ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] ನಾತಿಂ (- ಸಖಾರಾಮ್ ಶೆಣ್ವಿ ಬೋರ್ಕರ್)

ಹೊ ಸಂಸಾರ್ ಏಕ್ ಪಯ್ಣ್ ತರ್ ಹಾಂತುಂ ಜಿಯೆತಲೊ ದರೇಕಲೊ ಏಕ್ ಪಯ್ಣಾರಿ. ಆನಿ ಜಿವಿತಾ ಪಯ್ಣಾಂತ್ ಕೊಣ್‌ಯೀ ಎಕ್ಲೊ ಜಾವ್ನ್ ಜಿಯೆನಾ, ತಾಚೆಸವೆಂ ಕೊಣ್ ಥೊಡೆ ದೀಸ್, ಮಯ್ನೆ, ವರ್ಸಾಂ ಚಮ್ಕತಾ. ಸಂಸಾರಿಕ್ ಚಿಂತ್ಪಾನ್ ಹಾಕಾ ನಾತಿಂ ಮ್ಹಣುನ್ ವೊಲಯ್ತಾತ್. ಪುಣ್ ಮನಿಸ್ ಯೆತಾನಾ ಜಾಂವ್ ವೆತಾನಾ ಜಾಂವ್ ಎಕ್ಸುರೊಚ್ ಮ್ಹಳ್ಳೆಂ ಚಿಂತಪ್ ಹ್ಯಾ ಕವಿತೆಂತ್ ಉಟಂವ್ಚೆಂ ದಿಸುನ್ ಯೆತಾ.

- ಸಂ

[ಕವಿತಾ] ನಾತಿಂ (- ಸಖಾರಾಮ್ ಶೆಣ್ವಿ ಬೋರ್ಕರ್)

ನಾತಿಂ ಕಾಂಯ್ ನಾತಿಂ ನಿತಳ್ ಮನಾಂಚಿಂ ಕಾಂಯ್ ನಾತಿಂ ಪಿಳ್ಗ್ಯಾನ್ ಪಿಳ್ಗ್ಯೊ ಚಲ್ಪಿ ದಾಯ್ಜಾಚಿಂ. ಕಾಂಯ್ ನಾತಿಂ ಸಾಸ್ಣಾಕ್ ಉರ್ಪಾಚಿಂ ಕಾಂಯ್ ನಾತಿಂ ದೊನ್ ದಿಸಾಂನಿಂ ಸೊಂಪ್ಪಾಚಿಂ. ಕಾಂಯ್ ನಾತಿಂ ಕಪ್ಲಾರ್ ಲಾಯಿಲ್ಲ್ಯಾ ಕುಕ್ಮಾಂತಲಿಂ ಕಾಂಯ್ ನಾತಿಂ ಆವ್ಯ್ಚ್ಯಾ ಗರ್ಭಕುಡೀಂತ್ಲ್ಯಾನ್ ಆಯಿಲ್ಲಿಂ. ಕಾಂಯ್ ನಾತಿಂ ಆಸ್ತಾತ್ ಪೈಸಾವ್ಪಾಚಿಂ ಕಾಂಯ್ ನಾತಿಂ ಕಾಳ್ಜಾಂತ್ ಸಾಂಬಾಳೂನ್ ದವ್ರಪಾಚಿಂ. ಕಾಂಯ್ ನಾತಿಂ ನಾಸ್ತಾತ್ ನಾತ್ಯಾಂತ್ ದವ್ರಪಾಚಿಂ ಕಾಂಯ್ ನಾತಿಂ ಆಸ್ತಾತ್ ಪಯ್ಸುಲ್ಲ್ಯಾನುಚ್ ಅಣ್ಭವಪಾಚಿಂ! **** - ಸಖಾರಾಮ್ ಶೆಣ್ವಿ ಬೋರ್ಕರ್**. [ಅಕ್ಟೊಬ್ರ್, 2020]

	ಸಖಾರಾಮ್ ಶೆಣ್ವಿ ಬೋರ್ಕರ್: ಫಾಟ್ಲಿಂ ಸಾಬಾರ್ ವರ್ಸಾಂ ತೆ ಸಾತ್ತ್ಯಾನ್ ಕವಿತಾ, ಲೆಖ್, ನಿಬಂದ್, ಕಥಾ, ಪುಸ್ತಕ್ ಪರಿಕ್ಷಣಾಂ ಕರೀತ್ ಆಯ್ಲ್ಯಾತ್. ತಾಂಕಾ ಆತಾಂ ಮೆರೆನ್ ಸರ್ಸ್ವತಿ ವಾಚ್ನಮಂದೀರ್, ಪಣ್ಜಿ, ಗೊವಾ ಸೆಕ್ಯುಲರ್ ಸೆಲ್, ರಾಮಾನಂದ್ ಪ್ರಕಾಶನ್, ಕಲಾಮಂಥನ್ ಆಮೊಣೆ, ಕೊಂಕಣ್ ಟಾಯ್ಮ್ಸ್, ಗೊಂಯ್ ವಿಧ್ಯಾಪೀಠ್, ಕೊಂಕ್ಣಿ ಸೆವಾ ಕೆಂದ್ರ್ ಕುಡ್ಚಡೆ, ಕೊಂಕ್ಣಿ ಭಾಶಾ ಮಂಡಳ್ ಹಾಂಚೆ ಪುರಸ್ಕಾರ್ ಫಾವೊ ಜಾಲ್ಯಾತ್. ತಾಂಚೆ ಲಿಖಾಣ್ ಭಾಂಗ್ರಭೂಂಯ್, ಬಿಮ್ಬ್, ಜಾಗ್ ಆದಿ ನೆಮಾಳ್ಯಾಂನಿಂ ಉಜ್ವಾಡಾಕ್ ಯೆತಾ. ಆಕಾಶವಾಣಿ ಪಣ್ಜಿ ಕೆಂದ್ರಾಚೆರ್ ತಾಂಚೆ ಕವಿತಾ ವಾಚ್ನಾಚೆ ಕಾರ್ಯಕ್ರಮ್ ಜಾತಾತ್. ಬೊರ್ಕಾರ್ ಹಾಂಣಿ ಮುಂಬಯ್ ವಿಧ್ಯಾಪೀಠಾಚಿ ರಸಾಯ್ನಶಾಸ್ತ್ರ್ ಆನಿ ಕಾಯ್ದ್ಯಾಚಿ ಪದ್ವಿ ಘೆತ್ಲ್ಯಾ. ತ್ಯಾಭಾಯ್ರ್ ತಾಣಿಂ ಗೊಂಯ್ ವಿದ್ಯಾಪೀಠಾಂತ್ಲ್ಯಾನ್ ಕೊಂಕ್ಣಿ ವಿಶ್ಯಾಂತ್ ಪದ್ವ್ಯುತ್ತರ್ ಪದ್ವಿ(M.A.) ಆಣಿ ವ್ಯವ್ಸ್ಥಾಪನ್, ಕಾಮ್ಗಾರ್ ಕಾಯ್ದೊ ಆನಿ ಕರ್ (Taxation) ಹ್ಯಾ ವಿಶ್ಯಾಂತ್ ಪದ್ವೀಕಾ ಘೆತ್ಲ್ಯಾತ್. ತೆ ಹಾಲೀಂಚ್ ಎಕಾ ಬಹುರಾಷ್ಟ್ರೀಯ್ ಕಂಪ್ನೀತ್ಲ್ಯಾನ್ ಅಧಿಕಾರಿ ಪದಾವೆಲ್ಯಾನ್ ನಿವೃತ್ತ್ ಜಾಲ್ಯಾತ್. ಆತಾಂ ಮೆರೆನ್ ತಾಂಚೆ ದೊನ್ ಕವಿತಾ ಸಂಗ್ರಹ್ 'ಅಥ್ರೆಕ್' ಆನಿ 'ತುಂ' ಹೆ ಉಜ್ವಾಡಾಕ್ ಆಯ್ಲ್ಯಾತ್ ಆನೀಕ್ ದೊನ್ ಕವಿತಾ ಸಂಗ್ರಹ್ ಆನಿ ಎಕ್ ಕಥಾ ಸಂಗ್ರಹಾಚೆರ್ ಕಾಮ್ ಚಾಲು ಆಸಾ.
[kovita] Natim* (- Sakharam Shennvi Borkar)*
Ho somsar ek poinn tor hantum jietolo dorekolo ek poinnari. Ani jivita poinnant konn‌yi eklo zaun jiena, tachesovem konn thodde dis, moine, vorsam chomkota. Somsarik chintpan haka natim mhonnun voloitat. Punn monis yetana zamv vetana zamv eksuroch mholl'llem chintop hea kovitent uttomvchem disun yeta. - Som
[kovita] Natim* (- Sakharam Shennvi Borkar)*
Natim kaim natim nitoll monanchim kaim natim pillgean pillgeo cholpi daizachim. Kaim natim sasnnak urpachim kaim natim don disamnim somppachim. Kaim natim koplar layil'lea kukmantolim kaim natim auychea gorbhokuddintlean ayil'lim. Kaim natim astat poisaupachim kaim natim kallzant samballun douropachim. Kaim natim nastat nateant douropachim kaim natim astat poisul'leanuch onnbhoupachim! **** - Sakharam Shennvi Borkar.** [Oct, 2020]

	Sakharam Shennvi Borkar: fattlim sabar vorsam te sat'tean kovita, lekh, nibond, kotha, pustok porikxonnam korit aileat. Tanka atam meren sorsvoti vachnomondir, ponnji, gova sekyulor sel, ramanond prokaxon, kolamonthon amonne, konkonn ttaims, Gõy vidheapitth, konknni seva kendr kuddchodde, konknni bhaxa monddoll hanche purskar favo zaleat. Tanche likhann bhangrobhum-i, Bimb, Jag adi nemalleamnim ujvaddak yeta. Akaxovanni ponnji kendracher tanche kovita vachnache karyokrom' zatat. Borkar hamnni mumboi vidheapitthachi rosainoxastr ani kaideachi podvi ghetlea. Teabhair tannim gõy videapitthantlean konknni vixeant podvyut'tor podvi(M.A.) anni vyousthapon, kamgar kaido ani kor (Taxation) hea vixeant podvika ghetleat. Te halinch eka bohuraxttri-i kompnitlean odhikari podavelean nivrit't zaleat. Atam meren tanche don kovita songroh 'othrek' ani 'tum' he ujvaddak aileat anik don kovita songroh ani ek kotha songrohacher kam' chalu asa.
[कविता] नातीं (- सखाराम शेण्वी बोर्कार)
हो संसार एक पयण तर हांतूं जियेतलो दरेकलो एक पयणारी. आनी जिविता पयणांत कोण‌यी एकलो जावन जियेना, ताचेसवें कोण थोडे दीस, मयने, वर्सां चमकता. संसारीक चिंत्पान हाका नातीं म्हणून वोलयतात. पूण मनीस येताना जांव वेताना जांव एक्सुरोच म्हळ्ळें चिंतप ह्या कवितेंत उटंवचें दिसून येता. - सं
[कविता] नातीं (- सखाराम शेण्वी बोर्कार)
नातीं कांय नातीं नितळ मनांचीं कांय नातीं पिळग्यान पिळग्यो चलपी दायजाचीं. कांय नातीं सासणाक उरपाचीं कांय नातीं दोन दिसांनीं सोंपपाचीं. कांय नातीं कपलार लायिल्ल्या कुकमांतलीं कांय नातीं आवयच्या गर्भकुडींतल्यान आयिल्लीं. कांय नातीं आसतात पैसावपाचीं कांय नातीं काळजांत सांबाळून दवरपाचीं. कांय नातीं नासतात नात्यांत दवरपाचीं कांय नातीं आसतात पयसुल्ल्यानुच अणभवपाचीं! **** - सखाराम शेण्वी बोर्कार.** [अकटोबर, २०२०]

	सखाराम शेण्वी बोर्कार: फाटलीं साबार वर्सां ते सात्त्यान कविता, लेख, निबंद, कथा, पुसतक परिक्षणां करीत आयल्यात. तांका आतां मेरेन सर्स्वती वाचनमंदीर, पणजी, गोवा सेक्युलर सेल, रामानंद प्रकाशन, कलामंथन आमोणे, कोंकण टायम्स, गोंय विध्यापीठ, कोंकणी सेवा केंद्र कुडचडे, कोंकणी भाशा मंडळ हांचे पुर्स्कार फावो जाल्यात. तांचे लिखाण भांग्रभूंय, बिमब, जाग आदी नेमाळ्यांनीं उज्वाडाक येता. आकाशवाणी पणजी केंद्राचेर तांचे कविता वाचनाचे काऱ्यक्रम जातात. बोर्कार हांणी मुंबय विध्यापीठाची रसायनशासत्र आनी कायद्याची पद्वी घेतल्या. त्याभायर ताणीं गोंय विद्यापीठांतल्यान कोंकणी विश्यांत पद्व्युत्तर पद्वी (M.A.) आणी व्यवस्थापन, कामगार कायदो आनी कर (Taxation) ह्या विश्यांत पद्वीका घेतल्यात. ते हालींच एका बहुराषट्रीय कंपनीतल्यान अधिकारी पदावेल्यान निवृत्त जाल्यात. आतां मेरेन तांचे दोन कविता संग्रह 'अथ्रेक' आनी 'तूं' हे उज्वाडाक आयल्यात आनीक दोन कविता संग्रह आनी एक कथा संग्रहाचेर काम चालू आसा.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.