ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] ಪನ್ನಾಸಾವೊ ವ್ಹಡ್‌ದೀಸ್! (- ಸಖಾರಾಮ್ ಶೆಣ್ವಿ ಬೋರ್ಕರ್)

’ಸಾಠ್-ಸತ್ತರ್; ಫೊಂಡಾ ಭಿತರ್’ ಸಾಂಗಣಿ ಅರ್ಥಾಭರಿತ್. ಹಾಂಗಾಸರ್ ಪನ್ನಾಸಾವೊ ವ್ಹಡ್‌ದೀಸ್ ಕಸೊ ಮನಶಾಚ್ಯಾ ಜಿಣ್ಯೆಂತ್ ವೆಗಳಿಚ್ ಮಜಾ ಘೆವ್ನ್ ಯೆತಾ ಮ್ಹಳ್ಳೆಂ ಸೊಭಿತ್ ಚಿತ್ರಣ್ ಹ್ಯಾ ಕವಿತೆಂತ್ ಪಳೆಂವ್ಕ್ ಮೆಳತಾ. ಪ್ರಾಯ್ ಭರ್ಚಿ ಕುಡಿಕ್ ಶಿವಾಯ್ ಕಾಳ್ಜಾಕ್ ವಾ ಮತಿಕ್ ನ್ಹಯ್ ಮ್ಹಳ್ಳೆಂ ಚಿಂತಪ್ ಅಪುರ್ಭಾಯೆನ್ ಹ್ಯಾ ಕವಿತೆನ್ ಕೆಲ್ಲೆಂ ದಿಸುನ್ ಯೆತಾ.

- ಸಂ

[ಕವಿತಾ] ಪನ್ನಾಸಾವೊ ವ್ಹಡ್‌ದೀಸ್! (- ಸಖಾರಾಮ್ ಶೆಣ್ವಿ ಬೋರ್ಕರ್)

ಪನ್ನಾಸಾವೊ ವ್ಹಡ್‌ದೀಸ್! ಪನ್ನಾಸಾವೊ ವ್ಹಡ್‌ದೀಸ್ ಮನೊವ್ಪಾಂತ್ ಎಕ್ ವೆಗ್ಳೀಚ್ ಮಜಾ ಆಸ್ತಾ ಮನೊಹರಾಯಾಚ್ಯಾ ಉತ್ರಾಂನಿಂ ಸಾಂಗ್ತೊಲೊ ಜಾಲ್ಯಾರ್ "ಕೆಂಸ್ ಜರಿ ಜಾಲೆ ಧವೆ ಪೂಣ್ ನದರ್ ಮಾತ್ ತನ್ನಿ ಆಸ್ತಾ” ಪನ್ನಾಸಾವೊ ವಾಡ್ದೀಸ್ ಮನೊವ್ಪಾಂತ್ ಎಕ್ ವೆಗ್ಳೀಚ್ ಮಜಾ ಆಸ್ತಾ ! ಜಾಣ್ಟ್ಯಾಂಭಿತರ್ ನೆಣ್ಟೊ ಆನಿ ನೆಣ್ಟ್ಯಾಂಭಿತರ್ ಜಾಣ್ಟೊ ಅಶಿ ವಿಚಿತ್ರಶಿ ತಿ ಪಿರಾಯ್ ಆಸ್ತಾ ತರಿ ಪನ್ನಾಸಾವೊ ವಾಡ್ದೀಸ್ ಮನೊವ್ಪಾಂತ್ ಎಕ್ ವೆಗ್ಳೀಚ್ ಮಜಾ ಆಸ್ತಾ ! ಭುರ್ಗಿಂ ವ್ಹಡ್ ಜಾಲ್ಲಿಂ ಆಸ್ತಾತ್ ತಾಂಚೆ ವಿಶ್ವಾಂತ್ ತಿಂ ಗುಲ್ಲ್ ಆಸ್ತಾತ್ ಪೈಸ್ ರಾವ್ನ್ ಆತಾಂ ತುಮ್ಕಾಂ ತಾಂಚೆಕಡೆನ್ ಪಳೊವಂಚೆಂ ಪಡ್ಟಾ ಪನ್ನಾಶೀಕಡೆನ್ ಪಾವ್ಪಾಚೆಂ ಹೆಂ ಎಕ್ ದುಖ್ಖ್ ಆಸ್ತಾ ತರಿ ಪನ್ನಾಸಾವೊ ವಾಡ್ದೀಸ್ ಮನೊವ್ಪಾಂತ್ ಎಕ್ ವೆಗ್ಳೀಚ್ ಮಜಾ ಆಸ್ತಾ ! ತುಮ್ಚ್ಯಾ ಸುಖ್-ದುಖ್ಖಾಂತ್ ವಾಂಟೆಕಾರ್ ಜಾವ್ಪಾಕ್ ತುಮ್ಚ್ಯಾ ಘರ್ಕಾನ್ನಿ ಶಿವಾಯ್ ಆತಾಂ ದುಸ್ರೊ ಕೊಣ್ ಆಸ್ತಾ? ತುಮ್ಚಿಂ ಸಗ್ಳಿಂ ಶಾಣೆಪಣಾಂ ತೀಕಾಚ್ ಆತಾಂ ಸಾಂಗ್ಚಿಂ ಪಡ್ಟಾ ಪನ್ನಾಶೀಕಡೆನ್ ಪಾವ್ಪಾಚಿ ಹಿ ಎಕ್ ಖಂತ್ ಆಸ್ತಾ ತರಿ ಪನ್ನಾಸಾವೊ ವಾಡ್ದೀಸ್ ಮನೊವ್ಪಾಂತ್ ಎಕ್ ವೆಗ್ಳೀಚ್ ಮಜಾ ಆಸ್ತಾ ! ಖೂಪ್ ಜಿಯೆಲೊ ತುಂ ಸಗ್ಳ್ಯಾಂಖಾತೀರ್ ಆತಾಂ ಜಗೂಂಕ್ ಶಿಕ್ ಫಕತ್ ತುಜ್ಯಾಖಾತೀರ್ ಆಪ್ಲ್ಯಾ ಖಾತೀರ್ ಜಿಯೆವ್ಪಾಕ್ ಎಕ್ ವೆಗ್ಳೀಚ್ ನಶಾ ಆಸ್ತಾ ಮ್ಹೂಣೂನ್ ಪನ್ನಾಸಾವೊ ವಾಡ್ದೀಸ್ ಮನೊವ್ಪಾಂತ್ ಎಕ್ ವೆಗ್ಳೀಚ್ ಮಜಾ ಆಸ್ತಾ ! **** - ಸಖಾರಾಮ್ ಶೆಣ್ವಿ ಬೋರ್ಕರ್**. [ಜ್ಯೂನ್, 2020]

	ಸಖಾರಾಮ್ ಶೆಣ್ವಿ ಬೋರ್ಕರ್: ಫಾಟ್ಲಿಂ ಸಾಬಾರ್ ವರ್ಸಾಂ ತೆ ಸಾತ್ತ್ಯಾನ್ ಕವಿತಾ, ಲೆಖ್, ನಿಬಂದ್, ಕಥಾ, ಪುಸ್ತಕ್ ಪರಿಕ್ಷಣಾಂ ಕರೀತ್ ಆಯ್ಲ್ಯಾತ್. ತಾಂಕಾ ಆತಾಂ ಮೆರೆನ್ ಸರ್ಸ್ವತಿ ವಾಚ್ನಮಂದೀರ್, ಪಣ್ಜಿ, ಗೊವಾ ಸೆಕ್ಯುಲರ್ ಸೆಲ್, ರಾಮಾನಂದ್ ಪ್ರಕಾಶನ್, ಕಲಾಮಂಥನ್ ಆಮೊಣೆ, ಕೊಂಕಣ್ ಟಾಯ್ಮ್ಸ್, ಗೊಂಯ್ ವಿಧ್ಯಾಪೀಠ್, ಕೊಂಕ್ಣಿ ಸೆವಾ ಕೆಂದ್ರ್ ಕುಡ್ಚಡೆ, ಕೊಂಕ್ಣಿ ಭಾಶಾ ಮಂಡಳ್ ಹಾಂಚೆ ಪುರಸ್ಕಾರ್ ಫಾವೊ ಜಾಲ್ಯಾತ್. ತಾಂಚೆ ಲಿಖಾಣ್ ಭಾಂಗ್ರಭೂಂಯ್, ಬಿಮ್ಬ್, ಜಾಗ್ ಆದಿ ನೆಮಾಳ್ಯಾಂನಿಂ ಉಜ್ವಾಡಾಕ್ ಯೆತಾ. ಆಕಾಶವಾಣಿ ಪಣ್ಜಿ ಕೆಂದ್ರಾಚೆರ್ ತಾಂಚೆ ಕವಿತಾ ವಾಚ್ನಾಚೆ ಕಾರ್ಯಕ್ರಮ್ ಜಾತಾತ್. ಬೊರ್ಕಾರ್ ಹಾಂಣಿ ಮುಂಬಯ್ ವಿಧ್ಯಾಪೀಠಾಚಿ ರಸಾಯ್ನಶಾಸ್ತ್ರ್ ಆನಿ ಕಾಯ್ದ್ಯಾಚಿ ಪದ್ವಿ ಘೆತ್ಲ್ಯಾ. ತ್ಯಾಭಾಯ್ರ್ ತಾಣಿಂ ಗೊಂಯ್ ವಿದ್ಯಾಪೀಠಾಂತ್ಲ್ಯಾನ್ ಕೊಂಕ್ಣಿ ವಿಶ್ಯಾಂತ್ ಪದ್ವ್ಯುತ್ತರ್ ಪದ್ವಿ(M.A.) ಆಣಿ ವ್ಯವ್ಸ್ಥಾಪನ್, ಕಾಮ್ಗಾರ್ ಕಾಯ್ದೊ ಆನಿ ಕರ್ (Taxation) ಹ್ಯಾ ವಿಶ್ಯಾಂತ್ ಪದ್ವೀಕಾ ಘೆತ್ಲ್ಯಾತ್. ತೆ ಹಾಲೀಂಚ್ ಎಕಾ ಬಹುರಾಷ್ಟ್ರೀಯ್ ಕಂಪ್ನೀತ್ಲ್ಯಾನ್ ಅಧಿಕಾರಿ ಪದಾವೆಲ್ಯಾನ್ ನಿವೃತ್ತ್ ಜಾಲ್ಯಾತ್. ಆತಾಂ ಮೆರೆನ್ ತಾಂಚೆ ದೊನ್ ಕವಿತಾ ಸಂಗ್ರಹ್ 'ಅಥ್ರೆಕ್' ಆನಿ 'ತುಂ' ಹೆ ಉಜ್ವಾಡಾಕ್ ಆಯ್ಲ್ಯಾತ್ ಆನೀಕ್ ದೊನ್ ಕವಿತಾ ಸಂಗ್ರಹ್ ಆನಿ ಎಕ್ ಕಥಾ ಸಂಗ್ರಹಾಚೆರ್ ಕಾಮ್ ಚಾಲು ಆಸಾ.
[kovita] Pon'nasavo vodd'dis! (- Sakharam Shennvi Borkar)
'Satth-sot'tor; fondda bhitor’ sangonni orthabhorit. Hangasor pon'nasavo vhodd‌dis koso monoxachea jinnyent vegollich moza gheun yeta mholl'llem sobhit chitronn hea kovitent polleunko mellota. Prai bhorchi kuddik xivai kallzak va motik nhoi mholl'llem chintop opurbhayen hea koviten kel'lem disun yeta. - Som
[kovita] Pon'nasavo vodd'dis! (- Sakharam Shennvi Borkar)
Pon'nasavo vodd'dis! pon'nasavo vadd'dis monoupant ek vegllich moza asta monohorayachea utramnim sangtolo zalear "kems zori zale dhove punn nodor mat ton'ni asta” pon'nasavo vadd'dis monoupant ek vegllich moza asta ! zanntteambhitor nenntto ani nenntteambhitor zanntto oxi vichitroxi ti pirai asta tori pon'nasavo vadd'dis monoupant ek vegllich moza asta ! bhurgim vhodd zal'lim astat tanche vixvant tim gul'l astat pois raun atam tumkam tanchekodden pollounchem poddtta pon'naxikodden paupachem hem ek dukhkh asta tori pon'nasavo vadd'dis monoupant ek vegllich moza asta ! tumchea sukh-dukhkhant vanttekar zaupak tumchea ghorkan'ni xivai atam dusro konn asta? tumchim sogllim xanneponnam tikach atam sangchim poddtta pon'naxikodden paupachi hi ek khont asta tori pon'nasavo vadd'dis monoupant ek vegllich moza asta ! khup jielo tum soglleankhatir atam zogunk xik fokot tujeakhatir aplea khatir jieupak ek vegllich noxa asta mhunnun pon'nasavo vadd'dis monoupant ek vegllich moza asta ! **** - Sakharam Shennvi Borkar.** [Jun, 2020]

	Sakharam Shennvi Borkar: fattlim sabar vorsam te sat'tean kovita, lekh, nibond, kotha, pustok porikxonnam korit aileat. Tanka atam meren sorsvoti vachnomondir, ponnji, gova sekyulor sel, ramanond prokaxon, kolamonthon amonne, konkonn ttaims, gõy vidheapitth, konknni seva kendr kuddchodde, konknni bhaxa monddoll hanche purskar favo zaleat. Tanche likhann bhangrobhum-i, bimb, zag adi nemalleamnim ujvaddak yeta. Akaxovanni ponnji kendracher tanche kovita vachnache karyokrom' zatat. Borkar hamnni mumboi vidheapitthachi rosainoxastr ani kaideachi podvi ghetlea. Teabhair tannim gõy videapitthantlean konknni vixeant podvyut'tor podvi(M.A.) anni vyousthapon, kamgar kaido ani kor (Taxation) hea vixeant podvika ghetleat. Te halinch eka bohuraxttri-i kompnitlean odhikari podavelean nivrit't zaleat. Atam meren tanche don kovita songroh 'othrek' ani 'tum' he ujvaddak aileat anik don kovita songroh ani ek kotha songrohacher kam' chalu asa.
[कविता] पन्नासावो वाडदीस! (- सखाराम शेण्वी बोर्कार)
’साठ-सत्तर; फोंडा भितर’ सांगणी अर्थाभरीत. हांगासर पन्नासावो व्हड‌दीस कसो मनशाच्या जिण्येंत वेगळीच मजा घेवन येता म्हळ्ळें सोभीत चित्रण ह्या कवितेंत पळेवंक मेळता. प्राय भर्ची कुडीक शिवाय काळजाक वा मतीक न्हय म्हळ्ळें चिंतप अपुर्भायेन ह्या कवितेन केल्लें दिसून येता. - सं
[कविता] पन्नासावो वाडदीस! (- सखाराम शेण्वी बोर्कार)
पन्नासावो वाडदीस! पन्नासावो वाडदीस मनोवपांत एक वेगळीच मजा आसता मनोहरायाच्या उतरांनीं सांगतोलो जाल्यार "केंस जरी जाले धवे पूण नदर मात तन्नी आसता” पन्नासावो वाडदीस मनोवपांत एक वेगळीच मजा आसता ! जाण्ट्यांभितर नेण्टो आनी नेण्ट्यांभितर जाण्टो अशी विचित्रशी ती पिराय आसता तरी पन्नासावो वाडदीस मनोवपांत एक वेगळीच मजा आसता ! भुरगीं व्हड जाल्लीं आसतात तांचे विश्वांत तीं गुल्ल आसतात पैस रावन आतां तुमकां तांचेकडेन पळोवंचें पडटा पन्नाशीकडेन पावपाचें हें एक दुख्ख आसता तरी पन्नासावो वाडदीस मनोवपांत एक वेगळीच मजा आसता ! तुमच्या सुख-दुख्खांत वांटेकार जावपाक तुमच्या घरकान्नी शिवाय आतां दुसरो कोण आसता? तुमचीं सगळीं शाणेपणां तीकाच आतां सांगचीं पडटा पन्नाशीकडेन पावपाची ही एक खंत आसता तरी पन्नासावो वाडदीस मनोवपांत एक वेगळीच मजा आसता ! खूप जियेलो तूं सगळ्यांखातीर आतां जगूंक शिक फ़कत तुज्याखातीर आपल्या खातीर जियेवपाक एक वेगळीच नशा आसता म्हूणून पन्नासावो वाडदीस मनोवपांत एक वेगळीच मजा आसता ! **** - सखाराम शेण्वी बोर्कार.** [ज्यून, २०२०]

	सखाराम शेण्वी बोर्कार: फाटलीं साबार वर्सां ते सात्त्यान कविता, लेख, निबंद, कथा, पुसतक परिक्षणां करीत आयल्यात. तांका आतां मेरेन सर्स्वती वाचनमंदीर, पणजी, गोवा सेक्युलर सेल, रामानंद प्रकाशन, कलामंथन आमोणे, कोंकण टायम्स, गोंय विध्यापीठ, कोंकणी सेवा केंद्र कुडचडे, कोंकणी भाशा मंडळ हांचे पुर्स्कार फावो जाल्यात. तांचे लिखाण भांग्रभूंय, बिमब, जाग आदी नेमाळ्यांनीं उज्वाडाक येता. आकाशवाणी पणजी केंद्राचेर तांचे कविता वाचनाचे काऱ्यक्रम जातात. बोर्कार हांणी मुंबय विध्यापीठाची रसायनशासत्र आनी कायद्याची पद्वी घेतल्या. त्याभायर ताणीं गोंय विद्यापीठांतल्यान कोंकणी विश्यांत पद्व्युत्तर पद्वी (M.A.) आणी व्यवस्थापन, कामगार कायदो आनी कर (Taxation) ह्या विश्यांत पद्वीका घेतल्यात. ते हालींच एका बहुराषट्रीय कंपनीतल्यान अधिकारी पदावेल्यान निवृत्त जाल्यात. आतां मेरेन तांचे दोन कविता संग्रह 'अथ्रेक' आनी 'तूं' हे उज्वाडाक आयल्यात आनीक दोन कविता संग्रह आनी एक कथा संग्रहाचेर काम चालू आसा.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.