|
ಆಶಾವಾದಿ ಪ್ರಕಾಶನ್ ಆನಿ ಉಜ್ವಾಡ್ ಪಂದ್ರಾಳೆಂ ಹಾಂಚ್ಯಾ
ಜೋಡ್ ಪಾಲಂವಾಖಾಲ್ ಕೊಂಕಣಿ ಮೊಟ್ವ್ಯಾ ಕಥೆಂಚೆರ್ ಕೆಲ್ಲೆಂ
ರಾಶ್ಟ್ರೀಯ್ ಪಾಂವ್ಡಾಚೆಂ ವೆಬಿನಾರ್ 2 ಅಕ್ತೋಬರ್
(ಆಯ್ತಾರಾ) ಸಾಂಜೆರ್ 4 ಥಾವ್ನ್ 6 ಪರಯಾಂತ್ ಚಲ್ಲೆಂ.
ಬಾಯ್ ದಕ್ಶಿತಾ ಸಲ್ಗಾಂವ್ಕಾರ್ ಹಿಣೆಂ ಸರ್ವಾಂಕ್
ಯೆವ್ಕಾರ್ ಮಾಗುನ್ ಕಥಾವಿಹಾನ್ ಆಯ್ಚ್ಯಾ ಕೊಂಕಣಿ
ಸಾಹಿತಿಕ್ ವರ್ತುಲಾಂತ್ ಕಿತ್ಯಾಕ್ ಗರ್ಜೆಚೆಂ ಮ್ಹಣುನ್
ವಿವರಾವ್ನ್ ಹೆಂ ಸತ್ರ್ ಚಲಯ್ಲೆಂ.
ಉಧ್ಯಮಿ ತಶೆಂಚ್ ಕೊಂಕಣಿ ಗಾವ್ಪಿ, ಅಭಿನೇತಾ
ಮಾನೆಸ್ತ್ ಜೋಸೆಫ್ ಮಥಾಯಸಾನ್ ಉಗ್ತಾವಣ್ ಕರುನ್ ಕೊಂಕಣಿ
ಸಾಹಿತ್ಯಾಕ್ ಡಿಜಿಟಲ್ ಮಾಧ್ಯಮಾಂತ್ ಉಂಚಾಯೆಚೊ ಪಾಂವ್ಡೊ
ದಿಂವ್ಚೆದಿಶೆನ್ ವಾವ್ರ್ ಕರ್ಚ್ಯಾ ಸಮೇಸ್ತಾಂಕ್ ಉಲ್ಲಾಸ್
ಪಾಠಯ್ಲೆ.
ಉಜ್ವಾಡ್ ಪಂದ್ರಾಳ್ಯಾಚ್ಯಾ ಸಂಪಾದಕಾನ್
ಮಾ|ಬಾ|ರೋಯ್ಸನ್ ಫೆರ್ನಾಂಡಿಸಾನ್ ಯೆವ್ಕಾರ್ ಉಲವ್ಪ್
ಕರುನ್, ಕೊಂಕಣಿ ಸಾಹಿತ್ಯಾಂತ್ ಮೊಟ್ವ್ಯಾ ಕಥೆಂಚೆರ್
ವಾವ್ರ್ ಕರ್ಚಿ ಬರಿಚ್ ಗರ್ಜ್ ಆಸಾ ಆನಿ ತ್ಯಾ ದಿಶೆನ್
ರಾಶ್ಟ್ರ್ ಪಾಂವ್ಡಾರ್ ಏಕ್ ವೆದಿ ತಯಾರ್ ಕರ‍್ಚ್ಯಾಂತ್
ಕಥಾಪಾಠ್ ಮಿಸಾಂವ್ ಖಂಡಿತ್ ಸುಫಳ್ ಜಾಲಾಂ ಮ್ಹಳ್ಳೆಂ
ಪಾಟ್ಲ್ಯಾ ತೀನ್ ವರ್ಸಾಂನಿ ಮಾಂಡುನ್ ಹಾಡ್ಲೆಲ್ಯಾ ತೀನ್
ಕಥಾಪಾಠ್ ಶಿಂಕಳೆಂಚ್ಯಾ ಅಟ್ರಾ-ವೀಸ್ ವೆಬಿನಾರಾಂನಿ ರುಜು
ಕೆಲಾಂ ಆನಿ ಎಕಾ ಪ್ರಾಂತ್ಯಾಕ್ ಮಾತ್ ಸೀಮಿತ್ ಜಾವ್ನ್
ನಾಸ್ತಾನಾ ಹೆರ್ ಪ್ರಾಂತ್ಯಾಚ್ಯಾ ಕಥಾಕಾರಾಂಚಿ ವಳೊಕ್ ಆನಿ
ತಾಂಚ್ಯಾ ಸಾಹಿತ್ಯಾಚೆಂ ಅಭ್ಯಾಸ್ ಕರುಂಕ್ ಆಮ್ಕಾಂ
ಮೆಳ್‌ಲ್ಲಿ ಸಂಧಿ ಖಂಡಿತ್ ಜಾವ್ನ್ ಯುವಜಣಾಂಕ್ ಲಾಭ್‌ಲ್ಲೊ
ಏಕ್ ವರ್ತೊ ಆವ್ಕಾಸ್ ಮ್ಹಣಾಲೆ.
ಬಾಬ್ ಶಯ್ಲೇಂದ್ರ ಮೆಹ್ತಾನ್ ದೋನ್ ಅಧ್ಯಯನ್
ಪುಸ್ತಕಾಂಚಿ ಮೊಟ್ವ್ಯಾ ಪರಿಚಯ್ ಕರುನ್ ಕಶೆಂ ಹಿಂ ದೋನ್
ಪುಸ್ತಕಾಂ ದೋನ್ ಲಿಪಿಂನಿ (ಕನ್ನಡ್ ಆನಿ ನಾಗರಿ) ಆಸುನ್
ಚ್ಯಾರ್ ಪುಸ್ತಕಾಂ ಜಾತಾತ್ ಮ್ಹಣಾಲೊ.
’ಚಲ್ ದೋನ್ ಚಂದ್ರಾಂಕ್’ (ಸಮಕಾಳೀನ್
ಕಥಾಕಾರ್ ಬಾಬ್ ಎಡ್ವಿನ್ ಜೆ.ಎಫ್.ಡಿ’ಸೋಜ್ ಆನಿ ಬಾಬ್
ವಲ್ಲಿ ವಗ್ಗಚ್ಯಾ ಚ್ಯಾ-ಚ್ಯಾರ್ ಕಥೆಂಚೆರ್ ವಲ್ಲಿ
ಕ್ವಾಡ್ರಸಾನ್ ಕೆಲ್ಲೆಂ ತುಲನಾತ್ಮಕ್ ಅಭ್ಯಾಸ್ ಪುಸ್ತಕ್
ಡಿಜಿಟಲ್ ವಿಮೋಚನ್ ಕರುನ್) ವಿಶಿಂ ಅಪ್ಲ್ಯಾ ಪ್ರಸ್ತಾವಿಕ್
ಉಲವ್ಪಾಂತ್ ಉಲಯಿತ್ತ್ ದೊ|ಪ್ರಕಾಶ್ ಪೆರಿಯಂಕರ್ (ಗೊಂಯ್
ವಿಧ್ಯಾಪೀಠಾಚ್ಯಾ ಕೊಂಕಣಿ ವಿಭಾಗಾಚೊ ಆಧ್ಲೊ ಮುಖೆಸ್ತ್
ತಶೆಂಚ್ ರಾಶ್ಟ್ರ್ ಪುರಸ್ಕಾರ್ ಜಿಕ್ಪಿ ಕಥಾಕಾರ್) ಹಾಣಿಂ
ಆಮಿ ಅಸಲೊ ಕೊಂಕಣಿ ವಾವ್ರ್ ಎಕಾಮನಾನ್ ಕೆಲೊನಾ ತರ್
ಖರೆಂಚ್ ಜಾವ್ನ್ ಆಮಿ ಆಮ್ಚ್ಯಾ ವರ್ತುಲಾಭಿತರ್ ಬೊನ್ಸಾಯ್
ಜಾವ್ನ್ ಉರ್ತಲ್ಯಾಂವ್ ಮ್ಹಣಾಲೊ.
’ಕಥಾವಿಹಾನ್’ (ಸಮಕಾಳೀನ್
ಕಥಾಕಾರಾಂಚ್ಯಾ ಕಥೆಂಚೆರ್ ಕೆಲ್ಲ್ಯಾ ಸಾತ್ ತುಲನಾತ್ಮಕ್
ಅಭ್ಯಾಸ್ ಲೇಖನಾಚ್ಯಾ ಪುಸ್ತಕಾಕ್ ಡಿಜಿಟಲ್ ವಿಮೋಚನ್
ಕರುನ್ ಹ್ಯಾ ಪುಸ್ತಕಾಚೆರ್ ಉಲಯಿಲ್ಲ್ಯಾ ದೊ|ಕಿರಣ್
ಬುಡ್ಕುಲೊ (ಗೊಂಯ್ ವಿಧ್ಯಾಪೀಠಾಚ್ಯಾ ಇಂಗ್ಲಿಶ್ ವಿಭಾಗಾಚಿ
ಆಧ್ಲಿ ಮುಖೇಸ್ತ್) ಹಿಣೆಂ ಉಲವ್ನ್ ಖರೆಂಚ್ ಕೊಂಕಣಿಂತ್
ಸಯ್ತ್ ಉಂಚ್ಲ್ಯಾ ದರ್ಜೆಚ್ಯಾ ಸಾಹಿತ್ಯ್ ನಿರ್ಮಾಣಾಂತ್
ಕಥಾಪಾಠಾಚೊ ವಾವ್ರ್ ಖೂಪ್ ಮಜತ್‌ದಾರ್ ಜಾತಲೊ ಮ್ಹಣಾಲಿ.
ದುಸ್ರ್ಯೆ ಸತ್ರೆಂತ್ ಚ್ಯಾರ್ ರಾಜ್ಯಾಂತ್ಲ್ಯಾ
ಮೊಟ್ವ್ಯಾ ಕಥೆಂಚೆರ್ ಚ್ಯಾರ್ ಪ್ರಬಂಧಾಂ ಮಾಂಡನ್ ಜಾಲಿಂ;
ಗೊಂಯ್ಚೆ ಕಥಾಕಾರ್ ಆನಿ ಕಥಾಚೆರ್ ದೊ|ರೇಶ್ಮ ಅನಿಲ್
ಖೋಲ್ಕಾರ್ ಹಿಣೆಂ ಪ್ರಭಂಧ್ ಮಾಂಡ್ಲೊ
ಕರ್ನಾಟಕಾಚೆ
ಕಥಾಕಾರ್ ಆನಿ ಕಥಾಚೆರ್ ಬಾಯ್ ಲವಿ ಗಂಜಿಮಠ್ ಹಿಣೆಂ
ಪ್ರಭಂಧ್ ಮಾಂಡ್ಲೊ
ಮಹಾರಾಶ್ಟ್ರಾಚೆ ಕಥಾಕಾರ್ ಆನಿ
ಕಥಾಚೆರ್ ಬಾಬ್ ಹಿಲರಿ ಡಿಸಿಲ್ವಾನ್ ಪ್ರಭಂಧ್ ಮಾಂಡ್ಲೊ
ಕೇರಳಾಚೆ ಕಥಾಕಾರ್ ಆನಿ ಕಥಾಚೆರ್ ಬಾಯ್ ನಮೃತಾ ಪಿ ಕಿಣಿ
ಹಿಣೆಂ ಪ್ರಭಂಧ್ ಮಾಂಡ್ಲೊ
ದೆ|ಫ್ರೆಡ್ರಿಕ್ ಕ್ವಾಡ್ರಸ್ ಸ್ಮಾರಕ್ ಆಶಾವಾದಿ
ಪ್ರಕಾಶನಾಚೆ ಡಿಜಿಟಲ್ ಮಾಧ್ಯಮಾಚ್ಯಾ ವಾವ್ರಾಚೆ 2022
ವರ್ಸಾಚೆ ಪುರಸ್ಕಾರ್ ಜಿಕ್ಪ್ಯಾಂಚಿಂ ನಾಂವಾಂ ಬಾಯ್
ಮೊನಿಕಾ ಡೆ’ಸಾ ಮಥಾಯಸ್ ಹಿಣೆಂ ಉಚಾರ್ಲಿಂ;
ಪಯ್ಲೆಂ ಸ್ಥಾನ್: ಬಾಯ್ ಯೋಗಿತಾ
ವೆರ್ಣೇಕರಾನ್ ವೆಬಿನಾರ್ 6 ಚೆರ್ ಸಾದರ್ ಕೆಲ್ಲ್ಯಾ
ಪ್ರಭಂಧಾಕ್ (ವಲ್ಲಿ ಕ್ವಾಡ್ರಸ್ ಆನಿ ಎಚ್ಚೆಮ್ ಹಾಂಚ್ಯಾ
ಕಥೆಂಚೆರ್ ಕೆಲ್ಲೆಂ ಅಭ್ಯಾಸ್)
ದುಸ್ರೆಂ
ಸ್ಥಾನ್: ಬಾಯ್ ಕೃಪಾಲಿ ನಾಯ್ಕ್ ಹಿಣೆಂ
ವೆಬಿನಾರ್ 3 ಚೆರ್ ಸಾದರ್ ಕೆಲ್ಲ್ಯಾ ಪ್ರಭಂಧಾಕ್
(ಪುಂಡ್ಲೀಕ್ ನಾಯ್ಕ್ ಆನಿ ಎನ್. ಶಿವ್‌ದಾಸಾಚ್ಯಾ
ಕಥೆಂಚೆರ್ ಕೆಲ್ಲೆಂ ಅಭ್ಯಾಸ್)
ತಿಸ್ರೆಂ
ಸ್ಥಾನ್: ಮಾ|ಬಾ|ಜೇಸನ್ ಪಿಂಟೊನ್ ವೆಬಿನಾರ್ 7
ಚೆರ್ ಸಾದರ್ ಕೆಲ್ಲ್ಯಾ ಪ್ರಭಂಧಾಕ್ (ಜಯಂತಿ ನಾಯ್ಕ್ ಆನಿ
ವಸಂತ್ ಸಾವಂತಾಚ್ಯಾ ಕಥೆಂಚೆರ್ ಕೆಲ್ಲೆಂ ಅಭ್ಯಾಸ್)
ಬಾಬ್ ಮೆಲ್ವಿನ್ ರೊಡ್ರಿಗಸಾನ್ ಬಾಯ್ ಕ್ಯಾಥರೀನ್
ರೊಡ್ರಿಗಸಾಚಿ ಆನಿ ತಿಚ್ಯಾ ಸವಿಸ್ತಾರ್ ಸಾಹಿತ್ಯಿಕ್
ವಾವ್ರಾಚಿ ಓಳೊಕ್ ಕರುನ್ ತಿಚ್ಯಾ 50 ಕಥೆಂಚ್ಯಾ
ಪುಸ್ತಕಾಚೆರ್ ಉಲವ್ನ್ ’ಕ್ಯಾಥರೀನ್
ರೊಡ್ರಿಗಸಾಚ್ಯೊ ಮೊಟ್ವ್ಯೊ ಕಥಾ’ ಪುಸ್ತಕಾಚೆಂ
ಡಿಜಿಟಲ್ ವಿಮೋಚನ್ ಕೆಲೆಂ.
ಬಾಯ್ ಡೊ|ಜಯಂತಿ ನಾಯ್ಕಾನ್ ಬಾಬ್ ವಲ್ಲಿ
ಕ್ವಾಡ್ರಸಾಚ್ಯಾ 25 ಕಥೆಂಚ್ಯಾ ಪುಸ್ತಕಾಂಕ್ (ಸಾಂಕವ್;
ಕನ್ನಡ್ ಆನಿ ನಾಗರಿ ಲಿಪಿಯೆಂತ್) ಡಿಜಿಟಲ್ ವಿಮೋಚನ್
ಕರುನ್ ಕೊಂಕಣಿ ಕಥಾ ಸಾಹಿತ್ಯಾಂತ್ ಬಾಬ್ ವಲ್ಲಿನ್
ಯೆದೊಳ್‌ಚ್ ಅಪ್ಲೆಂ ಸ್ಥಾನ್ ಘೆತ್ಲಾಂ ಆನಿ ಹ್ಯಾ ದಿಶೆನ್
ತಾಚ್ಯೊ ಸಭಾರ್ ಕಥಾ ಉತ್ಕೃಶ್ಟ್ ಕೊಂಕಣಿ ಕಥೆಂನಿ ಮೆಜುಂಕ್
ಜಾತಾ ಮ್ಹಣುನ್ ಹೊ ಸಾಂಕವ್ ಫಕತ್ ದೋನ್ ಪ್ರದೇಶಾಂಚೊ
ಮಾತ್ರ್ ನ್ಹಯ್ ದೋನ್ ವಿಚಾರಾಂಚೊ, ದೋನ್ ತತ್ವಾಂಚೊ, ದೋನ್
ಸಿದ್ಧಾಂತಾಚೊ ಮ್ಹಣಾಲಿ.
ಬಾಬ್ ವಸಂತ್ ಸಾವಂತ್ ಹಾಣಿಂ ವಲ್ಲಿ ಕ್ವಾಡ್ರಸಾನ್
ಲಿಪಿಯಂತರ್ ಆನಿ ಸಂಪಾದನ್ ಕೆಲೆಲ್ಯಾ ರಾಶ್ಟ್ರೀಯ್
ಪಾಂವ್ಡಾಚ್ಯಾ ತಿಸ್ರ್ಯಾ ಸಂಕಲನಾಚೆರ್ (ಸುರ‍್ಯೊ
ಉದೆಲಾ) ಪುಸ್ತಕಾಚಿ ಒಳೊಕ್ ಕರುನ್ ಹ್ಯಾ
ಪುಸ್ತಕಾಚೆಂ ಡಿಜಿಟಲ್ ವಿಮೋಚನ್ ಕೆಲೆಂ.
ತ್ಯೇ ಉಪ್ರಾಂತ್ ಹಾಜರ್ ಆಸ್‌ಲ್ಲ್ಯಾ ದೊ|ಆಸ್ಟಿನ್
ಪ್ರಭುನ್ ಹ್ಯಾ ವೆಬಿನಾರಾ ಥಾವ್ನ್ ಖರೆಂಚ್ ಖೂಪ್ ಶಿಕುಂಕ್
ಆವ್ಕಾಸ್ ಮೆಳ್ಳೊ ಆನಿ ತ್ಯಾ ದಿಶೆನ್ ವಾವೆ ಕೆಲ್ಲ್ಯಾ
ಆಶಾವಾದಿ ಪ್ರಕಾಶನಾಕ್ ಆನಿ ಉಜ್ವಾಡ್ ಪಂದ್ರಾಳ್ಯಾಕ್
ಧಿನ್ವಾಸ್ಲೆಂ.
ಬಾಬ್ ಉಬ್ಬ ಮೂಡ್‌ಬಿದ್ರಿನ್ ಕೊಂಕಣಿ ಬರಯ್ಣಾರಾಂನಿ
ಪಯ್ಲೆಂ ಆಧ್ಲ್ಯಾ ಕಥಾಕಾರಾಂಚೆಂ ಸಾಹಿತ್ಯ್ ವಾಚುಂಕ್ ಜಾಯ್
ಮ್ಹಣಾಲೊ.
ಮಾ|ಬಾ|ರೋಯ್ಸನ್ ಫೆರ್ನಾಂಡಿಸಾನ್
ಧಿನ್ವಾಸ್ ಪಾಠಯ್ಲೆಂ.
ಹೆಂ ಕಥಾವಿಹಾನ್ ವೆಬಿನಾರ್
ಬಾಯ್ ದಕ್ಶಿತಾ ಸಲ್ಗಾಂವ್ಕಾರ್ ಆನಿ ಬಾಬ್ ಶೈಲೇಂದ್ರ
ಮೆಹ್ತಾ ಹಾಣಿಂ ಚಲವ್ನ್ ವ್ಹೆಲೆಂ.
ಖಬರ್: ಆಮ್ಚೊ ಭಾತ್ಮಿ
|
