[ಕವಿತಾ] ತ್ರಿಕೊಣ್ (- ಕಾಜಲ್ ಪ್ರಕಾಶ್ ರಾಯ್ಕರ್)

ತ್ರಿಕೊಣ್


ಪುರಾಯ್ ಘರಾಣ್ಯಾಚೊ ಎಕವ್ಟ್ ದಿಸ್ತಾಲೊ
ಜಾಣ್ಟಿಂ ನೆಣ್ಟಿಂ ಪೊರಾಂಟ್ಯಾಚೊ
ಹಾಂಸೂನ್ ಖೆಳೂನ್ ದಿಸ್ ವತಾಲೊ
ಆಯ್ಜ್ ಖಂಯ್ ರೆ ಆಸಾತ್ ತೆ ದೀಸ್?

ಸಣ್ ಪರ್ಬೊ ಉಮೆದೀನ್ ಮನಯ್ತಾಲಿಂ
ಜಾಯ್ ಜಾಯ್ ತ್ಯಾ ವೆಳಾರ್ ಸಗ್ಲಿಂ ಪಾವ್ತಾಲಿಂ
ಆಂಗ್ಣಾಂತ್ ಬಸೂನ್ ಗಜಾಲ್ಯೊ ಕರ್ತಾಲಿಂ
ಆಯ್ಜ್ ಖಂಯ್ ರೆ ಆಸಾತ್ ತೆ ದೀಸ್?

ಮಾಯ್ ಮಾವಾಚ್ಯಾ ಕಡಕ್ ಉತ್ರಾಂನಿ ಆಸ್ತಾಲೊ ಮೊಗ್
ಭಾವ್ಜ್ ದೆರ್ ಆನಿ ನಂಡೆ ಮದಿಂ ಆಸ್ತಾಲಿ ಇಶ್ಟಾಗತ್
ಪಾಂಚೂಯ್ ಜಾವೊ ಭಯ್ಣಿ ಸಾರ್ಕಿಂ ಖೂಶ್
ಆಯ್ಜ್ ಖಂಯ್ ರೆ ಆಸಾತ್ ತೆ ದೀಸ್?

ಭುರ್ಗಿಂ ಸಗ್ಲಿಂ ಮೆಳೂನ್ ಖೆಳ್ಟಾಲಿಂ
ಆಪ್ಲ್ಯಾ ಸಾರ್ಕೊ ಆನಿ ಎಕ್ ಘರಾಬೊ ಕರ್ತಾಲಿಂ
ಆಜೊ ಆಜೀಯ್ ಜಾತಾಲಿಂ ನಾತ್ರಾಂ ವಾಂಗ್ಡಾ ಭುರ್ಗಿಂ
ಆಯ್ಜ್ ಖಂಯ್ ರೆ ಆಸಾತ್ ತೆ ದೀಸ್?

ಎಕವ್ಟ್ ಪಳೊವ್ಪಾಕ್ ಮೆಳ್ಟಾಲೊ
ತೊ ಕಾಳಾ ಪ್ರಮಾಣ್ ಬದ್ಲತ್ ಗೆಲೊ
ತಿಂ ನಾತಿಂ ಬದ್ಲ್ಲಿಂ, ತೊ ವೆಳ್ ಗೆಲೊ
ಆನಿ...ಆನಿ ಘರಾಬೊಯ್ ಬದ್ಲ್ಲೊ

ಚೌಖಣ್ ಫಾಂಫ್ಡೂನ್ ತ್ರಿಕೊಣ್ ಆಪ್ಣಾಯಲೆ
ತೆ ದೀಸ್ ಸಗ್ಲೆ ವ್ಹಾಂವತ್ ಗೆಲೆ
ಮನೀಸಪಣೂಯ್ ಝಡೂಂಕ್ ಲಾಗ್ಲೆಂ
ಆನಿ ಎಕ್ಮುಳೆಪಣಾನ್ ಜಗೂಂಕ್ ಲಾಗ್ಲೆ.

ಗೆಲೆ ತೆ ರಂಗೀತ್ ದೀಸ್
ವಣ್ಟಿ ಮಾತ್ ಉರ್ಲಿಂ ತೀಂಚ್
ಪೂಣ್ ಜಾಲೆ ಮಾತ್
ಸುವಾರ್ಥಿ ಸಗ್ಲೆ ಮನೀಸ್...

 ******

- ಕಾಜಲ್ ಪ್ರಕಾಶ್ ರಾಯ್ಕರ್. [ಜ್ಯೂನ್, 2020]

[kovita] Trikonn (- Kajal Prakash Raikar)

Trikonn


purai ghoranneacho ekoutt distalo
zannttim nennttim porantteacho
hamsun khellun dis votalo
aiz khoim re asat te dis?

sonn porbo umedin monoitalim
zai zai tea vellar soglim pautalim
angnnant bosun gozaleo kortalim
aiz khoim re asat te dis?

mai mavachea koddok utramni astalo mog
bhauz der ani nondde modim astali ixttagot
panchuy zavo bhoinni sarkim khux
aiz khoim re asat te dis?

bhurgim soglim mellun khellttalim
aplea sarko ani ek ghorabo kortalim
azo aji-i zatalim natram vangdda bhurgim
aiz khoim re asat te dis?

ekoutt polloupak mellttalo
to kalla promann bodlot gelo
tim natim bodl'lim, to vell gelo
ani...Ani ghoraboi bodl'lo

choukhonn famfddun trikonn apnnaile
te dis sogle vhamvot gele
monisoponnuy zhoddunk laglem
ani ekmulleponnan zogunk lagle.

Gele te rongit dis
vonntti mat urlim tinch
punn zale mat
suvarthi sogle monis...

******

- Kajal Prakash Raikar. [Jun, 2020]

[कविता] त्रिकोण (- काजल प्रकाश रायकर)

च्यार वणतिंचेर उभार‌ल्लें घर आनी त्या घरांत जियेंवचें कुटम, वेग-वेगळीं नातीं सुका-दुकाक वांटून घेवन, सूक-सोंतोसान काडचे दीस एका तेंपादीं सर्वांचे जावनासले पूण आज त्य वणती तश्योच आसात पूण मनीस, नातीं आनी भांद कसो बदल्लाकाय? पूण चौकोण आसले बदलून त्रिकोण जाताना गळोन गेल्लें तर‌यी कितें? मनशापण म्हळ्ळें चिंतप उटंवची कविता.

- सं

[कविता] त्रिकोण (- काजल प्रकाश रायकर)

त्रिकोण


पुराय घराण्याचो एकवट दिसतालो
जाणटीं नेण्टीं पोरांट्याचो
हांसून खेळून दिस वतालो
आयज खंय रे आसात ते दीस?

सण परबो उमेदीन मनयतालीं
जाय जाय त्या वेळार सगलीं पावतालीं
आंगणांत बसून गजाल्यो करतालीं
आयज खंय रे आसात ते दीस?

माय मावाच्या कडक उतरांनी आसतालो मोग
भावज देर आनी नंडे मदीं आसताली इश्टागत
पांचूय जावो भयणी सारकीं खूश
आयज खंय रे आसात ते दीस?

भुरगीं सगलीं मेळून खेळटालीं
आपल्या सारको आनी एक घराबो करतालीं
आजो आजीय जातालीं नात्रां वांगडा भुरगीं
आयज खंय रे आसात ते दीस?

एकवट पळोवपाक मेळटालो
तो काळा प्रमाण बदलत गेलो
तीं नातीं बदल्लीं, तो वेळ गेलो
आनी...आनी घराबोय बदल्लो

चौखण फांफडून त्रिकोण आपणायले
ते दीस सगले व्हांवत गेले
मनीसपणूय झडूंक लागलें
आनी एकमुळेपणान जगूंक लागले.

गेले ते रंगीत दीस
वण्टी मात उरलीं तींच
पूण जाले मात
सुवार्थी सगले मनीस...

******

-  काजल प्रकाश रायकर. [ज्यून, २०२०]

ದಾಯ್ಜ್.ಕೊಮ್