ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] ಕಾಳೊಕಾಕ್ ಯೇ (- ಲಾರೆನ್ಸ್ ವಿನೋದ್ ಬಾರ್ಬೋಜ್)

’ಉಜ್ವಾಡಾಂತ್ ಅರ್ಥ್ ಆಸಾ ಪುಣ್ ಕಾಳೊಕಾಂತ್ ಸತ್ ಆಸಾ’ ಎಕಾಚ್ ವ್ಹಳಿಂತ್ ಸಂಸಾರಾಚಿ ಕದ್ವಳ್ಳೆಲ್ಯಾ ಸಮಾಜಿಕ್/ರಾಜಕೀವ್ ವೆವಸ್ತೆಕ್ ಉತ್ರಾಯ್ತಾನಾ ಹ್ಯಾ ಕವಿಚಿ ನದರ್ ಕಿತ್ಲೆ ನಾಜೂಕ್ ತಶಿಚ್ ಪ್ರಭುದ್ದ್ ಮ್ಹಣ್ ಗಮ್ತಾ. ಆಯ್ಚ್ಯಾ ಕಾಳಾರ್ ಲಾದ್ರು-ಪೆದ್ರು ಸಯ್ತ್ ’ಕವಿತಾ’ ಮ್ಹಣ್ ಬರಯ್ತಾತ್, ಪುಣ್ ಹ್ಯಾ ’ಲಾದ್ರು/ಪೆದ್ರು’ ಪಯ್ಕಿಂತ್ ಕಿತ್ಲೆಶ್ಯಾಂಕ್ ಕವಿತಾ ಮ್ಹಳ್ಯಾರ್ ಕಿತೆಂ ಮ್ಹಣ್ ಖರೆಂಪಣಿ ಸಮ್ಜತಾ? ಅರ್ಥಾಕ್ ಅಪಾರ್ಥ್ ಕರುನ್ ಬರಂವ್ಚೆಂ ಸಯ್ತ್ ಏಕ್ ಫ್ಯಾಶನ್ ಜಾಲಾಂ. ಆನಿ ಹ್ಯಾ ’ಮತ್/ಗತ್’ ನಾತ್ಲೆಲ್ಯಾಂಚಿ ಲೆಂಡಿ ಸಯ್ತ್ ಎಕಾಮೆಕಾ ವಾಂಟುನ್ ಸಮಾಜೆಕ್ ಚ್ಯುರಾರ್ ಚ್ಯೂರ್ ಕರ್ಚೆ ಯೆಮ್ಕುಳೆ ಜೆದ್ನಾಂ ರಾಜಕೀಯ್ ಶೆತಾಂತ್ ಆಯ್ಲೆ ತರ್ ಸಮಾಜೆಚೊ ಭೊಂಗೊಸ್ತೊಳ್ ಜಾಯ್ನಾಸ್ತಾಂ ಆನಿ ಕಿತೆಂ ಜಾಯ್ತ್?

ಕವಿ ಕಾಳೊಕಾಕ್ ಯೇ ಮ್ಹಣ್ ಕಿತ್ಯಾಕ್ ಉಚಾರ್ತಾ? ಸತ್ ಮ್ಹಳ್ಯಾರ್ ಜ್ಯೆ ಕಿತೆಂ ಘಡೊನ್ ಗೆಲ್ಲೆಂ - ಆಸ್ಚೆಂ ಆಸಾ ತಶೆಂ ಆಸ್ಚೆಂ. ಪುಣ್ ಜೆದ್ನಾಂ ಆಜ್ ಜ್ಯೆ ಕಿತೆಂ ಘಡೊನ್ ಗೆಲ್ಲೆಂ ಬದ್ಲುನ್ ಕಾಲ್ ಘಡ್‌ಲ್ಲೆಂ ಕೆದಿಂಚ್ ಘಡೊಂಕ್ ನಾಸ್ಚೆಂ ಮ್ಹಣ್ ಇತಿಹಾಸ್ ಬದ್ಲುಂಚಿ ಕಾಮಾಂ ಮೆಟಾಂ ಮೆಟಾಂನಿ ಜಾವ್ನ್ ಆಸಾತ್. ಹಾಚೊ ಮುಳಾವೊ ಶೆವೊಟ್ ಅಧಿಕಾರ್ ಆನಿ ಅಬ್ಲೇಸ್. ಹಾಚೊ ಶೆವೊಟ್ ಮನ್ಶಾಪಣಾಕ್ ಲಜೆರ್ ಘಾಲ್ಚಿ ಕರ್ನಿ ಆಧಾರ್ಚೊ. ಭಾವಾಂಕ್ ಭಾವಾಂಲಾಗಿಂ ಝುಜೊಂಕ್ ಲಾಂವ್ಚೊ ಆನಿ ಗುಪ್ತಿಂ ಅಪ್ಲಿಂ ಬೊಳ್ಕಿಂ ಭರ್ಚೊ.

ಲಾರೆನ್ವ್ ವಿನೋದ್ ಬಾರ್ಬೋಜ್ ಥೊಡ್ಯಾಚ್ ವರ್ಸಾಂ ಆದಿಂ ಏಕ್ ವಾಚ್ಪಿ ಜಾವ್ನ್ ಅಪ್ಲಿಂ ಬರ್ಪಾಂ ಧಾಡ್ನ್ ಒಳ್ಕಿಚೊ ಜಾಲ್ಲೊ ಪುಣ್ ಹಾಚ್ಯಾ ಬರ್ಪಾಂನಿ ಆಸ್ಚಿ ಸಕತ್ ಮ್ಹಜ್ಯಾ ದೊಳ್ಯಾಂಕ್ ದಿಶ್ಟಿಕ್ ಪಡಾನಾಸ್ತಾಂ ಗೆಲಿನಾ. ಹ್ಯಾ ಥೊಡ್ಯಾಚ್ ವರ್ಸಾಂನಿ ತಾಚೆಂ ವಾಚಾಪ್ ಕಿತ್ಲೆಂ ಪ್ರಭುದ್ದ್ ಮ್ಹಳ್ಳೆಂ ತಾಚಿಂ ಎಕೇಕ್ ಕವಿತಾ ವಾಚ್ತಾನಾ ಗಮ್ತಾ. ಹಿ ಕವಿತಾ ಕಾಂಯ್ ಗಜಾಲಿ ಆಟಾಪ್ತಾತ್ ಪುಣ್ ಸಂವೇದನ್‌ಶೀಲ್ ವೆಕ್ತಿಕ್ ಜೊ ’ಕವಿತಾ’ ಮ್ಹಳ್ಯಾರ್ ಕಿತೆಂ ಮ್ಹಣ್ ಸಮ್ಜತೆಲ್ಯಾಕ್ ಹಿ ಕವಿತಾ ಕಾಂಯ್ ಪರತ್ ಪರತ್ ವಾಚುಂಕ್ ಲಾಯ್ತಾ.

- ಸಂ

[ಕವಿತಾ] ಕಾಳೊಕಾಕ್ ಯೇ (- ಲಾರೆನ್ಸ್ ವಿನೋದ್ ಬಾರ್ಬೋಜ್)

ಕಾಳೊಕಾಕ್ ಯೇ ಕಾಳೊ ಗೊರೊ ಲಾಂಬ್ ಮೊಟ್ವೊ ಉಂಚ್ ನೀಚ್ ಗೇಸ್ತ್ ದುಬ್ಳೊ ದಾದ್ಲೊ ಬಾಯ್ಲ್ ವಾ ಹಿಜ್ಡೊ ಕಿತೆಂಚ್ ಫರಕ್ ಪಡಾನಾ ಕಾಳೊಕಾಕ್ ಯೇ; ಉಲವ್ಯಾಂ ಮನ್ಶ್ಯಾಪಣ್ ದಿಸ್ತಾ; ಉಜ್ವಾಡಾಂತ್ ಅರ್ಥ್ ಅಸಾ ಕಾಳೊಕಾಂತ್ ಸತ್ ಅಸಾ ಗಾವ್ಪಿ ವಾ ಗಾಯನಾಂ ಪುರಸ್ಕಾರ್ ವಾ ಇನಾಮಾಂ ಪ್ರಾಯ್ ಅನಿ ಸೊಭಾಯ್ ಕಸ್ಲೊಚ್ ಫರಕ್ ಪಡಾನಾ ಕಾಳೊಕಾಕ್ ಯೇ; ಗಾವ್ಯಾಂ ತಾಳ್ಯಾಚೊ ಆವಾಜ್ ನಾ ಸಂಗೀತ್ ಆಯ್ಕಾತಾ ಹಾಂಗಾ ಯೇ ಕವಿ, ಬರಯ್ ಕವಿತಾ ಲಿಪಿ ಬೊಲಿ ರೀತ್ ಶೈಲಿ ಭಾಸ್ ಬರೀ ಸಮ್ಜಾತಾ ಕೊಣಾಕ್‌ಚ್ ಫರಕ್ ಪಡಾನಾ ಉಜ್ವಾಡಾಂತ್ಲೊ ಬಾಜಾರ್ ಸೊಡ್ ಯೇ ಕಾಳೊಕಾತ್ಲ್ಯಾ ಗೋಶ್ಟಿಂಕ್ ಸರ್ಗಾಚೊ ಅನ್ಬೋಗ್ ಜಾತಾ ಹಾಂವ್ ಕಾಳೊಕ್; ಜಾಲ್ಯಾರ್ ತುಂ ಚಂದ್ರ್ ನೆಕೆತ್ರ್ ಕಾಜುಲೊ ಸದಾಂಚ್ ಸಾಗಾಂತ್ ದಿಂವ್ಚಿ ಸಾವ್ಳಿ ಪ್ರಕಾಸ್ ಪರ್ಜಳ್ ಸೊಸಾನಾ ತೀಕ್ಷ್ಣತಾ ಬಂದ್ ಜಾತಾತ್ ಪಳೆ ಕಾಳೊಕಾಕ್ ಯೇ; ದಿಸ್ತಾ ಹಾಂಗಾ ಉಗ್ತೆ ಅಸ್ಚೆ ದೊಳೆ **** - ಲಾರೆನ್ಸ್ ವಿನೋದ್ ಬಾರ್ಬೋಜ್** [ಎಪ್ರಿಲ್, 2025]

	ಲಾರೆನ್ಸ್ ವಿನೋದ್ ಬಾರ್ಬೋಜ್: ಶಿರ್ವಾಂ ಗಾಂವಾಂತ್ ಜಲ್ಮುನ್ ಇಜ್ನೆರಾಚೆಂ ಶಿಕಪ್ ಜೊಡುನ್ ಸದ್ದ್ಯಾಕ್ ಮಾಂಚೇಸ್ಟರ್ ಯು.ಕೆ.ಂತ್ ಅಪ್ಲ್ಯಾ ಕುಟ್ಮಾಸವೆಂ ವಸ್ತಿ ಕರ್ಚೊ ಹೊ ಬರೊ ವಾಚ್ಪಿ ತಶೆಂಚ್ ಸಾಹಿತಿಕ್ ಅಭಿಮಾನಿ ಜಾವ್ನಾಸಾ. ಕವಿತಾ, ಲೇಖನಾಂ ತಶೆಂಚ್ ಸಮೀಕ್ಶಾ ಬರವ್ನ್ ಆಸ್ಚಾ ಹಾಣೆಂ ಡಿಜಿಟಲ್ ಕೊಂಕಣಿಂತ್ ಸಯ್ತ್ ವಾವ್ರ್ ಕರುನ್ ಆಸಾ.
[kovita] Kallokak Ye* (- Lawrence V Barboza)*
'Ujvaddant orth asa punn Kallokant sot asa’ ekach vhollint somsarachi kodvoll'llelea somajik/razokivo veustek utraitana hea kovichi nodor kitle nazuk toxich probhud'd mhonn gomta. Aichea kallar ladru-pedru soit ’kovita’ mhonn boroitat, punn hea ’Ladru/Pedru’ poikint kitlexeank kovita mhollear kitem mhonn khoremponni somzota? orthak oparth korun boromvchem soit ek feaxon zalam. Ani hea ’mot/got’ natleleanchi lenddi soit ekameka vanttun somajek chyurar chyur korche yemkulle jednam razoki-i xetant aile tor somajecho bhongostoll zainastam ani kitem zait? Kovi kallokak ye mhonn kiteak ucharta? sot mhollear jye kitem ghoddon gel'lem - aschem asa toxem aschem. Punn jednam az jye kitem ghoddon gel'lem bodlun kal ghodd‌l'lem kedinch ghoddonk naschem mhonn itihas bodlunchi kamam mettam mettamni zaun asat. Hacho mullavo xevott odhikar ani obles. Hacho xevott monxaponnak lojer ghalchi korni adharcho. Bhavank bhavamlagim zhuzonk lamvcho ani guptim oplim bollkim bhorcho. Lawence Vinod Barboza thoddeach vorsam adim ek vachpi zaun oplim borpam dhaddn ollkicho zal'lo punn hachea borpamni aschi sokot mhojea dolleank dixttik poddanastam gelina. Hea thoddeach vorsamni tachem vachap kitlem probhud'd mholl'llem tachim ekek kovita vachtana gomta. Hi kovita kaim gozali attaptat punn somvedon‌xil vektik zo ’kovita’ mhollear kitem mhonn somzoteleak hi kovita kaim porot porot vachunk laita. - Som
[kovita] Kallokak Ye* (- Lawrence V Barboza)*
Kallokak Ye Kallo goro lamb mottvo unch nich gest dubllo dadlo bail va hijddo kitench forok poddana kallokak ye; uloveam monxeaponn dista; ujvaddant orth osa kallokant sot osa Gaupi va gainam puroskar va inamam prai oni sobhai kosloch forok poddana kallokak ye; gaveam talleacho avaz na songit aikata hanga Ye kovi, boroi kovita lipi boli rit xoili bhas bori somzata konnak‌ch forok poddana ujvaddantlo bazar sodd ye kallokatlea goxttink sorgacho onbog zata Hamv kallok; zalear tum chondr neketr kazulo sodanch sagant dimvchi saulli prokas porzoll sosana tikxnnota bond zatat polle kallokak ye; dista hanga ugte osche dolle **** - Lawrence V Barboza.** [Apr, 2025]

	Lawrence V Barboza, Manchester, UK: Mongllur mullacho Lawrence Vinod Barboza sod'deak U.K.ntlea Manchesterant vosti korun ascho ek boro vachpi zaunasa. Konkonnint lekonam boroileant toxench konkonni kareamni kriall riticho vaur korun ascho. Kothadaizant hannem ek kanniechem sadar‌ponn kelam.
[कविता] काळोकाक ये (- लारेन्स वी. बारबोज)
’उज्वाडांत अर्थ आसा पूण काळोकांत सत आसा’ एकाच व्हळिंत संसाराची कद्वळ्ळेल्या समाजीक/राजकीव वेवसतेक उत्रायताना ह्या कविची नदर कितले नाजूक तशीच प्रभुद्द म्हण गमता. आयच्या काळार लाद्रू-पेद्रू सयत ’कविता’ म्हण बरयतात, पूण ह्या ’लाद्रू/पेद्रू’ पयकिंत कितलेश्यांक कविता म्हळ्यार कितें म्हण खरेंपणी समजता? अर्थाक अपार्थ करून बरंवचें सयत एक फ्याशन जालां. आनी ह्या ’मत/गत’ नातलेल्यांची लेंडी सयत एकामेका वांटून समाजेक च्युरार च्यूर कर्चे येमकुळे जेदनां राजकीय शेतांत आयले तर समाजेचो भोंगोसतोळ जायनासतां आनी कितें जायत? कवी काळोकाक ये म्हण कित्याक उचार्ता? सत म्हळ्यार ज्ये कितें घडोन गेल्लें - आसचें आसा तशें आसचें. पूण जेदनां आज ज्ये कितें घडोन गेल्लें बदलून काल घड‌ल्लें केदिंच घडोंक नासचें म्हण इतिहास बदलुंची कामां मेटां मेटांनी जावन आसात. हाचो मुळावो शेवोट अधिकार आनी अबलेस. हाचो शेवोट मनशापणाक लजेर घाल्ची कर्नी आधार्चो. भावांक भावांलागीं झुजोंक लांवचो आनी गुप्तीं अपलीं बोळकीं भर्चो. लारेन्व विनोद बारबोज थोड्याच वर्सां आदीं एक वाचपी जावन अपलीं बर्पां धाडन ओळकिचो जाल्लो पूण हाच्या बर्पांनी आसची सकत म्हज्या दोळ्यांक दिश्टीक पडानासतां गेलिना. ह्या थोड्याच वर्सांनी ताचें वाचाप कितलें प्रभुद्द म्हळ्ळें ताचीं एकेक कविता वाचताना गमता. ही कविता कांय गजाली आटाप्तात पूण संवेदन‌शील वेक्तीक जो ’कविता’ म्हळ्यार कितें म्हण समजतेल्याक ही कविता कांय परत परत वाचुंक लायता. - सं
[कविता] काळोकाक ये (- लारेन्स वी. बारबोज)
काळोकाक ये काळो गोरो लांब मोटवो उंच नीच गेसत दुबळो दादलो बायल वा हिजडो कितेंच फरक पडाना काळोकाक ये; उलव्यां मनश्यापण दिसता; उज्वाडांत अर्थ असा काळोकांत सत असा गावपी वा गायनां पुरसकार वा इनामां प्राय अनी सोभाय कसलोच फरक पडाना काळोकाक ये; गाव्यां ताळ्याचो आवाज ना संगीत आयकाता हांगा ये कवी, बरय कविता लिपी बोली रीत शैली भास बरी समजाता कोणाक‌च फरक पडाना उज्वाडांतलो बाजार सोड ये काळोकातल्या गोश्टिंक सर्गाचो अनबोग जाता हांव काळोक; जाल्यार तूं चंद्र नेकेत्र काजुलो सदांच सागांत दिंवची सावळी प्रकास पर्जळ सोसाना तीक्ष्णता बंद जातात पळे काळोकाक ये; दिसता हांगा उग्ते असचे दोळे **** - लारेन्स वी. बारबोज.** [एप्रील, २०२५]

	लारेन्स वी. बारबोज, म्यांचेसटर, यू.के.: मंगळूर मुळाचो लारेन्स विनोद बारबोज सद्द्याक यू.के.ंतल्या म्यांचेसटरांत वसती करून आसचो एक बरो वाचपी जावनासा. कोंकणिंत लेकनां बरयल्यांत तशेंच कोंकणी काऱ्यांनी क्रियाळ रितिचो वावर करून आसचो. कथादायजांत हाणें एक काणियेचें सादार‌पण केलां.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.