾಚೊ ತ್ರಾಣ್ ನಾ ಧಾರ್ ತಾಜಿ ಥರ್ಥರತಾ ತಾಜೆರ್ ಕೆನ್ನಾಯ್ ನದರ್ ಗೆಲ್ಯಾರ್ ಒಡೀನ್ ಕಾಳೀಜ್ ಭರೂನ್ ಯೆತಾ ಅಚ್ಕಿತ್ ಮಾಗೀರ್ ಲಾಗಿಂ ಒಡೂನ್ ಮಾಯೆನ್ ತಾಕಾ ವೆಂಗೆತ್ ಘೆತಾಂ ಪಾವ್ಸ್ ಆತಾಂ ಜಾಣ್ಟೊ ಜಾಲಾ ಆತಾಂ ಮ್ಹಾಕಾ ಕಳೂನ್ ಯೆತಾ ಪಾವ್ಸಾಳೊ ಹೊ ಸೊಪ್ಚೆ ಆದಿಂ ಘೊಘ್ಯಾನಿ ತ್ಯಾ ಭೀಜೂನ್ ಘೆತಾಂ ಪಾವ್ಸಾಳೊ ಹೊ ಸೊಪ್ಚೆ ಆದಿಂ ಘೊಘ್ಯಾನಿ ತ್ಯಾ ಭೀಜೂನ್ ಘೆತಾಂ - ಉರ್ಜಿತಾ ಭೊಬೆ. [ಎಪ್ರಿಲ್, 2025]

	ಉರ್ಜಿತಾ ಭೊಬೆ: ಸಾಹಿತಿಕ್ ಅಭಿರುಚ್ ಆಸ್ಚಿ ಗೊಂಯ್ಚಿ ಉರ್ಭೆವಂತ್ ಕವಯತ್ರಿ ಹಿ. ಕವಿಸಮ್ಮೇಳನಾಂನಿ ತಿ ಕಾರ್ಯಾಳ್. ಹೆರ್ ಭಾಸೆಂತ್ಲಿಂ ಕವಿತಾ ಸಯ್ತ್ ವಾಸ್ಚಿ ಅಭಿರುಚ್ ಆಸ್ಚ್ಯಾ ಹಿಚೊ ಫುಡ್ಲದ್ ಕವಿತಜಮೊ ’ಉರ್ಜಾಸ್ರೋತ್ (2018), ’ಅಂತರ್‌ನಾದ್ (2021), ಪರ್ಗಟ್ ಜಾಲ್ಯಾತ್. ಕೊಂಕಣಿ ಕವಿತೆಂನಿ ನವಿ ಸಕತ್ ಭರ್ಚೆ ದಿಶೆನ್ ಬಾಯ್ ಉರ್ಜಿತಾ ವಾವ್ರ್ ಕರುನ್ ಆಸಾ. ಪಯ್ಣಾರಿ-ವೀಜ್ ಸಾಹಿತಿಕ್ ಸ್ಪರ್ಧೊ 2018 ಚೆರ್ ಹಿಚ್ಯಾ ಕವಿತೆಕ್ ದುಸ್ರೆಂ ಇನಾಮ್, ಪಯ್ಣಾರಿ-ವೀಜ್ ಸಾಹಿತಿಕ್ ಸ್ಪರ್ಧೊ 2019 ಚೆರ್ ಪಯ್ಲೆಂ ಇನಾಮ್ ಲಾಭ್ಲಾಂ.
[kovita] Paus* (- Urjitha Bhobe)*
Pausall ani gimall prokritichea kallachim rodam. Pausall ani pausant sar‌l'lem bhurgemponn monxachea motichea podd'deant sodam jivall urchetosolem. Iskolachea disamni pausant bhizon khellche khell, ani pausant bhizon khell‌l'leurvim yemvcho tap, ani tapant nidon astana auy-bapaicho maipasi mog sorv somplelea kallasovem amchethaun pois veta punn sodam yadint urta. Bai Urjita-n hi ekathorachi flashback chintpachi kovita amchemukar ubhi kelea. Pauxilo kall ho, khup paus poddon asa; mumbomyt, kerollant, mongllurant toxench goyant. Hea sondhorbhim amim pattim ghumvon amim sar‌l'lem amchem bhurgemponn, toxench te pauxile dis yadik haddle tor amkam zamvcho onbhog khoroch amkam eka vegllea chintpak vhorun veta. Atam to onbhog zoddchak, hea kovitecho osvad korunk tuka ulo ditam. - Som
[kovita] Paus* (- Urjitha Bhobe)*
Paus Bhurgeponnant paus mhaka khub khub auddottalo. Jitlem mhaka bhizon disom titlo to zhoddttalo Pausa vangdda khellttalem sorink vochun mellttalem paulleo angar jheltalem pausant bhizot choltalem Mayen ken'na poxetalo ken'na nettan zhoddttalo bhurgeponnant paus mhaka khub khub auddottalo Vhodd hamv zata toxem bodlolem rup tajem moza zali unni ani vojem zalem khup tajem Bod naslo vinnounnek vatter modinch yetalo khellunk mhaka naslo vell venget tori ghetalo Bhurgeponnant paus mhaka jitlo mhonnun auddottalo bodlil'lea rupan tajea jivo titloch ghusomtt'ttalo Ken'na ken'nai bori dista hi pausachi opurobai atam hamv vhodd zalam pausak hea kollna kai? Fuddem choddoch koddok zalo addaunko laglo vatt mhoji koxem-i korun chukouchem haka khatri zali datt mhoji Pausachea hea ximvran atam hamv thoklem pausak hea chukounko atam hamv xiklem Pausachi sor chukounk sotri hamv dhortalem ghogheachea pausant legit sukench hamv urtalem Lhanponnantlea pausachi nokllot mhaka zal'li nosai paullim mhojer gollot rauli punn paus mhaka koll'llo kai? Atam paus zanntto zala odim modinch to zhoddtta dattun yetat kupam tori to fokot xiddxiddotta Xant zala, thondd zala surkutleat sori tajeo mhaka bhizounko vhauzhoddi asusleat tori tajeo Atam paus zanntto zala thembea thembean xirxirota kosllopacho trann na dhar taji thorthorota Tajer ken'nai nodor gelear oddin kalliz bhorun yeta ochkit magir lagim oddun mayen taka venget ghetam Paus atam zanntto zala atam mhaka kollun yeta pausallo ho sopche adim ghogheani tea bhizun ghetam pausallo ho sopche adim ghogheani tea bhizun ghetam - Urjita Bhobe. [Aug, 2025]

	Urjita Bhobe: Sahitik obhiruch aschi gõychi urbheunt kouyotri hi. Kovisom'mellonamni ti kareall. Her bhasentlim kovita soit vaschi obhiruch aschea hicho fuddlod kovitozomo ’Urzasrot (2018), 'Ontornad (2021)’ porgott zaleat. Konkonni kovitemni novi sokot bhorche dixen bai urjita vaur korun asa. Poinnari-viz sahitik spordho 2018 cher hichea kovitek dusrem inam' labhlam. Poinnari-viz sahitik spordho 2019 cher poilem inam' labhlam.
[कविता] पावस (- उर्जिता भोबे)
पावसाळ आनी गिमाळ प्रकृतिच्या काळाचीं रोदां. पावसाळ आनी पावसांत सार‌ल्लें भुर्गेंपण मनशाच्या मतिच्या पडद्यांत सदां जिवाळ उर्चेतसलें. इसकोलाच्या दिसांनी पावसांत भिजोन खेळचे खेळ, आनी पावसांत भिजोन खेळ‌ल्लेवर्वीं येंवचो ताप, आनी तापांत निदोन आसताना आवय-बापायचो मायपासी मोग सर्व संपलेल्या काळासवें आमचेथावन पयस वेता पूण सदां यादिंत उर्ता. बाय उर्जितान ही एकाथराची फ्ल्याश‌ब्याक चिंत्पाची कविता आमचेमुकार उभी केल्या. पावशिलो काळ हो, खूप पावस पडोन आसा; मुंबंयत, केरळांत, मंगळुरांत तशेंच गोयांत. ह्या संधर्भीं आमीं पाटीं घुंवोन आमीं सार‌ल्लें आमचें भुर्गेंपण, तशेंच ते पावशिले दीस यादीक हाडले तर आमकां जांवचो अनभोग खरोच आमकां एका वेगळ्या चिंत्पाक व्हरून वेता. आतां तो अनभोग जोडचाक, ह्या कवितेचो अस्वाद करुंक तुका उलो दितां. - सं
[कविता] पावस (- उर्जिता भोबे)
पावस भुरगेपणांत पावस म्हाका खूब खूब आवडटालो. जितलें म्हाका भीजन दिसं तितलो तो झडटालो पावसा वांगडा खेळटालें सरींक वचून मेळटालें पावळ्यो आंगार झेलतालें पावसांत भीजत चलतालें मायेन केन्ना पोशेतालो केन्ना नेटान झडटालो भुरगेपणांत पावस म्हाका खूब खूब आवडटालो व्हड हांव जाता तशें बदललें रूप ताजें मजा जाली उणी आनी वजें जालें खूप ताजें बद नासलो विणवणेक वाटेर मदींच येतालो खेळूंक म्हाका नासलो वेळ वेंगेत तरी घेतालो भुरगेपणांत पावस म्हाका जितलो म्हणून आवडटालो बदलिल्ल्या रूपान ताज्या जीव तितलोच घुसमट्टालो केन्ना केन्नाय बरी दिसता ही पावसाची अपुरबाय आतां हांव व्हड जालां पावसाक ह्या कळना काय? फुडें चडच कडक जालो आडांवक लागलो वाट म्हजी कशेंय करून चुकोवचें हाका खात्री जाली दाट म्हजी पावसाच्या ह्या शिंवरान आतां हांव थकलें पावसाक ह्या चुकोंवक आतां हांव शिकलें पावसाची सर चुकोवंक सत्री हांव धरतालें घोघ्याच्या पावसांत लेगीत सुकेंच हांव उरतालें ल्हानपणांतल्या पावसाची नकळत म्हाका जाल्ली नसाय पावळीं म्हजेर गळत रावली पूण पावस म्हाका कळ्ळो काय? आतां पावस जाणटो जाला अदीं मदींच तो झडटा दाटून येतात कुपां तरी तो फकत शिडशिडटा शांत जाला, थंड जाला सुरकुतल्यात सरी ताज्यो म्हाका भीजोंवक व्हावझडी आसूसल्यात तरी ताज्यो आतां पावस जाणटो जाला थेंब्या थेंब्यान शिरशिरता कोसळपाचो त्राण ना धार ताजी थरथरता ताजेर केन्नाय नदर गेल्यार ओडीन काळीज भरून येता अचकित मागीर लागीं ओडून मायेन ताका वेंगेत घेतां पावस आतां जाणटो जाला आतां म्हाका कळून येता पावसाळो हो सोपचे आदीं घोघ्यानी त्या भीजून घेतां पावसाळो हो सोपचे आदीं घोघ्यानी त्या भीजून घेतां - उर्जिता भोबे. [एप्रील, २०२५]

	उर्जिता भोबे: साहितीक अभिरूच आसची गोंयची उर्भेवंत कवयत्री ही. कविसम्मेळनांनी ती काऱ्याळ. हेर भासेंतलीं कविता सयत वासची अभिरूच आसच्या हिचो फुडलद कवितजमो ’उर्जास्रोत (२०१८), ’अंतर‌नाद (२०२१), पर्गट जाल्यात. कोंकणी कवितेंनी नवी सकत भर्चे दिशेन बाय उर्जिता वावर करून आसा. पयणारी-वीज साहितीक स्पर्धो २०१८ चेर हिच्या कवितेक दुस्रें इनाम लाभलां. पयणारी-वीज साहितीक स्पर्धो २०१९ चेर पयलें इनाम लाभलां.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.