[ಖಬರ್] ಸಿರಿವಂತಾಚ್ಯಾ ಸಾಹಿತ್ಯಾಚೆರ್ ರಾಶ್ಟ್ರೀಯ್ ಮಟ್ಟಾಚೆಂ ಅಧ್ಯಯನ್

ಆಶಾವಾದಿ ಪ್ರಕಾಶನ್ ಆನಿ ಧೆಂಪೆ ಕೊಲೆಜ್ ಗೊಂಯ್ ಹಾಣಿಂ ಮಾಂಡುನ್ ಹಾಡ್ಲೆಲ್ಲಿ ರಾಶ್ಟ್ರೀಯ್ ಮಟ್ಟಾಚ್ಯಾ ವೆಬಿನಾರಾಂಚಿ ಕಥಾಪಾಠ್ ಚೊವ್ತಿ ಶಿಂಕಳ್ ಜುಲಾಯ್ ಮಯ್ನ್ಯಾಚ್ಯಾ ಶನಿವಾರ್ ಸಾಂಜೆರ್ ಸಾಡೆ ಚ್ಯಾರ್ ಥಾವ್ನ್ ಸ ವೊರಾಂ ಪರ್ಯಾಂತ್ ಚಲ್ಲಿ. ಕಾರ್ಮೆಲ್ ಕೊಲೆಜ್, ಶ್ರೀ ಮಲ್ಲಿಕಾರ್ಜುನ ಕೊಲೆಜ್, ಫಾ|ಆಗ್ನೆಲ್ ಕೊಲೆಜ್ ಪಿಲಾರ್ ತಶೆಂಚ್ ಸೈಂಟ್ ರೋಸರೀ ಕೊಲೆಜ್ ಹಾಂಚ್ಯಾ ಸಹಭಾಗಿತ್ವಾಂತ್ ಜುಲಾಯ್ 1 ತಾರಿಕೆರ್ ಧೆಂಪೆ ಕೊಲೆಜಿಚ್ಯಾ ಪ್ರಿನ್ಸಿಪಾಲಾನ್ ಡೊ|ವೃಂದಾ ಬೋರ್ಕರಾನ್ ಉಗ್ತಾವಣ್ ಕೆಲ್ಲ್ಯಾ ಹ್ಯಾ ವೆಬಿನಾರಾಂತ್ ದಾಯ್ಜಿವರ್ಲ್ಡ್ ಹಫ್ತ್ಯಾಳ್ಯಾಚ್ಯಾ ಸಂಪಾದಕ್ ಮಾನೆಸ್ತ್ ಹೇಮಾಚಾರ್ಯ, ಜೆರಾಲ್ಡ್ ವಿ. ಕಾರ್ಲೊ ಹಾಸನ್, ಕಾಣಿಕ್ ನೇಮಾಳ್ಯಾಚೊ ಆಧ್ಲೊ ಸಂಪಾದಕ್ ಜಾವ್ನಾಸ್ಲ್ಯಾ ಅವಿಲ್ ರಾಸ್ಕಿನ್ಹಾನ್, ವೀಜ್ ಇ-ಪತ್ರಾಚ್ಯಾ ಸಂಪಾದಕ್ ಡೊ|ಆಸ್ಟಿನ್ ಪ್ರಭುನ್ ತಶೆಂಚ್ ಸಿರಿವಂತಾಚಿ ಧುವ್ ಕ್ಯಾರಲ್ ವೇಗಸಾನ್ ಆನಿ ಸಿರಿವಂತಾಚೊ ಖಾಸ್ ಮಿತ್ರ್ ಜಾವ್ನಾಸ್ಲ್ಯಾ ಮಾ|ಪ್ರತಾಪ್ ನಾಯ್ಕ್ ಹಾಣಿಂ ಸಿರಿವಂತಾಚಿ ಸವಿಸ್ತಾರ್ ಒಳೊಕ್ ಕರುನ್ ದಿಲಿ.

ಜುಲಾಯ್ 8 ತಾರಿಕೆರ್ ಸಿರಿವಂತಾಚ್ಯಾ 52 ಮೊಟ್ವ್ಯಾ ಕಥೆಂಚೆರ್ ತಶೆಂಚ್ ಸಾಳಕ್ ಪ್ರಕಾಶನಾಚ್ಯಾ 88 ಪುಸ್ತಕಾಂಚಿ ಸವಿಸ್ತಾರ್ ಒಳೊಕ್ ತಶೆಂಚ್ ಸಿರಿವಂತಾಚ್ಯಾ ಮೊಟ್ವ್ಯಾ ಕಥೆಂಚೆರ್ ಖೊಲಾಯೆನ್ ಕೆಲ್ಲೆಂ ಕೆಲ್ಲೆಂ ಅಧ್ಯಯನ್ ವಲ್ಲಿ ಕ್ವಾಡ್ರಸಾನ್ ಸಾದಾರ್ ಕೆಲೆಂ.

ಧೆಂಪೆ ಕೊಲೆಜಿಚ್ಯಾ ಪ್ರಾಧ್ಯಾಪಕ್ ಬಾಯ್ ವಿಧಿತಾ ಶೇಟಾನ್ ಸೂತ್ರ್‌ಸಂಚಾಲನ್ ಚಲಯಿಲ್ಲೆಂ ವೆಬಿನಾರ್ ಜುಲಾಯ್ 15 ತಾರಿಕೆರ್ ಸಿರಿವಂತಾಚ್ಯಾ ಮೊಟ್ವ್ಯಾ ಕಾಣಿಯಾಂನಿ ಅಸ್ತುರಿಚೊ ಪಾತ್ರ್ ವಿಶ್ಯಾಚೆರ್ ಖೊಲಾಯೆನ್ ಅಧ್ಯಯನ್ ಕೆಲ್ಲೊ ಪ್ರಭಂಧ್ ಫೆಲ್ಸಿ ಲೋಬೊ ದೆರೆಬೈಲ್ ಹಿಣೆಂ ಸಾದರ್ ಕೆಲೊ.

ಧೆಂಪೆ ಕೊಲೆಜಿಚ್ಯಾ ಪ್ರಾಧ್ಯಾಪಕ್ ಬಾಯ್ ವಿಧಿತಾ ಶೇಟಾನ್ ಸೂತ್ರ್‌ಸಂಚಾಲನ್ ಚಲಯಿಲ್ಲೆಂ ವೆಬಿನಾರ್ ಜುಲಾಯ್ 22 ತಾರಿಕೆರ್ ಸಿರಿವಂತಾಚ್ಯಾ ’ಜೆರಿ ಲುವಿಸ್’ ಲಿಖ್ಣೆನಾಂವಾಖಾಲ್ ರಾಕ್ಣೊ ಪತ್ರಾಂತ್ ಚಲಯಿಲ್ಲ್ಯಾ ’ಜಿವಿತಾಂತ್ಲೊ ತಮಾಸೊ’ ಅಂಕಣಾಂತ್ಲ್ಯಾ ಹಾಸ್ಯ್ ಬರ್ಪಾಂಚೆರ್ ಫ್ಲಾವಿಯಾ ಆಲ್ಬುಕರ್ಕ್ ಹಿಣೆಂ ಪ್ರಭಂಧ್ ಸಾದರ್ ಕೆಲೊ.

ಜುಲಾಯ್ 29 ತಾರಿಕೆರ್ ಧೆಂಪೆ ಕೊಲೆಜಿಚ್ಯಾ ಪ್ರಿನ್ಸಿಪಾಲ್ ಪ್ರೊ|ವೃಂದಾ ಬೋರ್ಕರಾಚ್ಯಾ ಅಧ್ಯಕ್ಷ್‌ಪಣಾಖಾಲ್ ಚಲ್‌ಲ್ಲ್ಯಾ ನಿಮಾಣ್ಯಾ ವೆಬಿನಾರಾಂತ್ ’ಸಾಳಕಾಚ್ಯಾ ಸಿರಿವಂತಾಚ್ಯೊ ಕಥಾ’ ನಾಗರಿ ಲಿಪಿಯೆಚ್ಯಾ ಇ-ಪುಸ್ತಕಾಚೆಂ ವಿಮೋಚನ್ ಡೊ|ಚಂದ್ರಲೇಖ ಡಿಸೋಜ್ ಹಿಣೆಂ ಕರುನ್ ವೆಗ್-ವೆಗಳ್ಯಾ ಲಿಪಿಂನಿ ಆಸ್ಚ್ಯಾ ಅಮೊಲಿಕ್ ಕೊಂಕಣಿ ಸಾಹಿತ್ಯಾಕ್ ಲಿಪಿಯಂತರ್ ಕರುನ್ ಆಶಾವಾದಿ ಪ್ರಕಾಶನಾನ್ ಕೊಂಕಣಿಕ್ ಖೂಪ್ ಯೋಗ್‌ದಾನ್ ದಿಲಾಂ, ತಶೆಂಚ್ ಕಥಾಪಾಠ್ ಮ್ಹಳ್ಳ್ಯಾ ಅಧ್ಯಯನ್ ಮಾಧ್ಯಮಾಂತ್ ಕೊಂಕಣಿ ಸಾಹಿತ್ಯಾಚೆಂ ಅಧ್ಯಯನ್ ಕರುಂಕ್ ಏಕ್ ಬರಿಚ್ ವೇದಿ ತಯಾರ್ ಕೆಲ್ಯಾ ಮ್ಹಣಾಲಿ. ’ಸಾಳಕಾಚ್ಯಾ ಸಿರಿವಂತಾಚ್ಯೊ ಕಥಾ’ ಕನ್ನಡ ಲಿಪಿಯೆಚ್ಯಾ ಇ-ಪುಸ್ತಕಾಚೆಂ ವಿಮೋಚನ್ ಮಾ|ಬಾ|ರಿಚಾರ್ಡ್ ರೇಗೊನ್ ಕರುನ್, ಅಪ್ಣಾಕ್ ಸಿರಿವಂತಾಸವೆಂ ಆಸ್ಲೆಲ್ಯಾ ಭಾಂದಾವಿಶಿಂ ಉಲವ್ನ್, ಕೊಂಕಣಿ ಸಾಹಿತ್ಯಾಕ್ ಶೈಕ್ಷಣಿಕ್ ಪಾಂವ್ಡಾರ್ ವರುನ್ ತಾಚೊ ಪೋಸ್ ಕರ್ಚ್ಯಾ ಆಶಾವಾದಿ ಪ್ರಕಾಶನಾಚಿ ಥೊಕ್ಣಾಯ್ ಕೆಲಿ.

ಡೊ|ಆಸ್ಟಿನ್ ಪ್ರಭುನ್ ದೆ|ಫ್ರೆಡ್ರಿಕ್ ಕ್ವಾಡ್ರಸ್ ಸ್ಮಾರಕ್ ಆಶಾವಾದಿ ಪ್ರಕಾಶನಾಚ್ಯಾ ಡಿಜಿಟಲ್ ಪುರಸ್ಕಾರ್ 2023 ಜಿಕ್ಪ್ಯಾಂಚಿಂ ನಾಂವಾಂ ಪರ್ಗಟ್ ಕೆಲಿಂ; ಫೆಲ್ಸಿ ಲೋಬೊ ದೆರೆಬೈಲ್ ಹಿಕಾ ಪಯ್ಲೆಂ ಇನಾಮ್ ತಶೆಂಚ್ ಫ್ಲಾವಿಯಾ ಆಲ್ಬುಕರ್ಕ್ ಹಿಕಾ ದುಸ್ರೆಂ ಇನಾಮ್ ಫಾವೊ ಜಾಲೆಂ.

ಹೆಚ್ ಸಂಧರ್ಭಾಚೆರ್ ಹೇಮಾಚಾರ್ಯ ಆನಿ ಸಹಭಾಗಿತ್ವ್ ಜೊಡ್ಪಿ ಕೊಲೆಜಿಚ್ಯಾ ಮುಖೆಸ್ತಾಂನಿ ಅಪ್ಲೆ ಸಂಧೇಶ್ ದಿಲೆ. ಮಾ|ದೊ|ವಿಲ್ಲಿ ಡಿಸಿಲ್ವಾನ್ ಸಿರಿವಂತಾವಿಶಿಂ ಉಲವ್ನ್ ಸಭಾರ್ ಗಜಾಲಿ (ಜ್ಯೊ ಚಡ್ತಾವಾಂಕ್ ಯೆದೊಳ್ ಕಳಿತ್ ನಾತ್‌ಲ್ಲ್ಯೊ) ವಾಂಟುನ್ ಘೆತ್ಲ್ಯೊ. ಧೆಂಪೆ ಕೊಲೆಜಿಂತ್ ಭಾರತೀಯ್ ಭಾಸೊ ವಿಭಾಗಾಚಿ ಮುಖೆಸ್ತ್ ಬಾಯ್ ಅಂಜು ಸಾಖರ್‌ದಾಂಡೆನ್ ಸಯ್ರ್ಯಾಂಚಿ ಒಳೊಕ್ ಕರುನ್ ದಿಲಿ. ವಲ್ಲಿ ಕ್ವಾಡ್ರಸಾನ್ ಧಿನ್ವಾಸ್ ಪಾಟಯ್ಲೆ. ದೀಪಾ ರಾಯ್ಕರ್ ಆನಿ ಗೌರಂಗ್ ಭಾಂದ್ಯೆನ್ ಹ್ಯಾ ವೆಬಿನಾರಾಚೆಂ ಸೂತ್ರ್ ಸಂಚಾಲನ್ ಕೆಲೆಂ.

ಸಿರಿವಂತಾಚ್ಯಾ ಸಾಹಿತ್ಯಾಚೆರ್ ಅಧ್ಯಯನಾಚೆಂ ಕಥಾಪಾಠ್ ಶಿಂಕಳಿಚೆಂ ಉಗ್ತಾವಣ್

[खबर] सिरिवंताच्या साहित्याचेर राश्ट्रीय मट्टाचें अध्ययन

 

Ashawadi Prakshan ani Dhempe College Gõy hannim manddun haddlel'li raxttri-i mott'ttachea webinaranchi KATHAPATT chouti xinkoll July moineachea xonivar sanjer sadde chear thaun so voram poreant chol'li. Karmel kolez, xri mol'likarzuno kolez, fa|agnel kolez pilar toxench sointt rosori kolez hanchea sohobhagitvant July 1 tariker dhempe Collegichea prinsipalan ddo|Vrinda Borkaran ugtaunn kel'lea hea webinarant DAIJIWORLD hoftealleachea sompadok manest Hemacharya, Gerald V Carlo Hassan, Kannik nemalleacho adhlo sompadok zaunaslea Avil Rasquinha, Veez i-potrachea sompadok do|Austin DSouza Prabhun toxench Sirivontachi dhuv Carrol Veigas ani Sirivontacho khas mitr zaunaslea ma|Pratap Naik hannim Sirivontachi sovistar ollok korun dili.

July 8 tariker Sirivontachea 52 mottvea kothencher toxench Sallok Prokaxonachea 88 pustokanchi sovistar ollok toxench Sirivontachea mottvea kothencher kholayen kel'lem kel'lem odhyoin Valley Quadrosan sadar kelem.

Dhempe Collegichea pradheapok bai Vidhita Shettan sutr‌sonchalon choloyil'lem webinar July 15 tariker Sirivontachea mottvea kanniamni osturicho patr vixeacher kholayen odhyoin kel'lo probhondh Felcy Lobo Derebail hinnem sador kelo.

Dhempe Collegichea pradheapok bai Vidhita Shettan sutr‌sonchalon choloyil'lem webinar July 22 tariker Sirivontachea ’Jerry Lewis’ likhnnenamvakhal raknno potrant choloyil'lea ’Jivitantlo Tomaso’ onkonnantlea hasy borpancher bai Flavia Albuquerque hinnem probhondh sador kelo.

July 29 tariker dhempe Collegichea prinsipal Pro|Vrinda Borkarachea odhyokx‌ponnakhal chol‌l'lea nimannea webinarant ’Sallokachea Sirivontacheo Kotha’ nagori lipiechea i-pustokachem vimochon ddo|chondrolekho ddisoz hinnem korun veg-vegollea lipimni aschea omolik konkonni sahiteak lipiyontor korun Ashawadi Prakashanan konkonnik khup yog‌dan dilam, toxench kothapatth mholl'llea odhyoin madhyomant konkonni sahiteachem odhyoin korunk ek borich vedi toyar kelea mhonnali. ’Sallokachea Sirivontacheo Kotha’ kannad lipiechea i-pustokachem vimochon ma|ba|Richard Regon korun, opnnak Sirivontasovem aslelea bhandavixim uloun, konkonni sahiteak xoikxonnik pamvddar vorun tacho pos korchea Ashawadi Prakashanachi thoknnai keli.

Do|Ausstin Prabhun de|Fredrick Quadros smarok Ashawadi Prakashanachea digital puroskar 2023 jikpeanchim namvam porgott kelim; Felcy Lobo Derebail hika poilem inam' toxench Flavia Albuquerque hika dusrem inam' favo zalem.

Hech sondhorbhacher Hemacharya ani sohobhagitv zoddpi Collegichea mukhestamni ople sondhex dile. Ma|do|Willy D'Silvan Sirivontavixim uloun sobhar gozali (jeo choddtavank yedoll kollit nat‌l'leo) vanttun ghetleo. Dhempe Collegint bharoti-i bhaso vibhagachi mukhest bai Anju Sakhardanden soireanchi ollok korun dili. Valley Quadrosan dhinvas pattoile. Deepa Raikar ani Gaurang Bhandyen hea webinarachem sutr sonchalon kelem.

Sirivontachea Sahiteacher Odhyoinachem Kothapatth Xinkollichem Ugtaunn