[ಖಬರ್] ಸಿರಿವಂತಾಚ್ಯಾ ಸಾಹಿತ್ಯಾಚೆರ್ ಅಧ್ಯಯನಾಚೆಂ ಕಥಾಪಾಠ್ ಶಿಂಕಳಿಚೆಂ ಉಗ್ತಾವಣ್

1 ಜುಲಾಯ್ 2023: ಆಶಾವಾದಿ ಪ್ರಕಾಸನ್ ಆನಿ ಧೆಂಪೆ ಕೊಲೆಜ್ ಗೊಂಯ್ ಹಾಂಚ್ಯಾ ಜೋಡ್ ಪಾಲಂವಾಖಾಲ್, ನಾಮ್ನೆಚೊ ಕೊಂಕಣಿ ಕಥಾಕಾರ್, ವಾವ್ರಾಡಿ ಸಿರಿವಂತ್ (ಜೆರೊಮ್ ಸಿರಿಲ್ ವೇಗಸ್) ಹಾಚ್ಯಾ ಸಾಹಿತ್ಯಾಚೆರ್ ಅಧ್ಯಯನ್ ಚಲಂವ್ಚ್ಯಾ ಇರಾದ್ಯಾನ್ ಚಲುಂಕ್ ಆಸ್ಚ್ಯಾ ರಾಶ್ಟ್ರೀಯ್ ಮಟ್ಟಾಚ್ಯಾ ವೆಬಿನಾರಾಂಚೆಂ ’ಕಥಾಪಾಠ್ ಚೊವ್ತಿ ಶಿಂಕಳೆಚೆಂ’ ಉಗ್ತಾವಣ್ ಸನ್ವಾರಾ (1 ಜುಲಾಯ್ 2023) ಸಾಂಜೆರ್ 4:30 ವೊರಾರ್ ಜಾಲೆಂ.

ಧೆಂಪೆ ಕೊಲೆಜಿಂತ್ ’ಭಾರತೀಯ್ ಭಾಸಾಂಚಿ ಮುಖೇಸ್ತ್’ ಜಾವ್ನಾಸ್ಚಾ ಪ್ರೊಫೆಸರ್ ಅಂಜು ಸಾಖರ್‌ದಾಂಡೆನ್ ಒಳೊಕ್ ಕರುನ್ ಯೆವ್ಕಾರಾಚೆಂ ಉಲವ್ಪ್ ಕರ್ತಚ್ ಧೆಂಪೆ ಕೊಲೆಜಿಚಿ ಪ್ರಿನ್ಸಿಪಾಲ್, ಪ್ರೊಫೆಸರ್ ದೊ|ವೃಂದಾ ಪಿ. ಬೋರ್ಕರಾನ್ ಅಪ್ಲ್ಯಾ ಉಗ್ತಾವಣ್ ಉಲಪ್ವಾಂತ್ ’ಕೊಂಕಣಿ ಭಾಸ್, ಕೊಂಕಣಿ ಸಾಹಿತ್ಯ್ ಜೆಂ ಹೆರ್ ಲಿಪಿ-ಬೊಲಿಂನಿ ಆಸಾ, ತಾಚೊ ಅಭ್ಯಾಸ್ ಕರ್ಚಿ ಗರ್ಜ್ ಆಸಾ ಆನಿ ಶೈಕ್ಷಣಿಕ್ ರಿತಿಚ್ಯಾ ಹ್ಯಾ ಕಾಮಾಸಾಳಾಂನಿ ಭಾಗ್ ಘೆವ್ನ್ ಫಾಯ್ದೊ ಜೊಡ್ಚ್ಯಾ ವಿಧ್ಯಾರ್ಥಿಂಚಿ ತಶೆಂಚ್ ಅಸಲಿಂ ಉಪಕ್ರಮಾಂ ಮಾಂಡುನ್ ಹಾಡುಂಕ್ ಸಹಭಾಗಿತ್ವ್ ಘೆತ್ಲೆಲ್ಯಾ ಸಮೇಸ್ತಾಂಚಿ ಥೊಕ್ಣಾಯ್ ಕೆಲಿ.

ಕಥಾಪಾಠಾಚ್ಯಾ ತೀನ್ ಶಿಂಕಳೆಂಚೊ ತಶೆಂಚ್ ಕಥಾಪಾಠ್ ಅಧ್ಯಯನ್ ವೆಬಿನಾರಾಂತ್ಲ್ಯಾ ಪ್ರಬಂಧಾಂಚ್ಯಾ ಪುಸ್ತಕಾಂಚೊ ಮೊಟ್ವೊ ವಿವರ್ ದಿವುನ್ ವಲ್ಲಿ ಕ್ವಾಡ್ರಸಾನ್ ಸಿರಿವಂತಾಚಿ ಸವಿಸ್ತಾರ್ ಒಳೊಕ್ ತಶೆಂಚ್ ’ಮಮಶಕ್ತಿ ಕಮಲನಾಥ’ (ದೇವ್‌ಚ್ ಮ್ಹಜಿ ಸಕತ್) ಧ್ಯೇಯಾಖಾಲ್ ೧೯೬೬ ಇಸ್ವೆಂತ್ ಸಿರಿವಂತಾನ್ ಸುರು ಕೆಲ್ಲ್ಯಾ ಸಾಳಕ್ ಪ್ರಕಾಶನಾಚ್ಯಾ 88 ಪುಸ್ತಕಾಂಚಿ ಒಳೊಕ್ ಕರುನ್ ಹೆಚ್ ಮಯ್ನ್ಯಾಂತ್ ಚಲುಂಕ್ ಆಸ್ಚ್ಯಾ ವೆಬಿನಾರಾಂಚೊ ವಿವರ್ ದಿಲೊ.

8 ಜುಲಾಯ್ (ಸಾಂಜೆರ್ 4:30 ವೊರಾಂಕ್): ಸಿರಿವಂತಾಚಿ ಸಾಹಿತ್ಯಿಕ್ ಒಳೊಕ್ ಆನಿ ಸಾಳಕ್ ಪ್ರಕಾಶನ್ (ಚಲಯ್ತಾ: ವಲ್ಲಿ ಕ್ವಾಡ್ರಸ್)

15 ಜುಲಾಯ್ (ಸಾಂಜೆರ್ 4:30 ವೊರಾಂಕ್): ಸಿರಿವಂತಾಚ್ಯಾ ಕಥೆಂನಿ ಅಸ್ತುರಿಚೊ ಪಾತ್ರ್ (ಚಲಯ್ತಾ: ಫೆಲ್ಸಿ ಲೋಬೊ ದೆರೆಬೈಲ್)

22 ಜುಲಾಯ್ (ಸಾಂಜೆರ್ 4:30 ವೊರಾಂಕ್): ಸಿರಿವಂತಾಚಿಂ (ಜೆರಿ ಲುವಿಸ್) ಹಾಸ್ಯ್ ಬರ್ಪಾಂ (ಚಲಯ್ತಾ: ಫ್ಲಾವಿಯಾ ಆಲ್ಭುಕರ್ಕ್)

29 ಜುಲಾಯ್ (ಸಾಂಜೆರ್ 4:30 ವೊರಾಂಕ್): ಕಥಾಪಾಠ್ ಚೊವ್ತ್ಯಾ ಶಿಂಕಳೆಚೆಂ ಸಂಪ್ಣೆಚೆಂ ವೆಬಿನಾರ್

ಪ್ರಮುಖ್ ಉಲವ್ಪಿ ಮಾನೆಸ್ತ್ ಸ್ಟೀಫನ್ ಹೆರಾಲ್ಡ್ ಮಸ್ಕರೇನ್ಹಸ್ (ಹೇಮಾಚಾರ್ಯ) ಅಪ್ಲ್ಯಾ ಉಲವ್ಪಾಂತ್ ಸಿವಿರಂತಾಚಿ, ತಾಚ್ಯಾ ವೆಕ್ತಿತ್ವಾಚಿ ಖೊಲಾಯೆನ್ ಒಳೊಕ್ ಕರುನ್ ದಿವುನ್ "ಸಿರಿವಂತ್ ಏಕ್ ವೆಕ್ತಿ ನ್ಹಯ್, ಬಗಾರ್ ಏಕ್ ಸಂಸ್ಥೊ ಜಾವ್ನಾಸ್ಲೊ ಆನಿ ಕೊಂಕಣಿ ವಾವ್ರ್ ಕರ್ತೆಯಾಂಕ್ ಏಕ್ ದೇಕ್ ಜಾವ್ನ್ ಅಪ್ಲೆಂ ಜಿವಿತ್‌ಚ್ ಕೊಂಕಣಿಕ್ ಸಮರ್ಪಿತ್ ಕೆಲ್ಲೊ ಮಹಾನ್ ಸಾಹಿತಿ/ವಾವ್ರಾಡಿ" ಮ್ಹಣಾಲೊ. ಅನ್ಯೇಕ್ ಉಲವ್ಪಿ ಮಾ|ಪ್ರತಾಪ್ ನಾಯ್ಕಾನ್ ಸಿರಿವಂತಾಸವೆಂ ಅಪ್ಣಾಕ್ ಆಸ್‌ಲ್ಲ್ಯಾ ಖಾಸ್ ಇಸ್ಟಾಗತೆವಿಶಿಂ ಉಲವ್ನ್, "ಸಿರಿವಂತ್ ತಸಲೊ ವಾವ್ರಾಡಿ ಕೊಂಕಣಿಂತ್ ಉದೆವ್ನ್ ಆಯಿಲ್ಲೆವರ್ವಿಂ ಕೊಂಕಣಿ ಭಾಸೆಚ್ಯಾ ಸಮಗ್ರ್ ಗಿರೇಸ್ತ್‌ಕಾಯ್ ಜೊಡುಂಕ್ ಸಕ್ಲ್ಯಾಂವ್" ಮ್ಹಣಾಲೊ. ಸಯ್ರಿಂ ಜಾವ್ನ್ ಹಾಜರ್ ಆಸ್ಲೆಲ್ಯಾ ದೊ|ಆಸ್ಟಿನ್ ಪ್ರಭು, ಕಾಣಿಕ್ ಪತ್ರಾಚೊ ಸಂಪಾದಕ್ ಮಾನೆಸ್ತ್ ಅವಿಲ್ ರಾಸ್ಕಿನ್ಹಾ ಆನಿ ಮಾನೆಸ್ತ್ ಜೆರಾಲ್ಡ್ ವಿ. ಕಾರ್ಲೊ ಹಾಣಿಂ ಸಿರಿವಂತಾವಿಶಿಂ ಅಪ್ಲಿಂ ಭಗ್ಣಾಂ ಆನಿ ವಿಚಾರ್ ಉಚಾರ್ಲೆ.

ವಲ್ಲಿ ಕ್ವಾಡ್ರಸಾನ್ ಧಿನ್ವಾಸ್ ಪಾಠಯ್ಲೆ.

 ಖಬರ್: ಆಮ್ಚೊ ಭಾತ್ಮಿ

[खबर] सिरिवंताच्या साहित्याचेर अध्ययनाचें कथापाठ शिंकळिचें उग्तावण

1 July 2023: Ashawadi Prakashan ani Dhempe College Gõy hanchea zodd palomvakhal, namnecho konkonni kothakar, vauraddi Sirivont (Jerom' Cyril Veigas) hachea sahiteacher odhyoin cholomvchea iradean cholunk aschea raxttri-i mott'ttachea vebinaranchem ’Kothapatth chouti xinkollechem’ ugtaunn sonvara (1 July 2023) sanjer 4:30 vorar zalem. Dhempe collegint ’bharoti-i bhasanchi mukhest’ zaunascha profesor Anju Sakhar‌danden ollok korun yeukarachem uloup kortoch Dhempe Collegichi prinsipal, Profesor Do|Vrinda P. Borkeran oplea ugtaunn ulopvant ’Konkonni bhas, Konkonni sahity jem her lipi-bolimni asa, tacho obheas korchi gorz asa ani xoikxonnik ritichea hea kamasallamni bhag gheun faido zoddchea vidhearthinchi toxench osolim upokromam manddun haddunk sohobhagitv ghetlelea somestanchi thoknnai keli.

Kothapatthachea tin xinkollencho toxench kothapatth odhyoin vebinarantlea probondhanchea pustokancho mottvo vivor divun Valley Quadrosan Sirivontachi sovistar ollok toxench ’Momoxokti Komolonatho’ (Devo‌ch Mhoji Sokot) dhyeyakhal 1966 isvent Sirivontan suru kel'lea Sallok Prokaxonachea 88 pustokanchi ollok korun hech moineant cholunk aschea vebinarancho vivor dilo.

8 July (sanjer 4:30 vorank): Sirivontachi sahitk ollok ani sallok prokaxon (choloita: Valley Quadros)
15 July (sanjer 4:30 vorank): Sirivontachea kothemni osturicho patr (choloita: Felcy Lobo Derebail)
22 July (sanjer 4:30 vorank): Sirivontachim (jeri luvis) hasy borpam (choloita: Flavia Albuquerque)
29 July (sanjer 4:30 vorank): Kothapatth choutea xinkollechem sompnnechem vebinar

promukh uloupi manest Stephen Herald Mascarenhas (Hemacharya) oplea uloupant Sivirontachi, tachea vektitvachi kholayen ollok korun divun "Sirivont ek vekti nhoi, bogar ek somstho zaunaslo ani Konkonni vaur korteyank ek dek zaun oplem jivit‌ch Konkonnik somorpit kel'lo mohan sahiti/vauraddi" mhonnalo. Onyek uloupi Ma|Pratap Naikan Sirivontasovem opnnak as‌l'lea khas isttagotevixim uloun, "Sirivont tosolo vauraddi konkonnint udeun ayil'leurvim konkonni bhasechea somogr girest‌kai zoddunk sokleamv" mhonnalo. Soirim zaun hazor aslelea Do|Austin Prabhu, Kannik potracho sompadok manest Avil Rasquinha ani manest Gerald V. Carlo hannim Sirivontavixim oplim bhognnam ani vichar ucharle.

Valley Quadrosan dhinvas patthoile.