ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] ಘಾಟಿ (- ಸಂಗೀತಾ ನಾಯ್ಕ್)

’ಮ್ಹಜ್ಯಾ ಗಾಂವಾಂತ್ ಸ ಆಮಿ, ತಾಂತೂನ್ ಚ್ಯಾರ್ ಕವಿ. ಬಾಕಿಚೆ ಮೊನೆ’ - ಆಯ್ಲೆವಾರ್ ವಾಚ್‌ಲ್ಲಿ ಏಕ್ ವಳ್ ಯಾದಿಂತ್ ಯೆತಾ. ಕವಿತಾ ಮ್ಹಳ್ಯಾರ್ ಕಿತೆಂ? ಕವಿ ಮ್ಹಳ್ಯಾರ್ ಕೊಣ್? ಕವಿತಾ ಮ್ಹಳ್ಯಾರ್ ಉತ್ರಾಂಚಿ ರಾಸ್ ಕರುನ್ ಜಶೆಂ ಮಾಪಳ್ಯಾಂಚೆಂ ಸುಣೆಂ ತೊಪಿ ದವರ್ಲೆಲ್ಯಾ ಪಾಟಲ್ಯಾನ್ ಗೆಲ್ಲೆಪರಿಂ ವೆಚೊ ಕವಿ ಕಾಯ್? ಕವಿತಾ ಮ್ಹಳ್ಯಾರ್ ಏಕ್ ಜವಾಭ್ದಾರಿ ಮ್ಹಣುನ್ ಹಾಂವ್ ತರ್‌ಯೀ ಪಾತ್ಯೆವ್ನ್ ಆಯ್ಲಾಂ ದೆಕುನ್ ಹ್ಯಾ ಸಂಘರ್ಶಾಚ್ಯಾ ದಿಸಾಂನಿ ಸಯ್ತ್ ಅಪ್ಲ್ಯಾ ಜಿಣ್ಯೆಚೆ ಸಂಘರ್ಶ್, ಕಶ್ಟ್ - ಅಕಾಂತ್ ಕಾಳ್ಜಾಂತ್ ದವರುನ್, ಸಮಾಜಿಕ್ ಅನೀತೆವಿರೋದ್ ಕಾಳ್ಜಾಂತ್ ಉಟ್ಚೊ ಆಜಾಜ್ ಉಮಾಳ್ಯಾಂಚ್ಯಾ ತಿಂತಾನ್ ಕವಿತೆಚ್ಯಾ ಎಕೆಕಾ ಉತ್ರಾಂನಿ ಭರ್ಚಿ ಕಲಾ ಜಣಾಸ್ಚೆ ಕವಿ ಆಯ್ಚ್ಯಾ ಸಮಾಜೆಂತ್ ಕಿತ್ಲೆ? ದೆಕುನ್ ಮ್ಹಾಕಾ ಅಶೆಂ ಭಗ್ತಾ ಮ್ಹಜ್ಯಾ ಗಾಂವಾಂತ್ ಜೆ ಮೊನೆ ಆಸಾತ್, ತೆಚ್ ಕವಿ ಶಿವಾಯ್ ಉಡ್ಕಾಣಾ ಮಾರ್ಚೆ ಚ್ಯಾರ್ ನ್ಹಯ್.

ಮಾಯ್ 1 ತಾರಿಕ್ ಜಾಗತಿಕ್ ಕಾಮೆಲ್ಯಾಂಚೊ ದೀಸ್. ಕಾಮೆಲಿ ಮ್ಹಳ್ಯಾರ್ ದುಡು ಆಸ್ಲ್ಯಾಂನಿ ಮೊಲಾಯಿಲ್ಲಿ ಖೆಳಂವ್ಚಿ ಬಾವ್ಲಿ ನ್ಹಯ್. ದುಡು ಆಸಾ ದೆಕುನ್ ಮನ್ಶಾಪಣ್ ಕೊಣೆಂಚ್ ಮೊಲಾಕ್ ಘೆಂವ್ಕ್ ಜಾಯ್ನಾ. ಸಮಾಜೆಂತ್ ವೆವೆಗಳ್ಯಾ ನಿಬಾಂನಿ ಉಭೆಂ/ಆಡ್ ಚಿರುನ್ ಅಪ್ಲಿ ದಾಳ್ ಶಿಜಯ್ತೆಲೆ ಭರುನ್ ಗೆಲ್ಲ್ಯಾ ಸಂಧರ್ಭಾರ್ ಹೆಂ ಚಿಂತಪ್ ಸಲೀಸಾಯೆಚೆಂ ನ್ಹಯ್. ಜಶೆಂ ಆವಾಜಾಕ್‌ಚ್ ಸಂಗೀತ್ ಮ್ಹಣ್ ಮಾಂಧ್ತೆಲೆ ಚಡ್ ಮ್ಹಣುನ್ ಆವಾಜ್ ಸಂಗೀತ್ ಜಾಯ್ನಾ. ಹ್ಯಾ ಆಡ್-ಉಭೆಂ ಚಿರ್ತೆಲೆ ಎಕಾಮೆಕಾವಿಶಿಂ ವೀಕ್ ವಾಂಟುನ್ ಸಮಾಜೆಂತ್ ಎಕಾಮೆಕಾಚೊ ಮಾನ್ ಕಾಡುನ್ ಅಪ್ಲಿ ವ್ಹಡ್‌ಪಣ್ ಗಾಜಯ್ತಾತ್. ಆನಿ ಹೆರಾಂಕ್ ’ಘಾಟಿ’ ಮ್ಹಣತಾತ್. ಗಲ್ಫಾಂತ್ ಆಮ್ಚ್ಯಾ ದೇಶಾಚ್ಯಾ ಲೊಕಾಚಿಂ ಕರ್ಮಾಂ ಪಳೆವ್ನ್ ಬಾಕಿಚೊ ಲೋಕ್ ಆಮ್ಕಾಂ ’ಘಾಟಿ’ ಮ್ಹಣ್ತಾ. ಆಮ್ಚ್ಯಾ ದೇಶಾಂತ್ ಸಯ್ತ್ ಆಮಿ ಹೆರಾಂಕ್ ಆನಿ ಹೆರಾಂ ಆಮ್ಕಾಂ ’ಘಾಟಿ’ ಮ್ಹಣುನ್ ಹಲ್ಕ್ ಕರ್ಚಿ ರಿವಾಜ್ ಭೋವ್ ಪರ್ನಿ ಪುಣ್ ಅಜೂನ್ ಪ್ರಸ್ತುತ್ ಆಸ್ಚಿ. ಹ್ಯಾ ಕವಿತೆಂತ್ ಸಯ್ತ್ ತೊ ಅಕ್ಮಾನ್, ತಿ ನಿಂದಾ, ತಿ ಲಜ್, ಆನಿ ಚಡ್ ಕರುನ್ ಮನ್ಶಾಪಣಾಚೆರ್ ಚಲ್ಚ್ಯಾ ಅನೀತೆಚ್ಯಾ ವಿರೋದ್ ಉಟ್‌ಲ್ಲೊ ಆವಾಜ್ ಕವಿತೆಚ್ಯಾ ಎಕೆಕಾ ವಳಿಚೆರ್ ಅಪುರ್ಭಾಯೆನ್ ಅಪ್ಲ್ಯಾ ಕಾಳಜಾಚೆಂ ರುದಾನ್ ಗಾಯಿತ್ ವೆತಾನಾ ಖರೆಂಚ್ ಕವಿತಾ ಮ್ಹಳ್ಯಾರ್ ಕಿತೆಂ ಆನಿ ಕವಿ ಮ್ಹಳ್ಯಾರ್ ಕೊಣ್ ಮ್ಹಳ್ಳ್ಯಾ ಸವಾಲಾಚಿ ಜವಾಬ್ ಮೆಳತಾ.

- ಸಂ

[ಕವಿತಾ] ಘಾಟಿ (- ಸಂಗೀತಾ ನಾಯ್ಕ್)

ಘಾಟಿ ತುಜ್ಯಾ ಘರಾಕಡೆನ್ ಉದ್ಕಾಚೆ ವ್ಹರ್ಪಾಕ್ ಪಾಯ್ಪ್ ... ಫೊಣ್ಡ್ ಮಾರೂನ್ ಮಾರೂನ್ ಆಂಗ್ ಝರ್ಲಿ ಮ್ಹಾಜ್ಯಾ ಪಾಯಾಚಿ ವಾಟಿ ಹಯ್ ಹಾಂವ್ ಘಾಟಿ .... ಸಪ್ನಾತ್ಲ್ಯಾ ಘರಾಚ್ಯೊ ತುಜ್ಯಾ ಉಬ್ಯೊ ಕರೂಂಕ್ ವಣ್ಟಿ ಮಾಥೆ ಕಡ್ಡಯತ್ ಪೂತ್ ಮ್ಹಜೊ ವ್ಹಾವಯ್ತಾ ಹಿ ಯೆದಿ ಪಾಟಿಂ ... ಹಯ್ ಹಾಂವ್ ಘಾಟಿ ... ಆಯ್ದನ್ ಪಾಣಿ ತುಜ್ಯಾ ಘರ್ಚೆ ಜಾವಂಚೆ ದಿಸ್ತಾದಿಸ್ತ್ .... ಮ್ಹೂಣ್ ಭುಕೆಕಂಗಾಲ್ ಬಾಯ್ಲ್ ಮ್ಹಜಿ ಝರ್ ಝರ್ ಝರ್ತಾ ವ್ಹಟಿ -ಪೊಟಿಂ ಹಯ್ ಹಾಂವ್ ಘಾಟಿ ... ತುಜ್ಯಾ ಭುರ್ಗ್ಯಾಂಚ್ಯಾ ಹಾತಾಂತ್ ಪೆನ್ಸೀಲ್ ಆನಿ ಪಾಟಿ ತುಜೊ ಕೊಯ್ರ್ ಭಂಗಾರ್ ಮಾತ್ ಮ್ಹಜ್ಯಾ ಪೊರಾಂಚ್ಯಾ ಫಾಟಿಂ ಹಯ್ರೆ ಬಾಬಾ ಹಯ್ ಹಾಂವ್ ಘಾಟಿ ಎಕ್ದೀಸ್ ಮ್ಹಜ್ಯಾ ಜೊತ್ಯಾಂನ್ ಘಾಲ್ಗಾ ಮಾತ್ಶೆ ಪಾಯ್... ಭೊಗ್ ಘಾಟಿ .. ಘಾಟಿ ಹಿಣಯ್ತಕೀಚ್ ಕಾಳ್ಜಾಕ್ ಜಾಲ್ಲೆ ಭಳ್ಭಳಪಿ ಘಾಯ್ ತರಿಕಯ್ ದಿಸ್ಲೆ ತುಕಾ ಮ್ಹಣ್ಚೆ ತೆಂಚ್ ಉತರ್ ಜಾಲ್ಯಾರ್ ಹಾಂವ್ ಹೊಲ್ಮತಲೊ ಮನೀಸ್ ನ್ಹಿ ತು ಫಾತರ್ ಮಾಗೀರ್ ಮ್ಹಣ್ತಂ ರಾವಂ ಜಾಯ್ತೀತಲೊ ಘಾಟಿ ... ಘಾಟಿ ... ಘಾಟಿ ವಳುನ್ ಹಾಂವ್ ಪರತ್ ಪಳೊವ್ಚೊನಾ ರೆ ಫಾಟಿ ವಳುನ್ ಹಾಂವ್ ಪರತ್, ಪಳೊವ್ಚೊನಾ ರೆ ಫಾಟಿ **** - ಸಂಗೀತಾ ನಾಯ್ಕ್**. [ಎಪ್ರಿಲ್, 2020]

	ಸಂಗೀತಾ ನಾಯ್ಕ್: ಡಿಜಿಟಲ್ ಗೋವಾಚಿ ಎಕ್ಸೆಕ್ಯುಟಿವ್ ಸಂಪಾದಕ್ ಜಾವ್ನ್ ವಾವ್ರ್ ಕರುನ್ ಆಸ್ಚಿ ಬಾಯ್ ಸಂಗೀತಾ ನಾಯ್ಕಾಕ್ ಪ್ರತಿಶ್ಟಿತ್ ಎಮ್.ಬಿಲಿಯನ್ತ್ ಪುರಸ್ಕಾರ್ ಸೌತ್ ಏಶಿಯಾ 2018 ಲಾಭ್ಲಾ. ಗೊಂಯ್ ಕೊಂಕಣಿ ಅಕಾಡೆಮಿಂತ್ ಸಯ್ತ್ ವಾವ್ರ್ ಕೆಲ್ಲ್ಯಾ ಹಿಣೆಂ ಪತ್ರಿಕೋಧ್ಯಮ್, ಸಾಹಿತ್ಯ್, ಶಿಕ್ಷಣ್ ಅಶೆಂ ವೆವೆಗ್ಳ್ಯಾ ಶೆತಾಂತ್ ಖೂಬ್ ವಾವ್ರ್ ಕೆಲಾ. ಕೊಂಕಣಿ ಸಾಹಿತ್ಯಾಂತ್ ಸಯ್ತ್ ತಿಚಿ ದೇಣ್ಗಿ ಆಸಾ.
[kovita] Ghatti* (- Sangeeta Naik)*
’mhojea gamvant so ami, tantun chear kovi. Bakiche mone’ - ailevar vach‌l'li ek voll yadint yeta. Kovita mhollear kitem? kovi mhollear konn? kovita mhollear utranchi ras korun zoxem mapolleanchem sunnem topi dourlelea pattolean gel'leporim vecho kovi kai? kovita mhollear ek zovabhdari mhonnun hamv tor‌yi patyeun ailam dekun hea songhorxachea disamni soit oplea jinnyeche songhorx, koxtt - okant kallzant dourun, somajik onitevirod kallzant uttcho azaz umalleanchea tintan kovitechea ekeka utramni bhorchi kola zonnasche kovi aichea somajent kitle? dekun mhaka oxem bhogta mhojea gamvant je mone asat, tech kovi xivai uddkanna marche chear nhoi. Mai 1 tarik zagotik kameleancho dis. Kameli mhollear duddu asleamni molayil'li khellomvchi bauli nhoi. Duddu asa dekun monxaponn konnench molak gheunko zaina. Somajent vevegollea nibamni ubhem/add chirun opli dall xizoitele bhorun gel'lea sondhorbhar hem chintop solisayechem nhoi. Zoxem avazak‌ch songit mhonn mandhtele chodd mhonnun avaz songit zaina. Hea add-ubhem chirtele ekamekavixim vik vanttun somajent ekamekacho man kaddun opli vhodd‌ponn gazoitat. Ani herank ’ghatti’ mhonnotat. Golfant amchea dexachea lokachim kormam polleun bakicho lok amkam ’ghatti’ mhonnta. Amchea dexant soit ami herank ani heram amkam ’ghatti’ mhonnun holk korchi rivaz bhovo porni punn ozun prostut aschi. Hea kovitent soit to okman, ti ninda, ti loz, ani chodd korun monxaponnacher cholchea onitechea virod utt‌l'lo avaz kovitechea ekeka vollicher opurbhayen oplea kallozachem rudan gayit vetana khorench kovita mhollear kitem ani kovi mhollear konn mholl'llea sovalachi zovab mellota. - Som
[kovita] Ghatti* (- Sangeeta Naik)*
Ghatti tujea ghorakodden udkache vhorpak paip ... Fonndd marun marunh ang zhorli mhajea payachi vatti hoi hamv ghatti .... Sopnatlea ghoracheo tujea ubeo korunk vonntti mathe kodd'ddoit put mhozo vhauyta hi yedi pattim ... Hoi hamv ghatti ... Aidon panni tujea ghorche zaunche distadist .... Mhunn bhukekongal bail mhoji zhor zhor zhorta vhotti -pottim hoi hamv ghatti ... Tujea bhurgeanchea hatant pensil ani patti tuzo koir bhongar mat mhojea poranchea fattim hoire baba hoi hamv ghatti ekdis mhojea zoteamn ghalga matxe pai... Bhog ghatti .. Ghatti hinnoitokich kallzak zal'le bhollbhollopi ghai torikoi disle tuka mhonnche tench utor zalear hamv holmotolo monis nhi tu fator magir mhonntom raum zaititolo ghatti ... Ghatti ... Ghatti vollun hamv porot pollouchona re fatti vollun hamv porot, pollouchona re fatti **** - Songita Naik.** [Apr, 2020]

	Songita Naik: Ddijittol govachi eksekyuttiv sompadok zaun vaur korun aschi bai songita naikak protixttit em'.Biliyont puroskar sout exia 2018 labhla. Gõy konkonni okaddemint soit vaur kel'lea hinnem potrikodhyom', sahity, xikxonn oxem vevegllea xetant khub vaur kela. Konkonni sahiteant soit tichi denngi asa.
[कविता] घाटी (- संगीता नाईक)
’म्हज्या गांवांत स आमी, तांतून च्यार कवी. बाकिचे मोने’ - आयलेवार वाच‌ल्ली एक वळ यादिंत येता. कविता म्हळ्यार कितें? कवी म्हळ्यार कोण? कविता म्हळ्यार उत्रांची रास करून जशें मापळ्यांचें सुणें तोपी दवरलेल्या पाटल्यान गेल्लेपरीं वेचो कवी काय? कविता म्हळ्यार एक जवाभदारी म्हणून हांव तर‌यी पात्येवन आयलां देकून ह्या संघर्शाच्या दिसांनी सयत अपल्या जिण्येचे संघर्श, कश्ट - अकांत काळजांत दवरून, समाजीक अनीतेविरोद काळजांत उटचो आजाज उमाळ्यांच्या तिंतान कवितेच्या एकेका उत्रांनी भर्ची कला जणासचे कवी आयच्या समाजेंत कितले? देकून म्हाका अशें भग्ता म्हज्या गांवांत जे मोने आसात, तेच कवी शिवाय उडकाणा मार्चे च्यार न्हय. माय १ तारीक जागतीक कामेल्यांचो दीस. कामेली म्हळ्यार दुडू आसल्यांनी मोलायिल्ली खेळंवची बावली न्हय. दुडू आसा देकून मनशापण कोणेंच मोलाक घेवंक जायना. समाजेंत वेवेगळ्या निबांनी उभें/आड चिरून अपली दाळ शिजयतेले भरून गेल्ल्या संधर्भार हें चिंतप सलीसायेचें न्हय. जशें आवाजाक‌च संगीत म्हण मांधतेले चड म्हणून आवाज संगीत जायना. ह्या आड-उभें चिर्तेले एकामेकाविशीं वीक वांटून समाजेंत एकामेकाचो मान काडून अपली व्हड‌पण गाजयतात. आनी हेरांक ’घाटी’ म्हणतात. गलफांत आमच्या देशाच्या लोकाचीं कर्मां पळेवन बाकिचो लोक आमकां ’घाटी’ म्हणता. आमच्या देशांत सयत आमी हेरांक आनी हेरां आमकां ’घाटी’ म्हणून हल्क कर्ची रिवाज भोव पर्नी पूण अजून प्रसतूत आसची. ह्या कवितेंत सयत तो अक्मान, ती निंदा, ती लज, आनी चड करून मनशापणाचेर चल्च्या अनीतेच्या विरोद ऊट‌ल्लो आवाज कवितेच्या एकेका वळिचेर अपुर्भायेन अपल्या काळजाचें रुदान गायीत वेताना खरेंच कविता म्हळ्यार कितें आनी कवी म्हळ्यार कोण म्हळ्ळ्या सवालाची जवाब मेळता. - सं
[कविता] घाटी (- संगीता नाईक)
घाटी तुज्या घराकडेन उदकाचे व्हरपाक पायप ... फोण्ड मारून मारून आंग झरली म्हाज्या पायाची वाटी हय हांव घाटी .... सपनातल्या घराच्यो तुज्या उब्यो करूंक वण्टी माथे कड्डयत पूत म्हजो व्हावयता ही येदी पाटीं ... हय हांव घाटी ... आयदन पाणी तुज्या घरचे जावंचे दिस्तादिस्त .... म्हूण भुकेकंगाल बायल म्हजी झर झर झरता व्हटी -पोटीं हय हांव घाटी ... तुज्या भुरग्यांच्या हातांत पेन्सील आनी पाटी तुजो कोयर भंगार मात म्हज्या पोरांच्या फाटीं हयरे बाबा हय हांव घाटी एकदीस म्हज्या जोत्यांन घालगा मात्शे पाय... भोग घाटी .. घाटी हिणयतकीच काळजाक जाल्ले भळभळपी घाय तरिकय दिसले तुका म्हणचे तेंच उतर जाल्यार हांव होलमतलो मनीस न्ही तु फातर मागीर म्हणतं रावं जायतीतलो घाटी ... घाटी ... घाटी वळुन हांव परत पळोवचोना रे फाटी वळुन हांव परत, पळोवचोना रे फाटी *** - संगीता नाईक.** [एपरील, २०२०]

	संगीता नाईक: डिजिटल गोवाची एक्सेक्युटीव संपादक जावन वावर करून आसची बाय संगीता नायकाक प्रतिश्टीत एम.बिलियनत पुरसकार सौत एशिया २०१८ लाभला. गोंय कोंकणी अकाडेमिंत सयत वावर केल्ल्या हिणें पत्रिकोध्यम, साहित्य, शिक्षण अशें वेवेगळ्या शेतांत खूब वावर केला. कोंकणी साहित्यांत सयत तिची देणगी आसा.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.