ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] ಮ್ಹಾಕಾಯ್ ಜಿಯೆಂವ್ಕ್ ದಿಯಾ... (- ವಲ್ಲಿ ಕ್ವಾಡ್ರಸ್)

ಮನಿಸ್ ದಿಸಾನ್‌ದೀಸ್ ವರ್ಚುವಲ್ ಸಂಸಾರಾಂತ್ ಜಿಯೆಂವ್ಕ್ ಲಾಗ್ಲಾ. ದೀಸ್ ಗೆಲ್ಲೆಪರಿಂಚ್ ಮನ್ಶಾಪಣ್ ಮನ್ಶಾಥಾವ್ನ್ ಪಯ್ಸ್ ವಚೊಂಕ್ ಲಾಗ್ಲಾಂ. ಪುಣ್ ಹ್ಯಾ ದಾಕವ್ಪಾಚಿ ಜಿಣಿ ಜಿಯೆತೆಲ್ಯಾ ಮನ್ಶಾಂಥಾವ್ನ್ ಮನ್ಶಾಪಣಾಚೆಂ ಮುಳಾವೆಂ ತತ್ವ್ ಅಪೇಕ್ಶಾ ಕರ್ಚಿಂ ಅಜೂನ್ ಜಿಯೆಂವ್ಚಿಂ ಹ್ಯಾ ಸಂಸಾರಾಂತ್ ಆಸಾತ್ ಜಾಲ್ಲ್ಯಾನ್ ’ಮ್ಹಾಕಾಯ್ ಜಿಯೆಂವ್ಕ್ ದಿಯಾ’ ಉಲೊ, ಪರತ್ ಪರತ್ ಕಾಳ್ಜಾಕ್ ಖೊಂಕ್ತಾ ಆನಿ ಆಮಿಂ ಪಾಳುಂಕ್ ಜಾಯ್ ಆಸ್ಚಿ ಜವಾಭ್ದಾರಿ ಪಾಳಿನಾಸ್ತಾನಾ ಏಕ್ ನಿರ್ದೋಶಿ ಜೀವ್ ಗೆಲ್ಲ್ಯಾಚೊ ಗುನ್ಯಾಂವ್ಕಾರಿ ಉಲೊ ಅಂತರ್ ಮನಾಂತ್ ಗಾಜ್ತಾ.

ಹಿ ಫಕತ್ ಏಕ್ ಕವಿತಾ ನ್ಹಯ್. ಅಂತರ್ ಮನಾಚ್ಯಾ ದಾರಾಕ್ ಜಾಗಂವ್ಚಿ ಏಕ್ ಲ್ಹಾನ್ ಬೋಬ್. ಮನ್ಶಾಪಣಾಕ್ ಲಜೆರ್ ಘಾಲ್ಚಿಂ, ಪರತ್ ಪರತ್ ಘಡ್ಚಿಂ ಅಸಲಿಂ ಘಡಿತಾಂ ಕಾಂಯ್ ’ಹಾದ್‍ಸಾ’ ಮ್ಹಣೊನ್ ಆಮಿ ಪಿಲಾತಾಪರಿಂ ಹಾತ್ ಧುವ್ನ್ ಮಜೇನ್ ಜಿಯೆಂವ್ಕ್ ಲಾಗ್ತಾನಾ, ಏಕ್ ಘಡಿ ಆಮ್ಚೆಭಿತರ್ ತಿಳ್ಚೆಂ ಪ್ರೇತನ್ ಕರ್ಚಿ ಗರ್ಜ್ ಆಸಾ ಮ್ಹಳ್ಳೆಂ ಸಮ್ಜೊನ್ ಘೆಂವ್ಚೆಂ.

- ಸಂ

[ಕವಿತಾ] ಮ್ಹಾಕಾಯ್ ಜಿಯೆಂವ್ಕ್ ದಿಯಾ... (- ವಲ್ಲಿ ಕ್ವಾಡ್ರಸ್)

ಮ್ಹಾಕಾಯ್ ಜಿಯೆಂವ್ಕ್ ದಿಯಾ... ರಾತಿಚ್ಯಾ ಮಧ್ಯಾನೆರ್ ಶ್ಹೆರಾಚ್ಯಾ ಖಂದಕಾಂತ್ ಪಡ್ಲೊ ಎಕ್ ಸತ್ತಾವಿಸ್ ವರ್ಸಾಂಚೊ ತರ್ನಾಟೊ ಮಜತೀ ಖಾತಿರ್ ಹಾಕ್ ಬೋಬ್ ಮಾರುಂಕ್ ಲಾಗ್ಲೊ ಆಮಿ ಆಸ್ಲ್ಯಾಂವ್ ವೆವಸ್ತಾ ಆಸ್ಲಿ ಉಲಂವ್ಕ್ ಲಾಗ್ಲಿಂ ಜಣಾಂ, ಫೊನಾಂ ಪುಣ್ ನ್ಹಯ್ ಹಾತ್ ಪಳೆಂವ್ಕ್ ಲಾಗ್ಲೆ ದೊಳೆ ಪುಣ್ ನ್ಹಯ್ ಕಾಳ್ಜಾಂ ರಾಜಕೀಯ್ ಫುಡಾರಿ ವಾ ತಾಚ್ಯಾ ಕುಟ್ಮಾಚೊ ತರ್ ಮೊಳೊಬ್ ಪಿಂಜುನ್ ಧರ್ತಿ ಚಿರುನ್ ಮಜತೆಕ್ ಉದೆತಿಂ ಮೀಡಿಯಾ ಸೊಡ್ವಣೆಕ್ ನವಿ ವೆವಸ್ತಾಚ್ ಉದೆತಿ ಪುಣ್ ತೊ ಫಕತ್ ಏಕ್ ಸಾದೊ ನಾಗರಿಕ್ ಉಜ್ವಾಡ್ ಫಾಂಕಯಿತ್ ರಾಕೊನ್ ರಾವ್ಲೊ ಮನಿಸ್ ’ಅಜೂನ್ ಮನ್ಶಾಪಣಾನ್ ಜಿಯೆತಾ’ ಅಶ್ಯಾ ಭರ್ವಶ್ಯಾನ್ ತೊ ಆಸ್ಲೊ ಕೊಣ್ ತರೀ ರಾಕಣ್ ಭಡ್ವೊ ಯೆಂವ್ಚಿ ವಾಟ್ ಪಳೆಯಿತ್ ರಾವ್ಲೊ ಮೊಬಾಯ್ಲಾಚ್ಯಾ ಕೆಮರಾಂ ಸಮೊರ್ ವೆವಸ್ತೆಚ್ಯಾ ಮೊನ್ಯಾ ಜವಾಭ್ದಾರೆ ಸಮೊರ್ ಬುಡೊನ್ ಮೆಲೊ ’ಮ್ಹಾಕಾಯ್ ಜಿಯೆಂವ್ಕ್ ದಿಯಾ..’ ತಾಣೆಂ ಪರತ್ ಪರತ್ ಉಲೊ ದಿಲೊ ಆಮಿ ತಾಕಾ ಆಯ್ಕಲೆಂ ಆನಿ ತಾಕಾ ಮೊರೊಂಕ್ ದಿಲೆಂ ಆಜ್ ತೊ... ಫಾಲ್ಯಾಂ ಹೊ... ಆನಿ ಪೊರ್ವಾಂ, ಆನಿ ಪೊರ್ವಾಂಚ್ಯಾ ಪೊರ್ವಾಂ ತುಂ ಆನಿ ಹಾಂವ್....... (೧೭ ಜನೆರ್ ೨೦೨೬ ರಾತಿಂ ನೋಯ್ಡಾಂತ್ ಎಕಾ ಉದ್ಕಾಚ್ಯಾ ಖಂದ್ಕಾಂತ್ ಕಾರಾಸವೆಂ ಸಕ್ಲಾ ಪಡೊನ್ ಮೆಲ್ಲ್ಯಾ ಯುವರಾಜ್ ಮೆಹ್ತಾಚ್ಯಾ ಮೊರ್ನಾಚೆರ್ ವಿಣ್ಲಲಿ ಕವಿತಾ) **** - ವಲ್ಲಿ ಕ್ವಾಡ್ರಸ್**. [ಫೆಬ್ರೆರ್, 2026]

	ವಲ್ಲಿ ಕ್ವಾಡ್ರಸ್: ಚ್ಯಾರ್ ಮುಖಾಂ (2002), ಕಟ್‌ಪುತ್ಳಿ (2004), ದರ್ಭಾರಾಂತ್ಲಿ ಪಿಂರ್ಗೊಣ್ (2006), ಬಜಾರ್ (2017), ಭಿತರ‍್ಲೊ ಕವಿ (2020) ನಾಂವಾಚೆ ಪಾಂಚ್ ಕವಿತಾಜಮೆ. ಕವಿತಾಪಾಠ್ (2005), ದರ‍್ಯಾಕ್ ಉದಕ್ (2006), ಕಾಳೊಕ್ ನಾತ್ಲೊ ಗಾಂವ್ (2007), ಮುಗ್ದನಾತ್ಲಿಂ ಗಿತಾಂ (2017), ಸುಕ್ತಿ ಭರ್ತಿ (2018) ಮ್ಹಳ್ಳೆ ಪಾಂಚ್ ಕವಿತಾ ವಿಶ್ಲೇಷಣಾಚಿಂ ಪುಸ್ತಕಾಂ ತಶೆಂಚ್ ಕವಿತೆಚಿಂ ಸಭಾರ್ ಸಂಕಲನಾಂ ತಶೆಂಚ್ ಡಿಜಿಟಲ್ ಪುಸ್ತಕಾಂ ಸಂಪಾದನ್ ಕರುನ್ ಪರ್ಗಟ್ಲ್ಯಾಂತ್. ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚೆ ಪುರಸ್ಕಾರ್ (2005,2006), ಕವಿತಾ ಟ್ರಸ್ಟಾಚೊ ಮಥಾಯಸ್ ಕುಟ್ಮಾಚೊ ಪುರಸ್ಕಾರ್ (2018), ತಶೆಂಚ್ ವಿಶ್ವ್ ಕೊಂಕಣಿ ಕೇಂದ್ರಾಚೊ ವಿಮಲ ವಿ. ಪೈ. ಪುರಸ್ಕಾರ್ (2022) ಹಾಕಾ ಲಾಭ್ಲಾ.
[kovita] Makayi jiunk dia* (- Valley Quadros)*
Monis disan-dis virtual sounsarnt jiunk lagla. dis gelleporinch monxeaponn monxea thaun pois vosonk laglam. Punn hea dakoupachi jinni jietelea monxea thaun monxaponnachem to'tv opekxa korchim ozun jieunchim hea sounsarnt asat zallean 'Makayi jiunk dia' ulo', porot porot kallzak khonkta ani ami pallunk zai aschi zobabdari pallinastam iek nirdoxi jiv gelleacho' guneaunkari ulo' ontor monant gazta. Hi fokot iek kovita noim. ontor monachea darak zagounchi iek lhan bob. monxeaponnak lojer ghalchim, porot porot ghoddchim oslim ghodditam kaim 'hadsa' monno'n ami piataporim hat dhuvn mojen jiunk lagtana, iek ghodi amchie bhitor tillchem preton korchi gorz asa mullem sozmon gheunchem. - Som
[kovita] Makayi jiunk dia* (- Valley Quadros)*
Makayi jiunk dia Ratichea modheaner xarachea khondokant poddlo' iek sot'tavis vorsancho' tornatto' mozoti khatir hak bo'b marunk laglo' ami asleamv veusta asli ulounk laglim zonnam, fo'nam punn noin hat polleunk lagle dolle punn noin kallzam Rajokiy fuddari va tachea kuttmacho tor mo'llo'b pinzun dhorti chirun mo'zo'tek udetim 'media' so'ddvo'nnek novi veustach udeti punn to' fo'ko't iek sado nagrik uzvadd fankoit rako'n raulo' Monis 'ajun monxaponnan jieta' oxea bhorvoxean to also' konn tori rakonn bhoddvo' yeunchi vatt polleit raulo' mobile-achea camera-m somo'r veustechea mone zobabdare somo'r buddo'n melo' 'Makai jiunk dia...' tannem porot porot ulo' dilo' ami taka aikolem ani taka mo'ro'nk dilem aiz to'... faleam ho'... ani po'rvam, ani po'rvanchea po'rvam tum ani hamv....... *(17 Joner 2026 ratim Noida-nt ieka udkachea khondokant Car-a sovem sakla po'ddo'n mel'lea Yuvaraj Mehta-chea mo'rnacher vinnloli kovita)* **** - Valley Quadros.** [Feb, 2026]

	Valley Quadros: Chear Mukham (20020, Kott'putlli (2004), Dorbharantli Pirngonn (2006), Bozar (2017), Bitorlo Kovi (2020) Namvace panc kovitazome. Kovitapatt (2005), Doreak Udok (2006), Kallok Natlo Gaum (2007), Mugdonatlim Gitam (2016), Sukti Borti (2018) molle panc kovita vixlexonnachim pustokam toxens sobhar kovita sonkolonachi ani Digittol pustokam sompadon korun porgottleant. Kornattak Konknni Sahity Okaddemiche puroskar (2005, 2006), Kovita Ttrusttacho Mothais kuttmacho Puroskar (2018), Tosens Vixv Konkkni Kendracho Vimola Vi. Poi. Puroskar (2022) Haka Labhla.
[कविता] म्हाकाय जियेंवक दिया... (- वल्ली क्वाड्रस)
मनीस दिसानदीस वर्चुवल संसारांत जियेंव्क लागला. दीस गेल्लेपरिंच मनशापण मन्शाथाव्न पयस वचोंक लाग्लां. पूण ह्या दाकव्पाची जिणी जियेतेल्या मनशांथाव्न मनशापणाचें मुळावें तत्व अपॆक्शा करचीं अजून जियेंव्चिं ह्या संसारांत आसात जाल्ल्यान ’म्हाकाय जियेंव्क दिया’ उलो, परत परत काळजाक खोंकता आनी आमिं पाळुंक जाय आस्ची जवाभ्दारी पाळिनास्ताना ऎक निरदोशी जीव गेल्ल्याचो गुन्यांवकारी उलो अंतर मनांत गाजता. ही फकत एक कविता न्हय. अंतर मनाच्या दाराक जागंवची एक ल्हान बॊब. मनशापणाक लजेर घालचीं, परत परत घडचीं असलीं घडितां कांय ’हाद्‍सा’ म्हणोन आमी पिलातापरिं हात धुव्न मजॆन जियेंव्क लागताना, ऎक घडी आमचेभितर तिळचें प्रॆतन करची गरज आसा म्हळ्ळें सम्जोन घेंवचें. - सं
[कविता] म्हाकाय जियेंवक दिया... (- वल्ली क्वाड्रस)
म्हाकाय जियेंवक दिया... रातिच्या मध्यानेर शाराच्या खंदकांत पडलो एक सत्ताविस वार्सांचो तरनाटो मजती खातिर हाक बॊब मारुंक लागलो आमी आसल्यांव वेवस्ता आस्ली उलंव्क लागलीं जणां, फोनां पूण न्हय हात पळेंव्क लाग्ले दोळे पुण न्हय काळजां राजकीय फुडारी वा ताच्या कुटमाचो तर मोळोब पिंजुन धरती चिरून मजतेक उदेतीं मीडिया सोडवणेक नवी वेवस्ताच उदेती पुण तो फकत ऎक सादो नागरीक उजवाड फांकयित राकोन रावलो मनीस ’अजून मनशापणान जियेता’ अश्या भरवश्यान तो आसलो कोण तरी राकण भडवो येंवची वाट पळेयित रावलो मोबाय्लाच्या केमरां समोर वेवस्तेच्या मोन्या जवाभ्दारे समोर बुडोन मेलो ’म्हाकाय जियेंव्क दिया..’ ताणें परत परत उलो दिलो आमी ताका आयकलें आनी ताका मोरोंक दिलें आज तो... फाल्यां हो... आनी पोरवां, आनी पोरवांच्या पोरवां तुं आनी हांव....... (१७ जनेर २०२६ रातिं नॊयडांत एका उदकाच्या खंदकांत कारासवें सकला पडोन मेल्ल्या युवराज मेह्ताच्या मोरणाचेर विणलली कविता) **** - वल्ली क्वाड्रस.** [फेबरेर, २०२६]

	वल्ली क्वाड्रस: च्यार मुखां (२००२), कट‌पुतळी (२००४), दर्भारांतली पिंर्गोण (२००६), बजार (२०१७), भितर‍्लो कवी (२०२०) नांवाचे पांच कविताजमे. कवितापाठ (२००५), दर‍्याक उदक (२००६), काळोक नातलो गांव (२००७), मुगदनातलीं गितां (२०१६), सुक्ती भर्ती (२०१८) म्हळ्ळे पांच कविता विशलेषणाचीं पुसतकां तशेंच कवितेचीं सभार संकलनां तशेंच डिजिटल पुसतकां संपादन करून पर्गटल्यांत. कर्नाटक कोंकणी साहित्य अकाडेमिचे पुरसकार, कविता ट्रसटाचो मथायस कुटमाचो पुरस्कार(२०१८), तशेंच विश्व कोंकणी केंद्राचो विमला वी. पै. पुरस्कार(२०२२) हाका लाभला.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.