ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] ನಿರ್ಜೀವ್ (- ಉರ್ಜಿತಾ ಭೊಬೆ)

ದೊಳೆ ಆಸುನ್ ಪಳೆಂವ್ಕ್ ಸಕುನ್‌ಯೀ ದೀಶ್ಟ್ ನಾಸ್ಚ್ಯಾಂಕ್, ಕಾನ್ ಆಸುನ್ ಆಯ್ಕುಂಕ್ ಸಕುನ್‌ಯೀ ಕಸ್ಲೊಚ್ ಬದ್ಲಾಪ್ ಕರಿನಾಸ್ಚ್ಯಾಂಕ್, ಜೀವ್ ಆಸುನ್‌ಯೀ ಧರ್ತೆಕ್ ಭಾರ್ ಜಾವ್ನ್ ಜಿಯೆತೆಲ್ಯಾಂಕ್ ಜೀವ್ ಮ್ಹಣ್ಚೆಂ ವಾ ಜಿವೆಂ ಮೊಡೆಂ? ಹೆಂ ಚಿಂತಪ್ ಭೋವ್ ಅಪುರ್ಭಾಯೆನ್ ಉಟಯಿಲ್ಲೆಂ ಹ್ಯಾ ಕವಿತೆಂತ್ ದಿಸುನ್ ಯೆತಾ.

ಕವಿತಾ ಜೆದ್ನಾಂ ಮನ್ಶಾಚ್ಯಾ ದಳ್ದಿರ್ ಸವಯೆಂಚೆರ್ ಆರ್ಸೊ ಧರ್ತಾ ತೆದ್ನಾ ತ್ಯಾ ಕವಿತೆಚಿ ಎಕೆಕ್ ವ್ಹಳ್ ದಿವ್ಯಾಪರಿಂ ಉಜ್ವಾಡ್ ಫಾಂಕಯ್ತಾ. ಪುಣ್ ಸಂಸಾರ್ ಬದ್ಲುಂಕ್ ಆಶೆತೆಲೆ ಕೆದ್ನಾಂಚ್ ಸ್ವತಾ ಬದ್ಲಲ್ಲೆ ನಾಂತ್ ವಾ ತ್ಯಾ ದಿಶೆನ್ ಚಿಂತುಂಕ್ ಸಯ್ತ್ ವ್ಹಚಾನಾಂತ್. ಸಾಹಿತಿ ಮ್ಹಳ್ಯಾರ್ ಅಪ್ಣಾಚೆಂ ಕಾಮ್ ಫಕತ್ ಬರಂವ್ಚೆಂ ಆನಿ ಸಮಾಜೆನ್/ಹೆರಾಂನಿ ತೆಂ ಪಾಳ್ಚೆಂ ಮ್ಹಳ್ಳೆಂ ಚಿಂತಪ್ ಚಿಂತ್ಚೆಚ್ ಆಮ್ಚ್ಯಾ ಸಮಾಜೆಂತ್ ಭರುನ್ ಗೆಲ್ಯಾತ್ ಆಸ್ತಾಂ ಹ್ಯಾ ಕವಿತೆಚೆಂ ರುದಾನ್ ಕಿತ್ಲೆಶ್ಯಾಂಚ್ಯಾ ಕಾನಾರ್ ಪಡತ್? ಪಡ್ಲೆಂ ತರ್‌ಯೀ ಕಸಲೆಂ ಪರಿವರ‍್ತನ್ ಜಾಯ್ತ್ ಮ್ಹಳ್ಳೆಂ ಅಧುರೆಂ ಸವಾಲ್.

- ಸಂ

[ಕವಿತಾ] ನಿರ್ಜೀವ್ (- ಉರ್ಜಿತಾ ಭೊಬೆ)

ನಿರ್ಜೀವ್ ತಾಕಾ ದೊಳೆ ನಾಸ್ತಾತ್ ಬರೊ ಕೊಣ್ ವಾಯ್ಟ್ ಕೊಣ್ ಪಾರ್ಖುಪಾಕ್ ಆಪ್ಲೊ ಪರ್ಕಿ ವಳ್ಖುಪಾಕ್ ಮ್ಹಣೂನಚ್ ಕಾಯ್ ಆಮಿ ತಾಕಾ ನಿರ್ಜೀವ್ ಮ್ಹಣ್ಟಾತ್? ಮಳ್ಬಾಚೆಂ, ಝಾಡಾಂಪೆಡಾಂಚೆಂ, ದೊಂಗ್ರಾಂಚೆಂ ರೂಪ್ ಘೆತಾ. ಪೂಣ್ ಮನ್ಶಾ ಪ್ರಮಾಣ್ ಬದ್ಲಪಾಕ್ ತಾಕಾ ರಂಗ್ ನಾಸ್ತಾ. ಮ್ಹಣ್ ಜಾಯ್ತ್ ಘಡ್ಯೆ ಹಾತಯ್ ನಾಸ್ತಾತ್ ತಾಕಾ ಜಾಯ್ ತೆಂ ಸ್ವೀಕಾರಪಾಕ್ ನಾಕಾ ತೆಂ ನ್ಹಯ್ಕಾರಪಾಕ್ ಮ್ಹಣೂನ್ ಕಾಯ್? ತುಜ್ಯಾ ಪೊಶಾಂತ್ ಪಾವ್ಲೆಂ ತುಜೆಂ ಜಾವ್ನ್ ರಾವ್ಲೆಂ ಆಡಾಯ್ನಾ ಜಾಲ್ಯಾರ್ ನಿಖಳ್ ನಿರಂತರ್ ವ್ಹಾಂವ್ಲೆಂ ತೆಂ ಜಾತ್ ಪಾತ್ ನಕ್ಳೊ ತೆಂ ನೆಣಾ ಮ್ಹಜೆಂ ತುಜೆಂ ತೆಂ ಜಾಣಾ ಫಕತ್ ವ್ಹಾಂವ್ಪಾಕ್ ತಾಕಾ ಲಾಗ್ನಾ ದೀಸ್ ಆನಿ ರಾತ್ ತೆಂ ಪಳಯ್ನಾ ದೀಕ್ ಆನಿ ವಾಟ್ ತೆಂ ವ್ಹಾಂವ್ತಾ ಖಂಯ್ ಪಾವ್ಪಾಚಿ ನಾಸ್ತನಾ ಸಾಸ್ಣಾಯ್ ಮ್ಹಣೂನ್ ಕಾಯ್? ತೆಂ ವ್ಹಾಂವ್ತಾ, ವ್ಹಾಂವ್ತಚ್ ಆಸ್ತಾ ಹಾಕಾ ಲಾಗೂನ್ ತಾಕಾ ಲಾಗೂನ್ ಮ್ಹಾಕಾ ಲಾಗೂನ್ ತುಕಾ ಲಾಗೂನ್ ತೆಂ ಸಗ್ಳ್ಯಾಂಚೆಂ ಜೀವ್ನ್ ಜಾತಾ ತೆಂ ಸಗ್ಳ್ಯಾಂಕ್ ಜೀವ್ನ್ ದಿತಾ ಪೂಣ್ ಸ್ವತಾಃ ಮಾತ್ ಜಗ್ನಾ ಮ್ಹಣೂನಚ್ ಘಡ್ಯೆ ತಾಜೆಂ ನಾಂವ್ ಜೀವ್ನ್ ಆಸೂನ್ ಲೆಗೀತ್ ತಾಕಾ ಆಮಿ ಮ್ಹಣ್ಟಾತ್ ನಿರ್ಜೀವ್. **** - ಉರ್ಜಿತಾ ಭೊಬೆ**. [ಅಗೊಸ್ತ್, 2020]

	ಉರ್ಜಿತಾ ಭೊಬೆ: ಸಾಹಿತಿಕ್ ಅಭಿರುಚ್ ಆಸ್ಚಿ ಗೊಂಯ್ಚಿ ಉರ್ಭೆವಂತ್ ಕವಯತ್ರಿ ಹಿ. ಕವಿಸಮ್ಮೇಳನಾಂನಿ ತಿ ಕಾರ್ಯಾಳ್. ಹೆರ್ ಭಾಸೆಂತ್ಲಿಂ ಕವಿತಾ ಸಯ್ತ್ ವಾಸ್ಚಿ ಅಭಿರುಚ್ ಆಸ್ಚ್ಯಾ ಹಿಚೊ ಫುಡ್ಲದ್ ಕವಿತಜಮೊ ’ಉರ್ಜಾಸ್ರೋತ್’ ಪರ್ಗಟ್ ಜಾಲಾ. ಕೊಂಕಣಿ ಕವಿತೆಂನಿ ನವಿ ಸಕತ್ ಭರ್ಚೆ ದಿಶೆನ್ ಬಾಯ್ ಉರ್ಜಿತಾ ವಾವ್ರ್ ಕರುನ್ ಆಸಾ. ಪಯ್ಣಾರಿ-ವೀಜ್ ಸಾಹಿತಿಕ್ ಸ್ಪರ್ಧೊ 2018 ಚೆರ್ ಹಿಚ್ಯಾ ಕವಿತೆಕ್ ದುಸ್ರೆಂ ಇನಾಮ್, ಪಯ್ಣಾರಿ-ವೀಜ್ ಸಾಹಿತಿಕ್ ಸ್ಪರ್ಧೊ 2019 ಚೆರ್ ಪಯ್ಲೆಂ ಇನಾಮ್ ಲಾಭ್ಲಾಂ.
[kovita] Nirjiv* (- Urjitha Bhobe)*
Dolle asun polleunko sokun‌yi dixtt nascheank, kan asun aikunk sokun‌yi kosloch bodlap korinascheank, jivo asun‌yi dhortek bhar zaun jieteleank jivo mhonnchem va jivem moddem? hem chintop bhovo opurbhayen uttoyil'lem hea kovitent disun yeta. Kovita jednam monxachea dolldir souyencher arso dhorta tedna tea kovitechi ekek vholl diveaporim ujvadd fankoita. Punn somsar bodlunk axetele kednanch svota bodlol'le nant va tea dixen chintunk soit vhochanant. Sahiti mhollear opnnachem kam' fokot boromvchem ani somajen/heramni tem pallchem mholl'llem chintop chintchech amchea somajent bhorun geleat astam hea kovitechem rudan kitlexeanchea kanar poddot? poddlem tor‌yi kosolem porivoro‍ton zait mholl'llem odhurem soval. - Som
[kovita] Nirjiv* (- Urjitha Bhobe)*
Nirjiv taka dolle nastat boro konn vaitt konn parkhupak aplo porki vollkhupak mhonnunoch kai ami taka nirjivo mhonnttat? mollbachem, zhaddampeddanchem, dongranchem rup gheta. Punn monxa promann bodlopak taka rong nasta. Mhonn zait ghoddye hatoi nastat taka zai tem svikaropak naka tem nhoikaropak mhonnun kai? tujea poxant paulem tujem zaun raulem addaina zalear nikholl nirontor vhamvlem tem zat pat nokllo tem nenna mhojem tujem tem zanna fokot vhamvpak taka lagna dis ani rat tem polloina dik ani vatt tem vhamvta khoim paupachi nastona sasnnai mhonnun kai? tem vhamvta, vhamvtoch asta haka lagun taka lagun mhaka lagun tuka lagun tem soglleanchem jiun zata tem soglleank jiun dita punn svotah mat zogna mhonnunoch ghoddye tajem namv jiun asun legit taka ami mhonnttat nirjivo. **** - Urjita Bhobe.** [Aug, 2020]

	Urjita Bhobe: sahitik obhiruch aschi gõychi urbheunt kouyotri hi. Kovisom'mellonamni ti kareall. Her bhasentlim kovita soit vaschi obhiruch aschea hicho fuddlod kovitozomo ’urzasrot’ porgott zala. Konkonni kovitemni novi sokot bhorche dixen bai urjita vaur korun asa. Poinnari-viz sahitik spordho 2018 cher hichea kovitek dusrem inam' labhlam. Poinnari-viz sahitik spordho 2019 cher poilem inam' labhlam.
[कविता] निर्जीव (- उर्जिता भोबे)
दोळे आसून पळेवंक सकून‌यी दीश्ट नासच्यांक, कान आसून आयकुंक सकून‌यी कसलोच बदलाप करिनासच्यांक, जीव आसून‌यी धर्तेक भार जावन जियेतेल्यांक जीव म्हणचें वा जिवें मोडें? हें चिंतप भोव अपुर्भायेन उटयिल्लें ह्या कवितेंत दिसून येता. कविता जेदनां मनशाच्या दळदीर सवयेंचेर आर्सो धर्ता तेदना त्या कवितेची एकेक व्हळ दिव्यापरीं उज्वाड फांकयता. पूण संसार बदलुंक आशेतेले केदनांच स्वता बदलल्ले नांत वा त्या दिशेन चिंतुंक सयत व्हचानांत. साहिती म्हळ्यार अपणाचें काम फकत बरंवचें आनी समाजेन/हेरांनी तें पाळचें म्हळ्ळें चिंतप चिंतचेच आमच्या समाजेंत भरून गेल्यात आसतां ह्या कवितेचें रुदान कितलेश्यांच्या कानार पडत? पडलें तर‌यी कसलें परिवर‍्तन जायत म्हळ्ळें अधुरें सवाल. - सं
[कविता] निर्जीव (- उर्जिता भोबे)
निर्जीव ताका दोळे नासतात बरो कोण वायट कोण पारखुपाक आपलो परकी वळखुपाक म्हणूनच काय आमी ताका निर्जीव म्हणटात? मळबाचें, झाडांपेडांचें, दोंगरांचें रूप घेता. पूण मनशा प्रमाण बदलपाक ताका रंग नासता. म्हण जायत घडये हातय नासतात ताका जाय तें स्वीकारपाक नाका तें न्हयकारपाक म्हणून काय? तुज्या पोशांत पावलें तुजें जावन रावलें आडायना जाल्यार निखळ निरंतर व्हांवलें तें जात पात नकळो तें नेणा म्हजें तुजें तें जाणा फकत व्हांवपाक ताका लागना दीस आनी रात तें पळयना दीक आनी वाट तें व्हांवता खंय पावपाची नासतना सासणाय म्हणून काय? तें व्हांवता, व्हांवतच आसता हाका लागून ताका लागून म्हाका लागून तुका लागून तें सगळ्यांचें जीवन जाता तें सगळ्यांक जीवन दिता पूण स्वताः मात जगना म्हणूनच घडये ताजें नांव जीवन आसून लेगीत ताका आमी म्हणटात निर्जीव. **** - उर्जिता भोबे.** [अगोस्त, २०२०]

	उर्जिता भोबे: साहितीक अभिरूच आसची गोंयची उर्भेवंत कवयत्री ही. कविसम्मेळनांनी ती काऱ्याळ. हेर भासेंतलीं कविता सयत वासची अभिरूच आसच्या हिचो फुडलद कवितजमो ’उर्जास्रोत’ पर्गट जाला. कोंकणी कवितेंनी नवी सकत भर्चे दिशेन बाय उर्जिता वावर करून आसा. पयणारी-वीज साहितीक स्पर्धो २०१८ चेर हिच्या कवितेक दुस्रें इनाम लाभलां. पयणारी-वीज साहितीक स्पर्धो २०१९ चेर पयलें इनाम लाभलां.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.