![]() |
 |
|
ವೆಂಚಿಕ್ ತಿಯಾತ್ರಾಂಚೆರ್ ಚಿಂತನ್-ಮಂಥನ್ |
ವೆಂಚಿಕ್ ತಿಯಾತ್ರಾಂಚೆರ್ ಚಿಂತನ್-ಮಂಥನ್
ಕೊಂಕಣಿ ತಿಯಾತ್ರಾಚೆರ್ ರಾಷ್ಟ್ರೀಯ್ ಪರಿಸಂವಾದ್ - ರೋಮಿ
ಲಿಪಿಂತ್ಲೆಂ ಪಯ್ಲೆಂ ಜರ್ನಲ್ ಸೊದ್-ಪರ್ಮಳ್ ಲೊಕಾರ್ಪಣ್
19 ಫೆಬ್ರೆರ್ 2026 (ಗೊಂಯ್): ನಾಮ್ನೆಚೊ ಕೊಂಕಣಿ
ತಿಯಾತ್ರಿಸ್ತ್ ಬಾಬ್ ತೊಮಾಜಿನೊ ಕಾರ್ಡೊಜೊಚ್ಯಾ ’ಆಮಿ
ಸಗ್ಳೆ ಏಕ್’, ’ಗೋವಾ.. ಗೋಯಿಂಗ್..
ಗೋನ್..?’, ’ಮೊಂವಾಳ್ ವೀಕ್’
ತೀನ್ ತಿಯಾತ್ರಾಂಚೆರ್ ಎಕಾ ದಿಸಾಚೊ ರಾಷ್ಟ್ರೀಯ್
ಪಾಂವ್ಡಾಚೊ ಪರಿಸಂವಾದ್ ದಲ್ಗಾದೊ ಕೊಂಕಣಿ
ಅಕಾಡೆಮಿ ಆನಿ ಸಾಂತ್ ಝೇವಿಯರ್ಸ್ ಕೊಲೆಜ್ ಮಾಪ್ಸಾ ಗೊಂಯ್
ಹಾಂಚ್ಯಾ ಜೊಡ್ ಪಾಲವಾಖಾಲ್ 19 ಫೆಬ್ರೆರ್ 2026 ವೆರ್
ಸಾಂತ್ ಝೇವಿಯರ್ಸ್ ಕೊಲೆಜಿಚ್ಯಾ ಸಭಾಂಗ್ಣಾಂತ್ ಆಯೋಜಿತ್
ಜಾಲೊ. ’ಸೊದ್-ಪರ್ಮಳ್’ ನಾಂವಾಚೆಂ
ರೋಮಿ ಲಿಪಿಂತ್ಲೆಂ ಪಯ್ಲೆಂ ಸಾಹಿತ್ಯಿಕ್ ಜರ್ನಲ್, ತಶೆಂಚ್
ಲಿಪ್ಯಂತರಣಾಚಿಂ ಹೆರ್ ಚಾರ್ ಪುಸ್ತಕಾಂ ಹೆಚ್ ಸಂಧರ್ಭಾರ್
ಮಾನಾಚೊ ಸಯ್ರೊ ಜಾವ್ನ್ ಹಾಜರ್ ಆಸ್ಲಲ್ಯಾ ಬಾಬ್ ವಲ್ಲಿ
ಕ್ವಾಡ್ರಸಾನ್ ಲೊಕಾರ್ಪಣ್ ಕೆಲಿಂ.
ಕಾವಾತ್ಯಾಕ್ ಉದಕ್ ದಿವುನ್ ಪರಿಸಂವಾದಾಚಿ ಸುರ್ವಾತ್
ಜಾತಚ್, ಸಾಂತ್ ಝೇವಿಯರ್ಸ್ ಮಹಾವಿಧ್ಯಾಲಯಾಚೆ ನಿರ್ವಾಹಕ್
ಬಾಪ್ ಆಂಟನಿ ಸಲೆಮಾನ್ ಯೆವ್ಕಾರಾಚ್ಯಾ ಅಪ್ಲ್ಯಾ
ಉಲವ್ಪಾಂತ್ ’ಜಶೆಂ ಎಕಾ
ಕಾವಾತ್ಯಾಕ್ ಉದಕ್ ಜೀವ್ ದಿತಾ ತೆಚ್ಪರಿಂ ಅಸಲಿಂ
ಪರಿಸಂವಾದಾಂ ಆಮ್ಚ್ಯಾ ಮತಿಂತ್ಲ್ಯಾ ಚಿಂತ್ಪಾಂಕ್ ಜೀವ್
ದಿತಾ’ ಮ್ಹಣಾಲೊ. ಪ್ರಿನ್ಸಿಪಾಲ್ ಡೊ ಉರ್ಸುಲಾ
ಬಾರೆಟ್ಟೊನ್ ಅಪ್ಲ್ಯಾ ಉಲವ್ಪಾಂತ್ ’ಆಜ್
ಕೊಂಕಣಿ ಭಾಸೆಕ್ ಆಮಿ ಮುಕಾರ್ ವರುಂಕ್ ಚಿಂತುನ್ ಆಸ್ತಾನಾ
ಆಮ್ಚೊ ಕಾಲ್ ಆನಿ ಕಾಲ್-ಪೊಯ್ರ್ ಜಾಲ್ಲೊ ಕೊಂಕಣಿ ವಾವ್ರ್
ಆನಿ ಇತಿಹಾಸ್ ಆಮಿಂ ಜಾಣಾಂ ಜಾಂವ್ಚಿ ಗರ್ಜ್ ಆಸಾ, ತ್ಯಾ
ದಿಶೆನ್ ಆಯ್ಚೊ ಪರಿಸಂವಾದ್ ಉಜ್ವಾಡ್ ಫಾಂಕಯ್ತಲೊ’
ಮ್ಹಣಾಲಿ.
ಪ್ರಸ್ತಾವಿಕ್ ಉಲವ್ಪಾಂತ್ ಸಾಂ ಝೇವಿಯರ್ಸ್
ಕೊಲೆಜಿಚ್ಯಾ ಕೊಂಕಣಿ ವಿಭಾಗಾಚೊ ಮುಖೆಸ್ತ್ ಬಾಬ್ ಧರ್ಮ
ಚೋಡಕ್ನಾರಾನ್ ’ಕೊಂಕಣಿ
ತಿಯಾತ್ರ್ ಗೊಂಯ್ಚ್ಯಾ ಕೊಂಕಣಿ ಮನ್ಶಾಚ್ಯಾ ಅಸ್ಥಿತ್ವಾಚಿ
ಕುರುಃ ಜಾಲ್ಲ್ಯಾನ್ ಹ್ಯಾ ತಿಯಾತ್ರಾಂಕ್ ಸಾಂಬಾಳುಂಕ್ ಆನಿ
ರಾಕೊನ್ ವ್ಹರ್ಚಿ ಜವಾಭ್ದಾರಿ ಆಮ್ಚಿ ಸರ್ವಾಂಚಿ’
ಮ್ಹಣಾಲೊ.
ದಲ್ಗಾದೊ ಕೊಂಕಣಿ ಅಕಾಡೆಮಿಚೊ ಅಧ್ಯಕ್ಷ್ ಬಾಬ್
ಸೆಲ್ಸೊ ಫೆರ್ನಾಂಡಿಸ್ ಅಪ್ಲ್ಯಾ ಉಲವ್ಪಾಂತ್ ’ಕೊಂಕಣಿ
ಭಾಸ್ ಲೊಕಾಚ್ಯಾ ಜಿವಿತಾಂತ್ ಥಿರ್ ಜಾವ್ನ್ ಉರ್ಚ್ಯಾಂತ್
ಆಮ್ಚ್ಯಾ ಆಧ್ಲ್ಯಾಂನಿ ಸಾಂಬಾಳೂನ್ ದವರ್ಲಲೆಂ ದಾಯ್ಜ್
ರಾಕೊನ್ ವರ್ಚಿ ಗರ್ಜ್ ಆಸಾ’ ಮ್ಹಣಾಲೊ.
ಮಾನಾಚೊ ಸಯ್ರೊ ಬಾಬ್ ವಲ್ಲಿ ಕ್ವಾಡ್ರಸ್ ಅಪ್ಲ್ಯಾ
ಉಲವ್ಪಾಂತ್ ’ಸಂಸಾರ್ಂತ್
ಭೋವ್ ಗರೀಬ್ ಮನಿಸ್ ದುಡು ವಾ ಆಸ್ತ್ ನಾಸ್ಚೊ ನ್ಹಯ್,
ಬಗಾರ್, ಸಂಸ್ಕೃತಿ ಆನಿ ಮಾನವೀಯ್ ಮೌಲ್ಯಾಂ ಹೊಗ್ಡಾವ್ನ್
ಘೆತ್ಲಲೊ ಜಾವ್ನಾಸಾ. ಆಜ್ ಹರ್ಶೆಂಚೆಪರಿಂ ದರೇಕ್ ಮನಿಸ್
ಭಿರಾಂತೆನ್ ಜಿಯೆವ್ನ್ ಆಸಾ, ತಿಚ್ ಭಿರಾಂತ್ 1950 ಚ್ಯಾ
ದಶಕಾಂತ್ ’ನಯಾ ದೌರ್’ ಪಿಂತುರಾಂತ್ ಮಶಿನಾಂ ಯೆತಾಸ್ತಾಂ
ಮನ್ಶಾಂಕ್ ಆಸ್ಲಿ, 1980 ಚ್ಯಾ ದಶಕಾಂತ್ ’ಟೆಲಿವಿಶನ್’
ಯೆತಾಸ್ತಾಂ ಮನ್ಶಾಚ್ಯಾ ಮತಿಂತ್ ಆಸ್ಲಿಂ, ಆತಾಂ ಕೃತಿಮ್
ಬುಧ್ವಂತ್ಕಾಯೆಚೆರ್ ಭಿರಾಂತ್. ದೆಕೂನ್ ಮನಿಸ್ ಆಜ್
ಶಿಕಪ್-ದುಡು ಚ್ಯಾ ಪಾಟಿಕ್ ಪಡೊನ್ ಅಪ್ಲಿ ಸಂಸ್ಕೃತಿ
ತಶೆಂಚ್ ಮೌಲ್ಯಾಂ ಸಾಂಡುನ್ ವ ವಿಸ್ರೊನ್ ಜಿಯೆಂವ್ಕ್
ಲಾಗ್ಲಾ ದೆಕೂನ್ ಆಜ್ ಸಂಸಾರಾಂತ್ 39% ಲೋಕ್ ’ಸ್ಟ್ರೆಸ್’
ಮ್ಹಳ್ಳ್ಯಾ ಮ್ಹಾ-ಪಿಡೆಚೆಂತ್ ಸಂಕಶ್ಟಾಂತ್ ಆಸಾ. ಶಿಕಪ್
’ಮತಿಕ್’ ಆಕಾರ್ ದಿತಾ ತರ್ ಸಂಸ್ಕೃತಿ ’ಸ್ವಭಾವಾಕ್ (Character)’
ಆಕಾರ್ ದಿತಾ’. ಮ್ಹಣಾಲೊ. ದಲ್ಗಾದೊ ಕೊಂಕಣಿ
ಅಕಾಡೆಮಿಚ್ಯಾ ಕಾರ್ಯದರ್ಶಿ ಬಾಪ್ ಮಾಯ್ರನ್ ಬಾರೆಟ್ಟೊನ್
ಧಿನ್ವಾಸ್ ಪಾಠಯ್ಲೆ.
ಹೆಚ್ ಸಂಧರ್ಭಾರ್ ದಲ್ಗಾದೊ ಕೊಂಕಣಿ ಅಕಾಡೆಮಿನ್
ಪ್ರಕಾಶಿತ್ ಕೆಲ್ಲೆಂ ’ಸೊದ್-ಪರ್ಮಳ್’
ನಾಂವಾಚೆಂ ರೋಮಿ ಲಿಪಿಯೆಂತ್ಲೆಂ ಪಯ್ಲೆಂ ಸಾಹಿತ್ಯಿಕ್
ಜರ್ನಲಾಚೆಂ, ತಶೆಂಚ್ ಬಾಬ್ ತೊಮಾಜಿನ್ ಕಾರ್ಡೊಜೊಚ್ಯಾ
ತೀನ್ ತಿಯಾತ್ರಾಂಚಿಂ ಪುಸ್ತಕಾಂ, ಬಾಪ್ ಲೂವಿಸ್
ಗೋಮ್ಸಾಚ್ಯಾ ತಿಯಾತ್ರಾಂಚೆರ್ ಸಂಶೋಧ್ ಕೆಲ್ಲೆಂ ರೋಮಿ
ತಶೆಂಚ್ ನಾಗರಿ ಲಿಪಿಂನಿ ಲಿಪ್ಯಂತರಣ್ ಕೆಲ್ಲೆಂ ’ತಿಯಾತ್ರಾಭ್ಯಾಸ್’
ಪುಸ್ತಕಾಂ ಮಾನಾಚೊ ಸಯ್ರೊ ಬಾಬ್ ವಲ್ಲಿ ಕ್ವಾಡ್ರಸಾನ್
ಲೊಕಾರ್ಪಣ್ ಕೆಲಿಂ. ಹಿಂ ಪುಸ್ತಕಾಂ ಬಾಯ್ ಅಂಕಿತಾ
ಜಂಬಾವ್ಲಿಕರ್ ಆನಿ ಬಾಪ್ ಲೂವಿಸ್ ಗೋಮ್ಸ್ ಹಾಣಿಂ
ಲಿಪ್ಯಂತರಣ್ ಕೆಲ್ಯಾಂತ್, ತಶೆಂಚ್ ನ್ಯೂ ಏಜ್ ಪ್ರಕಾಶನಾನ್
ಪ್ರಕಾಶಿತ್ ಕೆಲ್ಯಾಂತ್. ಉಪ್ರಾಂತ್ 49 ತಿಯಾತ್ರಾಂ
ಬರವ್ಪಿ ಶಿಕ್ಷಕ್, ಸಾಮಾಜಿಕ್, ರಾಜಕೀಯ್ ಮುಖೆಲಿ, ತಶೆಂಚ್
ದಲ್ಗಾದೊ ಕೊಂಕಣಿ ಅಕಾಡೆಮಿಚೊ ಅಧ್ಯಕ್ಷ್ ಜಾವ್ನ್ ಸೆವಾ
ದಿಲ್ಲ್ಯಾ ಬಾಬ್ ತೊಮಾಜಿನೊ ಕಾರ್ಡೊಜೊಕ್
ಬಾಪ್ ಆಂಟನಿ ಸಲೆಮೊ ತಶೆಂಚ್ ಪ್ರಿನ್ಸಿಪಾಲ್ ಡೊ.ಅರ್ಸುಲಾ
ಬಾರೆಟ್ಟೊನ್ ಸನ್ಮಾನ್ ಕೆಲೊ.
’ಗೋವನ್ ರಿವ್ಯೂ’ ಆನಿ ’ಗುಲಾಬ್’ ಪತ್ರಾಚೊ ಸಂಪಾದಕ್
ಬಾಬ್ ಫಾವುಸ್ತೊ ದ ಕೊಸ್ತಾನ್ ಬಿಜ್
ಭಾಷಣಾಂತ್ (Keynotes) ಕೊಂಕಣಿ ತಿಯಾತ್ರಾಚೊ
ಇತಿಹಾಸ್ ಆನಿ ಕಸೊ ಹೊ ತಿಯಾತ್ರ್ ಗೊಂಯ್ಕಾರಾಂಚ್ಯಾ
ಜಿವಿತಾಚ್ಯಾ ವೆವೆಗ್ಳ್ಯಾ ಸಂಘರ್ಶಾಂಕ್ ಪರಿಯಾರ್ ಸೊಧುಂಕ್
ಪಾವ್ಲೊ ಆನಿ ಇತಿಹಾಸಿಕ್, ಸಮಾಜಿಕ್, ರಾಜಕೀಯ್, ಧಾರ್ಮಿಕ್
ಪ್ರಕಾರಾಂಚ್ಯಾ ಪ್ರಕಾರಾಂಚೆ ತಿಯಾತ್ರ್ ಕಶೆಂ ಸಮಾಜೆಚ್ಯಾ
ಹೆರ್ ಚಿಂತ್ಪಾಚೆರ್ ಪ್ರಭಾವ್ ಘಾಲುಂಕ್ ಸಕ್ಲೆ
ಮ್ಹಳ್ಳ್ಯಾಚೆರ್ ಉಲಯ್ಲೊ.
ಪಯ್ಲ್ಯಾ ಪ್ರಪತ್ರ್ ಸಾದರೀಕರಣಾಚೆಂ ಸತ್ರ್
ಡೊ. ಕೋಸ್ಮಾ ಫೆರ್ನಾಂಡಿಸಾಚ್ಯಾ
ಅಧ್ಯಕ್ಷ್ಪಣಾಖಾಲ್ ’ಗೋವಾ.. ಗೋಯಿಂಗ್..
ಗೋನ್..?’ ಆನಿ ’ಆಮಿ ಸಗ್ಳೆ ಏಕ್’ಹ್ಯಾ
ದೋನ್ ತಿಯಾತ್ರಾಂಚೆರ್ ಪ್ರಪತ್ರಾಂ ಸಾದರ್ ಜಾಲಿಂ.
ಸಮಾಜ್ಶಾಸ್ತ್ರ್ ನದ್ರೆಂತ್ಲ್ಯಾನ್ ’ಗೋವಾ..
ಗೋಯಿಂಗ್.. ಗೋನ್..?’ ತಿಯಾತ್ರಾಚಿ ಸಮೀಕ್ಷಾ
ಬಾಬ್ ದರ್ಶನ್ ಕಾಂದೊಲ್ಕಾರ್ (ಸಹಾಯಕ್
ಪ್ರಾಧ್ಯಾಪಕ್ - ವಿಧ್ಯಾ ಪ್ರಭೋಧಿನಿ ಕೊಲೆಜ್ ಫೊರ್ವೊರಿಂ)
ಭಾಶಿಕ್ ವಿಸ್ಕವ್ಣೆಚೆರ್ ’ಗೋವಾ.. ಗೋಯಿಂಗ್.. ಗೋನ್..?’
ತಿಯಾತ್ರಾಚಿ ಸಮೀಕ್ಷಾ ಬಾಯ್ ಎಡ್ನಾ ವಾಜ್
(ಸಹಾಯಕ್ ಪ್ರಾಧ್ಯಾಪಕ್ - ಖೆಪೆಂ ಸರ್ಕಾರಿ
ಮಹಾವಿಧ್ಯಾಲಯ್)
ಸಮಾಜಿಕ್ ಆನಿ ಇತಿಹಾಸಿಕ್ ಸಂಧರ್ಭಾನ್
’ಆಮಿ ಸಗ್ಳೆ ಏಕ್’ ತಿಯಾತ್ರಾಚಿ ಸಮೀಕ್ಷಾ ಡೊ.
ರೆಮಿ ಡಾಯಸ್ (ಇತಿಹಾಸಾಚೊ ಪ್ರಾಧ್ಯಾಪಕ್ -
ಖೆಪೆಂ ಸರ್ಕಾಇ ಮಹಾವಿಧ್ಯಾಲಯ್)
ಭಾಶಿಕ್ ವಿಶ್ಲೇಷಣ್
’ಆಮಿ ಸಗ್ಳೆ ಏಕ್’ ತಿಯಾತ್ರಾಚಿ ಸಮೀಕ್ಷಾ ಬಾಬ್
ಸುಶಾಂತ್ ನಾಯ್ಕ್ (ಸಹಾಯಕ್ ಪ್ರಾಧ್ಯಾಪಕ್ -
ಸರ್ಕಾರಿ ಕೊಲೆಜ್ ಸಾಂಕಲಿಂ ಗೊಂಯ್)
ದೊನ್ಪಾರಾಂ ಉಪ್ರಾಂತ್ಲ್ಯ್ ಪ್ರಪತ್ರ್ ಸಾದರೀಕರಣಾಚೆಂ
ಸತ್ರ್ ಬಾಬ್ ವಲ್ಲಿ ಕ್ವಾಡ್ರಸಾಚ್ಯಾ
ಅಧ್ಯಕ್ಷ್ಪಣಾಖಾಲ್ ’ಮೊಂವಾಳ್ ವೀಕ್’
ತಿಯಾತ್ರಾಚೆರ್ ಪ್ರಪತ್ರಾಂ ಸಾದರ್ ಜಾಲಿಂ.
’ಮೊಂವಾಳ್ ವೀಕ್’ ತಿಯಾತ್ರಾಚೊ ಅಭ್ಯಾಸ್
(ಸಮಾಜ್ಶಾಸ್ತ್ರೀಯ್ ನದ್ರೆಂತ್ಲ್ಯಾನ್) - ಡೊ.
ಹನುಮಂತ್ ಚೋಪ್ಡೇಕಾರ್ (ಕೊಂಕಣಿ ವಿಭಾಗಾಚೆ
ಮುಖೆಸ್ತ್ - ಗೊಂಯ್ ಮಹಾವಿಧ್ಯಾಪೀಠ್)
’ಮೊಂವಾಳ್
ವೀಕ್’ ತಿಯಾತ್ರಾಚೊ ಅಭ್ಯಾಸ್ (ಭಾಶಿಕ್ ಚಿಕಿತ್ಸಾ) -
ಡೊ. ಡೆನಿಸ್ ವಾಸಾಚೆಂ ಪ್ರಪತ್ರ್
ಬಾಯ್ ವಿನಿತಾ ವೆಲಿಪಾನ್ ಸಾದರ್ ಕೆಲೆಂ (ಸಹಾಯಕ್
ಪ್ರಾಧ್ಯಾಪಕ್ - ರೋಜರಿ ಕೊಲೆಜ್ ನಾವೆಲಿಂ)
’ಮೊಂವಾಳ್
ವೀಕ್’ ತಿಯಾತ್ರಾಚೊ ಅಭ್ಯಾಸ್ (ಕಾಂತಾರಾಂಚೆಂ
ಚಿಂತನ್-ಮಂಥನ್) - ಬಾಬ್ ಧರ್ಮ ಚೋಡನ್ಕಾರ್
(ಕೊಂಕಣಿ ವಿಭಾಗಾಚೆ ಮುಖೆಸ್ತ್ - ಸಾಂತ್ ಝೆವಿಯರ್ಸ್
ಮಹಾವಿಧ್ಯಾಲಯ್, ಮಾಪ್ಸಾ)
’ಮೊಂವಾಳ್ ವೀಕ್’
ತಿಯಾತ್ರಾಚೊ ಅಭ್ಯಾಸ್ (ಪರ್ಯಾಟನಾಚ್ಯಾ ಸಂಧರ್ಭಾಂತ್) -
ಡೊ. ಎವೆರೆತ್ ಫೆರ್ನಾಂಡಿಸ್
(ಇತಿಹಾಸಾಚೊ ಸಹಾಯಕ್ ಪ್ರಾಧ್ಯಾಪಕ್ - ಸರ್ಕಾರಿ ಕೊಲೆಜ್,
ಖೆಪೆಂ)
ಗೊಂಯ್ಚ್ಯಾ ಸಭಾರ್ ಹೆರ್ ಕೊಲೆಜಿಚಿಂ
ವಿಧ್ಯಾರ್ಥಿಂನಿ ಹ್ಯಾ ಪರಿಸಂವಾದಾಂತ್ ವಾಂಟೊ ಘೆತ್ಲೊ.
ಸಾಂ ಝೇವಿಯರ್ಸ್ ಕೊಲೆಜಿಚ್ಯಾ ವಿಧ್ಯಾರ್ಥಿಂನಿ
ತಿಯಾತ್ರಾಚಿಂ ಕಾಂತಾರಾಂ ಗಾಯ್ಲಿಂ. ಹ್ಯಾ ಪರಿಸಂವಾದಾಚೆಂ
ಸೂತ್ರ್ ಸಂಚಾಲನ್ ಕೆಲ್ಲೆಂ ಬಾಯ್ ಅಂಕಿತಾ ಜಂಬಾವ್ಲಿಕರ್,
ಬಾಯ್ ಪ್ರಣಿತಾ ಆನಿ ಬಾಬ್ ಮೇಗನ್ ದ ಸೋಜ್ ಹಾಣಿಂ. ಆಯೋಜಕ್
ಬಾಪ್ ಲೂವಿಸ್ ಗೋಮ್ಸ್ ಹಾಣಿಂ ಧಿನ್ವಾಸಿ ಉಲವ್ಪ್ ಕೆಲೆಂ.
|
|
वेंचीक तियात्रांचेर चिंतन-मंथन |
|
वेंचीक तियात्रांचेर चिंतन-मंथन
कोंकणी
तियात्राचेर राषट्रीय परिसंवाद - रोमी लिपिंतलें
पयलें जर्नल सोद-पर्मळ लोकार्पण
१९ फेबरेर
(गोंय): नाम्नेचो कोंकणी तियात्रिसत बाब तोमाजिनो
कार्डोजोच्या ’आमी सगळे एक’, ’गोवा.. गोयिंग..
गोन..?’, ’मोंवाळ वीक’ तीन तियात्रांचेर एका
दिसाचो राषट्रीय पांवडाचो परिसंवाद दल्गादो कोंकणी
अकाडेमी आनी सांत झेवियर्स कोलेज माप्सा गोंय
हांच्या जोड पालवाखाल १९ फेबरेर २०२६ वेर सांत
झेवियर्स कोलेजिच्या सभांगणांत आयोजीत जालो.
’सोद-पर्मळ’ नांवाचें रोमी लिपिंतलें पयलें
साहित्यीक जर्नल, तशेंच लिप्यंतरणाचीं हेर चार
पुसतकां हेच संधर्भार मानाचो सयरो जावन हाजर
आसलल्या बाब वल्ली क्वाड्रसान लोकार्पण केलीं.
कावात्याक उदक दिवून परिसंवादाची सुर्वात
जातच, सांत झेवियर्स महाविध्यालयाचे निर्वाहक बाप
आंटनी सलेमान येवकाराच्या अपल्या उलवपांत ’जशें
एका कावात्याक उदक जीव दिता तेचपरीं असलीं
परिसंवादां आमच्या मतिंतल्या चिंत्पांक जीव दिता’
म्हणालो. प्रिन्सिपाल डो उर्सुला बारेट्टोन अपल्या
उलवपांत ’आज कोंकणी भासेक आमी मुकार वरुंक चिंतून
आसताना आमचो काल आनी काल-पोयर जाल्लो कोंकणी वावर
आनी इतिहास आमीं जाणां जांवची गर्ज आसा, त्या
दिशेन आयचो परिसंवाद उज्वाड फांकयतलो’ म्हणाली.
प्रसतावीक उलवपांत सां झेवियर्स कोलेजिच्या
कोंकणी विभागाचो मुखेसत बाब धर्म चोडक्नारान ’कोंकणी
तियात्र गोंयच्या कोंकणी मनशाच्या अस्थित्वाची
कुरूः जाल्ल्यान ह्या तियात्रांक सांबाळुंक आनी
राकोन व्हर्ची जवाभदारी आमची सर्वांची’
म्हणालो.
दल्गादो कोंकणी अकाडेमिचो
अध्यक्ष बाब सेल्सो फेर्नांडीस अपल्या उलवपांत ’कोंकणी
भास लोकाच्या जिवितांत थीर जावन उर्च्यांत आमच्या
आधल्यांनी सांबाळून दवरललें दायज राकोन वर्ची गर्ज
आसा’ म्हणालो.
मानाचो सयरो बाब वल्ली क्वाड्रस अपल्या उलवपांत ’संसार्ंत
भोव गरीब मनीस दुडू वा आसत नासचो न्हय, बगार,
संसकृती आनी मानवीय मौल्यां होगडावन घेतललो
जावनासा. आज हर्शेंचेपरीं दरेक मनीस भिरांतेन
जियेवन आसा, तीच भिरांत १९५० च्या दशकांत ’नया
दौर’ पिंतुरांत मशिनां येतासतां मनशांक आसली, १९८०
च्या दशकांत ’टेलिविशन’ येतासतां मनशाच्या मतिंत
आसलीं, आतां कृतीम बुध्वंत्कायेचेर भिरांत. देकून
मनीस आज शिकप-दुडू च्या पाटीक पडोन अपली संसकृती
तशेंच मौल्यां सांडून व विस्रोन जियेवंक लागला
देकून आज संसारांत ३९% लोक ’स्ट्रेस’ म्हळ्ळ्या
म्हा-पिडेचेंत संकश्टांत आसा. शिकप ’मतीक’ आकार
दिता तर संसकृती ’स्वभावाक (Character)’
आकार दिता’ म्हणालो. दल्गादो कोंकणी
अकाडेमिच्या काऱ्यदर्शी बाप मायरन बारेट्टोन
धिन्वास पाठयले.
हेच संधर्भार दल्गादो
कोंकणी अकाडेमीन प्रकाशीत केल्लें ’सोद-पर्मळ’
नांवाचें रोमी लिपियेंतलें पयलें साहित्यीक
जर्नलाचें, तशेंच बाब तोमाजीन कार्डोजोच्या तीन
तियात्रांचीं पुसतकां, बाप लूवीस गोम्साच्या
तियात्रांचेर संशोध केल्लें रोमी तशेंच नागरी
लिपिंनी लिप्यंंतरण केल्लें ’तियात्राभ्यास’
पुसतकां मानाचो सयरो बाब वल्ली क्वाड्रसान
लोकार्पण केलीं. हीं पुसतकां बाय अंकिता जंबावलिकर
आनी बाप लूवीस गोम्स हाणीं लिप्यंतरण केल्यांत,
तशेंच न्यू एज प्रकाशनान प्रकाशीत केल्यांत.
उपरांत ४९ तियात्रां बरवपी शिक्षक, सामाजीक,
राजकीय मुखेली, तशेंच दल्गादो कोंकणी अकाडेमिचो
अध्यक्ष जावन सेवा दिल्ल्या बाब तोमाजिनो
कार्डोजोक बाप आंटनी सलेमो तशेंच प्रिन्सिपाल
डो.अर्सुला बारेट्टोन सन्मान केलो.
’गोवन
रिव्यू’ आनी ’गुलाब’ पत्राचो संपादक बाब फावुसतो द
कोसतान बीज भाषणांत (Keynotes) ’कोंकणी
तियात्राचो इतिहास आनी कसो हो तियात्र
गोंयकारांच्या जिविताच्या वेवेगळ्या संघर्शांक
परियार सोधुंक पावलो आनी इतिहासीक, समाजीक,
राजकीय, धार्मीक प्रकारांच्या प्रकारांचे तियात्र
कशें समाजेच्या हेर चिंत्पाचेर प्रभाव घालुंक सकले
म्हळ्ळ्याचेर उलयलो.
पयल्या प्रपत्र
सादरीकरणाचें सत्र डो. कोस्मा
फेर्नांडिसाच्या अध्यक्षपणाखाल ’गोवा..
गोयिंग.. गोन..?’ आनी ’आमी सगळे
एक’ह्या दोन तियात्रांचेर प्रपत्रां सादर
जालीं.
समाजशासत्र नद्रेंतल्यान ’गोवा..
गोयिंग.. गोन..?’ तियात्राची समीक्षा बाब दर्शन
कांदोल्कार (सहायक प्राध्यापक - विध्या प्रभोधिनी
कोलेज फोर्वोरीं)
भाशीक विसकवणेचेर ’गोवा..
गोयिंग.. गोन..?’ तियात्राची समीक्षा बाय एडना वाज
(सहायक प्राध्यापक - खेपें सर्कारी महाविध्यालय)
समाजीक आनी इतिहासीक संधर्भान ’आमी सगळे एक’
तियात्राची समीक्षा डो. रेमी डायस (इतिहासाचो
प्राध्यापक - खेपें सर्काई महाविध्यालय)
भाशीक
विशलेषण ’आमी सगळे एक’ तियात्राची समीक्षा बाब
सुशांत नायक (सहायक प्राध्यापक - सर्कारी कोलेज
सांकलीं गोंय)
दोनपारां उपरांतल्य प्रपत्र
सादरीकरणाचें सत्र बाब वल्ली क्वाड्रसाच्या
अध्यक्षपणाखाल ’मोंवाळ वीक’
तियात्राचेर प्रपत्रां सादर जालीं.
’मोंवाळ
वीक’ तियात्राचो अभ्यास (समाजशासत्रीय
नद्रेंतल्यान) - डो. हनुमंत चोपडेकार (कोंकणी
विभागाचे मुखेसत - गोंय महाविध्यापीठ)
’मोंवाळ
वीक’ तियात्राचो अभ्यास (भाशीक चिकित्सा) - डो.
डेनीस वासाचें प्रपत्र बाय विनिता वेलिपान सादर
केलें (सहायक प्राध्यापक - रोजरी कोलेज नावेलीं)
’मोंवाळ वीक’ तियात्राचो अभ्यास (कांतारांचें
चिंतन-मंथन) - बाब धर्म चोडनकार (कोंकणी विभागाचे
मुखेसत - सांत झेवियर्स महाविध्यालय, माप्सा)
’मोंवाळ वीक’ तियात्राचो अभ्यास (पऱ्याटनाच्या
संधर्भांत) - डो. एवेरेत फेर्नांडीस (इतिहासाचो
सहायक प्राध्यापक - सर्कारी कोलेज, खेपें)
गोंयच्या सभार हेर कोलेजिचीं विध्यार्थिंनी ह्या
परिसंवादांत वांटो घेतलो. सां झेवियर्स कोलेजिच्या
विध्यार्थिंनी तियात्राचीं कांतारां गायलीं. ह्या
परिसंवादाचें सूत्र संचालन केल्लें बाय अंकिता
जंबावलिकर, बाय प्रणिता आनी बाब मेगन द सोज हाणीं.
आयोजक बाप लूवीस गोम्स हाणीं धिन्वासी उलवप केलें.
|
|
|
|
|
|
|
|
|
|
|
 |
|
|
2004 ಥಾವ್ನ್
2011 ಪರ್ಯಾಂತ್ ಕಾರ್ಯಾಳ್ ಆಸ್ಲ್ಲ್ಯಾ
ದಾಯ್ಜ್.ಕೊಮ್ ಚೆರ್
ಪರ್ಗಟ್ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ
ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್
ಲಾಭಯ್ತೆಲ್ಯಾಂವ್. | |
| |
 |
|
