ಆಶಾವಾದಿ ಪ್ರಕಾಶನ್-ಚೊ ರುಪ್ಯೋತ್ಸವ್ ಆನಿ ಪಯ್ಣಾರಿಚೊ ದಶಮಾನೋತ್ಸವ್ ಸಂಭ್ರಮ್

ದಸೆಂಬರ್ 14 (ಮಂಗ್ಳೂರ್): 2000 ಇಸ್ವೆಂತ್ ಕುವೆಯ್ಟಾಂತ್ ಸುರ್ವಾತ್‌ಲ್ಲ್ಯಾ ’ಆಶಾವಾದಿ ಪ್ರಕಾಶನ್’ ಚೊ ರುಪ್ಯೋತ್ಸವ್, ತಶೆಂಚ್ 2015 ಇಸ್ವೆಂತ್ ಮುಂಬಂಯ್ತ್ ಸುರ್ವಾತ್‍ಲ್ಲ್ಯಾ ಪಯ್ಣಾರಿ.ಕೊಮ್ ಮ್ಹಳ್ಳ್ಯಾ ತೀನ್ ಲಿಪಿಂಚ್ಯಾ ಕೊಂಕಣಿ ಸಾಹಿತ್ಯಿಕ್ ಜಾಳಿಜಾಗ್ಯಾಚೊ ದಶಮಾನೋತ್ಸವ್ - ಅಶೆಂ ದೊಡೊ ಸಂಭ್ರಮ್ ಆಯ್ತಾರಾ 14 ದಸೆಂಬರ್) ಸಕಾಳಿಂ 10 ಥಾವ್ನ್ ದೊನ್ಪಾರಾಂ 1 ಪರ್ಯಾಂತ್ ಮಂಗ್ಳುರ್‌ಚ್ಯಾ ಎಮ್.ಸಿ.ಸಿ.ಬ್ಯಾಂಕಾಚ್ಯಾ ಪಿ.ಎಫ್.ಎಕ್ಸ್.ಸಭಾಂಗ್ಣಾಂತ್ ಚಲ್ಲೊ. ಬಸ್ತಿ ವಾಮನ್ ಶೆಣಯ್ ಸ್ಮಾರಕ್ 25 ಕೊಂಕಣಿ ಪುಸ್ತಕಾಂಚೆಂ ಲೊಕಾರ್ಪಣ್, ಮೌಲ್ಯಾಧಾರಿತ್ ಕೊಂಕಣಿ ಪತ್ರಿಕೋಧ್ಯಮಾಚೊ ಜಿವಿತಾ-ಆವ್ದೆಚೊ ಪುರಸ್ಕಾರ್ ತಶೆಂಚ್ ಸಾಹಿತ್ಯ್, ಕಲಾ, ರಂಗ್‌ಮಂಚ್, ಭರತನಾಟ್ಯ್, ಸಮಾಜಸೇವಾ ಶೆತಾಂನಿ ದೇಣ್ಗಿ ದಿಲೆಲ್ಯಾಂಕ್ ಸನ್ಮಾನ್ ಕಾರ್ಯೆಂ ಆನಿ ಕನ್ನಡ ಲಿಪಿಯೆಂತ್ ಲಿಪಿಯಂತರಣ್ ಜಾಲ್ಲ್ಯಾ ಕೊಂಕಣಿಚ್ಯಾ ಪುಸ್ತಕಾಚೊ ಪಯ್ಲೊ ಪುರಸ್ಕಾರ್ ’ದೆವಾದಿನ್ ಡೆನಿಸ್ ಡಿಕುನ್ಹಾ ಸ್ಮಾರಕ್ ಆಶಾವಾದಿ ಲಿಪಿಯಂತರಣ್ ಪುಸ್ತಕ್ ಪುರಸ್ಕಾರ್ ಪ್ರಧಾನ್’ ಹಿಂ ಸರ್ವ್ ಹ್ಯಾ ಸಂಭ್ರಮಾಂತ್ ಆಸ್ಲೆಂ.

ಕಾರ್ಯಕ್ರಮಾಚ್ಯಾ ಸುರ್ವಾತೆರ್ ಪ್ರಸ್ತಾವನ್ ದಿಲೆಲ್ಯಾ ಸೂತ್ರ-ಸಂಚಾಲಕ್ ಲಾರೆನ್ಸ್ ವಿನೋದ್ ಬರ್ಬೋಜಾ ಶಿರ್ವಾ (ಮ್ಯಾಂಚೆಸ್ಟರ್) ಹಾಣೆಂ ಆಶಾವಾದಿ ಪ್ರಕಾಶನ್ ಪಾಟ್ಲ್ಯಾ 25 ವರ್ಸಾಂನಿ ಕೊಂಕಣಿ ಸಾಹಿತ್ಯ್ ಪ್ರಕಾಶನ್ ಮಾತ್ರ್ ನ್ಹಯ್ ಆಸ್ತಾಂ, ಸಾಹಿತ್ಯಿಕ್ ಚಟುವಟಿಕೊ, ಸಾಹಿತ್ಯಿಕ್ ಸ್ಪರ್ದೆ, ಅಧ್ಯಯನ್ ಕಾಮಾಸಾಳಾಂ, ಎಕಾ ಸಂಸ್ಥ್ಯಾಪರಿಂ ನಿರಂತರ್ ಜಾವ್ನ್ ಚಲವ್ನ್ ಆಯ್ಲಾಂ, ತಾಚೊ ಫಳ್ ಜಾವ್ನ್ ಕೊಂಕಣಿಂತ್ ಜಾಯ್ತೆ ಸಾಹಿತ್ಯಿಕ್ ಪ್ರತಿಭಾವಂತ್ ಆಜ್ ಪರ್ಜಳ್ತಾತ್ ಮ್ಹಣಾಲೊ.

ಕಾರ್ಯಾಚೆಂ ಉಗ್ತಾವಣ್ ಮಾನಾದಿಕ್ ರೊನಾಲ್ಡ್ ಪ್ರಕಾಶ್ ಡಿಸೋಜ್ ಅಜೆಕಾರ್ ಹಾಣೆಂ ಕರ್ತಚ್, ಆಶಾವಾದಿ ಪ್ರಕಾಶನಾಚೊ ಸ್ಥಾಪಕ್ ತಶೆಂಚ್ ಪಯ್ಣಾರಿ.ಕೊಮ್-ನ ಸಂಪಾದಕ್ ವಲ್ಲಿ ಕ್ವಾಡ್ರಸ್ ಅಜೆಕಾರ್ ಹಾಣೆಂ ಯೆವ್ಕಾರ್ ಉಲವ್ಪ್ ಕೆಲೆಂ, ನಾಮ್ನೆಚೊ ಕೊಂಕಣಿ ಕವಿ ಆಂಡ್ರೂ ಎಲ್. ಡಿಕುನ್ಹಾನ್ ’ಆಶಾವಾದಿ ಪ್ರಕಾಶನಾಚಿ 25 ವರ್ಸಾಂಚಿ ವಾಟ್’ ವಿಶ್ಯಾಂತ್ ಸವಿಸ್ತಾರ್ ವಿವರ್ ದಿತಚ್ ಮಾನಾಧಿಕ್ ಮೆಲ್ವಿನ್ ಡಿಕುನ್ಹಾನ್ ’ಪಯ್ಣಾರಿ ದಶಮಾನೋತ್ಸವಾಚೊ ವಿಶೇಷ್ ಅಂಕೊ (ಆಶಾವಾದಿ-25)’ ಲೊಕಾರ್ಪಣ್ ಕೆಲೊ. ಮುಕೆಲ್ ಸಯ್ರೆ ಜಾವ್ನ್ ಬಾಬ್ ನಂದಗೋಪಾಲ ಶೆಣಯ್ (ವಿಶ್ವ ಕೊಂಕಣಿ ಕೇಂದ್ರ, ಮಂಗ್ಳೂರ್), ಡೊ.ಚಂದ್ರಲೇಖ ಡಿಸೋಜ್ (ಗೋವಾ ವಿಧ್ಯಾಪೀಠಾಚ್ಯಾ ಕೊಂಕಣಿ ವಿಭಾಗಾಚಿ ಆಧ್ಲಿ ಮುಖೆಸ್ತ್), ತಶೆಂಚ್ ಬಾಯ್ ಕೋರಿನ್ ರಾಸ್ಕಿನ್ಹಾ (ವೈಟ್-ಡಾವ್ಸ್) ವೆದಿಚೆರ್ ಉಪಸ್ಥಿತ್ ಆಸ್ಲಿಂ.

ದಾಯ್ಜ್.ಕೊಮ್‌ಚಿ ಸಹ-ಸಂಪಾದಕಿ ಜಾವ್ನ್ ವಾವ್ರ್ ಕೆಲ್ಲಿ ಬಾಯ್ ಪ್ರಿಯಾ ಸಿಕ್ವೇರಾ ಫೆರಾರ್ ಹಿಣೆಂ ಸರ್ವ್ ಸನ್ಮಾನಿತಾಂಚಿಂ ಮಾನ್‌ಪತ್ರಾಂ ವಾಚ್ಲಿಂ. ಕ್ಲಾರಾ ಅರುಣ್ ಡಿಕುನ್ಹಾ (ಸಮಾಜ್ ಸೇವಾ), ಇವೆಟ್ ರೆಮೋನಾ ಪಿರೇರಾ (ಭರತನಾಟ್ಯ), ಕ್ರಿಸ್ಟೋಫರ್ ಡಿಸೋಜ್ ನೀನಾಸಮ್ (ರಂಗ್‌ಮಂಚ್), ರೋಹಿತ್ ಸಾಂಕ್ತುಸ್ (ಸಮಾಜ್ ಸೇವಾ), ವಿಲ್ಸನ್ ಡಿಸೋಜ್ ಕಯ್ಯಾರ್ (ಕಲಾ), ಗ್ಲ್ಯಾನಿಶ್ ಮಾರ್ಟಿಸ್ ಅಲಂಗಾರ್ (ಸಾಹಿತ್ಯ್), ಬರ್ನಾಡ್ ಜೆ ಕೊಸ್ತಾ ಕುಂದಾಪುರ (ನಾಟಕ ಆನಿ ಡಿಜಿಟಲ್ ಪತ್ರಿಕೋಧ್ಯಮ್) ಹಾಂಕಾಂ ಶಾಲ್ ಪಾಂಗ್ರಾವ್ನ್, ಯಾದಿಸ್ತಿಕಾ, ಮಾನಪತ್ರ್ ಆನಿ ಉಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಕೆಲೊ. ಆವಿಲ್ ರಸ್ಕೀನ್ಹಾ (ಮೌಲ್ಯಾಧಾರಿತ್ ಕೊಂಕಣಿ ಪತ್ರಿಕೋಧ್ಯಮ್) ಹಾಕಾ ಜಿಣ್ಯೆ ಆವ್ದೆಚೊ ಪುರಸ್ಕಾರ್, ಡೊ.ಚಂದ್ರಲೇಖ ಡಿಸೋಜ ಆನಿ ಮಾನಾದಿಕ್ ಚೇತನ್ ಲೋಬೊಥಾವ್ನ್ ದಿವಯ್ಲೊ. ಹೆಚ್ ವೆಳಾರ್ ಹಾಂಚೊ ತಿಸ್ರೊ ಕವಿತಾಜಮೊ ’ಪಾವ್ಸಾ ಥೆಂಬೆ’ ಲೊಕಾರ್ಪಣ್ ಜಾಲೊ.

ಮಾನಾಧಿಕ್ ಮೆಲ್ವಿನ್ ಡಿಕುನ್ಹಾನ್ ಅಪ್ಲೆ ಸಂಧೇಶ್ ದಿತಚ್, ಆವಿಲ್ ರಸ್ಕೀನ್ಹಾ ಆನಿ ಸನ್ಮಾನಿತಾಂ ಪಯ್ಕಿಂತ್ ಕ್ಲಾರಾ ಅರುಣ್ ಡಿಕುನ್ಹಾ ಉಲಯ್ಲಿಂ.

ಅರುಣ್ ಡಿಸೋಜ್ ಅಜೆಕಾರ್ ಹಾಣೆಂ ಸೂತ್ರಸಂಚಾಲನ್ ಕರ್ತಾಸ್ತಾಂ ಮ್ಹಳೆಂ; "ಶೆಂಭೊರ್ ಆನಿ ತಿಸಾಂಚ್ಯಾಕೀ ಚಡಿತ್ ವರ್ಸಾಂಚೊ ಇತಿಹಾಸ್ ಆಸ್ಚ್ಯಾ ಕೊಂಕಣಿ ಪತ್ರಿಕೋಧ್ಯಮಾಂತ್ ಹೆಂಚ್ ಪಯ್ಲೆಪಾವ್ಟಿಂ ಕೊಂಕಣಿ ಕಾಣಿಯಾಂಚೆರ್ ಸಮಗ್ರ್ ಅಧ್ಯಯನಾಚಿಂ ಪುಸ್ತಕಾಂ ಪರ್ಗಟುನ್ ಯೆಂವ್ಚಿಂ". ಸಾಳಕಾಚ್ಯಾ ಸಿರಿವಂತಾಚ್ಯೊ ಕಥಾ (ಅಧ್ಯಯನ್), ಚಲ್ ದೋನ್ ಚಂದ್ರಾಂಕ್ (ಅಧ್ಯಯನ್), ಕಥಾವಿಹಾನ್ (ಅಧ್ಯಯನ್), ಕಥಾಪಾಠ್ (ಅಧ್ಯಯನ್). ಮ್ಹಳ್ಳಿಂ ಚ್ಯಾರ್ ಅಧ್ಯಯನ್ ಪುಸ್ತಕಾಂ, ಭೃಮಿದೆಂತ್ಲ್ಯೊ ಸಾವ್ಳ್ಯೊ (ಮೆಲ್ವಿನ್ ಜೆ. ವಾಸ್), ಭೃಮಿದೆಂತ್ಲಿ ಝಡ್ತಿ (ಮೆಲ್ವಿನ್ ಜೆ. ವಾಸ್), ಜಿಣ್ಯೆ ಕಾಣಿಕ್ (ಮೊನಿಕಾ ಡೆಸಾ ಮಥಾಯಸ್) ಮ್ಹಳ್ಳಿಂ ತೀನ್ ಕಾದಂಬರಿಚಿಂ ಪುಸ್ತಕಾಂ, ಆಮ್ಗೆಲ್ಯೊ ಕೊಂಕಣಿ ಕಾಣಿಯೊ (ಜೇಸನ್ ಪಿಂಟೊ), ವರ್ಕ್ ಫ್ರೊಮ್ ಹೋಮ್ (ವಲ್ಲಿ ಕ್ವಾಡ್ರಸ್), ಜಾಂಬ್ಳಾಚೊ ರೂಕ್ ಆನಿ ಹೆರ್ ಕಥಾ (ಕ್ಯಾಥರೀನ್ ರೊಡ್ರಿಗಸ್), ಉದ್ಕಾಚೊ ಆರ್ಸೊ (ಮೆಲ್ವಿನ್ ಜೆ. ವಾಸ್) ಮ್ಹಳ್ಳಿಂ ಚ್ಯಾರ್ ಕಥಾ ಸಂಗ್ರಹಾಂ, ನಾನುಚ್ಯಾ ಸಾಣ್ಯಾಥಾವ್ನ್ (ನಾನು ಮರೋಲ್ ತೊಟ್ಟಾಮ್), ಮುದಲ್ (ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ), ಕಾಳಿಜ್ ಉಸವ್ಲಾಂ (ಉದಯ್ ಎನ್. ಮ್ಹಾಂಬ್ರೊ) ಮ್ಹಳ್ಳಿಂ ತೀನ್ ಲೇಖನಾಂಚಿಂ ಪುಸ್ತಕಾಂ ತಶೆಂಚ್ ಉಜ್ವಾಡಾಚ್ಯೆ ವೆಂಗೆಂತ್ (ಆಂಡ್ರೂ ಎಲ್. ಡಿಕುನ್ಹಾ), ಮುರಳಿಚೊ ನಾದ್ (ಪ್ರಸನ್ನ ನಿಡ್ಡೋಡಿ ಮುಂಬಯ್), ಅಂತರ್‌ಮನ್ (ಉರ್ಜಿತಾ ಭೊಬೆ) ಮ್ಹಳ್ಳಿಂ ತೀನ್ ಕವಿತಾಸಂಗ್ರಹಾಂ, ಹಿಂ ಸರ್ವ್ ಆಶಾವಾದಿ ಪ್ರಕಾಶನಾನ್ ಪರ್ಗಟ್ಲೆಲಿಂ ಪುಸ್ತಕಾಂ ಲೊಕಾರ್ಪಣ್ ಜಾಲಿಂ. ಮಾಯ್ಕಲ್ ಡಿಸೋಜ ವಿಶನ್ ಕೊಂಕಣಿಚ್ಯಾ ಕುಮ್ಕೆಂತ್ ’ಮುರಳಿಚೊ ನಾದ್’ ಕವಿತಾಸಂಗ್ರಹ್ ಲೊಕಾರ್ಪಣ್ ಜಾಲೆಂ.

ದೆವಾದಿನ್ ಡೆನಿಸ್ ಡಿಕುನ್ಹಾ ಸ್ಮಾರಕ್ ಆಶಾವಾದಿ ಲಿಪಿಯಂತರಣ್ ಪುರಸ್ಕಾರ್ ’ನಿರ್ವಾಸಿತ್ ಯಾತ್ರಿಚಿ ಭಂವ್ಡಿ’ ಕವಿತಾಸಂಗ್ರಹಾಚ್ಯಾ ಕವಿ ಶೈಲೇಂದ್ರ ಮೆಹ್ತಾಕ್ ಮೆಲ್ವಿನ್ ರೊಡ್ರಿಗಸ್ ಹಾಗೂ ಫ್ರಾನ್ಸಿಸ್ ಡಿಕುನ್ಹಾನ್ ಶಾಲ್ ಪಾಂಗ್ರಾವ್ನ್, ಮಾನಪತ್ರ್, ಯಾದಿಸ್ತಿಕಾ ಹಾಗೂ ಉಡಾಸಾಚಿ ಕಾಣಿಕ್ ದಿಲಿ. ಆಂಡ್ರೂ ಎಲ್. ಡಿಕುನ್ಹಾನ್ ಪುರಸ್ಕಾರಾಚೊ ಐವಜ್ ರು.25,000 ಚೆಕ್ ರುಪಾರ್ ಹತಾಂತರ್ ಕೆಲಿ. ಕವಿ ಶೈಲೇಂದ್ರ ಮೆಹ್ತಾನ್ ಅಪ್ಲಿಂ ದೋನ್ ಉತ್ರಾಂ ಉಲಯ್ಲೊ.

ಮೆಲ್ವಿನ್ ರೊಡ್ರಿಗಸ್ (ಸಾಹಿತ್ಯ ಅಕಾಡೆಮಿಚೊ ಸಂಚಾಲಕ್), ಅನಿಲ್ ಲೋಬೊ ಪೆರ್ಮಾಯ್ (ಎಮ್.ಸಿ.ಸಿ.ಬ್ಯಾಂಕಾಚೊ ನಿರ್ದೇಶಕ್), ಡೊ.ಎಡ್ವರ್ಡ್ ಎಲ್. ನಜ್ರೆತ್, ಜುಲಿಯಾನಾ ವೇಗಸ್, ಎಚ್ಚೆಮ್ ಪೆರ್ನಾಲ್ (ಸಂಪಾದಕ್ - ಕಿಟಾಳ್.ಕೊಮ್), ವಿನ್ಸಿ ಕ್ವಾಡ್ರಸ್ (ದಲ್ಗಾದೊ ಕೊಂಕಣಿ ಅಕಾಡೆಮಿಚೊ ಆಧ್ಲೊ ಅಧ್ಯಕ್ಷ್), ಜ್ಯೋ ಕ್ವಾಡ್ರಸ್ ಸಂತೆಕಟ್ಟೆ. ಮಾನಾಧಿಕ್ ಆಲ್ವಿನ್ ಸೆರಾವೊ, ಎಚ್. ಆರ್. ಆಳ್ವ, ಕೊನ್ಸೆಪ್ಟಾ ಫೆರ್ನಾಂಡಿಸ್ ಆಳ್ವ, ವಾಯ್ಲೆಟ್ ಜೆ. ಪಿರೇರಾ, ಸಾವ್ರಾಟ್ ಭೊಬೆ, ಮಚ್ಚಾ ಮಿಲಾರ್, ಮಾರಿಯೆಟ್ ರಸ್ಕೀನ್ಹಾ, ಡೇವಿಡ್ ಡಿಸೋಜ್ ಅಜೆಕಾರ್, ಜೋನ್ ಪೆರ್ಮನ್ನೂರ್, ವಿಲ್ಫ್ರೆಡ್ ಲೋಬೊ ಪಡೀಲ್ ಸಯ್ರಿಂ ಜಾವ್ನ್ ಆಸ್ಲಿಂ. ಪ್ರಿಯಾ ಸಿಕ್ವೇರಾ ಫೆರಾರ್, ಜೆಸ್ಸಿ ಲೋಬೊ ಕುಲ್ಶೇಕರ್ ಹಾಣಿಂ ಸಹಕಾರ್ ದಿಲೊ.

ಲೊಕಾರ್ಪಣ್ ಜಾಲ್ಲ್ಯಾ ಸರ್ವ್ ಪುಸ್ತಕಾಂಚ್ಯಾ ಲೇಖಕಾಂಚ್ಯಾ ತರ್ಫೆನ್ ನಾನು ಮರೋಲ್ ತೊಟ್ಟಾಮ್ ಉಲಯ್ಲೊ. ವಲ್ಲಿ ಕ್ವಾಡ್ರಸ್ ಅಜೆಕಾರ್ ಹಾಣೆಂ ಧಿನ್ವಾಸ್ ಪಾಠಯ್ಲೆ.

आशावादी प्रकाशन-चो रुप्यॊत्सव आनी पय्णारीचो दशमानॊत्सव संभ्रम

दसेंबर १४ (मंग्ळूर): २००० इस्वेंत कुवेय्टांत सुर्वात्‌ल्ल्या ’आशावादी प्रकाशन’ चो रुप्यॊत्सव, तशेंच २०१५ इस्वेंत मुंबंय्त सुर्वात्‍ल्ल्या पय्णारि.कोम म्हळ्ळ्या तीन लिपिच्या कोंकणी साहित्यिक जाळिजाग्याचो दशमानॊत्सव अशें दोडो संभ्रम आय्तारा १४ दसेंबर) सकाळिं १० थाव्न दोन्पारां १ पर्यांत मंग्ळुर्‌च्या एम.सि.सि.ब्यांक्चाच्या पि.एफ.एक्स.सभांगणांत चल्लो. बस्ती वामन शेणय स्मारक २५ कोंकणी पुस्तकांचें लोकार्पण, मौल्याधारित कोंकणी पत्रिकॊध्यमाचो जिविता-आव्देचो पुरस्कार तशेंच साहित्य, कला, रंग्‌मंच, भरतनाट्य, समाजसॆवा शेतांनी दॆण्गी दिलेल्यांक सन्मान कार्यें आनी कन्नड लिपियेंत लिपियंतरण जाल्ल्या कोंकणिच्या पुस्तकाचो पय्लो पुरस्कार ’देवादिन डॆनिस डिकुन्हा स्मारक आशावादी लिपियंतरण पुस्तक पुरस्कार प्रधान’ हिं सर्व ह्या संभ्रमांत चल्लें.

कार्यक्रमच्या सुर्वातेर प्रस्तावन दिलेल्या सूत्र-संचालक लारेन्स विनॊद बर्बॊजा शिर्वा (म्यांचेस्टर) हाणें आशावादी प्रकाशन पाटल्या २५ वर्सांनी कोंकणी साहित्य प्रकाशन मात्र न्हय आस्तां, साहित्यिक चटुवटिको, साहित्यिक स्पर्दे, अध्ययन कामासाळां, एका संस्थ्यापरिं निरंतर जाव्न चलव्न आय्लां, ताचो फळ जाव्न कोंकणिंत जाय्ते साहित्यिक प्रतिभावंत आज पर्जळ्तात म्हणालो.

कार्यक्रमाचें उग्तावण केलें मानादिक रोनाल्ड प्रकाश डिसॊज अजेकार हाणें, आशावादी प्रकाशनचो स्थापक तशेंच पय्णारि.कोम-चो संपादक वल्ली क्वाड्रस अजेकार हाणें येव्कार उलव्प केलें, नाम्नेचो कोंकणी कवी ~आंड्रू एल. डिकुन्हान ’आशावादी प्रकाशनाची २५ वर्सांची वाट’ विश्यांत सविस्तार विवर दितच मानाधिक मेल्विन डिकुन्हान ’पय्णारी दशमानॊत्सवाचो विशॆष अंको (आशावादि-२५)’ लोकार्पण केलो. मुकेल सय्रे जाव्न नंदगॊपाल शेणय (विश्व कोंकणी कॆंद्र, मंग्ळूर), डो.चंद्रलॆख डिसॊज (गॊवा विध्यापीठाच्या कोंकणी विभागाची आध्ली मुखेस्त), तशेंच बाय कॊरिन रास्किन्हा (वैट-डाव्स) वेदिचेर उपस्थित आस्लिं.

क्लारा अरुण डिकुन्हा (समाज सॆवा), इवेट रेमॊना पिरॆरा (भरतनाट्य), रॊहित सांक्तुस (समाज सॆवा), क्रिस्टॊफर डिसॊज नीनासम (रंग्‌मंच), विल्सन डिसॊज कय्यार (कला), ग्ल्यानिश मार्टिस अलंगार (साहित्य), बर्नाड जे कोस्ता कुंदापुर (नाटक आनी डिजिटल पत्रिकॊध्यम) हांकां शाल पांग्राव्न, यादिस्तिका, मानपत्र आनी उडासाची काणिक दीव्न सन्मान केलो. आविल रस्कीन्हा (मौल्याधारित कोंकणी पत्रिकॊध्यम) हाका जिण्ये आव्देचो पुरस्कार, डो.चंद्रलॆख डिसॊज आनी मानादिक चॆतन लॊबोथाव्न दिवय्लो. हेच वेळार हांचो तिस्रो कविताजमो ’पाव्सा थेंबे’ लोकार्पण जालो.

मानाधिक मेल्विन डिकुन्हान अप्ले संधॆश दितच, आविल रस्कीन्हा आनी सन्मानितां पय्किंत क्लारा अरुण डिकुन्हा उलय्लिं.

अरुण डिसॊज अजेकार हाणें सूत्रसंचालन कर्तास्तां उलव्न म्हळें, शेंभोर आनी तिसांच्याकी चडित वर्सांचो इतिहास आस्च्या कोंकणी पत्रिकॊध्यमांत हेंच पय्लेपाव्टिं कोंकणी काणियांचेर समग्र अध्ययनाचिं पुस्तकां पर्गटुन येंव्चे विश्यांत उलय्लो. साळकाच्या सिरिवंताच्यो कथा (अध्ययन), चल दॊन चंद्रांक (अध्ययन), कथाविहान (अध्ययन), कथापाठ (अध्ययन). भृमिदेंत्ल्यो साव्ळ्यो (मेल्विन जे. वास), भृमिदेंत्ली झड्ती (मेल्विन जे. वास), जिण्ये काणिक (मोनिका डेसा मथायस) म्हळ्ळिं तीन कादंबरिचिं पुस्तकां, आम्गेल्यो कोंकणी काणियो (जॆसन पिंटो), वर्क फ्रोम हॊम (वल्ली क्वाड्रस), जांब्ळाचो रूक आनी हेर कथा (क्याथरीन रोड्रिगस), उद्काचो आर्सो (मेल्विन जे. वास) म्हळ्ळिं चार कथा संग्रहां, नानुच्या साण्याथाव्न (नानु मरॊल तोट्टाम), मुदल (स्टीवन क्वाड्रस पेर्मुदे), काळिज उसव्लां (उदय एन. म्हांब्रो) म्हळ्ळिं तीन लॆखनांचिं पुस्तकां तशेंच उज्वाडाच्ये वेंगेंत (~आंड्रू एल. डिकुन्हा), मुरळिचो नाद (प्रसन्न निड्डॊडी मुंबय), अंतर्‌मन (उर्जिता भोबे) म्हळ्ळिं तीन कवितासंग्रहां, आशावादी प्रकाशनान पर्गट्लेलिं पुस्तकां लोकार्पण जालिं. माय्कल डिसॊज विशन कोंकणिच्या कुमोकेंत ’मुरळिचो नाद’ कवितासंग्रह लोकार्पण जालें.

देवादिन डेनिस डिकुन्हा स्मारक आशावादी लिपियंतरण पुरस्कार ’निर्वासित यात्रिची भंव्डि’ कवितासंग्रहाच्या कवी शैलॆंद्र मेह्ताक मेल्विन रोड्रिगस हागू फ्रान्सिस डिकुन्हान शाल पांग्राव्न, मानपत्र, यादिस्तिका हागू उडासाची काणिक दिलि. ~आंड्रू एल. डिकुन्हान पुरस्काराचो ऐवज रु.२५,००० चेक रुपार हतांतर केलो. कवी शैलॆंद्र मेह्तान अप्लिं दॊन उत्रां उलय्लो.

मेल्विन रोड्रिगस (साहित्य अकाडेमिचो संचालक), अनिल लॊबो पेर्माय (एम.सि.सि.ब्यांकाचो निर्दॆशक), डो.एड्वर्ड एल. नज्रेत, जुलियाना वॆगस, एच्चेम पेर्नाल, विन्सी क्वाड्रस (दल्गादो कोंकणी अकाडेमिचो आध्लो अध्यक्ष), जॊ क्वाड्रस संतेकट्टे. मानाधिक आल्विन सेरावो, एच. आर. आळ्व, कोन्सेप्टा फेर्नांडिस आळ्व, वाय्लेट जे. पिरॆरा, साव्राट भोबे, मच्चा मिलार, मारियेट रस्कीन्हा, डॆविड डिसॊज अजेकार, जॊन पेर्मन्नूर, विल्फ्रेड लॊबो पडील सय्रिं जाव्न आस्लिं. प्रिया सिक्वॆरा फेरार, जेस्सी लॊबो कुल्शॆकर हाणिं सहकार दिलो.

लोकार्पण जाल्ल्या सर्व पुस्तकांच्या लॆखकांच्या तर्फेन नानु मरॊल तोट्टाम उलय्लो. वल्ली क्वाड्रस अजेकार हाणें धिन्वास पाठय्ले.