|
ಸಂಪಾದಕೀಯ್
- 14.
ಲಾಖ್
ಕೊಂಕ್ಣಿ ಪುಣ್ ಏಕ್ ಆಸ್ಟಿನ್ |
ಮ್ಹಜ್ಯಾ ಸಾಹಿತಿಕ್
ಪಿಸಾಯೆರ್, ಏಕ್ ವಾಚ್ಪಿ ಜಾವ್ನ್ ಮ್ಹಾಕಾ ಭೋವ್ ಪಸಂದ್
ಜಾಲ್ಲಿ ಕೊಂಕ್ಣಿ ಕಾದಂಬರಿ ಜಾವ್ನಾಸಾ; ಎಟ್ಯೆಲಾಚಿ ’ತುಂ
ಬರೊ ಜಾ’. ರಾಕ್ಣೊ ಪತ್ರಾಚೆರ್ ಪರ್ಗಟುನ್ ಯೆಂವ್ಚ್ಯಾ ಹ್ಯಾ
ಕಾದಂಬರೆಚೆ ಎಕೇಕ್ ಪಾತ್ರ್ ತಶೆಂಚ್ ಸಭಾರ್ ಅಮೊಲಿಕ್ ಉತ್ರಾಂ
ಮ್ಹಜ್ಯಾ ಯಾದಿಂತ್ ಅಜೂನ್ ಖಂಚುನ್ ಉರ್ಲ್ಯಾಂತ್, ತಾಂತುಂ
ದೋನ್ ಅಪುರ್ಭಾಯೆಚಿಂ ಉತ್ರಾಂ ಜಾವ್ನಾಸಾತ್ ಹಿಂ;
1. ರುಂವಾಂತ್ ಸರ್ಗ್.
2. ಆಮಿ ಹಾಸುಂಕ್ ಜಾಣಾಂವ್, ಸೊಸುಂಕ್ ನ್ಹಯ್.
ಹಿಂ ದೋನ್ ವಾಕ್ಯಿಂ ವಿವಿಂಗಡ್ ಕರುನ್ ತಶೆಂಚ್ ಎಕಾಚ್
ಅರ್ಥಾನ್ ವಾಚ್ಲಿಂ ತರ್ ಏಕ್ ಅತ್ವೊಚ್ ಮತ್ಲಬ್ ಉಭೊ ಜಾತಾ.
ಪುಣ್ ದುಸ್ರೆಂ ವಾಕ್ಯ್ ತ್ಯಾ ವೆಳಾಚ್ಯಾ ಪುಣ್ ಕೆದಿಂಚ್
ಬದ್ಲನಾತ್ಲ್ಲ್ಯಾ ಆಯ್ಚ್ಯಾ ಕಾಳಾಚ್ಯಾ ಕೊಂಕ್ಣಿ
ಸಮಾಜೆಚ್ಯಾ ಚಿಂತ್ಪಾಚೆರ್ ಅಪುರ್ಭಾಯೆಚೊ ಆರ್ಸೊ ಧರ್ತಾ.
ಸಮಾಜ್ ಮ್ಹಳ್ಯಾರ್ ಭಾಂದ್ಪಾಂ ನ್ಹಯ್, ಗಾಂವ್, ನ್ಹಂಯೊ,
ಬಾಂಯೊ, ಗುಡೆ, ದೊಂಗೊರ್, ರಾನಾಂ-ಮೊಲಿಂ ನ್ಹಯ್; ಮನಿಸ್.
ಆನಿ ಮನಿಸ್, ಅಪ್ಲೆಂ ಕುಟಾಮ್, ಆಪ್ಲೊ ಸೆಜ್-ಸಂಬಾರ್,
ಆಪ್ಲೊ ಗಾಂವ್, ರಾಜ್ಯ್, ದೇಸ್.... ಆನಿ ಜೆರಾಲ್ ರಿತಿನ್
ಎಕೆಕಾ ಮನ್ಶಾಚೆಂ ಚಿಂತಾಪ್ಚ್ ಸಮಾಜಿಕ್ ಚಿಂತಪ್.
ಲೇಕನಾಚ್ಯಾ ಮಾತಾಳ್ಯಾಕ್ ಆನಿ ಎಟ್ಯೆಲಾಚ್ಯಾ ಉತ್ರಾಂಕ್
ಸಂಬಂಧ್ ಗಡ್ಸುಂಕ್ ಚಿಂತಾಸ್ತಾಂ ತುಂ ಚಿಂತುಂಕ್ ಆಸಾಯ್,
ಅಷ್ಟಮಿ ಪರ್ಬೆಕ್ ಆನಿ ಕಾಸಿಮ್ ಸಾಯ್ಬಾಕ್ ಕಸ್ಲೊಗಾಯ್
ಸಂಬಂಧ್ ಮ್ಹಣುನ್. ಸಂಬಂಧ್ ಆಸಾ, ಭೋವ್ ಗುಂಡಾಯೆಚೊ, ಭೋವ್
ಮಹತ್ವಾಚೊ ಸಂಬಂಧ್.
ಪುಣ್ ಸದ್ದ್ಯಾಕ್ ಎಟ್ಯೆಲಾಚೆಂ ರಾಜಾಂವ್ ವಾ ಗಿನ್ಯಾನ್ ವಾ
ತತ್ವಾಕ್ ಬಗ್ಲೆನ್ ದವರ್ನ್, ಆಸ್ಟಿನಾಚೆರ್ ಎಕೊಡಿ ನದರ್
ಘಾಲ್ತಾಂ.
ಮ್ಹಜೊ ಜಲ್ಮಾಗಾಂವ್ ’ಅಜೆಕಾರ್’ ಮ್ಹಜ್ಯಾ ಆವಯ್ಚೊ ಗಾಂವ್,
ಮ್ಹಜೊ ಬಾಪುಯ್ ಬೊಳಿಯೆ/ಪಾಂಗ್ಳಾ ಮುಳಾಚೊ ದೆಕುನ್
ಭುರ್ಗ್ಯಾಪಣಾಲ್ಯಾ ದಿಸಾಂನಿ ಮ್ಹಾಕಾ ಪಾಂಗ್ಳಾಚ್ಯಾ
ಆಕಯ್ಚ್ಯಾ ಘರಾ ವಚುಂಕ್ ಆವ್ಕಾಸ್ ಮೆಳ್ತಾಲೊ, ಆನಿ
ಪಾಂಗ್ಳಾಚೊ ಸೊಭಿತ್ ಗಾಂವ್, ಶಿಕ್ಪಿ/ಸಮ್ಜಣೆಚೊ ಲೋಕ್, ಅನಿ
ವೆವಸ್ತಿತ್ ರಿತಿನ್ ಚಲುನ್ ಆಸ್ಚೆಂ ಫಿರ್ಗಜ್ ಘರಾಣೆಂ
ಮ್ಹಜ್ಯಾ ಚಿಂತ್ಪಾಕ್ ಪ್ರಭಾವ್ ಕರುಂಕ್ ಸಕ್ಲೆಂ,
ಪ್ರತ್ಯೇಕ್ಪಣಿಂ ಕಥೊಲಿಕ್ ಯುವಸಂಚಾಲನ್. ತ್ಯೇ ವೆಳಾರ್
ಸಿ.ವೈ.ಎಮಾಂತ್ ಎಚ್.ಆರ್.ಆಳ್ವ ಏಕ್ ಭಳ್ವಂತ್ ನಾಂವ್, ತಾಕಾ
ಆದರ್ಶ್ ಮಾಂದುನ್ ಜಾಯ್ತೆ ಮುಖೆಲಿ ಶಿರ್ವಾಂ-ಉಡ್ಪಿ
ವಾರಾಡ್ಯಾಂತ್ ಉದೆಲ್ಲೆ. ಪಾಂಗ್ಳಾಂತ್ ಸಯ್ತ್
ಜೆ.ಬಿ.ಮಾರ್ಟಿಸ್ (ಆತಾಂ ದೆವಾಧಿನ್), ಸ್ಟೀಫನ್ ಆಳ್ವ, ಐವಿ
ಗಾಗ, ರೊನಾಲ್ಡ್ ನಜ್ರೆತ್ (ಆತಾಂ ಸಾಂ|ಲುವಿಸ್ ಕೊಲೆಜಿಚೊ
ಪ್ರಾಧ್ಯಾಪಕ್), ವಾಯ್ಲೆಟ್ ಆಳ್ವ, ವಾಲ್ಟ್ಸನ್, ಮೆಲ್ವಿನ್
ಆನಿ ಸಭಾರ್ ಹೆರ್ ಪ್ರತಿಭಾವಂತ್ ಯುವಜಣಾಂಚ್ಯಾ ವಾವ್ರಾಕ್
ಏಕ್ ಪ್ರೇರಣ್ ಜಾವ್ನಾಸ್ಲೆಂ; ಎಚ್.ಆರ್.ಆಳ್ವ, ಆನಿ ಜೆದ್ನಾಂ
ಎಚ್.ಆರ್.ಆಳ್ವ ಅಪ್ಣಾಕ್ ಪ್ರೇರಣ್ ದಿಲ್ಲೊ ಜಾವ್ನಾಸಾ
’ಆಸ್ಟಿನ್ ಪ್ರಭು’ ಎಕಾ ಯುವ ಕಾರ್ಯಾಂತ್ ಸಾಂಗ್ತಾನಾ
ಪಯ್ಲೆಪಾವ್ಟಿಂ ಹಾಂವೆಂ ಆಸ್ಟಿನ್ ಪ್ರಭುಚೆಂ ನಾಂವ್ ಆಯ್ಕಲೆಂ.
ತೆದ್ನಾಂ ತೊ ಅಮೆರಿಕಾಂತ್ ಆಸ್ಲೊ.
ಅಜೆಕಾರ್ ಘಾಟಾಚ್ಯಾ
ಪೊಂತಾರ್ ಅಖ್ರೇಚಿ ಫಿರ್ಗಜ್, ಚಡ್ತಾವ್ ಲೋಕ್ ಕೃಷಿ/ಸಾಗ್ವೊಳಿ
ಕರ್ನ್ ಜಿಯೆತಾಲೊ, ದೆಕುನ್ ಮೊಸ್ತು ಪಾಟಿಂ (ಆರ್ಥಿಕ್,
ಸಮಾಜಿಕ್ ರಿತಿನ್ ತಶೆಂಚ್ ಚಿಂತ್ಪಾನ್ ಸಯ್ತ್). ದೆಕುನ್
ಹಾಂವೆಂ ಸಯ್ತ್ ಪಾಂಗ್ಳಾ ಸಿ.ವೈ.ಎಮ್.ಚೆಂ ಸಾಂದೆಪಣ್
ಘೆತ್ಲೆಂ ಆನಿ ಥೊಡೆ ತೇಂಪ್ ಪಾಂಗ್ಳಾಚ್ಯಾ ತಾಲೆಂತಾಂಸವೆಂ
ಸಂಪರ್ಕ್ ಕರ್ಚೊ ಆವ್ಕಾಸ್ ಲಾಭ್ಲೊ. ಹೆಂ ಕಾಂಯ್ 1987-88
ಇಸ್ವೆಚಿ ಗಜಾಲ್.
2001-2 ಇಸ್ವೆಂತ್ ಜೆದ್ನಾಂ ಹಾಂವ್ ಕುವೆಯ್ಟಾಕ್ ಪಾವ್ಲೊಂ,
ತೆಚ್ಚ್ ವೆಳಾರ್ ಕೊಂಕ್ಣಿ ಅಂತರ್ಜಾಳಿಜಾಗೆ ಉದೆಲ್ಲೆ.
ತಾಂತುಂ ಪ್ರಮುಕ್ ಜಾವ್ನ್ ವಾಲ್ಟರ್ ನಂದಳಿಕೆಚೊ ’ದಾಯ್ಜಿದುಭಾಯ್.ಕೊಮ್’
ಆನಿ ರೋಶನ್ ಡಿ’ಸೋಜಾಚೊ ’ಮ್ಯಾಂಗಲೋರಿಯನ್.ಕೊಮ್’.
ಆನಿ ತ್ಯೇ ಸಂಧರ್ಭಾರ್, ಲ್ಹಾನ್ ಜಾಂವ್, ವ್ಹಡ್ ಜಾಂವ್,
ಕೊಣಾಯ್ಚ್ಯಾಯ್ ಪ್ರಗತೆಚಿ ಖಬರ್ ವಾಚುನ್, ಹರ್ಯೆಕ್ಲ್ಯಾಕ್
ಉಲ್ಲಾಸ್ ಪಾಟಂವ್ಚೊ ಆಸ್ಟಿನ್ ಪ್ರಭುಚೆಂ ನಾಂವ್ ವಾಚುಂಕ್
ಮೆಳ್ಳೆಂ, ಪುಣ್ ತಾಚೆವಿಶಿಂ ಪಾಟ್ಲ್ಯಾನ್ ಉಭ್ಚ್ಯೊ ಜಿಬೊ
ಸಯ್ತ್ ಆಯ್ಕುಂಕ್ ಮೆಳ್ಳ್ಯೊ; ’ಆಸ್ಟಿನಾಕ್ ನಾಂವ್ ಜಾಯ್,
ದೆಕುನ್ ಪಬ್ಲಿಸಿಟಿಕ್ ಸರ್ವಾಂಕ್ ಉಲ್ಲಾಸ್ ಪಾಟಯ್ತಾ’.
ಪುಣ್ ಚಡಾವತ್ ಸರ್ವ್ ಸಮಾಜಿಕ್ ಸಂಘಟನಾಂ ಜಾಂವ್, ಕಾರ್ಯಿಂ
ಜಾಂವ್, ಹರ್ಯೆಕ್ಲ್ಯಾಕ್ ತವಳ್ ಅಮೆರಿಕಾಥಾವ್ನ್ ಕುಮೊಕ್
ಕರ್ತಾಲೊ ಆಸ್ಟಿನ್, ಪುಣ್ ಭೋವ್ ವಿಪರ್ಯಾಸಾಚಿ ಗಜಾಲ್
ಮ್ಹಳ್ಯಾರ್ ತೊಂಡಾರ್ ಸಯ್ಲಾಪ್ ಉಲಯ್ತಲೆಚ್ಚ್ ತಾಚೆ
ಪಾಟ್ಲ್ಯಾನ್ ತಾಚಿಂ ಖೆಳ್ಕುಳಾಂ ಕರ್ತಾಲೆ.
ತೆದೊಳ್ ಮ್ಹಣಾಸರ್ ಆಸ್ಟಿನಾಚಿ ಮ್ಹಾಕಾ ಭೆಟ್ ಜಾಂವ್ಕ್
ನಾತ್ಲಿ. ಪುಣ್ ’ಕವಿತಾ’ ಮ್ಹಣುನ್ ಪಾನಾಂಗಟ್ಲೆ ಬರಯಿಲ್ಲೆಂ
ತಾಚೆಂ ಬರಪ್ ಸರಾಗ್ ರಿತಿನ್ ಪರ್ಗಟ್ ಜಾತಾಲೆಂ. ಎಕಾದಿಸಾ
ತಾಚೆರ್ ಶಿಣುನ್ (ಗರ್ಜೆಭಾಯ್ರ್) ತಾಕಾ ಏಕ್ ಇಮೇಯ್ಲ್
ಧಾಡ್ಲೆಂ. ತುರಂತ್ ತಾಚಿ ಜವಾಬ್ ಆಯ್ಲಿ ವಾಚುನ್ ಹಾಂವ್
ಅಜ್ಯಾಪ್, ಜಿತ್ಲೆಂ ಹಾಂವೆಂ ಕಡಕ್ಕ್ ರಿತಿನ್ ಬರಯಿಲ್ಲೆಂಕಿ
ತಿತ್ಲೆಚ್ಚ್ ಮೊವಾಳಾಯೆಚಿ ಆನಿ ಖಾಲ್ತಿ ಜವಾಬ್ ವಾಚುನ್
ಭಗ್ಲೆಂ ’ನಿಜಾಯ್ಕಿ, ಭರ್ಲ್ಲೊ ಕೊಳ್ಸೊ ಆಲ್ಕಂದನಾ’. ಪುಣ್
ಹೆರ್ ಥೊಡ್ಯಾಬರಿಂ ಗುಪ್ತಿಂ ಸ್ವಾರ್ಥಿ ಇರಾದೊ ದವರ್ನ್
ತಾಚೆಥಾವ್ನ್ ಕೆದಿಂಚ್ ಹಾಂವೆಂ ಫಾಯ್ದೊ ಜೊಡುಂಕ್ ನಾ.
ಖರೆಪಣಿಂ ಮ್ಹಾಕಾ ತಾಚೆರ್ ಅಭಿಮಾನ್ ಉದೆಲ್ಲೊ, ತಾಚೊ ಪಯ್ಲೊ
ಬೂಕ್ ’ಆಡೊಸಾಂತ್ಲಿಂ ಫುಲಾಂ’ ಪರ್ಗಟ್ ಕರುನ್, ತಾಚ್ಯಾ
ಹಿಶಾರ್ಎಪ್ರಕಾರ್ ತೆ ಸರ್ವ್ ಬೂಕ್ ತಾಚ್ಯಾ ಭಾವಾಕ್
ಪಾವಿತ್ ಕರಯಿಲ್ಲೆ. ಪುಣ್ ಮುಖಾಮುಖಿ ತಾಕಾ ಮೆಳ್ಚೆಂ ಭಾಗ್
ಮ್ಹಾಕಾ ಲಾಭ್ಲ್ಲೆಂಚ್ ನಾ.
2017 ಇಸ್ವೆಚ್ಯಾ ಸುರ್ವಾತೆರ್ ಆಸ್ಟಿನ್ ಅಪುಣ್
ಮಂಗ್ಳುರಾಕ್ ಯೆಂವ್ಚಾರ್ ಆಸಾಂ ಮ್ಹಣ್ ಮ್ಹಾಕಾ ಕಳಯ್ತಚ್,
ತಾಕಾ ಹ್ಯೇ ಪಾವ್ಟಿಂ ಮುಖಾಮುಖಿ ಮೆಳುಂಕ್ಚ್ ಜಾಯ್
ಮ್ಹಣುನ್ ಗೆಲ್ಲೊಂ, ತಾಣೆಂ ಆಯಿಲ್ಲ್ಯಾ ದುಸ್ರೆಚ್ಚ್ ದಿಸಾ
ತಾಕಾ ವಚುನ್ ಮೆಳ್ಳೊಂ, ಪ್ರಾಯೆನ್, ಅನ್ಭೋಗಾಂತ್,
ಜಾಣ್ವಾಯೆನ್ ಮ್ಹಜ್ಯಾಕೀ ಕಿತ್ಲೊ ಉಂಚ್ಲೊ ಜಾವ್ನಾಸ್ಲೊ
ತೊ, ಲಾಂಬಾಯೆನ್ ಇಲ್ಲೊ ಮಟ್ವೊ ದಿಸ್ಲೊ ತರ್ಯೀ,
ಹಾಸೊ-ಫೊಕಾಣಾಂ ಆನಿ ಮೋಗ್-ಮಯ್ಪಾಸಾಂತ್ ಸಯ್ತ್ ತಾಣೆಂ
ಲಿಪಂವ್ಕ್ ಸೊಧ್ಚೆಂ ದೂಕ್ ಪಳೆಂವ್ಕ್ ಮೆಳ್ಳೆಂ.
ಥೊಡೆಚ್ಚ್ ದಿಸಾಂನಿ
ತಾಣೆಂ ಭೆಟುಂಕ್ ಗೆಲ್ಲ್ಯಾ ಎಕೆಕ್ಲ್ಯಾಚಿ ತಸ್ವೀರ್ ಫೇಸ್ಬುಕಾಚೆರ್
ಫಾಯ್ಸ್ ಕೆಲ್ಲಿ ಪಳೆತಾನಾ, ಪಯ್ಲೆ ಪಾವ್ಟಿಂ ಆಮ್ಚೆ
ಕೊಂಕ್ಣಿ ಕಲಾಕಾರ್ ಜೆ ಖಂಯ್ಗಿ ಲಿಪೊನ್ ಬಸ್ಲ್ಲೆ, ಎಕ್ಚ್
ಪಾವ್ಟಿಂ ಭಾಯ್ರ್ ಆಯ್ಲೆಗಾಯ್ ಮ್ಹಣ್ ಭಗ್ಲೆಂ. ಆನಿ ಹ್ಯಾ
ಸರ್ವ್ ಕೊಂಕ್ಣಿ ಕಲಾಕಾರಾಂಕ್ ಭಾಯ್ರ್ ಹಾಡ್ಚಿ ಸಕತ್ ಆನಿ
ತಾಂಕ್ ಫಕತ್ ಆಸ್ಟಿನಾಕ್ ಮಾತ್ರ್ ಆಸ್ಚಿ ಮ್ಹಣ್ಚೆಂ ಧಯ್ರ್
ಘೆತಾಂ.
ಥೊಡ್ಯಾ ದಿಸಾಂನಿ ಆಸ್ಟಿನ್ ಅಮೆರಿಕಾ ಪಾಟಿಂ ಗೆಲೊ, ಪುಣ್
ಮಾಂಯ್ಗಾಂವಾಂತ್ ಮಾಯಾಮೊಗಾಚೊ ಶಿಂವೊರ್ ವೊಂಪುನ್ ಗೆಲೊ.
ಮಂಗ್ಳುರಾಂತ್ ಆಜ್ ಪರ್ಯಾಂತ್ ಯುವಸಕ್ತೆಚೊ ಕೆದ್ನಾಂಯ್
ಉಲ್ಲೇಕ್ ಜಾತಲೊ, ಆಸ್ಟಿನಾಚೆಂ ನಾಂವ್ ಸರ್ವಾಂಚ್ಯಾಕಿ
ವಯ್ರ್ ಆಸ್ತೆಲೆಂ ಮ್ಹಳ್ಳೆಂ ಖಂಡಿತ್.
ಆಜ್ ಸಯ್ತ್, ತಾಚೆಂ ಕಾಳಿಜ್ ಧಡ್ದಡ್ತಾ ಹೆರಾಂಪಾಸತ್
ಮ್ಹಳ್ಳೆಂ ಸತ್ ಭೋವ್ ಥೊಡ್ಯಾಂಕ್ ಕಳಿತ್ ಆಸುಂಕ್ ಪುರೊ,
ತಾಕಾ ಅಪ್ಲ್ಯಾ ಸ್ವಾರ್ಥಾಕ್ ಗಳ್ಸುನ್, ತಾಕಾ ಎಕಾ ಕೊಬಾಪರಿಂ
ಪಿಳುನ್ ಪಿಳುನ್ ಸಯ್ತ್ ಉಪ್ರಾಂತ್ ಪಾಟ್ಲ್ಯಾನ್ ತಾಚಿಂಚ್
ಖೆಳ್ಕುಳಾಂ ಕರ್ತೆಲೆ ಯಥೇಶ್ಟ್ ಮಾಪಾನ್ ಭರ್ಲ್ಲ್ಯಾ
ಆಮ್ಚ್ಯಾ ಸಮಾಜೆಕ್ ಖರಿಂಚ್ ಜಾವ್ನ್ ಎಟ್ಯೆಲಾಚಿಂ ಉತ್ರಾಂ
ಛಾಬೂಕೆಚೆ ಮಾರ್ ಘಾಲ್ತಾತ್. ಆಜ್ ಆಸ್ಟಿನ್ ತಸ್ಲೊ ಎಕ್ಲೊ
ಆಸಾ ತರ್, ಹಾಚೆಂ ಕಾರಣ್ಯೀ ಭೋವ್ ಸಂಪೆಂ; ತೊ ಸೊಸುಂಕ್
ಜಾಣಾ ದೆಕುನ್ ತೊ ಚಡುನ್ಚ್ ಗೆಲ್ಲೊ. ಆನಿ ಸಮಾಜ್ ಫಕತ್ತ್
ಹಾಸುಂಕ್ ಜಾಣಾ ದೆಕುನ್ ದಿಸಾನ್ದೀಸ್ ದೆಂವೊನ್ಚ್ ವಚುನ್
ಆಸಾ. ಆಸ್ಟಿನ್ ಏಕ್ ದಿಶ್ಟಾವೊ - ಮ್ಹಜೆತಸಲ್ಯಾಚೆ ದೋನ್
ಸಬ್ಧ್ ತಾಚ್ಯಾ ತಸಲ್ಯಾಕ್ ಭಿಲ್ಕುಲ್ ಫರಕ್ ಪಡ್ಚೆತಸ್ಲೆ
ನ್ಹಯ್, ಹಾಂವೆಂ ಫುಗಾರ್ತಚ್ ತೊ ಫುಗ್ಚೊನಾ, ಹಾಂವೆಂ
ಖೆಂಡ್ತಚ್ ತೊ ಪಡ್ಚೊನಾ, ಪುಣ್ ಮ್ಹಜ್ಯಾ ಕಾಳ್ಜಾಚ್ಯಾ
ಕೊನ್ಶಾಥಾವ್ನ್ ಯೆಂವ್ಚೊ ತಾಳೊ ಹೊಚ್;
ಆಸ್ಟಿನ್ ಎಕ್ಲೊಚ್ಚ್ ಕೊಂಕ್ಣೆಕ್ ಆನಿ ಕೊಣೀ ಆಸ್ಚೊನಾ.
- ವಲ್ಲಿ ಕ್ವಾಡ್ರಸ್- ವಲ್ಲಿ ಕ್ವಾಡ್ರಸ್
[ಅಗೋಸ್ತ್, 2017] |
|
| |
|
|
|
|
valleyquadros@gmail.com |
ವಲ್ಲಿ
ಕ್ವಾಡ್ರಸ್:
1984 ಥಾವ್ನ್ ಕೊಂಕ್ಣೆಂತ್ ಮಟ್ವ್ಯೊ ಕಾಣ್ಯೊ,
ಕಾದಂಬರಿ, ಕವಿತಾ, ಲೇಖನಾಂ ಬರವ್ನ್ ಆಯಿಲ್ಲೊ, 2004
ಥಾವ್ನ್ 2011 ಮ್ಹಣಾಸರ್ ದಾಯ್ಜ್.ಕೊಮ್ ಅಂತರ್ಜಾಳಿಚೊ
ಸಂಪಾದಕ್ ಜಾವ್ನ್ ವಾವ್ರ್ ಕೆಲಾ. ಕಾಣಿಕ್, ಉದೆವ್,
ಆಮ್ಚೊ-ಯುವಕ್ ಪತ್ರಾಚ್ಯಾ ಸಂಪಾದಕೀಯ್ ಮಂಡಳಿಂತ್ ವಾವ್ರ್
ಕೆಲ್ಲ್ಯಾ ಹಾಣೆ ’ಕುವೇಯ್ಟ್ಗಾರಾಂಚೊ ಝೆಲೊ ವಿಶೇಸ್ ಅಂಕೊ’,
’ದಿವೊ-ದಾಯ್ಜ್’, ’ಮಿತ್ರ್-ದಾಯ್ಜ್’ ತಶೆಂಚ್ ಕರ್ನಾಟಕ್
ಸಾಹಿತ್ಯ್ ಅಕಾಡೆಮಿಚ್ಯಾ ’ಶೆಕ್ಡ್ಯಾಚ್ಯೊ ಮಟ್ವ್ಯೊ
ಕಾಣ್ಯೊ’ ಬುಕಾಂಚೆಂ ಸಂಪಾದನ್ ಕೆಲಾಂ. MBA
ಪದ್ಯುತ್ತರ್ ಸನದ್ ಜೊಡ್ಲಲೊ, ಪ್ರಸ್ತುತ್ IBM ಕಂಪ್ಣೆಂತ್
ಗ್ಲೋಬಲ್ ಟ್ರಾನ್ಸಿಶನ್ ಪ್ರೋಜೆಕ್ಟ್ ಮ್ಯಾನೆಜರ್ ಜಾವ್ನ್
ವಾವ್ರ್ ಕರುನ್ ಆಸಾ. |
संपादकीय
- १४. लाख कोंकणी पूण एक आसटीन |
म्हज्या साहितीक पिसायेर, एक वाचपी
जावन म्हाका भोव पसंद जाल्ली कोंकणी कादंबरी जावनासा;
एट्येलाची ’तूं बरो जा’. राकणो पत्राचेर पर्गटून येंवच्या
ह्या कादंबरेचे एकेक पात्र तशेंच सभार अमोलीक उत्रां
म्हज्या यादिंत अजून खंचून ऊरल्यांत, तांतूं दोन
अपुर्भायेचीं उत्रां जावनासात हीं;
१. रुंवांत सर्ग.
२. आमी हासुंक जाणांव, सोसुंक न्हय.
हीं दोन वाक्यीं विविंगड करून तशेंच एकाच अर्थान वाचलीं तर
एक अत्वोच मतलब उभो जाता. पूण दुस्रें वाक्य त्या वेळाच्या
पूण केदिंच बदलनातल्ल्या आयच्या काळाच्या कोंकणी समाजेच्या
चिंत्पाचेर अपुर्भायेचो आर्सो धर्ता.
समाज म्हळ्यार भांदपां न्हय, गांव, न्हंयो, बांयो, गुडे,
दोंगोर, रानां-मोलीं न्हय; मनीस. आनी मनीस, अपलें कुटाम,
आपलो सेज-संबार, आपलो गांव, राज्य, देस.... आनी जेराल
रितीन एकेका मनशाचें चिंतापच समाजीक चिंतप.
लेकनाच्या माताळ्याक आनी एट्येलाच्या उत्रांक संबंध गडसुंक
चिंतासतां तूं चिंतुंक आसाय, अषटमी परबेक आनी कासीम सायबाक
कसलोगाय संबंध म्हणून. संबंध आसा, भोव गुंडायेचो, भोव
महत्वाचो संबंध.
पूण सद्द्याक एट्येलाचें राजांव वा गिन्यान वा तत्वाक
बगलेन दवर्न, आसटिनाचेर एकोडी नदर घाल्तां.
म्हजो जल्मागांव ’अजेकार’ म्हज्या आवयचो गांव, म्हजो बापूय
बोळिये/पांगळा मुळाचो देकून भुर्ग्यापणाल्या दिसांनी म्हाका
पांगळाच्या आकयच्या घरा वचुंक आवकास मेळतालो, आनी पांगळाचो
सोभीत गांव, शिकपी/समजणेचो लोक, अनी वेवसतीत रितीन चलून
आसचें फिर्गज घराणें म्हज्या चिंत्पाक प्रभाव करुंक सकलें,
प्रत्येकपणीं कथोलीक युवसंचालन. त्ये वेळार सी.वै.एमांत
एच.आर.आळव एक भळवंत नांव, ताका आदर्श मांदून जायते मुखेली
शिर्वां-उडपी वाराड्यांत उदेल्ले. पांगळांत सयत
जे.बी.मार्टीस (आतां देवाधीन), स्टीफन आळव, ऐवी गाग,
रोनालड नज्रेत (आतां सां|लुवीस कोलेजिचो प्राध्यापक),
वायलेट आळव, वाल्टसन, मेलवीन आनी सभार हेर प्रतिभावंत
युवजणांच्या वावराक एक प्रेरण जावनासलें; एच.आर.आळव, आनी
जेदनां एच.आर.आळव अपणाक प्रेरण दिल्लो जावनासा ’आसटीन प्रभू’
एका यूव काऱ्यांत सांग्ताना पयलेपावटीं हांवें आसटीन
प्रभुचें नांव आयकलें. तेदनां तो अमेरिकांत आसलो.
अजेकार घाटाच्या पोंतार अखरेची फिर्गज,
चडताव लोक कृषी/साग्वोळी कर्न जियेतालो, देकून मोसतू पाटीं
(आर्थीक, समाजीक रितीन तशेंच चिंत्पान सयत). देकून हांवें
सयत पांगळा सी.वै.एम.चें सांदेपण घेतलें आनी थोडे तेंप
पांगळाच्या तालेंतांसवें संपर्क कर्चो आवकास लाभलो. हें
कांय १९८७-८८ इस्वेची गजाल.
२००१ इस्वेंत जेदनां हांव कुवेयटाक पावलों, तेच्च वेळार
कोंकणी अंतरजाळिजागे उदेल्ले. तांतूं प्रमूक जावन वाल्टर
नंदळिकेचो ’दायजिदुभाय.कोम’ आनी रोशन डी’सोजाचो ’म्यांगलोरियन.कोम’.
आनी त्ये संधर्भार, ल्हान जांव, व्हड जांव, कोणायच्याय
प्रगतेची खबर वाचून, हऱ्येकल्याक उल्लास पाटंवचो आसटीन
प्रभुचें नांव वाचुंक मेळ्ळें, पूण ताचेविशीं पाटल्यान
उभच्यो जिबो सयत आयकुंक मेळ्ळ्यो; ’आसटिनाक नांव जाय,
देकून पबलिसिटीक सर्वांक उल्लास पाटयता’. पूण चडावत सर्व
समाजीक संघटनां जांव, काऱ्यीं जांव, हऱ्येकल्याक तवळ
अमेरिकाथावन कुमोक कर्तालो आसटीन, पूण भोव वीपऱ्यासाची
गजाल म्हळ्यार तोंडार सयलाप उलयतलेच्च ताचे पाटल्यान ताचीं
खेळकुळां कर्ताले.
तेदोळ म्हणासर आसटिनाची म्हाका भेट जावंक नातली. पूण
’कविता’ म्हणून पानांगटले बरयिल्लें ताचें बरप सराग रितीन
पर्गट जातालें. एकादिसा ताचेर शिणून (गर्जेभायर) ताका एक
इमेयल धाडलें. तुरंत ताची जवाब आयली वाचून हांव अज्याप,
जितलें हांवें कडक्क रितीन बरयिल्लेंकी तितलेच्च मोवाळायेची
आनी खाल्ती जवाब वाचून भगलें ’निजायकी, भरल्लो कोळसो
आल्कंदना’. पूण हेर थोड्याबरीं गुप्तीं स्वार्थी इरादो
दवर्न ताचेथावन केदिंच हांवें फायदो जोडुंक ना. खरेपणीं
म्हाका ताचेर अभिमान उदेल्लो, ताचो पयलो बूक ’आडोसांतलीं
फुलां’ पर्गट करून, ताच्या हिशारएपरकार ते सर्व बूक ताच्या
भावाक पावीत करयिल्ले. पूण मुखामुखी ताका मेळचें भाग म्हाका
लाभल्लेंच ना.
२०१७ इस्वेच्या सुर्वातेर आसटीन अपूण मंगळुराक येंवचार आसां
म्हण म्हाका कळयतच, ताका ह्ये पावटीं मुखामुखी मेळुंकच
जाय म्हणून गेल्लों, ताणें आयिल्ल्या दुस्रेच्च दिसा ताका
वचून मेळ्ळों, प्रायेन, अनभोगांत, जाण्वायेन म्हज्याकी
कितलो उंचलो जावनासलो तो, लांबायेन इल्लो मटवो दिसलो तरयी,
हासो-फोकाणां आनी मोग-मयपासांत सयत ताणें लिपवंक सोधचें
दूक पळेवंक मेळ्ळें.
थोडेच्च दिसांनी ताणें भेटुंक गेल्ल्या
एकेकल्याची तस्वीर फेसबुकाचेर फायस केल्ली पळेताना, पयले
पावटीं आमचे कोंकणी कलाकार जे खंयगी लिपोन बसल्ले, एकच
पावटीं भायर आयलेगाय म्हण भगलें. आनी ह्या सर्व कोंकणी
कलाकारांक भायर हाडची सकत आनी तांक फकत आसटिनाक मात्र आसची
म्हणचें धयर घेतां.
थोड्या दिसांनी आसटीन अमेरिका पाटीं गेलो, पूण मांयगांवांत
मायामोगाचो शिंवोर वोंपून गेलो. मंगळुरांत आज परयांत
युवसक्तेचो केदनांय उल्लेक जातलो, आसटिनाचें नांव
सर्वांच्याकी वयर आसतेलें म्हळ्ळें खंडीत.
आज सयत, ताचें काळीज धडदडता हेरांपासत म्हळ्ळें सत भोव
थोड्यांक कळीत आसुंक पुरो, ताका अपल्या स्वार्थाक गळसून,
ताका एका कोबापरीं पिळून पिळून सयत उपरांत पाटल्यान ताचिंच
खेळकुळां कर्तेले यथेश्ट मापान भरल्ल्या आमच्या समाजेक
खरिंच जावन एट्येलाचीं उत्रां छाबूकेचे मार घाल्तात. आज
आसटीन तसलो एकलो आसा तर, हाचें कारणयी भोव संपें; तो
सोसुंक जाणा देकून तो चडूनच गेल्लो. आनी समाज फकत्त
हासुंक जाणा देकून दिसानदीस देंवोनच वचून आसा. आसटीन एक
दिश्टावो - म्हजेतसल्याचे दोन सब्ध ताच्या तसल्याक भिल्कूल
फरक पडचेतसले न्हय, हांवें फुगार्तच तो फुगचोना, हांवें
खेंडतच तो पडचोना, पूण म्हज्या काळजाच्या कोनशाथावन येंवचो
ताळो होच;
आसटीन एकलोच्च कोंकणेक आनी कोणी आसचोना.
- वल्ली क्वाड्रस- वल्ली
क्वाड्रस [अगोसत, २०१७] |
|
valleyquadros@gmail.com |
वल्लि
क्वाड्रस: १९८४ थाव्न कोंक्णेंत मट्व्यो काण्यो,
कादंबरि, कविता, लॆखनां बरव्न आयिल्लो, २००४ थाव्न
२०११ म्हणासर दाय्ज.कोम अंतर्जाळिचो संपादक जाव्न
वाव्र केला. काणिक, उदेव, आम्चो-युवक पत्रांनि
संपादकीय वाव्र केल्ल्या हाणे ’कुवॆय्ट्गारांचो
झेलो विशॆस अंको’, ’दिवो-दाय्ज’, ’मित्र-दाय्ज’
तशेंच कर्नाटक कोंक्णी साहित्य अकाडेमिच्या
’शेक्ड्यांच्यो मट्व्यो काण्यो’ बुकाचें संपदन केलां.
MBA शिकाप जोडुन सद्द्याक IBM कंपेनिंत ग्लॊबल
ट्रान्सिशन प्रॊजेक्ट म्यानेजर जाव्न वाव्र करुन
आसा. |
|
|
ದಾಯ್ಜ್.ಕೊಮ್ |
|
2004 ಥಾವ್ನ್
2011 ಪರ್ಯಾಂತ್ ಕಾರ್ಯಾಳ್ ಆಸ್ಲ್ಲ್ಯಾ
ದಾಯ್ಜ್.ಕೊಮ್ ಚೆರ್
ಪರ್ಗಟ್ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ
ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್
ಲಾಭಯ್ತೆಲ್ಯಾಂವ್. | |
| |
|
|