[ಕವಿತಾ] ದೂಕ್ (- ಕಲ್ಪೇಶ್ ವೆರೆಂಕಾರ್)

ದೂಕ್

ಚಾರ್ ದಿಸಾಚ್ಯಾ ಹ್ಯಾ ಸಂವ್ಸಾರಾಂತ್
ಕೊಣ್ ಕೊಣಾಕ್ ವಳ್ಖನಾ
ಪಯ್ಶಾಕ್ ಲಾಗೂನ್ ಮನೀಸ್
ಖೂನ್ ಕರ್ಪಾಕ್ ಆಯ್ಕನಾ

ಅಶೆಂ ಕಿತೆಂ ಆಸಾ ಹ್ಯಾ ಪಯ್ಶಾಂನಿ
ಇತ್ಲೊ ಪಿಸೊ ಕರ್ತಾ ಮನ್ಶಾಕ್
ಇಲ್ಲ್ಯಾಶಾ ದುಡ್ವಾಂಕ್ ಲಾಗೂನ್
ಘೊವ್ ಲಾಗ್ಲಾ ಬಾಯ್ಲೆಕ್ ವಿಕ್ಪಾಕ್

ಪಯ್ಶಾಕ್ ಲಾಗೂನ್ ಘರಾಂತ್ ಝಗ್ಡಿಂ
ಬಾಪೂಯ್ ಮಾರ್ತಾ ಆವ್ಯ್ರ್ ಬಡಿ
ಪಯ್ಶಾನ್ ಕೆಲಾ ತಾಚೆರ್ ವರ್ಚಸ್ವ್
ತೊ ಮಾನ್ಪಾಕ್ ಲಾಗ್ಲಾ ತಾಕಾ ಸರ್ವಸ್ವ್

ಮನೀಸಪಣಾಚೊ ಜಾಲಾ ಅಭಾವ್
ದುಡ್ವಾಕ್ ಆಯ್ಲಾ ಸಗ್ಳೊ ಭಾವ್
ಮನೀಸ್ ಮನೀಸಪಣಾಕ್ ಸೊಡೂಂಕ್ ಲಾಗ್ಲಾ
ಪಯ್ಶಾ ಫಾಟ್ಲ್ಯಾನ್ ತೊ ಧಾವೂಂಕ್ ಲಾಗ್ಲಾ

ಧಾಂವ್ತಾ ಧಾಂವ್ತಾ ಎಕ್ ದೀಸ್ ಪಡ್ಟಲೊ
ಪಡ್ಪಾಚೆ ತೊ ಕಾರಣ್ ಸೊದ್ತಲೊ
ಕಾರಣ್ ಸೊದ್ತಾ ಸೊದ್ತಾ ತಾಕಾ ಕಳ್ಟಲೆಂ
ಪಯ್ಶಾನೀಂಚ್ ತಾಚೆ ಆಯುಷ್ಯ್ ಸೊಪಯ್ಲೆಂ

ದೊಶ್ ದಿವ್ನಾಕಾ ತ್ಯಾ ದುಡ್ವಾಂಕ್
ತಾಚಿ ಕಾಂಯ್ ಚೂಕ್ ನಾ
ಆಮಿ ದಿಲಾ ತಾಕಾ ವಯ್ಲೆಂ ಸ್ಥಾನ್
ತಾಣೆಂ ಕೆಲಾ ಆಮ್ಚ್ಯಾ ಜಿವಾಚೆಂ ರಾನ್

ಕೆನ್ನಾ ಮನೀಸ್ ಸುದಾರತಲೊ
ಹ್ಯಾ ದುಡ್ವಾಚಿ ಫಾಟ್ ಸೊಡ್ಟಲೊ
ಮನೀಸಪಣಾಚಿ ಗುಡಿ ಉಬಾರುನ್ ಹ್ಯಾ
ಸಂವ್ಸಾರಾಂತ್ ಸುಖಿ ತೊ ಜಿಯೆತಲೊ...
 ******

- ಕಲ್ಪೇಶ್ ವೆರೆಂಕಾರ್. [ಜುಲಾಯ್, 2020]

[kovita] Duk (- Kalpesh Verenkar)

Duk


char disachea hea somvsarant
konn konnak vollkhona
poixak lagun monis
khun korpak aikona

oxem kitem asa hea poixamni
itlo piso korta monxak
il'leaxa duddvank lagun
ghovo lagla bailek vikpak

poixak lagun ghorant zhogddim
bapuy marta auyr boddi
poixan kela tacher vorchosv
to manpak lagla taka sorvosv

monisoponnacho zala obhavo
duddvak aila sogllo bhavo
monis monisoponnak soddunk lagla
poixa fattlean to dhavunk lagla

dhamvta dhamvta ek dis poddttolo
poddpache to karonn sodtolo
karonn sodta sodta taka kollttolem
poixaninch tache ayuxy sopoilem

dox divnaka tea duddvank
tachi kaim chuk na
ami dila taka voilem sthan
tannem kela amchea jivachem ran

ken'na monis sudarotolo
hea duddvachi fatt soddttolo
monisoponnachi guddi ubarun hea
somvsarant sukhi to jietolo...

******

- Kalpesh Verenkar. [Jul, 2020]

[कविता] दूक (- कल्पेश वेरेंकार)

मनीस चडताव जावन अपल्या जिण्येंत केदनांच अपणान केल्ल्या चुकिंक समजून, ती तिद्वुंक वचाना बगर त्या चुकीक हेरांचेर दोश दिता. जांव तो काळ, जांव दुडू वा हेर. देकून मनीस मनशापणाक सोलून, अपल्या अबलेस्पणाक लागून हेरांच्या मिनतेक पिळून जियेंवचें चिंतप ह्या कवितेंत आसा.

- सं

[कविता] दूक (- कल्पेश वेरेंकार)

दूक 

चार दिसाच्या ह्या संवसारांत
कोण कोणाक वळखना
पयशाक लागून मनीस
खून करपाक आयकना

अशें कितें आसा ह्या पयशांनी
इतलो पिसो करता मनशाक
इल्ल्याशा दुडवांक लागून
घोव लागला बायलेक विकपाक

पयशाक लागून घरांत झगडीं
बापूय मारता आवयर बडी
पयशान केला ताचेर वर्चस्व
तो मानपाक लागला ताका सर्वस्व

मनीसपणाचो जाला अभाव
दुडवाक आयला सगळो भाव
मनीस मनीसपणाक सोडूंक लागला
पयशा फाटल्यान तो धावूंक लागला

धांवता धांवता एक दीस पडटलो
पडपाचे तो कारण सोदतलो
कारण सोदता सोदता ताका कळटलें
पयशानींच ताचे आयुष्य सोपयलें

दोश दिवनाका त्या दुडवांक
ताची कांय चूक ना
आमी दिला ताका वयलें स्थान
ताणें केला आमच्या जिवाचें रान

केन्ना मनीस सुदारतलो
ह्या दुडवाची फाट सोडटलो
मनीसपणाची गुडी उबारुन ह्या
संवसारांत सुखी तो जियेतलो...

******

- कल्पेश वेरेंकार. [जुलाय, २०२०]

ದಾಯ್ಜ್.ಕೊಮ್