|
ಕಥಾಪಾಠ್ (ರಾಶ್ಟ್ರೀಯ್
ಡಿಜಿಟಲ್ ಕಾಮಾಸಾಳ್) ಶಿಂಕಳ್ - 6) ಉಗ್ತಾವಣ್.
26 ಜುಲಾಯ್ 2025: ಆಶಾವಾದಿ ಪ್ರಕಾಶನಾನ್ ವರ್ಸಾನ್ ವರಸ್
ಚಲಂವ್ಚೆಂ ರಾಶ್ಟ್ರೀಯ್ ಮಟ್ಟಾಚೆಂ ಸಾಹಿತಿಕ್ ಕಾಮಾಸಾಳ್
ಕಥಾಪಾಠಾಚಿ ಸವಿ ಶಿಂಕಳೆಚೆಂ ಉಗ್ತಾವಣ್ ಜುಲಾಯ್ 26
ತಾರಿಕೆರ್ ಸನ್ವಾರಾ ಸಾಂಜೆಚ್ಯಾ 4:10ಥಾವ್ನ್ 5:45
ಮ್ಹಣಾಸರ್ ಡಿಜಿಟಲ್ ಮಾಧ್ಯಮಾಚೆರ್ ಚಲ್ಲೆಂ. ಸಾಂ| ಲುವಿಸ್
ಯುನಿವರ್ಸಿಟಿ ಮಂಗ್ಳುರ್ ಹಾಂಚೆ ಕುಲಪತಿ ಮಾ| ದೊ|
ಪ್ರವೀಣ್ ಮಾರ್ಟಿಸಾನ್ ಡಿಜಿಟಲ್ ಉಗ್ತಾವಣ್ ಕರುನ್
"ಕೊಂಕಣಿ ಸಾಹಿತಿಕ್ ಅಧ್ಯಯನ್ ಖರೆಂಚ್ ಜಾವ್ನ್ ಆಯ್ಚಾ
ಕಾಳಾರ್ ಭೋವ್ ಗರ್ಜೆಚೊ ವಿಶಯ್, ಆನಿ ಹ್ಯಾ ಅಧ್ಯಯನಾಂತ್
ರಾಶ್ಟ್ರೀಯ್ ಪಾಂವ್ಡಾರ್ ವೆಗ್-ವೆಗಳ್ಯಾ ಕೊಲೆಜಿಂನಿ
ಶಿಕ್ಚಿಂ ವಿಧ್ಯಾರ್ಥಿಂನಿ ವಾಂಟೊ ಘೆಂವ್ಚೊ, ಆನಿ ತ್ಯಾ
ಪಾಸತ್ ಹೊ ಆವ್ಕಾಸ್ ಫಾವೊ ಕರುನ್ ದಿಂವ್ಚ್ಯಾ ಆಶಾವಾದಿ
ಪ್ರಕಾಶನಾಕ್ ತಶೆಂಚ್ ಭಾಗಿದಾರ್ ಸರ್ವ್ ಕೊಲೆಜಿಂಚ್ಯಾ
ಕೊಂಕಣಿ ಮುಖೆಸ್ತಾಂಕ್ ಉಲ್ಲಾಸ್" ಮ್ಹಣಾಲೊ.
ದೇವಿತಾ ಖುಲೆನ್ ಕಥಾಪಾಠಾಚ್ಯಾ ಸುರ್ವಾತೆರ್ ಜುಲಾಯ್ 21
ತಾರಿಕೆರ್ ಅಂತರ್ಲೆಲ್ಯಾ ಬಾಯ್ ಗ್ಲೇಡಿಸ್ ರೇಗೊಚ್ಯಾ
ಅತ್ಮ್ಯಾಕ್ ಶಾಂತಿ ಮಾಗ್ಚ್ಯಾ ಇರಾದ್ಯಾಇರಾದ್ಯಾನ್ ಏಕ್
ಮಿನುಟ್ ಮಾವ್ನ್ ಪ್ರಾರ್ಥನ್ ಕೆಲೆಂ. ಉಪ್ರಾಂತ್ ಯೆವ್ಕಾರ್
ಕರುನ್ ಸರ್ವ್ ಮಾನ್ ಸಯ್ರ್ಯಾಂಚಿ ಮೊಟ್ವಿ ಒಳೊಕ್ ಕರುನ್
ದಿತಚ್ ಬಾಬ್ ಶೈಲೇಂದ್ರ ಮೆಹ್ತಾನ್ ಪಯ್ಣಾರಿ 2025
ವರ್ಸಾಚೊ ಕಥಾಕಾರ್ ಮಾ| ಚೇತನ್ ಲೋಬೊಚಿ, ತಾಂಚ್ಯಾ
ಪರ್ಗಟ್ಲೆಲ್ಯಾ ಪುಸ್ತಕಾಂಚಿ, ತಾಂಚ್ಯಾ ಸಾಹಿತಿಕ್
ದೇಣ್ಗೆಚಿ ಝಳಕ್ ದಿಲಿ. ಗೊಂಯ್ಚಿ ನಾಮ್ನೆಚಿ ಕೊಂಕಣಿ
ಸಂಶೋಧಕಿ, ಪ್ರಾಧ್ಯಾಪಕಿ ಬಾಯ್ ದೊ|ಕಿರಣ್ ಬುಡ್ಕುಲೆನ್
ಮುಖೆಲ್ ಉಲವ್ಪ್ ಕರುನ್ ಕೊಂಕಣಿ ಕಥೆಂಚೆರ್ ವಿಶಯ್, ಆಶಯ್
ತಶೆಂಚ್ ಹೆರ್ ತಾಂತ್ರಿಕ್ ವಿಶ್ಯಾಂಚೆರ್ ಜಾಗತಿಕ್
ಸ್ಥರಾಚೆರ್ ಕಥಾ ಖಂಚ್ಯಾ ಪಾಂವ್ಡಾರ್ ಆಸಾತ್ ಆನಿ
ಕೊಂಕಣಿಂತ್ಲ್ಯೊ ಕಥಾ ಮುಕಾರ್ ಪಾವೊಂಕ್ ಅಸಲಿಂಚ್
ಕಾಮಾಸಾಳಾಂ, ಎಕಾಮೆಕಾ ಹಾತ್ ಧರುನ್, ಎಕಾ ಮನಾನ್, ಮೊಗಾನ್
ಆನಿ ಗೌರವಾನ್ ಹೆಂ ಮಿಸಾಂವ್ ಮುಕಾರುನ್ ವ್ಹರ್ಚಿ ಗರ್ಜ್
ಆಸಾ ಮ್ಹಣಾಲಿ. ತಿಚ್ಯಾ ಉಲವ್ಪಾಂತ್ ಓ ಹೆನ್ರಿ ತಶೆಂಚ್
ಹೆರ್ ಥೊಡ್ಯಾ ಕಥೆಂಚೊ ಮೊಟ್ವೊ ವಿವರ್ ದಿವುನ್,
ಕೊಂಕಣಿಂತ್ ಸಯ್ತ್ ಅಸಲೆ ಅಪುರ್ಭಾಯೆಚೆ ಕಥಾಕಾರ್ ಆಸ್ಚಿ
ಮಾಹೆತ್ ದಿವುನ್ ಬಾಬ್ ಎಡ್ವಿನ್ ಜೆ.ಎಫ್. ಡಿ’ಸೋಜಾಚಿ
ಮೊಟ್ವಿ ಕಥಾ ’ದಿರ್ವೆಂ’, ಬಾಬ್
ಗಜಾನನ್ ಜೋಗಾಚಿ ಮೊಟ್ವಿ ಕಥಾ, ತಶೆಂಚ್ ಹೆರ್ ಥೊಡ್ಯಾ
ವೆಗ್-ವೆಗ್ಳ್ಯಾ ವಿಶಯ್-ಕಥಾನಕ್ಚೆರ್ ಆಯಿಲ್ಲ್ಯಾ
ಕಥೆಂಚೆರ್ ತಿಣೆಂ ಅಪುರ್ಭಾಯೆಚೆಂ ಉಲವ್ಪ್ ಕರುನ್, ಹ್ಯಾ
ಕಥಾಪಾಠ್ ಉಪಕ್ರಮಾಚ್ಯಾ ಸರ್ವ್ ಆಯೋಜಕಾಂಕ್ ಧಿನ್ವಾಸ್ಲೆಂ.
ಮುಖೆಲ್ ಸಯ್ರೊ ಜಾವ್ನಾಸ್ಲೊ ವಿಶ್ವ್ ಕೊಂಕಣಿ
ಕೇಂದ್ರ್ ಮಂಗ್ಳುರ್ಚೊ ಸಂಚಾಲಕ್ ಬಾಬ್ ನಂದಗೋಪಾಲ್ ಶೆಣಯ್
ಹಾಣೆಂ ಅಪ್ಲ್ಯಾ ಉಲವ್ಪಾಂತ್ ಕೊಂಕಣಿ ಸಾಹಿತ್ಯಾಚೆಂ
ಅಧ್ಯಯನ್ ಖರೆಂಚ್ ಜಾವ್ನ್ ಮುಕ್ಲ್ಯಾ ದಿಸಾಂನಿ ಬರೆ
ಸಾಹಿತಿ ನಿರ್ಮಿತ್ ಕರ್ಚ್ಯಾ ದಿಶೆನ್ ಉಪ್ಕಾರಾಕ್
ಪಡ್ತೆಲೆಂ ಮ್ಹಣಾಲೊ.
ಮಾ| ಚೇತನ್ ಲೋಬೊನ್ ಅಪ್ಲ್ಯಾ ಸಂಧೇಶಾಂತ್ ಮ್ಹಳೆಂ;
"ಆಯ್ಚ್ಯಾ ಪರಿಗತೆಂತ್ ಕೊಂಕಣಿಂತ್ ಆಸ್ಚ್ಯಾ
ಕಥಾಕಾರಾಂಪಯ್ಕಿಂಕ್ ಪ್ರಾಯ್ವಂತ್ ವಾ ಉತರ್ ಪ್ರಾಯ್ವಂತ್
ಕಥಾಕಾರ್ ಚಡ್ ಆಸಾತ್ ಆನಿ ತರ್ನೆಂ/ಯುವ ಕಥಾಕಾರ್ ಉಣೆಂ.
ಹ್ಯಾ ದಿಶೆನ್ ವಾವ್ರ್ ಕರ್ಚಿ ಗರ್ಜ್ ಆಸಾ, ಕಥಾಕಾಠ್
ಕಾಮಾಸಾಳ್ ಪಾಟ್ಲ್ಯಾ ಕಾಂಯ್ ತೆಂಪಾಥಾವ್ನ್ ಅಸಲ್ಯಾ
ಚಿಂತ್ಪಾಕ್ ಪಾಟಿಂಬೊ ದಿವುನ್ ಆಸಾ ಆನಿ ಹಾಚಿ ಫಾಯ್ದೊ
ಯುವಜಣಾಂನಿ ಜೊಡ್ಚಿ ಗರ್ಜ್ ಆಸಾ".
ಗೊಂಯ್ ಕೊಂಕಣಿ ಅಕಾಡೆಮಿಚೊ ಅಧ್ಯಕ್ಷ್ ದೊ| ಪೂರ್ಣಾನಂದಾ
ಚ್ಯಾರಿನ್ ಅಪ್ಲ್ಯಾ ಉಲವ್ಪಾಂತ್ ಮ್ಹಳೆಂ; "ಕಥಾಪಾಠ್ ಏಕ್
ಬರೆಂ ಉಪಕ್ರಮ್, ಹ್ಯಾ ಕಥಾಪಾಠ್ ವೆಬಿನಾರಾಂನಿ ಪ್ರಪತ್ರಾಂ
ಸಾದರ್ ಜಾತಾತ್, ಬರಿ ಗಜಾಲ್. ಪುಣ್ ಏಕ್ ಕಥಾ ವಾಚನ್
ಜಾವ್ನ್ ತ್ಯಾ ಕಥೆಚೆರ್ ಕೆಲ್ಲೆಂ ಅಧ್ಯಯನ್ ಪತ್ರ್ ಸಾದರ್
ಜಾಲೆಂ ತರ್, ಆಸಕ್ತ್ ಆಸ್ಚ್ಯಾ ವಿಧ್ಯಾರ್ಥಿಂಕ್ ಏಕ್ ಕಥಾ
ಕಶಿ ಬರವ್ಯೆತ್ ಮ್ಹಳ್ಳೆಂ ಮಾರ್ಗದರ್ಶನ್ ಮೆಳುಂಕ್ ಸಾಧ್ಯ್
ಆಸಾ".
ದಲ್ಗಾದೊ ಕೊಂಕಣಿ ಅಕಾಡೆಮಿಚೊ ಅಧ್ಯಕ್ಷ್ ಬಾಬ್ ಸೆಲ್ಸೊ
ಫೆರ್ನಾಂಡಿಸಾನ್ ಅಪ್ಲ್ಯಾ ಉಲವ್ಪಾಂತ್ "ಕೊಂಕಣಿ ಭಾಸ್
ಲೊಕಾಂನಿ ಸಾಂಬಾಳುಂಕ್ ಕೊಂಕಣಿ ಸಾಹಿತ್ಯ್ ಉಪ್ಕಾರ್ತಾ,
ದೆಕುನ್ ಕೊಂಕಣಿ ಸಾಹಿತ್ಯಾಚ್ಯಾ ಉದರ್ಗತೆಕ್ ಲಾಗುನ್
ವಾವ್ರ್ ಕರ್ಪಾಚಿ ಗರ್ಜ್ ಆಸಾ" ಮ್ಹಣಾಲೊ.
ಇ-ಉಜ್ವಾಡ್ ನೇಮಾಳ್ಯಾಚೊ ಸಂಪಾದಕ್ ಬಾಬ್ ಲುವಿಸ್
ರೊಡ್ರಿಗಸಾನ್ ಅಪ್ಲ್ಯಾ ಉಲವ್ಪಾಂತ್ "ಕೊಂಕಣಿ
ಸಾಹಿತ್ಯಾಚೆಂ ಅಧ್ಯಯನ್ ಅಶೆಂಚ್ ಉಂಚ್ಲ್ಯಾ ಪಾಂವ್ಡಾಕ್
ಪಾವೊಂದಿ" ಮ್ಹಣಾಲೊ.
ಧೆಂಪೆ ಕೊಲೆಜಿಚ್ಯಾ
ಕೊಂಕಣಿ ವಿಭಾಗಾಚಿ ಮುಖೆಸ್ತ್ ಬಾಯ್ ಅಂಜು ಸಾಖರ್ದಾಂಡೆನ್
ಅಪ್ಲ್ಯಾ ಸಂಧೇಶಾಂತ್ "ಕಥಾಪಾಠ್ ಕಾಮಾಸಾಳಾ ಮುಖಾಂತ್ರ್
ಆಮ್ಕಾಂ ಗೊಂಯಾಂತ್ ಅಧ್ಯಯನ್ ಕರ್ಪಿ ವಿಧ್ಯಾರ್ಥಿಂಕ್
ಕನ್ನಡ್ ಲಿಪಿಂತ್ ಆಸ್ಚ್ಯಾ ಅಪುರ್ಭಾಯೆಚ್ಯಾ ಕಥಾಕಾರಾಂಚೊ
ತಶೆಂಚ್ ತಾಂಚ್ಯಾ ಕಥೆಂಚಿ ಒಳೊಕ್ ಮೆಳ್ಳಿ. ದೆಕುನ್ ಹೊ
ಸಾಂಕವ್ ಫುಡೆಂ ವಚೊಂಕ್ ಫಾವೊ ಆನಿ ಕೊಂಕಣಿ ಸಾಹಿತ್ಯಾಚಿ
ಗಿರೆಸ್ತ್ಕಾಯ್ ಪಯ್ಲೆಂ ಆಮ್ಕಾಂಚ್ ಸಮ್ಜೊಂಕ್ ಪಾವೊಂದಿ"
ಮ್ಹಣಾಲಿ.
ಆಶಾವಾದಿ ಪ್ರಕಾಶನಾಚ್ಯಾ ವಲ್ಲಿ ಕ್ವಾಡ್ರಸಾನ್ ಕಥಾಪಾಠಾಚೊ
ಪೋಷಕ್ ಮಾನೆಸ್ತ್ ಮಾಯ್ಕಲ್ ಡಿಸೋಜಾಕ್, ತಶೆಂಚ್ ಸಮೇಸ್ತ್
ಮಾನ್ ಸಯ್ರ್ಯಾಂಕ್, ಜೋಡ್-ಆಯೋಜಕಾಂಕ್, ಪ್ರಪತ್ರಾಂ ಸಾದರ್
ಕರ್ಪಿಂಕ್, ಸೂತ್ರ್ ಸಂಚಾಲಕಾಂಕ್ ತಶೆಂಚ್ ವಾಂಟೆಲಿ
ಜಾಂವ್ಚಾ ಸಮೇಸ್ತ್ ವಿಧ್ಯಾರ್ಥಿಂಕ್, ಬರವ್ಪ್ಯಾಂಕ್,
ವಿಮರ್ಶಕಾಂಕ್ ಧಿನ್ವಾಸ್ ಪಾಠಯ್ಲೆ.
=====
ಪಯ್ಣಾರಿ 2025 ವರ್ಸಾಚೊ ಕಥಾಕಾರ್ ಪುರಸ್ಕಾರ್
ಜೊಡ್ಪಿ ಮಾ| ಚೇತನ್ ಲೋಬೊಚ್ಯಾ ಮೊಟ್ವ್ಯಾ ಕಥೆಂಚ್ಯಾ
ವೆಗ್-ವೆಗಳ್ಯಾ ವಿಶ್ಯಾಂಚೆರ್ ಪಾಂಚ್ ಪ್ರಪತ್ರಾಂ ಹ್ಯಾ
ಕಥಾಪಾಠ್ ಶಿಂಕಳೆಂನಿ ಚಲ್ಚ್ಯಾ ವೆಬಿನಾರಾಂನಿ ಸಾದರ್
ಜಾತಲಿಂ (ಶನ್ವಾರಾಂ 4:15 ಥಾವ್ನ್ 6:00 ಪರ್ಯಾಂತ್).
02 ಅಗೋಸ್ತ್ (ಸನ್ವಾರಾ): ಪ್ರಪತ್ರ್-1:
ಮಾ|ಚೇತನ್ ಲೋಬೊಚ್ಯಾ ಕಥೆಂತ್ಲಿ ವಯ್ಚಾರಿಕತಾ
(ಬಾಯ್ ಮೇಗನ್ ಡೆ ಸೋಜ್, ಗೊಂಯ್)
09 ಅಗೋಸ್ತ್ (ಸನ್ವಾರಾ): ಪ್ರಪತ್ರ್-2:
ಮಾ|ಚೇತನ್ ಲೋಬೊಚ್ಯಾ ಕಥೆಂತ್ಲಿ ಸಿದ್ಧಾಂತಿಕತಾ
(ಮಾ| ರೋಮನ್ ರೊಡ್ರಿಗಸ್, ಗೊಂಯ್)
16 ಅಗೋಸ್ತ್ (ಸನ್ವಾರಾ): ಪ್ರಪತ್ರ್-3:
ಮಾ|ಚೇತನ್ ಲೋಬೊಚ್ಯಾ ಕಥೆಂತ್ಲಿ ಸಮಾಜಿಕತಾ
(ಬಾಯ್ ದೇವಿತಾ ಖುಲೆ, ಗೊಂಯ್)
23 ಅಗೋಸ್ತ್ (ಸನ್ವಾರಾ): ಪ್ರಪತ್ರ್-4:
ಮಾ|ಚೇತನ್ ಲೋಬೊಚ್ಯಾ ಕಥೆಂತ್ಲಿ ಆಧ್ಯಾತ್ಮಿಕತಾ
(ಮಾ| ಜೇಸನ್ ಪಿಂಟೊ, ಮಂಗ್ಳುರ್)
|
